Jeowaba kãgabʉ jõmaʉ̃ta soiduba jẽda krĩchadamarẽã

1. ¿Kʼãrẽta obʉ ẽbẽra jẽda krĩchabʉbara?

ẼBẼRA abaʉba nemitiata osibʉrʉ jipade yibia bayi naʉ̃ ẽbẽraba soiduba jẽda krĩchabʉta ũdubita. Daizeze Bedʼeaba jarabʉ ẽbẽra abaʉba soiduba jẽda krĩchabʉ ũdubibʉrʉdera naʉ̃bara iya nãã kʼãrẽ kayirua odara jipa jʉrabʉta iya nemitia odata iduaribibʉ. Adewara zarea obʉ naʉ̃ta wua jẽda oẽ baita.

2. Dayirã jõmaʉ̃ba, ¿kʼãrẽa nesidapanʉ kʼawuaita kʼãrẽta jarakĩrãbʉta jẽda krĩchaibara? (Nehemías 8:​9-11).

² Ẽbẽrarã jõmaʉ̃ba nesidapanʉ kʼawuaita kʼãrẽta jarakĩrãbʉta jẽda krĩchaiba. ¿Kʼãrẽa mawũã nesidapanʉ? Jõmaʉ̃ba ewariza nemitiata opanʉ baera. Dayirãra Adán akʉza Evadeba zesi baera nemitia opanʉ akʉza beipanʉ (Rom. 3:23; 5:12). Mia abaʉ ẽbẽrata ẽdrʉ ẽ nemitiadebara. Ẽbẽrarã Jeowa ode kʼẽrẽpa pananarasida zarea odaibarabasi kayirua oẽ baita. Bari jaraita, Pablota (Rom. 7:​21-24). Mamina naʉ̃ba jarakĩrãbʉ ẽ dayirãra nemitia omiata kʼawuabʉ baera badua sopʉabaibarata maʉ̃ kʼarea, Jeowabara dayirã so zʉbʉria akʉbʉ baera akʉza iyara kãgabʉ baera dayirã sobiapanamarẽã. Krĩchadaya judiora Nehemías ewaridebema ʉ̃rʉ (akʉra Nehemías 8:​9-11). Jeowabara kãgaba ẽ basi judiorãra ãya nãã nemitia oda kʼarea sopʉa panamarẽã, awuarabʉrʉ kãgabasi iya kãgabʉ opanʉne sobiade opanamarẽã. Jeowabara kʼawuabʉ dayirãba nemitia oda kʼarea jẽda krĩchabʉrʉdera dayirãra sobiapanʉta, iyara maʉ̃ kʼarea jaradiabʉ sãwũã jẽda krĩchaibarata. Dayirãba kʼawuapanʉ Jeowabara ẽbẽrarã so zʉbʉria akʉbʉta, iyara maʉ̃ kʼarea soiduba kĩrãduakĩrãbʉ dayirã nemitiara, dayirãta soiduba jẽda krĩchara.

3. ¿Kʼãrẽta kʼawuadai naʉ̃ artikulodera?

³ Naʉ̃ artikulode kʼawuadayi bedʼea ũbea jẽda krĩchai ʉ̃rʉ bedʼeabʉta. Nããra akʉdayi Jeowaba israelitara kʼãrẽta diasita jẽda krĩchai ʉ̃rʉ. Tẽã akʉdayi Jeowaba sãwũã kʼareba zebʉrʉta ẽbẽrarãta jẽda krĩchadamarẽã ãya nemitia oda kʼarea. Jõbodoare kʼawuadayi Jesúsba kʼãrẽta jaradiasita iyi kʼaidubemara jẽda krĩchai ʉ̃rʉ.

JEOWABA KʼÃRẼTA JARADIASI ISRAELITARA JẼDA KRĨCHAI Ʉ̃RɄ

4. ¿Kʼãrẽta jaradiasi Jeowaba israelitara jẽda krĩchai ʉ̃rʉ?

