ARTIKULO KʼAWUAITA 33
TRÃBI 130 Jipa kĩrãdua kʼawuaibara
¿Jeowabara sãwũã edadamarẽãbʉ kongregasionebemaraba ẽbẽra nemitia odara?
«Abaʉba nekayiruata ora, erpanʉ [kʼarebata]» (1 JUAN 2:1).
KʼÃRẼTA ŨDUDAITA
Dayirãba kʼãrẽta kʼawuaseapanʉ mebẽrã kongregasion Corintodebemaba sãwũã edadadeba mebẽã abaʉba nemitia zroma oside.
1. ¿Kʼãrẽta kãgabʉ Jeowabara ẽbẽrarãitara?
JEOWABA iduaribibʉ dayirã aba abakaʉba kʼawua jidamarẽã kʼãrẽta oita, wãrĩnubaira dayirãbara ewariza krĩchaibara kʼãrẽta oita jidaita. Dayirãitara audre yibiabayi jidaita dayirã bebʉ Jeowa diaita akʉza iyi pʉwʉrʉdebema bʼaita. Jeowabara kãgabʉ ẽbẽrarã jõmaʉ̃ba maʉ̃ta oita jidamarẽã. Iyara ẽbẽrarã jõma mejãcha kãgabʉ baera akʉza nebiata kãgabʉ baera ẽbẽrarãita. Adewara Jeowabara kãgabʉ ẽbẽrarã iyi neũdukʼawua bia bamarẽã akʉza ewari jõmaʉ̃nẽ panamarẽã (Deut. 30:19, 20; Gál. 6:7, 8).
2. ¿Kʼãrẽta omarẽã kãgabʉ Jeowabara ẽbẽra nemitia odaba? (1 Juan 2:1).
2 Jeowabara ẽbẽrarã jara ẽ ajuerzade odamarẽã iya zokʼabʉta, awuarabʉrʉ kãgabʉ ẽbẽra aba abakaʉba kʼawua jidamarẽã kʼãrẽta okĩrãbʉta mamina, ¿kʼãrẽba sãwũãi ẽbẽra abaʉba buru kʼoeda tẽã nemitia zromata ora? Maʉ̃ ẽbẽrata iya nemitia oda kʼarea jẽda krĩcha ẽ bʉrʉ maʉ̃ra kongregasioneba ãĩ wãibara (1 Cor. 5:13). Maʉ̃ ẽbẽra mawũã Jeowa odeba ãĩ wãsimina Jeowabara soiduba kãgabʉ jẽda zemarẽã iyima, iya nemitia oda kʼarea jẽda krĩchamarẽã akʉza jẽda iyi neũdukʼawua bamarẽã nãã bada kĩrãkʼa. Jeowabara dayirãba nemitia odata wãrĩnu kĩrãduakĩrãbʉ baera zokʼasi yi warrata dayirã bari beimarẽã (akʉra 1 Juan 2:1). Jeowabara wãrĩnu kãgabʉ dayirãra. Iyiareba ẽbẽrarã nemitia odara jarabʉ ãya nemitia oda kʼarea jẽda krĩchadamarẽã mawũã jẽda zeita iyima (Zac. 1:3; Rom. 2:4; Sant. 4:8).
3. ¿Kʼãrẽta kʼawuadayi naʉ̃ artikulodera?
3 Jeowabara kãgabʉ dayirãba iya akʉbʉ kĩrãkʼa akʉdamarẽã ẽbẽra nemitia odara. Naʉ̃ artikulode bedʼea ũbea kʼawuadayi. Nããra akʉdayi Pabloba kʼãrẽta omarẽã jarasita mebẽrã kongregasion Corintodebemara ẽbẽra abaʉba nemitia oside, tẽã akʉdayi Pabloba kʼãrẽta omarẽã jarasita naʉ̃ ẽbẽraba iya nemitia oda kʼarea jẽda krĩchabʉta ũdubiside adewara kʼawuadayi Jeowaba sãwũã akʉbʉta ẽbẽra abaʉba nemitia zroma obʉrʉde.
ẼBẼRA ABAɄBA NEMITIA OSIDERA, ¿KʼÃRẼTA OSIDA NÃÃBEMA SIGLODERA MEBẼRÃBARA?
4. ¿Nããbema siglodera kongregasion Corintiodebemara kʼãrẽta berabarisi? (1 Corintios 5:1, 2).
