Mesera kʼarebadadrʉ yi ũrĩkĩrãbʉta

1. ¿Daizeze Bedʼea jaradiabʉrʉdera ẽbẽrarãbara kʼãrẽta opanʉ? (Hechos 13:​47, 48; 16:​14, 15).

NÃÃBEMA kristianoraba ẽbẽrarã Daizeze ʉ̃rʉ jaradiasidadera ẽbẽrarã mejãchaʉba ĩjãsida (akʉra Hechos 13:​47, 48; 16:​14, 15). Idi ewadebida bʉ ʉ̃kʉrʉ ẽbẽrarã dayirãba Daizeze Bedʼea jaradiabʉrʉta waña ĩjãpanʉta mamina bʉ ʉ̃kʉrʉ ẽbẽrarã dayirãba Daizeze Bedʼea ʉ̃rʉ jaradiabʉrʉdera ũrĩkĩrã ẽãta abaedaedara mamina tẽãne wiña wiñane kʼawuakĩrãpanʉ Daizeze ʉ̃rʉ akʉza ĩjã zepanʉ. ¿Kʼãrẽta oseapanʉ ẽbẽra abaʉba Daizeze ʉ̃rʉ kʼawuakĩrãbʉta ũdudara?

2. ¿Kʼãrẽa jaraseapanʉ Daizeze Bedʼea jaradia wãira ne u kĩrãkʼabʉta?

² Daizeze Bedʼea jaradiaira ne u kĩrãkʼabʉ. Krĩchara naʉ̃ta, ẽbẽra ne umiabara ne ura bio erbʉ, maʉ̃ba iya ne u erbʉdebemata aba kuarara maʉ̃ra waña jʉrepede wãbʉ, ¿maʉ̃bara jarakĩrãbʉka iya wuabema ne u erbʉra kĩrãduasita? Mawũã ẽ awuarabʉrʉ bia akʉ erbʉ. Maʉ̃ kĩrãkʼa dayirãba Daizeze Bedʼea jaradiabʉde ũdudara ẽbẽra abaʉba ũrĩkĩrãbʉta zarea obʉ maʉ̃ ẽbẽra waña kʼarebaita. Mamina ẽbẽra Daizeze Bedʼea ũrĩkĩrã ẽ badara zarea opanʉ jaradiaita kʼarea yibiata Daizeze ʉ̃rʉ kʼawuaita akʉza Daizeze Bedʼeaba kʼãrẽta jaradiabʉta. (Juan 4:​35, 36). Mawũã kʼawuadaira dayirãbara akʉdaibara ẽbẽrarã sãwũã bʉta mawũã kʼawuaita kʼai ẽbẽraba Daizeze Bedʼea ũrĩkĩrãta akʉza ũrĩkĩrã ẽãta, mawũãtrʉ kʼawuadayi ãyi aba abaka sãwũã kʼarebadaita. Naʉ̃ artikulode kʼawuadayi dayirãba Daizeze Bedʼea ʉ̃rabʉrʉ jaradiabʉrʉde ẽbẽra abaʉba ũrĩkĩrãbʉta ũdubʉrʉde kʼãrẽta odaita akʉza kʼawuadayi sãwũã kʼarebaseabʉta ãyita audre Jeowa kʼawabamarẽã.

ẼBẼRA ABAɄBA ŨRĨKĨRÃBɄDE

3. ¿Ẽbẽra abaʉba Daizeze Bedʼeata ũrĩkĩrãbʉta ũdudara kʼãrẽta odaibara? (1 Corintios 9:26).

³ Dayirãba Daizeze Bedʼea jaradiabʉde ũdudara ẽbẽra abaʉba ũrĩkĩrãbʉta maʉ̃ra waña kʼarebadadrʉ Jeowa ʉ̃rʉ kʼawuamarẽã akʉza Jeowa kʼawabamarẽã, maʉ̃ba kʼãrẽa mejãcha jʉ̃ãnʉmaira nesida ẽ, iyiʉ̃me bedʼea jʉ̃drʉbʉrʉde waña widibara Daizeze Bedʼea ʉ̃rʉ kʼawuakĩrãbʉ kʼawuaita akʉza jaraibara ãba yi jʉrebarieda jʉ̃ẽmarẽã (akʉra 1 Corintios 9:26).

4. ¿Kʼãrẽ nebʉraba ũdubibʉ ʉ̃kʉrʉ ẽbẽrarãbara waña kʼawuakĩrãbʉta Daizeze Bedʼea ʉ̃rʉ?

