Octubre

¿Bʉitara zareabʉka ũrĩta? Nokʼo Davidʼitabida mawũã zareabasi, maʉ̃ kʼarea iya Jeowaʼa jarasi: «Kʼarebara mʉ̃a bʉa jarabʉta ũrĩkĩrã bʼaita» (Sal. 51:12). Davidʼitara edaʉde zarebasi ũrĩta Jeowaba jarabʉra, dayirãsida abarika berabaribʉ. ¿Kʼãrẽa? Nããra, dayirãra kayirua omia baera. Yi ũmeta, Diarubara kãgabʉ baera dayirãbida iyide kĩrãkʼa ũrĩ ẽ marẽã (2 Cor. 11:3). Yi ũbeata, ẽbẽrarã dayirã audu panʉrabara ũrĩkĩrã ẽ baera (Efes. 2:2). Zarea odaibara kayirua oẽ baita akʉza Diaruba, adewara naʉ̃ drʉadebemaba obʉ kĩrãkʼa oẽ baita. Akʉza ũrĩbara Jeowa bedʼeata, adewara ũrĩbara ẽbẽrarã Jeowaba dayirã zokʼamarẽã amaenara bedʼeasida. w23.10 6 parr. 1

¿Kʼãrẽta kʼawuapanʉ Jesuba bania bino babidadeba? Kʼawuapanʉ edabʉta krĩchaibarata. Jesuba miõba okata obaside iya jara ẽ basi wuabemara iyi zareadeba maʉ̃ta obasita, awuarabʉrʉ jarasi maʉ̃ miõba okata obasita Daizeze jaure zareadeba (Juan 5:​19, 30; 8:28). Dayirãba Jesude kĩrãkʼa opanʉbʉrʉ jarada ẽ bayi nebiara dayabʉrʉ bia osita. Daizeze ʉ̃rʉ ibia bedʼeabibara, jõma erbʉra maʉ̃neba zebʉ baera (Jer. 9:​23, 24). Dayirãbara Jeowa kʼareabʉrʉ nebiata erpanʉ, dayirã dobaʉbara nebiara ũdu ẽ baera (1 Cor. 1:​26-31). Dayirãta edabʉta krĩchapanʉbʉrʉ jarakada ẽ bayi wuabemara daya kʼarebasita wuabemarata, awuarabʉrʉ sobiapanañi Jeowaba daya obʉta bia akʉbʉ baera (naʉ̃ testoʉ̃me akʉra Mateo 6:​2-4; Heb. 13:16). Dayirãba Jesude kĩrãkʼa eda krĩchabʉta ũdubipanʉnera mejãcha sobiabibʉ Jeowata (1 Ped. 5:6). w23.04 4 parr. 9; 5 parr. 11, 12

Apostol Pablora Daizeze jaure zareaba kʼarebasi wuabemara kristianora jaramarẽã wubemara ʉ̃rʉ krĩchamarẽã. ¿Sãwũã dayirãbara oseapanʉ maʉ̃ ũrãgʼara ãba yi jʉrepanʉne? Kĩrãbedaibara dayirã kĩrãkʼa komentario diakĩrãpanʉta. Krĩchaidua naʉ̃ta. Bʉ neũdukʼawuarabawara bedʼeabʉdera bʉ ãyi bedʼeabi ẽã ¿bʉra ewari jõmaʉ̃nẽ bedʼeabʉka? Mawũã ẽ, bʉabida kãgabʉ ãyisida bedʼeamarẽã, ãya krĩchaseabʉ bʉara ũrĩamabʉta ãyi bedʼeabʉra. Maʉ̃ kĩrãkʼa ãba yi jʉrebʉrʉdera kãgapanʉ mebẽrã mejãchaʉta komentario diadamarẽã, maʉ̃ne dayirãba so zarea diaseabʉ wuabemara mebẽrãra iduaribibʉde komentario diadamarẽã (1 Cor. 10:24). Dayirãra mejãcha bedʼea ẽ baibara maʉ̃ba iduaribiseabʉ baera wuabemara mebẽrãsida komentario diamarẽã, maʉ̃ba zõrãrãba mebẽrã yi audre kʼawuabʉraba maʉ̃ yizata diaseabʉ. Komentario wika diaimina maʉ̃ne awuara awuaraka jara wã ẽ baibara, bʉa maʉ̃ta jõma jarara wuabemarata komentario neẽã amaeseabʉ. Naʉ̃ parrapodera bedʼea ũme jarabʉ: mejãcha bedʼea ẽ baita akʉza komentario diabʉde wua eda jara ẽ baita. Bʉta nããra bedʼeaibʉrʉ yi jaradiabʉba bedʼea widibʉta panʉra. w23.04 22, 23 parr. 11-13

Kĩrãbedaibara audre yibiata wuabemara kʼarebaita audre Daizeze Bedʼea jaradiabʉdeba. Dayirãba jaradiabʉrʉdera zarea oibara daya krĩchabʉta oẽ baita. Daizeze Bedʼea jaradiabʉrʉde ũdukʼawuabʉ ẽbẽrarãba awuara krĩchabʉta, awuara obʉta akʉza pʉwʉrʉ awuara awuarakadeba zebʉta. Apostol Pablobara iya krĩchabʉta oẽ basi, dayirãba kʼawuaseabʉ iyi yizadeba. Jesuba zokʼasi apostol Pablota judiora ẽã jaradiamarẽã (Rom. 11:13). Maʉ̃nera Pabloba jaradiasi judiora, griegora, ẽbẽra buru biara, ẽbẽra oidebemara, ẽbẽra yi zokʼabʉra akʉza nokʼora. Pablo ẽbẽrarã soidu jʉ̃ẽita nekʼãrẽ mejãcha osi «wuabema kĩrãkʼa abarika» bʼaita (1 Cor. 9:​19-22). Pabloba akʉbasi ẽbẽrarã samaʉ̃ba zebʉta, kʼãrẽ kultura erbʉta, kʼãrẽne ĩjãbʉta akʉza maʉ̃neba jaradiabasi. Dayirãbida ẽbẽrarã soidu jʉ̃ẽbiseabʉ zarea obʉbʉrʉ bia akʉita ẽbẽraba kʼãrẽta kãgabʉta, kʼãrẽta obʉta, mawũã maʉ̃neba ãyaʼa jaradiaita. w23.07 23 parr. 11, 12

