¿Sãwũã kʼarebaseabʉ bʉ nekʼawuabariba Daizeze ode bʼaita krĩchamarẽã?

1, 2. (1) ¿Kʼãrẽa ʉ̃kʉrʉ nekʼawuabaritara zarea bʉ Jeowa ode bʼaita? (2) ¿Kʼãrẽta kʼawuadai naʉ̃ artikulodera?

KĨRÃBERA bʉa Daizeze Bedʼea kʼawuanʉmaside Daizeze ode bʼaita krĩchabʉrʉde sãwũã sentisita. ¿Pera basika bʉra? Perabasibaibara bʉ mebẽrã kʼarea, ãya kʼãrẽta jarai kʼarea mawũã ẽ bʉrʉ bʉ neũdukʼawuara kʼarea. Krĩchasibaibara ãyira bʉme kĩrʉita. Mawũã ẽ bʉrʉ bʉra mejãcha perasibaibara krĩchasi baera bʉra Jeowaba kãgabʉde babe ẽãta. Bʉita zarebasibʉrʉ jipa jidaita Jeowa ode wãita kʼawuabayi kʼãrẽa bʉ nekʼawuabarita zarebʉta jipa jidaita Jeowa ode wãita.

² Jesúsbara kʼawuabasi ʉ̃kʉrʉ ẽbẽrarã mawũã sentibaibasita akʉza maʉ̃ba ãyitara zareabaibasita Jeowa ode wãita, mawũãsidu jʉrʉsi maʉ̃ ẽbẽrarã sãwũã kʼarebaita (Mat. 13:​20-22). Maʉ̃ kʼarea kʼarebasi iyi kʼaidubemaraba kʼawuadamarẽã kʼãrẽba iduaribi ẽãta Jeowadeta oita akʉza Jeowata audre kãgadamarẽã adewara nããra bʉeita Jeowadeta, maʉ̃ adewara jaradiasi ãya kʼãrẽta oseabʉta wuabemara ãyi ʉ̃rʉ zebʉrʉde. Dayirãbara sãwũã Jesúsde kĩrãkʼa oseapanʉ libro Bʉra ewari jõmaʉ̃nẽ sobia baseabʉ dayi nekʼawuabaria jaradiaita.

BɄ NEKʼAWUABARIA KʼAWUABIRA KʼÃRẼBA IDUARIBI ẼÃTA JEOWADETA OITA

3. ¿Kʼãrẽba iduaribi ẽ basibaibara Nicodemo Jesús kʼaidubema bamarẽã?

³ Nicodemora judiorane yi zromabasi. Jesúsba Daizeze Bedʼea jaradiabʉta jedeko 6 basi, mainʉbaira Nicodemoba kʼawuabasi Jesúsʼra Mesíasta (Juan 3:​1, 2). Mawũãsidu mesera jida ẽ basi iyi kʼaidubema bʼaita. ¿Kʼãrẽa? Perabasi baera wuabemara judioraba maʉ̃ ʉ̃rʉ kʼawuabʉdade iyi sãwũã odai kʼarea (Juan 7:13; 12:42). Adewara perasibaibara iya nebia erbʉta aduaita kʼawuabʉdade iyira Jesús kʼaidubemata. Maʉ̃ kʼarea Jesúsʼʉ̃me bedʼea wãside diamasi wãsi.a

4. ¿Jesúsbara kʼãrẽta osi Nicodemoʼa kʼawuabita Jeowabara iya kʼãrẽta omarẽã kãgabʉta?

