Jeowaba kʼarebasi dai bʉmae kʼawaita akʉza sobia bʼaita

Matsʼra Ann-Catrinʼʉ̃me wãsi Eskuela Galaadʼeda poaga 1979de, maʉ̃nera ãyira zokʼabʉesida Irán, Mauricio, Myanmar, Tanzania, Uganda akʉza Zaireʼeda. Mebẽã Jack Redfordba, Eskuela Galaadʼde ãyaʼa nejaradia badada maʉ̃ ũrãgʼata diasi ãyira drʉaza wãibarabasi baera, iduaribidaya ãya maʉ̃ ʉ̃rʉ nebʉramarẽã.

Daia jara ũrĩbidua maraba Jeowa sãwũã ũdukʼawuadata

Mats: Mʉ̃ zezera Segunda Guerra Mundial berabarisidera Poloniane basi, iyara iglesia katolikade ũdusi ẽbẽrarã sãwũã ãyirai yi sewabʉta mawũãsidu iya naʉ̃ta jarabasi: «Mʉ̃a kʼawuabʉ bʉta religion wãrĩnuarata». Tẽã mʉ̃a kʼawuasi mʉ̃ zezeba jaradara wãrĩnubasita, mʉ̃ara edakĩrãbasi librorata maʉ̃ne ewari aba edasi libro aba azul kiruta yi trʉ̃ra naʉ̃basi La verdad que lleva a vida eterna. Naʉ̃ libro trʉ̃ra mʉ̃mara jipade yibiabasi, mʉ̃a naʉ̃ librora maʉ̃ ewaride diamasi jõma ma lesi, nrʉema mʉ̃a kʼawuasi idibʉrʉ ũdusita saʉ̃ta religion wãrĩnuarata.

Poaga 1972de abrilde, mʉ̃a lesi mejãcha kartara Jeowa ʉ̃rʉ Kʼawuabipanʉrãneta akʉza ũdusi sãwũã Daizeze Bedʼeaba panʉbʉta bedʼea mʉ̃a jõma widibʉra. Jesúsba nebʉrasi yumakẽrã aba ne nedobariba nebiata ũdusita akʉza iya erbʉta jõma nedobʉesita maʉ̃ nebia edaita. Mʉ̃ra naʉ̃ yumakẽrã kĩrãkʼa sentibasi, mʉ̃ara nekʼãrẽ jõma mʉ̃a erbʉra idubʉsi wãrĩnune eda wãña, mʉ̃ra unibersidaeda wãkĩrãbasi mediko bʼaita mamina oẽ basi (Mat. 13:​45, 46). Mʉ̃ra buru kʼoesi 10 diciembre 1972de.

Poaga aba berabaribʉrʉde, mʉ̃ yibariraba akʉza mʉ̃ mebẽã tẽãbemaba ĩjãsida Jeowa ode wãita akʉza ãyira buru kʼoesida. Julio 1973de, mʉ̃ra yi nãã edebaribasi. Dai kongregasione basi prekursora biʼia kiruta iyira Jeowaʉ̃me biabasi iyi trʉ̃ra Ann-Catrin, daira yi kãga kʼãrãpe juwa jidasida 1975de. Maʉ̃ tẽã daira poaga kimare basi pʉwʉrʉ zake Strömsundmae maʉ̃ra basi Sueciade akʉza maʉ̃ pʉwʉra biʼia kirasi adewara ẽbẽrarã mamabemarabara kʼawuakĩrãbasi Daizeze Bedʼea ʉ̃rʉ.

Ann-Catrin: Mʉ̃ zezebara wãrĩnura kʼawuasi iyi waidide unibersidaeda wãbʉeda pʉwʉrʉ Estocolmone. Mʉ̃ waidide wĩkakirueda jedeko ũbea bʉeda mʉ̃ zezebara ãba yi jʉrebarieda edebasi akʉza jaradiade edebasi, mamina mʉ̃ papabara jipa kãga ẽ basi maʉ̃ra iya jʉrʉsi sãwũã ũdubita mʉ̃ zezea Jeowa ʉ̃rʉ Kʼawuabipanʉrãbara aña opanʉta, mamina obe ẽ basi, ewari berabarida tẽã mʉ̃ zezera buru kʼoesi. Mʉ̃ra buru kʼoesi 13 poagabʉta akʉza 16 poagabʉde yi nãã edebaribasi. Tẽã mʉ̃ra wãsi Umeåena Daizeze Bedʼea jaradiaita mamara mejãcha nesidabasi ẽbẽrarã jaradiaita kʼarebadamarẽã maʉ̃ne mʉ̃ra prekursora espesial babisida.

