Jeowa ʉ̃rʉ ibia bedʼeadadrʉ

1. ¿Idi ewadera kʼãrẽta obʉ ẽbẽrarãbara?

IDI ewadera dayirãbara akʉpanʉ ẽbẽrarãbara nekʼãrẽ jõma obʉta wuabemaraba iyita ũdukʼawuadamarẽã akʉza iyi ʉ̃rʉ ibia bedʼeamarẽã. Maʉ̃ba internetʼta zokʼabʉ, nekʼãrẽta obʉ jõmaʉ̃ba iyita akʉdamarẽã sãwũã bia wãta. Mamina krĩchada ẽ Daizeze Jeowa ʉ̃rʉ ibia bedʼeaira. Naʉ̃ artikulode dayirãba kʼawuayi kʼãrẽta jarakĩrãbʉta Daizeze ʉ̃rʉ ibia bedʼeaibara akʉza kʼawuayi kʼãrẽ kʼãrẽa ibia bedʼeaibarata. Adewara sãwũã Jeowa ʉ̃rʉ ibia bedʼeaibarata. Adewara kʼawuadayi Jeowaba aranʉ iyikʉzaʉba weita jõmaʉ̃ba iyi trʉ̃ ʉ̃rʉ ibia bedʼeai ewarita.

KʼÃRẼTA JARAKĨRÃBɄ JEOWA Ʉ̃RɄ IBIA BEDʼEAIBARA

2. ¿Jeowabara sãwũã ũdubisi iyi zareara katuma Sinaínera? (Akʉra poto nããbemata).

² Daizeze Bedʼeade bedʼea «gloria» jarabʉbara jarakĩrãbʉ ẽbẽra abaʉba nekʼãrẽ zromata obʉta mawũã iyi ʉ̃rʉ ibia bedʼeadamarẽã. Jeowaba pʉwʉrʉ Israeldebemarata Egiptodeba ẽdrʉbiside ũdubisi iyi kʼãrẽãba zarea barabʉta. Krĩchadaya naʉ̃ berabarida ʉ̃rʉ. Ewari aba katuma Sinaí kʼawa israelitarãra ãba yi jʉrepanasi asamblea opanʉne. Maʉ̃ne katuma audu jãrãrata pãrĩgʉatotosi akʉza drʉa ureta zesi. Adewara bata baesi akʉza kachu mejãcha jĩgʉa pugabasi dayi kʉwʉrʉ ki kĩrãkʼa (Éx. 19:​16-18; 24:17; Sal. 68:8). Israelitaraba naʉ̃ ũdusidadera ãyira mejãcha kĩrãmigasidabaibara ũdusida baera Jeowa kʼãrẽãba zarea barabʉta.

3. ¿Kʼãrẽta jarakĩrãbʉ Jeowa ʉ̃rʉ ibia bedʼeaibara?

³ ¿Kʼãrẽta jarakĩrãbʉ Jeowa trʉ̃ ʉ̃rʉ ibia bedʼeaibara? Maʉ̃ba jarakĩrãbʉ awuru ẽbẽrarã jara ũrĩbita Jeowa kʼãrẽãba zarea barabʉta akʉza iya kʼãrẽ nebiata erbʉta. Adewara dayirãba nekʼãrẽ bia obʉrʉde biga diaita Jeowaʼa maʉ̃ra iyi zareadeba osi baera (Is. 26:12). Davidba jaradara jipade yiza bia dayirãita, dayirãbida iyide kĩrãkʼa oseapanʉ. Iya jarasi Jeowatrʉ abapai yi zromata, Jeowabʉrʉ abapaiba zarea mejãcha erbʉta akʉza Jeowabʉrʉ nebia mejãcha erbʉta. Adewara jarasi bajãra akʉza egorora Jeowadeta. Davidba maʉ̃ jara berabarida tẽãra israelitara jõmaʉ̃ba ibia bedʼeasida Jeowa ʉ̃rʉ (1 Crón. 29:​11, 20).

4. ¿Sãwũã ibia bedʼeabisi Jesúsba Jeowa ʉ̃rʉ?

