Lunes 20 octubre
Maraba jarada ẽ bʉrʉ kʼãrẽta jarakĩrãbʉta mʉ̃a kʼãĩmokʼãrãdaba, mara kakuara pikatʉkʉaya (Dan.2:5).
Poaga ũme berabarida tẽã babilonioraba Jerusalén ãrĩsidade nokʼo Nabucodonosorʼra mejãcha krĩcha zroma onʉmasi iya nekʼãrẽ parãna zroma kʼãĩmokʼãrãde ũduda kʼarea, nokʼoba jarasi ẽbẽrarã buru biara maʉ̃ne eda chuasi Danielta iyaʼa jaramarẽã kʼãrẽta kʼãĩmokʼãrãsita akʉza kʼãrẽta jarakĩrãbasita (Dan. 2:3-5). Danielbara nekʼãrẽ mesera jʉrʉibarabasi maʉ̃ jara ũrĩbita, mawũã ẽ bʉrʉ mejãchaʉta beikasi. Aramaʉ̃ta Danielba «widisi nokoʼa ewarita diamarẽã iya kʼãĩmokʼãrãda jara ũrĩbita» (Dan. 2:16). Danielba maʉ̃ bedʼea nokʼoʼa jaraira nesidabasi zowaĩnĩgʉata akʉza ĩjãbʉta ũdubita. Daizeze Bedʼeabara jara ẽ Danielbara nawedara kʼãĩmokʼãrãra jara ũrĩbisita, Danielbara kʼareba widisi Daizezeʼa wididamarẽã maʉ̃ kʼãĩmokʼãrãta jara ũrĩbita (Dan. 2:18). Mawũẽ Jeowaba panʉsi ãyi yiwidʼibadara, Daizeze kʼarebadeba Danielbara jara ũrĩbisi maʉ̃ kʼãĩmokʼãrãra. Mawũã odadeba Danielʼra akʉza iyi neũdukʼawuarãra ẽdrʉsida. w23.08 3 parr. 4
Martes 21 octubre
Izhi ewarita jõñeẽna mʉta pẽwã bʼʉra ẽdrʉya (Mat. 24:13).
Krĩchara kʼãrẽ nebiata ũduseabʉta jʉ̃ãbaiba. Dayirãba jʉ̃ã kʼawuabʉta ũdubibʉbʉrʉ audre sobiapanʉ akʉza aduʼapanʉ adewara wuabemarabawara ãba bʼaita ũdubʉ. Dayirã kongregasionʼra audre ãba baseabʉ. Dayirãta kĩrʉbisidabʉrʉ akʉza maʉ̃ta dayirãta abarika kĩrʉpanʉ ẽ bʉrʉ kʼarebabʉ aukʼara bedʼea zroma ba ẽ baita (Sal. 37:8, nota; Prov. 14:29). Jʉ̃ã kʼawuabʉta ũdubipanʉbʉrʉ audre Jeowa kʼawa baseabʉ, akʉza iya obʉ kĩrãkʼa obʉta ũdubiseabʉ. Jʉ̃ã kʼawuabʉ nebiara arigʉ yibia. Zareamina jʉ̃ã kʼawua bʼai erbaira maʉ̃ta oũdubi wãseabʉ Jeowa kʼarebadeba. Dayirãba ẽjũã kĩrãwãreã zeyeda jʉ̃ãbʉ naʉ̃ nebiata: «Jeowa dabʉbara akʉbʉ iyi wawiapanʉrata, iyi kãga jõka jʉ̃ãpanʉra ʉ̃rʉ» (Sal. 33:18). Zarea oidua ewari jõmaʉ̃nẽ jʉ̃ã kʼawuabʉta ũdubidaita. w23.08 22 parr. 7; 25 parr. 16, 17
Miércoles 22 octubre
Daya ĩjãbʉta oũdubi ẽ bʉrʉ beibʉ kĩrãkʼabʉ (Sant. 2:17).
Santiagoba jarasi naʉ̃ yumakẽrãba ĩjãbʉ abasimina iya obʉba ũdubi ẽ basi ĩjãbʉta (Sant. 2:1-5, 9). Adewara Santiagoba jara ũrĩbisi yumakẽrã abaʉba ũdubʉta mebẽã aba wua neẽãbʉta, yiko neẽãbʉta, mamina iya kʼãrẽ oẽãta maʉ̃ kʼarebaita. Naʉ̃ yumakẽrãba jarabʉbʉrʉ iya ĩjãbʉta mamina iya obʉdeba ũdubibʉ ĩjã erbʉ ẽãta (Sant. 2:14-16). Santiagoba jarasi Rahabʼbara iya ĩjãbʉ erbʉta iya nekʼãrẽ obʉdeba (Sant. 2:25, 26). Iya ũrĩbarisi Jeowaba israelitarãra kʼarebabʉta (Jos. 2:9-11). Iya ĩjãbʉta ũdubisi iya meraside israelitara ũme miaordabarita, mawũã ãyita beada ẽ marẽã. Maʉ̃ba naʉ̃ yuwẽrã nekayirua omiabasimina, israelita ẽ basimina aripe obʉta jarasida, Abrahán kĩrãkʼa. Rahab yizadeba kʼawuasida dayirãba ĩjãbʉ ũdubira ũdubibarata daya nekʼãrẽ obʉdeba. w23.12 5 parr. 12, 13