Dai juwa jidada tẽã, daibara ẽbẽrarã mejãchaʉa jaradiasida Daizeze Bedʼeata, maʉ̃ne jaradiasida Maivorʼa, naʉ̃ ẽbẽra wẽrãbara Jeowadeta audre oya idubʉsi iyi jemebadara akʉza iyira prekursora basi mʉ̃ mebẽã tẽãbemaʉ̃me. Maʉ̃ta poaga 1984de ãyi ũmena wãsida Eskuela Galaadʼeda akʉza mamaʉ̃ba misionerade zokʼa bʉesida Ecuardorʼeda.

Maraba Daizeze Bedʼeata drʉa biode jaradia zebʉrʉdera, ¿kʼãrẽba kʼareba zebʉrʉ naʉ̃ ũrãgʼaba jarabʉ oũdubita «Bʉ ubʉdamae ponora»?

Mats: Daia awuru drʉaeda jaradia wãmarẽã jarapanasidera, daira mejãcha kʼarebasi krĩchaiba Jesúsde kĩrãkʼa oita, iyara eda krĩchabʉta ũdubibasi (Col. 2:​6, 7). Bari jaradaita, dai awuru drʉaeda zokʼa bʉebʉdadera daibara krĩcha ẽ basi mebẽrãbara daiba obʉ kĩrãkʼa oibarata awuarabʉrʉ daibʉrʉ jʉrʉpanasi sãwũã mebẽrãba mamabemaba obʉ kĩrãkʼa oita, ũdu kʼawuaita ãyi kulturata akʉza kʼawuaita ãyi kʼãrẽa mawũã krĩchapanʉta. Daiba Jesúsde kĩrãkʼa obʉrʉdera daitara zare ẽ basi awuru drʉaeda zokʼa bʉebʉdade mesera kʼawaira akʉza sobia panasi daira (Sal. 1:​2, 3).

Ann-Catrin: Bakuru aba iyi badamaeba jãpe ubʉdade bia pãwãraira nesida bisiata, abarika daitara dai bisiara Jeowabasi (Sal. 84:11). Jeowaba daia diasi mebẽrã kongregasionebemarata, ãyara mejãcha kãgata ũdubipanasi daia bari jaradaita, Teheránʼne (Irán). Mebẽrã mamabemabara daira bia edabapanasi akʉza nekʼãrẽ diakĩrãne diapanasi. Ãya maʉ̃ odaba daia kĩrãbebisi Daizeze Bedʼeade ẽbẽrarãba wuabemara sãwũã bia edada ʉ̃rʉ. Daira Iránʼnera mejãcha sobia panasi, mamaʉ̃ba aña wãma panasi mamina julio 1980de nokʼoraba jarasida Jeowa ʉ̃rʉ Kʼawuabipanʉrãba obʉra wua oda ẽ marẽã akʉza jarasida daira maʉ̃ pʉwʉrʉdebara aña wãibarata. Maʉ̃ kʼarea daira zokʼa bʉesida Áfricaʼeda pʉwʉrʉ Zaireʼeda, maʉ̃ pʉwʉrʉra atiara kʼãwũã ũdukʼaʉpanʉ República Democrática del Congo.

Mʉ̃a kʼawuaside dai Áfricaʼeda zokʼa bʉedaita, mʉ̃ra mejãcha jẽgasi, perabasi ũrĩbasi baera Áfricadera damata mejãcha bʉta akʉza kayarata mamina dai neũdukʼawua biara mainʉ Daizeze Bedʼea poaga bio bayeda jaradia badaba daia jarasida: «¿Kʼãrẽa mawũã krĩchai marara mainʉ wãkabʉrʉ? Wãidua, maraba ũduyi sãwũã bia berabarita mama». Ãya jaradara wãrĩnubasi, mebẽrã Áfricadebemarabara mejãcha kãgata ũdubipanasi. Dai mama panʉta 6 poaga berabarida tẽã nokʼoraba jarasida wua jaradiada ẽ baita, maʉ̃ba daira Áfricadeba aña wãibarabasi, maʉ̃ne mʉ̃ra mʉ̃yikʉza ipidabasi krĩchasi baera mʉ̃ Áfricaʼeda wãmabasimina atiara Jeowa widibasi idu amaemarẽã Áfricade.