⁴ Jesús nama egorode baside yi Zeze ʉ̃rʉ ibia bedʼeabasi. ¿Iya maʉ̃ra sãwũã osi? Iya miõba okata obʉrʉdera jara ũrĩbibasi maʉ̃ra yi Zezedeba osita (Mar. 5:​18-20). Adewara Jeowa ʉ̃rʉ ibia bedʼeabasi awurura yi Zeze ʉ̃rʉ bedʼeabʉrʉde nebiata jarabasi baera. Akʉza wuabemara sãwũã edabʉdeba ibia bedʼeabibasi yi Zeze ʉ̃rʉ. Ewari aba Jesúsba sinagogade jaradianʉmasi ẽbẽrarã. Maʉ̃ne eda basi ẽbẽra wẽrã aba 18 poaga bata demonio abʉta. Iyira maʉ̃ demonioba ẽkarra jʉre erbasi. Jesúsba maʉ̃ta ũdui kʼawuasi maʉ̃ ẽbẽra wẽrã mejãcha zʉbʉriabʉta, maʉ̃ kʼarea so borokea akʉ kʼãrãpe jarasi maʉ̃ demonio neẽbeita. Aramaʉ̃ta maʉ̃ ẽbẽra wẽrãra betotosi. Maʉ̃ tẽã ẽbẽra wẽrãra Jeowa ʉ̃rʉ ibia bedʼeasi (Luc. 13:​10-13). Naʉ̃ ẽbẽra wẽrãbara erbasi kʼãrẽa Jeowa ʉ̃rʉ ibia bedʼeaira. Idi ewade dayirãbida erpanʉ kʼãrẽa Jeowa ʉ̃rʉ ibia bedʼeaira.

KʼÃRẼA IBIA BEDʼEAIBARA JEOWA Ʉ̃RɄ

5. ¿Kʼãrẽa wawia ũdubiseapanʉ Jeowara?

⁵ Dayirãra Jeowa ʉ̃rʉ ibia bedʼeaibara iyita wawiapanʉ baera. Nekʼãrẽ mejãcha kʼarea wawia ũdubidaibara. Bari jaradaita, Jeowara yi zroma iyi kĩrãkʼara neẽ akʉza iyi zareara jõka (Sal. 96:​4-7). Jeowaba naʉ̃ drʉade nekʼãrẽ parãnaba ũdubibʉ iyira mejãcha buru biata akʉza Jeowaba dayirãʼa bebʉta diasi. Mamina bari maʉ̃ awa dia ẽ basi, diasi nekʼãrẽ jõma dayirãba nesidabʉta bia bʼaita (Apoc. 4:11). Jeowabara kãga jõka ũdubibʉ (Apoc.15:4). Adewara Jeowaba nekʼãrẽ obʉrʉdera biʼia obʉ akʉza iya nekʼãrẽ oya asi bʉrʉ maʉ̃ra aripe obʉ (Jos. 23:14). Propeta Jeremíasbida jarasi Jeowa kĩrãkʼara neẽãta, iyitrʉ abapai yi zromata (Jer. 10:​6, 7). Nama ũdutabedadera dayirãbara nekʼãrẽ mejãcha kʼarea wawia ũdubiseapanʉ dayirã Zeze Jeowara. Mamina bari maʉ̃ kʼareabʉrʉ wawia ũdubibara ẽ Jeowabida kãga ũdubidaibara.

6. ¿Kʼãrẽa kãgapanʉ Jeowara?

⁶ Dayirãra Jeowa ʉ̃rʉ ibia bedʼeapanʉ iyita mejãcha kãgapanʉ baera. Jeowabara nebia mejãcha erbʉ mawũã dayirãba iyita kãgadamarẽã. Bari jaraita, so borekea akʉbʉ akʉza so zʉbʉria akʉbʉ (Sal. 103:13; Is. 49:15). Dayirã zʉbʉriabʉrʉdera Jeowara mejãcha sopʉabʉ dayima iyita zʉbʉriabibʉ kĩrãkʼabʉ baera (Zac. 2:8). Adewara Jeowaba kʼarebabʉ dayirãta iyi kʼawa panamarẽã mawũã iyi neũdukʼawua bia bʼaita (Sal. 25:14; Hech. 17:27). Adewara Jeowara yi zromamina iyara eda krĩchabʉta ũdubibʉ. Iyara ẽbẽrarãra nemitia omiamina kʼarebabʉ baera (Sal. 113:​6, 7). Jeowaba mawũã nebiata mejãcha erbʉ baera jõmaʉ̃ta iyi ʉ̃rʉ ibia bedʼeakĩrãpanʉ (Sal. 86:12).