4 (Akʉra 1 Corintios 5:1, 2). Pabloba pʉwʉrʉza jaradia wãbʉta ũbea obʉrʉde ũrĩsi kongregasion yiwidi Corintodebemane kʼãrẽ nemitiata obarabʉta. Mebẽã aba maʉ̃ kongregasionebemaba nemitia zromata osi, iyara erkʼãĩsi yi zeze kimata, Jeowa ode panʉra ẽã bida kʼawuabasi maʉ̃ oira jipade kayirua zromata. Kongregasionebemarabara maʉ̃ ẽbẽrarã neida oẽ basi nemitia osimina adewara ʉ̃kʉrʉba krĩchapanasi kongregasioneba ãĩ bʉe ẽ baibarata, mawũã obʉrʉba ũdubibasi baera Jeowade kĩrãkʼa so zʉbʉria akʉbʉta maʉ̃ ẽbẽrarã. Mamina wãrĩnubaira Jeowabara iduaribi ẽ ẽbẽra nemitia obʉra iyi pʉwʉrʉde bamarẽã. Maʉ̃ ẽbẽraba mawũã nemitia odaba mejãchade mitia bedʼeabisi kongregasion ʉ̃rʉ. Maʉ̃ ẽbẽrata kongregasioneba ãĩ bʉeda ẽ basibʉrʉ wuabemara mebẽrãbida iya obʉ kĩrãkʼa oseabasi. Mawũẽra, ¿kʼãrẽta omarẽã jarasi Pablobara kongregasionebemara?
5. ¿Kʼãrẽta omarẽã jarasi Pabloba kongregasionebemara akʉza maʉ̃ba kʼãrẽta jarakĩrãbasi? (1 Corintios 5:13 akʉza akʉra potota).
5 (Akʉra 1 Corintios 5:13). Jeowaba Pabloʼa kartata bʉbisi kongregasionebemara biʼia jara ũrĩbimarẽã maʉ̃ ẽbẽra nemitia odara kongregasionebara ãĩ wãibarata. Mawũẽra mebẽrã Jeowaʉ̃me kʼẽrẽpabʉbara, ¿sãwũã edaibarabasi ẽbẽra nemitia odara? Pablobara jarasi maʉ̃ ẽbẽraʉ̃mera ãba ba ẽ baibarata, maʉ̃ba jarakĩrãbasi mia neko ẽ baibarabasita maʉ̃ ẽbẽraʉ̃me. Dayirãta ẽbẽra abaʉme ãba nekobʉbʉrʉ akʉza maʉ̃ ẽbẽraʉ̃me aduʼa bedʼeapanʉ audre ũdukʼawua wãñi. Maʉ̃ba Pabloba jarakĩrãbasi ẽbẽra nemitia odaʉ̃mera ãba ba ẽ baibarata, mawũã obʉrʉba kʼarebaibasi kongregasionebemaraba iyabaʉ nemitiata oda ẽ marẽã maʉ̃ ẽbẽra kĩrãkʼa (1 Cor. 5:11). Adewara kongregasionebemaraba mawũã obʉrʉba kʼarebaibasi yi nemitia odaba ũdumarẽã iya odabara Jeowata mejãcha sopʉabisita akʉza kʼarebaseabasi iya oda kʼarea jẽda krĩchamarẽã (1 Cor. 5:5-7).
Jeowaba Pabloʼa bʉbisi kartata kongregasion Corintodebemaraita naʉ̃ kartade jara ũrĩbibasi yumakẽrã nemitia odara kongregasionebara ãĩ wãibarata. (Akʉra parrapo 5).
6. Kongregasionebemaba Pabloba karta dia bʉeda ũdui, ¿kʼãrẽta osida akʉza kʼãrẽta osi yumakẽrã nemitia odabara?
6 Pabloba maʉ̃ karta kristianora Corintodebemara zokʼabʉeda tẽã krĩchanʉmasi naʉ̃ kongregasionebemaraba kʼãrẽta krĩchabʉta iya karta zokʼabʉeda ʉ̃rʉ. Tẽã Titoba bedʼea biata jarasi Pabloʼa, naʉ̃ba mejãcha sobiabisi Pablora. Iya jarasi kongregasion Corintodebemabara Pabloba karta dia bʉedade osidata, ãyara kongregasioneba ãĩbʉesida yumakẽrã nemitia odara (2 Cor. 7:6, 7). Pabloba maʉ̃ karta bʉdiabʉedata jedeko bio berabarida tẽã yumakẽrã nemitia odabara idubʉsi iya nemitia obadara, mõbe soiduba jẽda krĩchasi iya oda kʼarea, jẽda Jeowaba zokʼabʉde ojʉ̃drʉsi naʉ̃ yumakẽrãbara (2 Cor. 7:8-11). ¿Pablobara kongregasionebemara kʼãrẽta omarẽã jarasi maʉ̃ kʼarea?