Mejãcha zareata nesidapanʉ urumʉ̃rʉã bʼaita awururaba dayirã kĩrʉbibʉdade. Urumʉ̃rʉã bʼaira neta jauredebema (Gál. 5:​22, 23). Griego bedʼeadera bedʼea urumʉ̃rʉãra zokʼapanʉ jara ũrĩbita kabayo mẽsiabʉta tẽã urumʉ̃rʉã babipanʉ ʉ̃rʉ. Naʉ̃ kabayobara waidide zarea erbʉ, mamina iyira urumʉ̃rʉãbʉrabʉ, mawũã mẽsiabʉ ẽ. ¿Dayirãbara sãwũã ũdubiseapanʉ zowãĩnĩgʉapanʉta mamina urumʉ̃rʉãpanʉne? Mamina naʉ̃ nebiara dayirã dobaʉbara oauda ẽ, awuarabʉrʉ Jeowa widibara kʼarebamarẽã maʉ̃ nebiata ũdubita. Maʉ̃ra wãrĩnu berabariseabʉ. Bari jaradaita, ʉ̃kʉrʉ Jeowa ʉ̃rʉ Kʼawuabipanʉrãba ibiade panʉsida ãyi nejʉraraba ãya ĩjãbʉ ʉ̃rʉ widisidade akʉza yi naʉ̃ ũdudaraba biʼia krĩchasida Jeowa ʉ̃rʉ Kʼawuabipanʉrã ʉ̃rʉ (2 Tim. 2:​24, 25). w23.09 14 parr. 3

Apostol Juanba ũdusi ʉ̃tʉ bajãne zõrãrã 24 panʉta Jeowa ʉ̃rʉ ibia bedʼeabarabʉta. Ãya jarasida: «Bʉ abapaiʼabʉrʉ ibia bedʼeaibara, wawiata ũdubibara akʉza zareata» (Apoc. 4:​10, 11). Angelerabida nekʼãrẽ mejãcha erbʉ Jeowa ʉ̃rʉ ibia bedʼeabira. Ãyira Jeowa kʼawabʉ baera, Jeowata bia ũdukʼawuabʉ akʉza akʉbʉ Jeowaba kʼãrẽ nebia erbʉta, maʉ̃ akʉbʉde ibia bedʼeabikĩrãbʉ Jeowa ʉ̃rʉ (Job 38:​4-7). Dayirã Jeowa yiwidʼibʉrʉdera jaraibara Jeowaba nekʼãrẽ nebia erbʉ ʉ̃rʉ akʉza jaraibara dayirãba mejãcha kãgabʉta. Bʉa Daizeze Bedʼea ʉ̃rʉ akʉbʉrʉde kĩrãkita akʉra kʼãrẽ nebia Jeowaba erbʉ ʉ̃rʉ bedʼeabʉta (Job 37:23; Rom. 11:33). Maʉ̃are Jeowa jarada bʉa kʼãrẽ sentibʉta iyi nebia ʉ̃rʉ, maʉ̃are Jeowaʼa jaraibara iya kʼãrẽ obʉta iyi pʉwʉrʉ kʼarea akʉza dayi kʼarea. (1 Sam. 2:​1, 2). w23.05 3, 4 parr. 6, 7

Poaga 1919deba ʉ̃ta Babilonia Zromabara wua ãyi juwa edre erba ẽ basi Daizeze pʉwʉrʉra. Maʉ̃ poagadeba ʉ̃ta nezokʼara jipabʉra akʉza bia krĩchabʉrãra, mejãcha trajasida ẽbẽrarã wãrĩnu Jeowa ʉ̃rʉ kʼawuakĩrãbʉta Neneẽãbʉ Oeda zemarẽã (Mat. 24:​45-47; Is. 35:8). Nããbema ẽbẽrarãbara mawũã odaba, kʼarebasi o ara odaita, mawũã ẽbẽrarã ʉ̃ra maʉ̃ oeda zedaraba kʼawuadamarẽã Daizeze ʉ̃rʉ akʉza Jeowaba kʼãrẽta krĩchabʉta (Prov. 4:18). Adewara ãyira panaseabasi Jeowaba kãgabʉ kĩrãkʼa. Jeowabara jʉ̃ã ẽ iyi pʉwʉrʉba mesera ara odamarẽã, awuarabʉrʉ Jeowabara iyi pʉwʉrʉʼa jaradiabʉ sãwũã wiña wiñane audre bia owãibarata. Dayirãra mejãcha sobiapanʉ daya obʉdeba Jeowata sobiabiseabʉ baera. Ora nesidabʉ badua jarepanamarẽã mawũã bia bamarẽã, maʉ̃ kĩrãkʼa poaga 1919deba ʉ̃ta, Neneẽãbʉ Ora ara ozebʉda, mawũã ẽbẽrarã mejãchaʉta Babilonia Zromaneba ẽdrʉdamarẽã. w23.05 17 parr. 15; 19 parr. 16

Zõrãrã Burubiadebemarabara jaradiapanʉ mebẽrã Zõrãrã Burubiadebema kʼarebabarira, naʉ̃ra mebẽrãbara mejãcha kʼarebapanʉ Jeowa organizasione ãyi trajo bia opanʉne. Ãyara biʼia jaradiapanʉ, mawũã Jeowa pʉwʉrʉ biʼia akʉdamarẽã. 144.000ra ʉ̃ta wãbʉrʉdera zʉbʉria zroma jõbodoare, Daizeze pʉwʉrʉra iyaʼa yiwidʼipanañi iya kãgabʉ kĩrãkʼa. Jesuba ãyi bia zokabʉ baera, Daizeze odepanʉrabara kʼẽrẽpa opanañi iya kãgabʉta. Kʼawuapanʉ maʉ̃ ewaridera dayirãra Gog de Magogba pẽwãita, maʉ̃rãra nokʼora ãba yi jʉrebʉ Daizeze pʉwʉrʉ pẽwãita (Ezeq. 38:​18-20). Mamina ãya mawũã pẽwãbʉba oẽ bayi Daizeze pʉwʉrʉba Daizezeʼa yiwidʼibʉta idubʉmarẽã, iya wãrĩnu ẽdrʉbiyi iyi pʉwʉrʉra. Juanba ũdusi mejãcha ẽbẽrarã awuru obejadebemarata, iyaʼa jarasida naʉ̃ra mejãcha ẽbẽrarãra zebʉta zʉbʉria zromaneba (Apoc. 7:​9, 14). Ãyira bei ẽã ẽdrʉyi. w24.02 5, 6 parr. 13, 14

