Lepanʉraba widipanʉta

¿Proverbios 30:​18, 19ba naʉ̃ bedʼea jarasidera kʼãrẽta jarakĩrãbasi «yumakẽrãta yuwẽrã warraraʉ̃me sãwũã wãi ʉ̃rʉ» kʼãrẽa jarasi iya maʉ̃ bedʼeara bia ũrĩ ẽ basita?

Ẽbẽrarã mejãchaʉba akʉza Daizeze Bedʼea ʉ̃rʉ kʼawuapanʉraba maʉ̃ bedʼeata mejãcha widipanʉ kʼãrẽta jarakĩrãbʉta. Nama Traducción del Nuevo Mundo de jarabʉ: «Bʉ nekʼãrẽ ũbea mʉ̃ mejãcha kĩrãmĩgabibʉta, mamina yi kimaredebemata bia ũrĩ ẽ mʉ̃a: Nejõbʉ ʉ̃tʉ sãwũã ateita, dama mõgara ʉ̃rʉ sãwũã wãbʉta, pʉza ẽzadra jãba zroma sama wã ʉ̃rʉ akʉza yumakẽrãta yuwẽrã warraraʉ̃me sãwũã wãi ʉ̃rʉ» (Prov. 30:​18, 19).

Yumakẽrãta yuwẽrã wararraʉ̃me sãwũã wãi ʉ̃rʉ maʉ̃ bedʼeara nããrãra aña ũrĩpanasida, ¿kʼãrẽa mawũã aña ũrĩpanasida? Nama Proverbios 30:​15, 16de jarabasi mejãcha nekayirua obu ʉ̃rʉ, waya nama wika kiru 20de jarabasi yuwẽrã ãĩbabʉ ʉ̃rʉ, maʉ̃bara nekayirua obasimina oẽbʉ kĩrãkʼa basita. Maʉ̃ kʼarea krĩcha zesida nejõbʉba, damaba, jãba zromaba akʉza yumakẽrãba, maʉ̃raba nekayirua obadara miõba yi kʼawuabi ẽ basida. Maʉ̃ba daibara krĩcha zesida naʉ̃ bedʼeaba jarabʉra yumakẽrãta yuwẽrã warraraʉ̃me, sãwũã wãi ʉ̃rʉra jarakĩrãbasita maʉ̃ yumakẽrãba bia sewakʼaʉbasita maʉ̃ yuwẽrã warrarabʉa auduaita iya kʼawuaena.

Bʉ nekʼãrẽ mejãcha wãrĩnu ĩjãita naʉ̃ bersikuloba jarabʉta, nebia ʉ̃rʉ bedeʼabʉra, naʉ̃ Proverbioba bʉdabara naʉ̃ bedʼeadeba ũdubibʉ iyitara nekʼãrẽ mejãchabasita iyi kĩrãmĩgabidata.

Proverbio 30:18de bedʼeabʉ nebia ʉ̃rʉ, maʉ̃ta jarabʉ Daizeze Bedʼea nããra juwaba bʉda kikibari ebreoba. Nama disionariode naʉ̃ bedʼea ebreode jarabʉ mejãcha kĩrãmĩgabibʉ, maʉ̃ra naʉ̃ bersikulode jarakĩrãbʉ audre yi zromata mʉ̃ krĩchaira (Theological Lexicon of the Old Testament, de Ernst Jenni y Claus Westermann).

Propesor Crawford Howell Toy, Unibersida Harvard, Estados Unidosdebemaba jarasi naʉ̃ bedʼeade jarabʉra nebia ʉ̃rʉ jarabʉta akʉza maʉ̃ propesorba jarabʉdebara naʉ̃ Proverbio bʉdabara ũdubibasi kʼãrẽãba kĩrãmĩgabibasita iyita maʉ̃ra nekʼãrẽba.

Abarika naʉ̃ Proverbios 30:​18, 19 bʉda kĩrãka dayisida kĩrãmĩgabibʉ nejõbʉra ewarade sãwũã wãbʉdeba dama mõgara ʉ̃rʉ jĩrʉ neẽmina sãwũa erbari wãbʉdeba jãba zroma sãwũã pusa ẽzadra wãneba akʉza sãwũã yumakẽrã warrarabʉta yuwẽrã warrarabʉme yiya kãga sobia ba zeseabʉta.