¿Kʼãrẽ nebiata ũdu zebʉda maraba Jeowade opanʉne?

Mats: Daitara jipade yibia kʼãwũã drʉa jãpeʼeda zokʼa bʉdade ũdupanʉ baera awuru mebẽrã daiba obʉ kĩrãkʼa bʉta opanʉta akʉza ãyira drʉa jãpedebema adewara daira sobia panʉ dai aba abakaʉba ẽbẽrarã 20 bʉa jaradiapanʉ baera Daizeze Bedʼeata. Adewara daibara sobiade kĩrãbepanʉ mebẽrã Áfricadebemaba kʼãrẽ odata ãya daia kãgata ũdubisida akʉza daira bia edasida. Daiba mebẽrã kongregasionʼra Zairedebema akʉ wãbʉrʉdera dai karrude wãpanasi akʉza mama kʼãĩ panasi daira, dai mainʉ jʉ̃ẽbʉrʉdera mebẽrãbara daira bia edapanasi akʉza ãya erbʉde wũẽta diapanasi ãyara (2 Cor. 8:3). Adewara daibara jipade kãgabasi nebʉraita diamasi kʼãĩ wãi nãã Ann-Catrinba mʉ̃meba krĩchapanasi ewaride kʼãrẽ berabarida ʉ̃rʉ akʉza Jeowaʼa biga diapanasi ewari jõmaʉ̃nẽ dai kʼawabʉ baera.

Ann-Catrin: Mʉ̃ara jipade kãgabasi mebẽrã awuru drʉadebemarata ũdukʼawuaita akʉza awuru bedʼea kʼawuaita bari jaraita, francés, luganda, persa akʉza suajili, daiba naʉ̃rane ũdukʼawuasi ẽbẽrarã kultura jõma jipa awuara awuarakabʉta adewara mʉ̃ita jipade yibiabasi kʼarebaita awuru mebẽrã ʉ̃rabʉrʉ Jeowa odepanʉta ãyi neũdukʼawua bia bʼaita akʉza ãba Jeowaita trajaita (Sof. 3:9).

Adewara daiba ũdu zebʉda Jeowaba sãwũã nekʼãrẽ kĩrãtana parãnata, adewara daiba aña wãita ĩjãbʉrʉdera dayima Jeowaba daia ũdubibʉ kĩrãkʼabʉ saʉ̃ ode wãibarata adewara daiba ũdu zebʉrʉ Jeowaba sãwũã nekʼãrẽ mejãcha jaradia zebʉrʉta naʉ̃ra dai dobaʉbara kʼawua ze ẽ bakasi.

¿Kʼãrẽ bedʼea zromata ũdu zebʉrʉ marabara akʉza kʼãrẽba kʼareba zebʉrʉ maʉ̃ne?

Mats: Maʉ̃ra poagarane daira mejãcha kayasi bari jaraita, daira paludismoba barisi akʉza mʉ̃ kima Ann-Catrinʼra bio operasida mejãcha kayasi baera. Adewara daira mejãcha krĩcha opanasi dai yibarira kʼarea ãyira zõnabasida baera maʉ̃nera dai mebẽrãba mejãcha kʼarebasi ãyira biʼia akʉsida maʉ̃ra daibara kĩrãduada ẽ (1 Tim. 5:4). Daiba ãyi mejãcha kʼarebakĩrãpanasimina jĩgapanʉ baera mejãcha obe ẽ basi daiba kãgabada kĩrãkʼa, maʉ̃ba edaʉde daira mejãcha sopʉabibasi.

Ann-Catrin: Poaga 1983de, dai Zairede bʉeda mʉ̃ra mejãcha kayasi koleraba, medikoba mʉ̃ kima jarasi: «Aña ededaibara iyira mesera». Nrʉema daira wãsi Sueciaeda, maʉ̃nera daira wãsi abion nekʼãrẽ edebaride, maʉ̃ abionʼra ẽbẽrarã edebari ẽ basi.

Mats: Medikoba jarasi Ann-Catrinʼra be ẽ baita, daira maʉ̃ kʼarea mejãcha jẽgapanasi krĩchapanasi baera misionerodebʉta idubʉdaita. Mamina Ann-Catrinʼra besi, maʉ̃ta daira poaga aba berabarida tẽã zokʼa bʉesida jẽda Zaireʼeda pʉwʉrʉ Lubumbashide kʼarebamarẽã kongregasion suajili bedʼea bedʼeabʉde.

