ARTIKULO KʼAWUAITA 24
Mia abaʉba Jeowade kĩrãkʼara kĩrãdua ẽã
«Jeowa bʉra kʼãrẽ ẽbẽra bia akʉza kĩrãduabʉ dai kayiruara akʉza bʉ kãga jõkara bʉa yi kʼareba widi bʉa jõmaʉ̃ʼa diabʉ» (SAL. 86:5).
TRÃBI 42 La oración del siervo de Dios
KʼÃRẼTA ŨDUDAITAa
1. ¿Kʼãrẽ wãrĩnuta jarasi nokʼo Salomónbara Eclesiastés 7:20de?
NOKʼO Salomónba jarasi: «Mia kʼai ẽbẽrata neẽ naʉ̃ drʉadera nekayirua okara» (Ecl. 7:20). Naʉ̃ra wãrĩnu, ẽbẽra jõmaʉ̃ta nemitia obari (1 Juan 1:8). Mawũẽra dayirã jõmaʉ̃ba nesidapanʉ Daizezeba kĩrãduamarẽã dayi mitiata akʉza wuabemarabida.
2. ¿Sãwũã sentipanʉ dayi neũdukʼawuaba kĩrãduara daya nemitia odata?
2 Edaʉde dayirãbara kĩrʉbibʉ dayi neũdukʼawuata, daya nemitiata osi baera. Mamina dayi neũdukʼawua adua ẽ baita, daya iyaʼa jarabʉ kĩrãduamarẽã daya nemitia odata, iya kĩrãduara dayi nemitia odata dayirã, ¿sãwũã sentibʉ? Mejãchade sobia sentidayi.
3. ¿Kʼãrẽ ʉ̃rʉ bedʼeai naʉ̃ artikulodera?
3 Jõmaʉ̃ba kãgapanʉ Jeowara dayi neũdukʼawua bamarẽã, mamina edaʉde opanʉ akʉza jarapanʉ iya kãga ẽãta. Naʉ̃ artikulode panʉnañi bedʼea ũbea. Nããra, ¿sãwũã kʼawuapanʉ wãrĩnu Jeowabara kĩrãduakĩrãbʉta dayi nemitia obʉra? Yi ũmeta, ¿kʼãrẽa Jeowaba dayi nemitia kĩrãduabʉra ẽbẽraba kĩrãduabʉ kĩrãkʼa bʉ ẽ? Yi ũbeata, ¿Jeowabara kʼaira nemitiata kĩrãduabʉ?
JEOWABARA KĨRÃDUAKĨRÃBɄ DAYA NEMITIA ODARA
4. ¿Kʼãrẽa kʼawuapanʉ dayirãbara, Jeowabara wãrĩnu kĩrãduaita dayirã nemitiara?
4 Daizeze Bedʼeabara ũdubibʉ Jeowabara kĩrãduakĩrãbʉta dayirãba nemitia odara. Bari jaraita, ewari aba angel abaʉba katuma Sinaíne, Moisésʼa jarasi Jeowa sãwũãbʉta: «Jeowa, Jeowa, Daizeze so zʉbʉria akʉbʉ akʉza nebia obʉ, kĩrʉmia ẽ akʉza kãga jõka mejãcha erbʉ akʉza wãrĩnuara, kãga jõkata ẽbẽrarã mejãchaʉʼa ũdubibʉ, kĩrãduabʉ aña opanʉta akʉza nekayirua opanʉta» (Éx. 34:6, 7). Mawũẽra ẽbẽra abaʉba nemitia odata soiduba jẽda krĩchabʉbʉrʉ, Jeowabara kãgade akʉza soiduba wãrĩnu kĩrãduayi (Neh. 9:17; Sal. 86:15).
Jeowabara biʼia kʼawuabʉ dayirãra kʼãrẽ omata. (Akʉra parrapo 5).