¿Kʼãrẽta oibara Daizezeba iyi jaure zareata diamarẽã? Jeowaʼa widibara iyi jaure zareata diamarẽã, iyi bedʼeata akʉibara akʉza Jeowa organizasione bʼaibara, Jeowaba iyi jaure zareadeba maʉ̃ta kʼarebabʉ baera. Maʉ̃ta obʉbʉrʉ neta jauredebemata erbaseabʉ (Gál. 5:​22, 23). Jeowabara iyi jaure zareara diabʉ ẽbẽra iyi krĩcha jaigʉa ẽã erbʉa akʉza nekayirua oẽã. Daizezebara iyi jaure zarea dia ẽ bayi dayirãba nekayiruata krĩchabʉbʉrʉ akʉza obʉbʉrʉ (1 Tes. 4:​7, 8). Daizezeba iyi jaure zarea dia bamarẽãra dayirãbara propesiarãra igara akʉ ẽ baibara (1 Tes. 5:20). Naʉ̃ bersikulode bedʼea propesiaba jarakĩrãbʉ Jeowaba nekʼãrẽ jaradata iyi jaure zareadeba, maʉ̃ra bedʼeade edabʉ Jeowa ewari zei ʉ̃rʉ akʉza dauba bʼai ʉ̃rʉ, maʉ̃ba krĩchada ẽ Armagedonʼra atia ze ẽãta, awuarabʉrʉ bia kʼawuapanʉ iyi ewari zeira arakʼaitabata. Adewara opanʉ «Daizezeba zokʼabʉta akʉza iyiʉ̃me» kʼẽrẽpapanʉ (2 Ped. 3:​11, 12). w23.06 12 parr. 13, 14

¿Kʼãrẽta oseabʉ kristianorabara ẽbẽra ãkadabʉta ʉ̃tʉ zera selularde mawũã ẽ bʉrʉ tablede? Mawũã ʉ̃tʉ zera jipa akʉ ẽ baibara. Dayirãbara krĩcha biata jidaseabʉ kĩrãbepanʉbʉrʉ dayirãitara audre yibiata Jeowa neũdukʼawua bʼaira. Ẽbẽra ãkadabeta ũdubida ẽ bʉrʉ, bʉ ẽbẽra iyiʉ̃me ãba kʼãĩmarẽã trʉ̃bʉ kĩrãkʼabʉta, ¿kʼãrẽa jipa akʉda ẽ baibara maʉ̃ra? Maʉ̃ kayirua akʉbʉdeba dayi sode nemitiata oamapanʉ baera (Mat. 5:​28, 29). Zõrãrã abaʉba Tailandiadebemaba yi trʉ̃ Davidba jarabʉ: «Mʉ̃yikʉza widibʉ: ‹¿Mʉ̃a ẽbẽra ãkadabʉta akʉbʉ ẽ mina, Jeowara sobia bʼaika mʉ̃a akʉbʉ kʼarea?›. Mawũã krĩchaiba mʉ̃ra kʼarebabʉ krĩcha bia jidaita».Dayirã jaradiapanʉ sãwũã Jeowa wawia ũdubibarata, mawũã iyi sopʉabi ẽ baita, «Jeowaʼa wawia ũdubibʉdeba zebʉ buru biara» (Prov. 9:10). w23.06 23 parr. 12, 13

Bedʼea «mayi deda» jarabʉbara jarakĩrãbʉbaibara kongregasionʼrata. Zʉbʉria zroma zebʉrʉdera Jeowa kʼarebara ũdudayi mebẽrãbawara ãbabʉde. Maʉ̃ba dayirãra zarea odaibara mebẽrãba nemitia obʉra bari awuanta ẽ baita, awuarabʉrʉ wãrĩnu kãgabʉta ũdubidaibara. Maʉ̃ta nesidadayi dayirã bebʉ zokʼai erbaira. Jeowa ewari zebʉrʉdera ẽbẽra mejãchaʉta zʉbʉriadayi (Sof. 1:​14, 15). Daizeze pʉwʉrʉbida bedʼea zromara ũduyi. Dayirãta kʼãwũãena ʉrʉmabʉbʉrʉ, zʉbʉria zroma zebʉrʉde aduʼapanañi akʉza kʼarebadayi wuabema ẽbẽrarãta akʉza awuantadayi badu bedʼea zroma zebʉrʉta. Maʉ̃ zʉbʉria zroma zebʉrʉdera dayirãbara nekʼãrẽ jõma odayi mebẽrãba nesidabʉ diadaita, ãyi so zʉbʉria akʉdaita, so zarea diaita akʉza dayirã mebẽrãbawara ãbapanaita, ãyita mejãcha kãgapanʉ baera. Jeowabara aranʉ dayirãra ewari jõmaʉ̃nẽ babiyi maʉ̃nera dayirãbara ũdu ẽ bayi zʉbʉriata akʉza bedʼea zromata (Is. 65:17). w23.07 7 parr. 16, 17

Daizeze Bedʼeaba jarabʉ ẽbẽrarã ʉ̃kʉrʉ mejãchade zarea ĩjãbasita Daizeze ʉ̃rʉ, mawũãsidu ãyira edaʉde zarea neẽ kĩrãkʼabasi. Bari jaraita, Davidʼra edaʉde krĩchabasi iyira bʉta katuma kĩrãkʼa zarea, mamina edaʉde iyira mejãcha perabasi (Sal. 30:7). Sansónʼra Daizeze jaure zareaba kʼarebabasidera mejãchade zareabarabasi, mamina iya jarasi iyita Daizeze jaure zareaba kʼareba ẽ bʉrʉ iyira bʼaita wuabema ẽbẽra kĩrãkʼa (Juec. 14:​5, 6; 16:17). Naʉ̃ra yumakẽrãrãra zareabarapanasi Jeowaba zarea diabasi baera. Apostol Pablobida kʼawuasi Jeowa zareata nesidabasita (2 Cor. 12:​9, 10). Iyisida kayasi (Gál. 4:​13, 14). Edaʉde yõbasi nekʼãrẽ aripe oita (Rom. 7:​18, 19). Edaʉde krĩcha zroma obasi (2 Cor. 1:​8, 9). Mawũãmina Pablo zarea neẽ basidera zareabarabasi, ¿sãwũã? Jeowaba zarea diasi Pablo zarea bamarẽã. w23.10 12 parr. 1, 2

