ARTIKULO KʼAWUAITA 15
TRÃBI 30 Mi Amigo, mi Padre, mi Dios
Jeowa kʼawa bʼaira jipade yibia
«Mʉ̃itara Daizeze orraira audre yibia» (SAL. 73:28).
KʼÃRẼTA ŨDUDAITA
Naʉ̃ artikulode kʼawuadayi kʼãrẽa yibiata Jeowa kʼawa bʼaira akʉza kʼãrẽ nebiata ũduita mawũã odara.
1, 2. (1) ¿Kʼãrẽta oibara neũdukʼawua bia erbaita? (2) ¿Kʼãrẽta kʼawuadayi naʉ̃ artikulodera?
KRĨCHARA bʉa neũdukʼawua bia erbʉta, ¿sãwũã audre iyi neũdukʼawua basi? Bʉra iyiʉ̃me ewari bio berabaribasi baibara, bʉa kʼawuasi baibara iyi kʼãrẽne sãwũã berabarisita, kʼawuasi baibara iya kʼãrẽta kãga ẽãta akʉza kʼãrẽta kãgata adewara mawũã ewari biobʉ baera akʉbasi baibara iyi sode kʼãrẽ nebia erbʉta, maʉ̃ba bʉabida iyide kĩrãkʼa okĩrãbasi bʼaibara. Mawũã bʉba kʼarebasi baibara bʉa bʉ neũdukʼawua audre kãgamarẽã.
2 Dayirãba neũdukʼawua bia erbʉ audre ũdukʼawuaira nesidapanʉ iyiʉ̃me ewari bio berabarita. Abarika Jeowa ũdukʼawuaita akʉza iyi kãgaira nesidapanʉ iyi ʉ̃rʉ audre kʼawuadaita. Naʉ̃ artikulode kʼawuadayi sãwũã Jeowa kʼawa baseapanʉta akʉza kʼãrẽ nebiata ũdudaita mawũã odara, mamina nããra kʼawuadayi, ¿kʼãrẽa yibiata Jeowa kʼawa bʼaira?
3. Dayirãba Jeowa orrabʉrʉdera nebiata ũdupanʉ, ¿kʼãrẽa yibia maʉ̃ ʉ̃rʉ krĩchaira?
3 Dayirãba kʼawuapanʉmina Jeowa neũdukʼawua bʼaira yibiata, mamina audre kʼarebayi dayirãba bia krĩchadara kʼãrẽa yibiata iyi orradaira maʉ̃ba kʼarebai baera dayirãra iyi neũdukʼawua bʼaita (Sal. 63:6-8). Krĩchara naʉ̃ yiza ʉ̃rʉ, ẽbẽrabara kʼawuabʉ dayi nekoiba, ejersisio oiba akʉza bia kʼãĩba maʉ̃ta neẽbʉrʉ bania doiba kʼarebaseabʉta dayi kakua bia bʼaita, mamina biga ẽ bayi bari maʉ̃ ʉ̃rʉ kʼawua bʼaita, awuarabʉrʉ maʉ̃ ʉ̃rʉ badua krĩcha bʼaibara kʼãrẽ nebia ũduita maʉ̃ta ora, abarika bʉ Daizeze ʉ̃rʉ kʼawuaita. Dayirãba kʼawuapanʉ Daizeze orraira yibiata mamina bari krĩcha ẽ baibara maʉ̃ ʉ̃rʉ, awuarabʉrʉ krĩchaibara kʼãrẽ nebiata ũduita dayirãba orradara, maʉ̃ba kʼarebai baera iyi neũdukʼawua bʼaita (Sal. 119:27-30).
4. ¿Kʼãrẽta jarasi salmistaba Salmo 73:28dera?
4 (Akʉra Salmo 73:28). Naʉ̃ Salmo 73 bʉdara Leví tribudebemabasi. Iyira nãã templode trãbasi adewara iya nekʼãrẽ za kʼawuabasi templodera. Naʉ̃ salmistara Daizeze ode kʼẽrẽpabʉta dããrabasi bʼaibara, iyara kʼawuabasi kʼãrẽãba yibiata badua krĩchaita Jeowa kʼawa bʼaira adewara kãgabasi wuabemabida kʼawuamarẽã kʼãrẽa yibiata Jeowa kʼawa bʼaira. Kõbebʉrʉ akʉdaya ʉ̃kʉrʉ nebia maʉ̃nebemata.
