Nekʼãrẽ biata kʼawua zebʉrʉ mʉ̃ nejaradiabari biadeba

MɄ̃ YIBARIRA YIZATA

Poaga 50ra jõbodoare mʉ̃ yibarirãra Italiadeba wãsida Canadáeda, pʉwʉrʉ zake yi trʉ̃ Kindersley Saskatchewanʼeda. Mama panʉta dããrababʉrʉde mʉ̃ yibariraba ũdukʼawuasida Jeowata. Ãyitara nekʼãrẽ Jeowadeta nããra bʉeita audre yibia basi. Mʉ̃a kĩrãbebʉ mʉ̃ra mʉ̃ yibarira kʼaidu badua jaradiade wãbasita, maʉ̃ba mʉ̃a edaʉde jarabʉ mʉ̃ara prekursorado ausiliarta obasita 8 poaga bʉdeba.

Mʉ̃ yibarirabara plata mejãcha erpana ẽ basi, mʉ̃ zezera trajabasi de ara obʉde akʉza zʉgʉbʉde. Maʉ̃ne iyitaʼa trajo mejãcha ũdubasimina edaʉde ʉ̃kʉrʉta ĩjã ẽ basi audre okĩrãbasi baera Jeowadeta. Adewara mʉ̃ yibarirabara nekʼãrẽ jõma opanasi Jeowadeta nããra bʉeita. Bari jaradaita poaga 1963de asamblea internasionalta osida Pasadenane (California, Estados Unidosde). Mʉ̃ yibarirãra maʉ̃ asambleaeda wãkĩrãbasi maʉ̃ kʼarea ãya nekʼãrẽ erbʉra jõma nẽdo bʉesida plata ũduita. Adewara 1972de dai badamaeba wãsida pʉwʉrʉ Trailʼeda, maʉ̃ra jĩga basi Columbia Británicade (Canadá). Mʉ̃ zezerara mama wãsida jaradiaita ẽbẽrarã italiano bedʼea bedʼeapanʉrama.

Mʉ̃ yibarirabara yiza biata diasida daiʼara, maʉ̃ba mejãchade biga diabʉ ãyaʼa mʉ̃bari akʉza mʉ̃ mebẽrã ũbea panʉrabari kʼãrẽ oda kʼarea. Ãya kʼãwã jaradiadaba kʼarebasi mejãchade daita akʉza naʉ̃ra mʉ̃ara kĩrãduaka bayi. Ãya jaradiasida mʉ̃a nãã Jeowadeta bʉebʉbʉrʉ Jeowaba ewari jõmaʉ̃nẽ akʉita mʉ̃ra (Mat. 6:33).

EWARI JÕMA ZOKʼASI JEOWADE OITA

Poaga 1980de mʉ̃ra juwa jidasi Debbieʉ̃me, iyira kĩrãwãreãbasi akʉza iyara audre okĩrãbasi Jeowaita. Dai ũmeba audre diakĩrãpanasi Jeowaʼa, maʉ̃ba dai juwa jidadata jedeko ũbea berabarida tẽã Debbiebara prekursoradota ojʉ̃drʉsi. Maʉ̃ta poaga aba berabarida tẽã daira wãsida awuru kongregasionʼena, mamara nesidabasi kʼarebata Daizeze Bedʼea jaradiaita. Maʉ̃ne mʉ̃abida ojʉ̃drʉsi prekursoradora.

Mamina ewari berabarida tẽã daira nãã sobiabada kĩrãkʼa sobiapana ẽ basi akʉza maʉ̃ba aña wãkĩrãsida. Mamina daiba maʉ̃ta oi nãã bedʼeasida sirkuito abaʉ̃me, naʉ̃ mebẽãbara ibiade daiʼa jarasi iya kʼãrẽta krĩchabʉta maʉ̃ ʉ̃rʉ. Iya jarasi: «Wãrĩnubaira yi bedʼea zromara mara. Marabara audrera akʉnʉmʉ kʼãrẽta aña nʉmʉta akʉ ẽã kʼãrẽ biata nʉmʉta. Kʼãrẽ bia bʉta akʉdara ũdudayi». Naʉ̃ mebẽãba jaradara jipade yibia basi daitara, maʉ̃ta ũrĩta nesidapanasi. Daiba iya jaradata ũrĩsida baera ũdusida kʼãrẽ nebiata bʉta (Sal. 141:5). Bari jaradaita daiba ũdusida mebẽrã kongregasionebemabara nekʼãrẽ jõma opanʉta Jeowaita. Maʉ̃ne eda panasi wũãwũãrata akʉza ʉ̃kʉrʉ mebẽrã ãyi kima Jeowa ode bʉ ẽãrata. Naʉ̃neba Jeowaba daiʼa nebiata jaradiasi. Daiba kʼawuasida akʉibarata nekʼãrẽ bia dayi audu bʉta akʉza dayi neida berabaribʉrʉdera ĩjãibarata Jeowaba iya kʼawuabʉ ewaride kʼarebaita (Miq. 7:7). Maʉ̃ tẽã daira akʉza jẽda sobiapanasi akʉza wiña wiñane nekʼãrẽra ara owãsi.

