Bʉyikʉza ĩjãra Jeowabara wãrĩnu kĩrãduabʉta bʉa nemitia odara

1, 2. ¿Kʼãrẽta obʉ Jeowabara dayirãba nemitia oda kʼarea soiduba jẽda krĩchabʉbʉrʉ akʉza maʉ̃ba sãwũã sentibibʉ? (Akʉra poto yi nããrabemata).

NOKʼO Davidʼra iya nãã nemitia oda kʼarea mejãcha sopʉabasi (Sal. 40:12; 51:3; ʉ̃trebemata). Maʉ̃ kʼarea soiduba jẽda krĩchasi iya odara maʉ̃ba Jeowabara kĩrãduasi iya nemitia odara (2 Sam. 12:13). Davidʼba iyikʉza ĩjãside, Jeowaba iya nemitia oda kĩrãduadata maʉ̃ba iyira aduʼa babisi akʉza sobia babisi (Sal. 32:1).

² Dayirãba nemitia odata soiduba jẽda krĩchadara akʉza Jeowaʼa jaradara adewara zarea opanʉbʉrʉ nemitia wua o ẽ baita Jeowabara nemitia zroma basimina jipa kĩrãduayi maʉ̃ra. Naʉ̃ kʼawuaiba kʼarebabʉ dayirã aduʼa bʼaita akʉza sobia baita (Prov. 28:13; Hech. 26:20; 1 Juan 1:9). Jeowabara jipa kĩrãduabʉ dayirãba nemitia obʉra akʉza dayirãra nemitia oka kĩrãkʼa akʉbʉ, naʉ̃ ʉ̃rʉ kʼawuaiba kʼarebabʉ dayirã aduʼa bʼaita (Ezeq. 33:16).

3, 4. ¿Sãwũã sentibasi Jenniferʼra akʉza kʼãrẽta kʼawuadai naʉ̃ artikulodera?

³ Edaʉde dayirãba ĩjãita Jeowaba wãrĩnu kĩrãduabʉta dayirãba nemitia odara zareabʉ, mawũã berabarisi Jenniferta, iyi wiñabʉ edara yibarirabara Jeowa ʉ̃rʉ jaradiabasi, maʉ̃ta yi zroma chubidade iyara nemitia ojʉ̃drʉsi maʉ̃ta yibarira jara ẽ basi, mawũãbʉta poaga bio berabarida tẽã iya nemitia obada idubʉ kʼãrãpe buru kʼoesi, iya jara ũrĩbibʉ: «Nawedara mʉ̃ra mia erkʼãĩbasi Jeowaba kãga ẽãne, ituadomiabasi, kĩrʉmiabasi akʉza platata mejãcha kãgabasi, mʉ̃a kʼawuabasi Daizeze Bedʼeaba jaradiabʉta Jeowabara diasita yi Warrata dayirãbari beimarẽã mawũã nemitia obʉta kĩrãduaita, mamina mʉ̃ soiduba jẽda krĩchasidera mʉ̃a nemitia oda kʼarea akʉza Jeowa widisidera maʉ̃ta kĩrãduamarẽã mʉ̃a wãrĩnu ĩjã ẽ basi Jeowaba kĩrãduasita maʉ̃ra».

⁴ Edaʉde bʉa krĩchabʉbʉrʉ bʉa nãã nemitia oda kʼarea Jeowara bʉme kĩrʉbʉta, kĩrãbera naʉ̃ta, Jeowabara kãgabʉ bʉara Davidʼde kĩrãkʼa ĩjãmarẽã, iyara ĩjãbasi Jeowaba so zʉbʉria akʉbʉta akʉza kĩrãduabʉta nemitia obʉra. Naʉ̃ artikulode kʼawuadayi kʼãrẽa yibiata ĩjãnaita Jeowabara wãrĩnu kĩrãduabʉta nemitiara akʉza kʼãrẽba kʼarebaita mawũã oita.

¿KʼÃRẼA YIBIA DAYIKɄZA ĨJÃITA JEOWABARA WÃRĨNU KĨRÃDUASITA DAYI NEMITIARA?

5. ¿Kʼãrẽta krĩchadamarẽã kãgabʉ Diarubara? Jara ũrĩbira yizata.

