Agosto

Naʉ̃ salmone bedʼea ũme kʼawuadayi: Nããra, ẽbẽra biarãra bedʼea zroma ũdupanʉ, yi ũmeta, Jeowabara ẽdrʉbibʉ maʉ̃ bedʼea zromaneba, ¿sãwũã kʼarebabʉ Jeowabara? Dayirã kʼawuabibʉ kʼãrẽa naʉ̃ drʉade kʼãwũã berabarinʉmʉta. Jeowabara jarabʉ iya zokʼabʉ opanʉnera dayirãra mejãcha sobia bʼaita, mamina maʉ̃ daucha jarabʉ dayirã naʉ̃ drʉadepanʉnera bedʼea zromara mejãcha ũdudaita (Is. 66:14). Jeowabara kãgabʉ dayirãba biode krĩchamarẽã ʉ̃rabʉrʉ kʼãrẽ nebia zei ʉ̃rʉ (2 Cor. 4:​16-18). Mamina maʉ̃ nebia ze ẽ nãã Jeowaba dayirãra kʼarebayi iyi ode kʼẽrẽpa bʼaita (Lam. 3:​22-24). ¿Kʼãrẽta kʼawuaseapanʉ dayirãbara nããbema ẽbẽra Jeowa ode kʼẽrẽpapanananeba akʉza idi ewadebema kristianoraneba? Dayirãbara bedʼea zroma ũduseabʉ dayirãba jʉ̃ã ẽãne, mamina dayirãba soiduba ĩjãpanʉbʉrʉ Jeowa ʉ̃rʉ, iya kʼarebayi (Sal. 55:22). w23.04 14, 15 parr. 3, 4

José Maríaʉ̃mera jipade yiza bia, ãyara ũrĩsida nokʼoraba jarapanʉta ãyita zarebasimina (Luc.2:1-6). María tobodobaside, iya Joséʉ̃meba ũdubisida sãwũã ũrĩpanʉta nokʼoraba jarabʉta. Bari jaraita nokʼo Augustoba jarasi jõma ãyi toda drʉaeda wãmarẽã, mawũã mainʉ registraita. Maʉ̃ba Joséra Maríaʉ̃mera wãibarabasi Belénʼena, naʉ̃ra jipade jĩgabasi akʉza katumata mejãcha berabaribarabasi ãyara. Mawũã wãira Maríaitara zarebasibaibara iyira biogobasi baera akʉza ãyira krĩcha osibaibara wũãwũã zake kʼarea akʉza María kʼarea. Maríaba wũãwũã abadara Dayirã ẽdrʉbibaribasi baera ãyara naʉ̃ ʉ̃rʉ krĩchasibaibara, ¿sãwũã oi ode wãne tora? Joséba Maríaʉ̃mebara bedʼea ũdusida mamina mawũãsidʉ ãyara ũrĩsida nokʼoraba jarapanʉta Jeowara mejãcha sobiabasi Joséba Maríaʉ̃meba oda kʼarea.Adewara ãyira bia jʉ̃ẽsi Belénʼena akʉza wũãwũã zakesida neida berabari ẽ basi. Akʉza ãya kʼarebasida propesia Daizeze Bedʼeadebʉta aripe berabarimarẽã (Miq. 5:2). w23.10 8 parr. 9; 9 parr. 11, 12

¿Kʼãrẽta oseabʉ ãba yi jʉrebarimae perakʉbʉrʉ komentario diaita? Kʼarebaseabʉ nãã biʼia estudiaiba (Prov. 21:5). Bʉta bia estudiabʉbʉrʉ kʼawuabayi komentario diabʉrʉde kʼãrẽ jaraita, adewara komentario diabʉrʉde mejãcha bedʼearãra (Prov. 15:23; 17:27). Bʉ bedʼeabʉrʉdera wiña bedʼeaseabʉ, bʉ mawũã wika bedʼeabʉba akʉza bʉ bedʼeadebʉ jarabʉba, ũdubibʉ bʉra wãrĩnu estudiasita akʉza ũrĩsita. Bʉa atia kʼawuada kĩrãkʼa osibʉrʉ, mawũãsidu wabida perabʉbʉrʉ bedʼeaita, wãrĩnu ĩjãbara Jeowabara bʉ kʼãwũã zarea obʉra akʉbʉta (Luc. 21:​1-4). Jeowabara daya obe ẽãne wuetara widi ẽ (Filip. 4:5). Akʉra bʉa kʼãrẽta oseabʉta, mõbe ojʉ̃drʉra akʉza Jeowa yiwidʼira so aduʼa bʼaita. w23.04 21 parr. 6-8