⁴ Widira Daizeze Bedʼea ʉ̃rʉ kʼawuakĩrãbʉ kʼawuaita. Dayirãba Daizeze Bedʼea jaradia wãbʉrʉde bʉ ẽbẽra waña Daizeze Bedʼea kʼawua jʉ̃drʉkĩrãbʉta. Akʉdaya Canadáde berabaridata. Ewari aba jueveside, ẽbẽra wẽrã abaʉba orrasi esibidorta mõbe jidasi karta Bʉra ewari jõmaʉ̃nẽ sobia baseabʉ. Mebẽã wẽrã esibidor kʼawa badaba jara ũrĩbisi naʉ̃ kartadeba Daizeze Bedʼeara bari jaradiaseapanʉta. Naʉ̃ ẽbẽra wẽrã karta jidadaba jarasi Daizeze ʉ̃rʉ kʼawuakĩrãbʉta akʉza iyi numero selularta diasi adewara maʉ̃ ewaride mensajeta diabʉesi, mama widibasi sõbede iya Daizeze Bedʼea jaradiaseabʉ kʼawuaita aramaʉ̃ta mebẽã wẽrãbara jarasi semana jõdogode jaradiaita, maʉ̃ne ẽbẽra wẽrãbara naʉ̃ta widisi: «¿Kʼãrẽa nʉ jaradia ẽpe? Mʉ̃ra kʼãrẽ oẽ». Aramaʉ̃ta nrʉema vierneside estudia jʉ̃drʉsida adewara naʉ̃ ẽbẽra wẽrãra maʉ̃ semana jõbʉrʉde wãsi ãba yi jʉrebarieda akʉza mesera nekʼãrẽ osi audre Jeowa kʼawa bʼaita.

5. ¿Daizeze Bedʼea kʼawuabidata widi nããra kʼãrẽta oibara dayirãra? (Akʉra potota).

⁵ Jõmaʉ̃ba naʉ̃ ẽbẽra wẽrãba oda kĩrãkʼa oẽ, maʉ̃ba edaʉde bigabayi dayi ẽbẽra abaʉme bedʼea jʉ̃drʉbʉrʉde bedʼeaita iya kãgabʉ ʉ̃rʉ mawũã iya Daizeze Bedʼea ʉ̃rʉ kʼawuakĩrãmarẽã. Mamina krĩcha biata erpanʉbʉrʉ akʉza krĩchapanʉbʉrʉ wuabemara ʉ̃rʉ naʉ̃ba kʼarebaseabʉ mesera erbaita kʼaia jaradiaita Daizeze Bedʼea ʉ̃rʉ. ¿Kʼãrẽta jaraseapanʉ Daizeze Bedʼea kʼawuabita? Akʉdaya kʼãrẽ ũrãgʼa biata diasidata ʉ̃kʉrʉ mebẽrã Daizeze Bedʼea kʼawuabipanʉraba.

6. ¿Kʼãrẽta jaraseapanʉ ẽbẽrarãba tẽãne ũrĩmarẽã Daizeze Bedʼea ʉ̃rʉ?

⁶ Naʉ̃ra mebẽrãnebemara ʉ̃kʉrʉra Daizeze Bedʼea jaradiapanʉ akʉza prekursorera, ãya jarapanʉ ʉ̃kʉrʉ drʉadera biga ẽãta ẽbẽra jaraita naʉ̃ bedʼeata, klase diaita, maʉ̃ta neẽbʉrʉ estudiaita awuarabʉrʉ bigata kʼãwũã jaraita, nebʉradaita, bedʼeaita akʉza audre kʼawuadaita Daizeze Bedʼea ʉ̃rʉ. Tẽã naʉ̃ ẽbẽraʉ̃me audre bedʼeaita naʉ̃ta jaraseabʉ iyaʼa: «Kʼãrẽ yibia Daizeze Bedʼeabara panʉbʉ baera dayirãba widibʉta jõma» mawũã ẽ bʉrʉ jaraseabʉ «Daizeze Bedʼeara bari bedʼeabʉ ẽ religion ʉ̃rʉ dayisida kʼarebabʉ» adewara naʉ̃ta jaraseabʉ: «10 minuto mawũã ẽ bʉrʉ 15 minutode bʉa nekʼãrẽ mejãcha kʼawuaseabʉ» akʉza jara ẽ baibara semanaza wãnʉmaita mawũã iyaʼa sentibi ẽ baita ajuerzade jaradianʉmʉta.

