Zõrãrãbara sãwũã ũdubiseabʉ kãgata akʉza so zʉbʉria akʉbʉta nemitia oda

1. ¿Ẽbẽra abaʉba nemitiata ora jẽda krĩchaseabʉka?

NÃÃBEMA artikulode dayirãba kʼawuasida sãwũã Pabloba kongregasion Corintodebemara jarasita kʼãrẽta oibarata ẽbẽra abaʉba nemitia zroma oside. Naʉ̃ ẽbẽrabara jẽda krĩchabʉta ũdubi ẽ basi baera iyira kongregasioneba ãĩ bʉesida. Mawũãsidu testo naʉ̃ artikulodebemaba jarabʉ kĩrãkʼa Daizezeba kʼarebaseabʉ ẽbẽra nemitia odara jẽda krĩchamarẽã (Rom. 2:4). ¿Zõrãrãbara sãwũã kʼarebaseabʉ nemitia oda jẽda krĩchamarẽãra?

2, 3. ¿Kʼãrẽta odaibara dayirãba kʼawuapanʉbʉrʉ mebẽãba nemitia zromata osita akʉza kʼãrẽa?

² Zõrãrã kongregasionebemaraba kʼawuada ẽ bʉrʉ kʼaiba nemitia zroma osita mawũãra ãya kʼawuada ẽ bayi sãwũã kʼarebaita. Mamina dayirãba kʼawuapanʉbʉrʉ kʼai ẽbẽraba nemitia zromata osita, ¿kʼãrẽta oseapanʉ? Nããrãra yi nemitia zroma oda jaraibara zõrãrãʉ̃me bedʼeamarẽã (Is. 1:18; Hech. 20:28; 1 Ped. 5:2).

³ Mamina maʉ̃ ẽbẽrarãta zõrãrãʉ̃me bedʼeakĩrã ẽ bʉrʉ, ¿kʼãrẽta odaibara? Maʉ̃ta mawũã berabarira dayirãra bedʼeaseabʉ zõrãrãbawara mawũã zõrãrãba kʼarebadamarẽã maʉ̃ ẽbẽrata. Dayirãba mawũã obʉrʉdera ũdubipanʉ maʉ̃ ẽbẽrarã mejãcha kãgapanʉta, kʼawuapanʉ baera zõrãrãbara iyira bia kʼarebadaita. Naʉ̃ ẽbẽraba iya nemitia odata idubʉ ẽ bʉrʉ akʉza maʉ̃ta ariwia obʉbʉrʉ wua Jeowa neũdukʼawua babe ẽ bayi. Adewara ẽbẽrarãba kʼawuapanʉbʉrʉ maʉ̃ ẽbẽraba kʼãrẽ nemitia osita imitia bedʼeaseapanʉ Jeowa ʉ̃rʉ akʉza iyi pʉwʉrʉ ʉ̃rʉ. Maʉ̃ ʉ̃rʉ zõrãrãʉ̃me bedʼeaira zareabʉmina maʉ̃ta opanʉ maʉ̃ mebẽãta kãgapanʉ baera akʉza mebẽrã kongregasionebemarata (Sal. 27:14).

ZÕRÃRÃBARA SÃWŨÃ KʼAREBASEAPANɄ NEMITIA ODARA

4. ¿Zõrãrãbara kʼãrẽta odamarẽã kãgapanʉ yi nemitia odaba?