Apostol Pabloba dayirãra jarasi gorogorora kĩrãkʼabʉta yõena wãña wãbʉta. Ẽbẽrarãbara akʉpanʉ gorogororãra wãña wãbʉta yõena. Maʉ̃ra kĩrãkʼabʉ dayirãsida, dayirãba ũdubibʉ Jeowa ewari zebʉrʉdera daubabʉta, jʉ̃bʉde trʉ̃ãne jʉbari ĩjãinebemata akʉza kãgaidebemata, adewara kasko nebia jʉ̃ãinebemata jʉ̃bʉde trʉ̃ãne jʉ̃baribara gorogorora sota kʼarebabasi. Maʉ̃ kĩrãkʼa ĩjãiba akʉza kãga ũdubiba kʼarebayi dayirã sora, mawũã Jeowa ode kʼẽrẽpa bʼaita akʉza Jesude kĩrãkʼa oita. Ĩjãiba kʼarebayi bia kʼawuaita Jeowabara iyi jʉrʉbʉara nebia diaita (Heb. 11:6). Idi ewade dayirãba ĩjãbʉra audre zarea erbaseabʉ akʉbʉde mebẽrã sãwũã Jeowa ode kʼẽrẽpabʉta ãya bedʼea zroma ũdubʉmina, pẽwãpanʉmina akʉza dayirãba odara mebẽrãba oda kĩrãkʼa Jeowata nãã bʉera, jʉrʉda ẽ bayi plata mejãcha erbaita akʉza nekʼãrẽ mejãcha naʉ̃ drʉadebʉta. w23.06 10 parr. 8, 9

Ẽbẽra abaʉba iyi kakuata bia zokʼabʉbʉrʉ bia zokʼa kʼawuabʉ iya krĩchabʉta akʉza iya obʉta. Naʉ̃ nebiaba kʼarebabʉ bia omarẽã dayirãba oitabʉta dayima zareabʉmina, mawũã ẽ bʉrʉ maʉ̃ta oamabʉmina. Kĩrãbera dayi kakua bia zokʼaira neta jauredebemata, maʉ̃ba Jeowa widira iya kʼarebamarẽã dayi kakua bia zokʼaita (Luc. 11:13; Gál. 5:​22, 23). Jʉ̃ãrãra bʉa nekʼãrẽ bia ũdubʉrʉidu oita. Naʉ̃ drʉadera zare nekʼãrẽ jõma bia oita. Daya krĩchabʉbʉrʉ nekʼãrẽ bia nãã erbaita mawũã daya ojʉ̃drʉita, mawũãra oẽbayi. Edaʉde dayirãba oita krĩchabʉra okĩrã ẽ zare baera, bʉta mawũã berabaribʉbʉrʉ wiña wiñaneba ojʉ̃drʉseabʉ. Bʉa Daizeze Bedʼeata malekĩrãbʉbʉrʉ ojʉ̃drʉra wiña wiñaneba. w23.05 29 parr. 11-13

Naʉ̃ ewari jõbodoarera Jeowabara zokʼabʉ iyi organizasionta dayirã yiko jauredebema mejãcha diaita. Maʉ̃ba kʼarebayi dayirã jõmaʉ̃ta Neneẽãbʉ Ode panamarẽã (Is. 35:8; 48:17; 60:17). Ẽbẽra abaʉba Daizeze Bedʼea kʼawua jʉ̃drʉbʉrʉde Neneẽãbʉ Ode jʉ̃drʉbʉrʉ kĩrãkʼabʉ. Ʉ̃kʉrʉbara Daizeze Bedʼea kʼawua jʉ̃drʉbʉrʉra tẽã idubʉebʉ, ʉ̃kʉrʉra jipa krĩchabʉ Neneẽãbʉ Ode bʼaita. Maʉ̃ obara, ¿sama edebʉ? Jeowaba ẽbẽrarã ʉ̃ta wãita jidadara maʉ̃ obara mama edebʉ (Apoc. 2:7). Nama egorode ewari jõmaʉ̃nẽ bʼairãra Jesuba Mil poaga zokʼa berabarida tẽã bʼaita. Idi ewade maʉ̃ ode wãbʉrʉ jẽda wãita krĩcharãra, adewara krĩchabara maʉ̃ ode bʼaita ẽjũã kĩrãwãreãinʉ jʉ̃ẽñiena. w23.05 17 parr. 15; 19 parr. 16- 18

