ARTIKULO KʼAWUAITA 22
TRÃBI 15 Alabemos al Primogénito de Jehová
Jesúsbara sãwũã ũdubisi Jeowa trʉ̃ra yibiata iyitara
«Mʉ̃a ũdukʼawuabisi bʉ trʉ̃ra, adewara ũdukʼawuabiyi» (JUAN 17:26 TNM).
KʼÃRẼTA ŨDUDAITA
Naʉ̃ artikulode kʼawuadayi Jesúsba kʼãrẽta jarakĩrãbasita jaraside «ũdukʼawuabisi bʉ trʉ̃ra» akʉza iya sãwũã ũdubisita Jeowara neneẽãbʉta akʉza sãwũã ũdubisita Diaruba Jeowa ʉ̃rʉ jaradara sewida basita.
1, 2. (1) ¿Kʼãrẽta osi Jesúsbara diamasi iyi bei nãã? (2) ¿Kʼãrẽta kʼawuadai naʉ̃ artikulodera?
JUEVESIDE 14 nisánʼne, poaga 33de diamasiare Jesúsba iyi bei nãã yikota osi iyi kʼaidubemarabawaraʉba koita, maʉ̃nera Jesúsbara kʼawuabasi iyira Judasba sewaibasita akʉza iyira poda kʼãrãpe beadaibasita iyi nejʉraraba. Maʉ̃ta ãyi mawũã nekopanʉta neko berabarida tẽã Jesúsba so zarea diasi iyi kʼaidubemaraʼa adewara iyi mamaʉ̃ba wãi nãã yiwidʼisi, maʉ̃ yiwidʼira apostol Juanba Juan kapitulo 17de bʉ amaesi.
2 Naʉ̃ artikulode kʼawuadayi kʼãrẽta kʼawuaseapanʉta Jesús yiwidʼidadeba, iyi bei nãã kʼãrẽ kʼarea krĩcha obasita akʉza iyi nama egorode bʉedara iyitara kʼãrẽta audre yibiabasita.
«MɄ̃A ŨDUKʼAWUABISI BɄ TRɄ̃RA»
3. ¿Jesúsbara kʼãrẽta jarasi akʉza maʉ̃ bedʼeabara kʼãrẽta jarakĩrãbasi? (Juan 17:6, 26).
3 Jesúsʼra kʼãwũã yiwidʼisi: «Mʉ̃a ũdukʼawuabisi bʉ trʉ̃ra». Iyara naʉ̃ bedʼeara jarama ũme jarasi, naʉ̃ba ũdubibʉ Jesúsʼitara mejãchade yibia basita iyi kʼaidupanʉraba ũdukʼawuadamarẽã Jeowa trʉ̃ta (akʉra Juan 17:6, 26 TNM). ¿Jesúsbara bari ũdukʼawuabikĩrãbasika Daizeze trʉ̃ta? Mawũã ẽ, iyi kʼaidupanʉrabara ũdukʼawuabasi Daizeze trʉ̃ra. Ãyira judiora baera ũdukʼawuabasi Escrituras Hebreasta adewara maʉ̃nera Daizeze Jeowa trʉ̃ra mejãchabasi mawũẽra, ¿kʼãrẽta jaradiakĩrãbasi Jesúsbara? Kãgabasi ũdukʼawuadamarẽã sãwũãchuta Jeowara, kʼãrẽ nebia erbʉta, kʼãrẽta obʉta akʉza kʼãrẽ oita krĩchabʉta. Jesúsbʉrʉ Jeowara bia ũdukʼawuabʉ baera jaradiaseabasi sãwũãbʉta.
4, 5. (1) ¿Kʼãrẽba oseabʉ bʉa bia krĩchamarẽã ẽbẽra abaʉ trʉ̃ ʉ̃rʉ? Yizata jara ũrĩbira. (2) ¿Jesús kʼaidubemarabara sãwũã audre kãga zesida Jeowa trʉ̃ra?