⁴ Nicodemobara bia ũdukʼawuabasi Moisés Leyba jarabʉta mamina kʼawua ẽ basi Jeowaba kʼãrẽta iya omarẽã kãgabʉta, maʉ̃ne Jesúsba kʼarebasi. ¿Sãwũã kʼarebasi Jesúsbara? Ewarita jʉrʉsi iyiʉ̃me bʼaita. Maʉ̃ba diamasi basimina bedʼeasi Nicodemoʉ̃me, adewara biʼia ũrĩbisi Nicodemoba kʼãrẽta oibarata Jesús kʼaidubema baita, jarasi maʉ̃itara iya nemitia oda kʼarea jẽda krĩchaibarata. Maʉ̃ adewara ũdubibarabasita Daizeze Warra ʉ̃rʉ ĩjãbʉta akʉza buru kʼoeibarabasita (Juan 3:​5, 14-21).

5. Dayi nekʼawuabariba kʼawua ẽ bʉrʉ kʼãrẽba iduaribi ẽãta Jeowa ode bʼaita, ¿sãwũã kʼarebaseabʉ dayirãba?

⁵ Edaʉde berabariseabʉ bʉ nekʼawuabariba biʼia kʼawuabʉta kʼãrẽta jaradiabʉta Daizeze Bedʼeabara. Mamina baseabʉ nekʼãrẽ iyi iduaribi ẽãta Jeowa ode wãita. Maʉ̃ne bʉa kʼawuabiseabʉ iya kʼãrẽne awuara oibarata. Bari jaraita, iyi trajoba iduaribi ẽ Jeowa ode bʼaita mawũã ẽ bʉrʉ yi mebẽrãba kãga ẽ Jeowa ode bʼaita. Mawũãbʉrʉdera Jesúsde kĩrãkʼa ora: Jʉrʉra ewarita iyiʉ̃me bʼaita, edaʉde wãra iyima mawũã ẽ bʉrʉ bʉ deda trʉ̃ra bari nebʉraita, mawũã iyi aduʼabidade jaraseabʉ iyira sãwũã bʉta akʉza kʼãrẽ bedʼea zroma erbʉta. Maʉ̃ne bʉara kʼawuayi sãwũã kʼarebaita akʉza sãwũã jara ũrĩbita iyara kʼãrẽne awuara oibarata. Mamina biʼia jara ũrĩbira iya nekʼãrẽ obʉra oẽ baibarata bʉ sobiabita awuarabʉrʉ oibarata Jeowata sobiabita.

6. ¿Sãwũã kʼarebaseabʉ bʉ nekʼawuabariba oũdubimarẽã iya kʼawua wãta? (1 Corintios 16:13).

⁶ Bʉ nekʼawuabariba ĩjãibara wãrĩnu Jeowaba iyira kʼarebaita naʉ̃ba kʼarebayi iya kʼawua wãta oũdubita (akʉra 1 Corintios 16:13). ¿Bʉa iyira sãwũã kʼarebaseabʉ audre ĩjãmarẽã Jeowa ʉ̃rʉ? Krĩchara naʉ̃ta: Nejaradiabari biaba bari jaradia ẽ yi nekʼawuabaria kʼãrẽta oibarata awuarabʉrʉ kʼarebabʉ iya ĩjãita iya biʼia oseabʉta maʉ̃ra. Bʉara abarika oseabʉ, bʉ nekʼawuabaria bari jaradia ẽ baibara Jeowaba kʼãrẽta omarẽã kãgabʉta awuarabʉrʉ jarara Jeowaba kʼarebaita iya awuara oibarata ara oita. Adewara akʉdayi kʼãrẽta oseabʉta dayi nekʼawuabari kʼarebaita.

KʼAREBARA BɄ NEKʼAWUABARIBA JEOWATA AUDRE KÃGAMARẼÃ

7. ¿Jesúsbara sãwũã kʼarebasi ẽbẽrarã iyi bedʼea ũrĩpanʉraba Jeowata audre kãgadamarẽãra?