7. ¿Adewara kʼãrẽta oseabʉ dayirãba Jeowa ʉ̃rʉ ibia bedʼeaita?

⁷ Dayirãra Jeowa ʉ̃rʉ ibia bedʼeapanʉ kãgapanʉ baera wuabemarabida ũdukʼawuadamarẽã Jeowata. Wãrĩnubaira ẽbẽrarã mejãchaʉba kʼawuada ẽ Jeowa sãwũã chura, ¿kʼãrẽa? Diaruba ẽbẽrarã aña krĩchabibʉ baera Jeowa ʉ̃rʉ akʉza Jeowa ʉ̃rʉ sewidata jarabʉ baera (2 Cor. 4:4). Diarubara ẽbẽrarã krĩchabibʉ Jeowara ẽbẽra kayiruata iya kãgakʉta oẽãnera zʉbʉriabi bareta ẽbẽrarã akʉza krĩchabibʉ ẽbẽrarã, naʉ̃ drʉade nemitiabʉra jõma Daizezedeba zebʉta. Mamina dayirãbara biʼia kʼawuapanʉ Jeowa sãwũã chʉra, maʉ̃ba ẽbẽrarã jaradiakĩrãpanʉ iyi ʉ̃rʉ. Mawũã opanʉneba ibia bedʼeabipanʉ iyi ʉ̃rʉ (Is. 43:10). Atia akʉdaya ʉ̃kʉrʉ bersikulora Salmo 96debemata. Nama jarabʉ audre Jeowa ʉ̃rʉ ibia bedʼeaibarata. Maʉ̃ ʉ̃rʉ kʼawuaiba kʼarebayi dayirãba krĩchadamarẽã Jeowa ʉ̃rʉ sãwũã audre ibia bedʼeaita.

SÃWŨÃ JEOWA Ʉ̃RɄ IBIA BEDʼEASEAPANɄ

8. ¿Sãwũã Jeowa ʉ̃rʉ ibia bedʼeaseapanʉ? (Akʉra Salmo 96:​1-3).

⁸ (Akʉra Salmo 96:​1-3). Dayirãra Jeowa ʉ̃rʉ ibia bedʼeapanʉ iyi ʉ̃rʉ bedʼea biata jarabʉrʉde. Naʉ̃ bersikulode Jeowa ode panʉra jarabʉ trãnamarẽã Jeowaʼa, iyi trʉ̃ ʉ̃rʉ ibia bedʼeadamarẽã akʉza ẽbẽrarã jaradamarẽã Jeowaba ãyi ẽdrʉbita. Adewara pʉwʉrʉra jõmaʉ̃a jaradamarẽã Jeowa zarea barabʉ ʉ̃rʉ. Naʉ̃ jõmaneba Jeowa ʉ̃rʉ ibia bedʼeaseabʉ. Judioraba akʉza kristianora nããbema siglodebemaba nekʼãrẽ jõma osida Jeowa ʉ̃rʉ ibia bedʼeabita (Dan. 3:​16-18; Hech. 4:29). ¿Dayirãbara sãwũã ãyide kĩrãkʼa oseabʉ?

9, 10. ¿Kʼãrẽta kʼawuapanʉ Angelina berabaridadeba? (Akʉra potota).

⁹ Akʉdaya kʼãrẽta berabarisita mebẽã Angelina,a iyira Estados Unidosdebema. Iyi trajabʉde ẽbẽra abaʉba Jeowa ʉ̃rʉ imitia bedʼeasi, aramaʉ̃ta iyira Jeoware bedʼeasi. Angelinara ʉ̃ra bʉrʉ traja jʉ̃drʉbʉrʉ baera wuabemara jara ũrĩbibarabasi aba abakaʉba kʼãrẽta obʉta. Maʉ̃ kʼarea iya ʉ̃rãbʉrʉ ũdubibasi wuabemara potota, ũdubita iyira kʼãrẽãba sobiabʉta Jeowa ode bʉ baera. Mamina iyi bedʼeai nãã iyiʉ̃me trajabʉta imitia bedʼea jʉ̃drʉtotosi Jeowa ʉ̃rʉ, iyira dapʉẽsidamina Daizeze Jeowa ode. Angelinaba jarabʉ: «Mʉ̃ra mejãcha perasi mamina mʉ̃yikʉza widisi, ‹¿mʉ̃a iduaribika kʼãwũã Jeowa trʉ̃ ʉ̃rʉ imitia bedʼeamarẽã?›».