Dai eskuela prekursorʼeda jʉ̃ẽkata jʉ̃esidera erpanasi nejaradiabarira awuru pʉwʉrʉde misionerora badata. Ãya mama sãwũã jaradiabʉ ũdubita ũdubisida potota akʉza nebʉrasida ãya kʼãrẽ bedʼea zroma ũduda ʉ̃rʉ. Adewara ãya kʼãrẽ nebiata ũdusidata. Ãya nebʉrabʉ ũrĩba kʼarebasi daibida misionero bʼaita krĩchaita akʉza maʉ̃ta okĩrãita.

Daira mawũã misionero bakĩrãbʉ baera daiba nekʼãrẽ ojʉ̃drʉsida maʉ̃ta ũdubita, maʉ̃ kʼarea poaga 1984de wãsida Quebecʼeda, naʉ̃ra jĩga basi Columbia Británicadebara. Ẽbẽrarã maʉ̃ pʉwʉrʉdebemabara bedʼeapanasi bedʼea pransesta, aramaʉ̃ta daibara kʼawaibarabasi ãyi bedʼeata akʉza ẽbẽrarã mamabema bʉ kĩrãkʼa bʼaibarabasi. Maʉ̃ awuara daiba ũdusi awuru bedʼea zromata. Edaʉde daiba plata wiña erpanasi, maʉ̃nera daiba ũdupanasi Jeowaba dai sãwũã mejãcha kʼarebabʉta (Sal. 64:10). ¿Sãwũã kʼarebasi iya daira? Dai mawũã plata wiña erbʉdera Jeowabara kʼarebabasi daiʼa yiko diabʉde, edaʉde daibara papa awa koibarabasi neẽ basi baera wuara. Maʉ̃ papara daibara erpanasi ẽbẽra dai de kʼawabʉba diabʉ baera. Mamina mʉ̃ kima Debbieba jʉrʉbasi sãwũã kĩrãtana wia koita papara. Daiba naʉ̃ra bedʼea zromara ũdusidamina sobiade awuantasida Jeowaba kʼarebasi baera.

Ewari aba daiba jʉ̃ã ẽãne trʉ̃sida daira, maʉ̃ne jarasida daira wãibarata Betel Canadáeda. Maʉ̃ nãã daiba misionero bakĩrãbʉ baera birasibasi solisitu Eskuela Galaadʼeda wãita, maʉ̃ba daibara kʼawua ẽ basi sãwũã sentira. Sobiapanasi Beteldeba trʉ̃sida baera mamina sopʉapanasi wãbe ẽ baera eskuelaeda. Maʉ̃ba dai Betelʼeda jʉ̃ẽbʉrʉde mebẽã Kenneth Little Comité Sucursaldebema, naʉ̃ta widisida: «Daita eskuelaeda wãita trʉ̃nara, ¿kʼãrẽta oi daibara?». Aramaʉ̃ta mebẽãba daiʼa jarasi: «Maʉ̃ ewari zebʉrʉde kʼawua krĩchadayi kʼãrẽta odaita».