5. Salmo 103:13, 14de jarabʉdera, ¿Jeowaba dayirã biʼia ũdukʼawuabʉ baera naʉ̃ba kʼãrẽta obibʉ?
5 Dayirã jõmaʉ̃ta Jeowaba parãsi baera iyara biʼia ũdukʼawuabʉ. Jeowabara biʼia ũdukʼawuabʉ ẽbẽra aba abaka naʉ̃ drʉadebʉra (Sal. 139:15-17). Jeowabara kʼawuabʉ daya edaʉde nemitia obʉta, dayi yibarita nemitia omiabasi baera akʉza Jeowabara akʉbʉ dayi wiña yiruedaʉba sãwũã waribʉrʉta. Maʉ̃ kʼarea iya kʼawuabʉ dayi yi zroma bachubidade nemitia obʉbʉrʉ, wiña yirueda sãwũã berabaridadeba mawũã obʉta. Jeowaba mawũã dayirãta biʼia ũdukʼawuabʉ baera, ¿naʉ̃ba kʼãrẽta obibʉ? Naʉ̃ba kʼarebabʉ Jeowaba dayirãta so zʉbʉria akʉmarẽã (Sal. 78:39; akʉra Salmo 103:13, 14).
6. ¿Sãwũã ũdubi zebʉrʉ Jeowabara dayirã nemitia kĩrãduakĩrãbʉta?
6 Jeowabara ũdubi zebʉrʉ, dayirãba nemitia obʉra iya wãrĩnu kĩrãduakĩrãbʉta. Jeowabara biʼia kʼawuabʉ Adán kʼarea dayirãra beibʉta akʉza nemitia opanʉta (Rom. 5:12). Adewara kʼawuabʉ dayirãkʉzara ẽdrʉbeda ẽãta akʉza wuabemara ẽbẽrasida kʼarebabeda ẽãta (Sal. 49:7-9). Maʉ̃ kʼarea, dayirãta so zʉbʉria akʉ kʼãrãpe yi warrata dia bʉesi, Juan 3:16ba jarabʉ kĩrãkʼa, dayirãta kʼãbãẽã kãgabʉ baera diabʉesi yi warrata dayirãbari bei marẽã (Mat. 20:28; Rom. 5:19). Mawũẽra Jesura beisi yi ẽbẽra iyi ĩjãbʉ ũdubibʉrʉ ẽdrʉbita (Heb. 2:9). Jeowaba yi Warra beabaramʉta ũdusidera, iyira mejãcha sopʉa sentisi akʉza Jesura beisi dayirã kayiruadeba ẽdrʉbita. Jeowaba iduaribisibʉrʉ iyi Warrata beimarẽã, naʉ̃ba ũdubibibʉ dayirãba nemitia obʉra wãrĩnu kĩrãduakĩrãbʉta.
7. Jara ũrĩbira, ¿kʼairaba nemitia odata kĩrãduasita Jeowabara?
7 Daizeze Bedʼeadera eda jarabʉ ẽbẽrarã arigʉ kayirua oda ʉ̃rʉ, mawũãsidu Jeowabara kĩrãduasita ãya nemitia odara (Efes. 4:32). Kĩrãbedadrʉ Manasésba odata. Iyira jipa ẽbẽra kayiruabasi, daizeze zeri ẽã yiwidʼi jʉ̃drʉsi adewara yi wũãwũãrasida tʉbʉde babʉesi maʉ̃ daizeze zeri ẽã diaita akʉza Manasésbara Daizeze templode eda bʉesi nekʼãrẽ oma daizeze zeri ẽãdebemata. Daizeze Bedʼeabara iyi ʉ̃rʉ jarabʉ: «Iya mejãcha osi nekayiruata Jeowa nãã, iyi kĩrʉbita» (2 Crón. 33:2-7). Mamina Manasésba iya nemitia odata soiduba jẽda krĩchasidera, Jeowaba kĩrãduasi iya odara adewara iyira jẽda nokʼo babisi (2 Crón. 33:12, 13). Akʉza kĩrãbedaya nokʼo David ʉ̃rʉ, iya nemitiata osi, ãĩbasi awuru yuwẽrãʉ̃me akʉza mia beasi. Mamina iya odata soiduba jẽda krĩchasi baera, Jeowaba kĩrãduasi iya odara (2 Sam. 12:9, 10, 13, 14). Mawũẽra, dayirãbara wãrĩnu ĩjãnaibara Jeowabara kĩrãduakĩrãbʉta dayirãba nemitia obʉra. Atia kʼawuadayi, Jeowaba dayirã nemitia kĩrãduabʉrʉdera dayi ẽbẽraba kĩrãduabʉ kĩrãkʼa oẽãta.
