Karta dayirãʼa zarea diabʉta naʉ̃ ewari jõñiena

1, 2. (1) Pabloba Hebreos Karta bʉsidera kristianora Judeadebemarãra, ¿sãwũã panasi? (2) ¿Maʉ̃ kartara kʼãrẽa yibia basi ãyitara?

JESÚS beida tẽã kristianora Jerusalénʼne akʉza Judeade badarãra mejãcha zʉbʉria osida. Maʉ̃ ewadede ʉ̃tʉ zesi kongregasion kristianata. Maʉ̃neba ʉ̃ta kristianorãra mejãcha pẽwã jʉ̃drʉsida (Hech. 8:1). 20 poaga berabarida tẽã naʉ̃ra kristianorãra mejãcha zʉbʉriasida jarraba kʼarea akʉza nekʼãrẽ mejãcha neẽ baera (Hech. 11:​27-30). Mamina poaga 61nera naʉ̃ra kristianorãra maʉ̃neba wiña aduʼanʉmedasi. Ãyara tẽã bedʼea zromata audre ũdudaibasi. Ãyi mawũã wiña aduʼa bidade Jeowaba apostol Pabloʼa bʉbisi kartata, naʉ̃ba mejãcha kʼarebaibasi naʉ̃ra kristianoraba ʉ̃ra zeide bedʼea zroma ũdubʉrʉta awuantadamarea.

² Hebreos Kartade Pabloba ũrãgʼata diasi kristianora ãyi kʼãwũã wiña aduʼa bʉra ewari jõmaʉ̃nẽ ba ẽ baibasi baera, awuarabʉrʉ ʉ̃ra zeide ãya bedʼea zromata ũdudaibasi baera. Maʉ̃nera Jesúsba Jerusalén pʉwʉrʉ jõbiyi ada ewarita zebodobasi baera (Luc. 21:20). Mia Pabloba mia kristianora Judeadebemaraba kʼawua ẽ basi sõbede zeibasita maʉ̃ ewarira. Mamina ãyara maʉ̃ ze ẽ nããra ãyi ewarira biʼia zokʼaibarabasi mawũã maʉ̃ ewari zebʉrʉde kʼawuaita kʼãrẽta oita akʉza ãya ĩjãbʉsida audre zarea erbaibarabasi (Heb. 10:25; 12:​1, 2).

3. ¿Kʼãrẽa kristianora idi ewadebemarabara Hebreos Kartaba jarabʉ ʉ̃rʉ kʼawuaibara?

³ Dayirãba aranʉ bedʼea zroma ũduira audre yi zroma bayi kristianora Judeadebemaraba ũdudaira (Mat. 24:21; Apoc. 16:​14, 16). Maʉ̃ kʼarea akʉdayi ũrãgʼara naʉ̃ra kristianora kʼarebadata akʉza sãwũã dayirãbida maʉ̃neba nebia ũduseabʉta.

ZAREA ODADRɄ AUDRE KʼAWUA WÃITA

4. ¿Kʼãrẽ bedʼea zromata ũdusida kristianora judiorabara? (Akʉra potota).

