ARTIKULO KʼAWUAITA 36
TRÃBI 89 Jeowa bedʼeata ũrĩra ewari jõma baya
Daizeze Bedʼeaba jarabʉde odadrʉ
«Bedʼeaba jarabʉta oũdubidua, bari ũrĩraidua» (SANT. 1:22).
KʼÃRẼTA ŨDUDAITA
Naʉ̃ artikuloba kʼarebayi dayirãba Daizeze Bedʼeata ewariza akʉdamarẽã akʉza maʉ̃ ʉ̃rʉ krĩchadamarẽã. Adewara dayirãba kʼawuadade oũdubidamarẽã.
1, 2. ¿Kʼãrẽa sobiapanʉ Jeowa ode panʉrãra? (Santiago 1:22-25).
JEOWABA yi warra Jesúsʼʉ̃meba kãgabʉ dayirãra ewari jõmaʉ̃nẽ sobiapanamarẽã. Salmo 119:2ba jarabʉ naʉ̃ta: «Sobiapanʉ iya jarada aripe opanʉrãra akʉza iyita soiduba jʉrʉpanʉrãra». Adewara Jesúsbida jarasi: «Audrera sobia bʼeaidʼe bʼʉa Daizeze bedʼeata ũrĩpe aribʼae bʼeta» (Luc. 11:28).
2 ¿Kʼãrẽa sobiabaseapanʉ Jeowa ode panʉrãra? Ãyira mejãcha sobiapanʉ Daizeze Bedʼeata ewariza lepanʉ baera akʉza mama jarabʉta oũdubipanʉ baera (akʉra Santiago 1:22-25).
3. ¿Kʼãrẽ nebiata ũdupanʉ Daizeze Bedʼeaba jarabʉde oũdubipanʉbʉrʉ?
3 Dayirãba Daizeze Bedʼeaba jarabʉde oũdubipanʉbʉrʉ, naʉ̃ba kʼarebabʉ Jeowata sobiabita. Jeowata sobiabipanʉta kʼawuapanʉ baera dayirãsida sobiapanʉ (Ecl. 12:13). Adewara Daizeze Bedʼeaba jarabʉde oũdubipanʉbʉrʉ, naʉ̃ba kʼarebabʉ dayirã mebẽrãbawara audre bia panaita akʉza mebẽrã kongregasionebemarabawara audre neũdukʼawua bia bʼaita. Bʉsida mawũã berabaribaribaibara. Adewara dayirãba Daizeze Bedʼeaba jarabʉde oũdubipanʉbʉrʉ naʉ̃bara mejãcha kʼarebabʉ bedʼea zroma ẽbẽrarã Daizeze ode bʉ ẽãraba ũdubʉta ũdu ẽ baita. Naʉ̃ra nokʼo Davidba jarada kĩrãkʼabʉ. Iyi trãbide Jeowa ley ʉ̃rʉ, Jeowaba sãwũã zokʼabʉ ʉ̃rʉ akʉza Jeowaba sãwũã kʼawua obʉ ʉ̃rʉ bedʼeaside, iya jarasi yi maʉ̃ta wuagabʉbara nebia zromata erbaita (Sal. 19:7-11).
4. ¿Kʼãrẽa zarea baseabʉ Daizeze Bedʼeaba jarabʉ oũdubira?
4 Wãrĩnubaira Daizeze Bedʼeaba jarabʉ oũdubira zarea baseabʉ dayirãitara. Ewaride dayirãbara nekʼãrẽ mejãcha oibara baera, ewari jʉrʉdaibara Daizeze Bedʼea leita akʉza biʼia ũrĩta Jeowaba kʼãrẽta omarẽã kãgabʉta dayirãba. Adewara naʉ̃ artikulode akʉdayi kʼãrẽba kʼarebaseabʉta dayirãba Daizeze Bedʼea ewariza akʉita akʉza kʼãrẽta oseabʉta daya lebʉ ʉ̃rʉ bia krĩchaita. Adewara sãwũã oũdubita maʉ̃ta.
EWARI JɄRɄDA DAIZEZE BEDʼEA AKɄITA
5. ¿Dayirãbara ewariza kʼãrẽta odaibara?
