Septiembre

Daizezeba Jesuʼa zareata diasi bedʼea zroma idi ũdupanʉta ara omarẽã. Jesuba miõba okata odadeba, ũdubisi bedʼea zromara ara oseabʉta daya obe ẽãta. Bari jaraita, zarea barabʉ ẽdrʉbita nemitiadeba, maʉ̃ba kayabibʉ baera akʉza beibibʉ baera (Mat. 9:​1-6; Rom. 5:​12, 18, 19). Jesuba miõba oka odaba ũdubisi iya bebikʉaseabʉ kayara jõma akʉza beidarãra piradrʉbikʉaseabʉ (Mat. 4:23; Juan 11:​43, 44). Akʉza zarea barabʉ taʉbita nãgʉ zromata, adewara ãĩ jʉretaseabʉ angel kayiruara ẽbẽrarãneba (Mar. 4:​37-39; Luc. 8:2). Kʼawuabʉrʉde Jeowaba Jesuʼa mejãcha zarea diasita maʉ̃ nebia oita dayirãra aduʼapanʉ.Dayirãbara wãrĩnu ĩjãseabʉ Daizezeba nebia diaya adara Daizeze Nokʼodeba wãrĩnu weita. Jesu nama egoroeda zeside, iya miõba oka odaba ũdubisi kʼãrẽta oita Daizeze Nokʼo zokʼa jʉ̃drʉbʉrʉdera. w23.04 3 parr. 5-7

Bʉ kongregasione mebẽrãta mejãchabʉbʉrʉ akʉza maʉ̃ba edaude krĩchabaribaibara bʉara komentario diada ẽãta. Mawũãbʉrʉ bʉara krĩchaseabʉ ãba yi jʉrebari eda wãbʉrʉdera komentario dia ẽ baita, mawũãsidu krĩcharãra komentario diabʉ idubʉita. Bʉ estudiabʉrʉde bʉa mejãcha jʉrʉseabʉ komentario jaraita, bʉ nãã juwa wuabʉrʉde bʉaʼa komentario diada ẽ bʉrʉ, ãba jʉre barabʉ jõñiena bʉa komentario bio diaseabʉ. Bʉa karta Jarakabʉ estudiabʉrʉdera akʉra sãwũã parrapo aba abaka sãwũã bedʼea abarikabʉta, bʉa mawũã obʉbʉrʉ audre jaraseabʉ maʉ̃ artikulodebemata. Adewara mawũã estudiabʉbʉrʉ audre jara ũrĩbiseabʉ maʉ̃ artikulode yi bedʼea audre zareabʉta. ¿Kʼãrẽa? Mawũã zareabʉ baera mejãchaʉta komentario diada ẽ bayi, mamina, ¿kʼãrẽta berabariseabʉ mawũãsidu bʉaʼa komentario diada ẽ bʉrʉ? Bʉra bedʼeaseabʉ yi Jarakabʉ jaradiabʉa, bʉaʼa diamarẽã bʉa komentario diakĩrãbʉta. w23.04 21, 22 parr. 9, 10

Joséba Jeowaba jarabʉ kĩrãkʼa obasi baera, maʉ̃ba iyira kima biabasi. Jeowabara jarama ũbea jarasi Joséʼa yi mebẽrã sãwũã akʉi ʉ̃rʉ. Maʉ̃ra iya jõma aripe osi, iyibada awuara bʼaibasimina (Mat. 1:20; 2:​13-15, 19-21). Josébara Jeowa kʼarebadeba Maríata kʼarebasi akʉza iya nesidabʉta diabasi. Krĩchaidua naʉ̃ta, sãwũã Maríaba kãgata akʉza wawiata ũdubisi Joséba nebia obadadeba. Yumakẽrãra juwa jidapanʉra marabara Joséde kĩrãkʼa oseabʉ, Daizeze Bedʼeade eda akʉpanʉne mara mebẽrã sãwũã akʉi ʉ̃rʉ. Naʉ̃ ũrãgʼata obʉbʉrʉ akʉza bʉa nekʼãrẽ awuara oimina, mawũãra marara yi kãgapanañi akʉza audre ãbapanañi. Mebẽãba Vanuatura iyi juwa jidadara poaga 20 audre ba, iya jarabʉ: «Mʉ̃ kimaba obʉde akʉza jʉrʉbʉde Jeowa kʼarebata, mʉ̃ara audre wawiata ũdubibʉ akʉza kãgata. Mʉ̃a kʼawuabʉ baera iya kʼãrẽ jidabʉra bia jidaita, Jeowaba kãgabʉ kĩrãkʼa». w23.05 21 parr. 5

Judiora Jerusalénʼena jẽda zebʉrʉra Jeowa pʉwʉrʉ bʼai baera, neneẽã baibarabasi (Deut. 7:6). Maʉ̃ba israelitara Babilonianeba wãnara, ãya nãã obadara jipa idubʉibarabasi Jeowaba kãgabʉde bʼaita. Judiora mejãchaʉta tosida Babiloniane, maʉ̃ba babiloniora kĩrãkʼa krĩchapanasi akʉza opanasi ãya obada kĩrãkʼa. Israelitarata Jerusalénʼena jʉ̃ẽnata poaga bio berabarida tẽã, gobernador Nehemíasba ũdusi judio wũãwũãrabara kʼawua ẽ basita ãyi bedʼeara mama tosidamina (Deut. 6:​6, 7; Neh. 13:​23, 24). ¿Warrarabara sãwũã kãgaibasi Jeowara bedʼeabe ẽ basibʉrʉ ebreo bedʼeade akʉza Daizeze Bedʼeara maʉ̃ bedʼeade bʉchuasibʉrʉ? (Esd. 10:​3, 44). Mawũẽra israelitarabara jipa awuara odaibarabasi, mamina ãyitara zare ẽ baibasi maʉ̃ta Israelde osidabʉrʉ, mama wiña wiñane Jeowaba kãgabʉde owãnaibasi baera (Neh. 8:​8, 9). w23.05 15 parr. 6, 7

