Jeowaba zokʼabʉta obʉ kʼarea sobiabʉ

MɄ̃ DEDA SÃWŨÃ BADATA

Mʉ̃ra tosida 1934de. Mʉ̃ yibarirãra Suizadebema. Maʉ̃ta ãyira pʉwʉrʉ Timmins eda wãsi, maʉ̃ra Ontario Canadádebʉ. Ẽbẽrarã mamabemara minane trajapanasi. Poaga 1939de mʉ̃ papabara karta Jarakabʉta le jʉ̃drʉsi. Maʉ̃ba iyira ãba yi jʉrebarieda wãbesi. Maʉ̃ne iyi kʼaidu edebasi mʉ̃ta akʉza mʉ̃ mebẽrã 6 panʉta. Maʉ̃ audre ẽãne iyira buru kʼoesi Jeowa ʉ̃rʉ Kʼawuabipanʉrãne.

Mʉ̃ zezebara jipade kãga ẽ basi mʉ̃ papa mawũã Jeowa ode wãira. Mamina mʉ̃ papabara mejãcha kãgabasi Jeowa ode wãira. Maʉ̃ba iyira kʼẽrẽpa basi. Poaga 1940deba ʉ̃ta Canadáde Jeowa ʉ̃rʉ Kʼawuabipanʉrãbara ãya opanʉra wua obe ẽ basi, mʉ̃ papabara maʉ̃nebida idubʉ ẽ basi Jeowara. Adewara mʉ̃ papabara mʉ̃ zezera bia akʉbasi, wawia ũdubibasi mʉ̃ zezeba imitia bedʼeabʉmina. Mʉ̃ papaba mawũã yiza biata ũdubibasi baera naʉ̃ba kʼarebasi mʉ̃ta akʉza mʉ̃ mebẽrãsida Jeowa ode wãnamarẽã. Daira mejãchade sobiasi ewari berabarida tẽã mʉ̃ zezebara daira audre bia edabasi baera. Nãã kĩrʉ bada kĩrãkʼa kĩrʉ ba ẽ basi.

MɄ̃RA EWARI JÕMAɄ̃NẼ JEOWAITA TRAJA JɄ̃DRɄSI

Poaga 1950de mʉ̃ra wãsi Nueva York eda asamblea bade. Maʉ̃ asamblea trʉ̃ra «Aumento de la teocraciabasi». Mama mejãcha ũdukʼawuasi mebẽrã yumakẽrãrata akʉza yuwẽrãrata naʉ̃ drʉa jõmaʉ̃nebemata. Adewara ũrĩsi nebʉrãra mebẽrã Eskuela Galaadʼeda jʉ̃ẽnapeadaraneta. Naʉ̃ba kʼarebasi mʉ̃abida ãyide kĩrãkʼa audre diakĩrãita Jeowaita. Maʉ̃ba mʉ̃ deda jʉ̃ẽbʉrʉdera mʉ̃ara birasi karta yi nãã edebaridebemata. Maʉ̃ne Betel Canadádebemaba mʉ̃aʼa jarasi audre bigabaita maʉ̃ bʼai nãã buru kʼoera. Maʉ̃ta 1 octubre 1950de buru kʼoesi mʉ̃ra. Maʉ̃neba jedeko aba berabarida tẽã yi nãã edebarita ojʉ̃drʉsi. Mõbe mʉ̃ra zokʼabʉesida Kapuskasingʼena jaradiade. Maʉ̃ra mʉ̃ dedaʉba jĩga chuasi.

Poaga 1951 jʉ̃drʉbʉrʉde Betel Canadádebemaba jarasi Jeowa ʉ̃rʉ Kʼawuabipanʉrã franse bedʼea kʼawuapanʉrata Quebecʼda jʉ̃ẽnamarẽã, mamara mejãcha nesidabasi baera. Mʉ̃ara bedʼea kʼawuabasi franseta akʉza ingleta, maʉ̃ kʼarea mʉ̃sida wãña asi. Mõbe mʉ̃ra zokʼabʉesida Rouynʼena. Mʉ̃ara mamabemara mia abaʉta ũdukʼawua ẽ basi. Mʉ̃a nãã jarada kĩrãkʼa mʉ̃ra jʉ̃ẽsi mʉ̃aʼa sama jʉ̃ẽi jaradapeadamae, maʉ̃ tẽã mʉ̃ra jipade neũdukʼawua bia basi mebẽã Marcelʼʉ̃me. Mʉ̃ra mama Quebecde bʉta poaga kimare basi, mamina mejãcha sobia berabarisi. Mama yi nãã edebari 100 ora diabari babisida.