¹⁰ Yumakẽrã bedʼea berabarida tẽã Angelinara Daizeze Jeowaʼa yiwidʼisi, mõbe iyaʼa ibiade bedʼeasi. Iya jarasi: «Mʉ̃sida bʉ kĩrãkʼabʉ. Mʉ̃ra wiña kiruedaʉba Jeowa ode dapʉẽsida akʉza idi basidu mʉ̃ra Jeowa odebʉ». Maʉ̃ra iyitara zare basimina Angelinabara ũdubisi aduʼabʉta, mõbe ũdubisi potora iyi sãwũã Jeowaita sobiade trajabʉta akʉza ibiade jara ũrĩbisi iya ĩjãbʉ ʉ̃rʉ (1 Ped. 3:15). Angelina bedʼea berabarida tẽãra naʉ̃ yumakẽrãbara iyi sãwũã krĩchabadara awuara krĩchasi. Iya jarasi iyisida sobiabasita Jeowa ode basidera. Angelinaba jarabʉ: «Dayirãitara jipade yibia Jeowa trʉ̃are bedʼeaira». Awuru ẽbẽrarã Jeowa ʉ̃rʉ imitia bedʼeabʉrʉdera dayirãsida Jeowa trʉ̃are bedʼeaibara, iyi ʉ̃rʉ ibia bedʼeaibara maʉ̃ra jipade yibia baera.

11. ¿Jeowa ode panʉrabara sãwũã oũdubi zebʉda Salmo 96:8ba jarabʉra?

¹¹ (Akʉra Salmo 96:8). Dayirãba kʼãrẽ erbʉdeba Jeowa ʉ̃rʉ ibia bedʼeabipanʉ. Kristianora wãrĩnuarabara maʉ̃ opanʉne ibia bedʼeabipanʉ Jeowa ʉ̃rʉ (Prov. 3:9). Bari jaraita, nawedara israelitarabara platata diabasi mawũã ẽ bʉrʉ ãya nekʼãrẽ bia erbʉta diapanasi templo maparãnamarẽã akʉza bia akʉdamarẽã (2 Rey. 12:​4, 5; 1 Crón. 29:​3-9). Ʉ̃kʉrʉ ẽbẽrarã Jesús kʼaidubadarãbara ãya nekʼãrẽ bia erbʉta diapanasi Jesúsʼa akʉza iyi apostoleraʼa ãya erpanamarẽã ãya nesidabʉta (Luc. 8:​1-3). Adewara Daizeze Bedʼeaba jarabʉ nããbema siglode ʉ̃kʉrʉ kristianora jarrababa zʉbʉriaside mebẽrã awuru pʉwʉrʉdebemaba platata zokʼa bʉesita maʉ̃ra mebẽrã kʼarebaita (Hech. 11:​27-29). Idi ewade dayirãbida dayirãba nekʼãrẽ bia erbʉta zokʼaseabʉ Jeowa ʉ̃rʉ ibia bedʼeaita.

12. ¿Sãwũã Jeowa ʉ̃rʉ ibia bedʼeabiseapanʉ dayirãba donasion diapanʉneba? (Akʉra potota).