Dayirãba okĩrãbʉbʉrʉ dayirãba krĩchadata akʉza zarea obʉbʉrʉ maʉ̃ta berabarimarẽã, edaʉde berabariseabʉ daya jʉ̃ã ẽ badata, maʉ̃ba jãrĩseabʉ dayirã ewarita dayirãba oita krĩchabadata (Ecl. 9:11). Bari jaraita dayirãba ũduseabʉ bedʼea zroma dayi zarea jãrĩseabʉta akʉza dayi sopʉabiseabʉta (Prov. 24:10). Nekayirua omia baera oseapanʉ daya krĩcha ẽ badata oita (Rom. 7:23). Mawũã ẽ bʉrʉ mapaebʉba (Mat. 26:43). ¿Kʼãrẽba kʼarebaseabʉ maʉ̃ bedʼea zroma ara oita? Kĩrãbera nekʼãrẽ baduba iduaribi ẽ bʉrʉ bʉa krĩchada oita, maʉ̃ba jarakĩrãkʉ ẽ bʉa oita krĩchabadara idubʉita. Daizeze Bedʼeaba jarabʉ dayara badua ũduseabʉta bedʼea zromara akʉza jarabʉ dayirãbara jẽda ojʉ̃drʉseabʉta. Zareabʉbʉrʉ bʉa oita krĩchabadata mawũãsidu obʉbʉrʉ, ũdubiyi Jeowa kãgabʉta. Jeowara mejãcha sobiabʉ bʉta zarea obʉ baera bʉa oita krĩchabadata, aripe oita. w23.05 30 parr. 14, 15

Yi nãã edebari bʼaira jipade yibia, naʉ̃ba kʼarebabʉ baera wuabemaraʉ̃me bia bʼaita akʉza bʉ platasida bia zokʼa kʼawuaita, mawũã ewarade gasta ẽ baita (Filip. 4:​11-13). Bʉta Daizezeita ewari jõmaʉ̃nẽ trajakĩrãbʉbʉrʉ yi nãã edebari 30 ora diabarita ora, naʉ̃ba kʼarebayi tẽã yi nãã edebari 50 ora diabari bʼaita. Bʉta yi nãã edebaribʉrʉ, naʉ̃ba kʼarebayi Jeowaita audre trajaita, bari jaraita Daizeze de parãbʉde kʼarebaseabʉ, mawũã ẽ bʉrʉ Betelde trajaseabʉ. Mebẽrã kongregasionebemarabara nekʼãrẽ oibara mawũã zõrãrã kongregasionebema bʼaita. Daizeze Bedʼeaba jarabʉ mebẽrãba maʉ̃ oita krĩchapanʉbʉrʉ maʉ̃ra yibiata (1 Tim. 3:1). Nããra, zõrãrã kʼarebabari bʼaibara, zõrãrãra kʼarebabarirabara mejãcha kʼarebapanʉ zõrãrãta. Zõrãrãta akʉza zõrãrã kʼarebabarirãra, mebẽrãita trajapanʉ akʉza Daizeze Bedʼea jaradia wãpanʉ mebẽrãbawara. w23.12 28 parr. 14-16

Nokʼo Josíasbara 16 poagabʉde ojʉ̃drʉsi Jeowaba zokʼabʉra, mamina iyita naʉ̃ oira zarebasi iyira waidide warrarabasi baera. Maʉ̃ ewaridera ẽbẽra mejãchaʉba daizeze zeri ẽã yiwidʼipanasi. Maʉ̃ kʼarea Josíasbara zowaĩnĩgʉabʉta ũdubibarabasi Jeoware bʼaita akʉza ẽbẽrarã jaraita idubʉdamarẽã daizeze zeri ẽã yiwidʼibʉta. Iya maʉ̃ra oũdubisi iyi 20 poaga bʼai nãã daizeze zeri ẽãra jõbi jʉ̃drʉside (2 Crón. 34:​1, 2). Bʉ warraramina Josíasde kĩrãkʼa kʼawuaseabʉ Jeowa ʉ̃rʉ akʉza iya nebia erbʉ ʉ̃rʉ. Bʉa maʉ̃ta obʉbʉrʉ naʉ̃ba kʼarebayi bʉ bebʉta Jeowaʼa diamarẽã, ¿bʉ bebʉ Jeowaʼa diaibara sãwũã kʼarebabʉ? Luke poaga 14bʉde buru kʼoedaba jarabʉ: «Naʉ̃neba ʉ̃ta zarea oyi Jeowaba jarabʉta nããra bʉeita akʉza zarea oyi iyita sobiabita» (Mar. 12:30). Kʼãrẽ nebia bʼai bʉabida abarika ora. w23.09 11 parr. 12, 13

Apostol Pabloba maʉ̃ karta kristianora Tesalónicadebema bʉdara, mamabema kongregasionʼra poaga aba ba ẽ basi wabida, maʉ̃ kʼarea zõrãrã mamabema kongregasion yi nãã edebaribara, nekʼãrẽ mejãcha kʼawua ẽ basi baera nemitiata osibaibara, mawũãsidu maʉ̃ra mebẽrã wawiata ũdubibarabasi. Zʉbʉria zroma ewariza kʼãwũã arakʼaita wã kʼarea, dayirãbara audre ũrĩbaibara zõrãrã bedʼeara nãã ũrĩbadaira. Zʉbʉria zroma ewari zebʉrʉdera sukursalba, sede mundialʼʉ̃meba nãã zokʼabada kĩrãkʼa neẽbayi dayirãʼa kʼãrẽ omarẽãra jarabʉra, maʉ̃ba kʼãwũãena yibia dayirãba wawia ũdubita akʉza kãgata zõrãrã. Kʼãrẽ berabarimina bia krĩchabaibara akʉza akʉ ẽ baibara maʉ̃ra mebẽrãba nekayirua obʉta, awuarabʉrʉ krĩchara sãwũã Jeowaba Jesukristodeba jaradiabʉta maʉ̃ra mebẽrã. Adewara Gorogorora buru kaskoba kʼarebabʉ kĩrãkʼa, abarika kʼarebabʉ dayirãsida nebia jʉ̃ã bʼaiba bia krĩchaita. Dayirãba nebia jʉ̃ãbʉta wãrĩnu ĩjãpanʉbʉrʉ, ũdupanʉ nekʼãrẽ naʉ̃ drʉade diabʉra zeri ẽãta (Filip. 3:8). Nebia jʉ̃ã baiba karebabʉ aduʼa baita akʉza zarea bʼaita. w23.06 11, 12 parr. 11, 12