⁴ Pablobara kartara ebreora bʉ diabʉesi, maʉ̃ra ebreorabara ãyi religion judiata idubʉsida kristianora bʼaita, mamina mawũã awuara yiwidʼi jʉ̃drʉira ãyitara zare baibasi. Bari jaraita, judiorãra Jeowaba iyi pʉwʉrʉbamarẽã jidasi. Adewara Jerusalénʼra kristianora judioraitara jipade yibia basi, ¿kʼãrẽa? Jeowaba nokʼo jʉrʉdabara Jerusalénʼneba zokʼabasi baera akʉza ãyara Jeowaʼa yiwidʼipanasibaera Jerusalénʼnebema templodeba. Nokʼora religionebemaraba jarapanasi Moisés Leyba jarabʉde oibarata, maʉ̃ kʼãrẽa judiora kʼẽrẽpa panʉrabara aya zokʼabʉde opanasi. Basi Ley sãwũã nekʼoibara ʉ̃rʉ, sirkunsision ʉ̃rʉ akʉza yi judiora ẽ sãwũã edaibara ʉ̃rʉ jara ũrĩbibʉta. Mamina Jesús beida tẽã Jeowabara bia akʉ ẽ basi templode iyaʼa sakripisio diadaira. Naʉ̃ jõma kʼarea ʉ̃kʉrʉ kristianoraitara jipade zarebasi Jeowaʼa sãwũã awuara yiwidʼi (adoración) jʉ̃drʉita (Heb. 10:​1, 4, 10). Adewara ʉ̃kʉrʉ kristianora ãya ĩjãbʉ zarea erbʉraitabida zarebasi mawũã Jeowaʼa awuara yiwidʼi jʉ̃drʉira. Bari jaraita, apostol Pedroita (Hech. 10:​9-14; Gál. 2:​11-14). Mawũã Jeowaʼa awuara yiwidʼi jʉ̃drʉsida baera naʉ̃ra kristianorãra nokʼora religionebemabaraba pẽwã jʉ̃drʉsida.

5. ¿Kʼairaneba jʉra kʼawua baibarabasi kristianorãra?

⁵ Kristianora ebreorabara bedʼea zroma ũdusida grupo ũmeneba. Yi nããrabemara, nokʼora religion judiadebemarabasi, ãyara naʉ̃ra mebẽrãra apostatara kĩrãkʼa akʉpanasi. Adewara ʉ̃kʉrʉ ẽbẽrarã kristiano apanʉraba jarapanasi ʉ̃kʉrʉ Moisés Leyba jarabʉta oibarabasita mawũã pẽwãna ẽ marẽã (Gál. 6:12). ¿Kʼãrẽba kʼarebaibasi naʉ̃ra kristianora kʼẽrẽpa bʼaita?

6. ¿Kʼãrẽta omarẽã jarasi Pablobara kristianora? (Hebreos 5:14–6:1).

⁶ Hebreos Kartade Pabloba kristianora ũrãgʼasi Daizeze Bedʼeata akʉdamarẽã akʉza maʉ̃ ʉ̃rʉ krĩchadamarẽã (akʉra Hebreos 5:14–6:1). Apostol Pabloba Escrituras Hebreasdeba jara ũrĩbisi kʼãrẽa audre yibia basita naʉ̃ra kristianoraba kʼãwũã Jeowaʼa yiwidʼibʉra judioraba nãã obadaira.a Pabloba kristianora jarasi Daizeze bedʼeade wãrĩnu jarabʉta biʼia kʼawuadamarẽã akʉza biʼia ũrĩnamarẽã mawũã yi sewida jarapanʉʼa yi edebi ẽ baita.

7. ¿Idi ewade dayirãbara kʼãrẽ bedʼea zromata ũdupanʉ?

⁷ Idi ewadebida naʉ̃ra kristiano ewaride berabarida kĩrãkʼa berabaribʉ. Ʉ̃kʉrʉ ẽbẽrarãba bedʼea jarapanʉra Jeowaba kãgabʉde bʉ ẽ baera. Ʉ̃kʉrʉ ẽbẽrarãba jarapanʉ Jeowa ʉ̃rʉ Kʼawuabipanʉrãba Daizeze Bedʼeade sãwũã mia erkʼãĩbara ʉ̃rʉ jarabʉta daucha opanʉ baera aña krĩchapanʉta. Ẽbẽrarãba idi ewade sãwũã krĩchabʉra jipade awuara wã Jeowaba sãwũã krĩchabʉira (Prov. 17:15). Maʉ̃ba yibia bayi dayirãba kʼawuaita sõbede ẽbẽra abaʉba aña bedʼeabʉta akʉza maʉ̃ba jarabʉta ĩjã ẽ baibara, mawũã dayirãba Jeowade sobiade obʉta aduabida ẽ bayi (Heb. 13:9).

8. ¿Kʼãrẽba kʼarebai dayirãba audre bia kʼawua wãita?