Edaʉde dayirãba krĩchabaribʉrʉ dayirãra kʼãrẽita zeri ẽãta kĩrãbeibara Jeowaba iyi biaba dayirãra iyima wesita (Juan 6:44). Jeowabara akʉbʉ dayirãba kʼãrẽ nebia erbʉta akʉza iyara bia kʼawuabʉ dayirã so sãwũãbʉra, maʉ̃ta dayirãba ũdu ẽ mina (2 Crón. 6:30). Maʉ̃ kʼarea Jeowaba dayirã jarabʉbʉrʉ iyitara dayirãra jipade yibiata, ĩjãnaibara maʉ̃ ʉ̃rʉ (1 Juan 3:​19, 20). Dayirãba wãrĩnu ʉ̃rʉ kʼawuai nããra osibaibara nekʼãrẽ kayirua dayirã sopʉabibʉta (1 Ped. 4:3). Ʉ̃kʉrʉ ẽbẽrarã Jeowa ode kʼẽrẽpapanʉrasida zarea opanʉ yi kayirua yi edebi ẽ baita. ¿Bʉara edaʉde krĩchabarika Jeowabara kĩrãdua ẽãta bʉa nekʼãrẽ kayirua odara? Bʉa mawũã krĩchabaribʉrʉ, naʉ̃ba so zarea diayi, kĩrãbeiba ʉ̃kʉrʉ mebẽrãrasida zarea opanʉta mawũã krĩcha ẽ baita. Bari jaraita, Pabloba krĩchabasi iyira kʼãrẽita zeri ẽãta iya nekʼãrẽ aña obʉ kʼarea (Rom. 7:24). Mamina Pablora iya kayirua oda kʼarea jẽda krĩchasi akʉza iyira buru kʼoesi, mawũãsidu iyi ʉ̃rʉ bedʼeabʉrʉdera jarabasi wuabemara apostoleraira iyitrʉ audre edabʉta akʉza iyabʉrʉ audre kayirua osita (1 Cor. 15:9; 1 Tim. 1:15). w24.03 27 parr. 5, 6

Nokʼo Jehoás yizadeba dayirãba kʼawuapanʉ jʉrʉibarata neũdukʼawua biarata, neũdukʼawuara Jeowa kãgapanʉrãta akʉza sobiabikĩrãpanʉrata. Dayirãba neũdukʼawua jʉrʉbʉrʉdera bari jʉrʉ ẽ baibara ẽbẽrarã dayirã dauchabemata. Kĩrãbeidua Jehoásʼra audre warrarabasi iyi neũdukʼawua Jehoiadáira. Bʉa neũdukʼawua jʉrʉbʉrʉde naʉ̃ta widira: «¿Kʼarebapanʉka mʉ̃a Jeowata audre ĩjãmarẽã? ¿Kʼarebapanʉka Jeowaba kãgabʉde bʼaita? ¿Jeowaba kʼãrẽ nebia erbʉ ʉ̃rʉ bedʼeapanʉka? ¿Daizezeba kʼãrẽ zokʼabʉa wawia ũdubipanʉka? ¿Mʉ̃a ũrĩkĩrãbʉtrʉ jara ũrĩbipanʉka, mawũã ẽ bʉrʉ mʉ̃a nei aña obʉrʉdera ũrãgʼa diapanʉka?» (Prov. 27:​5, 6, 17). Bʉ neũdukʼawuaraba Jeowata kãga ẽ bʉrʉ bʉa maʉ̃rãra nesida ẽ, mamina ãya Jeowata kãgapanʉbʉrʉ ãyi kʼawa bara. Naʉ̃ra jipade yibiabayi bʉitara (Prov. 13:20). w23.09 9 parr. 6, 7

Alfa akʉza Omegara griego abesedario, yi letra nããbemara Alfaʼa akʉza yi jõdogoarebʉra Omegaʼa. Naʉ̃neba Jeowaba ũdubibʉ iya nekʼãrẽ ojʉ̃drʉbʉrʉdera maʉ̃ra maobʉta. Jeowaba Adánta akʉza Evaʉ̃me parãside ãyaʼa jarasi: «‹Todamarẽã naʉ̃ drʉa jõma ẽbẽrarãba birayeda akʉza trajamarẽã›» (Gén. 1:28). Jeowaba jaraside iya kʼãrẽta kãgabʉta ẽbẽrarãita akʉza naʉ̃ ẽjũãita, maʉ̃ne iya oita krĩchabʉta ojʉ̃drʉbʉrʉ kĩrãkʼabasi (Alfa). Jeowaba oita krĩchabʉ aripe berabaribʉrʉdera Adán akʉza Eva wũãwũãraba naʉ̃ ẽjũã birabʉdade akʉza ẽjũã kĩrãwãreã babibʉrʉdera, Jeowaba iya oita krĩchabʉta maobʉrʉ kĩrãkʼabayi (Omega). Naʉ̃ drʉadebʉta akʉza bajãnebʉta jõma parãna tẽã Jeowaba nei jarasi mawũã dayirãba ĩjãnamarẽã iya oita jarabʉra aripe oita. Jeowaba ẽbẽrarãita akʉza naʉ̃ ẽjũãita nekʼãrẽ oita krĩchabʉra aripe berabariyi ewari siete jõbodode (Gén. 2:​1-3). w23.11 5 parr. 13, 14