⁴ Jeowara israelitarabawara bedʼea abarika zesi. Jeowaba israelitara jarasi iyi leyba jarabʉta opanʉbʉrʉ iya ãyira bia akʉita akʉza kʼarebaita. Adewara Jeowaba ãyaʼa jarasi iya ley diabʉra zare ẽ basita ãya jõma aribaera (Deut. 30:​11, 16). Mamina israelitaraba Jeowaba ley diabʉde opana ẽ basibʉrʉ, bari jaraita, ãyita daizeze zeri ẽãra yiwidʼibasibʉrʉ Jeowabara ãyira akʉ ẽ baibasi. Maʉ̃ kʼarea zʉbʉriadaibasi ãyira. ¿Maʉ̃ba jarakĩrãbasika Jeowabara ãyira wua kʼareba ẽ baibasita akʉza bia akʉ ẽ baibasita? Mawũã ẽ. Leyba jarabasi baera ãya Jeowaʼa kʼarebata jẽda jʉrʉdara Jeowabara ãyira kʼarebaibasita (Deut. 30:​1-3, 17-20). Mamina ãyara soiduba jẽda krĩchabʉta ũdubibarabasi mawũã Jeowaba ãyita jẽda bia akʉmarẽã.

5. ¿Jeowabara sãwũã ũdubisi israelitara doba amae ẽ basita? (2 Reyes 17:​13, 14).

⁵ Israelitarabara badua opanasi nemitiata. Ãyara awuru daizeze zeri ẽãra yiwidʼi jʉ̃drʉsida akʉza nekʼãrẽ Jeowaba jipade jʉrata osida. Israelitarãra ãya maʉ̃ mawũã oda kʼarea mejãcha zʉbʉriasi. Mamina Jeowabara kĩrãdua ẽ basi israelitarãra maʉ̃ kʼarea, awuarabʉrʉ propetarata zokʼa bʉeda ʉ̃rʉ zokʼabasi, mawũã iyima jẽda zedamarẽã mawũã ãya nemitia obʉta idubʉdamarẽã akʉza iyima jẽda zedamarẽã (akʉra 2 Reyes 17:​13, 14).

6. Jeowaba propetaraneba, ¿sãwũã kʼawuabisi israelitara kʼãrẽãba yibiata jẽda krĩchaita? (Akʉra potota).

⁶ Israelitaraba Jeowaba zokʼabʉta oẽãnera Jeowabara propetara badua zokʼa bʉebasi ãyaʼa jaramarẽã kʼãrẽta berabarita iyi bedʼeata ũrĩna ẽ bʉrʉ. Bari jaraita, Jeowaba Jeremíasneba jarasi israelitara iyima jẽda zedara iyara ãyira jẽda bia akʉita akʉza kãga jõkata ũdubita. Jeowabara bari kãgabasi israelitaraba ãya nemitia oda kʼarea jẽda krĩchadamarẽã mawũã iya bia akʉita (Jer. 3:​12, 13). Jeowaba Joeldeba jarasi israelitara soiduba jẽda zedamarẽã (Joel 2:​12, 13). Jeowaba Isaíasdeba jarasi israelitara ãya kʼãrẽ kayirua obadara idubʉdamarẽã Jeowa dabʉ nãã neneẽã panaita (Is. 1:​16-19). Adewara Jeowaba Ezequieldeba naʉ̃ta jarasi: «‹¿Mʉ̃ra sobiabʉka ẽbẽra kayirua beibʉrʉdera? ¿Mʉ̃itara audre yibia ẽka iya nemitia obʉta idubʉmarẽã mawũã bei ẽ bamarẽã?›. ‹Ẽbẽra aba beibʉrʉdera mʉ̃ra sobiabʉ ẽ, maʉ̃ kʼarea jẽda zeidua mʉ̃ma mawũã zokʼaipanaita›». (Ezeq. 18:​23, 32). Ẽbẽra abaʉba iya nãã nemitia obadata idubʉra akʉza jẽda krĩchara Jeowara mejãcha sobiabʉ Jeowabara kãgabʉ baera ẽbẽrarãra ewari jõmaʉ̃nẽ panamarẽã. Mamina Jeowabara kʼãrẽ oẽ jʉ̃ãbʉ ẽ ẽbẽrarã sõbede iyima jẽda zeita awuarabʉrʉ iyiareba kʼarebabʉ iyima zedamarẽã. Akʉdaya awuru yizarata.