JEOWA KʼAWA BʼAIBA MEJÃCHA SOBIABIBɄ DAYIRÃRA
5. (1) ¿Kʼãrẽa Jeowa kʼawa baibara sobiabibʉ? (2) ¿Sãwũã kʼarebabʉ bʉra Jeowaba bʉaʼa buru bia diabʉbara? (Proverbios 2:6-16).
5 Dayirãta audre Jeowa kʼawa panʉbʉrʉ, audre sobia panañi (Sal. 65:4). ¿Kʼãrẽa mawũã jarapanʉ? Bari jaradaita Daizeze Bedʼeaba jarabʉta dayirãba oũdubidara, Daizezeba dayirã buru bia diayi nemitia oẽ baita mawũã tẽã zʉbʉria ẽ baita (akʉra Proverbios 2:6-16). Maʉ̃ kʼãrẽa Daizeze Bedʼeaba naʉ̃ta jarabʉ: «Sobiabʉ yumakẽrãba buru bia ũdubʉra akʉza yumakẽrã kʼawuabʉra saʉ̃ta yibiata akʉza saʉ̃ta zeriẽãta» (Prov. 3:13).
6. ¿Kʼãrẽba krĩcha zroma obisi salmistara?
6 Jeowa neũdukʼawuarasida mejãcha krĩcha zroma oseapanʉ, mawũã berabarisi Salmo 73 bʉdata, iya krĩchabasi ẽbẽrarã Jeowa odebʉ ẽãra akʉza ẽbẽra kayiruarãra bia wãta, maʉ̃ba mejãcha krĩcha zroma obisi akʉza krĩchabisi ãya nekʼãrẽ bia erbʉta iyabida erbaita. Salmistara mejãcha kĩrʉbasi iya akʉbasi baera ẽbẽra kayiruarãra plata mejãcha erbasita, iyi mara maʉ̃ra ẽbẽrarã kayirua ẽ kĩrãkʼa basi, jipa zʉbʉria ẽ kĩrãkʼa (Sal. 73:3-7, 12). Maʉ̃ba ẽbẽra biaraira bia wã kĩrãkʼa basi. Salmistara mejãcha krĩcha zroma obasi baera iya krĩchasi Daizeze ode kʼẽrẽpa bʼaira zeri ẽãta (Sal. 73:13).
7. ¿Sãwũã jẽda sobia baseapanʉ dayirã krĩcha zroma opanʉnera? (Akʉra poto nããrabemata).
7 Salmistara mejãcha krĩcha zroma obasi baera, jʉrʉsi iyi wua mawũã krĩcha zroma oẽ baita, maʉ̃ba salmistara templo eda wãsi, mama Jeowaba kʼarebasi iyi bia krĩchamarẽã (Sal. 73:17-19). Jeowara dayirã neũdukʼawuara baera kʼawuabʉ dayirã sãwũãbʉra, maʉ̃ba dayirãra Jeowa yiwidʼidara iyara kʼarebayi mebẽrãneba, kongregasioneba adewara iyi Bedʼeadeba, mawũã zarea diayi dayirã krĩcha zroma obʉ awuantaita. Adewara dayirã krĩcha zroma obʉde kʼawua ẽãne kʼãrẽta sãwũã oita, Jeowaba dayirãʼa zarea diayi aduʼa bʼaita (Sal. 94:19).a
Levita Salmo 73 bʉdara santuario kĩrãbita edaʉnʉmʉ. (Akʉra parrapo 7).
JEOWA KʼAWA BʼAIBARA ATIA SOBIABABISEABɄ AKɄZA Ʉ̃RA ZEIDEBIDA
8. ¿Adewara kʼãrẽ nebiata ũdupanʉ Jeowa kʼawa bʼaibara?
8 Dayirãta Jeowa neũdukʼawuabʉrʉ nekʼãrẽ bia ũme ũdudayi. Nããra, dayirãra mejãchade bia wãñi. Ũmera, ʉ̃ra zeide nekʼãrẽ biata jʉ̃ãnañi (Jer. 29:11). Naʉ̃ra nebiata aba abaka kʼawuadayi.