5 Dayirã Jeowa ode panʉra mejãchaʉba nekʼãrẽ mejãcha oibara ewaride. Oibara nekʼãrẽ Daizeze Bedʼeaba oibara abʉta. Bari jaradaita, dayirãnebema mejãchaʉta trajade wãibara mawũã daya nesidabʉta akʉza dayirã mebẽrãba nesidabʉta diaita (1 Tim. 5:8). Adewara ʉ̃kʉrʉ mebẽrãbara ãyi mebẽrã kayabʉta akʉpanʉ, mawũã ẽ bʉrʉ ãyi mebẽrãnebema zõrã panʉrata akʉpanʉ. Maʉ̃ awuara dayirã jõmaʉ̃ba dayikʉza bia akʉibara, dayisida medikoma wãibara. Adewara dayirã jõmaʉ̃ba kʼarebadaibara kongregasionebida. Bari jaradaita, dayirã jõmaʉ̃ba ewariza jaradia wãibara. Dayirãba mawũã ewariza nekʼãrẽ mejãcha oibarata erbʉ baera dayikʉza krĩchaseabʉ: «¿Mʉ̃ara kʼãrẽta oseabʉ ewari jʉrʉita Daizeze Bedʼea ewariza akʉita, maʉ̃ ʉ̃rʉ krĩchaita akʉza mama jarabʉta oũdubita?».
6. ¿Kʼãrẽta oseabʉ Daizeze Bedʼea ewariza akʉita? (Akʉra potota).
6 Daizeze Bedʼea akʉira Jeowa ode panʉraitara audre yibia, maʉ̃ kʼarea jipade yibiabayi ewariza opanaita maʉ̃ta (Filip. 1:10). Salmo libroba jarabʉ sãwũãbʉta ẽbẽra sobiabʉra, jarabʉ: «Kãga Jeowa leyta; ewaride akʉza diamasi lebʉ akʉza bia krĩchabʉ maʉ̃ ʉ̃rʉ» (Sal. 1:1, 2). Naʉ̃ba ũdubibʉ ewari jʉrʉibarata Daizeze Bedʼea akʉita mamina, ¿dayirãitara kʼãrẽ ũmadaʉde audre yibia Daizeze Bedʼea akʉira? Maʉ̃ra dayirã aba abakaʉdebʉ, aba abakaʉba jʉrʉibara baera kʼãrẽ ũmadaʉde audre yibiata Daizeze Bedʼea akʉita ewariza. Mebẽã Víctorba jara ũrĩbibʉ iya kʼãrẽ ũmadaʉde akʉbʉta Daizeze Bedʼeata. Iya jarabʉ: «Mʉ̃ara Daizeze Bedʼeara diapeda akʉkĩrã. Wãrĩnubaira diapeda piradrʉkĩrã ẽ, mamina naʉ̃ ũmadaʉde Daizeze Bedʼea akʉira yibia, miõ neẽnʉmʉ baera akʉza mʉ̃ita audre zare ẽ mʉ̃a lenʉmʉ ʉ̃rʉ krĩchaita akʉza biʼia ũrĩta». ¿Bʉsida Víctor kĩrãkʼa berabaribarika? Bʉyikʉza naʉ̃ta widira: «¿Mʉ̃itara kʼãrẽ ũmadaʉde audre yibia Daizeze Bedʼea akʉira?».
¿Kʼãrẽ ũmadaʉde audre yibia bʉita Daizeze Bedʼea ewariza akʉita? (Akʉra parrapo 6).
BIA KRĨCHARA BɄA LEBɄ Ʉ̃RɄ
7, 8. ¿Kʼãrẽta oda ẽ baibara Daizeze Bedʼea lebʉrʉde? Yizadeba jara ũrĩbira.
7 Dayirãba kʼawuasidabʉrʉ kʼãrẽ ũmadaʉde audre yibiata Daizeze Bedʼea akʉita, waya zarea odaibara Daizeze Bedʼea akʉbʉrʉde bari lenʉma ẽ baita, awuarabʉrʉ zarea oibara krĩchaita daya lebʉ ʉ̃rʉ. Edaʉde berabariseabʉ dayirãba nei lenʉmʉne jẽda kʼãrẽ leda ʉ̃rʉ krĩchabʉrʉde mia kʼãrẽsida kĩrãbe ẽãta. Mamina zarea odaibara dayirãba Daizeze Bedʼea akʉbʉrʉde mawũã berabari ẽ marẽã. Bʉa krĩchabaribaibara Daizeze Bedʼea ewariza sõbe kapitulo leita, maʉ̃ oira jipade yibia akʉza yibia bʉa mawũã oita krĩchada jõma aribaeira (1 Cor. 9:26). Daizeze Bedʼea akʉbʉdeba nebiata ũdukĩrãpanʉbʉrʉ bari leibara ẽ.