Semana berabarida tẽã daira trʉ̃sida Eskuela Galaadʼeda wãita. Maʉ̃nera daibara jidaibarabasi kʼãrẽta oita. Aramaʉ̃ta mebẽã Littleba daiʼa naʉ̃ta jarasi: «Maraba baduta jidaseabʉ, maʉ̃ jidada tẽãra maraba tẽã krĩchayi audre yibia basita ababemata jidaita, mamina wãrĩnubaira ãyidebema baduta yibia maraba badu jidadade Jeowaba kʼarebai baera». Aramaʉ̃ta daibara krĩchasida Eskuela Galaadʼeda wãita. Maʉ̃ta poaga bio berabarida tẽã daiba ũdusida mebẽã Littleba jaradara wãrĩnu basita. Idi ewade daiba wuabema mebẽrã dai kĩrãkʼa iyabaʉ nekʼãrẽ aba jidaibara ʉ̃rʉ krĩchabʉrʉdera iyabaʉ bedʼea naʉ̃ mebẽãba jaradata jara ũrĩbipanʉ.

DAI MISIONERO BASIDE KʼÃRẼ BERABARIDATA

Daira wãsi Eskuela Galaad numero 83eda, maʉ̃ra jʉ̃drʉsi abril 1987de Brooklynʼne (Nueva Yorkde). Daira ãba estudiapanasi mebẽrã 22 bawara. Maʉ̃ra daitara jipa yibia basi, mejãcha sobia panasi maʉ̃ kʼarea. Daiʼa nejaradiapananara naʉ̃ra mebẽrãbasi Ulysses Glass akʉza Jack Redford. Daira naʉ̃ eskuelade estudiapanʉta 5 jedekobasi mamina maʉ̃ra daitara mesera berabaribʉrʉ kĩrãkʼabasi. Maʉ̃ta 6 septiembre 1987de graduasida daira. Mõbe zokʼasida Haitíeda. Daira wãsi mebẽrã John akʉza Marie Goodebawara.

Eskuela Galaadʼde graduadata semana ũbea berabarida tẽã daira wãsi Haitíeda kʼarebade kongregasion aba nejaradiabarira 35 erbʉma, maʉ̃ra jĩga basi. Haitíedara poaga 1962deba ya misionerorãra zokʼa bʉeda ẽ basi mebẽrã mama pananara jʉretasida. Ẽbẽrarã Haitídebemabara nekʼãrẽ mejãcha erba ẽ basi akʉza ãyidebema mejãchaʉba lebe ẽ basi. Maʉ̃ ewadedera daira warrara panasi akʉza daiba nekʼãrẽ mejãcha kʼawuaibarabasi. Adewara daitrʉ panasi de misionerora diadapeadamae. Dai mama panʉenara daiba bedʼea zroma mejãcha ũdusida. Ẽbẽrarã mamabemarãra yõpanasi politika kʼarea akʉza mejãchaʉta nokʼora ʉ̃rʉ panasi. Adewara protestata mejãcha opanasi, maʉ̃ awuara nãgʉta berabarisi.

Mebẽrã Haitídebemaneba daiba kʼawuasida bedʼea zroma erpanʉmina zareapanaita akʉza sobiapanaita. Naʉ̃ra mebẽrã mejãchaʉba bedʼea zromata ũdupanasi mawũãsidu ãyara Jeowara mejãcha kãgabasi akʉza jaradiakĩrãpanasi. Mama basi mebẽã wẽrã aba lebe ẽã kiruta mawũãsidu iyara burude kʼawuasi 150 testorata. Daiba kʼãwũã ewariza kʼãrẽ ũdubʉba kʼarebasi ẽbẽrarã jara ũrĩbita Daizeze Nokʼobʉrʉ ara oseabʉta ẽbẽrarã bedʼea zromara. Adewara mejãcha sobiasida ũdusida baera sãwũã dai nejaradiabarira ʉ̃kʉrʉta prekursor regular basita akʉza ʉ̃kʉrʉta prekursor espesial basita, adewara ʉ̃kʉrʉta zõrãrã kongregasionebema basita.

Haitíde mʉ̃a ũdukʼawuasi kʉ̃ra aba misionerota religion mormónʼne, iyi trʉ̃ra Trevorbasi. Mʉ̃ra iyiʉ̃me bedʼeabasi Daizeze Bedʼea ʉ̃rʉ, maʉ̃ta poaga bio berabarida tẽã mʉ̃a jʉ̃ã ẽãne diasida iya karta zokʼadata, maʉ̃ne kʼãwũã jarabasi: «Mʉ̃ra buru koeyi wuarebema asambleade akʉza jẽda wãkĩrãbʉ Haitíeda, mõbe mama prekursor espesial bʼaita. Mʉ̃ mormón iglesiade baside misionero bada kĩrãkʼa». Iya maʉ̃ta osi, iyira mama besi poaga biobayeda yi kimaʉ̃me.