Judiora Babilonianeba Jerusalénʼena jʉ̃ẽira jedeko kimare wãibarabasi. Mamina Jeowaba jarasi ãya ode badu bedʼea zroma ũdubʉra ãĩ bʉeita. Judiora Jeowaʉ̃me kʼẽrẽpapanʉrabara, kʼawuabasi Jerusalénma wãra nebia mejãcha ũduita, mama wãira zarebasimina. Jẽda wãbʉrʉdera kʼawuabasi audre odaibasita Jeowaba zokʼabʉta. Neẽbasi templo Jeowaitara Babilonianera akʉza neẽbasi altar sakripisio oita Jeowaba Moisésʼa ley diada kĩrãkʼa akʉza neẽbasi saserdoterata maʉ̃ sakripisio oita, adewara audre basi ẽbẽrarã daizeze zeri ẽã yiwidʼipanʉta judiora Jeowaʉ̃me kʼẽrẽpabʉraira, adewara Jeowara wawiada ẽ basi akʉza Jeowaba zokʼabʉta. Maʉ̃ kʼarea judiora Jeowa mejãcha kãgabʉra jẽda wãkĩrãbasi, mawũã Jeowaba zokʼabʉde bʼaita. w23.05 14, 15 parr. 3, 4

Dayirãbara nesidapanʉ Daizeze jaure zareata panaita ũnanebema wũãwũãra kĩrãkʼa. ¿Kʼãrẽa? Zare baera naʉ̃ drʉadebemaba mitia obʉ kĩrãkʼa oẽ baita (1 Tes. 4:​3-5, 7, 8). Daizeze jaure zareaba kʼarebayi naʉ̃ drʉadebema kĩrãkʼa krĩcha ẽ baita. Naʉ̃ra drʉadebemarabara akʉ ẽ baera nekʼãrẽra Jeowaba akʉbʉ kĩrãkʼa. Adewara Daizeze jaure zareaba kʼarebaseabʉ ẽbẽra bia bʼaita akʉza aripe oita (Efes. 5:9). ¿Sãwũã jidai Daizeze jaure zareara? Jeowaʼa widibara maʉ̃ta diamarẽã. Jesuba jarasi jaure zareata Jeowaʼa wididara, Jeowaba diayi (Luc. 11:13). Ãba yi jʉrebarima wãbʉrʉdebida Daizeze jaure zarea jidapanʉ (Efes. 5:​19, 20). Daizeze jaure zareaba kʼarebayi dayirã Jeowaba kãgabʉde bamarẽã. w24.03 23, 24 parr. 13-15

¿Jʉ̃ãkʼawuabʉta ũdubita wãebʉka? Widira Jeowa kʼarebamarẽã. Jʉ̃ã kʼawua bʼaira neta jauredebema (Gál. 5:​22, 23). Maʉ̃ kʼarea widibara Jeowaʼa iyi jaure zareata diamarẽã mawũã audre jʉ̃ã kʼawua bʼaita. Dayirãma zera dayi kĩrʉbiseabʉta, Jeowa yiwidʼibʉde widibara audre diamarẽã jʉ̃ã kʼawua bʼaita (Luc. 11:13). Akʉza Jeowaʼa widiseabʉ iya akʉbʉ kĩrãkʼa akʉbimarẽã. Dayi yiwidʼida tẽã zarea oibara jʉ̃ã kʼawuabʉ ũdubita. Dayirãba Jeowaʼa widibʉbʉrʉ jʉ̃ã kʼawua bʼaita akʉza zarea obʉbʉrʉ jʉ̃ã kʼawua bʼaita, mawũãra maʉ̃ nebiara dayirã sode erbayi akʉza oũdubiyi. Akʉza biga bʉ bʉa krĩchamarẽã yizara Daizeze Bedʼeadebema ʉ̃rʉ. Daizeze Bedʼeabara mejãcha jara ũrĩbibʉ Jeowa pʉwʉrʉba sãwũã jʉ̃ã kʼawuabada ʉ̃rʉ. Maʉ̃ra yiza ʉ̃rʉ krĩchabʉrʉde dayirã kʼarebaseabʉ jʉ̃ã kʼawua bʼaita. w23.08 22, 23 parr. 10, 11

Jesubara apostol Pedroʼa kʼawuabisi Jeowaba kʼarebaseabʉta iyira. Jesu jẽda piradrʉda tẽã Pedroʼa akʉza iyi kʼaidupanʉra bea diasi bedata mejãcha (Juan 21:​4-6). Jesuba mawũã odaba Pedroʼa kĩrãbebisi Jeowaba diaita nekʼãrẽ iya nesidabʉra. Pedrobara kĩrãbesibaibara Jesuba naʉ̃ bedʼea jaradata: «Nããra jʉrʉidua Daizeze Nokʼota [ . . . ] mawũãtrʉ maʉ̃ jõma diaya» (Mat. 6:33). Maʉ̃neba ʉ̃ta Pedrobara iyi trajota nããra bʉei kaude nããra bʉebasi Daizeze Nokʼota. Poaga 33de Pentecostés ewaride Pedrobara zowaĩnĩgʉa jaradiasi ẽbẽrarã mejãchaʉʼa, mawũã kʼarebasi mejãchaʉba wãrĩnuta ĩjãnamarẽã (Hech. 2:​14, 37-41). Maʉ̃ ewarideba ʉ̃ta iyara kʼarebasi ẽbẽrarã samaritanoraba akʉza judiora ẽãba Jesu ʉ̃rʉ ĩjãmarẽã (Hech. 8:​14-17; 10:​44-48). Pedrodeba Jeowabara kʼarebasi ẽbẽrarã pʉwʉrʉ awuara awuarakadebemata iyi kongregasionʼena zemarẽã. w23.09 20 parr. 1; 23 parr. 11

Poaga ũme berabarida tẽã babilonioraba Jerusalén ãrĩsidade nokʼo Nabucodonosorʼra mejãcha krĩcha zroma onʉmasi iya nekʼãrẽ parãna zroma kʼãĩmokʼãrãde ũduda kʼarea, nokʼoba jarasi ẽbẽrarã buru biara maʉ̃ne eda chuasi Danielta iyaʼa jaramarẽã kʼãrẽta kʼãĩmokʼãrãsita akʉza kʼãrẽta jarakĩrãbasita (Dan. 2:​3-5). Danielbara nekʼãrẽ mesera jʉrʉibarabasi maʉ̃ jara ũrĩbita, mawũã ẽ bʉrʉ mejãchaʉta beikasi. Aramaʉ̃ta Danielba «widisi nokoʼa ewarita diamarẽã iya kʼãĩmokʼãrãda jara ũrĩbita» (Dan. 2:16). Danielba maʉ̃ bedʼea nokʼoʼa jaraira nesidabasi zowaĩnĩgʉata akʉza ĩjãbʉta ũdubita. Daizeze Bedʼeabara jara ẽ Danielbara nawedara kʼãĩmokʼãrãra jara ũrĩbisita, Danielbara kʼareba widisi Daizezeʼa wididamarẽã maʉ̃ kʼãĩmokʼãrãta jara ũrĩbita (Dan. 2:18). Mawũẽ Jeowaba panʉsi ãyi yiwidʼibadara, Daizeze kʼarebadeba Danielbara jara ũrĩbisi maʉ̃ kʼãĩmokʼãrãra. Mawũã odadeba Danielʼra akʉza iyi neũdukʼawuarãra ẽdrʉsida. w23.08 3 parr. 4