Bʉa krĩchabʉrʉde Jeowaba kʼãrẽ ozebʉrʉta, maʉ̃ kʼarea bʉ bebʉ Jeowaʼa diakĩrãñi (Sal. 116:​12-14). Daizeze Bedʼeaba jarabʉ «Jõma kʼãrẽ biara akʉza jõma nekʼãrẽ aripe bʉra» Daizezedeba zebʉta (Sant. 1:17). Jeowaba dayirãʼa nekʼãrẽ jõmaʉ̃ra audre yibia diadara naʉ̃: yi Warra Jesu bebʉ. Jesuta dayirãbari beisi baera, Jeowa neũdukʼawua baseabʉ akʉza ewari jõmaʉ̃nẽ baseabʉ (1 Juan 4:​9, 10). Bʉa bʉ bebʉ Jeowaʼa diabʉrʉde maʉ̃ba ũdubibʉ biga diabʉta Jeowaba bʉaʼa nebia dia zebʉrʉ kʼarea (Deut. 16:17; 2 Cor. 5:15). w24.03 5 parr. 8

Naʉ̃ drʉade kayiruata opanʉ baera dayirãsida Lot kĩrãkʼa sentipanʉ, iyira mejãcha sopʉabasi ẽbẽrarã ley neẽãbʉ kĩrãkʼabʉba obada kʼarea, ãya kʼawuapanʉne Jeowabara jipa jʉrata nekayirua oira (2 Ped. 2:​7, 8). Lotba Jeowa wawia ũdubibʉba kʼarebasi wuabemaba nekayirua obʉta oẽ baita. Idi ewadebida dayirã audurabʉ ẽbẽrarã Jeowaba zokʼabʉ oda ẽãta, mawũãsidu dayirãra neneẽã baseapanʉ iyi nãã, iyita audre kãgapanʉbʉrʉ akʉza iyaʼa wawia ũdubipanʉbʉrʉ. Maʉ̃ kʼarea Jeowabara Proverbios librodeba dayirã so zarea diabʉ nekʼãrẽta okĩrã omarẽã. Yuwẽrãba, yumakẽrãba, warraraba akʉza zõrãrãba, jõmaʉ̃ba ũduseabʉ ũrãgʼa biata naʉ̃ Proverbios librodera. Jeowa wawia ũdubibʉbara nekayirua oda tẽã jaranʉmʉ ẽ maʉ̃ra jipa kayirua ẽ basita, awuarabʉrʉ nemitiata oẽ. w23.06 20 parr. 1, 2; 21 parr. 5

Bʉra bʉ mebẽrãba pẽwãbadabaibara Daizeze odebʉ kʼarea, mawũã ẽ bʉrʉ bʉa nekʼãrẽ bia erbʉta idubʉsibaibara mawũã Daizeze Nokʼoba zokʼabʉta nããra bʉeita (Mat. 6:33). Bʉa maʉ̃ta osibʉrʉ kʼawuabara Jeowabara akʉbʉta bʉa nekʼãrẽ bia obʉra iyi kʼarea (Heb. 6:10). Bʉa ũdubʉrʉbaibara Jesuba naʉ̃ bedʼea jaradara wãrĩnuta: «Mʉ̃a mara jaraya abaʉba amaera iyi deta, mebẽãrata, papata, zezeta, wũãwũãrata akʉza drʉata mʉ̃ kʼarea, mawũã ẽ bʉrʉ bedʼea bia kʼãrẽa idi ewade jidama 100 jidaya (deta bio, mebẽrã yumakẽrãrata, yuwẽrãrata, paparata, wũãwũãrata akʉza drʉarata, iyita pẽwãpanʉmina) akʉza ʉ̃ra zeide ewari jõmaʉ̃nẽ bʼaita erbayi» (Mar. 10:​29, 30). Bʉara nebiata audre ũdubʉ nekʼãrẽ aduabʉira (Sal. 37:4). w24.03 9 parr. 5