9. ¿Kʼãrẽa sobiabibʉ Jeowa kʼawa bʼaita jʉrʉbʉbara?
9 Dayirãba Jeowata jʉrʉpanʉbʉrʉ, mawũãra audre sobia panañi. Idi ewadera ẽbẽrarãbara krĩchabʉ Daizezera neẽãta akʉza jarapanʉ ẽbẽrarã naʉ̃ drʉadera neẽnʉmeita, kõbe dayirãbara mawũã krĩchada ẽ, Daizeze Bedʼea estudiadadeba kʼawuapanʉ Daizezera wãrĩnu bʉta akʉza iyi jʉrʉbʉara Daizezebara nebiata diaita (Heb. 11:6). Adewara Daizeze Jeowabara parãsi dayirãra iya jarabʉta opanamarẽã, maʉ̃ kʼarea dayirãba opanʉbʉrʉ iya zokʼabʉta mawũãra sobiapanañi (Deut. 10:12, 13).
10. ¿Salmo 37:29ba jarabʉdebara, kʼãrẽ nebiata diaita jarabʉ Jeowabara iyi ʉ̃rʉ ĩjãpanʉara?
10 Ẽbẽrarã mejãchaʉba kʼãrẽ nebiata jʉ̃ãna ẽ maʉ̃ba ãyara krĩchabʉ trajaita, mia kʼãĩta, wũãwũãra baraita akʉza plata mejãcha wuagabʉ ãyi zõrãbabʉrʉde maʉ̃ta gastaita. Mamina ãyara kʼawua ẽ Daizezeba kʼãrẽ nebiata weita jarabʉta, kõbe Jeowa ode panʉrabara ĩjãpanʉ Jeowabara akʉita iyi ode panʉrãra (Sal. 25:3-5; 1 Tim. 6:17). Ĩjãpanʉ Jeowabara iya jaradara aripe oita, maʉ̃ kʼarea ẽjũã kĩrãwãreãnẽra jʉ̃ãpanʉ nekʼãrẽ bia berabarita, maʉ̃nebemara jõmaʉ̃ba iya yiwidʼi bʼaita (akʉra Salmo 37:29).
11. ¿Kʼãrẽ nebiata ũdupanʉ Jeowa kʼawapanʉrabara akʉza sãwũã sentibʉ Jeowara?
11 Daizeze kʼawa bʼaibara nekʼãrẽ biata mejãcha ũdubʉ. Bari jaraita, Jeowaba jarabʉ jipa kĩrãduaita dayirã nemitiara, dayirãta maʉ̃ nemitia kʼarea jẽda krĩchadara (Is. 1:18). Adewara dayi krĩchade aduʼa bʼaita Jeowaba mawũã obʉ baera (Sal. 32:1-5). Jeowara mejãcha sobiabʉ dayirãba jʉrʉbʉbʉrʉ iyi kʼawa bʼaita (Prov. 23:15). Bʉara nekʼãrẽ biata mejãcha ũdu zebʉrʉbaibara naʉ̃ awuara, Jeowa kʼawa bʉ baera. Mamina, ¿kʼãrẽta oseabʉ audre Jeowa kʼawa bʼaita?
KʼÃRẼTA ODAIBARA AUDRE JEOWA KʼAWA BʼAITA
12. ¿Kʼãrẽta oibara bʉara audre Jeowa kʼawa bʼaita?
12 Bʉ buru kʼoeside ũdubisi nekʼãrẽ jõma osita Jeowa kʼawa bʼaita, bʉa kʼawuasi Jesús ʉ̃rʉ akʉza Jeowa ʉ̃rʉ adewara bʉa nemitia oda kʼarea jẽda krĩchasi akʉza ĩjãbʉta ũdubisi, maʉ̃ awuara nekʼãrẽ jõma osi bʼaita Jeowaba zokʼabʉde, mamina dayirã audre Jeowa kʼawa bʼaira maʉ̃ta obʉta idubʉ ẽ baibara (Col. 2:6).
13. ¿Kʼãrẽba kʼarebasebʉ audre Jeowa kʼawa bʼaita?