7. ¿Kʼãrẽta jaradiasi Jeowabara israelitara Oseas akʉza Gómer yizadeba?

⁷ Akʉdaya kʼãrẽta jaradiasita Jeowaba israelitara Oseas akʉza iyi kima Gómer yizadeba. Gómerʼra Oseasdeba ãĩ basi. Iyara Oseasʼra awuru yumakẽrãrabari yi idubʉsi. Jeowabara Gómer mawũã wãsi baera kĩrãdua ẽ basi, awuarabʉrʉ iyara kʼawuabasi Gómer sode kʼãrẽtabʉta, maʉ̃ kʼarea Oseasʼa jarasi: «Jẽda wãra kʼaʉ̃ wẽra edade akʉza kãga ũdubira iyaʼa, iyira awuru yumãkẽraba kãgabʉmina akʉza ãĩbabʉmina abarika Jeowaba Israeldebemaraʼa kãga ũdubibʉ kĩrãkʼa, ãyi awuru daizezea yiwidʼibʉmina akʉza torta maʉ̃ita zokʼabʉta kãgamina». (Os. 3:1; Prov. 16:2). Oseasʼra Gómer eda wãsidera, Gómerʼra waidide nemitia onʉmasi, mamina Jeowaba Oseasʼa jarasi iyiareba jʉrʉ wãmarẽã Gómerʼra mawũã iyiʉ̃me ibiade bʼaita akʉza kĩrãduamarẽã iya nemitia odara.a Naʉ̃ yizadeba Jeowaba israelitara ũdubisi ãya nemitia zroma osimina Jeowabara ãyira kĩrãdua ẽãta akʉza iya kãga ũdubibʉra jõkata. Adewara Jeowabara propetarata zokʼa bʉebasi israelitarata kʼarebaita mawũã ãya nemitia obʉta idubʉdamarẽã. Naʉ̃ yizaba jaradiabʉ Jeowabara ẽbẽra abaʉ ʉ̃rʉ jõma biʼia kʼawuabʉta akʉza iya nekʼãrẽ jõma obʉta kʼarebaita maʉ̃ ẽbẽraba iya kʼãrẽ aña obʉta idubʉmarẽã (Prov. 17:3).

SÃWŨÃ KʼAREBABɄ JEOWABARA KAYIRUA ODAPEADARA JẼDA KRĨCHAMARẼÃ

8. ¿Kʼãrẽta osi Jeowaba kʼarebaita Caínba iya nemitia oda kʼarea jẽda krĩchamarẽã? (Génesis 4:​3-7 akʉza akʉra potota).

⁸ Caínʼra Adán akʉza Evadeba zesi baera nemitia omia basi akʉza iyara nekʼãrẽ oẽ basi jẽda krĩchaita. Daizeze Bedʼeaba jarabʉ Caínbara nemitiata obasita (1 Juan 3:12). Maʉ̃ kʼarea Jeowabara Caínba sakripisio diadara bia akʉ ẽ basibaibara akʉza iyisida bia akʉ ẽ basi baibara. Caínʼra iya nemitia oda kʼarea jẽda krĩchai kaʉde Jeowaʉ̃me kĩrʉsi. Maʉ̃ kʼarea Jeowara Caínʼʉ̃me bedʼeasi (akʉra Génesis 4:​3-7). Jeowara ibiade bedʼeasi Caínʼʉ̃me, Jeowaba jarasi Caínba nebiata ora nebiata diaita. Adewara jarasi iyita kĩrʉbia yi edebira naʉ̃bara nemitia obita. Mamina Caínʼra Jeowa yi kʼarebabi ẽ basi akʉza jẽda krĩcha ẽ basi iya nemitia oda kʼarea. Caínba iyi bedʼeata ũrĩ ẽ basi baera, ¿kʼãrẽta osi Jeowabara? ¿Jeowabara krĩchasika ẽbẽrarãra wua kʼareba ẽ baita? Mawũã ẽ.