⁴ Mebẽã abaʉba nemitia obʉrʉdera zõrãrãbara ãyidebemata ũbea jidapanʉ maʉ̃ mebẽãʉ̃me bedʼea wãmarẽã. Maʉ̃ra zõrãrãbara kʼawuabaibara sainʉ oseabʉta akʉza eda krĩchabʉta ũdubipanaibara. Naʉ̃ra zõrãrãba maʉ̃ ẽbẽra kʼarebakĩrãpanʉmina kʼawuapanʉ ãyara ajuerzade awuara krĩchabi be ẽãta (Deut. 30:19). Zõrãrãbara kʼawuapanʉ jõmaʉ̃ba nokʼo Davidʼde kĩrãkʼa jẽda krĩchabʉta ũdubi ẽ baita iya oda kʼarea (2 Sam. 12:13). Ʉ̃kʉrʉba Jeowaba ũrãgʼa diabʉra ũrĩ ẽ bayi (Gén. 4:​6-8). Mawũãsidu zõrãrãba nekʼãrẽ jõma opanʉ kʼarebaita yi nemitia odaba jẽda krĩchamarẽã. ¿Kʼãrẽta kĩrãbedaibara zõrãrãbara nemitia odaʉ̃me bedʼeabʉrʉdera?

5. Nemitia odaʉ̃me bedʼeabʉrʉdera, ¿sãwũã panaibara zõrãrãra? (2 Timoteo 2:​24-26 akʉza akʉra potota).

⁵ Zõrãrãba kʼawuapanʉ ẽbẽra abaʉba nemitia osimina Jeowabara maʉ̃ ẽbẽrarã mejãcha kãgata (Luc. 15:​4, 6). Zõrãrãra ẽbẽrã nemitia odaʉ̃me bedʼeabʉrʉdera ibiade bedʼeapanʉ akʉza kʼẽãna ẽ maʉ̃ ẽbẽrarã. Adewara zõrãrãbara krĩcha ẽ nemitia odaʉ̃me bedʼeabʉrʉdera bari widibarata mawũã kʼawuaita kʼãrẽta berabarisita. Awuarabʉrʉ ãyara opanʉ 2 Timoteo 2:​24-26 bayeda jarabʉ kĩrãkʼa (akʉra). Zõrãrãra nemitia odaʉ̃me bedʼeabʉrʉdera ibiade bedʼeapanʉ aduʼabʉta ũdubipanʉ kʼarebakĩrãpanʉ baera jẽda krĩchamarẽã.

6. ¿Zõrãrãbara kʼãrẽta opanʉ nemitia odaʉ̃me bedʼeai nãã? (Romanos 2:4).

⁶ Zõrãrãbara nemitia odaʉ̃me bedʼeai nãã jʉrʉbʉ Jeowaba sãwũã krĩchabʉta. Zõrãrãbara zarea opanʉ nemitia odara Jeowaba akʉbʉ kĩrãkʼa akʉita. Ãyara kĩrãbepanʉ Pabloba jaradata, iya jarasi: «¿Daizeze kʼãwũã ẽbẽra biata, bʉa kayirua obʉta idubʉpe iyima zemarẽãbʉta? (Akʉra Romanos 2:4). Zõrãrãbara kĩrãbedaibara ãyira obeja akʉbari kĩrãkʼa panʉta, maʉ̃ba ãyi trajo bia oira ãyara nesidapanʉta Jesúsba jarada kĩrãkʼa odaita (Is. 11:​3, 4; Mat. 18:​18-20). Yi nemitia odaʉ̃me bedʼeai nãã zõrãrãra Jeowaʼa yiwidʼipanʉ kʼarebamarẽã maʉ̃ ẽbẽra jẽda krĩchaita. Adewara zõrãrãbara maʉ̃ nemitia oda sãwũã berabarinʉmʉ kʼarebaita jʉrʉpanʉ testota akʉza dayirã kartarane jʉrʉpanʉ maʉ̃ ʉ̃rʉ bedʼeabʉta. Adewara Jeowaʼa widipanʉ kʼarebamarẽã maʉ̃ ẽbẽra sãwũã berabarinʉmʉta bia ũrĩta akʉza ãya krĩchadayi maʉ̃ ẽbẽra kʼãrẽba mawũã krĩchabisita akʉza kʼãrẽba edesita mawũã maʉ̃ nemitia omarẽã (Prov. 20:5).