⁵ Dayikʉza ĩjãra Jeowaba wãrĩnu kĩrãduabʉta nemitia obʉta mawũãra Diarua yi sewa bi ẽ bayi. Diarubara nekʼãrẽ jõma obʉ dayirãba Jeowade obʉta idubʉdamarẽã, ¿sãwũã obʉ maʉ̃ra? Iya kãgabʉ krĩchadamarẽã dayirãba nemitia zroma osibʉrʉ Jeowabara maʉ̃ra jipa kĩrãdua ẽãta. Krĩchara naʉ̃ta, yumakẽrã Corintodebemara mia erkʼãĩsi Jeowaba kãga ẽãne maʉ̃ kʼarea iyira kongregasioneba ãĩbʉesida (1 Cor. 5:​1, 5, 13). Mamina tẽã jʉ̃neane iya oda kʼarea soiduba jẽda krĩchasi mamina Diarubara kãga ẽ basi mebẽrãba bia edadamarẽã kongregasione akʉza kĩrãduamarẽã iya odata. Mebẽrãba mawũã osibʉrʉ naʉ̃ yumakẽrãbara krĩchakasi iya nemitia odara jipa kĩrãduada ẽãta maʉ̃ba iyira sopʉa kʼãrãpe Jeowadeba jĩga wãkasi, mawũãsibʉrʉ Diaruba kãgabadata aripe berabarikasi. Idi ewadebida Diaruba kãgabʉ dayirãba ĩjãnamarẽã nemitia zroma obʉrʉdera Jeowabara kĩrãdua ẽãta maʉ̃ra mawũã kãgabʉ Jeowadeba jĩga wãmarẽã, mamina dayirãbara bia kʼawuapanʉ Diarubara kʼãrẽta zokʼabʉta dayirã sewaita maʉ̃ba iyaʼa idu yi sewabida ẽ bayi (2 Cor. 2:​5-11).

6. ¿Kʼãrẽba kʼarebai aukʼara krĩcha zroma oẽ baita?

⁶ Dayikʉza ĩjãbʉbʉrʉ Jeowaba wãrĩnu kĩrãduabʉta daya nemitia odata mawũãra jẽda sobia bayi. Nemitia obʉrʉdera dayirãra sopʉapanʉ (Sal. 51:17). Mawũã sentira biga, naʉ̃ba kʼarebabʉ baera dayirãba nãã nemitia obadata wua oẽ baita akʉza nebia ojʉ̃drʉita (2 Cor. 7:​10, 11). Mamina dayirãba nemitia oda kʼarea soiduba jẽda krĩchasidu ariwia sopʉapanʉbʉrʉ naʉ̃ba Jeowadeba jĩga wãbiseabʉ, mamina dayirãba ĩjãnara Jeowabara wãrĩnu kĩrãduasita dayirãba nemitia odara mawũãra aduʼa panañi, dayirãba mawũã opanʉbʉrʉ Jeowadeta sobiade odayi akʉza krĩcha aduʼa panañi (Col. 1:​10, 11; 2 Tim. 1:3). Atia akʉdayi kʼãrẽba kʼarebaseabʉta dayikʉzaʉba ĩjãita Jeowabara wãrĩnu kĩrãduabʉta dayirãba nemitia odara.

¿KʼÃRẼBA KʼAREBAI BɄA ĨJÃITA BɄA NEMITIA ODARA JEOWABA WÃRĨNU KĨRÃDUASITA?

7, 8. ¿Éxodo 34:​6, 7de kʼãrẽta jarabʉ Jeowa ʉ̃rʉ akʉza kʼãrẽta kʼawuapanʉ maʉ̃neba?

⁷ Krĩchara Jeowaba iyikʉza kʼãrẽta jarada ʉ̃rʉ. Bari jaraita, krĩchara Jeowaba Moisésʼa katuma Sinaíne iyi ʉ̃rʉ jaradata (akʉra Éxodo 34:​6, 7).a Jeowabara jõma jaraseabasi iyi sãwũã bʉ ʉ̃rʉ mamina naʉ̃nera bari jarasi iyara so zʉbʉria akʉbʉta akʉza nebia obʉta. Ẽbẽra abaʉba iya nemitia oda kʼarea soiduba jẽda krĩchara maʉ̃ta, ¿Jeowabara kĩrãdua ẽka? Jeowaba kĩrãdua ẽ bʉrʉ maʉ̃ta, ũdubiyi iyira ẽbẽra kayiruata, mamina Jeowara mawũã chu ẽ.