4 Krĩchara naʉ̃ta, bʉ kongregasione aba bayi zõrãrã yi trʉ̃ Davidta, iyira mediko operabari. Maʉ̃ta ewari aba bʉra mejãcha kaya kʼãrãpe David trajachʉ ospitalʼeda ededayi, maʉ̃ne iya bʉta operayi mawũã bʉ beideba ẽdrʉbiyi, maʉ̃neba ʉ̃ta bʉara Davidʼra bari zõrãrã kongregasionebema kĩrãkʼa akʉ ẽ bayi, awuarabʉrʉ akʉyi mediko bʉ ẽdrʉbida kĩrãkʼa.
5 Abarika Jesús kʼaidubemarabara ũdukʼawuabasi Jeowa trʉ̃ra, mamina Jesúsba jaradiasi baera sãwũã bʉta Jeowara, ãyara audre kãga zesi Jeowa trʉ̃ra, ¿kʼãrẽa mawũã jarapanʉ? Jesúsba iya jarabadadeba akʉza kʼãrẽ obadadeba adewara wuabemara sãwũã edabadadeba ũdubisi baera yi Zeze Jeowade kĩrãkʼa obʉta, maʉ̃ba ãyara ũduseabasi sãwũãbʉta Jeowara (Juan 14:9; 17:3).
«BɄ TRɄ̃ARA BɄA MɄ̃A DIADA»
6. ¿Kʼãrẽta jarakĩrãkʉasi Jesúsba jaraside Jeowaba iyi trʉ̃ta diadabara? (Juan 17:11, 12).
6 Jesús iyi kʼaidubemara ʉ̃rʉ yiwidʼidisidera naʉ̃ta jarasi: «Ãyita akʉra bʉ trʉ̃ara kʼarea, bʉa mʉ̃a diada kʼarea» (akʉra Juan 17:11, 12 TNM). ¿Naʉ̃ba jarakĩrãbʉka naʉ̃neba ʉ̃ta Jesúsʼra trʉ̃gaibasita Jeowa? Mawũã ẽ, iya jarasi baera «bʉ trʉ̃ara kʼarea», naʉ̃ba ũdubibʉ iyira naʉ̃neba ʉ̃tara trʉ̃ga ẽ baibasita Jeowa mawũẽra, ¿kʼãrẽta jarakĩrãbʉ Jesúsba jaraside Jeowaba iyi trʉ̃ara diadaba? Jarakĩrãbasi nããrãra Jeowabara zokʼasita Jesústa Jeowa trʉ̃ bari bedʼeamarẽã, mawũã Jesúsbara Jeowa trʉ̃neba miõba okata osi (Juan 5:43; 10:25). Adewara Jesús trʉ̃bara jarakĩrãbʉ Jeowaba ẽdrʉbita, nama dayirãba bia akʉdara Jesús trʉ̃ba kʼãrẽta jarakĩrãbʉdera jarabʉ Jeowa trʉ̃ta.
7. ¿Sãwũã Jesúsʼra Jeowa trʉ̃ne bedʼeaseabasi? Yizata jara ũrĩbira.
7 Naʉ̃ ʉ̃rʉ biʼia ũrĩnaita krĩchaidua naʉ̃ yizata: Nokʼo abaʉba jidayi ẽbẽra aba iyi bari bedʼeamarẽã akʉza maʉ̃ʼa zareata diayi, maʉ̃ kʼarea maʉ̃ ẽbẽraba wuabemara nekʼãrẽ omarẽã jarabʉrʉdera ĩjãnañi maʉ̃ ẽbẽrarã nokʼo trʉ̃ne bedʼeakʉ baera. Abarika Jeowabara yi Warrata zokʼabʉesi iyi trʉ̃ bari bedʼeamarẽã akʉza maʉ̃ʼa zarea diasi (Mat. 21:9; Luc. 13:35).