⁷ Jesúsbara, iya jaradiadadeba kʼarebasi iyi kʼaidubemaraba Jeowata audre kãgadamarẽã iya kʼawuabasi baera iyi kʼaidubemaraba Jeowata audre kãgapanasibʉrʉ audre okĩrãnaibasita Jeowaba zokʼabʉta. ¿Sãwũã osi iyara maʉ̃ta? Bari jaraita, iya jarasi Jeowara zeze yi wũãwũãra nebia diabʉ kĩrãkʼa bʉta (Mat. 7:​9-11). Adewara iya nebʉrasi wũãwũã abaʉba iya kãgata osita yi zeze dedaʉba wãna tẽã mamina iya jẽda krĩchada tẽã jẽda zesita yi zezema. Maʉ̃ne yi zezeba bia edasi akʉza kãgata ũdubisi. Ẽbẽrarã Jesús bedʼea ũrĩbadadebema ʉ̃kʉrʉra neẽ basi zeze mia kãgata, maʉ̃ kʼarea kãgabasi zeze bia erbaita. Maʉ̃ba Jesúsba mawũã jarasidera mejãcha sobiasida kʼawuasida baera Jeowaba ẽbẽrarã mejãcha kãgabʉta (Luc. 15:​20-24).

8. ¿Sãwũã kʼarebaseabʉ bʉ nekʼawuabariba Jeowata audre kãga wãmarẽã?

⁸ Bʉabida abarika oseabʉ Jesúsde kĩrãkʼa. Bʉ nekʼawuabariʉ̃meba Daizeze Bedʼea kʼawuanʉmʉne iyaʼa ũdubira Jeowaba kʼãrẽ nebia erbʉdebemata aba akʉza mara estudiabʉrʉza iyaʼa ũdubira iya kʼawuanʉmʉneba Jeowaba sãwũã ũdubibʉta kãgata. Adewara Jeowaba yi warra Jesúsdeba ẽdrʉbida ʉ̃rʉ bedʼeabʉrʉdera jara ũrĩbira Jeowabara maʉ̃ta osita iyita kãgabʉ baera (Rom. 5:8; 1 Juan 4:10). Bʉ nekʼawuabariba biʼia kʼawuara Jeowaba iyi kʼãrẽãba kãgabʉta, naʉ̃ba kʼarebaseabʉ iyabida Jeowata audre kãga wãmarẽã (Gál. 2:20).

9. ¿Kʼãrẽba kʼarebasi Michaelba nekʼãrẽ awuara ojʉ̃drʉita?

⁹ Akʉdaya Michael nebʉrata, iyira Indonesiadebema. Iyara Jeowa ʉ̃rʉ kʼawuasi wiñayiruiduba mamina iyira buru kʼoe ze ẽ basi. Maʉ̃ta iyi 18 poagabidade wãsi aña trajade karrode. Maʉ̃ta ewari berabarida tẽã jẽda zesi mõbe juwa jidasi akʉza wũãwũã barasi. Mamina iyira yi mebẽrãbawara badata jẽda aña traja wãsi yi mebẽrã amae kʼãrãpe. Mainʉ bʉeda yi kimaba yi kaʉmebara Daizeze Bedʼeata kʼawua jʉ̃drʉsida akʉza nekʼãrẽ awuara ojʉ̃drʉsida. Maʉ̃ne Michael papara beisi, maʉ̃ kʼarea iyira jẽda wãsi yi mebẽrãbʉidu yi zeze akʉde. Iya yi zeze akʉbʉde ĩjãsi Daizeze Bedʼea ʉ̃rʉ kʼawua jʉ̃drʉita naʉ̃ librodeba Bʉra ewari jõmaʉ̃nẽ sobia baseabʉ, yi «Audre biʼia kʼawuadadrʉ» abʉmae, yi 27de jarabʉ bedʼeaba mejãcha kʼarebasi, naʉ̃ne jara ũrĩbibasi Jeowaba sãwũã iduaribisita yi wũãwũã zʉbʉria odamarẽã dayirã ẽdrʉbiya. Iya naʉ̃ ʉ̃rʉ krĩchaside kʼawuasi Jeowaita yi Warra mawũã zʉbʉria ojirpanʉ ũduira jipade zarebasita, naʉ̃ba iyi sota tõbarisi, maʉ̃ kʼarea jẽgasi iyira, maʉ̃ba Jeowaba yi Warrata mawũã iyi bari diada kʼarea biga diabʉta ũdubiya nekʼãrẽ awuara ojʉ̃drʉsi iyara akʉza buru kʼoesi.