Kristianora Judeadebema jarrababa mejãcha zʉbʉriasidera. Mebẽrã Antioquíadebemaba «Abʼa abʼaʉba ne erubʼera kʼarebata diabuedʼaita krĩchasidʼa mebẽrã bʼema Judeadʼe» (Hech. 11:​27-30). Mebẽrã jarrababa mejãcha zʉbʉrianʉmʉra ãyideba wawarabasimina mebẽrã Antioquíadebemabara soiduba kʼarebakĩrãpanasi (1 Juan 3:​17, 18). Dayirãbida so zʉbʉria akʉbʉta ũdubiseabʉ mebẽrã naʉ̃ drʉade neida berabaribʉ kʼarea zʉbʉriabʉde. Mawũã berabaribʉrʉdera dayirãbara zõrãrã kongregasionebema widiseabʉ kʼãrẽne sãwũã kʼarebaseabʉta. Plata soiduba diabʉde akʉza Jeowa yiwidʼibʉde ãyi kʼarebamarẽã. Adewara Dayirã mebẽrãbara nesidayi kʼarebata ãya nesidabʉ erbaita maʉ̃nebida kʼarebaseabʉ. Jesuba dayirã kʼawua oita zebʉrʉ ewaridera, bigabayi iya ũdu zemarẽã dayirãba wuabemara so zʉbʉria akʉbʉta, mawũã iyi Nokʼo edre bayi (Mat. 25:​34-40). w23.07 4 parr. 9, 10; 6 parr. 12

Jesuba Jeowaba obada kĩrãkʼa obasi iya krĩchabʉta jipa oẽãne. Jeowaba Jesuʼa zokʼasi jaradiamarẽã israelitara Jeowadeba jĩgabadara. Mamina iya ũdubisi wuabemara ʉ̃rʉ krĩchabʉta Daizeze Bedʼea jaradiabaside. Ewari aba yuwẽrã Israeldebema ẽãba Jesuʼa widisi iyi kau wawabʉta bebimarẽã, Jesuba so zʉbʉria akʉita ũdubibasi baera, osi yuwẽrãba wididara, iyi kaura bebisi (Mat. 15:​21-28). Akʉdaya awuru yizata. Jesuba Daizeze Bedʼea jaradia jʉ̃drʉside iya jarasi: «Zhãrã kĩrãbita mʉ pẽwã bʼʉ ẽã ara, mʉãbidʼa mʉ pẽwã bʼʉ ẽã aya» (Mat. 10:33). Mamina Pedroba ũbeabayeda jaraside Jesura ũduaduata, maʉ̃ kʼarea Jesubara iyideba jĩga babi ẽ basi. Jesuba ũdusi Pedrora iya jarada kʼarea mejãcha sopʉabasita akʉza iya wãrĩnu ĩjãbasita. Jẽda piradrʉda tẽã Jesura Pedroʼa yi ũdubisi, mõbe jarasi kĩrãduasita iya aña jaradara akʉza iyita kãgabʉta ũdubisi (Luc. 24:​33, 34). Jeowaba akʉza Jesuʉ̃mebara ãya krĩchabʉta oẽã akʉza Jeowaba jʉ̃ãbʉ dayirãba iyide kĩrãkʼa daya krĩchabʉta oẽ marẽã. w23.07 21 parr. 6, 7