8 Maʉ̃ ʉ̃rʉ bia ũrĩnaita naʉ̃ ʉ̃rʉ̃ krĩchadaya. Kue zeira yibia ne u bia pãwãraita. Mamina kueta nruemaza mejãcha zera yibia ẽ, baniara ariwia pia oũbida baera, maʉ̃ba audre yibia kue wiña zeita egoroba ewari erbamarẽã bania pia oũbuta sõita, mawũã põasãmarẽã. Maʉ̃ kĩrãkʼa dayirãba Daizeze Bedʼea lebʉrʉde mesera lebʉbʉrʉ, naʉ̃bara kʼareba ẽ bayi jẽda kĩrãbeita dayirãba kʼãrẽ leda ʉ̃rʉ akʉza maʉ̃ba kʼawuada ẽ bayi kʼãrẽta oũdubibarata (Sant. 1:24).
Kue zeda tẽãra egorobara ewari berabaribibara maʉ̃ iruita. Maʉ̃ kĩrãkʼa dayirãbida Daizeze Bedʼea le kʼãrãpe ewarita jʉrʉibara Daizeze Bedʼeaba jarabʉta bia krĩchaita akʉza maʉ̃ba jarabʉta oũdubita. (Akʉra parrapo 8).
9. ¿Kʼãrẽta odaibara Daizeze Bedʼeata mesera lepanʉbʉrʉ?
9 Bʉa Daizeze Bedʼea lenʉmʉne kʼawuara mesera lenʉmʉta, ¿kʼãrẽta oseabʉ? Zarea ora pikãga leita akʉza krĩchaita bʉa kʼãrẽ lenʉmʉ ʉ̃rʉ. Daizeze Bedʼeade kʼãrẽ ũrĩna ʉ̃rʉ krĩchaira zare ẽ. Maʉ̃itara bʉara audre ewari jʉrʉseabʉ Daizeze Bedʼea leita mawũã audre ewari erbaita bʉa leda ʉ̃rʉ krĩchaita. Mawũã ẽ bʉrʉ krĩchaseabʉ bersikulora Daizeze Bedʼeadebemata audre wiña leita mawũã ewari erbaita maʉ̃ ʉ̃rʉ krĩchaita. Víctorba jarabʉ: «Mʉ̃ara zarea obʉ Daizeze Bedʼea lebʉrʉde kapitulora mejãcha le ẽ baita. Mʉ̃a Daizeze Bedʼeara diapeda akʉbʉ baera, ewari erbʉ diapedaʉba kiuyeda maʉ̃ ʉ̃rʉ krĩchaita». Wãrĩnubaira bʉa Daizeze Bedʼea lebʉrʉde sõbe kapitulo lebʉ kʼawuaira audre yibia ẽ, awuarabʉrʉ audre yibia bʉa Daizeze Bedʼea lebʉrʉde maʉ̃neba bʉa nebia ũduita (Sal. 119:97; akʉra rekuadro «Kʼãrẽ ʉ̃rʉ widibara bia krĩchaita»).
10. Yiza abaʉdeba jara ũrĩbira bʉa kʼãrẽta oseabʉta Daizeze Bedʼea akʉda tẽã maʉ̃ta oũdubita (1 Tesalonicenses 5:17, 18).