JEOWADE KĨRÃKʼARA MIA KʼAIBA KĨRÃDUABɄ Ẽ NEMITIARA
8. ¿Kʼãrẽa Jeowatrʉ juez bia akʉza maʉ̃ba sãwũã kʼarebabʉ dayi nemitia kĩrãduaita?
8 Jeowara naʉ̃ drʉa juez (Gén. 18:25). Juez biabara jõma bia kʼawuabaibara leyʼra. Jeowabara diabʉ leyta maʉ̃ kʼarea iyara biʼia kʼawuabʉ kʼãrẽta oibarata dayirãba. Maʉ̃ kʼarea iyira juez bia (Is. 33:22). Mawũẽra Jeowabʉrʉ kʼawuabʉ kʼãrẽta biata akʉza kʼãrẽta zeri ẽãta. Maʉ̃ awuara juez biabara, ¿kʼãrẽta oibara? Juezbara ẽbẽra abaʉʼa kʼawua jarai nawedara, iyara biʼia kʼawuabaibara akʉza bia krĩchaibara jõma kʼãrẽ berabaridata. Mamina naʉ̃ trajo oidera, Jeowatrʉ abapai juez bia, iya jõma bia kʼawuabʉ baera.
9. Ẽbẽra abaʉba nemitia odata kĩrãduaita mawũã ẽ bʉrʉ kĩrãdua ẽ baita, ¿kʼãrẽta kʼawuabʉ Jeowabara?
9 Jeowara naʉ̃ drʉadebema juez kĩrãkʼabʉ ẽ. Ẽbẽra aba neida berabaridata mawũã ẽ bʉrʉ iya odata, Jeowabara jõma bia kʼawuabʉ kʼãrẽ berabaridara (Gén. 18:20, 21; Sal. 90:8). Jeowabara kʼawua oẽ ẽbẽrarã iya awuru ẽbẽraneba ũrĩnaneba mawũã ẽ bʉrʉ maʉ̃ba jaradadeba. Jeowabara bia kʼawuabʉ ẽbẽra abaʉba odara zebʉta, iyi sãwũã krĩchabʉdeba, iyi sãwũã sentibʉdeba, iyi sãwũã dapʉẽnaneba akʉza iyi bʉmae sãwũãbʉdeba adewara Jeowabara kʼawuabʉ dayirã sode edabʉta. Maʉ̃ kʼarea, Jeowabara bia kʼawuabʉ kʼãrẽa mawũã obʉta akʉza kʼãrẽta okĩrãbʉta. Mawũẽra Jeowara jõma akʉbʉ iyi dabʉba (Heb. 4:13). Dayirãba nemitia odata Jeowaba kĩrãduabʉbʉrʉ, iyara mawũã obʉ jõma biʼia kʼawuabʉ baera kʼãrẽ berabaridata.
Jeowabara jõmaʉ̃ta abarika akʉbʉ akʉza mia kʼaiba plata diabeda ẽ dayirã nemitia kĩrãduamarẽãra. (Akʉra parrapo 10).
10. ¿Kʼãrẽa kʼawuapanʉ Jeowaba kʼawua obʉra aripe obʉta? (Deuteronomio 32:4).
10 Jõma Jeowaba kʼawua jidabʉra, aripe obʉ adewara ẽbẽra jõmaʉ̃ta abarika akʉbʉ. Jeowaba dayirã nemitia kĩrãduabʉrʉdera, iyara akʉ ẽ ẽbẽraba plata erbʉ kʼawuaita, nekʼãrẽ bia erbʉta, ẽbẽra sãwũãbʉta akʉza maʉ̃ba kʼãrẽ okʼawuabʉta (1 Sam. 16:7; Sant. 2:1-4). Jeowara mia kʼaiba jarabe ẽ kʼai nemitiata kĩrãduamarẽã mawũã ẽ bʉrʉ kĩrãdua ẽ marẽã adewara platata diabeda ẽ dayirã nemitiata kĩrãdua marẽã (2 Crón. 19:7). Adewara Jeowara yi edebi ẽ yi sãwũã sentibʉ kʼarea ẽbẽra nemitia kĩrãduaita mawũã ẽ bʉrʉ kĩrãdua ẽ baita (Éx. 34:7). Jeowatrʉ abapai Juez biʼia, iya jõma bia ũdukʼawuabʉ baera dayirã ʉ̃rʉ (akʉra Deuteronomio 32:4).
