¿Kʼãrẽa Jeowa ʉ̃rʉ Kʼawuabipanʉrãbara Jesu beidara awuara opanʉ wuabema religioraneira?

Daibara Jesús beidara jẽda kĩrãbepanʉ Daizeze Bedʼeaba jarabʉ kĩrãkʼa (1 Corintios 11:20; King James Version). Mamina awuru religionʼrabara Jesús beida ʉ̃rʉ kĩrãbepanʉnera mawũã Daizeze Bedʼeaba jarabʉ kĩrãkʼa oda ẽ.

¿Kʼãrẽa kĩrãbepanʉ Jesús beidara?

Jẽda kĩrãbepanʉ Jesús beidara biga diabʉ ũdubita iyita beisi baera dayirãbari (Mateo 20:28; 1 Corintios 11:24). Jesús beida kʼãwũã jẽda kĩrãbepanʉra bari jẽda kĩrãbepanʉ ẽ, mawũã Daizezeba dayirã nekayiruata kĩrãduamarẽã.a Daizezebara dayirãba nemitia obʉra religionʼraba omarẽã jarabʉ kʼarea kĩrãdua ẽ, awuaraburu kĩrãduabʉ dayirãba Jesús ʉ̃rʉ wãrĩnu ĩjãbʉta ũdubipanʉbʉrʉ (Romanos 3:​25; 1 Juan 2:​1, 2).

¿Badua kĩrãbedaibaraka Jesús beidara?

Jesúsbara jarasi iyi beidara jẽda kĩrãbemarẽã, mamina jara ẽ basi badua odamarẽã (Lucas 22:19). Ʉ̃kʉrʉ ẽbẽrarãba krĩchapanʉ Jesús beidara kĩrãbedaibarata semanaza, badua, jedekoza akʉza ewariza. Mamina naʉ̃ oi nãã naʉ̃ta krĩchadaibara.

Jesúsʼra iyi bei nãã iyi kʼaidupanʉrabawara nekosi, maʉ̃ra osi maʉ̃ Pascua ewaride, tẽã maʉ̃ audre ẽãne beisi (Mateo 26:​1, 2). Jesúsbara bari Pascua ewaridebʉrʉ jida ẽ basi iyi kʼaidubemarabawara iyi nekoita, awuarabʉrʉ Pascua ewarita jidasi maʉ̃ ewaridera korderota beapanasi baera akʉza iyira maʉ̃ kordero kĩrãkʼa beibasi (1 Corintios 5:​7, 8). Adewara Pascuara opanasi poagaza (Éxodo 12:​1-6; Levítico 23:5). Kristianora nããbemarabara Jesús beidara kĩrãbepanasi poagaza, dai Jeowa ʉ̃rʉ Kʼawuabipanʉrãbida abarika opanʉ, Daizeze Bedʼeaba jarabʉta ũrĩpanʉ baera.b

¿Kʼãrẽ ewaride akʉza kʼãrẽ ũmadaʉde?

Jesúsba kʼãwũã yiza amaenaneba dayirã kʼawuabibʉ iyi beidara badua jẽda kĩrãbepanaseabʉ kʼawuaita akʉza kĩrãbebibʉ kʼãrẽ ũmadaʉde, kʼãrẽ ewaride oseabʉ kʼawuaita. Jesúsbara iyi bei nãã iyi kʼaidu panʉrabawaraʉba kosi yikodebemata, maʉ̃ra osi 14 Nisánbaside poaga 33de, bisia baeside. Iya maʉ̃ra osi mawũã jarabasi baera maʉ̃ ewaride kalendario jedekodebema erbadaba (Mateo 26:18-​20, 26). Abarika dai Jeowa ʉ̃rʉ Kʼawuabipanʉrãbida iyabaʉ ewaride kĩrãbepanʉ Jesús beidara nããrabema kristianoraba oda kĩrãkʼa.c

Jesús ewaribasidera 14 Nisánʼra poaga 33de baesi viernesebaside mamina poagaza awuru ewaride baeseabʉ. Dai Jeowa ʉ̃rʉ Kʼawuabipanʉrãbida kʼawuaita kʼãrẽ ewaride baebʉta 14 Nisánʼra abarika opanʉ Jesús ewaride odapeada kĩrãkʼa, maʉ̃ra oda ẽ idibema judioraba obʉ kĩrãkʼa.d

Panta binoʼʉ̃me

Iyi bei nãã yikodebemara Jesúsbara naʉ̃ta osi, iyara zokʼasi pan ne oreguea neẽãbʉta akʉza bino tintota, maʉ̃ yiko Pascuadebema osidade maʉ̃trʉ wesi (Mateo 26:26-​28). Maʉ̃ kʼarea Jeowa ʉ̃rʉ Kʼawuabipanʉrãbida Jesús beida jẽda kĩrãbedaita zokʼapanʉ pan ne oreguea neẽã akʉza kʼãrẽ eda bʉeda ẽ adewara zokʼapanʉ bino tintota, naʉ̃ binonera eda bʉeda ẽ ne kũata, ituata akʉza nekʼãrẽ awuarabʉta.