7, 8. ¿Zõrãrãbara sãwũã Jeowade kĩrãkʼa jʉ̃ã kʼawuabʉta ũdubiseapanʉ nemitia odaʉ̃me bedʼeabʉrʉdera?

⁷ Zõrãrãbara Jeowade kĩrãkʼa jʉ̃ã kʼawuabʉta ũdubipanʉ. Ãya kĩrãbepanʉ Jeowaba naweda sãwũã awuru ẽbẽra nemitia oda kʼarebadata. Bari jaraita, Caínta. Jeowaba Caínʼa jara ũrĩbisi iyi bedʼeata ũrĩra kʼãrẽta ũduita akʉza kʼãrẽta berabarita iyi bedʼeata ũrĩ ẽ bʉrʉ (Gén. 4:​6, 7). Jeowaba Natánta zokʼasi Davidʼa ũrãgʼata diamarẽã. Natánbara yizata jara ũrĩbisi Davidʼa mawũã kʼarebaita jẽda krĩchamarẽã (2 Sam. 12:​1-7). Israelitaraba iya zokʼabʉde oẽbasidera Jeowabara propetarata zokʼabʉeda ʉ̃rʉ zokʼabasi kʼarebaita jẽda krĩchadamarẽã (Jer. 7:​24, 25). Jeowabara jʉ̃ã ẽ basi naʉ̃ra ẽbẽrarã nemitia odaraba sõbede jẽda krĩchabʉta ũdubita, awuarabʉrʉ iyiareba jʉrʉsi sãwũã kʼarebaita ãyi jẽda krĩchamarẽã.

⁸ Zõrãrãbara Jeowade kĩrãkʼa opanʉ ẽbẽra nemitia zroma oda kʼarebapʉnʉnera. Zõrãrãbara nemitia odara 2 Timoteo 4:2ba jarabʉ kĩrãkʼa akʉpanʉ, jʉ̃ã kʼawuabʉta ũdubipanʉ. Mawũẽra zõrãrãbara nesidapanʉ ewari jõmaʉ̃nẽ aduʼa bʉta ũdubita akʉza ãyara jʉ̃ã ẽ baibara nemitia odara mesera jẽda krĩchamarẽã, awuarabʉrʉ pikãgade kʼarebaibara iya nebiata okĩrãmarẽã. Zõrãrãta nemitia odaʉ̃me bedʼeabʉde kĩrʉ bedʼeadogobʉrʉ mawũãra kʼareba ẽ bayi iyi ũrãgʼata ũrĩkĩrãmarẽã akʉza kʼareba ẽ bayi jẽda krĩchamarẽã.

9, 10. ¿Zõrãrãbara sãwũã kʼarebaseapanʉ nemitia odaba kʼawuamarẽã iya odara biga ẽ basita?

⁹ Zõrãrãba akʉpanʉ kʼãrẽba edesita maʉ̃ ẽbẽra nemitia omarẽã. Bari jaraita, ¿iya Daizeze Bedʼea estudiabʉta idubʉsika? ¿Daizeze Bedʼea badua jaradia wãbʉta idubʉsika? ¿Daizezea badua yiwidʼibʉta idubʉsika? ¿Krĩcha mitia oita zebʉa yi edebisika? ¿Kʼairata iyi neũdukʼawuara? ¿Kʼãrẽta akʉbʉ, ũrĩbʉ akʉza kʼãrẽne jemenebʉ? ¿Naʉ̃ jõma obʉba sãwũã aña krĩchabisi iyaʼa? ¿Kʼawuabʉka Jeowara sãwũã sentibʉta iya nemitia oda kʼarea?