KʼAREBARA BɄ NEKʼAWUABARIBA NÃÃRA BɄEMARẼÃ JEOWADETA

10. ¿Kʼãrẽta osi Jesúsbara kʼarebaita iyi kʼaidubemaraba nããra bʉedamarẽã Daizeze Bedʼea jaradia wãita? (Lucas 5:​5-11 akʉza akʉra potota).

¹⁰ Jesús kʼaidubemarabara mesera kʼawuasida Jesúsʼra Mesíasta, mamina ãyara nesidapanasi biʼia ũrĩnaita Jeowa ode bʼaira nesidabasita Daizeze Bedʼeata soiduba jaradia wãita akʉza maʉ̃ta nããra bʉeita. Bari jaradaita, Jesúsba Pedroʼa akʉza Andrésʼa jõma idubʉ kʼãrãpe ewari jõmaʉ̃nẽ iyi kʼaidu wãmarẽã widi nããra ãyira dããrabasi Jesús kʼaidubʉta (Mat. 4:​18, 19). Mamina ãyitara zarea baseabasi Jesúsba jarada oira, Santiago akʉza Juanbawara beda nẽdobʉde trajapanasi baera akʉza ãyi trajora bia wãbasi baera (Mar. 1:​16-20). Mamina mawũãsidu Pedroba akʉza Andrésʼʉ̃mebara ĩjãsida Jesús kʼaidu wãita akʉza krĩchasidabaibara kʼãrẽta oita yi mebẽrãba nesidabʉta diaita ãyi Jesús kʼaidu panʉena, ¿kʼãrẽba kʼarebasi ãya nãã Daizezedeta bʉeita plata audre jʉrʉi kaude? Lucasde nebʉrabʉ Jesúsba miõba okata osita mawũã kʼarebaita ãya audre ĩjãnamarẽã Jeowaba nekʼãrẽ ãya nesidabʉta diaseabʉta (akʉra Lucas 5:​5-11).

11. ¿Kʼãrẽta oseabʉ dayi nekʼawuabariba ĩjãbʉta audre zarea erbamarẽã?

¹¹ Wãrĩnu dayirãbara Jesúsde kĩrãkʼa miõba okata obe ẽ idi ewadera, mamina dayi nekʼawuabaria jara ũrĩbiseabʉ Jeowaba sãwũã kʼarebabʉta ẽbẽrarã iyideta nããra bʉepanʉrãra, bari jaraita jara ũrĩbiseabʉ bʉa nekʼãrẽ awuara oda ʉ̃rʉ ãba yi jʉrebarieda wãita, maʉ̃nera bʉ nokʼoʼa widisi baibara awuru ewarita diamarẽã ãba yi jʉrebarieda wãita. Bʉ nekʼawuabaria jara ũrĩbira bʉa maʉ̃ta osidera ũdusita sãwũã Jeowaba kʼarebadata akʉza maʉ̃ ũduiba bʉa ĩjãbʉra audre zarea erbesita.

12. (1) ¿Kʼãrẽa yibia bʉ nekʼawuabaria jaradia wãbʉrʉde mebẽrãta kʼaidu edeita? (2) ¿Adewara kʼãrẽta oseabʉ kʼarebaita bʉ nekʼawuabariba Jeowadeta nããra bʉemarẽã? Yizata jara ũrĩbira.