⁸ Jeowaba jarabʉ wuabemara nemitiara kĩrãduabʉta, dayirãbara maʉ̃ra ĩjãnaibara iyara sewanebʉrʉ jara ẽ baera (Sal. 31:5). Mamina bʉita zareabʉbʉrʉ maʉ̃ta ĩjãita naʉ̃ta bʉyikʉza krĩchara: «Mʉ̃ã akʉbʉbʉrʉ Jeowaba wuabemara so zʉbʉria akʉbʉta akʉza ãya nemitia obʉra jipa kĩrãduabʉta, ¿kʼãrẽa mʉ̃ yikʉza ĩjã ẽ Jeowaba mʉ̃a nemitia obʉsida kĩrãduabʉta?».

9. Salmo 32:5de, ¿kʼãrẽta jaradiabʉ Jeowaba dayirã nemitia kĩrãduabʉ ʉ̃rʉ?

⁹ Daizeze Bedʼeaba jaradiabʉ Jeowabara kĩrãduabʉta dayirã nemitiara, maʉ̃ ʉ̃rʉ krĩchara. Bari jaraita, Davidʼba naʉ̃ta jarasi Jeowaʼa: «Bʉara kĩrãduasi mʉ̃ nekayiruara akʉza mʉ̃ nemitiasida» (akʉra Salmo 32:5). Nama naʉ̃ testode jarabʉ bedʼea «kĩrãduasi» naʉ̃ bedʼeabara ebreodera jara kĩrãbʉ «jiraedaita» mawũã ẽ bʉrʉ «edeita» naʉ̃ba ũdubibʉ Jeowaba Davidʼba nemitia odata kĩrãduasidera Davidʼba iyi okiwade nezʉgʉa abʉta Jeowaba jiraedabʉrʉ kĩrãkʼasita maʉ̃ba Davidʼra bia sentisi akʉza sobiabasi (Sal. 32:​2-4). Dayirãba nemitia oda kʼarea soiduba maʉ̃ta jẽda krĩchapanʉbʉrʉ kʼãrẽa sopʉa bʼaira nesida ẽ. Jeowaba dayirã zʉgʉata atʉi baera maʉ̃ba kʼarebayi David kĩrãkʼa aduʼa bʼaita akʉza sobia baita.

10, 11. ¿Kʼãrẽta jaradiabʉ Salmo 86:5ba Jeowa ʉ̃rʉ?

¹⁰ (Akʉra Salmo 86:5). Davidʼba naʉ̃ta jarasi Jeowa ʉ̃rʉ: «Dai nemitiara kĩrãduaya awabʉ». Naʉ̃ba jarakĩrãbʉ Jeowara mesera kĩrʉ ẽãta dayirãba nemitia obʉrʉdera akʉza jarakĩrãbʉ ẽbẽra abaʉta iya nemitia oda kʼarea jẽda krĩchara, Jeowabara maʉ̃ nemitiara kĩrãdua kĩrãbʉta, ¿kʼãrẽa mawũãchu Jeowara? Bersikuloba jarabʉ baera «bʉ kãga jõkara bʉa yi kʼareba widibʉʼa jõma diabʉ». Nããbema artikulode kʼawuasida Jeowabara iyi ode panʉrãra kãga jõkata ũdubibʉta maʉ̃ kãgaba yi ẽbẽra nemitia oda kʼarea soiduba jẽda krĩchabʉra Jeowabara kĩrãdua kĩrãne kĩrãduabʉ iya nemitia odara (Is. 55:7). Bʉita zareabʉbʉrʉ ĩjãita Jeowaba bʉa nemitia odata kĩrãduasita kʼãwũã krĩchaseabʉ «mʉ̃a kʼawuabʉ ẽbẽra abaʉba iya nemitia oda kʼarea soiduba jẽda krĩchabʉbʉrʉ Jeowabara kĩrãdua kĩrãbʉta maʉ̃ nemitiara, maʉ̃ba mʉ̃a ĩjãbibʉ mʉ̃a nemitia odara Jeowaba kĩrãduasita».

¹¹ Adewara Daizeze Bedʼeaba jaradiabʉ Jeowabara kʼawuabʉta dayirãra sãwũã parãbʉta akʉza kʼawuabʉta dayirãra nemitia omiata, naʉ̃ kʼawuaiba dayirãra aduʼa sentibibʉ (Sal. 139:​1, 2). Akʉdaya Davidʼba awuru Salmone jaradata naʉ̃ba kʼarebayi dayikʉza audre ĩjãita Jeowabara wãrĩnu kĩrãdua kĩrãbʉta dayirãba nemitia odara.