¹⁰ Zõrãrãbara bedʼeata widipanʉ yi nemitia oda, mawũã iyikʉzaʉba krĩchamarẽã kʼãrẽba edesita iyi Jeowadeba jĩga bʼaita akʉza nemitia omarẽã. Mamina zõrãrãbara maʉ̃ bedʼea widibʉrʉdera ibiade widipanʉ. Widida ẽ bedʼea ãya widita nesida ẽãra (Prov. 20:5). Adewara zõrãrãbara yizata zokʼaseabʉ kʼarebaita nemita odaba krĩchamarẽã iya odara biga ẽ basita akʉza jẽda krĩchamarẽã maʉ̃ kʼarea, abarika Natánba Davidʼʉ̃me oda kĩrãkʼa. Adewara nemitia odara zõrãrãba ʉ̃ra akʉ jʉ̃ẽbʉrʉdera sopʉabaseabʉ iya nekʼãrẽ aña jidada kʼarea akʉza iyi sãwũã krĩchabʉ kʼarea. Maʉ̃ba iya jẽda krĩchaseabʉ.

11. ¿Jesúsbara sãwũã edasi nemitia omiarãra?

¹¹ Zõrãrãra zarea opanʉ Jesúsde kĩrãkʼa odaita. Jesúsbara kʼarebasi Pablora naʉ̃ bedʼea widiside: «Saulo, Saulo, ¿bʉa mʉrã kʼãrẽã pẽwã bʼʉ?». Naʉ̃neba Jesúsbara kʼawuabikĩrãbasi Pabloa iya obʉra biga ẽ basita (Hech. 9:​3-6). Jesúsba Jezabel ʉ̃rʉ nebʉrasidera jarasi ewari diasita iya nemitia obʉta jẽda krĩchamarẽã (Apoc. 2:​20, 21).

12, 13. ¿Zõrãrãbara sãwũã ewari diapanʉ yi nemitia odaba jẽda krĩchamarẽã? (Akʉra potota).

¹² Zõrãrãbara Jesúsde kĩrãkʼa opanʉ mesera krĩcha ẽãne yi nemitia obʉba iya obʉra idubʉ ẽ baita. Ʉ̃kʉrʉbara zõrãrãba ʉ̃ra akʉ jʉ̃ẽbʉrʉde jẽda krĩchabʉ ãya nemitia odara. Ʉ̃kʉrʉbara ewari nesidabʉ jẽda krĩchaita. Maʉ̃ba zõrãrãbara yi nemitia odara akʉ jʉ̃ẽna ʉ̃rʉ akʉ jʉ̃ẽpanʉ. Zõrãrãba ʉ̃rabʉrʉ akʉ jʉ̃ẽna tẽã yi nemitia odabara jẽda krĩchaseabʉ iyaʼa ũrãgʼa diadapeda ʉ̃rʉ, mawũã obʉba kʼarebaseabʉ jẽda krĩchaita, mõbe Jeowaʼa widiseabʉ kĩrãduamarẽã iya nemitia odata (Sal. 32:5; 38:18). Maʉ̃ba akʉza zõrãrãʉ̃me ãba yi jʉrebʉrʉdera yi nemitia odabara ũdubiseabʉ bia ẽãbʉta akʉza ũrĩkĩrãbʉta iyaʼa ũrãgʼa diabʉdata.

¹³ Zõrãrãba yi nemitia oda kʼarebadaita jẽda krĩchamarẽã, ibiade edapanʉ akʉza ũdubipanʉ kʼawuabʉta iyi sãwũã berabarinʉmʉta. Adewara Jeowaʼa yiwidʼipanʉ kʼarebamarẽã ãyi mebẽã kʼarebaita zarea obʉta akʉza jʉ̃ãpanʉ yi nemitia odaba biʼia krĩchamarẽã iya kʼãrẽta aña obʉta (2 Tim. 2:​25, 26).