¹² Adewara bʉ nekʼawuabariba kʼawuara wuabema mebẽrãba Jeowadeta nãã bʉeya kʼãrẽta odata, naʉ̃ba mejãcha kʼarebayi iyira. Maʉ̃ba yibiabayi bʉa mebẽã aba edeita bʉta kopayamarẽã. Adewara maʉ̃ mebẽã widiseabʉ bʉ nekʼawuabaria jara ũrĩbimarẽã iya Jeowa sãwũã ũdukʼawuadata akʉza kʼãrẽta osita Jeowadeta nããra bʉeita. Adewara bigabayi bʉa ewari jʉrʉita bʉ nekʼawuabariʉ̃meba bideota akʉita, akʉseabʉ ʉ̃kʉrʉ bideora Bʉra ewari jõmaʉ̃nẽ sobia baseabʉ librodebemata, yi «Audre biʼia kʼawuadadrʉ» mawũã ẽ bʉrʉ «Jʉrʉda audre kʼawuaita» abʉdebemata. Bari jaraita maraba yi 37 akʉbarʉ ewaride bʉ nekʼawuabariʉ̃meba akʉseabʉ bideo yi trʉ̃, Jeowaba kʼarebayi dayirãba nesidabʉ ewaride abʉta akʉza kʼarebara iya ũdumarẽã Jeowaba sãwũã kʼarebaita Jeowadeta nããra bʉera.

BɄ NEKʼAWUABARIA JARADIARA KʼÃRẼTA OSEABɄTA AWURURA IYI Ʉ̃RɄ PANɄNE

13. ¿Kʼãrẽta osi Jesúsba iyi kʼaidubemara kʼawuabita ãyi pẽwãbʉdade kʼãrẽta oita?

¹³ Jesúsba iyi kʼaidubemara jarada ʉ̃rʉ jara ũrĩbibasi ãyira pẽwãnaibasita maʉ̃ne ãyi mebẽrãsida ãyi ʉ̃rʉ bʼaibasita (Mat. 5:11; 10:​22, 36). Adewara iyi beibodoare Jesúsba ãyaʼa jarasi ãyira bebʉde bʼaibasita (Mat. 24:9; Juan 15:20; 16:2). Akʉza ãyi maʉ̃ne berabarinʉmʉ kʼarea Daizeze Bedʼea jaradiabʉta idubʉda ẽ marẽãra Jesúsba ũrãgʼata diasi ãyaʼa, jarasi jʉra kʼawuapanamarẽã, krĩcha bia zokʼadamarẽã akʉza ãyi ʉ̃rʉ panʉraʉ̃me yõna ẽ marẽã.

14. ¿Sãwũã kʼarebaseabʉ bʉ nekʼawuabariba kʼawuamarẽã kʼãrẽta oita wuabemara iyi ʉ̃rʉ wãbʉdade? (2 Timoteo 3:12).

¹⁴ Abarika Jesúsde kĩrãkʼa dayirãbida dayirã nekʼawuabaria jara ũrĩbiseapanʉ kʼãrẽta oseabʉta wuabemara iyi ʉ̃rʉ panʉne. Bari jaraita, iyi neũdukʼawuarata iyiʉ̃me ãba trajapanʉrata mawũã ẽ bʉrʉ iyi mebẽrãta (akʉra 2 Timoteo 3:12). Edaʉde iyiʉ̃me ãba trajapanʉrãra iyi kʼarea ipidaseapanʉ iya nekʼãrẽ awuara ojʉ̃drʉbʉrʉ baera mawũã ẽ bʉrʉ iyi mebẽrãra iyi ʉ̃rʉ imitia bedʼeaseapanʉ iya Daizeze Bedʼeadeba kʼãrẽ kʼawuanʉmʉ kʼarea. Maʉ̃ba jipade yibia maʉ̃ berabari nãã bʉ nekʼawuabaria jara ũrĩbita iya kʼãrẽ bedʼea zroma ũduseabʉ ʉ̃rʉ mawũã maʉ̃ berabaribʉrʉde iya kʼawuamarẽã kʼãrẽta oita akʉza kʼãrẽta jaraita.

