Bʉa o ẽ bada kʼarea zʉbʉriabibʉdade, ¿kʼãrẽta oi?

1, 2. ¿Dayirãra kʼairaba zʉbʉriabiseabʉ?

JESÚSBA yiza abaʉde nebʉrasi sãwũã pẽdra abaʉba juez abaʉa widibasita kʼarebamarẽã awururaba iya oẽ bada kʼarea zʉbʉriabipanʉ baera. Jesús kʼaidubemarabara maʉ̃ yizara biʼia ũrĩsidabaibara, ãyi ewaridera ãyara badua ũdubasi baera ãya kʼãrẽ oẽ bada kʼarea awururaba zʉbʉriabibʉta (Luc. 18:​1-5). Dayirãba kʼawuapanʉ maʉ̃ yizadebema pẽdrara sãwũã sentibasita, idi ewade dayirãbida badua ũdupanʉ baera maʉ̃ta.

² Idi ewadera ẽbẽrarãbara kãga ũdubida ẽ naʉ̃ drʉa jõmaʉ̃mae, ʉ̃kʉrʉbara awurura ãyi ʉ̃rʉ sãwũãbʉ kʼarea bia edada ẽ adewara ãya erbʉde wũẽta erbakĩrãpanʉ, maʉ̃ kʼarea dayirãbara kʼawuapanʉ edaʉde zʉbʉria odaita dayirãra (Ecl. 5:8). Mamina dayirãitara audre pʉ mebẽrãba dayirãba oẽ bada kʼarea zʉbʉriabibʉdade, ãyira nemitia omia baera edaʉde nekʼãrẽ aña opanʉ, mamina dayirãbara kʼawuaseapanʉ kʼãrẽta oita dayirãba oẽ bada kʼarea awururaba zʉbʉriabibʉrʉde kʼawuabʉrʉde Jesúsba akʉza awuru ẽbẽrarãba kʼãrẽta osidata ãyi abarika zʉbʉriabisidade. Wãrĩnubaira dayirãra zarea opanʉ dayirã nejʉraraba dayirãba oẽ bada kʼarea zʉbʉriabibʉrʉde mejãcha kĩrʉ ẽ baita, maʉ̃ba audre biga dayirã mebẽrãba dayirãba oẽ bada kʼarea zʉbʉriabibʉrʉde kĩrʉ ẽ baita, mamina Jeowaba ũdubʉrʉde dayirãba oẽ bada kʼarea awuru ẽbẽrarãba zʉbʉriabinʉmʉta mawũã ẽ bʉrʉ mebẽrãba, ¿maʉ̃nera iyara kʼãrẽta sentibʉ? ¿Iyara krĩchabʉka dayirã ʉ̃rʉ?

3. ¿Sãwũã kʼawuapanʉ Jeowabara wãrĩnu krĩchabʉta iyi ode panʉra zʉbʉriabipanʉra?

³ «Jeowabara kãga nekʼãrẽ aripe oita» (Sal. 37:28). Jeowabara kãgabʉ dayirãra awururaba bia edadamarẽã akʉza iyara kʼawuabʉ sõbede awururaba dayirãba oẽ bada kʼarea zʉbʉriabibʉta. Jeowabʉrʉ kʼawuabʉ sõbede dayirãba bedʼea zroma erbʉde kʼarebaira, maʉ̃ kʼarea Jesúsba jarasi maʉ̃ ewaride Jeowaba wãrĩnu kʼarebaita dayirãra (Luc. 18:​7, 8). Aranʉbai Jeowaba zʉbʉria naʉ̃ drʉadebʉra jõma jõbiyi akʉza dayirãba oẽ bada kʼarea zʉbʉriabipanʉra wua mawũã oda ẽ bayi (Sal. 72:​1, 2).

4. ¿Idi ewadera Jeowabara sãwũã kʼarebabʉ?