Jari ẽbẽra yuwẽrã bia krĩchabʉ ẽãbʉ bedʼea ũrĩbʉra, maʉ̃bara kʼawua jidaibara: ¿Ĩjãika naʉ̃ ẽbẽra wẽrãba trʉ̃bʉta mawũã ẽ bʉrʉ ĩjã ẽ baika? Bʉ kʼãrẽa dayi kakua bia zokʼaibarata. Yuwẽrã bia krĩchabʉ ẽãbara naʉ̃ta jarabʉ: «Bania zrʉgadapeadara kũabʉ» (Prov. 9:17). ¿Kʼãrẽta jarakĩrãbʉ bania zrʉgadapeadabara? Daizeze Bedʼeabara jarabʉ juwa jidapanʉrata ãba kʼãĩbʉta, maʉ̃ra jʉ̃wʉrʉabʉde bania kʉrãza dobʉ kĩrãkʼabʉta (Prov. 5:​15-18). Juwa jidapanʉrata ãba yi erkʼãĩpanʉnera mejãchade sobiapanʉ, mamina kʼãrẽaba awuarabʉ bania zrʉgadapeadara, maʉ̃ba jarakĩrãbʉ juwa jidapanʉ ẽãta ãba yi erkʼãĩpanʉta. Maʉ̃ra miõba kʼawua ẽ nãã obʉ, abarika nezrʉgamiaba obʉ kĩrãkʼa. Bania zrʉgadara kũabʉ kĩrãkʼabʉ, yi nemitia obʉba krĩchabʉbʉrʉ miõba kʼawua ẽãta ãyi nemitia obʉra akʉza maʉ̃ba neida berabari ẽãta, mamina ãyikʉza sewabʉ Jeowaba jõma akʉbʉ baera. Jeowaba dayirãta bia akʉ ẽãnera daya obʉ kʼarea, bania soata dobʉ kĩrãkʼa bayi (1 Cor. 6:​9, 10). w23.06 22 parr. 7-9

Bʉta soiduba yiwidʼinʉmʉ ẽ bʉrʉ, Daizeze Bedʼea jaradia wãbʉrʉde sobiade obʉ ẽ bʉrʉ, krĩcharãra bʉra Daizeze jaure zareaba kʼareba ẽãta, dayirãra kayirua omia baera edaʉde dayirã sãwũã sentibʉra awuara baseabʉ. Bʉa Jeowaba jarabʉta nãã obada kĩrãkʼa soiduba obʉ ẽ bʉrʉ, krĩchara Pablo yiza ʉ̃rʉ. Iyara Jesude kĩrãkʼa soiduba okĩrãbasi, mamina kʼawuabasi edaʉde mawũã soiduba okĩrã ba ẽ bai basita Pablobara zarea osi iyaʼa omarẽã zokʼadapeadara jõma aribaeita, krĩcha ẽã iyi sãwũã sentibʉta. Edaʉde, dayirãbara Jeowaba nekʼãrẽ omarẽã zokʼabʉra oamakʉ, mamina maʉ̃nera zarea odaibara maʉ̃ aripe oita. Bʉta zarea obʉbʉrʉ ewariza Jeowaba zokʼabʉta oita, mawũãra bʉara wiña wiñane okĩrã wãñi maʉ̃ra (1 Cor. 9:16). w24.03 11, 12 parr. 12, 13

Dayirãbara mebẽrã kãga ũdubiseabʉ iduaribipanʉne ãyisida dayi neũdukʼawua bamarẽã (2 Cor. 6:​11-13). Dayirã kongregasionerabʉ mebẽrã pʉwʉrʉ awuara awuarakadebemata akʉza awuara krĩchapanʉta. Dayirãba kãga audre zarea erbaira akʉdaibara mebẽrãba ãyi sode kʼãrẽ nebia erbʉta. Wuabemara kãga ũdubibara biode kʼarebayi dayirãra zʉbʉria zroma zebʉrʉde. Maʉ̃ zʉbʉria zroma jʉ̃drʉbʉrʉdera, ¿sama ũdui kʼarebara? Krĩchara Jeowaba kʼãrẽ jaradata iyi pʉwʉrʉʼa Babilonia jõbidaibaside: «Wãidua mʉ̃ pʉwʉrʉra, mõbe eda wãidua mayi deda aramaʉ̃ta puertara serraidua. Mama eda mĩrʉ totoidua, naʉ̃ jõma berabariyeda» (Is. 26:20). Naʉ̃ bedʼeara dayirãita yibiabayi zʉbʉria zroma jʉ̃drʉbʉrʉde. w23.07 6, 7 parr. 14-16