14. Wãrĩnubaira, ¿kʼaiba kʼarebabʉ nemitia odaba jẽda krĩchamarẽã akʉza kʼãrẽa mawũã jarapanʉ?

¹⁴ Nemitia odaba jẽda krĩchabʉrʉdera, mejãchade sobiapanʉ (Luc. 15:​7, 10). Zõrãrãba nekʼãrẽ jõma obʉ yi nemitia odaba jẽda krĩchamarẽã. Mamina wãrĩnubaira, ¿kʼaiba kʼarebabʉ iya obʉta jẽda krĩchamarẽãra? Kĩrãbedaibara Pabloba jarasita Daizezeba jẽda krĩchabibʉta (2 Tim. 2:25). Wãrĩnubaira Jeowabʉrʉ kʼarebabʉ yi nemitia odaba jẽda krĩchamarẽã, mawũã mia abaʉ ẽbẽraba kʼareba ẽ. Pabloba jara ũrĩbibʉ yi nemitia odaba iya obʉ jẽda krĩchabʉrʉ tẽãra kʼãrẽ nebia ũduita. Kʼarebabʉ Daizeze Bedʼeadebema ʉ̃rʉ audre bia kʼawuaita akʉza kʼarebabʉ audre nebiata oita adewara wua oẽ Diaruba omarẽã kãgabʉta (2 Tim. 2:​25, 26).

15. ¿Zõrãrãbara sãwũã kʼarebaseabʉ nemitia odaba jẽda krĩchada tẽãra?

¹⁵ Nemitia odaba jẽda krĩchabʉta ũdubibʉrʉdera zõrãrãbara nekʼãrẽ jõma odayi badua akʉ wã bʼaita mawũã iya ĩjãbʉta audre zarea erbamarẽã, adewara kʼarebadayi Diarua yi edebi ẽ marẽã akʉza kʼarebadayi nebiata omarẽã (Heb. 12:​12, 13). Adewara zõrãrãbara wuabemara jaraka ẽ naʉ̃ba kʼãrẽ mitia odata. Mamina kongregasionbara, ¿kʼãrẽ ʉ̃rʉ kʼawuaseabʉ?

JÕMAɄ̃RA KĨRÃBITA KʼẼÃPANɄ

16. 1 Timoteo 5:20ba jarabʉdera nemitia oda kʼẽãnara, ¿Pablobara kʼairabʉrʉ jaraseabʉ asi?

¹⁶ (Akʉra 1 Timoteo 5:20). Pabloba jarasi Timoteoʼa, iyisida zõrãrã kongregasionebemabasi, nemitia odara wuabemara kĩrãbita kʼẽãmarẽã. ¿Naʉ̃ba jarakĩrãbasika nemitia odara kongregasionba akʉbarabʉ kĩrãbita kʼẽãnaibarabasita? Mawũã ẽ. Awuarabʉrʉ yi ẽbẽra nemitia oda kʼawuabʉa jaraibarabasi. Bari jaraita, yi ũduda akʉza yi nemitia odaba jarada ẽbẽra. Zõrãrãbara maʉ̃rabʉrʉ jaraseabʉ yi nemitia odaʉ̃me bedʼeasita akʉza kʼẽãsidata iya oda kʼarea.

17. Kongregasione kʼawuapanʉbʉrʉ kʼaiba nemitia osita, ¿kʼãrẽta jarapanʉ akʉza kʼãrẽa?

¹⁷ Edaʉde kongregasionebema mejãchaʉba kʼawuapanʉ kʼaiba nemitia osita. Mawũã mejãchaʉba kʼawuapanʉnera, zõrãrãnebema abaʉba kongregasione platapormaneba jarabʉ yi nemitia odara kʼẽãsidata. ¿Kʼãrẽa mawũã opanʉ? Pabloba jarasi mawũã obʉrʉba kʼarebabʉta kongregasionebemata jʉra kʼawua panamarẽã akʉza iyabaʉ nemitiata oda ẽ marẽã.