⁴ Mamina dayirã zʉbʉriabibʉ ewari jõñienara Jeowabara dayirã jaradiabʉ kʼãrẽta oseapanʉta awururaba dayirãba oẽ bada kʼarea zʉbʉriabibʉrʉde (2 Ped. 3:13). Bari jaraita, jaradiabʉ kʼãrẽta oibarata bedʼea zromata audre ũdu ẽ baita. Iya dayirã jaradiabʉ yi Warra yizadeba, Daizeze Bedʼeade bʉbisi yi Warraba kʼãrẽta osita awururaba iya oẽ bada kʼarea zʉbʉriabisidade adewara Daizeze Bedʼeade ũrãgʼa biata bʉ jaradiabʉta awururaba dayirãba oẽ bada kʼarea zʉbʉriabibʉrʉde kʼãrẽta oibarata.

JɄRA KʼAWUA BʼAIBARA AWURURABA ZɄBɄRIABIBɄRɄDE KʼÃRẼ OI KʼAREA

5. Awururaba daya oẽ bada kʼarea zʉbʉriabibʉrʉdera, ¿kʼãrẽa bia krĩchaibara nekʼãrẽ oi nãã?

⁵ Awururaba daya oẽ bada kʼarea zʉbʉriabibʉdadera dayirãra maʉ̃ kʼarea mejãcha sopʉa baseabʉ akʉza krĩcha onʉmaseabʉ (Ecl. 7:7). Ʉ̃kʉrʉ ẽbẽrarã Jeowa ode kʼẽrẽpapanʉrasi mawũã berabarisi, mawũã sentisida. Bari jaraita, Jobta akʉza Habacucta (Job 6:​2, 3; Hab. 1:​1-3). Wãrĩnubaira ẽbẽra jõmaʉ̃ta iya oẽ bada kʼarea zʉbʉriabibʉrʉdera sopʉapanʉ, mamina audrera jʉra kʼawuapanaibara mawũã zʉbʉriabibʉdade bia krĩcha ẽã nekʼãrẽ ojʉ̃drʉtotoi kʼarea, ¿kʼãrẽa jʉra kʼawuapanaibara? Bia krĩcha ẽ bʉrʉ nekʼãrẽ aña oseabʉ.

6. ¿Kʼãrẽta kʼawuaseapanʉ Absalón berabaridadeba? (Akʉra potota).

⁶ Edaʉde awuru ẽbẽraba dayita zʉbʉriabibʉrʉde mawũã ẽ bʉrʉ dayirã mebẽrãnebema zʉbʉriabibʉrʉdera, dayara nããrãra krĩchadogo abarika oita, mawũã ẽ bʉrʉ jʉrʉita sãwũã ara oita dayikʉzaʉba maʉ̃ bedʼeara. Mamina edaʉde dayikʉzaʉba mawũã oita jʉrʉdogodera biga ẽ, audre bedʼea zromata ũduseabʉ baera. Krĩchadaya Absalón nebʉra ʉ̃rʉ, Absalónba kʼawuaside yi zeze warra Amnónba yi mebẽã Tamar wawa osita, maʉ̃nera iyira mejãcha kĩrʉsi akʉza beakĩrãsi yi mebẽã Amnónʼra adewara Moisés Leybida jarabasi ẽbẽra abaʉba maʉ̃ kayirua obʉrʉdera maʉ̃ ẽbẽrarã beibarabasita (Lev. 20:17). Absalón yi mebẽã mawũã odapeada kʼarea mejãcha kĩrʉira kayirua ẽ basi, baduta mawũã sentiseabasi maʉ̃ kʼareara, mamina Absalónbara yi mebẽãra beabe ẽ basi maʉ̃ra iya oibara ẽ basi baera (2 Sam. 13:​20-23, 28, 29).

7. ¿Salmistabara kʼãrẽta osi zʉbʉriabibʉ ũdubʉrʉdera?