GALAADTA AKɄZA MɄ̃A JɄ̃ÃBADATA MESERA BERABARI Ẽ BASI

Mʉ̃ Quebecde bʉde trʉ̃sida Eskuela Galaadʼeda wãmarẽã yi klase 26eda, maʉ̃ra osida South Lansing, Nueva Yorkde. Maʉ̃nera mʉ̃ra mejãcha sobiasi. Mʉ̃ra 12 febrero 1956de graduasi. Mamaʉ̃ba mʉ̃ra Ghanaena zokʼabʉesida Áfricade.b Ghanaena wãi nãã mʉ̃ra jẽda Canadá eda wãibarabasi jʉ̃ãita nokʼora permisota mawũã Ghanaena wãita.

Maʉ̃nera mʉ̃ara krĩchabasi mʉ̃ra semana aba mawũã ẽ bʉrʉ semana ũbea baibasita Canadáde. Mamina wãrĩnubaira mʉ̃ara jedeko 7 jʉ̃ãibarabasi Torontode mʉ̃ permiso diadamarẽã. Maʉ̃nera mʉ̃ra mebẽrã Crippsmae basi. Ãya erpanasi kauta aba, maʉ̃ trʉ̃ra Sheila basi. Daira yi kãgasida. Mʉ̃a iyaʼa mʉ̃me juwa jidamarẽã jaraitabʉde diasida mʉ̃ permisora. Maʉ̃nera daira mejãcha yiwidʼisida Jeowaʼa kʼawuaita kʼãrẽta oita. Daiba krĩchasida mʉ̃ zokʼadapeadama wãita akʉza Sheilaʼʉ̃me bedʼea bʼaita kartadeba, mawũã kʼawuadaita juwa jidaseabʉ kʼawuaita. Daiba maʉ̃ oita jidadara jipade zare basi, mamina ewari berabarida tẽã kʼawuasida maʉ̃ta audre yibia basita.

Pʉwʉrʉ Accra Ghananebemainu jʉ̃ẽira jedeko aba wãibarabasi ode. Maʉ̃nera wãibarabasi trenʼne, jãba zromane akʉza abionʼne. Mʉ̃ra superintendente distrito babisida. Maʉ̃ba wãibarabasi Ghanaena, Costa de Marfilʼeda akʉza Togoeda. Maʉ̃ oita Betelba mʉ̃aʼa diasi karruta. Maʉ̃nera mʉ̃ra audrera abapai wãbasi, mamina mebẽrã akʉ jʉ̃ẽbʉrʉde mejãcha sobiabasi.

Semana jõbodoarera mʉ̃ara kʼarebabasi asambleade, maʉ̃ ewadedera neẽ basi Asamblea Obari dera, maʉ̃ kʼarea mebẽrã mamabemabara chigorota jʉrʉpanasi akʉza kidʉarata de zake kĩrãkʼa oita mawũã bisiaba ba ẽ baita. Maʉ̃ ewaridera chichi ãrĩ ẽ marẽãra sama wuagaira neẽ basi neberata neẽ baera, maʉ̃ kʼarea mebẽrãba nedʉwʉrʉrata jida erbasi ẽbẽrarã yi asambleaeda jʉ̃ẽbʉrʉra ni diaita.

Asambleadera edaʉde neida berabaribasi. Mʉ̃a kĩrãbebʉ mebẽã Herb Jenningsbac iyi diskurso dianʉmʉne torota aba ẽdrʉ kʼãrãpe ẽzadra wẽba tẽitotosita. Herbʼbara maʉ̃nera yi kʼãrẽsi oisida kʼawua ẽ basi. Maʉ̃ne mebẽrã kimareba jidasida maʉ̃ torora, mõbe aña edesida. Aramaʉ̃ta jõmaʉ̃ta juwa tachisida.