KʼÃRẼTA KĨRÃBEBɄ JEOWABA DAYIRÃ Ʉ̃RɄ

12, 13. ¿Salmo 103:14de jarabʉdera, Jeowabara kʼãrẽta kĩrãbebʉ akʉza kʼãrẽta okĩrãbʉ iyara?

¹² (Akʉra Salmo 103:14). Davidʼba jarasi kʼãrẽa Daizezebara kĩrãduaya awabʉta ẽbẽra nemitia oda jẽda krĩchabʉrʉdera, naʉ̃ta jarasi Jeowa ʉ̃rʉ: «Kĩrãbebʉ dayirãra egoro omata». Naʉ̃ba jarakĩrãbʉ Jeowabara ewari jõmaʉ̃nẽ kʼawuabʉta dayirãra nemitia omiata, naʉ̃ ʉ̃rʉ audre kʼawuadaya.

¹³ Jeowabara Adánʼra parãsi egorodeba maʉ̃ba iya biʼia kʼawuabʉ ẽbẽrarã sãwũã parãsita. Jeowabara kʼawuabasi ẽbẽra jõmaʉ̃ba, nemitia omiata mawũã ẽ bʉrʉ nemitia okata nesidabasita ñaba bʼaita, nekoita akʉza kʼãĩ bʼaita (Gén. 2:7). Mamina dayirãra Adán Evadeba zesi baera jõmaʉ̃ta nemitia omia maʉ̃ba dayirãbara krĩchabʉ nemitia oita, mamina Davidʼba jarasi Jeowabara bari kʼawuabʉ ẽãta dayirã nemitia omiata awuarabʉrʉ iyara «kĩrãbebʉta» dayirãra egoro omata. Nama Salmo 103:14de jarabʉ bedʼea «kĩrãbebʉ» naʉ̃ bedʼeabara ebreodera jara kĩrãbʉ Jeowabara bari kʼawuabʉ ẽãta dayirãra nemitia omiata awuarabʉrʉ iya kʼawuabʉ baera dayirã nemitia omiata dayirãbari nebiata okĩrãbʉ, mawũẽra dayirãra nemitia omia baera nemitiata oseapanʉ, mamina dayirãba maʉ̃ nemitia oda kʼarea jẽda krĩchadara Jeowabara kĩrãdua kĩrãbʉ akʉza bia edakĩrãbʉ dayirãra (Sal. 78:​38, 39).

14. (1) Salmo 103:12ba, ¿sãwũã ũdubibʉ Jeowabara kĩrãduabʉta nemitiara? (2) ¿David yizaba sãwũã ũdubibʉ Jeowabara jipa kĩrãduabʉta nemitia obʉra? (Akʉra rekuadro «Jeowabara jipa kĩrãduabʉ dayirã nemitiara»).

¹⁴ Adewara Salmo 103de dayirã nekʼãrẽ biata jaradiabʉ Jeowaba sãwũã kĩrãduabʉ ʉ̃rʉ nemitia obʉta (akʉra Salmo 103:12). Davidʼba jarasi Jeowabara dayirã nemitia kĩrãduabʉrʉdera wawara bʉebʉta maʉ̃ra. Iya jarasi: «Ũmadaʉ ʉ̃tʉ zebʉra jigabʉ ũmadaʉ baebʉmaebara». Naʉ̃ba jarakĩrãbʉ Jeowabara dayirãba nemitia odara jĩga edeita dayirãba ũdu ẽ mae, maʉ̃ba ũdubibʉ Jeowabara badua kĩrãbenʉma ẽ baita dayirãba nemitia odara akʉza badua jaranʉma ẽ baita maʉ̃ta (Ezeq. 18:​21, 22; Hech. 3:19).

15. ¿Kʼãrẽta oseapanʉ nãã nemitia oda kʼarea sopʉapanʉbʉrʉ?

¹⁵ Bʉa nãã nemitia oda kʼarea sopʉabʉbʉrʉ krĩchara Salmo 103ba jarabʉ ʉ̃rʉ naʉ̃ba kʼarebayi ĩjãita Jeowabara wãrĩnu kĩrãduabʉta dayirã nemitiara akʉza naʉ̃ lenʉmʉne naʉ̃ ʉ̃rʉ krĩchara: «¿Mʉ̃abida kĩrãbeibara ẽka mʉ̃ra nemitia omiata akʉza Jeowabara kĩrãduabʉta mʉ̃a nemitia obʉra? Adewara krĩchara naʉ̃ta, ¿Jeowaba mʉ̃a nemitia odata jĩga bʉebʉbʉrʉ akʉza maʉ̃ta badua kĩrãbebinʉmʉ ẽ bʉrʉ kʼãrẽa mʉ̃abida kĩrãdua ẽ mʉ̃a nemitia odara?». Jeowabara bʉa nemitia odara jipa kĩrãduasi, ¿kʼãrẽa bʉabida jipa kĩrãdua ẽ maʉ̃ra? (Sal. 130:3). Bʉa wãrĩnu ĩjãra Jeowaba bʉa nemitia obʉra jipa kĩrãduasita mawũãra bʉra wuara sopʉa senti ẽ bayi akʉza Jeowadeta sobiade obayi.