⁷ Awururaba dayirã zʉbʉriabibʉrʉde akʉza ũdubʉdade maʉ̃ra ẽbẽrarã kʼãrẽ zʉbʉria berabari ẽãta. Maʉ̃nera bʉa krĩchaseabʉ, ¿biga basika mʉ̃ kʼãwũã zʉbʉriabida peada kʼarea kʼãrẽ oẽ baira? Krĩchadaya salmista ʉ̃rʉ, naʉ̃ salmistabara ũdubasi sãwũã ẽbẽra kayiruaraba zʉbʉriabipanʉta ẽbẽrarã nekʼãrẽ aripe opanʉrata akʉza iya ũdubasi maʉ̃ra ẽbẽra kayiruarãra awurura zʉbʉriabibʉmina biapanʉta, sobiapanʉta, salmistaba jarasi ẽbẽra kayiruaraitara nekʼãrẽ bia ũduira zare ẽãta (Sal. 73:12). Maʉ̃ra ẽbẽra kayiruara mawũãnʉmʉ ũdubʉrʉ kʼarea salmistara mejãcha sopʉabasi akʉza maʉ̃ta akʉnʉmʉ baera iyitara zarebasi ũduita Jeowaba iyaʼa kʼãrẽ nebia dianʉmʉta, iya maʉ̃ ʉ̃rʉ badua krĩchabasi baera sopʉa sentisi (Sal. 73:​14, 16). Adewara salmistaba jarasi iyira bera Jeowadeba jĩga wãsita (Sal. 73:2). Mawũã berabarisi mebẽã Albertota.

8. ¿Mebẽã abaʉba kʼãrẽta osi iya oẽ bada kʼarea zʉbʉriabisidade?

⁸ Jarasida Albertoba zrʉgasita plata kongregasionebemata, maʉ̃ra sewidabasi. Maʉ̃ kʼarea Albertora wua zõrãrã kongregasionebema babida ẽ basi akʉza mebẽrã iya maʉ̃ oda kʼawuapanʉrãbara bia akʉda ẽ basi. Albertoba jara ũrĩbibʉ iyi sãwũã sentisita: «Mʉ̃ra maʉ̃nera mejãcha sopʉasi akʉza mejãcha kĩrʉsi». Albertora iyi mawũã berabarida kʼarea mejãcha kĩrʉbasi baera 5 poagabayeda idubʉsi ãba yi jʉrebarima wãbadara. Naʉ̃ nebʉraba dayirãʼa jaradiabʉ kʼãrẽta berabariseabʉta awururaba zʉbʉriabibʉrʉde dayirãta kĩrʉbia yi edebidara.

JESÚSDE KĨRÃKʼA ODADRɄ

9. ¿Jesúsʼra sãwũã zʉbʉria osida? (Akʉra potota).

⁹ Iyira awururaba zʉbʉria osida iya kʼãrẽ oẽ bada kʼarea. Bari jaradaita, yi mebẽrãba jarasida iyira kĩrãnemabʉta adewara religion nokʼoraba jarasida iyara zarea erbʉta angelera kayiruaraba kʼarebabʉ baera adewara gorogorora romanorãra iyi kʼarea mejãcha ipidasida akʉza mejãcha posida, tẽã beasida (Mar. 3:​21, 22; 14:55; 15:​16-20, 35-37). Iyi mawũã edasidamina Jesúsʼra maʉ̃ kʼarea kĩrʉ ẽ basi, ¿kʼãrẽta kʼawuapanʉ dayirãba iyi yizadeba?