11. ¿Kʼãrẽa neẽ kʼaita Jeowade kĩrãkʼa yi nemitia oda jipa kĩrãduabʉra?
11 Ẽbẽrarã Daizeze Bedʼea ebreo bʉdabara biʼia kʼawuapanasi Jeowabara daya nemitia obʉ kĩrãduabʉra, mia kʼaiba iyide kĩrãkʼara oda ẽãta. Libro abaʉba jarasi naʉ̃ra ẽbẽrabara edaʉde zokʼasi bedʼea aba, naʉ̃ bedʼeaba jarakĩrãbasi «Daizezebara kĩrãduabʉta ẽbẽraba nemitia odara». Akʉza jarabʉ: «Naʉ̃ bedʼeara zokʼabe ẽ ẽbẽra abaʉba awuru ẽbẽraba nemitia oda kĩrãduaita» (Sinónimos del Antiguo Testamento, traducción y adaptación de Santiago Escuain). Jeowabʉrʉ jipa kĩrãduabʉ ẽbẽra abaʉba nemitia odara, iya jẽda soiduba krĩcha kʼãrãpe akʉza wua maʉ̃ta oẽ bʉrʉ. Mawũẽra, ¿sãwũã sentipanʉ Jeowaba dayirã nemitia jipa kĩrãduabʉdera?
12, 13. (1) ¿Sãwũã sentipanʉ Jeowaba dayi nemitia odata jipa kĩrãduara? (2) Jeowaba dayi nemitia oda kĩrãduada tẽã, ¿jẽda kĩrãbebʉka?
12 Dayirãba kʼawuabʉdade Jeowaba jipa kĩrãduasita dayi nemitia odata, mawũãra aduʼa sentipanañi akʉza krĩcha zroma oda ẽ bayi daya nemitia oda kʼarea. Dayirãra mawũã sentipanʉ, Jeowaba kĩrãduabʉ baera dayirãba nemitia odata, ẽbẽrabara mawũã sentibi ẽ baera (Hech. 3:19). Jeowaba dayi nemitia odata jipa kĩrãduabʉrʉdera, iyara dayirãra nemitia oka kĩrãkʼa akʉbʉ adewara iduaribibʉ jẽda iyi neũdukʼawua bamarẽã.
13 Jeowaba dayirãba nemitia oda kĩrãduabʉrʉdera, maʉ̃ta jẽda jaranʉmina ẽ akʉza maʉ̃ta jẽda kĩrãbenʉmina ẽ (Is. 43:25; Jer. 31:34). Jeowabara dayirã nemitia obʉra «ũmadaʉ bae jĩgabʉ kĩrãkʼa, maʉ̃ kĩrãkʼa jĩgabʉ kʼãrẽ dayirã nemitiara» (Sal. 103:12).b Dayirãba naʉ̃ ʉ̃rʉ bia krĩchabʉrʉdera Jeowaʼa biga diakĩrãpanʉ akʉza iyaʼa wawia ũdubikĩrãpanʉ (Sal. 130:4). Mamina atia akʉdayi kʼaira nemitiata kĩrãduabʉta Jeowabara.
JEOWABARA KʼAIRA NEMITIATA KĨRÃDUABɄ
14. ¿Kʼãrẽta kʼawuasida nainʉbayeda Jeowaba ẽbẽraba nemitia oda kĩrãduabʉ ʉ̃rʉ?