10 Dayirãba Daizeze Bedʼea lebʉrʉdera krĩchadaibara mama jarabʉta dayirãba sãwũã oũdubiseabʉ ʉ̃rʉ. Bʉa Daizeze Bedʼea akʉbʉde bʉyikʉza kʼãwũã krĩchara: «¿Kʼãwũãenara mʉ̃ara sãwũã oũdubiseabʉ nama jarabʉra akʉza tẽãbida?». Maʉ̃ ʉ̃rʉ bia ũrĩnaita krĩchara naʉ̃ ʉ̃rʉ: Bʉa lebʉta 1 Tesalonicenses 5:17, 18 (akʉra). Maʉ̃ tẽã, pikia kʼãrãpe krĩchara bʉ sãwũã yiwidʼinʉmʉ ʉ̃rʉ. ¿Bʉ yiwidʼibʉrʉdera soidʉba yiwidʼibʉka? mawũã ẽ bʉrʉ ¿badua yiwidʼibʉka? ¿Bʉara Jeowaʼa kʼãrẽ kʼãrẽa biga diakĩrãbʉ? Nekʼãrẽ ũbea ʉ̃rʉ krĩchabaribaibara mawũã Jeowaʼa biga diaita. Bʉa Daizeze Bedʼea akʉda tẽã ewari wiña jʉrʉbʉbʉrʉ maʉ̃ ʉ̃rʉ bia krĩchaita, naʉ̃ba kʼarebayi biʼia ũrĩta Daizeze Bedʼeaba kʼãrẽta jarabʉta akʉza maʉ̃ta oũdubita. Bʉa Daizeze Bedʼea akʉbʉrʉza mawũã obʉbʉrʉ, Jeowaba kãgabʉde bayi. Mamina bʉa nekʼãrẽ mejãcha ara oibarata erbʉbʉrʉ, ¿kʼãrẽta oibara?
BɄA KʼÃRẼ OSEABɄTA OITA KRĨCHARA
11. ¿Kʼãrẽa krĩchaseabʉ Daizeze Bedʼeaba jarabʉta oũdubira zareabʉta? Yizata jarada.
11 Bʉa Daizeze Bedʼea lebʉrʉdera edaʉde sopʉabaseabʉ ũdubʉ baera nekʼãrẽ mejãcha awuara oibarata. Krĩchara naʉ̃ ʉ̃rʉ: Ewari aba bʉa Daizeze Bedʼea akʉnʉmʉne ũduyi jarabʉta ẽbẽra abapaiabʉrʉ kãga ũdubira biga ẽata awuarabʉrʉ jõmaʉ̃ta daucha kãgaibarata (Sant. 2:1-8). Mawũã ũdubʉrʉ baera bʉara awuara oita krĩchabʉ sãwũã wuabemara bia edaita, mawũã oira biode yibia. Akʉza nrʉemane bʉa Daizeze Bedʼea lenʉmʉne ũduyi jʉra kʼawua bamarẽã jarabʉta dayi kĩrãme sãwũã zokʼabʉde (Sant. 3:1-12). Maʉ̃ne bʉyikʉza kʼawuabʉrʉ edaʉde wuabemara imitia bedʼeabarita. Maʉ̃ba awuara oita krĩchabʉ, wuabemara bʉyi bedʼeabʉdeba so zarea diaita. Adewara maʉ̃ nrʉemane bʉa lenʉmʉne ũduyi naʉ̃ drʉadebema neũdukʼawua bʼaira kayiruata (Sant. 4:4-12). Maʉ̃ba bʉyikʉza krĩchayi audre jʉra kʼawua baibarata telebisorde kʼãrẽ akʉbʉde akʉza kʼãrẽ musika ũrĩbʉde. Nrʉema bʉa krĩchaseabʉ nama jõma jarabʉ aripe oira mejãcha zareabʉta.
12. ¿Kʼãrẽa krĩcha zroma oẽ baibara Daizeze Bedʼea leda tẽã kʼawuara nekʼãrẽ awuara oibarata? (Akʉra notata).
12 Bʉa Daizeze Bedʼea lenʉmʉne kʼawuara bʉa nekʼãrẽ aña obʉta, maʉ̃ kʼarea krĩcha zroma orãra. Maʉ̃ba ũdubibʉ bʉra eda krĩchabʉta akʉza bʉa nekʼãrẽ aña obʉra ara okĩrãbʉta.a Akʉza daya nekʼãrẽ ara oira waña ara oẽ (Col. 3:10). ¿Kʼãrẽba kʼarebai Daizeze Bedʼeaba jarabʉde oita?
13. ¿Kʼãrẽba kʼarebaseabʉ bʉra? (Akʉra potota).
13 Bʉa Daizeze Bedʼea akʉbʉrʉde bʉbʉrʉ nekʼãrẽ ara oibarata zarea ora maʉ̃ta iyabaʉ ewaride jõma ara oẽ baita (Prov. 11:2). Bari jaraita, naʉ̃ta oseabʉ bʉa: Kartade bʉra bʉa kʼãrẽta ara oibarata, maʉ̃ tẽã maʉ̃ranebemata aba mawũã ẽ bʉrʉ ũme jidara wiña wiñane ara owãita. Yi wuabemara idubira tẽãbai awuara oita. ¿Kʼãrẽta nããra awuara oseabʉ bʉara?