8. Nama egoroeda zei nãã, ¿Jesúsbara kʼãrẽta osi Jeowa trʉ̃neba? (Éxodo 23:20, 21).
8 Daizeze Bedʼeabara jarabʉ Jesúsʼra Bedʼeata, ¿kʼãrẽa mawũã jarabʉ? Nawedara Jeowabara Jesústa zokʼabasi ẽbẽrarã akʉza angeleraʼa jara ũrĩbita iya kʼãrẽta kʼawuadamarẽã kãgabʉta akʉza kʼãrẽta odamarẽã kãgabʉta (Juan 1:1-3). Israelitara desiertode basidera Jeowabara angelta aba zokʼasi ãyaʼa jaradiaita sama wãibarata, maʉ̃ angel Jeowaba zokʼadara Jesúsbasi baibara, maʉ̃ne Jeowaba jarasi ãyara ũrĩbarabasita maʉ̃ angel bedʼeara, ¿kʼãrẽa? Jeowaba naʉ̃ta jarasi: «Iyira mʉ̃ trʉ̃ne wã baera» (akʉra Éxodo 23:20, 21).a Maʉ̃ba jarakĩrãbʉ Jesúsʼra Jeowa bari bedʼeabʉta. Jesúsbʉrʉ audre ũdubiseabasi Jeowaba obʉra jõma bia obʉta akʉza Jeowara neneẽãbʉta.
«ZEZE BɄ TRɄ̃RA YI ZROMA BABIRA»
9. ¿Sãwũã kʼawuapanʉ Jesúsʼitara Jeowa trʉ̃ra jipade yibiabasita?
9 Dayirãba kʼawuanʉmʉ kĩrãkʼa Jesús nama egoroeda zei nawedabida iyitara Daizeze trʉ̃ra jipade yibiabasi, iyi nama egorodebʉdebida iyara ũdubisi Jeowa trʉ̃ra iyitara jipade yibiata, iya nekʼãrẽ jõma odadeba maʉ̃ta ũdubisi. Iya Daizeze Bedʼea jaradiabʉta jõbodoare Jesúsba naʉ̃ta widisi Jeowaʼa: «Zeze bʉ trʉ̃ra yi zroma babira». Aramaʉ̃ta Jeowaba iyaʼa kʼãwũã panʉsi: «Yi zroma babisi akʉza jẽda yi zroma babiya» (Juan 12:28 TNM).
10, 11. (1) ¿Jesúsbara sãwũã yi zroma babisi Jeowa trʉ̃ra? (Akʉra potota). (2) ¿Kʼãrẽa Jeowa trʉ̃ra neneẽãbabibara akʉza ũdubibara iyara jõma bia obʉta?
10 Jesúsbida Jeowa trʉ̃ra yi zromababisi, ¿sãwũã osi iya? Ẽbẽrarã jara ũrĩbisi Jeowaba kʼãrẽ nebia erbʉta akʉza Jeowaba kʼãrẽta obʉta, mamina bari maʉ̃neba ũdubi ẽ basi Jeowa trʉ̃ra yi zromata. Iyara ũdubibarabasi Jeowabara jõma bia obʉta akʉza Jeowa trʉ̃ra neneẽãbʉta.b Jesúsba ũdubisi kʼãrẽãba yibiata Jeowa trʉ̃ mawũã oira, iyi kʼaidubemara kʼãwũã yiwidʼimarẽã jaradiaside: «Zeze ʉ̃tʉbema, bʉ trʉ̃ra neneẽã baide bʉa» (Mat. 6:9 TNM).