EUROPAEDA WÃSI TẼÃ ÁFRICAEDA

Tẽã daira zokʼa bʉesida Europaeda, mainʉra ʉ̃rabʉrʉ idaribibarasi jaradia jʉ̃drʉdamarẽã. Poaga 1992de daira wãsi Liublianaena, maʉ̃ra Esloveniane basi. Mʉ̃ yibarirãra maʉ̃ pʉwʉrʉ kʼawa panasi Italiaeda wãi nããra. Adewara maʉ̃ ewaridera ʉ̃rabʉrʉ yõta jʉ̃drʉnʉmasi pʉwʉrʉ Yugoslavia badade. Maʉ̃ pʉwʉrʉra akʉbasi Betel Viena, Austriadebemaba akʉza mebẽrã Zagreb, Croaciadebemaba akʉza Belgrado, Serbiadebemaba. Mamina tẽã pʉwʉrʉra aba abakaʉba ãyi Betelta erbaibasi.

Eslovenianera daibara awuru bedʼeata kʼawuaibarabasi akʉza awuru kulturata kʼawaibarabasi. Ẽbẽrarã Eslovenianebemaraba daiʼa kʼãwũã jarapanasi «Jezik je težek» maʉ̃ba jarakĩrãbasi «Awuru bedʼea kʼawuaira zare». Maʉ̃ra wãrĩnubasi. Daira mejãcha sobiapanasi ũdupanasi baera mebẽrã mamabemarãra kʼẽrẽpa panʉta akʉza ãya ũdubipanasi Jeowa organizasionba nekʼãrẽ awuara omarẽã jarabʉrʉde oya awa panʉta. Akʉza ũdusida Jeowaba sãwũã ãyaʼa nebiata diasita ãyita mawũã panʉ baera. Adewara kʼawuasida Jeowabara nekʼãrẽ awuara oibarabʉrʉ awuara obʉta, mamina maʉ̃nera kãgata ũdubibʉta akʉza iyara kʼawuabʉta sõbede mawũã awuara oibarata. Dai Esloveniane panasidera ũdusida sãwũã nekʼãrẽ daiba nãã kʼawuadara dai soidu zesita akʉza nekʼãrẽ yiwidita kʼawuasida mama.

Tẽã daiʼa nekʼãrẽ awuruta omarẽã jarasida. Poaga 2000de daira zokʼã bʉesida Costa de Marfilʼeda. Maʉ̃ra África Occidentalde bʉ. Mamima mama yõta jʉ̃drʉsi. Maʉ̃ta daira noviembre 2002de edesida Sierra Leonaena. Mamara ẽbẽrarã yõpanʉta 11 poaga badata ʉ̃rabʉrʉ taʉsibasi. Mama wãsidera mejãcha sopʉasida atiaʉde wãsida baera, mamina daiba nãã nebia kʼawuadaba kʼarebasi ariwia sobiapanaita.

Daitara Costa de Marfildeba wãira zare basimina zarea osida krĩchaita sãwũã Sierra Leonanebemara ẽbẽrarãba ũrĩkĩrãpanasita wãrĩnuta Daizeze ʉ̃rʉ akʉza akʉpanasi sãwũã mebẽrã mamabemaraba yõne berabarisidamina kãga ũdubipanasita. Adewara ãyira kʼãrẽ neẽ basimina ãya erbʉta diakĩrãpanasi wuabemara. Mebẽã abaʉba mʉ̃ kima Debbieʼa wuata bari diakĩrãbasi. Abedaedara Debbiebara jida ẽ baibasi maʉ̃ra, mamina mebẽãba jarada ʉ̃rʉ jarasi jidamarẽã akʉza naʉ̃ta jarasi: «Dai yõne berabarinʉmasidera mebẽrã awuru pʉwʉrʉdebemaraba kʼarebasida daira, atiara daiba kʼarebaibara yi wuabemarata». Naʉ̃ ũdui daibida mebẽrã mamabemarane kĩrãkʼa okĩrãsida.