10. Iyi zʉbʉriabisidadera, ¿kʼãrẽta osi Jesúsbara? (1 Pedro 2:​21-23).

¹⁰ (Akʉra 1 Pedro 2:​21-23).a Jesúsʼra iya oẽ bada kʼarea zʉbʉriabisida. Mamina yizabiata ũdubisi dayirãʼa, maʉ̃ne kʼãrẽta oita kʼawuadamarẽã. Jesúsbara kʼawuabasi sõbede chupea bʼaita akʉza sõbede bedʼeaita (Mat. 26:​62-64). Bari jaraita, ʉ̃kʉrʉ ẽbẽrarãba iyi ʉ̃rʉ sewidata jarasidera iyara kʼãrẽ jara ẽ basi (Mat. 11:19). Mamina iyi bedʼeabʉrʉdera kĩrʉ bedʼea ẽ basi mia imitia bedʼea ẽ basi iyi zʉbʉriabipanʉara. Jesúsbara kʼawuabasi kʼãrẽta oita iduaribisi baera «Daizezeba kʼawua omarẽã», Jesúsbara biʼia kʼawuabasi Jeowabara akʉnʉmʉta iyi sãwũã zʉbʉriabipanʉta iya oẽ bada kʼarea akʉza iya ĩjãbasi Jeowabara kʼawua oita iyi zʉbʉriabipanʉrãra.

11. ¿Sõbede audre yibia bayi chupea bʼaita akʉza bedʼeaita? (Akʉra potota).

¹¹ Dayirãbida Jesúsde kĩrãkʼa oseapanʉ, kʼawua bʼaibara awururaba daya oẽ bada kʼarea zʉbʉriabibʉrʉde kʼãrẽ oita. Bari jaraita, krĩchaseapanʉ kʼãrẽ jara ẽ baita awururaba dayi ʉ̃rʉ kʼãrẽ odata bedʼea zroma ẽ basibʉrʉ, mawũã ẽ bʉrʉ krĩchaseapanʉ chupea bʼaita audre bedʼea zroma ũdu ẽ baita (Ecl. 3:7; Sant. 1:​19, 20). Edaʉde audre yibiabayi dayirã bedʼeaita, bari jaraita dayirãba awuru zʉbʉriabipanʉ ũdubʉrʉde mawũã ẽ bʉrʉ dayirãba ĩjãbʉare bedʼeaita nesidabʉrʉde (Hech. 6:​1, 2). Mawũãsidu dayirã bedʼeabʉrʉdera zarea oibara ibiade bedʼeaita akʉza wawia ũdubita (1 Ped. 3:15).b

12. ¿Dayirãbara sãwũã iduaribiseabʉ Daizezeba kʼawua omarẽã?

¹² Dayirãbida Jesúsde kĩrãkʼa odaibara, iduaribibara jõma «Daizezeba kʼawua omarẽã». Ẽbẽra abaʉba dayirã ʉ̃rʉ aña krĩchabʉbʉrʉ mawũã ẽ bʉrʉ akʉza dayirãta bia eda ẽ bʉrʉ ĩjãnaibara Jeowabʉrʉ kʼawuabʉta wãrĩnu kʼãrẽta berabarisita. Dayirãba kʼawuapanʉbʉrʉ kʼãwũã zʉbʉriabʉra Jeowaba jõma jõbita, naʉ̃ba kʼarebayi dayirãba oẽ bada kʼarea zʉbʉriabipanʉmina awuantaita. Dayirãba jʉ̃ãpanʉbʉrʉ Jeowaba bedʼea zroma jõma ara oita mawũãra dayirãra kĩrʉna ẽ bayi akʉza mia awururata jʉrada ẽ bayi. Dayirãta badua kĩrʉkiki kʼawuabʉrʉ naʉ̃bara nemitiata obiseabʉ akʉza Jeowadeba jĩga babiseabʉ akʉza dayi sobiasida aduabiseabʉ (Sal. 37:8).

13. ¿Kʼãrẽba kʼarebaseabʉ zʉbʉriabipanʉmina awuantaita?