15. Bʉ nekʼawuabari mebẽrãta iyi ʉ̃rʉ panʉbʉrʉ, ¿kʼãrẽta oseabʉ bʉara iyi kʼarebaita?

¹⁵ Bʉ nekʼawuabari mebẽrãta iyi ʉ̃rʉ panʉbʉrʉ kʼarebara iya ũdumarẽã kʼãrẽa mawũã iyi ʉ̃rʉ panʉta, mawũã panʉ bʼaibara krĩchapanʉ baera Jeowa ʉ̃rʉ Kʼawuabipanʉrãbara wãrĩnuta jaradia ẽãta, mawũã ẽ bʉrʉ krĩchapanʉ baera Jeowa ʉ̃rʉ Kʼawuabipanʉrãra ẽbẽra kayiruarata. Kĩrãbedaibara Jesúsʼsida abarika berabarisita, iyi mebẽrãbara krĩchapanasi iyira kĩrãnemasita (Mar. 3:21; Juan 7:5). Jipade yibia bʉ nekʼawubariba ũdubi kʼawuaita jʉ̃ã kʼawuabʉta, wuabemaraʉ̃me ibia bedʼea kʼawuabʉta akʉza yi mebẽrãʉ̃mebida.

16. Bʉ nekʼawuabari mebẽrãba audre kʼawuakĩrãbʉbʉrʉ, ¿kʼãrẽta jaradiaseabʉ bʉa bʉ nekʼawuabaria?

¹⁶ Bʉ nekʼawuabari mebẽrãba audre kʼawuakĩrãbʉbʉrʉ iya kʼãrẽ kʼawuanʉmʉ ʉ̃rʉ, bʉa iyaʼa jaradiaseabʉ kʼãrẽta oseabʉta. Bari jaraita, jaraseabʉ ãyaʼa jara ũrĩbi ẽ baita jõma iya kʼawuabʉta, iya mawũã ora tẽã jʉ̃neane ũrĩamaseapanʉ baera, awuarabʉrʉ bigabayi ãyaʼa wĩña jara ũrĩbita akʉza ãyaʼa ũrĩne. Mawũã tẽã jʉ̃neare bedʼeakĩrãnamarẽã Daizeze ʉ̃rʉ bedʼeabʉrʉde iyiʉ̃me (Col. 4:6). Adewara bigabayi bʉ nekʼawuabariba dayirã pagina internetʼne jw.org ta ũdubita. Tẽã jʉ̃neare iyi mebẽrãnebemaba Jeowa ʉ̃rʉ Kʼawuabipanʉrã ʉ̃rʉ audre kʼawuakĩrãbʉrʉde internetʼne akʉmarẽã.

17. ¿Bʉ nekʼawuabariba Jeowa ʉ̃rʉ Kʼawuabipanʉrã ʉ̃rʉ bedʼea widibʉdade panʉ kʼawuamarẽã kʼãrẽneba jaradiaseabʉ bʉara? (Akʉra potota).

¹⁷ Bʉ nekʼawuabaria jaradiara sãwũã biʼia panʉseabʉta yi mebẽrãba mawũã ẽ bʉrʉ iyiʉ̃me trajapanʉraba iyaʼa bedʼea widibʉdade, maʉ̃itara zokʼara jw.org de «Badua widipanʉta» abʉta, iya maʉ̃neba kʼawuamarẽã sãwũã panʉita (2 Tim. 2:​24, 25). Akʉza Bʉra ewari jõmaʉ̃nẽ sobia baseabʉ librode lesion jõbodoare «Ʉ̃kʉrʉba krĩchapanʉta» abʉta zokʼaseabʉ. Adewara kʼarebara bʉ nekʼawuabariba iyi dobaʉba jara ũrĩbi kʼawuamarẽã iya ĩjãbʉ ʉ̃rʉ, maʉ̃ne iya nekʼãrẽ audre biʼia oita nesidabʉbʉrʉ jaradiara kʼãrẽne bia oibarata. Naʉ̃ba kʼarebayi bʉ nekʼawuabariba awurura iya ĩjãbʉ ʉ̃rʉ jaradiabʉrʉde pera ẽã jaradiamarẽã.