⁸ Pabloba kristianora ebreora jarasi zarea odamarẽã Daizeze Bedʼeata audre kʼawua wãita. Dayirãbida abarika oibara. Naʉ̃ba jarakĩrãbʉ dayirãba Daizeze Bedʼea akʉbʉrʉdera biʼia krĩchaibarata dayirãba kʼãrẽ kʼawuanʉmʉ ʉ̃rʉ, naʉ̃ba kʼarebai baera Jeowata bia ũdukʼawuamarẽã akʉza biʼia kʼawuadamarẽã Jeowa sãwũã krĩchabʉta. Mamina dayirãba maʉ̃ obʉra ewari abapai oibara ẽ, awuarabʉrʉ buru kʼoeda tẽãbida maʉ̃ta ewariza opanaibara. Dayirã Daizeze ode bʉta dããra ba ẽ mina mawũã e bʉrʉ dããrabamina dayirã jõmaʉ̃ba nesidapanʉ Daizeze Bedʼeata ewariza leita (Sal. 1:2). Dayirãba Daizeze Bedʼea dobaʉba akʉbʉta ewariza opanʉbʉrʉ, naʉ̃ba kʼarebayi dayirãba ĩjãbʉta audre zarea erpanamarẽã (Heb. 11:​1, 6).

YI ĨJÃPANɄRABARA ÃYI BEBɄRA ZOKʼAI ERBAYI

9. ¿Kristianorabara kʼãrẽa soidʉba ĩjãbʉta ũdubidaibarabasi?

⁹ Kristianora ebreorabara nesidapanasi ãya ĩjãbʉra zarea erbaita maʉ̃ba kʼarebaibasi baera ʉ̃ra bedʼea zroma zebʉrʉde (Heb. 10:​37-39). Jesúsba iyi kʼaidubemara jarasi Jerusalén gorogororaba purranʉmʉta ũdubʉrʉdera ãyira mĩrʉ wãibarabasita. Maʉ̃ bedʼeara Jesúsbara kristianora jõmaʉ̃ra jarasi, yi maʉ̃ pʉwʉrʉde eda panʉra akʉza yi meapanʉra (Luc. 21:​20-24). Maʉ̃ ewaridera gorogororaba pʉwʉrʉta purrabʉrʉdera ẽbẽrarã mea bʉrãra pʉwʉrʉeda wãpanasi mama mĩrʉne maʉ̃ pʉwʉrʉra muro barabasi baera. Maʉ̃ kʼarea ʉ̃kʉrʉitara Jesúsba jaradara añabʉ kĩrãkʼa basi. Maʉ̃ kʼarea Jesúsba jarada ũrĩra wãrĩnu ĩjãbʉta ũdubibarabasi.

10. ¿Soidʉba ĩjãbʉba sãwũã kʼarebaibasi kristianorãra? (Hebreos 13:17).

¹⁰ Kristianora ebreorabara nesidapanasi ẽbẽrarã Jesúsba kongregasion akʉita jidada ʉ̃rʉ ĩjãita. Kristianora Jesúsba mawũã jʉrʉdarabara mebẽrã jarasida baibara sõbede mĩrʉ wãita akʉza sãwũã oita (akʉra Hebreos 13:17). Pabloba jarasi kongregasion nãã edepanʉraba jarabʉta ũrĩnamarẽã. Maʉ̃ba jarakĩrãbasi ãyara ũrĩbara ẽ basita maʉ̃ta omarẽã jarapanasi baera, awuarabʉrʉ naʉ̃ra zõrãrãba jarabʉta ũrĩbarabasi ãyi ʉ̃rʉ ĩjãpanʉ baera. Kristianora ebreorabara ũdubibarabasi yi nãã edepanʉraba jarabʉra ũrĩpanʉta bedʼea zroma zei nãã. Kristianoraba zʉbʉria zroma ũdu ẽãne zõrãrãba jarabʉta ũrĩpanasibʉrʉ ãyitara zare ẽ baibasi zʉbʉria zroma zebʉrʉde zõrãrãba jarabʉ ũrĩra.