7. ¿Ẽbẽrarã kʼãrẽba kʼarebabʉ audre Jeowa kʼawa bʼaita? (1 Corintios 14:​23-25).

⁷ Jaradadrʉ ãba yi jʉrebarieda jʉ̃ẽmarẽã. Apostol Pablo ewari basidera, ẽbẽrarãbara Daizeze ʉ̃rʉ wãrĩnuta kʼawuasi ãyi aba yi jʉrebarieda jʉ̃ẽside (akʉra 1 Corintios 14:​23-25). Idi ewadebida ẽbẽrarã mejãchaʉta ãba yi jʉrebarieda wãbʉba kʼarebabʉ audre Jeowa kʼawa bʼaita. Mamina, ¿bʉa sõbede jaraseabʉ ẽbẽrarã ãba yi jʉrebarieda wãmarẽã? Libro Bʉra ewari jõmaʉ̃nẽ sobia baseabʉ abʉde jarabʉ yi 10de ẽbẽrarã trʉ̃marẽã ãba yi jʉrebarieda mamina maʉ̃inʉ bʼaita jʉ̃ã ẽ baibara dayirãbara, awuarabʉrʉ dayi ẽbẽraʉ̃me bedʼea jʉ̃drʉbʉrʉde waña jaraseabʉ jʉ̃ẽmarẽã ãba yi jʉrebarieda. ¿Kʼãrẽta jaraseabʉ? Semana jõbʉrʉde diskursode kʼãrẽ ʉ̃rʉ bedʼeaita jaraseabʉ akʉza karta Jarakabʉ ba kʼãrẽta jaraita jaraseapanʉ.

8. ¿Ẽbẽra abaʉa jarara ãba yi jʉrebarima jʉ̃ẽmarẽã kʼãrẽta jara ũrĩbibara? (Isaías 54:13).

⁸ Ẽbẽra bʉa trʉ̃na jara ũrĩbira kʼãrẽne awuarabʉta dayirã religionta iya religion ũdukʼawuabʉme. Ẽbẽra wẽrã aba, ãba yi jʉrebarieda jʉ̃ẽkata jʉ̃ẽside karta Jarakabʉ ta estudiabarabasi, aramaʉ̃ta iyaʼa nejaradiabaria widisi: «¿Jari ẽbẽra bedʼea widibʉbara ẽbẽra trʉ̃ra jõma kʼawuabʉka?». Mebẽã wẽrãba jara ũrĩbisi, nama kongregasionera mebẽrã kĩrãkʼapanʉta maʉ̃ba zarea opanʉta jõmaʉ̃ trʉ̃ta kʼawuaita, aramaʉ̃ta ẽbẽra wẽrãba jarasi iyi iglesiadera mia kʼaiba kʼawua ẽãta wuabemara trʉ̃ra. Edaʉde ẽbẽra mejãchaʉba kʼawua ẽ kʼãrẽa ãba yi jʉrepanʉta maʉ̃ kʼarea biga bayi ãyaʼa jara ũrĩbita (akʉra Isaías 54:13). Bari jaraita daira ãba yi jʉrepanʉ Jeowa yiwidʼidaita, kʼawuaita Jeowa ʉ̃rʉ akʉza dayirãi so zarea diadaita (Heb. 2:12; 10:​24, 25). Maʉ̃ kʼarea dai ãba yi jʉrebaridera jõma arare arare daucha jaradiapanʉ akʉza semanaza nekʼãrẽ mejãcha kʼawuapanʉ dayi kʼarebaseabʉta (1 Cor. 14:40). Akʉza dai ãba yi jʉrebari demaera nekʼãrẽ mejãchabʉ ẽ awuarabʉrʉ bigabʉ daya nekʼãrẽ kʼawuaita. Adewara daira kʼaiarebʉ ẽ baera bedʼeada ẽ politiko ʉ̃rʉ akʉza kʼai politiko are panʉ ẽ akʉza ãba yi jʉrebarimaera daiba krĩchabʉta jaradia ẽ adewara jʉra bedʼeada ẽ. Ẽbẽraba audre bia kʼawuamarẽã dayirãba kʼãrẽta obʉta ãba yi jʉrebarimae, ũdubiseabʉ naʉ̃ bideota ¿Kʼãrẽta opanʉ Jeowa ʉ̃rʉ Kʼawuabipanʉrãbara ãyi ãba yi jʉrebʉmaera?