Semananera ẽbẽrarã mʉ̃ chuadadebema pʉwʉrʉ kʼawa panʉra ũdubibasi pelikula La Sociedad del Nuevo Mundo en acción. Mʉ̃a maʉ̃ pelikula ũdubira buruba torroata bakʉrʉma jʉ̃basi. Ʉ̃kʉrʉ ẽbẽrarã mamabemarabara ũdukabasi pelikulara. Adewara ẽbẽrarãbara mejãcha kãgabasi maʉ̃ pelikulara. Ãya maʉ̃ pelikulade ẽbẽrarã buru kʼoebibarabʉta ũdubʉrʉdera juwa tachipanasi. Maʉ̃neba ãya kʼawuasida Jeowa ʉ̃rʉ Kʼawuabipanʉrãra naʉ̃ drʉa jõmaʉ̃mae mebẽrã kĩrãkʼa panʉta.

Mʉ̃ Áfricadebʉta poaga ũme babʉrʉde wãsi asamblea pʉwʉrʉ biodebema opanʉma maʉ̃ra poaga 1958de osida. Mama Sheilaʼʉ̃me yi ũdusi, maʉ̃nera mejãcha sobiasi. Sheilara pʉwʉrʉ Quebecde yi nãã edebari 100 ora diabaribasi. Iyira mamaʉ̃ba wãsi asambleaeda. Maʉ̃ nããra daira kartadeba yi bedʼeapanasi mamina mama yi ũdubʉrʉde mʉ̃a iyaʼa widisi mʉ̃me juwa jidakĩrãbʉ kʼawuaita. Iya jarasi mʉ̃me juwa jidakĩrãbʉta. Mebẽã Knorrʼad widisi Sheilara Eskuela Galaadʼeda wãseabʉ kʼawuaita akʉza mamaʉ̃ba Áfricaeda zokʼaseabʉ kʼawuaita. Mebẽãbara jarasi oseabʉta maʉ̃ra. Tẽã Sheila Ghanaena jʉ̃ẽbʉrʉde juwa jidasida Accrade, poaga 1959 3 octubrede. Maʉ̃ne daiba ũdusida Jeowaba sãwũã wãrĩnu nebia diabʉta iya zokʼabʉta nããra bʉepanʉ baera.

TẼÃ WÃSIDA CAMERÚNʼENA

Poaga 1961ne daira zokʼa bʉesida Camerúnʼena kʼarebamarẽã mamabema Betelʼta ʉ̃ra bʉrʉ jʉ̃drʉbʉrʉ baera. Mamara nekʼãrẽ oita mejãchabasi. Adewara mʉ̃a maʉ̃ Betelʼta akʉbasi baera nemejãcha kʼawuaibarabasi. Poaga 1965de mʉ̃ kimara biogosi, maʉ̃ kʼawuaira jipade zare basi daitara. Mamina tẽã maʉ̃ kʼarea sobiapaninane akʉza Canadáeda jẽda wãita krĩchapanʉne dai wũãwũãra ʉra wãsi.

Medikobara jarasi dai wũãwũãra yumakẽrã basita. Maʉ̃ mawũã berabaridata 50 poaga bamina kĩrãduada ẽ maʉ̃ ewarira. Daira maʉ̃ kʼarea mejãcha sopʉapanasimina idubʉda ẽ basi Jeowaita trajapanʉra.

Mebẽrã Camerúnʼnebemarãra pẽwãsida politikade eda wã ẽ basi baera. Mamina audre pẽwãpanasi presidentebaita jidapanʉ ewaride. 13 mayo 1970de nokʼoraba jarasida Jeowa ʉ̃rʉ Kʼawuabipanʉrãbara ãya opanʉra wua obe ẽ baita. Nokʼorabara jãrĩsida dai Betelʼra, maʉ̃ra daibara jedeko juesomapai zokʼasida. Semana aba berabarida tẽã misionerora mama panʉrãra jõmaʉ̃ta jʉretasida. Maʉ̃ra mebẽrã daiba amaeira jipade zare basi daibara ãyira mejãcha kãgapanasi baera akʉza mejãcha krĩcha opanasi ãyi kʼãrẽ sãwũã berabari kʼarea.