¿KONGREGASIONEBEMABARA SÃWŨÃ EDAIBARABASI ẼBẼRA JẼDA KRĨCHADARA?
7. ¿Kʼãrẽta osi maʉ̃ yumakẽrãbara iyi kongregasioneba ãĩbʉeda tẽãra? (2 Corintios 2:5-8).
7 (Akʉra 2 Corintios 2:5-8). Pabloba jarasi: «Naʉ̃ yumakẽrã mejãcha zʉbʉriasi iyi kʼẽãsidade mejãchaʉba». Maʉ̃ ẽbẽra nemitia osi baera kongregasioneba ãĩbʉesida, maʉ̃ba kʼarebasi iya nemitia oda kʼarea jẽda krĩchaita, maʉ̃ kʼarea mebẽrãbara nesida ẽ basi ariwia nemitia oda kĩrãkʼa akʉdaira (Heb. 12:11).
8. ¿Kʼãrẽta omarẽã jarasi Pabloba kongregasionʼa?
8 Maʉ̃ yumakẽrãbara iya nãã nemitia obadata idubʉsi baera Pabloba jarasi kongregasionebemara iduaribidamarẽã maʉ̃ yumakẽrãra jẽda kongregasionʼena zeita adewara Pabloba jarasi: «iyi nemitiara kĩrãduadaibara ibiade akʉza so zarea diadaibara» adewara iya kʼãrẽ obʉdeba «iyaʼa kʼawuabidamarẽã iyira kãgapanʉta». Yumakẽrã nemitia odata jẽda krĩchara, Pabloba kãgabasi mebẽrã kongregasionebemaba ãya kʼãrẽ jarabʉdeba, ãyi sãwũãbʉdeba akʉza ãya kʼãrẽ obʉdeba ũdubidamarẽã wãrĩnu kĩrãduasidata iya odara akʉza iyi wãrĩnu kãgapanʉta ũdubidamarẽã. Mebẽrãba mawũã osi baera mebẽã nemitia odabara ũduseabasi kongregasionebemarãra wãrĩnu sobiapanʉta iyita jẽda zesi baera.
9. ¿Kʼãrẽa ʉ̃kʉrʉ mebẽrãitara zareabasibaibara yumakẽrã nemitia oda jẽda bia edaira?
9 Ʉ̃kʉrʉitara zareabasibaibara naʉ̃ yumakẽrã nemitia oda jẽda bia edaira akʉza iyiʉ̃me aduʼa bedʼeabaira. Daizeze Bedʼeabara maʉ̃ ʉ̃rʉra jara ẽ mamina, ¿kʼãrẽa mawũã krĩchapanʉ? Naʉ̃ yumakẽrãba kʼãwũã nemitia oda kʼarea ʉ̃kʉrʉ mebẽrã kongregasionebemara mejãcha kĩrʉpanasibaibara kongregasion ʉ̃rʉ imitia bedʼeabisi baera akʉza ʉ̃kʉrʉ mebẽrãra sopʉapanasibaibara ãyita zʉbʉriabisi baera. Mebẽrã kongregasionebemara zarea opanasi Jeowaba zokʼabʉde odaita, maʉ̃ba ãyidebema ʉ̃kʉrʉraitara zareabasibaibara ĩjãita ẽbẽra aba nemitia zroma okʼãrãpe jẽda kongregasionma idu zebidaira (naʉ̃ testoʉ̃me akʉra Lucas 15:28-30). Mamina, ¿kongregasionebemarabara kʼãrẽa kãga ũdubidaibarabasi naʉ̃ yumakẽrã iya nemitia oda kʼarea jẽda krĩchadara?
10, 11. ¿Kʼãrẽta berabarikasi zõrãrãba naʉ̃ yumakẽrã jẽda krĩchadata bia edada ẽ basibʉrʉ?