¹² Akʉdaya nebʉra aba ũdubibʉta sãwũã dayirãba donasion diabʉba Jeowa ʉ̃rʉ ibia bedʼeabibʉta. Poaga 2020 Zimbabuede kue ze ẽ basi baera ẽbẽrarã mejãcha bera beisi jarrababa. Maʉ̃rane eda basi mebẽã aba yi trʉ̃ Priscata. Maʉ̃ mawũã berabarinʉmʉra jipa zare basi akʉza iyi neuibarabasimina Priscabara idubʉ ẽ basi Daizeze Bedʼea jaradiabʉta miércolesza akʉza viernesza. Iyi de kʼawabemarãra iyi kʼarea ipidapanasi neuikaude jaradia wãbasi baera iyaʼa jarapanasi: «Bʉra jarrababa beiyi». Priscabara kʼawuabasi Jeowaba bia akʉita iyira, maʉ̃ kʼarea kʼãwũã panʉbasi: «Jeowabara iyi ode kʼẽrẽpabʉrãra amae ẽ». Audre ẽãne dayirã organizasionba Priscaʼa zokʼa bʉesi yikota akʉza nekʼãrẽ iya nesidabʉta, dayirãba donasion diabʉdeba. Iyi de kʼawabemaba maʉ̃ta ũdubʉdadera Prisca jarasida: «Wãrĩnu Daizezebara doba amae ẽ bʉra». Maʉ̃ra ẽbẽrarã iyi de kʼawabema siete bʉta ãba yi jʉrebarieda wã jʉ̃drʉsi.

13. ¿Sãwũã Jeowa ʉ̃rʉ ibia bedʼeabiseabʉ dayirãba obʉdeba? (Salmo 96:9).

¹³ (Akʉra Salmo 96:9). Dayirãbara Jeowa ʉ̃rʉ ibia bedʼeabipanʉ dayirã sãwũã bʉdeba. Nawedara saserdoterata Jeowa templo eda akʉza tabernakulo eda wãibarabasibʉrʉ maʉ̃nera ãyira neneẽã baibarabasi, kʼãrẽ jaigʉa neẽã (Éx. 40:​30-32). Dayirãsida idi ewade kʼãrẽ jaigʉa neẽã panaibara, mamina audrera dayirãra Jeowa dabʉ nãã neneẽã baibara (Sal. 24:​3, 4; 1 Ped. 1:​15, 16). Daizeze Bedʼeaba jarabʉ dayirãbara idubʉibarata nãã odabara akʉza nekʼãrẽ awuru yiwidita ojʉ̃drʉibarata. Maʉ̃ba jarakĩrãbʉ dayirãba naweda nemitiata obasibʉrʉ Jeowaba kãga ẽãta mawũã ẽ bʉrʉ Jeowaba kãga ẽ kĩrãkʼa krĩchabasi bʉrʉ, maʉ̃ra idubʉibarata. Mõbe krĩchaibarata akʉza nekʼãrẽ ojʉ̃drʉibarata Jeowaba kãgabʉ kĩrãkʼa akʉza iya nebia erbʉta oũdubibarata (Col. 3:​9, 10). Ẽbẽrarã naweda nemitia mejãcha obadarabida idubʉseabʉ maʉ̃ra, mõbe nebiata ojʉ̃drʉseabʉ Jeowa kʼarebadeba.

14. ¿Kʼãrẽta jaradiabʉ Jack nebʉraba? (Akʉra potota).

¹⁴ Akʉdaya Jack nebʉrata. Naʉ̃ yumakerãra jipade ẽbẽra kayirua basi, iyara nemitia mejãcha obasi maʉ̃ kʼarea iyira trʉ̃gapanasi demonio. Adewara iyara jʉ̃ãbasi iyi beadai ewarita. Iya maʉ̃ jʉ̃ãbʉeda ewari aba mebẽã abaʉba jaradia jʉ̃ẽsi Daizeze Bedʼeata. Aramaʉ̃ta Jackbara kʼawua jʉ̃drʉsi Daizeze Bedʼeata maʉ̃ mebẽãʉ̃me. Jackba nemitia mejãcha osimina iyara nebiata ojʉ̃drʉsi. Iya sãwũã krĩchabadara awuara krĩchabesi. Maʉ̃ tẽã Jackʼra buru kʼoesi Jeowa ʉ̃rʉ Kʼawuabipanʉrã kĩrãkʼa. Jackbara jipade nekʼãrẽ awuara osi, iyira jipa ẽbẽra kayirua badata ẽbẽra bia basi baera. Maʉ̃ kʼarea ʉ̃kʉrʉ ẽbẽrarã karsel akʉbadarãra iyi beadai nãã mejãcha jẽgasida. Adewara gorogorora nokʼo abaʉba naʉ̃ta jarasi: «Namara yi audre ẽbẽra kayiruara Jack basi mamina atiara yi audre ẽbẽra biara Jack». Jack beadapeadata semana aba berabaribʉrʉde mebẽrãra jʉ̃ẽsida karselde bʉbawara ãba yi jʉreita, maʉ̃ne ãya ũdusida ẽbẽra aba jʉ̃ẽsita jʉ̃ẽkata, ¿kʼãrẽa jʉ̃ẽsi maʉ̃ ẽbẽrarã? Iya jipade kĩrãmiga akʉbasi kʼãwũã Jackba iya nãã nemitia obadata idi ewade nebiata osi baera. Iyabida kʼawuakĩrãbasi kʼãrẽta oibarata Jeowaba kãgabʉde bʼaita. Naʉ̃ba dayirã ũdubibʉ dayirã sãwũã bʉdeba Jeowa ʉ̃rʉ ibia bedʼeabiseabʉta (1 Ped. 2:12).