13 ¿Kʼãrẽta odaibara dayirã audre Jeowa kʼawa bʼaita? Naʉ̃ nekʼãrẽta ũbea oseabʉ. Aba, Daizeze Bedʼeata le bʼaibara akʉza estudiaibara. Mamina bari ʉ̃rʉbai le ẽ baibara, dayirãbara kʼawuaibara kʼãrẽta kãgabʉta Daizezeba akʉza Daizeze Bedʼeaba jarabʉta oũdubidaibara (Efes. 5:15-17). Ũme, dayirãba ĩjãbʉra zarea erbaibara, maʉ̃ kʼareara badua jẽda krĩcha bʼaibara Jeowaba dayirãʼa kʼãrẽãba kãga ũdubi zebʉrʉta. Ũbea, jʉraibara Jeowaba jʉrabʉta, adewara dayirãbara erba ẽ baibara neũdukʼawua kayiruara, maʉ̃bara Jeowaba zokʼabʉta o ẽ baera (Sal. 1:1; 101:3).
14. ¿Sãwũã sobiabiseabʉ Jeowara ewariza dayirãba nekʼãrẽ obʉdeba? (1 Corintios 10:31 akʉza akʉra potota).
14 (Akʉra 1 Corintios 10:31). Dayirãbara ewariza jʉrʉibara Jeowa sãwũã sobiabita, maʉ̃itara bari Daizeze Bedʼea jaradia wãibara ẽ akʉza ãba yi jʉrebari eda, dayirãba ewariza nekʼãrẽ obʉdeba ũdubiyi Jeowa sãwũã sobiabita, maʉ̃ kʼarea dayirãra zarea odaibara wuabema sewa ẽ baita akʉza dayirãba nekʼãrẽ erbʉra wuabemara diaibara (2 Cor. 8:21; 9:7). Adewara dayirãbara Jeowa biga diaibara dayi bebʉta diasi baera, maʉ̃ kʼarea bia nekopanʉ, bania dopanʉ akʉza nekʼãrẽ jõma obʉ dayi mejãcha kaya ẽ baita. Mawũẽra, nekʼãre jõma opanʉbʉrʉ Jeowa sobiabita mawũãra Jeowabara dayirãra audre kãgayi, mawũã Jeowa kʼawapanʉta ũdubidayi (Luc. 16:10).
Nekʼãrẽ jʉra kʼawua manejaiba, ejersisio oiba, wuabemara nekʼãrẽ diaiba akʉza bia nekoiba ũdubibʉ Jeowa kʼawa bakĩrãbʉta akʉza naʉ̃ba Jeowata sobiabibʉ. (Akʉra parrapo 14).
15. ¿Jeowabara sãwũã edadamarẽãbʉ wuabemara?
15 Jeowabara kãga ẽbẽrarã iyi ode kʼẽrẽpa panʉrata akʉza iyi ode panʉra ẽãsida (Mat. 5:45). Maʉ̃ kʼarea iyara kãgabʉ iyi ode panʉrabara wuabemarara iyide kĩrãkʼa edadamarẽã. Bari jaraita, Jeowabara kãgabʉ «yãrã ʉ̃rʉ imitia bedʼea ẽ marẽã, bedʼeakada ẽ marẽã [ . . . ] akʉza ewari jõmaʉ̃nẽ ibiade panamarẽã wuabemarabawara» (Tito 3:2). Maʉ̃ kʼarea dayirãbara krĩchada ẽ baibara ẽbẽrarã Jeowa ʉ̃rʉ ĩjãna ẽãrara dayirãne edabʉta (2 Tim. 2:23-25). Maʉ̃ba dayirãba wuabema ẽbẽrarãta bia edapanʉbʉrʉ audre Jeowa kʼawa panañi.
NEMITIA OSIMINA JEOWA KʼAWA BASEABɄ
16. ¿Salmo 73 bʉdara sãwũã senti basi?