11. ¿Kristianora idibemarabara kʼãrẽa wãrĩnu ĩjãbʉta ũdubidaibara?

¹¹ Idi ewadebida dayirãbara wãrĩnu ĩjãbʉta ũdubita nesidapanʉ, ẽbẽrarãba ĩjãna ẽ baera dayirãba naʉ̃ ewari jõi arakʼaitaba jarabʉra. Adewara ãya jarapanʉ dayirãra kĩrãnemapanʉta (2 Ped. 3:​3, 4). Daizeze Bedʼeabara mejãcha jara ũrĩbibʉ zʉbʉria zroma zebʉrʉde kʼãrẽ berabarira, mamina wãrĩnubaira dayirãbara jõma biʼia kʼawua ẽ maʉ̃ ewaride kʼãrẽ berabarira. Maʉ̃ kʼarea nesidapanʉ wãrĩnu ĩjãnaita, Jeowaba naʉ̃ drʉade nemitiabʉ jõbiya abʉra weita iya kãgabʉ ewaride akʉza ĩjãnaibara Jeowaba dayirãra bia akʉita (Hab. 2:3).

12. ¿Kʼãrẽba kʼarebai zʉbʉria zroma zebʉrʉde ẽdrʉita?

¹² Idi ewadebida dayirãbara ĩjãnaibara Jeowaba Zõrãrã Burubiarata zokʼabʉta mawũã dayirãʼa jaradiaita kʼãrẽta oibarata (Mat. 24:45). Romanoraba pʉwʉrʉ purrasidadera kristianora ebreorabara yi nãã edepanʉraba jarabʉta ũrĩnaibarabasi. Maʉ̃ kĩrãkʼa idi ewade zʉbʉria zroma zebʉrʉdera dayirãʼa nekʼãrẽ omarẽã jarabʉta ũrĩnaibara mawũã ẽdrʉita. Kʼãwũãweda dayirãbara Jeowa organizasionba nekʼãrẽ omarẽã jarabʉta ũrĩnaibara. Dayirãba kʼawũãweda ãya jarabʉta ĩjãna ẽ bʉrʉ, zʉbʉria zroma zebʉrʉde nekʼãrẽ omarẽã jarabʉdadera zare bayi ũrĩta ãyi bedʼeata.

13. Hebreos 13:5de ũrãgʼa diabʉra, ¿kʼãrẽa yibia?

¹³ Maʉ̃ ewari zeyedara kristianorabara ũdubidaibarabasi ãyara nekʼãrẽ bia mejãcha kãga ẽãta, bari jaradaita, aukʼara kãgada ẽ baibarabasi platata (akʉra Hebreos 13:5). Naʉ̃ra kristianoranebema ʉ̃kʉrʉra nãã mejãcha zʉbʉriasida jarrababa adewara ʉ̃kʉrʉta nekʼãrẽ mejãcha neẽbasi (Heb. 10:​32-34). Adewara ãyidebema ʉ̃kʉrʉra mejãcha traja jʉ̃drʉsibaibara mawũã plata mejãcha ũduita nekʼãrẽ bia erbaita. Mamina zʉbʉria zroma zebʉrʉdera ãyira platabara kʼareba ẽ baibasi (Sant. 5:3). Maʉ̃ba kristianora plata mejãcha jʉrʉdaraitara audre zare basi ãyi de amaeita akʉza ãya nekʼãrẽ bia erbʉsida amaeita.

14. ¿Soidʉba ĩjãpanʉbʉrʉ kʼãrẽta kʼawua jidadai?