9, 10. ¿Ẽbẽra abaʉba ãba yi jʉrebarieda trʉ̃nara kʼãrẽta jaraseabʉ pera ẽ marẽã? (Akʉra potota).

⁹ Ʉ̃kʉrʉ ẽbẽrarã perabʉ ãba yi jʉrebarieda wãira, krĩchapanʉ baera Jeowa ʉ̃rʉ Kʼawuabiparãba jaraita iyita Jeowa ode bamarẽã, maʉ̃ kʼarea dayirãbara iyaʼa bia jaradiaibara yi Jeowa odepanʉ ẽãsida bia edapanʉta akʉza iya kãgabʉrʉ bari ũrĩne wãseabʉta akʉza iyaʼa kʼaiba jarada ẽãta juwa ʉ̃ta wua kʼãrãpe bedʼeamarẽã mia iya religion erbʉta idubʉmarẽã. Adewara ãba yi jʉrebaridera wũãwũãra jãpe ededa ẽ awuara jaradiadaita awuarabʉrʉ yi mebẽrãbawara ãba jewedabibʉ ãbaʉba nekʼãrẽta kʼawuadamarẽã mawũã yibarirabara kʼawuapanʉ ãyi wũãwũãra samabʉta akʉza kʼãrẽta jaradiaita (Deut. 31:12). Adewara wuabemara plata widida ẽ awuarabʉrʉ opanʉ Jesúsba jaradata: «Bari jaradiasida baera, bari jaradiaidua» (Mat. 10:8 TNM). Adewara jaraseapanʉ nesida ẽãta wua mejãcha balebʉ jʉ̃ira, Daizezebara akʉ ẽ baera maʉ̃ra awuarabʉrʉ akʉbʉta dayi sode kʼãrẽta bʉta (1 Sam. 16:7).

¹⁰ Ẽbẽrata jʉ̃ẽra ãba yi jʉrebarieda, nekʼãrẽ jõma ora iyi aduʼabamarẽã. Ũdukʼawuabira zõrãrã kongregasionebemata, akʉza wuabemara mebẽrãta, mawũã ora iyira tẽã jẽda zeseabʉ. Ãba yi jʉrebarabʉde, ẽbẽra abaʉba erbʉ ẽ bʉrʉ Daizeze Bedʼeata bʉreta iyaʼa ũdubira akʉza jaradiara sainʉ bata dayirãba estudiabarabʉra mawũã ẽ bʉrʉ yi diskurso diabʉba testo jarabʉta kʼareba jʉrʉ diara.

KʼÃRẼTA OIBARA DAIZEZE BEDʼEATA KʼAWUABI JɄ̃DRɄSIBɄRɄ

11. ¿Sãwũã wawiapanʉta ũdubibʉ ẽbẽraba ewari jaradara?

¹¹ Dayirãba ẽbẽra abaʉa Daizeze Bedʼeata kʼawuabi jʉ̃drʉsibʉrʉ, ¿kʼãrẽta odaibara? Biga bayi maʉ̃ ẽbẽraba ewari jarabʉta wawia ũdubidaita. Bari jaraita, dayirãba jarasibʉrʉ kʼãrẽ orade jʉ̃ẽita maʉ̃ orade jʉ̃ẽnaibara, ẽbẽrarã dayi drʉadebema maʉ̃ta opanʉ ẽ mina. Adewara biga bayi ʉ̃rabʉrʉ estudia jʉ̃drʉbʉrʉdera wiña estudiadaita, ʉ̃kʉrʉ mebẽrã Daizeze Bedʼea jaradia zebʉdaba jarapanʉ, bigata daya ora jaradade pai estudiaita, yi estudiakĩrãbʉba jarabʉmina ʉ̃ta estudiaita akʉza mejãcha bedʼea ẽ baibara, iduaribibara yi estudiabʉta audre bedʼeamarẽã (Prov. 10:19).

12. ¿Ẽbẽra Daizeze Bedʼea kʼawuabibʉrʉdera kʼãrẽta jaradiaibara?