11 ¿Kʼãrẽa nesidapanʉ Jeowa trʉ̃ neneẽã babita akʉza ũdubita Jeowabara jõma bia obʉta? Nawedara jardín Edénʼnera Diaruba jarasi sewidata Daizeze Jeowa ʉ̃rʉ, iyara jarasi Jeowara sewa nebʉrʉ omiata akʉza Jeowabara nebiata merabʉta Adán akʉza Evadeba (Gén. 3:1-5). Adewara Diarubara jarasi Jeowabara bia zokʼa ẽãta, Diaruba mawũã jarabʉrʉba Jeowa trʉ̃ ʉ̃rʉ imitia bedʼeabibasi. Tẽã Diaruba jarasi sewidata Job ʉ̃rʉ, iyara jarasi Jobʼbara Jeowadeta obʉta Jeowaba iyaʼa nebiata diabʉ baera adewara Diaruba jarasi ẽbẽrarãbara Jeowade obʉra idubʉita ãya bedʼea zroma ũdubʉrʉdera Jeowata wãrĩnu kãgapanʉ ẽ baera (Job 1:9-11; 2:4). Maʉ̃ba ewari berabaribita nesidabasi kʼawuaita saʉ̃ba wãrĩnuta jarabʉta, Jeowaba mawũã ẽ bʉrʉ Diaruba.
Jesúsba iyi kʼaidubemara jaradiasi kʼãrẽãba yibiata Jeowa trʉ̃ neneẽã erbaira. (Akʉra parrapo 10).
«MɄ̃Ã MɄ̃ BEBɄTA DIAI BAERA»
12. ¿Jeowa trʉ̃ra mejãcha kãgabasi baera kʼãrẽta osi Jesúsbara?
12 Jesúsbara Jeowa trʉ̃ra mejãcha kãgabasi, maʉ̃ kʼarea iyira beisic Jeowa trʉ̃ neneẽãbabita akʉza ũdubita Jeowabara jõma bia obʉta (Juan 10:17, 18). Nawedara, Adán Evaʉ̃mebara ũdubisida ãyira Jeoware bʉ ẽãta awuarabʉrʉ Diaruarepanʉta, mamina Jesúsʼra jipa awuarabasi. Iyira nama egoroeda zesi akʉza iya ũdubisi Jeowara mejãcha kãgabʉta iya Jeowaba jarabʉta aripe obʉde (Heb. 4:15; 5:7-10). Iyira zʉbʉria beasidamina ũdubisi kʼẽrẽpabʉta iyi beiyeda (Heb. 12:2). Mawũã ũdubisi Jeowa trʉ̃ kãgata akʉza Jeowata.
13. ¿Kʼãrẽa Jesúsbʉrʉ ũdubiseabasi yi sewa nebʉrʉ omiara Diaruta? (Akʉra potota).
13 Jesúsba nekʼãrẽ jõma odaba ũdubisi Diarutrʉ sewa nebʉrʉ omiata mawũã Jeowa ẽãta (Juan 8:44). Naʉ̃ drʉa jõmaʉ̃nẽra Jesúsbʉrʉ biʼia ũdukʼawuabʉ Jeowara, maʉ̃ba Diaruba jaradade wiña wãrĩnuta jarasibʉrʉ Jesúsbara biʼia kʼawuabakasi maʉ̃ra. Mawũã ẽ baera Jesúsbara nekʼãrẽ jõma osi Daizeze Jeowa trʉ̃ ʉ̃rʉ bia bedʼeabita adewara iyimara Jeowaba iyi doba amaesi kĩrãkʼa basimina Jesúsbara diasi iyi bebʉta Jeowaʼa ẽkarra diai kaude (Mat. 27:46).d
Jesúsba iya kʼãrẽ obadadeba ũdubisi yi wãrĩnu sewa nebʉrʉ omiara Diaruta mawũã Jeowa ẽãta. (Akʉra parrapo 13).
«BɄA JARADARA JÕMA ARIBAEBɄRɄA»
14. ¿Jeowabara Jesúsʼa kʼãrẽ nebiata diasi iyi kʼẽrẽpabʉ kʼarea?