10 ¿Naʉ̃ yumakẽrãra sãwũã sentikasi iya nemitia oda kʼarea jẽda krĩchabʉta ũdubisidu zõrãrãbara jẽda kongregasionma zebi ẽ basibʉrʉ? adewara ¿sãwũã sentikasi jẽda kongregasionʼena zebʉrʉde mebẽrãba bia edada ẽ basibʉrʉ akʉza kãgabʉta ũdubida ẽ basibʉrʉ? Pabloba jarasi naʉ̃ yumakẽrãta bia edada ẽ basibʉrʉ iyira mejãcha sopʉakasita akʉza zarea neẽã sentikasita, adewara krĩchaseabasi iya kʼãrẽ nebia jʉ̃ãira neẽãta akʉza wua Jeowa neũdukʼawua babe ẽãta.
11 Adewara, ¿kʼãrẽta berabariseabasi kongregasionebemaraba naʉ̃ yumakẽrãta bia edada ẽ basibʉrʉ? Naʉ̃ yumakẽrãta bia edada ẽ basibʉrʉ ãyisida Jeowadeba jĩga wãseabasi, ¿kʼãrẽa mawũã jarapanʉ? Ãya naʉ̃ yumakẽrãta bia eda ẽ basibʉrʉ Jeowade kĩrãkʼa so zʉbʉria akʉbʉta ũdubida ẽ bakasi, awuarabʉrʉ ãyara Diarude kĩrãkʼa onʉmakasi. Diarura jipade ẽbẽra kayirua, Diarubara mia abaʉta kãga ẽ. Ãya mawũã opanasibʉrʉ Diaruta kʼarebabʉ kĩrãkʼa bakasi maʉ̃ mebẽã sopʉabita akʉza Jeowadeba jĩga wãbita (2 Cor. 2:10, 11; Efes. 4:27).
12. ¿Kongregasion Corintodebemabara sãwũã Jeowa kĩrãkʼabʉta ũdubiseabasi?
12 Kongregasion Corintodebemabara, ¿sãwũã Jeowade kĩrãkʼa obʉta ũdubiseabasi? Ẽbẽra abaʉta iya nemitia oda kʼarea soiduba jẽda krĩchara, mebẽrãbara Jeowade kĩrãkʼa kĩrãduaibarabasi iya odara. Akʉdaya kʼãrẽta jarasidata ʉ̃kʉrʉ ẽbẽrarã Jeowa ode pananaraba, bari jaraita, Davidba kʼãwũã jarasi: «Jeowa bʉra kʼãrẽ ẽbẽra bia akʉza kĩrãduabʉ dai kayiruara» (Sal. 86:5). Miqueasba jarasi ẽbẽra abaʉba nemitia zroma obʉrʉdera mia abaʉba Jeowade kĩrãkʼa kĩrãdua kʼawuabʉra neẽãta (Miq. 7:18). Isaías bida kʼãwũã jarasi: «Ẽbẽra kayiruabara idubʉibara iyi ora akʉza ẽbẽra kayiruabara idubʉibara krĩcha kayiruara, jẽda zeibara Jeowama, iya so zʉbʉria akʉi baera akʉza iya biode kĩrãduabʉ baera iyi kayiruara» (Is. 55:7).
13. ¿Kʼãrẽa bigabasi naʉ̃ yumakẽrã nemitia oda idu jẽda kongregasionʼena zebira? (Akʉra rekuadro «¿Sõbeda kongregasionʼena jẽda zebisida yumakẽrã Corintodebemara?»).
13 Kongregasion Corintodebemarabara Jeowade kĩrãkʼa obʉta ũdubira, naʉ̃ yumakẽrãba nemitia odata kĩrãduaibarabasi akʉza ũdubidaibarabasi iyira kãgapanʉta. Pabloba jarasi ãya naʉ̃ yumakẽrãba odata jipa kĩrãduadara mawũãra ũdubidaita nekʼãrẽ jõmaʉ̃nẽ ãyaʼa omarẽã zokʼabʉta opanʉta (2 Cor. 2:9). Wãrĩnubaira, naʉ̃ yumakẽrãra kongregasioneba ãĩ bʉedapeadata dããraba ẽ basi, jedeko bio berabarisi, mawũãsidu iyi mawũã ãĩ bʉebʉdaba kʼarebasi iya bida ũdubimarẽã jẽda krĩchabʉta, maʉ̃ba kʼãrẽa kongregasioneba wua ãĩ bʼaira nesida ẽ basi.
¿SÃWŨÃ JEOWADE KĨRÃKʼA ARIPE OSEABɄ AKɄZA SO ZɄBɄRIA AKɄSEABɄ?
14, 15. ¿Kʼãrẽta kʼawuaseapanʉ Corintode berabaridadeba? (2 Pedro 3:9 akʉza akʉra potota).