Dayikʉza widibara: «¿Wuabemaraba mʉ̃ ʉ̃rʉ krĩchabʉde krĩchabʉka mʉ̃ya krĩchabʉta oẽãta akʉza wuabemara ʉ̃rʉ krĩchabʉta, adewara kĩrʉ ẽãta? Mawũã ẽ bʉrʉ ¿mʉ̃ra akʉpanʉka mʉ̃a kãgabʉta jõma aripe omarẽã, adewara ẽbẽra so zareata akʉza mʉ̃yimabʉta obʉta? Mawũã ẽ bʉrʉ ¿ũrĩbʉka ãya jarabʉra akʉza ãya widibʉ omarẽã bigabʉrʉ obʉka?». Dayirãba daya krĩchabʉta oẽãne ũdubibʉ kʼãrẽaba Jeowaba akʉza Jesuba obada kĩrãkʼa obʉta. Daya krĩchabʉta oẽ bʉrʉ nekʼãrẽ awuara odayi dayi bebʉ awuarabidade. Dayi bebʉ awuarabidaba bedʼea zromata ũduseabʉ. Dayirãra kayaseabʉ, plata neẽãseabʉ mawũã ẽ bʉrʉ politikoraba obʉ kʼarea bedʼea zromata ũduseabʉ (Ecl. 9:11). Akʉza dayirã Jeowaita awuru trajota omarẽã jarabʉdade, maʉ̃ kʼarea mejãcha krĩcha zroma oseabʉ. Dayirãba naʉ̃ra nekʼãrẽ kimareta obʉbʉrʉ bia wãseabʉ: (aba) wãrĩnu ĩjãra bʉ bebʉra awuarabidata, (ũme) krĩchara bʉa atia kʼãrẽ oita, (ũbea) krĩchara bʉa kʼãrẽ nebia erbʉta bʉ bebʉde, (kimare) wuabemara kʼarea nebiata ora. w23.07 21, 22 parr. 7, 8

Propeta Danielʼra warrarabasi iyi drʉadeba jidada kʼãrãpe jĩgara edesidade gorogorora Babilonianebemaraba, iyi ededarãra kĩrãmigasida Daniel kʼarea, ũdusida baera Danielbara nekʼãrẽ aña oba ẽ basita, iyira ẽbẽra biabasita akʉza ũdusida Danielʼra kʼẽrẽpabasita yi mebẽrãneba (1 Sam. 16:7). Maʉ̃ kʼarea babiloniorabara nekʼãrẽ jaradiasida nokʼo kʼarebabari bamarẽã (Dan. 1:​3, 4, 6). Jeowaba kãgabasi Danielʼra, iyira ẽbẽra bia bʼaita jidasi baera. Jeowaba jaraside Danielʼra kʼẽrẽpabasita Noé kĩrãkʼa akʉza Job kĩrãkʼa maʉ̃nera iyira 20 poagabasi. Jeowaba jarasi Danielʼra kʼẽrẽpabasita Noé kĩrãkʼa akʉza Job kĩrãkʼa, naʉ̃rãra poaga biobayeda Jeowaita kʼẽrẽpa trajasida (Gén. 5:32; 6:​9, 10; Job 42:​16, 17; Eze. 14:14). Mawũẽ Jeowabara Danielʼra kãgabasi iyi zokʼaibʉedara (Dan. 10:​11, 19). w23.08 2 parr. 1, 2

Bʉa nei edakĩrãbʉrʉde, maʉ̃ edai nãã, bʉyi dabʉaraba ũdukĩrãbʉ wãrĩnu bigachu kʼawuaita akʉza bʉa kãgadebʉ kʼawuaita. Dayirãbida Daizeze Bedʼea akʉbʉrʉdera maʉ̃ kĩrãkʼa oibara. Dayirãba Daizeze Bedʼeata mesera lepanʉbʉrʉ nekʼãrẽ mejãcha kʼawuada ẽ bayi (Heb. 5:12). Awuarabʉrʉ bʉara Daizeze Bedʼeara biʼia akʉibara mawũã kʼawuaita kʼãrẽta jarabʉta, abarika bʉa nei edai kĩrãkʼa, bʉa nãã biʼia akʉbʉ sãwũãbʉta. Dayirãba Daizeze Bedʼea estudiabʉdera jʉrʉibara awuru testora dayirãba lenʉmʉme abarika bedʼeabʉta. Zarea ora kʼawuaita, bʉa ĩjãbʉ ʉ̃rʉ akʉza kʼawuaita kʼãrẽa ĩjãbʉta bʉa maʉ̃ra. Dayirãba Daizeze Bedʼeaba kʼãrẽ jarabʉ biʼia ũrĩra, bari ʉ̃rʉ akʉ ẽ baibara, awuarabʉrʉ biʼia estudiaibara maʉ̃ ʉ̃rʉ. Pabloba jarasi kristianora Daizeze Bedʼeata biʼia estudiadamarẽã, iya jarasi: «Biʼia kʼawuadamarẽã yi joʉbʉata, yi drazoata, yi ʉ̃tʉata akʉza yi eiduata». Ãya maʉ̃ta obasibʉrʉ zarea ĩjãseabasi (Efes. 3:​14-19). Dayirãbida abarika oibara. w23.10 18 parr. 1-3

Daizeze Bedʼeadera mejãchabʉ eda sãwũã maʉ̃ra ẽbẽrarãba jʉ̃ã kʼawuabada ʉ̃rʉ. Yibia maʉ̃ra yiza ʉ̃rʉ bʉa estudiamarẽã. Bari jaradaita, Davidʼra warrarabasi Jeowaba jidaside Israel pʉwʉrʉ nokʼo bamarẽã, mamina iyara poaga bio jʉ̃ãibarabasi maʉ̃ zokʼa zeira. Simeónta Anaʉ̃mera Jeowa ode kʼẽrẽpapanasi ãya jʉ̃ãpanʉena Dayirã ẽdrʉbibari zeyeda (Luc. 2:​25, 36-38). Bʉa maʉ̃ra yiza ʉ̃rʉ lebʉeda bʉyikʉza widira: «¿Kʼãrẽba kʼarebasi maʉ̃ ẽbẽraba jʉ̃ã kʼawuabʉ ũdubita? ¿Kʼãrẽ nebiata ũdusi mawũã jʉ̃ã kʼawuabʉ ũdubibʉba? ¿Sãwũã abarika oseabʉ?». Akʉza bʉara kʼawuaseabʉ ẽbẽrarã jʉ̃ã kʼawuabʉta ũdubida ẽãra ʉ̃rʉ (1 Sam. 13:​8-14). Bʉyikʉza widiseabʉ: «¿Kʼãrẽa ãyara jʉ̃ã kʼawuabʉta ũdubi ẽ basi? ¿Maʉ̃ba kʼãrẽ bedʼea zromata ũdusi?». w23.08 25 parr. 15.