Krĩchara kʼãrẽ nebiata ũduseabʉta jʉ̃ãbaiba. Dayirãba jʉ̃ã kʼawuabʉta ũdubibʉbʉrʉ audre sobiapanʉ akʉza aduʼapanʉ adewara wuabemarabawara ãba bʼaita ũdubʉ. Dayirã kongregasionʼra audre ãba baseabʉ. Dayirãta kĩrʉbisidabʉrʉ akʉza maʉ̃ta dayirãta abarika kĩrʉpanʉ ẽ bʉrʉ kʼarebabʉ aukʼara bedʼea zroma ba ẽ baita (Sal. 37:​8, nota; Prov. 14:29). Jʉ̃ã kʼawuabʉta ũdubipanʉbʉrʉ audre Jeowa kʼawa baseabʉ, akʉza iya obʉ kĩrãkʼa obʉta ũdubiseabʉ. Jʉ̃ã kʼawuabʉ nebiara arigʉ yibia. Zareamina jʉ̃ã kʼawua bʼai erbaira maʉ̃ta oũdubi wãseabʉ Jeowa kʼarebadeba. Dayirãba ẽjũã kĩrãwãreã zeyeda jʉ̃ãbʉ naʉ̃ nebiata: «Jeowa dabʉbara akʉbʉ iyi wawiapanʉrata, iyi kãga jõka jʉ̃ãpanʉra ʉ̃rʉ» (Sal. 33:18). Zarea oidua ewari jõmaʉ̃nẽ jʉ̃ã kʼawuabʉta ũdubidaita. w23.08 22 parr. 7; 25 parr. 16, 17

Santiagoba jarasi naʉ̃ yumakẽrãba ĩjãbʉ abasimina iya obʉba ũdubi ẽ basi ĩjãbʉta (Sant. 2:​1-5, 9). Adewara Santiagoba jara ũrĩbisi yumakẽrã abaʉba ũdubʉta mebẽã aba wua neẽãbʉta, yiko neẽãbʉta, mamina iya kʼãrẽ oẽãta maʉ̃ kʼarebaita. Naʉ̃ yumakẽrãba jarabʉbʉrʉ iya ĩjãbʉta mamina iya obʉdeba ũdubibʉ ĩjã erbʉ ẽãta (Sant. 2:​14-16). Santiagoba jarasi Rahabʼbara iya ĩjãbʉ erbʉta iya nekʼãrẽ obʉdeba (Sant. 2:​25, 26). Iya ũrĩbarisi Jeowaba israelitarãra kʼarebabʉta (Jos. 2:​9-11). Iya ĩjãbʉta ũdubisi iya meraside israelitara ũme miaordabarita, mawũã ãyita beada ẽ marẽã. Maʉ̃ba naʉ̃ yuwẽrã nekayirua omiabasimina, israelita ẽ basimina aripe obʉta jarasida, Abrahán kĩrãkʼa. Rahab yizadeba kʼawuasida dayirãba ĩjãbʉ ũdubira ũdubibarata daya nekʼãrẽ obʉdeba. w23.12 5 parr. 12, 13

Dayirã kristianorabara Daizeze Bedʼeara bari ʉ̃rʉ akʉpanʉ ẽ, awuarabʉrʉ Jeowa jaure zarea kʼarebadeba Daizeze Bedʼeara biʼia akʉpanʉ, mawũã bia kʼawuaita kʼãrẽ ʉ̃rʉ bedʼeabʉta (1 Cor. 2:​9, 10). Maʉ̃ oira bʉara estudiaseabʉ nekʼãrẽ bʉ audre Jeowa kʼawa babibʉ ʉ̃rʉ. Bari jaraita, bʉa kʼawuaseabʉ Jeowaba iyi pʉwʉrʉ nããbema sãwũã kãga ũdubida ʉ̃rʉ akʉza bʉa maʉ̃ne ũduseabʉ Jeowabara bʉsida abarika kãgata. Adewara bʉa akʉseabʉ Jeowaba israelitara kʼãrẽta omarẽã jarasita iyaʼa yiwidʼidamarẽã akʉza sãwũã idi ewade dayirã organizasionbida abarika obʉta Jeowaʼa yiwidʼita. Akʉza jʉrʉseabʉ saʉ̃ra propesiarata Jesu ʉ̃rʉ bedʼeabʉta akʉza iya nama nekʼãrẽ oda ʉ̃rʉ bedʼeabʉta akʉza maʉ̃ra sãwũã aripe berabarisita. Bʉa maʉ̃ra bedʼea ʉ̃rʉ audre kʼawuakĩrãbʉbʉrʉ kʼarebata jʉrʉseabʉ naʉ̃ra kartarane Índice de las publicaciones Watch Tower, mawũã ẽ bʉrʉ Guía de estudio para los testigos de Jehová. Bʉa Daizeze Bedʼeata biʼia estudiabʉbʉrʉ naʉ̃ba kʼarebayi bʉa ĩjãbʉta audre zarea bamarẽã akʉza Daizezeta audre ũdukʼawuamarẽã (Prov. 2:​4, 5). w23.10 18, 19 parr. 3-5