¿Kʼãrẽta oseapanʉta wuabema ẽbẽrarãbida ĩjãmarẽã maʉ̃ ẽjũã bia weya abʉ ʉ̃rʉ? Nããra, Jeowabʉrʉ jarasi baera naʉ̃ta oita. Apocalipsis libroba jarabʉ: «Mõbe bʉguede jewedabʉba mawũãsi: ‹Akʉra, mʉ̃ara nekʼãrẽ jõma yiwidi babinʉmʉ›». Jeowara buru bia baera akʉza zareabarabʉ baera, adewara iyara okĩrãbʉ baera wãrinu oyi iya oita jarabʉra. Yi ũmeta, Jeowabara biʼia kʼawuabʉ baera iya kʼãrẽ oita krĩchabʉra aripe oita, maʉ̃ba iya jaraseabʉ maʉ̃ra yi berabarima kĩrãkʼa. Maʉ̃ kʼarea iya jarasi: «Bʉra naʉ̃ bedʼearata, kʼẽrẽpabʉ baera akʉza wãrĩnu baera […]. Maʉ̃ra wãrĩnu berabarisi». Yi ũbeata, Jeowaba nei ojʉ̃drʉbʉrʉdera maʉ̃ra obʉ maoyeda, maʉ̃ kʼarea iya jarabʉ: «Mʉ̃ra Alfa akʉza yi Omega» (Rev. 21:6). Jeowaba ũdubiyi Diarura sewa nebʉrʉ omiata akʉza oau ẽãta. Maʉ̃ba bʉaʼa ẽbẽra abaʉba jarara ĩjã ẽãta maʉ̃ wãrĩnu berabarita, le ũrĩbira Apocalipsis 21:​5, 6ta. Mõbe iyaʼa jara ũrĩbira Jeowaba kama bedʼea jarabʉra aripe berabarita iya karta pirmana kĩrãkʼabʉ baera (Is. 65:16). w23.11 7 parr. 18, 19

Jeowaba maʉ̃ta jarasi Abrahánʼra iyi 75 poagabaside akʉza wũãwũã neẽ baside. Abrahánbara maʉ̃ jaradapeadara ¿ũdusika? Jõma ũdu ẽ basi. Abrahánbara do Éufrates berabarida tẽã 25 poaga jʉ̃ãibarabasi ũduita yi warra Isaac todapeadata, akʉza 60 poaga berabarida tẽã ũdusi Isaac warrarata Esaúta Jacobʼʉ̃me (Heb. 6:15). Mamina ũdu ẽ basi sãwũã iyideba zedarãra pʉwʉrʉ zroma bʼaira akʉza ũdu ẽ basi Jeowaba drʉa diaya adama wãita, mamina Abrahánʼra audre Jeowa kʼawabasi (Sant. 2:23). Akʉza Abrahánʼra jẽda piradrʉbʉrʉde, mejãcha sobiayi iya kʼãwũã jʉ̃ãbadadeba akʉza ĩjãbadadeba ẽbẽrarã mejãchaʉta nebia ũdui baera (Gén. 22:18). ¿Kʼãrẽta kʼawuapanʉ? Dayirãbida ũdu ẽ baseabʉ ʉ̃kʉrʉ propesia Jeowaba jaradara. Dayirãba jʉ̃ã kʼawuabʉta ũdubibʉbʉrʉ Abrahánba oda kĩrãkʼa wãrĩnu ĩjãseapanʉ Jeowaba nebia diaita dayirã idi ewade akʉza ʉ̃ra zeide (Mar. 10:​29, 30). w23.08 24 parr. 14

Nokʼo Uzíasbara warrarainʉba ũdubisi eda krĩchabʉta akʉza iyara kʼawuasi wawia ũdubita Daizeze wãrĩnuara. Iyira 68 poagabasi akʉza iya nebia obasidera Jeowabara nebia mejãcha diasi (2 Crón. 26:​1-4). Uzíasbara iyi nejʉrarãra jõma makenasi akʉza biʼia akʉsi pʉwʉrʉ Jerusalén neida berabari ẽ marẽã (2 Crón. 26:​6-15). Uzíasʼra sobiabasibaibara Jeowaba iyi mejãcha kʼarebada kʼarea (Ecl. 3:​12, 13). Nokʼo Uzíasbara jʉ̃ãbasi wuabemaraba iyaʼa jarabʉta odamarẽã. Maʉ̃ba iya krĩchabisibaibara iya kãgabʉta oseabʉta. Nokʼo Uzíasʼra ewari aba jʉ̃ẽsi Daizeze temploeda insienso bade, mamina naʉ̃ra, nokʼoraba obe ẽ basi, awuarabʉrʉ saserdoterabʉrʉ oseabasi (2 Crón. 26:​16-18). Sumo saderdote Azaríasba iyaʼa jarasi kʼãwũã oẽ marẽã, mamina Uzíasʼra kĩrʉsi, maʉ̃ba nokʼo Uzíasbara ũdubisi wua kʼẽrẽpabʉ ẽãta, maʉ̃ kʼarea Jeowaba iyira lepraba kayabisi (2 Crón. 26:​19-21). Kʼãrẽaba kĩrã awuarabakasi iyita ariwia eda krĩchabʉta ũdubibasibʉrʉ. w23.09 10 parr. 9, 10