Daira Betel Franciadebemane panasi jedeko 6 bayeda. Mʉ̃ara nekʼãrẽ jõma osi mebẽrã Camerúnʼnebema kʼarebaita mamaʉ̃ba. Daira diciembrede iyabaʉ poagade zokʼa bʉesida Betel Nigeriadebemama. Maʉ̃ Betelba akʉ jʉ̃drʉsi mebẽrã Camerúnʼnebemarata. Mebẽrã Nigeriadebemarabara daira bia edasida. Adewara dai mama Jeowaita trajabʉdera mejãcha sobiapanasi.

ZARE BASI KʼÃRẼ OITA BIA JIDAITA

Poaga 1973de daiba bia krĩchaibarabasi kʼãrẽta oita. Mʉ̃ kima Sheilara mejãcha kayasi. Dai Nueva Yorkde asamblea eda wãita panʉne iya mʉ̃aʼa jarasi: «Awuanta ẽ mʉ̃ara, mejãcha zʉbʉriabʉ mʉ̃ra, dããraba kayabʉta». Daira Áfricade Jeowaita trajapanʉta 14 poaga berabarisi. Mʉ̃ra Sheilaba kʼãrẽ obʉ kʼarea mejãcha sobiabasi, mamina daibara nekʼãrẽ awuruta oibarabasi. Maʉ̃ tẽã daira Jeowaʼa soidʉba mejãcha yiwidʼisida. Maʉ̃ne jidasida jẽda Canadáeda wãita. Mama medikoraba audre bia akʉdaibasi baera iyira. Jeowaita ewari jõmaʉ̃nẽ trajabʉ idubʉira daitara jipade zare basi.

Dai Canadáʼeda jʉ̃ẽna tẽã mʉ̃ra traja jʉ̃drʉsi Torontode mʉ̃ neũdukʼawuamae karru nedobarimae. Daibara deta aba arrendasida, mõbe nekʼãrẽ daiba edadara yi zokʼamabasi, maʉ̃ba debe mejãcha oda ẽ basi. Daibara krĩchasida nekʼãrẽ mejãcha eda ẽ baita mawũã jẽda Jeowaita ewari jõma trajaitabʉbʉrʉ wãita. Daibara krĩchapanasi mawũã Jeowaita ewari jõmaʉ̃nẽ trajaira ewari bio berabaribasita, mamina mawũã ẽ basi.

Mʉ̃ara sabadoza kʼareba wãbasi Asamblea Obari de parãita Norval Ontariode. Tẽã mʉ̃aʼa jarasida Asamblea Obari de akʉbari bamarẽã. Sheilara nãã kayabada kĩrãkʼa aukʼara kayaba ẽ basi baera daiba krĩchasida ĩjãita maʉ̃ trajo oira. Junio 1974de daira Asamblea Obari deda wãsida mama panaita. Daira mejãcha sobiapanasi jẽda Jeowaita ewari jõmaʉ̃nẽ trajai baera.

Sheilara iyi nãã badaraira audre bia basi. Poaga ũme berabarida tẽã mʉ̃aʼa widisida zõrãrã kongregasionʼra akʉbari bamarẽã. Mʉ̃ara ĩjãsi maʉ̃ oita Sheilara audre zrogabasi baera. Daibara akʉ jʉ̃drʉsida kongregasion Manitobadebemata. Doidadera mamara ĩjara kʉrãza. Mamina mebẽrã mamabemabara mejãcha kãgata ũdubibasi baera daitara zare ẽ basi mama bʼaira. Daiba kʼawuasida Jeowaba zokʼabʉ biʼia oira kʼãrẽ ẽãta dayi sama bʉra, awuarabʉrʉ dayi samabʉ krĩcha ẽã zarea oibara daya oseabʉta audre biʼia oita.