Bʉa Daizeze Bedʼeade akʉbʉrʉde mama jarabʉta jõma oita krĩchai kʼaʉde aba jidara bʉa kʼãrẽne sãwũã ara oibarata. (Akʉra parrapo 13 akʉza 14).
14. ¿Nãã kʼãrẽta oita krĩchaibara?
14 Nããrãra bʉara krĩchaseabʉ naʉ̃ra nekʼãrẽra bʉa awuara oibarade, saʉ̃ta bʉita audre zare ẽãta awuara ũdubita. Mawũã ẽ bʉrʉ jʉrʉseabʉ saʉ̃ta audre nesidata bʉa awuara oita. Bʉa kʼãrẽta mesera awuara oibarata ũdubʉrʉde, dayirã kartarane jʉrʉseabʉ maʉ̃ ʉ̃rʉ bedʼeabʉta. Maʉ̃itara zokʼaseabʉ Índice de las publicaciones Watch Tower mawũã ẽ bʉrʉ Guía de estudio para los testigos de Jehová. Jeowaʼa yiwidʼira, iyaʼa widira kʼarebamarẽã bʉa maʉ̃ta okĩrãita akʉza zarea diamarẽã bʉa maʉ̃ oita (Filip. 2:13). Maʉ̃ tẽã bʉa kʼawuada kĩrãkʼa oũdubira. Bʉa ũdubʉrʉde nekʼãrẽ awuara oita krichabada jõma aripe osita, naʉ̃ba kʼarebayi bʉa nekʼãrẽ awuruta awuara oibarade sobiade oita. Adewara nekʼãrẽ awurude awuara oibarabʉrʉ maʉ̃ oisida zare ẽ bayi.
IDU YI KʼAREBABIRA DAIZEZE BEDʼEA
15. ¿Kʼãrẽne awuarapanʉ Jeowa ode panʉrata ẽbẽrarã Daizeze Bedʼea lepanʉraʉ̃me? (1 Tesalonicenses 2:13).
15 Ẽbẽra mejãchaʉba jarapanʉ ãyara Daizeze Bedʼeara leda ʉ̃rʉ lepanʉta. Mamina, ¿ãyara wãrĩnu ĩjãpanʉka Daizeze Bedʼeaba jarabʉ ʉ̃rʉ? ¿Idu yi jaradiabipanʉka Daizeze Bedʼea? Wãrĩnubaira ãyidebema mejãchaʉba oda ẽ maʉ̃ra. Mamina dayirãra jipa awuarapanʉ. Dayirãbara Daizeze Bedʼeara kristianora nããbema siglodebemaba akʉbada kĩrãkʼa akʉpanʉ. Ãyara naʉ̃ra biʼia akʉpanasi Daizezedeba zesi baera. Maʉ̃ kʼarea dayirãbara Daizeze Bedʼeaba jarabʉde oũdubikĩrãpanʉ (akʉra 1 Tesalonicenses 2:13).
16. ¿Kʼãrẽba kʼarebai Daizeze Bedʼeaba jarabʉde oita?
16 Dayirãba Daizeze Bedʼea leira akʉza mama jarabʉde oira edaʉde zarea baseabʉ. Edaude ewari neẽ baera Daizeze Bedʼea leita, maʉ̃ta neẽbʉrʉ mesera lebʉba bia krĩcha ẽ kʼãrẽta jarabʉta, mawũã ẽ bʉrʉ Daizeze Bedʼeade nekʼãrẽ mejãcha awuara oibarata ũdubʉrʉba krĩcha zroma obibʉ. Naʉ̃ranebema dayirãita mejãcha zareabʉmina Jeowaba biode kʼarebayi dayirãba oita krĩchabʉ aripe oita, idu yi kʼarebabira. Daizeze Bedʼea lebʉrʉdera bari akʉrãra, awuarabʉrʉ zarea ora mama jarabʉde aripe oita. Mawũẽra bʉa Daizeze Bedʼea audre lebʉrʉde akʉza mama jarabʉde oũdubibʉbʉrʉ, naʉ̃ba kʼarebayi bʉ audre sobia bʼaita (Sant. 1:25).
TRÃBI 94 Agradecidos por la palabra de Dios
a Akʉra jw.org de bideo Kaseapanʉta bʉ neũdukʼawuaraba: Daizeze Bedʼea akʉita.