Apostol Pedrora kʼẽrẽpabasi iyi mawũã nemitia obʉ kʼarea idubʉ ẽ basi Jesu kʼawabʉta. Pedrobara kʼẽrẽpabʉta ũdubisi Jesuba jara ũrĩbiside bedʼea ãya ũrĩ ẽãta (Juan 6:68). Ʉ̃kʉrʉbara maʉ̃ bedʼeata bia ũrĩ ẽ basi baera idubʉsida Jesu odebʉta, mamina Pedrobara mawũã oẽ basi, iya kʼawuabasi baera Jesuba jarabʉba ewari jõmaʉ̃nẽ babiseabʉta. Jesúsbara kʼawuabasi iyi kʼaidubemaraba akʉza Pedroba diamasi iyi bei nãã iyira idubʉdaibasita, mawũãsidu Jesubara kʼawuabasi Pedrora jẽda iyiʉ̃me kʼẽrẽpa bʼaita (Luc. 22:​31, 32). Jesubara kʼawuabasi ẽbẽrarãbara nebiata okĩrãbʉta, mamina ãyi kakuaba idubi ẽ basita (Mar. 14:38). Maʉ̃ kʼarea Pedroba jaraside iyi ũdukata, Jesubara krĩcha ẽ basi Pedrora zeri ẽãta, Jesu jẽda piradrʉda tẽã yi ũdubisi Pedroʼa, maʉ̃nera Pedrora dobabasibaibara (Mar. 16:7; Luc. 24:34; 1 Cor. 15:5). Maʉ̃ba mejãcha so zarea diasibaibara Pedroʼa. w23.09 22 parr. 9, 10

Daizezeba kĩrãduabʉ ẽbẽrarã iyi ʉ̃rʉ ĩjãbʉ kayiruara, adewara iyara wuara kĩrãbe ẽ (Sal. 32:​1, 2). Daizezeba maʉ̃ra ẽbẽrarã biʼia akʉbʉ ãyita wãrĩnu soiduba jẽda krĩchapanʉ baera. Abrahán, David akʉza wuabemara Daizeze odepananasida aripe obʉta jarasidamina, ãyisida kayirua omiarabasi. Mamina Daizezebara ãya ĩjãbʉ kʼarea ãyira neneẽãbʉ kĩrãkʼa akʉsi, mawũã akʉ ẽ basi ẽbẽrarã iyi odepanʉra ẽ kĩrãkʼa (Efes. 2:12). Apostol Pabloba Romanos kartade jara ũrĩbisi dayirãbara ĩjãta erbaibarata Daizeze neũdukʼawua bʼaira. Maʉ̃ta osi Abrahánba akʉza Davidba. Dayirãbida maʉ̃ta odaibara. w23.12 3 parr. 6, 7

Idi ewadera kristianorabara Jeowaʼa sakripisio diapanʉ ãya diapanʉ ãyi ewarita, ãyi zareata akʉza ãya nekʼãrẽ erbʉta Daizeze Nokʼobari. Dayirãba Jeowaʼa diapanʉbʉrʉ dayirãba diaseabʉta ũdubidayi iyaʼa biga diapanʉta.Apostol Pabloba jarasi dayirãbara naʉ̃rata kĩrãdua ẽ baibarata (Heb. 10:​22-25). Nããra, dayirãra yiwidʼibarata Jeowa kʼawa bʼaita. Yi ũmeta, iyi ʉ̃rʉ jaradiaibarata akʉza iya nebia jʉ̃ãbibʉ ʉ̃rʉ. Yi ũbeata, ãba yi jʉreibarata akʉza dayirãi so zarea diaibarata naʉ̃ ewari jõira arakʼaitaba baera. Apocalipsis libro jõbodoare angelba naʉ̃ta jarama ũme jarabʉ «Daizezeʼa yiwidʼidua» (Apoc. 19:10; 22:9). Dayirãba idi templo espiritual ʉ̃rʉ kʼawuadara kĩrãduada ẽ baibara akʉza dayirãba Jeowa sãwũã yiwidʼibʉra dayirãitara jipade yibiabaibara. w23.10 29 parr. 17, 18

Dayirã jõmaʉ̃ba yiya kãgabʉta ũdubikĩrãpanʉ. Mawũãsidu kĩrãbedaibara Jesuba jarasita mejãchaʉba yãrã kãgada ẽ baita (Mat. 24:12). Jesuba maʉ̃ba jarakĩrãkʉa ẽ basi iyi kʼaidubemara mejãchaʉba yiya kãga ũdubida ẽ baibasita, awuarabʉrʉ jarakĩrãbasi jʉra kʼawuapanamarẽã naʉ̃ drʉadera bʉ baera ẽbẽrarã yiya kãga ũdubi ẽãta, maʉ̃ kʼarea dayirãba krĩchaibara naʉ̃ta ¿kʼãrẽba kʼarebai mʉ̃a kʼawuaita mebẽrã kãga ũdubibʉra zareabʉta? Dayirãba kãga ũdubibʉ zarea erbʉ kʼawuaira, krĩchaibara daya bedʼea zroma erbʉde kʼãrẽta obʉta (2 Cor. 8:8). Pedroba maʉ̃ ʉ̃rʉ naʉ̃ta jarasi: «Mayirai mejãcha yi kãgapanaidua akʉza kãgabara jõma kĩrãduabʉ kayirua opanʉra» (1 Ped. 4:8). Mawũẽra mebẽrãba kayirua obʉba akʉza dayirã ʉ̃rʉ kayirua obʉba, kʼarebaseabʉ kʼawuaita daya ãya kãga ũdubibʉra zareabʉ kʼawuaita. w23.11 10, 11 parr. 12, 13

