Daizeze bedʼea jaradia wãita noviembrede Daizeze Nokʼo ʉ̃rʉ jarakaita

Jesuba «bedʼea bia Daizeze Nokʼo ʉ̃rʉ» jaradiasi akʉza ẽbẽrarã maʉ̃ ʉ̃rʉ wididamarẽã jaradiasi (Lu 4:43; Mt 6:9, 10). Noviembrede zarea odayi Daizeze Nokʼo ʉ̃rʉ jarakadaita (Mt 24:14). ¿Kʼãrẽa ewari jʉrʉ ẽ dayirãra maʉ̃ ewaride Daizeze bedʼea jaradia wãita? Maʉ̃ jedekode yi nãã edebarirabara oseabʉ 30 mawũã ẽ bʉrʉ 50 ora.

Maʉ̃ ewaridera, Daizeze bedʼeara jaradiara testo Daizeze Nokʼo ʉ̃rʉ bedʼeabʉdeba. Bʉa badu testo jidabʉrʉde krĩchara ẽbẽrarãba kʼãrẽta ĩjãbʉta bʉchumae. Bʉ nãã bedʼea jʉ̃drʉbʉrʉde ẽbẽra abaʉba ũrĩkĩrãbʉbʉrʉ Daizeze Bedʼeata, diara karta Jarakabʉ numero 2, 2020de (jõmaʉ̃itabʉra). Ewari bio berabarirãra maʉ̃ ẽbẽra jẽda akʉ wãita mawũã Daizeze Bedʼea kʼawuabita nekʼãrẽ jaradiabaridebemaneba. Arakʼaita ba Daizeze Nokʼoba nokʼora naʉ̃ Drʉadebema jõma makenaita (Da 2:44; 1Co 15:24, 25). Maʉ̃ kʼarea zarea odadrʉ Jeowaʉ̃me kʼẽrẽpa bʼaita akʉza iyi Nokʼoare bʼaita.