Jeowaba ʉ̃ta wãita jidada tẽãbida apostol Pedrobara ũdubibarabasi zarea obʉta nemitia oẽ baita. Poaga 36de Kristo tẽã, Pedroba ũdusi Jeowaba Cornelio ʉ̃ta wãita jidasita, naʉ̃ba ũdubisi Jeowaitara jõmaʉ̃ta abarikabʉta akʉza iyara iduaribibʉta ẽbẽrarã judiora ẽãsida kristianora bamarẽã (Hech. 10:​34, 44, 45). Maʉ̃neba ʉ̃ta Pedrora ãba nekobasi ẽbẽrarã judiora ẽ bawara, iyara maʉ̃ra okabasi. Ʉ̃kʉrʉ mebẽrã judiorabara bia akʉ ba ẽ basi mebẽrã judiora ẽ bawara ãba nekoira, maʉ̃ba mebẽrã mawũã krĩchapanʉta Antioquíaidu jʉ̃ẽsidera, Pedrora wua neko ẽ basi mebẽrã judiora ẽ bawarara. Iyara maʉ̃ra osibaibara mebẽrã judiora mawũã krĩchapanʉrata kĩrʉ ẽ marẽã. Pabloba maʉ̃ta ũdusidera kʼẽãsi Pedrora jõmaʉ̃ra kĩrãbita (Gál. 2:​13, 14). w23.09 22 parr. 8

Bʉ sãwũãbʉ ʉ̃rʉ krĩchabʉrʉde ũduseabʉ kʼãrẽne aña onʉmʉta, mamina maʉ̃ kʼarea krĩcha orãra. Jeowara ẽbẽra bia baera kʼarebayi bʉa maʉ̃ta ara owãmarẽã (1 Ped. 2:3). Apostol Pedroba jarasi: «[Daizezeba] zarea babiyi akʉza teitea babiyi». Ewari aba Pedrobara krĩchasi iyira Jesu kʼawara babe ẽãta (Luc. 5:8). Mamina Jeowaba akʉza Jesu kʼarebadeba, Pedrora Jesu kʼaidu kʼẽrẽpabasi. Maʉ̃ kʼarea Jeowabara Pedrora bia akʉsi akʉza jidasi ʉ̃ta wãita (2 Ped. 1:11). Dayirãbida abarika opanʉbʉrʉ Pedrode kĩrãkʼa akʉza mapaeda ẽ bʉrʉ, Jeowaba diayi ewari jõmaʉ̃nẽ bʼaita. Bʉa mawũã ĩjãbʉba ẽdrʉseabʉ (1 Ped. 1:9). w23.09 31 parr. 16, 17

Nawedara tabernakulora ewarabarabasi, maʉ̃ra audu purrabasi. Tabernakulo ewaradebasi altar kobre omata, maʉ̃ra sakripisio obaribasi akʉza basi ponchera kobre omata. Baniaba birabasi maʉ̃ra. Saserdote ãyi nekʼãrẽ oi naweda maʉ̃ baniaba jaigua sʉgʉibarabasi (Éx. 30:​17-20; 40:​6-8). Idi ewadera 144.000rãra nama egorode Jeowaʉ̃me kʼẽrẽpapanʉ, maʉ̃ba templo espiritual ewara yi edabemane panʉ kĩrãkʼabʉ. Ponchera kobre omaba kĩrãbebibʉ yi ʉ̃ta wãira akʉza nama egoro bʼaira, kʼẽrẽpabaibarata akʉzade religion zeri ẽãne ãba ba ẽ baibarata. Yi nama egorode bʼairabara, ¿sama yiwidʼipanʉ Jeowara? nama egorode (Apoc. 7:​9, 13-15). Kʼãrẽaba yibia Jeowaba iduaribisi baera iyi pʉwʉrʉde dayirãba iyaʼa yiwidʼimarẽã. w23.10 28 parr. 15, 16