Dayirãba kongregasione ʉ̃kʉrʉ mebẽrãbʉrʉ kãga ũdubipanʉbʉrʉ, ũrĩpanʉ ẽ Jesuba bedʼea zokʼadata «dayirãi yiya kãgaita» (Juan 13:23; 20:2). Apostol Pedroba jaraside mebẽrã kĩrãkʼa yiya kãgaita jarakĩrãbasi kãgaibarata mebẽrã kongregasionebemara dayirã mebẽrã kĩrãkʼapanʉ baera (1 Ped. 2:17) Pedroba jarasi: «Mayirai soidʉba yiya kãgaidʉa» (1 Ped. 1:22). Naʉ̃ testode bedʼea «soidʉba» jarakĩrãbʉ ẽbẽra aba kãgaita zaremina iyaʼa maʉ̃ kãga ũdubita. Bari jaraita, mebẽã abaʉba dayita kĩrʉbira, ¿kʼãrẽta oi? Mawũã berabaribʉrʉdera dayirãbara krĩchadogo abarika oita kãga ũdubi kaude. Mamina Pedroba Jesuba jaradadeba kʼawuasi daya abarika ora, Jeowabara bia akʉ ẽãta (Juan 18:​10, 11). Pedroba bʉsi: «Awuruba kayirua obʉrʉde abarika oraidua, i jʉra bedʼeabʉrʉde abarika i jʉra bedʼearaidua. Awuarabʉrʉ nebiata jaraidua» (1 Ped. 3:9). Bʉa soiduba kãga ũdubibʉdera ibiadebayi akʉza awuru ʉ̃rʉ krĩcha kʼawuabayi. w23.09 28, 29 parr. 9-11

Dayirãba wũãwũã zakera sãwũã mesera waribʉ ũdubʉdera kĩrãmigapanʉ. Ãyara zarea mejãcha oibara ẽ baera mainʉ jʉ̃ẽira. Mamina dayi kristiano bia bʼaira zarea oibara, nesidabʉ nei oita maʉ̃itara (1 Cor. 13:11; Heb. 6:1). Dayirã kristiano bia bʼaira nesidapanʉ Jeowa neũdukʼawua bia bʼaita. Adewara iyi jaure zareata nesidapanʉ kʼarebamarẽã nebia iya kãgabʉ kĩrãkʼabʉta erbaita. Adewara nekʼãrẽ okʼawuaita akʉza dayirã nei omarẽã jarabʉdade kʼawua bʼaita kʼãrẽta oita (Prov. 1:5). Jeowaba parãsi yumakẽrãta akʉza yuwẽrãta (Gén. 1:27). Yumakẽrãra yuwẽrãʉ̃mera ʉ̃rʉra jipa awuarapanʉ. Mamina nekʼãrẽ awurudebida awuarapanʉ. Bari jaraita Jeowaba yumakẽrãta yuwẽrãʉ̃me parãsidera osi ãyi aba abakaʉba nekʼãrẽ oita erbamarẽã. Maʉ̃ oira nesidapanʉ nebiata ũdubita akʉza nekʼãrẽ okʼawua bʼaita (Gén. 2:18). w23.12 18 parr. 1, 2

Jesuba kãgabasi wuabema ẽbẽrarãbida Daizeze trʉ̃ta zokʼadamarẽã. Ʉ̃kʉrʉ nokʼora religionebemarabara krĩchapanasi Daizeze trʉ̃ zokʼaira kayiruata. Mamina ẽbẽrarãba ãyi krĩchadeba zebʉ jarabʉ kʼarea, Jesubara idubʉ ẽ basi Daizeze trʉ̃ ʉ̃rʉ ibia bedʼeabʉra. Krĩchadaya jari ewade Jesuba yumakẽrã Gerazadebemaba angel kayirua erbada ãĩ bʉeside, maʉ̃ kʼarea mejãcha perasida akʉza Jesuʼa jarada ʉ̃rʉ jarasida wamarẽã maʉ̃ drʉadeba (Mar. 5:​16, 17). Mamina Jesubara kãgabasi ẽbẽrarã maʉ̃ drʉadebemaba Jeowa trʉ̃ta ũdukʼawuadamarẽã, maʉ̃ kʼarea maʉ̃ yumakẽrã iya bebida jarasi ẽbẽrarã jara ũrĩbimarẽã Jeowaba kʼãrẽta osita iyi bari (Mar. 5:19). Iya kãgabʉ idi ewade dayirãbida naʉ̃ drʉa jõmaʉ̃mae ũdukʼawuabidamarẽã iyi Zeze trʉ̃ta (Mat. 24:14; 28:20). Dayirãba maʉ̃ obʉrʉdera sobiabipanʉ dayirã Nokʼo Jesuta. w24.02 10 parr. 10