Tẽã daira jẽda wãsi Costa de Marfilʼeda mamina dai mama panʉne ẽbẽrarãra politika kʼarea akʉza jẽda yõ jʉ̃drʉsida. Maʉ̃ba daira noviembre 2004de edesida elikoterode, maʉ̃nera daibara bolso zaketa edeibarabasi aba abakaʉba. Maʉ̃ta daira gorogorora pransesʼra bʉmae amaesida. Mama egorode kʼãĩsi daira. Nrʉema abionʼne edesida Suizaeda. Maʉ̃ta daira Betel Suizadebemainʉ jʉ̃ẽsida ewari ẽzadra babodoare. Mebẽrã Comité Sucursaldebemaraba akʉza Eskuela Entrenamiento Ministerialde jaradiapanʉraba yi kimabawaraʉba jʉ̃ãpanasi daira. Ãya diasida yikota akʉza chokolateta. Daira maʉ̃ kʼarea mejãcha sobiasida.

Tẽã daira atiaeda zokʼasida Ghanaena akʉza Costa de Marfilde yõbadata taʉbʉrʉde daira jẽda zokʼasida. Dai mawũã edepanaside akʉza daiʼa atieda nekʼãrẽ omarẽã jarasidade mebẽrãba bia edapanʉba mejãcha kʼarebasi. Debbieba mʉ̃meba krĩchasida kʼãrẽ ẽ kĩrãkʼa akʉ ẽ baita kʼãwũã Jeowa organizasione mebẽrã jõmaʉ̃ba kãga ũdubibʉta. Dai kʼãwũã bedʼea zromane berabaribʉrʉba nebiata jaradiasi daiʼa mawũã audre jaradia wãita Daizeze Bedʼeata.

ASINASIONTA DIASIDA

Poaga 2006de daiʼa diasida kartata central mundialdeba. Mama jara ũrĩbibasi daira wãibasita Asia Occidentalʼeda, (Oriente Medioeda). Mamara politikoraba akʉza religionʼnebemaraba audre zokʼapanasi. Maʉ̃ba mamara nekʼãrẽ jõma yiwidi basi daitara, awuru bedʼea zromarata ũduibasi akʉza awuru bedʼeata kʼawuaibarabasi adewara awuru kulturata. Mamina kongregasion mamabemara daitara jipade yibia basi sobiapanasi mamabema mebẽrãbara bedʼea awuara awuaraka bedʼeapanasi baera akʉza ũdusida baera sãwũã ãya Jeowa organizasionba jarabʉde obʉba kʼarebabasita ãyi ãba panaita. Adewara ãyi mebẽrãra, ãyi de kʼawabemarãra, ãyiʉ̃me ãba trajapanʉrãra adewara ãyiʉ̃me ãba estudiapanʉrãra ãyi ʉ̃rʉ panasi, mawũãsidu maʉ̃ra mebẽrãba ũdubisida zowaĩnĩgʉapanʉta, daitaʼa maʉ̃ ũduira jipade yibia basi.

Poaga 2012de daira wãsida asamblea espesialʼeda Tel Aviv, (Israelma). Maʉ̃ drʉadera pentecostés ewari poaga 33deba ya kʼãwũã mejãcha ãba yi jʉrekabasi Jeowa ode panʉrãra. Maʉ̃ba daitara jipade yibia basi, maʉ̃ ewarira kĩrãduada ẽ basi wua daibara.

Maʉ̃ra poagarane dai mama panasidera ewari aba zokʼa bʉesida pʉwʉrʉ abaʉma, maʉ̃ pʉwʉrʉdera iduaribi ẽ basi Jeowa ʉ̃rʉ Kʼawuabipanʉrãba jaradia wãmarẽã, mawũãsidu daibara dai kʼaidu edesida kartarata akʉza jaradia wãpanasi adewara ʉ̃kʉrʉ asamblea wiña odapeadama wãpanasi. Adewara mama panasi gorogororata, ãyara põgata erpanasi akʉza ode mejãcha basi daya kʼãrẽ edeta akʉpanʉrata. Daira maʉ̃ kʼareara perada ẽ basi mebẽrã mamabemarata dai kʼaidu wãpanasi baera. Ãya kʼarebapanasi jʉra kʼawua wãita.