Apostol Pedroba jara ũrĩbisi kʼãrẽ kãgata ũdubibarata, jarasi mejãcha yiya kãgapanaibarata. Yi bersikulode tẽã jara ũrĩbibʉ daya kãgata mejãcha ũdubibʉbʉrʉ naʉ̃ba kʼarebaita mebẽrãba kayirua obʉrʉde kĩrãduaita. Pedroba jarasi mejãcha kãga ũdubibarata, naʉ̃ bedʼea biʼia ũrĩta krĩchadaya naʉ̃ yiza ʉ̃rʉ. Krĩchara mesa aba dauchabʉ ẽãta akʉza maʉ̃ daucha zobe zobekachuta, naʉ̃bara zobea abapai erbʉ ẽ, awuarabʉrʉ bio erbʉ akʉza maʉ̃ daucha dauchabʉ ẽ. Mawũẽra bʉa naʉ̃ mitia mẽrãira wuata jira edayi, mõbe maʉ̃ wuara ewarayi mawũã maʉ̃ mitia anaita. Mamina maʉ̃ wuabara bari zobea abapai ana ẽ bayi, awuarabʉrʉ zobea jõma anañi. Abarika dayirãba kãgata mejãcha erbʉbʉrʉ mebẽrãba kayirua obʉrʉdera bari ãya kayirua aba obʉrʉtrʉ kĩrãdua ẽ bayi, awuarabʉrʉ ãya kayirua mejãcha obʉrʉsida kĩrãduayi. Mebẽrãba dayirã ʉ̃rʉ kayirua obʉrʉdera nesidadayi dayirã kãgata mejãcha zarea erpanaita, mawũã kĩrãduaita ãya kayirua odata, naʉ̃ra edaʉde zareabʉmina (Col. 3:13). Dayirãba wuabemaba kayirua obʉrʉta kĩrãduapanʉbʉrʉ, ũdubidayi dayirãba kãga erbʉra mejãcha zareabʉta akʉza Jeowaba bia akʉyi. w23.11 11, 12 parr. 13-15

Josías 26 poagabaside Daizeze templota ara ojʉ̃drʉsi, maʉ̃ne ũdusi Jeowaba Moisésʼa Ley diadata, nokʼoba ũrĩside maʉ̃ Leyba kʼãrẽ jarabʉta, zarea osi maʉ̃ta wãña ojʉ̃drʉita (2 Crón. 34:​14, 19-21). ¿Bʉara Daizeze Bedʼeara ewariza lekĩrãbʉka? Bʉa maʉ̃ta ojʉ̃drʉsibʉrʉ, ¿sãwũã wã bʉra?, ¿akʉbʉka bʉ kʼãrẽ testoba kʼarebaseabʉta? Josías 39 poagabaside osi nekʼãrẽ iyi bebʉ aduabita. Aukʼara ĩjãsi iyi ʉ̃rʉ Jeowa ʉ̃rʉ ĩjãi kaude (2 Crón. 35:​20-25). Naʉ̃neba kʼawuapanʉ dayirã sõbe poagabʉ krĩcha ẽã akʉza Daizeze Bedʼea kʼawuabʉ sõbe poaga ba krĩcha ẽã, zarea odaibara Jeowa kʼawa bʼaita. Maʉ̃ oira Daizezeʼa yiwidʼibara, Daizeze Bedʼeata akʉibara akʉza mebẽrã ũrãgʼa widibara. Mawũã opanʉbʉrʉ kayirua mejãcha oẽ bayi akʉza sobiapanañi (Sant. 1:25). w23.09 12 parr. 15, 16

Daizeze Bedʼeade mejãcha ũdubibʉ yiza wẽrãra biaraba Jeowa kãgabʉ ũdubidarata akʉza Jeowaba kãgabʉde badarata. Ãyira ãyi kakua bia zokʼa kʼawuapanʉ akʉza kʼãrẽ jõma daucha opanʉ (1 Tim. 3:11). Adewara naʉ̃ra mebẽrã wẽrãra warrarapanʉrabara yiza biata ũduseapanʉ ãyi kongregasione, namara bʉ baera mebẽrã wẽrãra kristiana biarata. Krĩchara bʉ kongregasione saʉ̃ mebẽãba yiza biata ũdubibʉta, mawũã maʉ̃ne kĩrãkʼa oita. Yuwẽrãba edabʉta ũdubibʉbʉrʉ, Jeowaʉ̃me biabayi akʉza wuabemaraʉ̃me. Bari jaraita, yuwẽrã abaʉba Jeowa kãgabʉbara edabʉta ũdubi kʼãrãpe, ũrĩñi 1 Corintios 11:3ba jarabʉta, namara jara ũrĩbibʉ Jeowaba kʼaita kongregasion buru babisita akʉza mebẽrã buru babisita. w23.12 18, 19 parr. 3-5

Jeowabara kãgabʉ yumakẽrãba diamarẽã yuwẽrãba nesidabʉta akʉza iyi neũdukʼawua bia bamarẽã, adewara kʼarebamarẽã audre Jeowa kʼawa bʼaita. Yumakẽrãbara krĩcha biata erbaibara, yuwẽrãra wawiata ũdubibara akʉza iyi ʉ̃rʉ ĩjãbʉta ũdubibara, iya maʉ̃ra nebia erbidade, maʉ̃ba kʼarebayi iyi juwa jidabʉrʉdera kima bia bʼaita. Bʉ juwa jidabʉrʉdera zeze baseabʉ, maʉ̃ kʼarea Jeowadebara, ¿kʼãrẽta kʼawuaseapanʉ zeze bʼai ʉ̃rʉra? (Efes. 6:4). Jeowabara yi warra Jesuara pera ẽ jarasi iyira mejãcha kãgabʉta akʉza bia akʉbʉta (Mat. 3:17). Bʉta zeze ba zera jarada bʉ wũãwũã kʼãrẽaba kãgabʉta ewariza, mõbe ibia bedʼeara iyi ʉ̃rʉ iya kʼãrẽ obʉ kʼarea. Yibariraba Jeowaba obʉ kĩrãkʼa opanʉbʉrʉ kʼarebabʉ yi wũãwũãrata waribʉrʉde kristiano bia bamarẽã. Bʉra zeze bia baseabʉ bʉa bʉ mebẽrãta bia akʉbʉbʉrʉ akʉza mebẽrã kongregasionebemarata, adewara kãgata ũdubibʉbʉrʉ ãyaʼa, adewara ũrĩbʉbʉrʉ ãya jarabʉta (Juan 15:9). w23.12 28, 29 parr. 17, 18