¹⁴ Dayirãba ĩjãpanʉbʉrʉ naʉ̃ ewarira wãrĩnu jõita mawũãra krĩchada ẽ bayi plata mejãcha jʉrʉita akʉza nekʼãrẽ bia erpanaita, zʉbʉria zroma zebʉrʉdera platara mia kʼãrẽsida bale ẽ bayi. Daizeze Bedʼeabara jarabʉ ẽbẽrarãbara orota, platata ode balbʉeita, maʉ̃bara ãyi bebʉra kʼareba ẽ bai bera (Ezeq. 7:19). Dayirãbara krĩchada ẽ baibara mejãcha plata erbaita awuarabʉrʉ jʉrʉdaibara trajo dayi mebẽrãba nesidabʉ diabʉta akʉza dayi bia babibʉta. Maʉ̃ awuara maʉ̃ trajoba audre obibʉta Jeowadeta. Mawũã opanʉbʉrʉ naʉ̃ba kʼarebayi dayirã mejãcha debe oẽ baita. Adewara dayirãba nekʼãrẽ biata erbʉ ẽ bʉrʉ ewari adua ẽ bayi jʉrʉita maʉ̃ sãwũã bia erbaita. Adewara dayirãra jʉra kʼawua panaibara dayirãba nekʼãrẽ biata erbʉbʉrʉ maʉ̃trʉ jʉ̃zaba akʉnʉma ẽ baita (Mat. 6:​19, 24). Naʉ̃ ewari jõbodoarera dayirãbara bia krĩcha kʼãrãpe jidaibara nekʼãrẽ bia erpanʉta audre bia akʉita mawũã ẽ bʉrʉ Jeowa ʉ̃rʉ audre ĩjãita.

«MARABARA NESIDABɄ AWUANTAITA»

15. ¿Kristianorabara kʼãrẽa awuatadaibarabasi?

¹⁵ Nããbema kristianorabara nesidapanasi mejãcha awuantadaita ãyira tẽãne mejãcha zʉbʉria odaibasi baera (Heb. 10:36). Kristianora ebreorãra mejãcha pẽwãsida. Ãyi mawũã pẽwãpanʉta wiña aduʼa nʉmaedaside ẽbẽrarã mejãchaʉta kristianora basida maʉ̃ ewaridera. Pablobara jarasi naʉ̃ra kristianora mejãcha zʉbʉria osidamina, ãyira Jesús kĩrãkʼara mejãcha zʉbʉria berabari ẽ basita, Jesúsʼra beasida baera (Heb. 12:4). Judiorãra mejãcha kĩrʉpanasi akʉza wuabemarata zʉbʉria oita panasi judiora mejãchaʉba ĩjãsida baera kristiano bʼaita. Maʉ̃ nãã Pablo Jerusalénʼena jʉ̃ẽna kʼarea mamabema ẽbẽrarã mejãcha kĩrʉsida. Maʉ̃ kʼarea 40 judiorata bedʼea abarika zesida nekʼoda ẽ baita mia bania doda ẽ baita Pablo beadayeda (Hech. 22:22; 23:​12-14). Kristianora ãyi mawũã pẽwãpanasimina ãya nesidabasi ãba yi jʉredaita, Daizeze Bedʼea jaradia wãnaita akʉza ãya ĩjãbʉra audre zarea ĩjã erbaita.

16. ¿Hebreos Kartaba jarabʉdera dayirãbara sãwũã akʉdaibara pẽwãpanʉra? (Hebreos 12:7).

¹⁶ ¿Kʼãrẽba kʼarebaibasi kristianorãra ãya bedʼea zroma erbʉ awuantaita? Pablobara jarasi Jeowabara iduaribibʉta kristianorãra mawũã pẽwãnamarẽã jaradiaita ãya bedʼea zroma ũdubʉrʉde kʼãrẽta oibarata (akʉra Hebreos 12:7). Naʉ̃ba kʼarebaibasi kristianoraba ãyi sode nebia erbʉta audre bia oũdubidamarẽã Jeowaba kãgabʉ kĩrãkʼa. Kristianora ebreoraba krĩchasida baera ãya mawũã awuantabʉ kʼarea kʼãrẽ nebia ũduita maʉ̃ba ãyitara zare ẽ basi bedʼea zroma erpanʉra awuantaita (Heb. 12:11).