Jeowaba dayirãʼa zarea diabʉ zõrãrãneba (Is. 32:​1, 2). Krĩcha zroma obʉde zõrãrã jarada, ãya ũrãgʼa diabʉrʉta ĩjãra, ãyideba bʉra Jeowaba zarea babiseabʉ. Dayirã (jõmaʉ̃ba nebiata jʉ̃ãpanʉ, ʉ̃kʉrʉba ʉ̃ta wãita akʉza ʉ̃kʉrʉba nama egorode ewari jõmaʉ̃nẽ bʼaita, naʉ̃ba zarea diabʉ dayirãʼa (Rom. 4:​3, 18, 19). Dayirãba nebia jʉ̃ãbʉba kʼarebabʉ bedʼea zroma awuantaita, Daizeze Bedʼea jaradiaita akʉza kongregasione nekʼãrẽ omarẽã jarabʉta oita (1 Tes. 1:3). Maʉ̃ nebia jʉ̃ãbʉba so zarea diasi apostol Pabloʼabida. Iyira mejãcha sopʉabasi, krĩcha zroma obasi akʉza iya krĩchabasi iyira pẽwãpanʉta, adewara iyira bebʉdebʉta (2 Cor. 4:​8-10). Mamina iyara bedʼea zromara awuantasi iya kʼãrẽ nebia jʉ̃ãbʉ ʉ̃rʉ krĩchabasi baera (2 Cor. 4:​16-18). Iya ʉ̃ta wãita jʉ̃ãbasi mawũã nebia jʉ̃ãbʉ ʉ̃rʉ krĩchabʉba kʼarebasi zarea erbaita akʉza ewariza okĩrã wãita Jeowaba zokʼabʉta. w23.10 15, 16 parr. 14-17

Dayirã yiwidʼibʉrʉdera krĩchaibara Jeowababʉrʉ kʼawuabʉta sõbede diaibarata dayirãba widibʉra. Dayirãbara krĩchaseapanʉ dayirãba widibʉra Jeowabara maʉ̃ ewaride panʉibarata, mamina wãrĩnu bʼaira Jeowabʉrʉ kʼawuabʉ nekʼãrẽ dayirãba widibʉra sõbede diaibarata (Heb. 4:16). Dayirãbara krĩchaseapanʉ dayirãba widibʉta Jeowaba iyabaʉ ewaride dia ẽ bʉrʉ maʉ̃ra iyara diakĩrã ẽãta, mamina Jeowaba krĩchaseabʉ dayirãba widibʉra tẽã diaita audre bigata. Krĩchadaya naʉ̃ta: Mebẽã abaʉba Jeowa iyi kayabʉta bebimarẽã widida ʉ̃rʉ, Jeowaba iya wididata obʉbʉrʉ Diarubara jaraseabʉ naʉ̃ mebẽãbara Jeowaba kãgata obʉta iyita bebisi baera (Job 1:​9-11; 2:4). Adewara Jeowabara kʼawuabʉ kʼãrẽ ewaride jõbita kayara (Is. 33:24; Apoc. 21:​3, 4). Dayirãbara jʉ̃ãibara Jeowaba maʉ̃ kaya jipa jõbibʉrʉ ewari zeita. w23 11 23 parr. 13

Sansónbara nekayirua osimina idʉbʉ ẽ basi Jeowaba zokʼabʉ obʉta. Iyara jʉrʉsi sõbede oita Jeowaba omarẽã zokʼadara, pilisteora makenaita (Juec. 16:​28-30). Sansónba Jeowaʼa widisi: «Iduaribira mʉ̃abida pilisteora abarika kayirua oita». Daizezebara panʉsi Sansón bedʼeara. Mõbe iya zarea nãã erbadara jẽda diasi. Jeowaba kʼarebasi baera Sansónbara pilisteora mejãcha makenasi naʉ̃ne nãã odaira. Sansónʼra iya kayirua oda kʼarea zʉbʉriabasimina, idubʉ ẽ basi Jeowaba kãgabʉ oita. Dayirãba kayirua obʉrʉde maʉ̃ kʼarea kʼẽãnara, mawũã ẽ bʉrʉ dayirãba pribilegio erbʉta aduara, zarea oibara Jeowaba kãgabʉta idubʉ ẽ baita. Kĩrãbera Jeowabara kĩrãduakĩrãbʉta bʉa nemitia odata (Sal. 103:​8, 9). w23.09 6 parr. 15, 16