Ann-Catrin: Daiba wũãwũã baraita krĩcha ẽ basimina dai Lubumbashidebʉde mʉ̃ra biogo besi mamina mʉ̃ wũãwũãra urawãsi maʉ̃ kʼarea daira mejãcha sopʉasida, mawũãsidu dai mawũã sopʉabʉde ũdusida Jeowaba sãwũã kʼarebasita bari jaraita, daibara ẽbẽrarã mejãchaʉa Daizeze Bedʼeata kʼawuabi jʉ̃drʉsida maʉ̃ta poaga aba bai nãã, kongregasionera 35 jaradiabari badata 70 panesi akʉza ẽbẽrarã nãã ãba yi jʉrebarieda 40 wãbadara tẽã wãbesi 220 ẽbẽrarã. Mawũẽra daira maʉ̃nera nekʼãrẽ mejãcha oita erbasi jaradiapanʉne, mʉ̃a ũdubasi Jeowaba sãwũã kʼarebabʉta maʉ̃ba mʉ̃a mejãcha so zarea diasi. Mamina daibara dai wũãwũãra kĩrãduada ẽ basi iyi ʉ̃rʉ krĩchapanasi akʉza iyi ʉ̃rʉ bedʼeapanasi adewara sobiapanʉ kʼawuapanʉ baera aranʉbai Jeowaba dai sopʉara jipa taʉbita.

Mats: Ewari berabarida tẽã, Ann-Catrinʼra mejãcha kayasi, iyira kakuade zarea neẽ besi, maʉ̃ne mʉ̃si kayasi kolonʼne kanserba maʉ̃ra izdrasi jipa maʉ̃ kʼarea operasida mamina atiara mʉ̃ra biabʉ akʉza Ann-Catrinsida biabʉ. Atiara iyara zarea obʉ iya oseabʉta oita Jeowa kʼarea.

Daibara kʼawuapanʉ awuru mebẽrãsida mejãcha bedʼea zromane berabaripanʉta dai kĩrãkʼa bari jaradaita, poaga 1994de Ruandade daiba akʉ wãsida mebẽrã mejãcha ãyi drʉadeba mama jʉ̃ẽnapeadata yõta mejãcha basi baera, daiba ũdusida naʉ̃ra mebẽrãbara wãrĩnu ĩjãbʉta ũdubipanasita akʉza ãyira Jeoware kʼẽrẽpanasi adewara wuabemarata bia edapanasi. Maʉ̃neba daiba kʼawuasida Jeowabara mejãcha zarea erbʉta iyi odepanʉra kʼarebaita nekʼãrẽ badude (Sal. 55:22).

Ann-Catrin: Betel yiwidi obʉdade reunionta opanʉ, daira maʉ̃ reunionʼena wãmarẽã trʉ̃sida Ugandaeda 2007de. Maʉ̃ reunion berabarida tẽã, daira wãbasi 25 misionerorabawara akʉza betelitarabawara Nairobiʼeda, maʉ̃ra Kenianebʉ. Maʉ̃ta dai Keniainʉ jʉ̃ẽi nãã karru abaʉba dai karruma tẽĩsi, maʉ̃ne beisi mebẽrãta juesoma akʉza yi karru maneja badata. Adewara tẽã ospitalde beisi mebẽã wẽrãta aba, daibara mejãcha krĩchapanʉ maʉ̃ra mebẽrã jẽda ũdui ewarita (Job 14:​13-15).

Maʉ̃ ewadedera daisida posi, mamina ewari berabarida tẽã besi. Adewara mʉ̃a mʉ̃ kimaba akʉza awuru mebẽrãba maʉ̃ ewaride berabaridata jẽda krĩchabʉrʉdera mejãcha krĩcha opanʉ akʉza perapanʉ bari jaraita, mʉ̃ra diamasira bia kʼãĩbe ẽ basi akʉza kʼãĩbʉrʉdera pera piradrʉbasi, adewara sentibasi dayima mʉ̃ sora pikiai kĩrãkʼa. Mamina daira mejãcha kʼareba zebʉrʉ Jeowa yiwidʼiba akʉza Daizeze Bedʼea akʉiba akʉza maʉ̃ ʉ̃rʉ krĩchaiba. Atiara daira audre so zareapanʉ maʉ̃ba daiba Jeowaʼa widipanʉ kʼarebamarẽã awuru ẽbẽrarã dai kĩrãkʼa iyaba berabaripanʉrata kʼarebadaita.