14 Diamasi Jesús bei nãã Jesúsʼra kʼãwũã yiwidʼisi: «Bʉa jaradara jõma aribaebʉrʉa». Jesúsbara kʼawuabasi iyita kʼẽrẽpabʉbʉrʉ Jeowabara iyaʼa nebia diaita (Juan 17:4, 5 TNM). Naʉ̃ra wãrĩnu aripe berabarisi, Jeowabara idu amae ẽ basi bewãrã deda (Hech. 2:23, 24). Jẽda piradrʉbisi Jesúsʼra akʉza ʉ̃tʉ nebiata diasi (Filip. 2:8, 9). Poaga bio berabarida tẽã Jeowabara Jesúsʼra ʉ̃tʉ Nokʼo babisi. Maʉ̃ Nokʼobara, ¿kʼãrẽta oi? Jesúsba iyi yiwidʼibʉde naʉ̃ta kʼãwũã jarasi: «Zebira bʉ Nokʼota. Bʉa kãgata odaide bʉa ʉ̃tre akʉza nama egorodebida» (Mat. 6:10 TNM).
15. ¿Adewara kʼãrẽta oi Jesúsbara?
15 Aranʉ Jesúsbara Jeowa nejʉrarãra jõma makenañi Armagedónʼne (Apoc. 16:14, 16; 19:11-16). Adewara Jesúsbara Diarura zobea daʉkʉrenʉmʉne ibalbʉeyi mamara iyara nekʼãrẽ oẽ bayi jipa (Apoc. 20:1-3). Jesúsba Mil poagabayeda zokʼabʉrʉdera dayirãra aduʼa panañi akʉza nemitia okabayi, maʉ̃enara Jesúsbara ẽbẽrarãra jẽda piradrʉbiyi akʉza naʉ̃ drʉara ẽjũã kĩrãwãreã babiyi. Mama jõma aripe berabariyi Jeowaba oita krĩchabadara (Apoc. 21:1-4).
16. ¿Sãwũã panai Jesúsba Mil poaga zokʼaberabarida tẽãra?
16 ¿Sãwũã panai Jesúsba Mil poaga zokʼaberabarida tẽãra? Ẽbẽrarã jõmaʉ̃ta nemitia okabayi adewara nesida ẽ bayi Jeowaba dayirã nemitiata kĩrãduadamarẽã Jesús beidadeba. Akʉza Jeowa neũdukʼawua bʼaira nesida ẽ bayi 144.000rata dayirã saserdote bamarẽã mia Jesústa dayirã sumo saserdote bamarẽã. Adewara beira wuara neẽ bayi, jõmaʉ̃ta jẽda piradrʉdayi adewara naʉ̃ drʉa jõmaʉ̃mae bayi ẽbẽrarã nemitia okata (1 Cor. 15:25, 26).
17, 18. (1) ¿Kʼãrẽta berabari Mil poagabayeda zokʼabʉta berabarida tẽãra? (2) Iya zokʼabʉta jõbʉrʉdera, ¿kʼãrẽta oi Jesúsbara? (1 Corintios 15:24, 28 akʉza akʉra potota).
17 Adewara, ¿kʼãrẽta berabari Mil poagabayeda zokʼabʉta jõna tẽãra? Maʉ̃nera nebiata berabariyi. Diaruba Jeowa ʉ̃rʉ sewida jarabʉra jõma jõñi. Diarubara jardín Edénʼnera jarasi Jeowara sewa nebʉrʉ omiata akʉza Jeowabara ẽbẽrarãra kãga ẽãta akʉza bia zokʼa ẽãta. Ebẽrarã Jeowa ode kʼẽrẽpapanʉraba ũdubi zebʉda Jeowade oira jipade yibiata, mawũã obʉdeba Jeowa trʉ̃ta neẽã babipanʉ ãyara. Mil poagabayeda zokʼabʉta jõbʉrʉdera ũdudayi Jeowabara jõma bia obʉta. Adewara Jeowabara ũdubiyi iyara dayirãra wãrĩnu kãgata.