14 Jeowabara Corintode nekʼãrẽ berabaridara bʉbisi iyi Bedʼeade dayirãba maʉ̃neba nekʼãrẽta kʼawuadamarẽã (Rom. 15:4). Maʉ̃neba kʼawuapanʉ Jeowabara iduaribi ẽãta ẽbẽra nemitia obʉta kongregasione bamarẽã. Ʉ̃kʉrʉbara krĩchaseabʉ Jeowaba ẽbẽrarãta so zʉbʉria akʉbʉ baera iduaribibʉta ẽbẽra nemitia obʉra kongregasione bamarẽã, mamina wãrĩnubaira Jeowabara mawũã so zʉbʉria akʉbʉ ẽ. Wãrĩnu, Jeowabara so zʉbʉria akʉbʉ wuabema ẽbẽrarãra, mamina iyara iduaribi ẽ ẽbẽrarã nemitia obʉra bamarẽã kongregasione, iya jarabʉra nrʉemaza awuarabʉ ẽ baera (Jud. 4). Jeowaba iduaribira ẽbẽra nemitia obʉta kongregasione bamarẽã wuabema mebẽrãta zʉbʉria berabaribiseabʉ akʉza Jeowabara so zʉbʉria akʉbʉta ũdubi ẽ bayi (Prov. 13:20; 1 Cor. 15:33).
15 Adewara kʼawuasida Jeowabara kãgabʉta miõta bei ẽ bamarẽã, awuarabʉrʉ beideba ẽdrʉbikirabʉ ewari jõmaʉ̃nẽ panamarẽã, ẽbẽrarãba ãya nãã nemitia obadata idubʉdara akʉza odara Jeowaba zokʼabʉta mawũãra jẽda iyi neũdukʼawuabaseabʉ (Ezeq. 33:11; akʉra 2 Pedro 3:9). Yumakẽrã Corintodebemata nemitia oda kʼarea jẽda krĩchasidera, Jeowaba jarasi kongregasionebemara naʉ̃ yumakẽrãra bia edadamarẽã akʉza kĩrãduamarẽã iya nemitia odara.
Dayirãbara Jeowade kĩrãkʼa kãgata ũdubipanʉ akʉza so zʉbʉriata ũdubipanʉ yi Jeowa odeba ãĩ wãpanʉ jẽda zebʉrʉrata bia edabʉdade akʉza dayirã kãgata ãya ũdubibʉdade. (Akʉra parrapo 14 akʉza 15).
16. ¿Kʼãreta krĩchabʉ Jeowa ʉ̃rʉ yumakẽrã Corintodebema sãwũã edadadeba?
16 Corintode berabaridaba dayirãʼa ũdubibʉ Jeowabara dayirãra kãgata akʉza nekʼãrẽ jõma aripe obʉta (Sal. 33:5). Naʉ̃ ʉ̃rʉ kʼawuabʉrʉba kʼarebabʉ dayirãba audre Jeowa ʉ̃rʉ ibia bedʼeaita. Dayirã jõmaʉ̃ta nemitia omia baera Jeowaʼa biga diapanʉ iya so zʉbʉria akʉbʉ kʼarea, adewara Jeowaʼa biga diapanʉ iya yi Warrata diasi baera dayirã jõmaʉ̃ta ẽdrʉmarẽã nemitiadeba. Mejãcha sobiapanʉ Jeowaba wãrĩnu kãgabʉta ũdubibʉ baera iyi pʉwʉrʉa akʉza iya kãga baera iyi pʉwʉrʉra ewari jõmaʉ̃nẽ bia wãmarẽã.
17. ¿Wuarebemara artikuloradera kʼãrẽta kʼawuadai?
17 ¿Idi ewade kongregasione yi ẽbẽra nemitia obʉra sãwũã akʉpanʉ? Zõrãrã kongregasionebemabara, ¿sãwũã Jeowade kĩrãkʼa kãga ũdubiseabʉ akʉza kʼarebaseabʉ yi ẽbẽra nemitia odara? adewara ¿Mebẽrã kongregasionebemabara kʼãrẽta oseabʉ zõrãrãba nemitia oda kongregasioneba ãĩbʉebʉrʉde akʉza jẽda zebibʉrʉde? Wuarebemara artikulode kʼawuadayi naʉ̃ bedʼea ʉ̃rʉ.
TRÃBI 109 Amémonos de todo corazón