9. ¿Jeowaba sãwũã kʼarebasi Davidʼra jẽda krĩchamarẽã?

⁹ Jeowabara Davidʼra mejãcha kãgabasi maʉ̃ kʼarea iyi ʉ̃rʉ naʉ̃ta bʉbisi Daizeze Bedʼeade: «Yumakẽrã mʉ̃ so sobiabibʉta» (Hech. 13:22). Mamina Davidbara nekayirua zroma osi, bari jaraita, iyira ãĩ basi akʉza mia beasi. Moisés leyba jarabasi ẽbẽra abaʉba naʉ̃ta osibʉrʉ beibarabasita (Lev. 20:10; Núm. 35:31). Mamina Jeowabara Davidʼra so zʉbʉrʉria akʉsi.b Jeowaba propeta Natánta David akʉde zokʼasi David waidide jẽda krĩcha ẽ basimina nemitia oda kʼarea. Iyi kʼarebaita Natánbara yizata zokʼasi mawũã Davidʼa biʼia jara ũrĩbita. Maʉ̃ba David sota tõbarisi maʉ̃ kʼarea iyira sopʉasi iya oda kʼarea akʉza jẽda krĩchasi (2 Sam. 12:​1-14). Tẽã Davidba bʉsi salmo aba, maʉ̃ne jara ũrĩbibʉ iyi kʼãrẽãba sopʉabasita iya nemitia oda kʼarea (Sal. 51, yi ʉ̃trebemata). Idibasidu maʉ̃ salmo Davidba bʉdaba mejãcha kʼareba zebʉrʉ ẽbẽrarã kayirua odapeadata ãya nemitia oda kʼarea jẽda krĩchaita. Mawũẽra idi ewadera mejãchade biga diapanʉ Jeowaʼa kʼarebasi baera Davidba iya nemitia oda kʼarea jẽda krĩchaita.

10. Jeowaba jʉ̃ã kʼawuabʉ ʉ̃rʉ akʉza dayirã nemitia kĩrãduabʉ ʉ̃rʉ kʼawuaiba, ¿sãwũã sentibibʉ bʉra?

¹⁰ Jeowabara jʉra nemitiara jõma (Sal. 5:​4, 5). Mamina Jeowabara kʼawuabʉ dayirãra nemitia omiata akʉza iya dayirãra mejãcha kãgabʉ baera nemitia obʉrʉde kʼarebakĩrãbʉ. Jeowabara yi audre nemitia omiara kayiruasida kĩrãduakĩrãbʉ. Kʼãrẽ yibia kʼawuaita Jeowabara dayirã nemitia kĩrãduakĩrãbʉta. Dayirãba Jeowaba kʼãrẽãba jʉ̃ã kʼawuabʉta ũdubibʉ ʉ̃rʉ akʉza iya sãwũã kĩrãduabʉ ʉ̃rʉ krĩchapanʉbʉrʉ, naʉ̃ba kʼarebayi dayirãsida iyiare kʼẽrẽpa panaita akʉza dayirãba nemitia obʉrʉde jẽda krĩchaita maʉ̃ kʼarea. Atia kʼawuadayi kʼãrẽta jaradiasita Jesúsba iyi kʼaidubemara jẽda krĩchai ʉ̃rʉ.

JESÚSBA IYI KʼAIDUBEMARA JARADIASI JẼDA KRĨCHAI Ʉ̃RɄ

11, 12. ¿Kʼãrẽ ʉ̃rʉ nebʉrasi Jesúsba ũdubita yi Zezebara kĩrãduakĩrãbʉta dayirã nemitiara? (Akʉra poto yi nããradebemata).