18 Jesúsba Mil poagabayeda zokʼabʉta berabarida tẽãra ẽbẽrarã jõmaʉ̃ba kʼawuadayi Diaruba Jeowa ʉ̃rʉ jaradara jõma sewidabasita. Maʉ̃ Mil poaga berabarida tẽãra, ¿Jesúsbara kʼãrẽta oi? ¿Iyira Diaru kĩrãkʼa Jeowa ʉ̃rʉ wãika? Mawũã ẽ (akʉra 1 Corintios 15:24, 28). Awuarabʉrʉ Jesúsbara iya mawũã zokʼabadara jẽda yi Zeze Jeowaʼa diayi, iyira Jeowaʼa yi zokʼabiyi, ¿kʼãrẽa mawũã oi? Jeowata mejãcha kãgabʉ baera adewara maʉ̃nera Diarura jipa beiyi akʉza maʉ̃inʉbaira Jeowa trʉ̃ra jipa neneẽ beyi akʉza jõmaʉ̃ba kʼawuayi Jeowabʉrʉ wãrĩnu jõma bia obʉta.
Jesúsba Mil poagabayeda zokʼabʉta berabaribʉrʉdera Jesúsbara iya zokʼabʉra Jeowaʼa jẽda diayi. (Akʉra parrapo 18).
19. ¿Jesúsbara sãwũã akʉbʉ Jeowa trʉ̃ra?
19 Naʉ̃ jõma kʼarea Jeowabara iyi trʉ̃ta diasi yi warra Jesúsʼara, wãrĩnubaira Jeowaba zokʼasi Jesústa iyi bari bedʼeamarẽã maʉ̃ba Jesúsbara iya kʼãrẽ jarabʉdeba akʉza obʉdeba ũdubisi Jeowa trʉ̃ ʉ̃rʉ ibia bedʼeabibʉta. ¿Jesúsbara sãwũã akʉbasi Jeowa trʉ̃ra? Jesúsʼitara Jeowa trʉ̃ra jipade yibia basi, iyara maʉ̃ba nekʼãrẽ jõma osi ibia bedʼeabita, beisi Jeowa trʉ̃ bari akʉza aranʉbai iya Mil poagabayeda zokʼabʉta berabaribʉrʉdera Jesúsbara iya zokʼabʉra jẽda Jeowaʼa diayi. ¿Dayirãbara sãwũã Jesúsde kĩrãkʼa oseapanʉ? Yi wuarebema artikulode maʉ̃ ʉ̃rʉ kʼawuadayi.
TRÃBI 16 Alabemos a Jehová por su Hijo, el Ungido
a Edaʉde angelerãra Jeowa bari bedʼeapanasi ẽbẽrarã bedʼea jaraita mamina edaʉde Daizeze Bedʼeaba jarabʉ Jeowata mawũã bedʼeabʉ kĩrãkʼa basimina wãrĩnubaira angelta bedʼeabasita Jeowa bari (Gén. 18:1-33). Daizeze Bedʼeade jarabʉ Jeowaba diasita Leyta Moisésʼa, mamina awuru bersikuloraba ũdubibʉ Jeowaba angelta zokʼasita maʉ̃ Leyta diamarẽã (Lev. 27:34; Hech. 7:38, 53; Gál. 3:19; Heb. 2:2-4).
b KʼÃRẼTA JARAKĨRÃBɄ: Bedʼea neneẽã babibara jarakĩrãbʉ wawia ũdubita akʉza ũdubita maʉ̃ra dayirãitara jipade yibiata akʉza bedʼea vindicar (jõma bia obʉ) naʉ̃bara jarakĩrãbʉ wuabemara kʼawuabita ẽbẽra ʉ̃rʉ sewida jarapanʉra mawũã ẽãta, mawũã ẽ bʉrʉ ũdubita maʉ̃ ẽbẽrabara wãrĩnuta jarabʉta.
c Adewara Jesús beidaba kʼarebasi ẽbẽrarãbida ũdudamarẽã ewari jõmaʉ̃nẽ bʼaita.
d Karta La Atalaya abril 2021nebemane, yi pagina 30 akʉza 31ne akʉra artikulo «Preguntas de los lectores» abʉta.