NEKʼÃRẼ BIATA KʼAWUABɄ

Daira poaga bio basi kongregasion akʉbaride trajapanʉta, mamina maʉ̃ta poaga 1978de trʉ̃sida Betel Canadáeda traja wãmarẽã. Tẽã mʉ̃a nebiata kʼawuasi mamina mejãcha sopʉasi. Ewari aba mʉ̃aʼa jarasida Montrealde diskursota diamarẽã ora imediabayeda, maʉ̃ra franse bedʼeade jara ũrĩbibarabasi, adewara maʉ̃ diskursora jipade yibiabasi, mamina ẽbẽrarã masẽsida mʉ̃a jarabʉ kʼarea. Maʉ̃ne mebẽã Departamento Serbisiodebemaba maʉ̃ kʼarea ũrãgʼasi. Idi ewade mʉ̃a kʼawuabʉ ʉ̃tʉba diskurso diaira mʉ̃ita ẽãta, mamina maʉ̃ ewaridera maʉ̃ ĩjãira zarebasi. Adewara mebẽãba mʉ̃aʼa ũrãgʼa diadara mʉ̃itara jipade pʉbasi. Mʉ̃mara daira krĩcha abarika panʉ ẽ baera bia wã ẽ kĩrãkʼabasi, maʉ̃ kʼarea krĩchabasi iyira aukʼara bedʼeanʉmasita akʉza maʉ̃ kʼarea ũdu ẽ basita mʉ̃a diskurso diadade kʼãrẽ nebia odara. Mʉ̃aʼa ũrãgʼa diadapeadara mʉ̃ara ũrĩ ẽ basi mʉ̃aʼa sãwũã jara ũrĩbidapeda kʼarea akʉza kʼaiba jarasi kʼarea, maʉ̃ oira biga ẽ.

Tẽã mebẽã Betel akʉbaridebemata mʉ̃me bedʼeasi, mawũã iyiʉ̃me bedʼeabʉde kʼawuasi mʉ̃a odara biga ẽ basita. Mʉ̃a iyaʼa jarasi mʉ̃a oda kʼarea sopʉabʉta. Maʉ̃ tẽã mʉ̃ra wãsi mebẽã mʉ̃aʼa ũrãgʼa diadaidu iyaʼa widita kĩrãduamarẽã mʉ̃a aña odata. Maʉ̃ mebẽãbara jarasi bedʼea neẽãta. Mʉ̃ kʼãwũã berabaridadeba kʼawuasi jipade yibiata eda krĩchabʉ ũdubita, mõbe maʉ̃ta wua kĩrãdua ẽ basi (Prov. 16:18). Mʉ̃ra Jeowaʼa yiwidʼibʉ mʉ̃a nekʼãrẽ aña oda kʼarea mõbe zarea obʉ maʉ̃ta wua oẽ baita.

Betel Canadádebemane trajabʉta 40 poagaba mʉ̃ra akʉza poaga 1985deba ʉ̃ta mʉ̃ra Betel akʉbarirane eda trajabʉ. Febrero 2021ne beisi mʉ̃ kima Sheilara. Mʉ̃a iyira mejãcha krĩchabʉ, adewara mʉ̃sida wuabʉrʉ kaya wã. Mamina mʉ̃mara ewarira mesera berabaribʉ kĩrãkʼabʉ nekʼãrẽ mejãcha obʉ baera Jeowaita. Akʉza maʉ̃ obʉde mʉ̃ra sobiabʉ (Ecl. 5:20). Wãrĩnu mʉ̃ara bedʼea zromata ũdu zebʉrʉ mamina audrera mʉ̃ra mejãcha sobiabʉ nebiata ũdu zebʉrʉ baera. Jeowaba omarẽã zokʼabʉta nããra bʉebʉ baera akʉza ewari jõmaʉ̃nẽ iyita trajabʉta 70 poaga ba baera mʉ̃ra mejãcha sobiabʉ. Mʉ̃a widibʉ Jeowaʼa kʼarebamarẽã idibema warrarata ãya nããra bʉeita Jeowaba zokʼabʉta, mawũãbʉrʉ ãyira wãrĩnu sobiapanai baera.