¹¹ Nããbema siglodera zesi Mesiasta. Dayirãba nããbema artikulode kʼawuasida Jesúsba akʉza Juan buru kʼoebibariba jaradiasidata kʼãrẽãba yibia basita jẽda krĩchaira (Mat. 3:​1, 2; 4:17).

¹² Jesús nama egorode baside iya ẽbẽrarã jaradiabasi yi Zezebara ẽbẽraba kayirua odara kĩrãduakĩrãbʉta. Jesúsba maʉ̃ ʉ̃rʉ audre biʼia kʼawuabita nebʉrasi zeze abaʉba yi warra aduadata. Maʉ̃ yumakẽrã warrara dedaʉba wãsi iya kãgata oita. Naʉ̃ yumakẽrã warrabara tẽã krĩchasi iya kʼãrẽ odara biga ẽ basita, maʉ̃ kʼarea jẽda yi zezema wãita krĩchasi. ¿Kʼãrẽta osi yi zezebara maʉ̃nera? Jesúsba jarasi yi zezeba yi warra jĩgaʉba uruta ũdubʉrʉdera iyira mejãcha sobiasita akʉza so borekeatotosi. Maʉ̃ kʼarea yi warrata sobia orra wãsi mõbe ũdubʉrʉde bura kʼãrãpe nẽgasi. Yi warrabara yi zezeʼa widikĩrãbasi iyi deda babimarẽã iyi nezokʼa kĩrãkʼa mamina yi zezebara ĩjã ẽ basi iyita mawũã bamarẽã. Yi zezebara yi warraba kʼãrẽ aña odara kĩrãduakĩrãbasi akʉza iyi deda bamarẽã kãgabasi yi warra baera. Yi zezeba kʼãwũã jarasi: «Naʉ̃ mʉ warra beudʼa kĩrãkʼa nʉmanata zokʼai bʼʉa, aduadʼata ũdubʉda» (Luc. 15:​11-32). Jesúsba nama egoroeda zei nãã yi Zezeʉ̃me ʉ̃tʉ baside ũdubasibaibara sãwũã Jeowaba ẽbẽrarã ãya nemitia oda kʼarea jẽda krĩchabʉrʉde ãyi nemitia kĩrãduabasita. Maʉ̃ba biʼia jara ũrĩbiseabasi Jeowaba sãwũã ẽbẽrarã so borekea akʉbʉta.

13, 14. ¿Kʼãrẽta kʼawuasi Pedroba jẽda krĩchai ʉ̃rʉ akʉza iya kʼãrẽta jaradiasi wuabemara maʉ̃ ʉ̃rʉ? (Akʉra potota).

¹³ Pedrobara Jesúsdeba nebiata kʼawuasi, iya kʼawuasi Jeowaba sãwũã kĩrãduabʉta ẽbẽrarã soiduba jẽda krĩchabʉra. Pedrobara nemitia mejãcha osi, mamina Jesúsbara soiduba kĩrãduakĩrãbasi iya kʼãrẽ aña odara. Bari jaraita, Pedrobara jarasi Jesúsʼra ũdukata iyara, mamina iya maʉ̃ mawũã aña oda kʼarea Pedrora tẽã mejãcha sopʉasi (Mat. 26:​34, 35, 69-75). Jesús jẽda piradrʉda tẽãra Pedroʼa yi ũdubisi, mamina iyira yi ũdubisi ãyi ũmepai panʉnebʉrʉ (Luc. 24:​33, 34; 1 Cor. 15:​3-5). Jesúbara kʼawuabasi Pedrora sopʉabʉta akʉza jẽda krĩchasita iya nemitia oda kʼarea, maʉ̃ kʼarea so zarea diasi Pedroʼa akʉza kʼawuabisi iya nekʼãrẽ aña odara kĩrãduasita.