18. ¿Sãwũã kʼarebaseabʉ bʉ nekʼawuabariba kongregasionebemabawaraʉba jaradiamarẽã? (Mateo 10:27).

¹⁸ Jesúsba iyi kʼaidubemara jarasi bedʼea bia Daizeze Bedʼeadebemata ẽbẽrarã jõmaʉ̃ʼa jaradiadamarẽã (akʉra Mateo 10:27). Jipade yibia bʉ nekʼawuabariba iya kʼawua wãta deza jaradia wãita kongregasionebemarabawaraʉba. ¿Kʼãrẽa? Iya maʉ̃ta ora, naʉ̃ba kʼarebayi iya ũduita Jeowaba iyi sãwũã kʼarebabʉta akʉza maʉ̃ ũdubʉrʉba audre ĩjã wãñi Jeowa ʉ̃rʉ. Mamina bʉa, ¿sãwũã kʼarebaseabʉ bʉ nekʼawuabariba jaradia jʉ̃drʉmarẽã mebẽrãbawaraʉba? Maʉ̃itara kampaña ewari zebʉrʉde bʉra bedʼeaseabʉ bʉ nekʼawuabariʉ̃me mõbe jara ũrĩbiseabʉ iyaʼa kʼãrẽta oseabʉta jaradia jʉ̃drʉita akʉza jara ũrĩbiseabʉ maʉ̃ ewaride jaradia wãira audre yibiata akʉza iyitara zare ẽ baita. Adewara bʉa iyaʼa jaraseabʉ ãba yi jʉrebarimae ʉ̃tʉba bedʼeaita matrikulamarẽã, naʉ̃ obʉba kʼarebaseabʉ bʉ nekʼawuabariba iya ĩjãbʉta audre biʼia ẽza jara ũrĩbi kʼawuaita.

BɄ NEKʼAWUABARIA ŨDUBIRA BɄARA KʼAWUABɄTA IYARA JEOWATA SOBIABIKĨRÃBɄTA

19. ¿Jesúsbara sãwũã ũdubisi iyi kʼaidubemara ʉ̃rʉ ĩjãbʉta akʉza dayirãba sãwũã iyide kĩrãkʼa oseabʉ?

¹⁹ Jesúsba kʼawuabasi iyi kʼaidubemarabara ewarita nesidaibasita nekʼãrẽ ʉ̃kʉrʉ iya jaradiabʉ biʼia ũrĩra. Bari jaraita ãya ʉ̃ta wãita jʉ̃ãpanʉta (Juan 16:12). Iyi bei nãã akʉza ʉ̃ta wãi nãã Jesúsba iyi kʼaidubemara jarasi ãyira iyibawara jẽda ãbapanaita, mamina Jesúsba maʉ̃ jarasidera iyi kʼaidubemarabara bia ũrĩna ẽ basi Jesúsba kʼãrẽta jarakĩrãbʉta, ũrĩna ẽ basi Jesúsba maʉ̃ra jarakĩrãbasita ʉ̃tʉ yi ũduita. Mamina Jesúsba ãya mawũã ũrĩna ẽ basimina ãyi ʉ̃rʉ aña krĩcha ẽ basi awuarabʉrʉ krĩchasi iyi kʼaidubemara sãwũã kʼẽrẽpapanʉ ʉ̃rʉ (Juan 14:​1-5, 8). Dayirãbida abarika oseapanʉ dayirã nekʼawuabariʉ̃me, ũdubidaibara ĩjãpanʉta ãyi ʉ̃rʉ akʉza ãyara wãrĩnu soiduba okĩrãpanʉta Jeowadeta.