14 Dayirãbara nainʉbayeda, kʼawuasida Jeowabara dayirãba nemitia obʉra kĩrãduabʉta yi zroma baya mawũã ẽ bʉrʉ wiñabʉ bʉsida, adewara kʼawuasida Jeowara dayirã Parãna baera, Ley diabʉ baera akʉza dayirã Juez baera iyabʉrʉ kʼawua jidaseabʉta ẽbẽraba nemitia odara kĩrãduaita, mawũã ẽ bʉrʉ kĩrãdua ẽ baita. Mawũẽra atia akʉdayi, ¿kʼãrẽta akʉbʉta Jeowaba ẽbẽraba nemitia oda kĩrãduaita?
15. Lucas 12:47, 48de jarabʉdera, ¿kʼãrẽta kʼawuabʉ Jeowabara?
15 Jeowabara kʼawuabʉ yi ẽbẽra nemitia odabara krĩña kʼawuachuta mawũã osi kʼawuaita. Jesura naʉ̃ ʉ̃rʉ bedʼeasi Lucas 12:47, 48 (akʉra). Ẽbẽra abaʉba krĩña nemitiata osibʉrʉ iya kʼawuabʉta, mawũãra Jeowa nãã nemitia zromata obʉ, mawũãra Jeowaba kĩrãduabe ẽ bayi iya odara (Mar. 3:29; Juan 9:41). Dayirãba kʼawuapanʉ edaʉde aña obʉta, mawũã obʉrʉdera, ¿Jeowaba kĩrãduaseabʉka? Kĩrãduaseabʉ. Atia akʉdayi kʼãrẽa.
Dayirãba soiduba krĩchapanʉbʉrʉ ĩjãseapanʉ Jeowabara kĩrãduaita dayirã nemitiara. (Akʉra parrapo 16 akʉza 17).
16. ¿Kʼãrẽa soiduba jẽda krĩchaibara akʉza maʉ̃ba kʼãrẽta jarakĩrãbʉ?
16 Jeowabara akʉbʉ yi ẽbẽra nemitia odaba, wãrĩnu soiduba jẽda krĩchabʉta. Mamina, ¿kʼãrẽta jarakĩrãbʉ soiduba jẽda krĩchaibara? Jarakĩrãbʉ awuara krĩchaita akʉza wua maʉ̃ta oẽ baita. Ẽbẽra abaʉba jẽda soiduba krĩchabʉrʉdera sopʉa sentibʉ iya nemitia oda kʼarea akʉza bia ẽ bʉ aripe oẽ basi baera akʉza sopʉa sentibʉ Jeowadeba jĩgarabasi baera nemitia osi baera. Jẽda Kĩrãbedadrʉ nokʼo Manasés akʉza David ʉ̃rʉ, ãya nemitia zromata osimina Jeowaba kĩrãduasi ãya nemitia odara, ãya soiduba jẽda krĩchasi baera ãya nemitia odata (1 Rey. 14:8). Jeowabara kĩrãduabʉ nemitiara, ũdura ẽbẽra abaʉba wãrĩnu jẽda krĩchabʉta, iya odara bari bia ẽãbʉta ũdubira, Jeowabara kĩrãdua ẽ bayi iya nemitia odara, awuarabʉrʉ wua oẽ baibara maʉ̃ nemitiara.c Adewara, ¿kʼãrẽta akʉbʉ Jeowabara?
17. ¿Kʼãrẽta jarakĩrãbʉ nemitia idubʉibara? (Isaías 55:7).
17 Adewara, ¿kʼãrẽta akʉbʉ Jeowabara? Jeowabara akʉbʉ ẽbẽraba nemitia obadata idubʉsi kʼawuaita. Naʉ̃ba jarakĩrãkʉ wua nemitia oẽ baita akʉza Jeowaba zokʼabʉ ojʉ̃drʉita (akʉra Isaías 55:7). Yi ẽbẽra nemitia obada idubʉdabara, iya nãã krĩchabadara awuara bʼaibara, mawũã Jeowa krĩchabʉ kĩkãkʼa krĩchaita (Rom. 12:2; Efes. 4:23). Jipa idubʉibara nemitia obʉta akʉza krĩcha mitiata (Col. 3:7-10). Adewara kĩrãbedaibara Jeowabara dayirãba nemitia obʉra kĩrãduaseabʉta, dayirãba soiduba ĩjãpanʉbʉrʉ Jesuta dayirãbari beidata. Jeowaba akʉbʉde dayirã zarea obʉta nemitia idubʉita, Jeowabara kĩrãduabʉ Jesuta dayirãbari beisi baera (1 Juan 1:7).