16 Bʉta Jeowadeba jĩgabʉta sentibʉbʉrʉ, ¿kʼãrẽba kʼarebai? Krĩchara Salmo 73 bʉdata. Iya jarabʉ iyara bera nemitia osita (Sal. 73:2). Adewara jarabʉ mejãcha sobia ba ẽ basita, bia krĩcha ẽ basita adewara Jeowa nããra nedʉwʉrʉ krĩcha neẽbʉ kĩrãkʼa basita (Sal. 73:21, 22). Kõbe iya mawũã aña krĩchada kʼareara, ¿krĩchasika Jeowaba kãga ẽãta iyira akʉza kĩrãdua ẽãta iya nemitia obʉra?
17. (1) ¿Kʼãrẽta osi salmistabara iyi krĩcha zroma osidera? (2) ¿Kʼãrẽta kʼawuapanʉ dayirãbara iyi berabaridadeba? (Akʉra potota).
17 Salmistata Jeowadeba jĩgabʉta sentisibʉrʉ maʉ̃ra ewari bio bayeda mawũã berabari ẽ basi, ¿kʼãrẽa? Iyara aukʼara sopʉabʉde jʉrʉsi baera Jeowa kʼarebata, naʉ̃ra kʼawuapanʉ iya naʉ̃ta jarasi baera: «Mamina mʉ̃ra atiara bʉmebʉ ewari jõmaʉ̃nẽ: bʉa jidabʉ mʉ̃ juwarara. Bʉ ũrãgʼaba jaradiabʉ samare wãita akʉza mʉ̃ra bʉ kʼaita babiyi» (Sal. 73:23, 24). Dayirã krĩcha zroma obʉdera jʉrʉdaibara Jeowa kʼarebata iya kʼarebai baera dayirãra audre ĩjãita (Sal. 73:26; 94:18). Akʉza nemitia oda kʼãrãpe Jeowadeba jĩga wãnara kʼawuapanaibara jẽda zebʉrʉdera Jeowabara kĩrãduaita maʉ̃ mitiara (Sal. 86:5). Dayirã krĩcha zroma obʉdera maʉ̃nebʉrʉ audre jʉrʉdaibara sãwũã Jeowa kʼawa bʼaita (Sal. 103:13, 14).
Dayirãba Daizezedeta oamabʉdera akʉza audre ĩjãita nesidabʉdera jʉrʉdaibara audre Jeowa kʼawa bʼaita yiwidʼibʉdeba akʉza ãba yi jʉre bari eda wãbʉdeba. (Akʉra parrapo 17).
EWARI JÕMAɄ̃NẼ JEOWA KʼAWA PANADRɄ
18. ¿Kʼãrẽa ewariza jʉrʉdaibara Jeowa kʼawa bʼaita?
18 Jeowa ʉ̃rʉra dayirãbara jõma ũdukʼawua ze ẽ bayi maʉ̃ba ewariza nekʼãrẽ odaibara awuara kʼawua wãita iyi ʉ̃rʉ adewara jʉrʉdaibara sãwũã ewariza iyi kʼawa bʼaita. Daizeze Bedʼeabara jarabʉ Jeowaba kʼãrẽ krĩchabʉra akʉza kʼãrẽ obʉra dayirãbara jõmara kʼawua ze ẽãta (Rom. 11:33).
19. ¿Salmora nama jarabʉba kʼãrẽta jaradiabʉ?
19 Salmo 79:13de jarabʉ Jeowa pʉwʉrʉdebemabara Jeowa biga diapanaita ewari jõmaʉ̃nẽ akʉza ibia bedʼea panaita Jeowa ʉ̃rʉ akʉza ãyideba zebʉrʉrabida iyaba opanaita. Bʉabida ewariza jʉrʉseabʉ Jeowa kʼawa bʼaita mawũã ora Jeowabara bʉara ewari jõmaʉ̃nẽ nebiata diayi, bʉra salmista kĩrãkʼa sentiseabʉ, iya jarasi naʉ̃ta: «Daizezera mõgara mʉ̃ soita adewara mʉ̃me bayi ewari jõmaʉ̃nẽ» (Sal. 73:26).
TRÃBI 32 Daizeze Jeoware bara
a Dããrababʉrʉ krĩcha zroma obʉta biga bayi medikoma wãita. Bʉa audre kʼawuakĩrãbʉbʉrʉ naʉ̃ ʉ̃rʉ, akʉra karta La Atalaya numero 1 2023debemata.