Maraba jarapanʉ Jeowabara marara biʼia akʉbʉta neʉ̃mʉ õgoata iyi juwade edebari kĩrãkʼa, ¿kʼãrẽta jarakĩrãbʉ maʉ̃bara?

Mats: Ẽbẽrarã suajilidebemaba mejãcha zokʼa panʉ naʉ̃ bedʼeata, «Tumebebwa kama mayai mabichi», naʉ̃bara jarakĩrãbʉ «Edesida neʉ̃mʉ õgoa kĩrãkʼa». Ẽbẽra abaʉba neʉ̃mʉ õgoata yi juwade edera iyara jʉra kʼawua edebʉ, abarika daiba ũdusi dai wãmae Jeowaba daira iyi juwade jʉra kʼawua edesita akʉza bia akʉsita. Iya ewari jõmaʉ̃nẽ diasi daiba nesidabʉta edaʉde daiba nesidabʉde wũẽta diabasi bari jaradaita, dai bedʼea zromane berabaribʉrʉdera Zõrãrã Burubiadebemaraba mejãcha kʼareba panasi maʉ̃neba daiba ũdupanasi Jeowabara daira mejãcha kãgata.

Ann-Catrin: Matsba Jeowaba dayirã sãwũã akʉbʉ ʉ̃rʉ jarabʉrʉba mʉ̃a kĩrãbebibʉ mʉ̃ sãwũã berabaridata. Ewari aba, mʉ̃ta trʉ̃sida jaradaita mʉ̃ zezera mejãcha kayanʉmʉta akʉza ospitalde erpanʉta mamina maʉ̃nera Matsʼra paludismoba baridata basi maʉ̃ba iyira waidide zarea neẽ basi adewara daira plata neẽ basi Sueciaeda wãira, maʉ̃ kʼarea daibara krĩchasida biga bʼaita dai karru nedobʉeita mamina daiba maʉ̃ta oita panʉne ẽbẽrarã ũmeba trʉ̃sida dai. Nããra trʉ̃sida mebẽrã juwa jida panʉraba ãya dai kʼãrẽne berabarinʉmʉ kʼawuai jarasida, diaita pasajeta aba abione wãmarẽã adewara mebẽã wẽrã yõdra kiruba trʉ̃si naʉ̃ mebẽã wẽrãbara platata wuaga erbasi kaja zakede maʉ̃ne iya kʼãwũã bʉ erbasi «yi nesidabʉraita», maʉ̃ne daiba ũdusida Jeowabara daira mesera kʼarebasita (Heb. 13:6).

Maraba ewariza Jeowadeta obʉta 50 poaga badera, ¿kʼãrẽta kʼawuabʉda?

Ann-Catrin: Mʉ̃ara mejãcha krĩchakĩrã Isaías 30:15ba jarabʉ ʉ̃rʉ, nama jarabʉ: «Marara zarea panañi aduʼapanʉbʉrʉ akʉza ĩjãbʉta ũdubidara», naʉ̃ba ũdubibʉ dayirãba nekʼãrẽ badude Jeowa ʉ̃rʉ ĩjãnara, dayirã bedʼea zromane berabaribʉrʉdera Jeowaba kʼarebaita (2 Crón. 20:​15, 17). Adewara daiba ũdu zebʉda Jeowadeta ewariza oita jidasida baera nebiata mejãcha ũdupanʉta, mamina kʼawuapanʉ daiba nekʼãrẽ awuruta oita jidasidabʉrʉ maʉ̃ra nebiara ũduda ẽ bakasita.

Mats: Mʉ̃ara kʼawua zebʉrʉ ewari jõmaʉ̃nẽ ĩjãibarata Jeowa ʉ̃rʉ mawũã ũduita iya sãwũã kʼarebabʉta mʉ̃ta (Sal. 37:5). Wãrĩnu Jeowabara daira iya jarada kĩrãkʼa kʼareba zebʉrʉ. Dai nama Betel Myanmarde panʉnebida ũdu zebʉda iyi kʼarebara.

Daiba ũdusida Jeowaba sãwũã kʼarebasita, kãgapanʉ abarika warrarabida ũdudamarẽã Jeowaba ãyi sãwũã kʼarebabʉta Jeowadeta audre oita jidadara. Daiba kʼawuapanʉ Jeowabara ãyira wãrĩnu kʼarebaita ãyi wãbʉrʉmae ãya iduaribidara.