¿Nokʼorãra ãba trajaseabʉka drʉade nekʼãrẽ berabaribʉ jõbidaita? | ¿Kʼãrẽta jarabʉ Daizeze Bedʼeabara maʉ̃ ʉ̃rʉ?

Naciones Unidas naʉ̃ drʉade sãwũã awuara wã ʉ̃rʉ bedʼeadara jõsi domingo 20 noviembre 2022de (COP27). Nokʼora ãba yi jʉrebadaraba platata ãba jʉresida mawũã kʼarebaita pʉwʉrʉra audre zʉbʉriaberata drʉade nekʼãrẽ berabarida kʼarea. Ʉ̃kʉrʉba krĩchapanʉ maʉ̃ra nokʼoraba mawũã odadeba naʉ̃ drʉade nekʼãrẽ berabaribʉra taʉ ẽãta.

• «Mʉ̃ra mejãcha sobiabʉ kʼãwũã nokʼoraba platata ãba zebisida baera wuabemara kʼarebaita […]. Maʉ̃ba jarakĩrãkʉ ẽ jõma ara oita […]. Dayirã drʉara wuabʉrʉ mitia wã» (António Guterres, sekretario general Naciones Unidasdebema; 19 noviembre 2022de).

• «Drʉara jipa awuara wã mejãcha jʉ̃wʉrʉbʉ baera akʉza kue mejãcha zebʉ baera» (Mary Robinson, Irlandadebema nokʼo wẽrãbadaba, adewara iyira trajabʉ ONUne ẽbẽrarã kʼarebaita (Derechos Humanos); 20 noviembre 2022de).

Warrarabara biode krĩchabʉ naʉ̃ drʉade sãwũã awuara wã ʉ̃rʉ. ¿Nokʼorãra ãba trajaseabʉka drʉade nekʼãrẽ berabaribʉ jõbidaita? ¿Kʼãrẽta jarabʉ Daizeze Bedʼeabara maʉ̃ ʉ̃rʉ?

¿Nokʼorãra ãba trajaseabʉka drʉade nekʼãrẽ berabaribʉ bia wãbita?

Daizeze Bedʼeabara jarabʉ ʉ̃kʉrʉ nokʼoraba ara okĩrãbʉmina naʉ̃ drʉade berabaribʉta ãyira zarea neẽãta. Akʉdaya bedʼea ũme kʼãrẽa obeda ẽãta:

• «Yi jʉ̃reabʉra ara jipa obe ẽ, yi waebʉra jʉachabeda ẽ» (Eclesiastés 1:15).

  Kʼãrẽta jarakĩrãbʉ. Nokʼorabara bedʼea zromara ara obeda ẽ Jeowaba parã ẽ basi baera ãyikʉza zokʼamarẽã (Jeremías 10:23). Nokʼora drʉa jõmaʉ̃nẽbemata ãba zebʉrʉbʉsida ara obeda ẽ bayi bedʼea zroma drʉadebʉra.

• «Ẽbẽrarãbara ãyitrʉ audre kãgadayi, plata audre jʉrʉita kãgadayi, […], bedʼea abarika zeda ẽ bayi (2 Timoteo 3:2, 3).

  Kʼãrẽta jarakĩrãbʉ. Daizeze Bedʼeabara jarasi idi ewadera ẽbẽrarã ãyitrʉ jʉ̃zaba krĩcha bʼaita akʉza bedʼea abarika zeda ẽ baita. Idi ewade maʉ̃ta ũdupanʉ.

Bʉ nekʼãrẽ nebia jʉ̃ãita

Naʉ̃ drʉara bia wã ẽ bayi nokʼoraba obʉrʉ kʼarea. Awuarabʉrʉ Jeowabara jidasi naʉ̃ drʉa jõma bia wãbiseabʉta: Jesukristo. Daizeze Bedʼeaba jarabʉ:

• «Akʉza Nokʼora iyi juwadebayi. Akʉza trʉ̃gadayi Ũrãgʼa bia jaradiabari, Daizeze zarea barabʉta, Daizeze Ewari jõmaʉ̃nẽbʉta, Nokʼo warra neneẽã erbaita» (Isaías 9:6).

Jesuba zokʼayi Daizeze Nokʼota (Mateo 6:10). Iya erbʉ zareata, buru biata akʉza iyara akʉkĩrãbʉ dayirã drʉata akʉza maʉ̃ne edapanʉta (Salmo 72:12, 16). Iya zokʼabʉrʉdera jõbiyi jõma ẽbẽrarã naʉ̃ drʉa ãrĩbʉra akʉza ara oyi naʉ̃ drʉata (Apocalipsis 11:18; Isaías 35:1, 7).

Audre kʼawuakĩrãbʉbʉrʉ kʼãrẽa naʉ̃ drʉa awuara wãta akʉra artikulo «¿Qué dice la Biblia sobre el cambio climático y nuestro futuro?».