Idi ewade dayirãra naʉ̃ ewari jõbodoarebʉ akʉza audre ũdupanʉ zʉbʉriata. Maʉ̃ba jipade yibia Jeowa organizasione edapanaira. Naʉ̃ drʉade audre kayirua ũdu wãne Jeowaba dayirã diabʉ mebẽrã kongregasionebemata (Sal. 133:1). Akʉza kʼarebabʉ dayirã mebẽrãʼarabawara ãbapanamarẽã (Efes. 5:33–6:1). Akʉza iyara dayirãba buru bia nesidata diabʉ, mawũã aduʼapanaita. Dayirãra zarea odaibara Jeowaʉ̃me kʼẽrẽpa bʼaita. ¿Kʼãrẽa? Wuabemaraba nekʼãrẽ obʉba dayita sopʉabibʉ baera. Mawũã ẽ bʉrʉ nekʼãrẽ daya obʉba sopʉabibʉ baera. Audre sopʉa baseabʉ nekʼãrẽ daya aña obʉta badua iyaba obʉbʉrʉ. Dayirãbara nekʼãrẽ ũbea kʼarea nesidabʉ Jeowaʉ̃me kʼẽrẽpa bʼaita: Yi nããbemata, dayirã mebẽrãba nekʼãrẽ aña obʉba dayi sopʉabibʉ kʼarea. Yi ũmeta, dayi kimaba nekʼãrẽ aña obʉba sopʉabibʉrʉde. Yi ũbeata, daya nekʼãrẽ aña oda kʼarea sopʉabʉrʉde. w24.03 14 parr. 1, 2

Edaʉde bʉa ũrĩñi ʉ̃kʉrʉ mebẽrãba nekʼãrẽ ozebʉrʉta mawũã Jeowaita audre trajaita. Maʉ̃ra mebẽrãra Eskuela Ebangelizadorʼeda jʉ̃ẽsibaibara, mawũã ẽ bʉrʉ ãyira awuru drʉa eda jʉ̃ẽsibaibara, mawũã nesidabʉmae kʼarebaita, bʉabida maʉ̃ta oseabʉbʉrʉ ora. Jeowa pʉwʉrʉbara Jeowa kʼarea nekʼãrẽ audre okĩrãbʉ (Hech. 16:9). Mamina bʉa maʉ̃ta obe ẽ bʉrʉ, krĩcharãra bʉra zeri ẽãta wuabemarane kĩrãkʼa obe ẽ baera. Daizeze odebʉraitara audre yibia baera awuanta bʼaita, bʉa oseabʉta obʉbʉrʉ maʉ̃ba Jeowata sobiabibʉ (Mat. 10:22). Kĩrãbera bʉa nekʼãrẽ jõma obʉbʉrʉ Jeowaba kãgabʉ oita, mawũãra iyita sobiabibʉta. Bʉ buru kʼoeda tẽã bʉa maʉ̃ta obʉbʉrʉ, idubʉ ẽ bayi Jesu kʼaidubʉta (Sal. 26:1). w24.03 10 parr. 11

Jeowaba jarabʉ dayirãba kayirua oda kʼarea wãrĩnu soiduba jẽda krĩchapanʉbʉrʉ, iyara kĩrãduaita dayirã kayiruara (Sal. 86.5). Dayirãba kayirua oda kʼarea wãrĩnu soiduba jẽda krĩchapanʉbʉrʉ ĩjãseapanʉ Jeowaba iyi Bedʼeade jarabʉra wãrĩnuta, dayirãba kayirua oda kĩrãduaita. Kĩrãbedaibara Jeowabara jʉ̃ã ẽãta dayirãba oseabʉde wũẽta odamarẽã awuarabʉrʉ Jeowaba ũdubʉrʉde dayirãba iyi kʼarea nekʼãrẽ oseabʉta opanʉta mawũãra iyira sobiabʉ. Daizeze Bedʼeade nebʉrabʉ ʉ̃kʉrʉ ẽbẽrarã Jeowaba kãgabʉta soiduba oda ʉ̃rʉ, bʉara maʉ̃ ʉ̃rʉ krĩchaseabʉ. Bari jaraita, krĩchadaya apostol Pablo nebʉrata. Iyira zarea trajasi kongregasionʼra mejãcha oita, maʉ̃itara iyira jĩga wãibarabasi, mamina iyi bebʉ awuara beside akʉza iya Daizeze bedʼea nãã jaradiabada kĩrãkʼa jaradia ẽ basidera, ¿Jeowabara bia akʉ ẽ basika iya kʼãrẽ obʉra? Mawũã ẽ, awuarabʉrʉ iya oseabʉta osi Pablobara akʉza Jeowaba maʉ̃ kʼarea nebiata diasi iyaʼa (Hech. 28:​30, 31). Abarika dayirãba Jeowa kʼarea obʉra edaʉde audre diaseapanʉ Jeowaʼa mawũã ẽ bʉrʉ nãã diabada kĩrãkʼa dia ẽ bayi, mamina kĩrãbedaibara Jeowabara audre bia akʉbʉta dayirãba iyi kʼarea nekʼãrẽ obʉta soiduba opanʉbʉrʉ. w24.03 27 parr. 7, 9

Jesu sãwũã yiwidʼibadadeba yiza biata amaesi iyi kʼaidubemara. Jesura badua yiwidʼibasi iya jaradiabasidera, iyara ewari jʉrʉibarabasi yiwidʼita Jeowaʼa, ẽbẽrarãta iyi kʼawapanasi baera (Mar. 6:​31, 45, 46). Diapeda piradrʉbasi mawũã ewari erbaita Daizezeʼa yiwidʼita. Ewari aba iyira diamasira ũnadrʉyeda yiwidʼibasi nekʼãrẽ biata jidaibarabasi baera (Luc. 6:​12, 13). Diamasi iyi bei nãã yiwidʼida ʉ̃rʉ yiwidʼisi Jeowaʼa, mawũã aripe oita Jeowaba jaradata (Mat. 26:​39, 42, 44). Jesu yizabara ũdubibʉ dayirã nekʼãrẽ mejãcha oibaramina, ewari jʉrʉibarata Jeowa yiwidʼita. Jesu yizade kĩrãkʼa ewarita jʉrʉibara: diapeda piradrʉibara, mawũã ẽ bʉrʉ diamasi ʉrʉmabaibara Jeowa yiwidʼita. Mawũã opanʉne ũdubipanʉ dayirãitara yibiata Jeowa yiwidʼira. w23.05 3 parr. 4, 5