¹² Dayirãba ẽbẽra abaʉa Daizeze Bedʼea kʼawuabibʉrʉdera, iyi estudia jʉ̃drʉbʉrʉdeba ũdukʼawuabibara Daizeze Jeowata, yi warra Jesústa akʉza kʼarebaibara ãyita kãga zemarẽã, mawũã oira dayirãba krĩchabʉta jaradia ẽ baibara awuarabʉrʉ nekʼãrẽ jõmaʉ̃nẽ Daizeze Bedʼeadeba jaradiaibara (Hech. 10:​25, 26). Apostol Pablobara yiza biata diasi, iya ẽbẽrarã jaradiabasidera audrera jaradiabasi Jesús ʉ̃rʉ, Jesúsʼra Jeowabara dia bʉesi dayirãta kʼarebamarẽã Jeowa ʉ̃rʉ ũdukʼawuamarẽã akʉza kãga zedamarẽã iyita (1 Cor. 2:​1, 2). Adewara Pablobara jarasi yibiata dayi nekʼawuabarira jaradiaita nekʼãrẽ biata oũdubidamarẽã, maʉ̃ nekʼãrẽ biara, plata akʉza oro kĩrãkʼabʉ (1 Cor. 3:11-15). Ʉ̃kʉrʉ naʉ̃ra nebiadebemara naʉ̃ra, ĩjã bʼaita, buru biata, kʼawuaita saʉ̃ta bigata saʉ̃ta zeri ẽãta akʉza Jeowaʼa wawia ũdubita (Sal. 19:​9, 10; Prov. 3:​13-15; 1 Ped. 1:7). Mawũẽra Pablode kĩrãkʼa kʼaredadrʉ dayirã nekʼawuabariraba ãya ĩjãbʉta audre zarea erbamarẽã akʉza audre Jeowa neũdukʼawua badamarẽã (2 Cor. 1:24).

13. ¿Sãwũã dayirã nekʼawuabaria ãyi jʉ̃ã kʼawuabʉta akʉza ũrĩbʉta ũdubiseabʉ? (2 Corintios 10:​4, 5; akʉza akʉra potota).

¹³ Dayirãba Daizeze Bedʼea jaradiabʉrʉdera Jesúsde kĩrãkʼa odaibara, ũdubira jʉ̃ã kʼawuabʉta akʉza ũrĩbara ãyi kʼãrẽa mawũãbʉta, dayirã nekʼawuabaria widi ẽ baibara ãyi bia sentibi ẽãta. Bʉ nekʼawuabariba bedʼea aba ũrĩ ẽ bʉrʉ zarea orara iyaʼa jõma ũrĩbita awuarabʉrʉ jaradiara wuabemarata, maraba estudiabarabʉta jõna tẽã bedʼeaita iya ũrĩ ẽ bada ʉ̃rʉ. Adewara Daizeze Bedʼeaba jaradiabʉta oũdubita iyita zareabʉbʉrʉ ewari diara iya bia ũrĩ kʼãrãpe maʉ̃ta soiduba oũdubimarẽã (Juan 16:12; Col. 2:​6, 7). Daizeze Bedʼeaba jaradiabʉ aña jaradiabʉra muro kĩrãkʼabʉta maʉ̃ra kora bʉeibarata (akʉra 2 Corintios 10:​4, 5; akʉra nota estudio «derrumbar cosas fuertemente atrincheradas»). Ẽbẽraba ãya nekʼãrẽ soiduba ĩjãbʉta ãĩ bʉedaira, nããra kʼarebadaibara ãya Jeowata ũdudamarẽã ãyi mirʉbari kĩrãkʼa (Sal. 91:9).

SÃWŨÃ KʼAREBASEAPANɄ YI Ʉ̃RA ÃBA YI JɄREBARIEDA JɄ̃ẼBɄRɄRA

14. ¿Sãwũã edadaibara ẽbẽrarã ãba yi jʉrebarieda zepanʉrãra?

¹⁴ Jeowabara kãgabʉ ẽbẽrarã ãba yi jʉrebarieda zebʉra dayirãbara kãgade akʉza bia edadamarẽã, krĩcha ẽã kʼãrẽ kulturadebemata, plata kʼãrẽãba erbʉta akʉza samabemata (Sant. 2:​1-4, 9). Akʉdaya maʉ̃ta sãwũã odaibarata.

15, 16. ¿Kʼãrẽta odaibara ẽbẽrarã ʉ̃rabʉrʉ ãba yi jʉrebarieda jʉ̃ẽpanʉra bia sentidamarẽã?