Dayirã Daizeze ode kʼẽrẽpapanʉrabida ẽbẽrarã naʉ̃ drʉadebema kĩrãkʼa ũdupanʉ iyabaʉ bedʼea zromarata, adewara dayirãra pẽwãpanʉ akʉza jʉrade Daizeze odepanʉ baera. Jeowaba dayirã maʉ̃ra bedʼea zromaneba jipa ẽdrʉbi ẽ mina iyara jarabʉ kʼarebaita (Is. 41:10). Iyi kʼarebadeba dayirãra sobiapanaseabʉ akʉza nekʼãrẽ bia jida kʼawuaseapanʉ, adewara iyiare kʼẽrẽpapanaseabʉ bedʼea zroma mejãcha ũdupanʉmina. Jeowaba jarabʉ dayirãʼa diaita Daizeze neneẽãta (Filip. 4:​6, 7). Dayirãta Jeowaʉ̃me neũdukʼawua biabʉrʉ aduʼapanañi akʉza neneẽã, naʉ̃ neneẽãra jõmaʉ̃ra krĩchaira ʉ̃tabʉ, naʉ̃ra jipade yibia. ¿Bʉra kʼãwũã berabaribarika? ¿Bʉ Daizezeʼa mejãcha yiwidʼida tẽã aduʼa sentibarika? Bʉra mawũã sentibari Jeowaba kʼarebasi baera aduʼa sentimarẽã. w24.01 20 parr. 2; 21 parr. 4

Jeowa kãgapanʉrabara soiduba ibia bedʼeakĩrãpanʉ Jeowa ʉ̃rʉ. Davidbara kʼawuabasi Jeowa trʉ̃ ʉ̃rʉ ibia bedʼeaira iyababʉta Jeowa ʉ̃rʉ ibia bedʼeaiʉ̃mera. Dayirãba Jeowa trʉ̃ ʉ̃rʉ krĩchabʉrʉdera krĩchapanʉ iyi ẽbẽra bia ʉ̃rʉ akʉza iya nekʼãrẽ parãna ʉ̃rʉ. Davidbara Daizeze trʉ̃ra neneẽã babikĩrãbasi akʉza maʉ̃ ʉ̃rʉ ibia bedʼeakĩrãbasi, iyara maʉ̃ra soiduba okĩrãbasi. Lebitarabida Jeowa trʉ̃ ʉ̃rʉ ibia bedʼeabisida, ãyara edabʉta ũdubisida jarasidade Jeowa trʉ̃ kʼãrẽaba yibiara majarauda ẽãta (Neh. 9:5). Ãya Jeowa trʉ̃ ʉ̃rʉ mawũã ibia bedʼeadara soiduba osida baera, Jeowa sota sobiabisida. w24.02 9 parr. 6

Jeowabara dayirãra mitia akʉ ẽ daya krĩchadata aripe oẽ kʼareara (2 Cor. 8:12). Bʉa krĩchabʉta aripe obi ẽ bʉrʉ nekʼãrẽ berabaribʉrʉba, maʉ̃neba kʼawuara. Jẽda kĩrãbera bʉya nekʼãrẽ oda ʉ̃rʉ. Daizeze Bedʼeaba jarabʉ: «Daizezera jipabʉ baera maraba opanʉra kĩrãdua ẽ» (Heb. 6:10). Mawũẽra bʉabida kĩrãdua ẽ baibara bʉa ozebʉrʉra. Bari jaraita, sãwũã audre Jeowa neũdukʼawua babʉrʉta, kʼãrẽta obʉta wuabemara iyi ʉ̃rʉ audre bedʼeaita akʉza bʉ buru koeda ʉ̃rʉ. Nãã bʉa nekʼãrẽ krĩchada aripe ozebʉrʉ kĩrãkʼa, naʉ̃neba ʉ̃ta bʉa oita krĩchabʉsida aripe oyi Jeowa kʼarebadeba bʉa nekʼãrẽ oita krĩchadara aripe oyi. Dayirãba nekʼãrẽ oita krĩchabʉrʉdera, jẽda kĩrãbedaibara Jeowaba sãwũã kʼareba zebʉrʉta dayirãba nãã oita krĩchadara, mawũã obʉrʉdera dayirãra mejãcha sobiabayi (2 Cor. 4:7). Mawũã obʉbʉrʉ Jeowaba bʉaʼa nebiata mejãcha diayi (Gál. 6:9). w23.05 31 parr. 16-18

Jeowabara jʉrʉbʉ iyi ode kʼẽrẽpapanʉra sãwũã ũdubita iya kãgata akʉza bia akʉbʉta ãya nekʼãrẽ obʉra. Daizeze Bedʼeade jara ũrĩbibʉ Jeowaba yi warra jarada ũme jarasita iyara Jesura kãgata akʉza bia akʉbʉta (Mat. 3:17; 17:5). ¿Kʼawuakĩrãbʉka Jeowaba bʉa sãwũã jarabʉta iyara bia akʉbʉta nekʼãrẽ bʉa obʉra? Jeowaba dayirã nemi jĩgʉa jara ẽ maʉ̃ra, mamina iyira dayirã bedʼeabʉ iyi Bedʼeadeba. Dayirãba Daizeze Bedʼeade akʉbʉrʉde Jesuba iyi kʼaidubemara kʼãrẽ bedʼea bia jaradata, dayima maʉ̃ bedʼeara Jeowaba dayirã jarabʉ kĩrãkʼabʉ. Jesubara yi Zezeba nekʼãrẽ bia erbʉta abarika oũdubisi. Maʉ̃ba dayirãba Daizeze Bedʼeade akʉbʉrʉde, Jesuba sãwũã iyi kʼaidubemara kʼẽrẽpapanʉra kayirua omiabasimina jarasita ãyira bia akʉbʉta, naʉ̃ba dayirã krĩchabibʉ maʉ̃ bedʼea biara Jeowaba dayirã jarabʉta (Juan 15:​9, 15). Dayirãba bedʼea zroma ũdubʉrʉdera krĩchada ẽ bʼaibaraJeowaba dayirãra bia akʉ ẽãta awuarabʉrʉ bedʼea zroma ũdubʉba kʼarebabʉ dayirãba Jeowaʼa ũdubita iyita kʼãrẽaba kãgabʉta akʉza kʼãrẽaba ĩjãpanʉta iyi ʉ̃rʉ (Sant. 1:12). w24.03 28 parr. 10, 11