Daizeze Bedʼeaba naʉ̃ bedʼeata jarabʉ: «Dayirã sode diasi [weasi]». Libro abaʉba bedʼea «weai» ʉ̃rʉ naʉ̃ta jarabʉ: Jeowaba ʉ̃ta wãira mejãcha kãgabʉ baera, jarabʉ Daizeze kãgara bania do zakedeba zebʉ kĩrãkʼabʉta. Ʉ̃ta wãirabara kʼawuapanʉ ãyira Daizezebara kãgata (Jud. 1). Juanba jara ũrĩbisi iyi sãwũã sentibʉta naʉ̃ta bʉside: «Akʉidua kʼãrẽaba kãgata Daizezeba dayirãta, maʉ̃ kʼarea dayirãra trʉ̃gapanʉ Daizeze warrara» (1 Juan 3:1). ¿Bari ʉ̃ta wãirabʉrʉ ũdubibʉka Jeowabara iyi kãgara? Mawũã ẽ, Jeowabara iyi kãgara ũdubibʉ dayirã jõmaʉ̃ʼabida.¿Jeowabara kʼãrẽneba ũdubisi dayirã kãgabʉta? Iyi warrata zokʼasi dayirã ẽdrʉbita, maʉ̃ra jipade yibiabasi (Juan 3:16; Rom. 5:8). w24.01 28 parr. 9, 10

Naʉ̃ bersikuloraba ũdubibʉ David perabaside kʼãrẽba kʼarebasita. Iyi bebʉ bebʉde baside krĩchasi Jeowaba iyi sãwũã kʼarebaita. Davidba kʼawuabasi iyi kʼareba nesidabʉrʉde Jeowaba kʼarebaita, iya maʉ̃ ʉ̃rʉ ĩjãsi Jeowaba jarasi baera Israel nokʼo bʼaita (1 Sam. 16:​1, 13). Davidba soiduba ĩjãbasi Jeowaba jaradara jõma aripe berabarita. ¿Kʼãrẽta omarẽãbʉ bʉara Jeowaba bʉbari? Dayirãbara jʉ̃ã ẽ Jeowaba dayirãba bedʼea zroma erbʉta jõma ara omarẽãra. Mamina kĩrãbera bʉa bedʼea zroma atia ũdubʉra aranʉbai ẽjũã kĩrãwãreã zebʉrʉde Jeowaba jõbita (Is. 25:​7-9). Dayirã parãnara zarea barabʉ dayirã piradrʉbita, kayabʉ bebita, sopʉabʉde so zarea diaita akʉza dayirã pẽwãbʉ jõbita (1 Juan 4:4). w24.01 6 parr. 12, 13.

Krĩchadadrʉ kʼãrẽa dayirã bebʉra Jeowaʼa diasita akʉza buru kʼoesidata. Mawũã osida Jeoware bakĩrãpanasi baera. Kĩrãbera bʉa ĩjãbasita naʉ̃ra wãrĩnuta, Jeowara bʉa ũdukʼawuasita akʉza akʉbasita Jeowara bʉ Zeze kĩrãkʼa. Maʉ̃ba bʉa jarasi iyaʼa wawia ũdubita akʉza kãga bʼaita. Bʉa ĩjãbʉra warisi akʉza nãã nemitia obadara idubʉsi, mawũã Jeowaba jʉrabʉta oẽ basi awuarabʉrʉ ojʉ̃drʉsi iya kãgabʉta, mawũẽra mejãcha sobiabasi kʼawuaside Jeowaba bʉa nemitia odata jipa kĩrãduasi baera (Sal. 32: 2). Krĩchasi ãba yi jʉrebarieda wãita akʉza Jeowa ʉ̃rʉ kʼawuadata awuru ẽbẽrarã jaradiaita, atiara bʉ bebʉra Jeowaʼa diasi baera akʉza buru kʼoesi baera, wã o ewari jõmaʉ̃nẽ babibʉ ode akʉza Daizeze odeba ãĩ wãita krĩchabʉ ẽ (Mat. 7:​13, 14). Zarea baidua, iduaribiraidua nekʼãrẽ baduba awuara babita akʉza ewari jõmaʉ̃nẽ krĩchaidua Jeowata kãgaita akʉza iya jarabʉta oita. w23.07 17 parr. 14; 19 parr. 19

Bʉa krĩchabʉbʉrʉ bʉ yiwidʼiside Jeowaʼa bʉ bebʉ diaya ada ʉ̃rʉ, naʉ̃ba kʼarebayi bʉa yi kayirua oita zebʉrʉde, zarea erbamarẽã maʉ̃ yi kayirua yi edebi ẽ baita. Bari jaraita, ẽbẽra aba kima barabʉbʉrʉ bʉra, ¿auduabaibaraka maʉ̃ ẽbẽraʉ̃me? Mawũã ẽ, bʉara Jeowa jarasi baera maʉ̃ta oẽ baita. Bʉta maʉ̃ yi kayirua yi edebi ẽ bʉrʉ tẽã bʼai bedʼea zroma ũdu ẽ bayi. Bʉra yi kayirua odebara jĩgabayi (Prov. 4:​14, 15). Jesubara ewari jõmaʉ̃nẽ yi Zezeba kãgata okĩrãbasi, abarika bʉabida krĩchaibara Jeowaba kãgabʉtrʉ oita (Mat. 4:10; Juan 8:29). Bʉa bedʼea zroma ũdubʉba akʉza yi kayirua oita zebʉrʉde kʼãrẽ oi jidabʉba, ũdubibʉ bʉra Jesu kʼaidubemata akʉza bʉa maʉ̃ta obʉrʉdera kʼawua baseabʉ Jeowaba kʼarebaita bʉra. w24.03 9, 10 parr. 8-10