17. ¿Kʼãrẽta kʼawuasi Pablobara iyi pẽwãnapeadadeba?

¹⁷ Pablobara wuabema kristianora so zarea diasi ãyi pẽwãbʉdade zarea panamarẽã akʉza mapaeda ẽ marẽã. Pablobara nããra kristianorãra pẽwãbasi baera kʼawuabasi kʼãrẽãba zʉbʉriabipanʉta kristianora pẽwãbʉdadera. Adewara Pablobara bia kʼawuabasi sãwũã awuantaita pẽwãbʉdadera, iyita maʉ̃ne berabarisi baera, kristiano bada tẽãra iyira pẽwã jʉ̃drʉsida (2 Cor. 11:​23-25). Pablobara ũrãgʼa biata diaseabasi kʼãrẽta sãwũã oibarata pẽwãbʉdade awuantaita, maʉ̃ba ũrãgʼa biata diasi kristianora ãyikʉza ĩjãna ẽ marẽã pẽwãbʉdadera awuarabʉrʉ ĩjãnamarẽã Daizeze Jeowa ʉ̃rʉ. Maʉ̃ba ãyaʼa jaraseabasi: «Jeowara mʉ̃ kʼarebabari, maʉ̃ba mʉ̃ra pera ẽ» (Heb. 13:6).

18. Dayirãba ʉ̃ra zeide kʼãrẽ berabarita kʼawuabʉba, ¿kʼarebaika pẽwãbʉdade awuantaita?

¹⁸ Idi ewadera mebẽrã mejãchaʉta pẽwãpanʉ. Dayirãba ãyi kãgabʉta ũdubiseapanʉ ãyibari yiwidʼipanʉne akʉza ãya nekʼãrẽ nesidabʉta diapanʉne (Heb. 10:33). Daizeze Bedʼeaba jarabʉ yi ẽbẽrarã Jeowaba akʉza Jesúsba jarabʉde bakĩrãpanʉrãra pẽwãnaita (2 Tim. 3:12). Maʉ̃ kʼarea dayirã jõmaʉ̃ba nesidapanʉ bedʼea zroma zebʉrʉdera kʼawuaita kʼãrẽta oibarata awuantaita. Kʼãwũãena dayirãbara ĩjãnaibara Jeowata, ĩjãnaibara dayirãba badu bedʼea zroma erbʉde Jeowabara kʼarebaita. Aranʉ Jeowabara jõma ẽbẽrarã iyi ode kʼẽrẽpa panʉrãra aduʼa sobia babiyi (2 Tes. 1:​7, 8).

19. Zʉbʉria zroma zei nããra, ¿kʼãrẽta oseapanʉ? (Akʉra potota).

¹⁹ Pabloba Hebreos Kartade jaradabara kʼarebasi nããbema kristianoraba kʼawuadamarẽã kʼãrẽta oibarata zʉbʉria zroma zebʉrʉde. Maʉ̃ne Pablobara jarasi Daizeze Bedʼeara biʼia kʼawuadamarẽã akʉza ũrĩnamarẽã, naʉ̃ba kʼarebaibasi baera sewa nebʉrʉ jarabʉrʉde maʉ̃ʼa yi edebi ẽ baita, mawũã ãya ĩjãbʉta aduada ẽ marẽã. Adewara Pablobara kʼarebasi mebẽrãba ĩjã erbʉta audre zarea bamarẽã akʉza odamarẽã Jesúsba zokʼada kĩrãkʼa. Akʉza mebẽrã kongregasion nãã edepanʉra bedʼeasida ũrĩnamarẽã. Pablobara jaradiasi nããbema kristianora ãyi pẽwãbʉdade zʉbʉria opanʉra, Jeowaba mawũã iduaribibʉta ãyaʼa jaradiaita awuanta kʼawuadamarẽã. Idi ewadebida dayirãba Daizeze Bedʼeaba jarabʉ kĩrãkʼa odara naʉ̃ba kʼarebayi dayirãba ĩjãpanʉra audre zarea erbaita jõñiena (Heb. 3:14).