16. ¿Kʼãrẽa yibia ẽ badua jẽda krĩchanʉmaita nãã nemitia oda ʉ̃rʉ? (Akʉra potota).

¹⁶ Krĩchara naʉ̃ta, ẽbẽra aba karrude wãnera iyara espejodeba jẽda akʉseabʉ kʼãrẽta uruta mamina iya maʉ̃ta badua akʉbʉbʉrʉ neida berabariseabʉ, mawũã neida berabari ẽ baira iyara nãã akʉ takeraibara, abarika edaʉde bʉa jẽda krĩchaseabʉ nãã nemitia odata naʉ̃ba kʼarebai baera bʉa wua oẽ baita. Mamina dayirãba badua krĩchapanʉbʉrʉ Jeowaba nemitia kĩrãduada ʉ̃rʉ mawũãra dayirãra sobia ba ẽ bayi akʉza Jeowadesida sobiade oẽ bayi. Mawũẽra biga bayi bʉa wua kĩrãbe ẽ baita nãã nekayirua obadata awuarabʉrʉ krĩchaibara kʼãrẽ nebia zeita maʉ̃nera dayirãba nãã nemitia obadara jipa wua kĩrãbe ẽ bai baera (Is. 65:17; Prov. 4:25).

JEOWABA BɄA NEMITIA OBɄ KĨRÃDUASI ĨJÃBɄTA IDUBɄRARA

17. ¿Kʼãrẽa ewariza dayikʉza ĩjãibara Jeowabara kãgabʉta akʉza kĩrãduabʉta dayirã nemitiara?

¹⁷ Dayirãkʉza ĩjãnaibara Jeowabara wãrĩnu dayirãra kãgata akʉza dayirãba nemitia obʉra iyara kĩrãduaya awabʉta mawũã ĩjãbʉta idubʉ ẽ baibara awuarabʉrʉ ewariza zarea oibara audre zarea ĩj̈ãita (1 Juan 3:​19, nota). ¿Kʼãrẽa? Diarubara nekʼãrẽ jõma obʉ dayirã ĩjãbita Daizezebara kãga ẽãta dayirãra akʉza dayirãba nemitia obʉra iyara kĩrãdua ẽãta jipa, iya kãgabʉ dayirãba idubʉdamarẽã Jeowade opanʉta. Diaruba kʼawuabʉ baera iyi beira arakʼaitabata maʉ̃ba nekʼãrẽ jõma obʉ dayirãba maʉ̃ta ĩjãnamarẽã mamina dayirãbara iduaribida ẽ baibara (Apoc. 12:12).

18. ¿Kʼãrẽta oseabʉ bʉyikʉza ĩjãita Jeowabara bʉra kãgabʉta akʉza nemitia odara jipa kĩrãduasita?

¹⁸ Nããbema artikulode kʼawuasida kʼãrẽba kʼarebaseabʉta ĩjãita Jeowaba dayirãra kãgata, naʉ̃ artikulode kʼawuasida kʼãrẽta oibarata dayikʉza ĩjãita Jeowaba dayirã nemitia odara kĩrãduabʉta. Maʉ̃itara krĩchaibara Jeowaba iyi ʉ̃rʉ sãwũã jarabʉta akʉza Daizeze Bedʼeaba jarabʉta nemitia obʉra kĩrãduabʉ ʉ̃rʉ, adewara kĩrãdua ẽ baibara Jeowabara kĩrãbebʉta dayirã nemitia omiata, maʉ̃ba iyara bia edaita dayirãra. Jeowabara wãrĩnu jipa kĩrãduabʉ dayirãba nemitia obʉra. Bʉa naʉ̃ ʉ̃rʉ bia krĩchara, Davidʼde kĩrãkʼa kʼãwũã jaraseabayi «biga Jeowa bʉa kĩrãduasi baera mʉ̃a nemitia obʉra» (Sal. 32:5).