Ʉ̃kʉrʉ religionbara zokʼabʉ pan ne oregueata mamina Daizeze Bedʼeade maʉ̃ ne oregueara akʉpanʉ nekayirua kĩrãkʼa (Lucas 12:1; 1 Corintios 5:​6-8; Gálatas 5:​7-9). Maʉ̃ba pan kʼãrẽ ne oreguea neẽbʉra jarakĩrãbasi Jesús kakuata, Jesúsʼra nekayirua okabasi baera (1 Pedro 2:​22). Ʉ̃kʉrʉ religionʼraba bino zokʼai kaude zokʼapanʉ uba bata mamina Daizeze Bedʼeabara maʉ̃ra jara ẽ awuaraburu maʉ̃ra Daizeze ʉ̃rʉbʉ. Mejãchaʉba zokʼapanʉ uba bata jarapanʉ baera ituara dobe ẽãta, mamina Daizeze Bedʼeabara maʉ̃ra jara ẽ.​(1 Timoteo 5:​23).

Binora panʼʉ̃mera yizarabasi

Wãrĩnu panʼra Jesús kakua ẽ basi akʉza binora yi wa ẽ basi, panta binoʉ̃mebara jarakĩrãkʉ Jesús kakuata, maʉ̃ba jarakĩrãkʉ ẽ ʉ̃kʉrʉba krĩchabʉ kĩrãkʼa binora Jesús wa badogota, waya panʼra Jesús kakua badogota. Akʉdaya kʼãrẽta jarabʉta Daizeze Bedʼeaba maʉ̃ ʉ̃rʉ:

• Jesúsba iyi kʼaidupanʉra jarasibʉrʉ wata domarẽã mõbemata ũdubikĩrãbasi oseabasita Jeowaba kãga ẽãta. Daizezebara jarabʉ kʼãrẽa wara dobe ẽãta (Génesis 9:4; Hechos 15:28, 29). Jesúsbara jara ẽ ũrĩ ẽ marẽã Jeowaba zokʼabʉta wa ʉ̃rʉ (Juan 8:​28, 29).

• Jesús kʼaidupanʉrabara maʉ̃ diamisira do ẽ basi Jesús wara, Jesúsba jarabarisi baera iyi wara zarraita, maʉ̃nera iyira wabida zokʼaibasi (Mateo 26:28).

• Jesúsʼra beima aba beisi (Hebreos 9:​25, 26). Jesús beida jẽda kĩrãbepanʉ ewaride, panta Jesús kakuata ba totosibʉrʉ akʉza binota Jesús wa ba totosibʉrʉ, mawũã Jesúsʼra jẽda beibʉ kĩrãkʼabasi.

• Jesúsbara jarasi iyi beidata jẽda kĩrãbedamarẽã, jara ẽ basi mawũã iyita jẽda sakripisio kĩrãkʼa diaita (1 Corintios 11:24).

Ẽbẽrarãbara krĩchapanʉ binora Jesús wa badogota, waya panʼra Jesús kakua badogota. Ẽbẽrarã Daizeze Bedʼea tradusipanʉraba aña opanʉ baera, ʉ̃kʉrʉ Bibliade Mateo 26:28ba jarabʉra jarapanʉ naʉ̃ta jarasita Jesúsba: «Naʉ̃ta mʉ̃ wa». Mamina naʉ̃ bedʼea Jesúsba jaradara kʼãwũã tradusiseapanʉ: «Naʉ̃bara jarakĩrãbʉ mʉ̃ wata».e Jesúsba jarabada kĩrãkʼa iyara zokʼasi yiza ʉ̃rʉ jara ũrĩbita (Mateo 13:34, 35).

¿Kʼairaba kobʉ panʼra akʉza kʼairaba dobʉ binora?

Jeowa ʉ̃rʉ Kʼawuabipanʉrã Jesús beida jẽda kĩrãbepanʉnera ẽbẽrarã wikaʉba kobʉ panta akʉza dobʉ binota. ¿Kʼãrẽa?

Nããrãra Jeowara bedʼea abarika zesi Israel pʉwʉrʉʼʉ̃me maʉ̃ tẽã Jesús beiside Jeowara bedʼea abarika zesi awuru ẽbẽrarãbawara (Hebreos 8:​10-​13). Ẽbẽrarã Jeowaʉ̃me bedʼea abarika zedarabʉrʉ kopanʉ panta akʉza dopanʉ binota, kristianora jõmaʉ̃rabara maʉ̃ra koda ẽ akʉza doda ẽ (Hebreos 9:​15; Lucas 22:20). Maʉ̃ra ẽbẽrarã Jeowaʉ̃me bedʼea abarika zedarara Jeowaba jidasi ʉ̃ta wãnamarẽã maʉ̃ra ẽbẽrarã 144.000 (Lucas 22:28-​30; Revelación 5:​9, 10; 14:​1, 3).

Maʉ̃ra ẽbẽrarã wikapanʉmina Jesúsbawaraʉba zokʼaita, mamina maʉ̃ awuara bayi ẽbẽrarã mejãcha naʉ̃ drʉade bʼaita (Lucas 12:32; Revelación 7:​9, 10). Dai nama egorode ewari jõmaʉ̃nẽ bʼairabara ko ẽ panta akʉza do ẽ binora. Wãpanʉ Jesús beida jẽda kĩrãbepanʉma, mawũã iyaʼa biga diaita iyita dayirãbari beisi baera (1 Juan 2:2).