18. Wũãwũã buru kʼoebʉta iyi 18 poaga baena nemitia ora, ¿kʼãrẽta obʉ zõrãrãbara? (Akʉra potota).

¹⁸ ¿Kʼãrẽta opanʉ zõrãrãbara wũãwũã aba buru kʼoebʉta iyi 18 poaga baena nemitia ora? Zõrãrãra ãba yi jʉreda kʼãrãpe, jʉrʉpanʉ zõrãrã ũme, maʉ̃rata bedʼeamarẽã wũãwũã yi nemitia odaʉ̃me adewara zõrãrã ãba yi jʉrebʉrʉdera chʉaibara wũãwũã nemitia odata akʉza yibarira Jeowa ode bʉrata.a Zõrãrã mawũã ãba yi jʉrebʉrʉdera yibariraʼa wididayi kʼãrẽta obʉta kʼarebaita ãyi wũãwũãba idubʉmarẽã nemitia obʉta akʉza jẽda krĩchamarẽã. Wũãwũãba bia krĩchabʉbʉrʉ akʉza nekʼãrẽ obʉbʉrʉ iya nemitia obʉ idubʉita, adewara yibariraba ũrãgʼa diabʉde obʉbʉrʉ, mawũãra zõrãrã ũmeba jaraseabʉ yibariraba kʼarebadamarẽã. Zõrãrãbara kʼawuapanʉ Jeowabara jarabʉta yibariraʼa ãyi wũãwũãra ibiade kʼẽã bamarẽã (Deut. 6:​6, 7; Prov. 6:20; 22:6; Efes. 6:​2-4). Zõrãrãbara badua akʉ wãpanʉ yibariraʉ̃me bedʼeaita mawũã kʼawuapanʉ kʼarebapanʉ kʼawuaita ãyi wũãwũãba kʼãrẽne kʼarebamarẽã nesidabʉde. Mamina, ¿kʼãrẽta obʉ zõrãrãbara wũãwũãba iya nemitia obʉta idubʉ ẽãnera? Maʉ̃nera chʉayi zõrãrã ũbea, ãba yi jʉredayi wũãwũã nemitia odaʉ̃me, yibariraʉ̃me mawũã ẽbʉrʉ yi akʉbʉme.

JEOWABARA KÃGA AKɄZA SO ZɄBɄRIA AKɄBɄ

19. ¿Zõrãrãbara sãwũã Jeowade kĩrãkʼa opanʉ nemitia odaʉ̃me bedʼeabʉrʉdera?

¹⁹ Jeowabara zokʼabʉ zõrãrãta kongregasion neneẽã erbamarẽã (1 Cor. 5:7). Adewara zõrãrãbara nekʼãrẽ jõma opanʉ nemitia odaba jẽda krĩchamarẽã. Maʉ̃ba nemitia odata kʼareba bʉdadera ãyara audrera kãgapanʉ naʉ̃ ẽbẽraba jẽda krĩchamarẽã. ¿Kʼãrẽa mawũã kãgapanʉ? Jeowade kĩrãkʼa okĩrãpanʉ baera. Jeowabara kãga akʉza so borekea akʉbʉ (Sant. 5:11). Apostol Juanbara mebẽrã kongregasionebemara kãga akʉbasi. Iya bʉsi: «Marara mʉ̃ warrara kĩrãkʼabʉ baera, mʉ̃a naʉ̃ta bʉbʉ nekayirua oda ẽ bamarẽã. Mamina, abaʉba nekayiruata ora, erpanʉ kʼareba Daizeze kʼawabʉta: Jesukristota, iyara nejõma aripe obʉ» (1 Juan 2:1).

20. ¿Kʼãrẽta kʼawuadai wuarebema artikulodera?

²⁰ Mamina bʉ mebẽrã ãya nemitia oda kʼarea jẽda krĩcha ẽãta. Mawũã berabaribʉrʉdera naʉ̃ ẽbẽrarã kongregasioneba ãĩ wãibara. Maʉ̃nera, ¿kʼãrẽta opanʉ zõrãrãbara? Naʉ̃ ʉ̃rʉ kʼawuadayi wuarebema artikulode.