¹⁵ Ʉ̃kʉrʉ ẽbẽrarã ãba yi jʉrebarieda wãbʉ kʼawuakĩrãpanʉ baera kʼãrẽta opanʉta mama, mawũã ẽ bʉrʉ ẽbẽra jãpebemaba jarasi baera jʉ̃ẽmarẽã. Ẽbẽra aba ãba yi jʉrebarieda jʉ̃ẽkata jʉ̃ẽbʉrʉdera, ¿kʼãrẽta oseapanʉ? Ẽbẽra jʉ̃ẽbʉrʉdera dayirãbara orraseapanʉ, bia edaseapanʉ, mamina jʉra kʼawua ora maʉ̃ba bia ẽã sentibiseabʉ baera. Adewara dayi kʼawa jewedamarẽã trʉ̃seabʉ, iyaʼa diaseabʉ Daizeze Bedʼeata akʉza dayirã kartarata maʉ̃ta neẽbʉrʉ daya erbʉta iyiʉ̃meba akʉseabʉ. Adewara nekʼãrẽ oseapanʉ yi ʉ̃ra zebʉrʉra bia edadaita. Bari jaraita, yumakẽrã aba ãba yi jʉrebarieda jʉ̃ẽnaba jarabʉ iyira perabasita krĩchabasi baera wua bia jʉ̃bʉ ẽãta, maʉ̃ kʼarea mebẽã iyiʉ̃me bedʼeadaba jarasi maʉ̃ kʼarea krĩcha zroma oẽ marẽã, Jeowa ʉ̃rʉ Kʼawuabipanʉrãra wuabema ẽbẽra kĩrãkʼabʉ baera. Naʉ̃ ẽbẽrarã buru kʼoesi akʉza kĩrãdua ẽ basi mebẽãba iyi sãwũã bia edadara. Dayirãbara ẽbẽrarã ãba yi jʉrebarieda jʉ̃ẽbʉrʉra ibiade edapanʉ mamina jʉra kʼawuapanaibara ãyi ʉ̃rʉ mejãcha widinʉma ẽ baita (1 Ped. 4:15).

¹⁶ Adewara, ¿kʼãrẽta oseapanʉ ẽbẽra aba ãba yi jʉrebarieda jʉ̃ẽra? Naʉ̃ta oseapanʉ, bari jaradaita dayirãba ẽbẽra aba Jeowa odebʉ ẽã ʉ̃rʉ mawũã ẽ bʉrʉ ãyi religion ʉ̃rʉ nekʼãrẽta jaraibʉrʉ ũdubidaibara wawia ũdubipanʉta akʉza dayirãta ãba yi jʉrebʉmae juwa ʉ̃ta wuabʉrʉde jʉra kʼawua baira kʼãrẽ jarabʉdeba dayirãba bedʼea zokʼabʉdeba ãyita sopʉa sentibi ẽ baita akʉza ãyaʼa krĩchabi ẽ baita wua ãba yi jʉrebarieda wã ẽ baita (Tito 2:8; 3:2). Adewara zarea odaibara ãya ĩjãbʉ ʉ̃rʉ imitia bedʼea ẽ baita (2 Cor. 6:3). Mebẽrã ʉ̃tʉba diskurso diapanʉrasida jʉra kʼawua baibara maʉ̃ne, adewara ãyara ũdubidaibara krĩchapanʉta ẽbẽrarã ʉ̃ra jʉ̃ẽpanʉra ʉ̃rʉ ãba yi jʉrebarieda, maʉ̃ba ãya bedʼea jarabʉrʉdera naʉ̃ra ẽbẽrarãba ũrĩne jaradaibara.

17. ¿Kʼãrẽta odaibara dayirãba ũdudara ẽbẽra abaʉba Daizeze ʉ̃rʉ kʼawuakĩrãbʉta?

¹⁷ Ewariza dayirãba Daizeze Bedʼea jaradiabʉra audre jaradia wãibara mawũã opanʉbʉrʉ ũdudayi ẽbẽrarã Daizeze ʉ̃rʉ wãrĩnu kʼawuakĩrãbʉta akʉza iyi Bedʼea ʉ̃rʉ (Hech. 13:48). Maʉ̃ kʼarea dayirãba Daizeze Bedʼea jaradia wãbʉrʉde ũdudara ẽbẽra aba Daizeze ʉ̃rʉ kʼawuakĩrãbʉta, kʼãrẽ krĩcha ẽã wididaibara iyaʼa Daizeze Bedʼea kʼawuabita akʉza ãba yi jʉrebarieda wãmarẽã trʉ̃naibara, mawũã odara kʼarebadayi naʉ̃ ẽbẽrasida wãmarẽã o zokʼai babibʉde (Mat. 7:14).