JEOWABARA ARANɄBAI SÃWŨÃ IBIA BEDʼEABI IYI TRɄ̃ Ʉ̃RɄ

15. ¿Aranʉbai kʼãrẽta oi Jeowaba iyi trʉ̃ jipa neneẽã babita? (Salmo 96:​10-13).

¹⁵ (Akʉra Salmo 96:​10-13). Salmo 96 jõbodoare jarabʉ Jeowara Nokʼo biata akʉza iyara biʼia kʼawua obʉta. ¿Jeowabara sãwũã neneẽã babi iyi trʉ̃ra aranʉ bʼaira? Maʉ̃itara Jeowabara iya kʼawua obʉrʉde jõma daucha kʼawua oyi. Bari jaraita, aranʉbai Jeowaba jõbiyi Babilonia Zromata, maʉ̃ba iyi trʉ̃ ʉ̃rʉ mejãcha imitia bedʼeabisi baera (Apoc. 17:​5, 16; 19:​1, 2). Ẽbẽrarãba ũdubʉdade religion zeri ẽãra jõma jõbibʉta ãya krĩchaseabʉ Jeowa pʉwʉrʉeda zeita. Maʉ̃ tẽãra Armagedón zebʉrʉde Jeowaba jipa jõbiyi Diaruba atia sãwũã zokʼabʉra, naʉ̃ drʉade nekʼãrẽ mitiabʉra wua neẽ bayi. Adewara ẽbẽrarã Jeowa trʉ̃ ʉ̃rʉ imitia bedʼeapanʉrãra akʉza iyi jʉrapanʉrãra Jeowabara makenañi. Mõbe ẽdrʉbiyi yi ẽbẽrarã iyi kãgapanʉrãta, iya zokʼabʉ opanʉrata akʉza iyi ʉ̃rʉ ibia bedʼeapanʉrata (Mar. 8:38; 2 Tes. 1:​6-10). Jesúsba mil poagabayeda zokʼabʉta berabarida tẽã akʉza Diaru ʉ̃tʉ zedata jõbʉrʉ tẽã Jeowa trʉ̃ra maʉ̃nebʉrʉ jipa neneẽã bayi (Apoc. 20:​7-10). Maʉ̃ ewaridera ẽbẽrarã naʉ̃ drʉa jõmanebemaba kʼawuadayi Jeowa kʼãrẽãba yi zromata akʉza iyi ʉ̃rʉ ibia bedʼeadayi (Hab. 2:14).

16. ¿Kʼãwũãena kʼãrẽta oita krĩchabʉ bʉara? (Akʉra potota).

¹⁶ Kʼãrẽ bia bai ẽjũã kĩrãwãreãnẽ jõmaʉ̃ba Jeowa trʉ̃ ʉ̃rʉ ibia bedʼeadaita. Maʉ̃ ewari zeyeda yibia bayi nekʼãrẽ jõma oita Jeowa ʉ̃rʉ bedʼeaita akʉza dayirãba nekʼãrẽ obʉdeba Jeowa trʉ̃ ʉ̃rʉ ibia bedʼeabita. Zõrãrã buru biaba kʼarebakĩrãpanʉ baera dayirãba maʉ̃ta biʼia odamarẽã ãya jʉrʉsida poaga 2025dera naʉ̃ testota Salmo 96:8 nama jarabʉ: «Jeowa ʉ̃rʉ ibia bedʼeaidua iyi trʉ̃ra yi zroma baera».