¹⁴ Pedrobara biʼia kʼawuabasi sãwũã sentibʉta daya nemitia oda kʼarea jẽda krĩchaira akʉza maʉ̃ nemitia odata kĩrãduadaira, maʉ̃ kʼarea awurura maʉ̃ ʉ̃rʉ jaradiasi. Pentekoste ewari berabarida tẽã Pedroba diskurso abaʉde judiora jara ũrĩbisi ãya beasidata Mesiasʼra. Maʉ̃ kʼarea Pedroba naʉ̃ra ẽbẽrarã ibiade kʼãwũã jarasi: «Kayiruara idubʉra akʉza jẽda zera, maraba kayirua obada kĩrãduamarẽã, mawũãra Jeowabara mara kayiruara kĩrãduayi» (Hech. 3:​14, 15, 17, 19). Pedroba jaradiasi ẽbẽra abaʉba jẽda krĩchabʉta ũdubira, naʉ̃bara nekʼãrẽ iya obadaira jipa awuara oibarata. Maʉ̃ba jarakĩrãbasi iya sãwũã aña krĩchabadara bia krĩchaibarata akʉza iya nekʼãrẽ aña obadara idubʉibarata. Adewara nekʼãrẽ oibarata Jeowaba kãgabʉde bʼaita. Pedroba ũdubisi Jeowabara dayirã nemitiara jipa kĩrãduabʉta, iyara maʉ̃ra wua krĩcha ẽãta. Poaga bio berabarida tẽã Pedroba kristianora naʉ̃ta jarasi: «Jeowaba [. . .] jʉ̃ãbʉ maraba kayirua obʉta jẽda krĩchamarẽã mawũã bei ẽ baita» (2 Ped. 3:9). Jeowaba dayirã nemitia jipa kirãduabʉ kʼawuabʉba kʼarebabʉ dayirã aduʼa sentipanaita.

15, 16. (1) ¿Kʼãrẽba kʼarebasi Pabloba kĩrãdua kʼawuamarẽã nemitiara? (1 Timoteo 1:​12-15). (2) ¿Kʼãrẽta kʼawuadai yi wuarebema artikulodera?

¹⁵ Pablobara nemitiara mejãcha osi, bari jaraita, nããbema kristianorãra iya mejãcha pẽwãbasi, maʉ̃ kʼarea kristianoraba krĩchapanasi iya kʼãwũã nekʼãrẽ kayirua obʉra idubʉ ẽ baita. Mamina Jesúsbara mawũã akʉba ẽ basi Pablora. Jesúsba akʉza Jeowaʉ̃meba akʉpanasi Pabloba iyi sode kʼãrẽ nebia erbʉta. Jesúsba jarasi Pablora iya jidasita (Hech. 9:15). Jesuba miõba okata osi kʼarebaita Pablo jẽda krĩchamarẽã (Hech. 7:58–8:3; 9:​1-9, 17-20). Tẽã Pablora kristiano basi akʉza iyira apostol basi, maʉ̃ne iya badua biga diabasi Jeowaʼa iyita so zʉbʉria akʉsi baera (akʉra 1 Timoteo 1:​12-15). Pablora mejãcha sobiabasi Jeowaba iyira sãwũã bia akʉbʉrʉ kʼarea, maʉ̃ kʼarea mebẽrã jarasi Daizezebara ãyira mejãcha kãga baera kʼarebabʉta jẽda krĩchadamarẽã (Rom. 2:4).

¹⁶ Ewari aba Pabloba ũrĩsi kongregasion Corintodebemane iduaribisidata yumakẽrã Jeowaba kãga ẽãne mia erkʼãĩbʉta aribia kongregasione bamarẽã. Maʉ̃nera, ¿kʼãrẽta omarẽã jarasi Pablobara? Pabloba odaba dayirã nebiata jaradiabʉ sãwũã Jeowaba kãga ũdubibʉta akʉza kʼẽãbʉta dayirãra akʉza kʼãrẽãba yibiata so zʉbʉria akʉita. Maʉ̃ ʉ̃rʉ audre bia kʼawuadayi yi wuarebema artikulode.