JẼDA ÁFRICAEDA WÃSI

Poaga 2013de daiʼa diasida awuru asinasionta. Naʉ̃ra jipade awuara basi daiba nãã erbadaira, daira trʉ̃sida wãita Betel Kinsasadebemama, maʉ̃ra basi República Democrática del Congode. Maʉ̃ pʉwʉrʉra jipade yi zroma akʉza biʼiakiru. Mamina mamara mejãchabʉ yõta akʉza ẽbẽrarã mejãcha kʼãrẽ neẽ. Mama wãmarẽã jarasidadera daibara abedaedara krĩchasida: «Áfricaeda wãira bedʼea neẽ, daya kʼawuabʉ sãwũã bʉta mamara, jʉ̃ẽbada baera, maʉ̃ba Congode bʼaira bedʼea zroma ẽ». Mamina dai wãibaradera o mitiade berabaribarabasi akʉza mamara puentesida neẽ basi, maʉ̃ba daiba kʼawuasi waidide ũdukʼawuaita waebʉta. Mawũãsidu daira zarea osida nekʼãrẽ bia berabaribʉta akʉita. Bari jaraita daiba akʉsida mebẽrã mamabemara sãwũã plata mejãcha neẽ basimina sobiapanasita akʉza Jeoware zarea panasita akʉza ãya sãwũã jaradia wãbʉrʉde sobiade jaradia wãpanasita, adewara ãya kʼãrẽãba zarea opanʉta ãba yi jʉrebarieda wãita akʉza asambleaeda wãita. Maʉ̃nera daiba dai dabʉba ũdusida sãwũã Jeowa pʉwʉrʉra wiña wiñane wari wãsita akʉza ẽbẽrarã mamabemaraba sãwũã audre kʼawuakĩrãpanasita Jeowa ʉ̃rʉ. Dai mawũã Congo-Kinsasade basidera nemejãcha kʼawuasi daibara, maʉ̃ra jipade yibia basi daita akʉza ũdusida neũdukʼawuara daita mebẽrã kĩrãkʼa panʉta.

Poaga 2017 jõbodoare daira zokʼa bʉesida Betel Sudáfricadebemaena. Naʉ̃ Betelʼra jipade yi zromabasi, daira mawũã chu Betelmae chuakabasi. Mama daiʼa jarasida nekʼãrẽ okata omarẽã, daiba nãã asinasion erbadade nekʼãrẽ kʼawuadaba kʼarebasi maʉ̃ trajo oita. Betel mamabemanera mejãcha bʉ mebẽrã drʉa awuara awuarakadebemata akʉza kultura awuara awuarakadebemata, mamina jipade yibia ũduita mawũã kĩrã awuara bʉrata mejãcha bʉmina jõmaʉ̃ta ãba aduʼa panʉta. Adewara mamara mejãcha bʉ mebẽrã Jeowa ode bʉta poaga biobata. Daibara naʉ̃ra mebẽrãra mejãcha kãga. Kʼãwũã Jeowa odepanʉraba zarea opanʉ baera Daizeze Bedʼeadebemata biʼia oũdubita akʉza ãya nebia erbʉta audre bia ũdubita Jeowaba kʼarebabʉ kʼãwũã aduʼa ãba panaita.

Naʉ̃ra poagara berabari zebʉrʉde mʉ̃a akʉza Debbieʼa dia zebʉda asinasionʼra dai mejãcha sobiabibʉta. Maʉ̃itara daira kʼawaibarabasi awuru kulturama akʉza awuru bedʼeata kʼawuaibarabasi. Edaʉde nekʼãrẽ daita zare basimina daiba ũdusida Jeowaba sãwũã iyi organizasionta akʉza mebẽrã kongregasionebemarata zokʼasita daiʼa iyi kãga jõkata ũdubita (Sal. 144:2). Kʼãwũã Jeowaita ewariza trajabʉde nekʼãrẽ kʼawuabʉrʉba kʼarebabʉ mejãcha dai audre Jeowa nezokʼa bia baita.

Mʉ̃ara biga diabʉ mʉ̃ yibarira ãya mʉ̃a kʼarẽ jaradiada kʼarea akʉza mʉ̃ kima Debbieʼa mejãcha kʼareba zebʉrʉ baera. Adewara mebẽrã naʉ̃ drʉa jõmaʉ̃nẽbemaba kʼawũã yiza biata ũdubipanʉ baera. Dai nãã nekʼãrẽ berabaridadeba nebiata mejãcha kʼawuasi daibara. Atiara mʉ̃ara mʉ̃ kimaʉ̃mebara kʼawuakĩrãpanʉ dayirã Zeze Jeowa nejaradiabari biadeba kʼãrẽ nebiata audre kʼawua wãnaita ʉ̃ra zeide.