¹³ Wãrĩnubaira dayirãra Jesús kĩrãkʼa nemitia oka ẽ iyara jõma aripe obasi. Edaʉde dayirãba kʼãrẽ obʉdeba mawũã ẽ bʉrʉ kʼãrẽ jarabʉdeba nekʼãrẽ aña jaraseabʉ akʉza maʉ̃ kʼarea jẽda sopʉa baseabʉ dayirãra (Sant. 3:2). Edaʉde awururaba zʉbʉriabida kʼarea sopʉabʉra mesera kĩrãduaseabʉ, mamina bʉ ʉ̃kʉrʉta ẽjũã kĩrãwãreã zebʉrʉdebʉrʉ kĩrãduaseabʉta. Bʉta maʉ̃ne berabaribʉbʉrʉ kĩrãbera Jeowabara bia kʼawuabʉta bʉ kʼãrẽne berabarinʉmʉra akʉza kĩrãbera Jesús nama egorode basidebida iyira zʉbʉriabisidata, maʉ̃ba iyara biʼia kʼawuabʉ bʉ sãwũã sentibʉra (Heb. 4:​15, 16). Jeowaba dayirãʼa dia amaesi yi Warra yizata, mamina iyara maʉ̃ awuara iyi Bedʼeade ũrãgʼa biarata diasi dayirãba kʼawuadamarẽã awururaba zʉbʉriabibʉrʉde kʼãrẽta oita. Bersikulo ũme akʉdaya Romanos librodebemata.

«IDUARIBIRA DAIZEZE KĨRɄBIBA KʼAWUA OMARẼû

14. ¿Kʼãrẽta jarakĩrãbʉ iduaribibara Daizeze kĩrʉbiba kʼawua omarẽã? (Romanos 12:19).

¹⁴ (Akʉra Romanos 12:19). Pabloba kristianora jarasi iduaribimarẽã «Daizeze kĩrʉbiba kʼawua omarẽã». Dayirãbara maʉ̃ ʉ̃rãgʼata ũrĩpanʉ awururaba zʉbʉriabibʉrʉde jõma Jeowa juwade amaepanʉne, iya krĩchabʉ ewaride kʼawua omarẽã yi dayirã zʉbʉriabibʉra, maʉ̃ta osi Johnba mebẽã abaʉba iyi zʉbʉriabiside. Iya jarabʉ: «Mʉ̃ara zarea oibarabasi kĩrʉbia yi edebi ẽ baita mawũã kayirua oẽ baita, maʉ̃ oira zarebasi mamina Romanos 12:19ba kʼarebasi mʉ̃a jʉ̃ã kʼawuabʉ ũdubita akʉza Jeowa ʉ̃rʉ ĩjãita».

15. ¿Kʼãrẽa yibia jõma Jeowa juwade amaeita?

¹⁵ Dayirãba jõma Jeowa juwade amaepanʉbʉrʉ akʉza jʉ̃ãpanʉbʉrʉ iya jõma sãwũã kʼawua oita mawũãra mejãcha zʉbʉria ẽ bayi. Bari jaraita, maʉ̃ kʼarea mejãcha sopʉa ẽ bayi akʉza krĩcha zroma oẽ bayi maʉ̃ sãwũã ara oi kʼarea. Jeowaba dayirãra kʼarebakĩrãbʉ, iya dayirã jarabʉ kĩrãkʼabʉ: «Idʉaribira jõma mʉ̃a kʼawua oita». Jeowaba jarabʉ iya jõbita dayirã zʉbʉriabibʉra akʉza iyara dayirã bedʼea zroma sãwũã ara oira audre yibiata dayirãba oita krĩchabʉira, maʉ̃ba dayirãba maʉ̃ ʉ̃rʉ ĩjãpanʉbʉrʉ Jeowaba kʼarebai jʉ̃ãbʉeda mejãcha krĩcha zroma oẽ bayi maʉ̃ kʼarea. Mawũã krĩchaiba kʼarebasi Johnʼta, iya jarabʉ: «Mʉ̃a kʼawuabʉ jõma Jeowa juwade amaera iya mʉ̃reira audre bia ara oita bedʼea zromara».

«NEBIA OBɄDEBA ÃĨBɄERA YI KAYIRUATA»

16, 17. ¿Yiwidʼibʉba sãwũã kʼarebabʉ nebia obʉdeba ãĩ bʉeita yi kayiruara? (Romanos 12:21).