ĨJÃRA JEOWABA BɄA NEMITIA ODARA KĨRÃDUAITA
18. ¿Kʼãrẽ bedʼea ũbea ʉ̃rʉ kʼawuasida naʉ̃ artikulodera?
18 Naʉ̃ drʉadera neẽ mia kʼaiba Jeowade kĩrãkʼa nemitia odara kĩrãduabʉra, ¿kʼãrẽa? Nããra, Jeowaba kĩrãduakĩrãbʉ dayirãba nemitia odara. Yi ũmeta, iya biʼia ũdukʼawuabʉ dayirãra akʉza kʼawuabʉ wãrĩnu jẽda soiduba krĩchabʉ kʼawuaita nemitia odara. Yi ũbeata, dayirã nemitia obʉ kĩrãduada tẽãra Jeowabara akʉbʉ nemitia oka kĩrãkʼa. Adewara dayirãra krĩcha zroma oẽ bayi akʉza iyi nãã biabayi.
19. Nemitia omiaenara aña odayi, mawũãsidu ¿kʼãrẽa sobia baseabʉ?
19 Dayirã jõmaʉ̃ta nemitia omiaenara aña odayi, maʉ̃ kʼarea krĩcha zroma oda ẽ baibara. Perspicacia para comprender las Escrituras, yi 1 pagina 209de jarabʉ: «Jeowabara so borekea akʉbʉ akʉza kʼawuabʉ dayirãra nemitia omiata. Maʉ̃ kʼarea ewari jõmaʉ̃nẽ sopʉa ba ẽ baibara aña obʉ kʼarea (Sl 103:8-14; 130:3). Mamina, dayirãta zarea opanʉbʉrʉ Jeowaba zokʼabʉde bʼaita, mawũãra aduʼa sobiapanañi (Flp 4:4-6; 1Jn 3:19-22.)». Maʉ̃ kʼarea naʉ̃ bedʼeaba dayirãra aduʼa babibʉ.
20. ¿Kʼãrẽta akʉdai wuarebema artikulodera?
20 Dayirãba nemitia odata wãrĩnu soiduba jẽda krĩchapanʉbʉrʉ Jeowabara kĩrãduayi maʉ̃ nemitiara, maʉ̃ kʼawuaiba dayirãra sobiabibʉ. Mamina, ¿sãwũã Jeowade kĩrãkʼa oseapanʉ? ¿Kʼãrẽne abarikabʉ akʉza kʼãrẽne awuarabʉ Daizezeba daya nemitia oda kĩrãduabʉta, ẽbẽraba kĩrãduabʉme daya nemitia odata? akʉza ¿kʼãrẽa dayirãbara naʉ̃ta biʼia kʼawuadaibara? Wuarebema artikulode naʉ̃ bedʼeata panʉnañi.
TRÃBI 45 «La meditación de mi corazón»
a Daizeze Bedʼeade jara ũrĩbibʉ, Jeowabara kĩrãduabʉta yi ẽbẽra wãrĩnu jẽda krĩchabʉ kayiruara. Mawũãsidu, edaʉde krĩchaseapanʉ Jeowabara kĩrãdua ẽãta dayirã kayiruara. Naʉ̃ artikulode kʼawuadayi, kʼãrẽa ĩjãseapanʉta Jeowabara kĩrãduakĩrãbʉta dayirã kayiruara.
b Akʉra libro Acerquémonos a Jehová, yi 26, parrapo 9.
c KʼÃRẼTA JARAKĨRÃKɄ: Soiduba jẽda krĩchaibara jarakĩrãbʉ awuara krĩchaita akʉza wua maʉ̃ta oẽ baita. Ẽbẽra abaʉba jẽda soiduba krĩchabʉrʉdera sopʉa sentibʉ iya nemitia oda kʼarea akʉza bia ẽ bʉ aripe oẽ basi baera.