20. ¿Mebẽã wẽrã Malauidebemaba sãwũã ũdubisi ĩjãbʉta iyi nekʼawuabari ʉ̃rʉ?

²⁰ Jipade yibia dayirãba ĩjãita dayirã nekʼawuabari ʉ̃rʉ, ĩjãita iyara nekʼãrẽra jõma biʼia okĩrãbʉta. Akʉdaya yiza aba, mebẽã Malauidebema yi trʉ̃ Marthaba,b Daizeze Bedʼeata kʼawuabi jʉ̃drʉsi ẽbẽra wẽrã yi trʉ̃ Patriciaʼa, iyira katolikabasi. Maʉ̃ta ãya Bʉra ewari jõmaʉ̃nẽ sobia baseabʉ librode, yi 14de kʼawua berabarida tẽã Marthaba iyi nekʼawuabaria widisi kʼãrẽta krĩchabasita nekʼãrẽ parãmaneba Daizezeʼa yiwidʼi ʉ̃rʉ, maʉ̃nera iyi nekʼawuabari Patriciara kĩrʉtotosi akʉza kʼãwũã panʉsi: «Maʉ̃ra mʉ̃abʉrʉ kʼawua jidaseabʉ». Maʉ̃ ũrĩ Marthabara krĩchasi mama pai estudiaibasita wua estudia ẽ baibasita, mawũãsidu iya iduaribi ẽ basi Daizeze Bedʼea jaradiabʉta, jʉ̃ãbasi baera tẽã bai Patriciaba ũrĩta dayirãbara nekʼãrẽ parãmara yiwidʼi be ẽãta. Tẽã bai, jedekora berabarida tẽã Marthaba yi 34de bedʼea widibʉta widisi: «¿Sãwũã kʼareba zebʉrʉ Daizeze Bedʼea akʉbʉba akʉza Jeowa ʉ̃rʉ kʼawuabʉba?». Marthaba naʉ̃ta jara ũrĩbibʉ: «Patriciabara maʉ̃nera biʼia panʉsi jõma, bedʼea biata jarasi, maʉ̃nebemara iya jarasi Jeowa ʉ̃rʉ Kʼawuabipanʉrãbara nekʼãrẽ Daizeze Bedʼeade oẽ marẽã jarabʉra oda ẽãta». Tẽã bai Patriciabara nekʼãrẽ parãma yiwidʼibʉra idubʉsi akʉza iyira buru kʼoesi.

21. ¿Kʼãrẽta oseapanʉ dayirã nekʼawuabariba Jeowa ode bʼaita jidamarẽã?

²¹ Dayirãba kʼawuapanʉ ẽbẽra aba Jeowa oeda zeira maʉ̃ra mawũã obʉta Jeowabʉrʉ, mamina dayirãbida kʼarebaseapanʉ (1 Cor. 3:7). ¿Sãwũã? Dayirã nekʼawuabarira kʼarebapanʉne Jeowa oeda zeita. Dayirãbara ãyaʼa jaradiapanʉ Jeowaba kʼãrẽta omarẽã kãgabʉta ãya, mamina maʉ̃ awuara kʼarebapanʉ ãya Jeowara soiduba kãga zemarẽã. Adewara ãyaʼa jaradiapanʉ Jeowa kãgabʉ ũdubira nããra bʉeibarata nekʼãrẽ Daizezedebemata akʉza ãya bedʼea zroma ũdubʉrʉdera Jeowata ĩjãibarata. Maʉ̃ awuara dayirãba dayirã nekʼawuabarira ʉ̃rʉ ĩjãbʉta ũdubibʉrʉdera kʼarebapanʉ ãyabida ĩjãnamarẽã ãyisida Jeowa ode kʼẽrẽpa baseabʉta.