¹⁶ (Akʉra Romanos 12:21). Pabloba kristianora ũrãgʼaside jarasi «nebia obʉdeba ãĩbʉera yi kayiruata». Jesúsba katumane bedʼea bia jaraside naʉ̃ta jarasi: «Mʉ̃a jarayi kãgadamarẽã mara nejʉrarãra akʉza mara pẽwãpanʉ kʼarea yiwidʼidamarẽã» (Mat. 5:44). Jesúsbara iya jaradade oũdubisi, gorogororaba Jesús ʉ̃tʉ bakurude kachi jirabʉsidadera iyira mejãcha zʉbʉriasi mejãcha pʉata ũdusi. Naʉ̃ra gorogororabara Jesúsʼra bia edada ẽ basi, iya oẽ bada kʼarea zʉbʉriabisida. Dayirãbara bia kʼawua ẽ Jesúsʼra kʼãrẽãba zʉbʉriasita.

¹⁷ Jesúsʼra iyi mawũã zʉbʉriabipanʉa yi edebi ẽ basi awuarabʉrʉ Jeowaʉ̃me kʼẽrẽpabasi. Iyira naʉ̃ra gorogorora imitia bedʼea ẽ basi awuarabʉrʉ yi Zezeʼa yiwidʼibʉrʉde jarasi naʉ̃ra ẽbẽrarãba kʼãrẽ aña obʉra kĩrãduamarẽã (Luc. 23:34). Dayirã zʉbʉriabipanʉra kʼarea Jeowa yiwidʼibʉrʉdera mejãcha kʼarebabʉ dayirãta maʉ̃ra ẽbẽrarãʉ̃me kĩrʉ ba ẽ baita, ãyita jʉra ẽ baita adewara kʼarebabʉ ãya oda kʼarea dayi aukʼara sopʉa ẽ baita.

18. ¿Yiwidʼibʉba sãwũã kʼarebasi Albertora akʉza Johnʼra ãyi zʉbʉribibʉa yi ede bi ẽ baita?

¹⁸ Naʉ̃ artikulode bedʼeasida mebẽrã ũme sãwũã zʉbʉriabisidata ãya oẽ bada kʼarea, ãyi ũmeba jara ũrĩbipanʉ yiwidʼiba sãwũã kʼarebasi maʉ̃a yi edebi ẽ baita. Albertoba jarabʉ: «Mʉ̃ra Jeowaʼa yiwidʼisi mebẽrã mʉ̃ zʉbʉriabida bari akʉza iyaʼa widisi kʼarebamarẽã mʉ̃ kʼãwã zʉbʉria berabarida kʼarea kĩrʉkiki kʼawua ẽ baita». Johnba jarabʉ: «Mʉ̃a Jeowa mejãcha widibasi kʼarebamarẽã mebẽã mʉ̃ zʉbʉriabidara akʉza kʼarebamarẽã mʉ̃abida iyita bia akʉita, iyiʉ̃me kĩrʉba ẽ baita badua, mawũã yiwidʼibʉba kʼarebasi mebẽãba odata kĩrãduaita».

19. ¿Kʼãrẽta odaibara ewari jõi jʉ̃ãpanʉena? (1 Pedro 3:​8, 9).

¹⁹ Dayirãbara kʼawuada ẽ aranʉ bai kʼãrẽãba zʉbʉria ũdudaira, maʉ̃ba kʼãrẽ berabari krĩcha ẽã audre yibiabayi ewari jõmaʉ̃nẽ Jeowaʼa kʼareba widita yiwidʼibʉrʉde, adewara zarea oita awururaba zʉbʉriabibʉrʉde Jesúsba oda kĩrãkʼa oita akʉza Daizeze Bedʼeadedemaba jarabʉde oita. Mawũã opanʉbʉrʉ Jeowaba nebiata diayi dayirã (akʉra 1 Pedro 3:​8, 9).