Awuantabʉbʉrʉ Jeowaba biʼia akʉyi dayirã. Mamina naʉ̃ba jarakĩrãbʉ ẽ Jeowara sobiabʉta dayirã bedʼea zroma ũdubʉrʉdera, awuarabʉrʉ jarabʉ iyira sobiabʉta ũdubʉ baera bʉra iyiare kʼẽrẽpabʉta bedʼea zroma ũdubʉmina. Jipade yibia kʼawuaita daya bedʼea zroma erbʉde awuantabʉbʉrʉ, naʉ̃ba Jeowata sobiabibʉta (Sal. 5:12). Kĩrãbedaibara Abrahánbida ũdusita bedʼea zromara akʉza iya maʉ̃ bedʼea zroma ũdusimina kʼẽrẽpabʉta ũdubisidera, Jeowabara iyira biʼia akʉsi akʉza jarasi Abrahánʼra iyi neũdukʼawuata (Gén. 15:6; Rom. 4:​13, 22). Jeowaba audre biʼia akʉbʉ ẽ dayirãta iyi kʼarea mejãcha trajabʉta, mawũã ẽ bʉrʉ dayirã iyita sama trajabʉta, awuarabʉrʉ iyira sobiabʉ ũdubʉde dayirãba bedʼea zroma ũdupanʉmina iyiare kʼẽrẽpapanʉta. Naʉ̃ta audre biʼia akʉbʉ iyara. Krĩcha ẽã dayi zõna babʉta, kayabʉta jõmaʉ̃ba awuantaseapanʉ. Dayirãba awuantapanʉbʉrʉ kʼawuapanʉ Jeowata sobiabipanʉta akʉza dayirãba nebia zei jʉ̃ãbʉra audre ĩjãnañi. w23.12 11 parr. 13, 14

Yumakẽrã naʉ̃ kʼãwũã obʉbara biʼia ũrĩbʉ wuabemara bedʼeabʉta akʉza kʼawuaseabʉ ãyi sãwũã sentibʉta adewara kʼãrẽ krĩchabʉta (Prov. 20:5). Bʉa kʼawuaseabʉ wuabemara sãwũã sentibʉra akʉbʉde iyi kĩrã sãwũãbʉta, iyi sãwũã bedʼeabʉta akʉza iyi sãwũã chu akʉbʉde. Maʉ̃ oita mebẽrãbawara ãbabaibara, bʉ wuabemaraʉ̃me bedʼeabʉrʉde mensajedeba, mawũã ẽ bʉrʉ internetʼneba bedʼeabʉbʉrʉ, bʉitara zareabayi awurume kĩrãbita bedʼeabʉrʉde bia bedʼeaita, maʉ̃ba zarea ora wuabemaraʉ̃me kĩrãbita bedʼea kʼawuaita (2 Juan 12). Akʉza kristiano biabara kʼawuabaibara kʼãrẽta oita mawũã iya nesidabʉ erbaita akʉza yi mebẽrãba kʼãrẽ nesidabʉ diaita (1 Tim. 5:8). Bʉa mawũã nekʼãrẽ okʼawuadaba kʼarebayi trajo ũduita (Hech. 18:​2, 3; 20:34; Efes. 4:28). Zarea trajara akʉza zarea ora jõma oita bʉaʼa nekʼãrẽ omarẽã jarapanʉta, mawũã wuabemaraba ũdudayi bʉa kʼãrẽ bia obʉra. Bʉa maʉ̃ta obʉbʉrʉ naʉ̃ba kʼarebayi trajo ũduita akʉza maʉ̃ trajo adua ẽ baita. w23.12 27 parr. 12, 13

Daizeze Bedʼeaba jarabʉde Daizeze ewari zeira, maʉ̃ba jarakĩrãbʉ iya iyi nejʉrarata kʼawua oita akʉza iyi pʉwʉrʉ ẽdrʉbita (Is. 13:​1, 6; Ezeq. 13:5; Sof. 1:8). Daizeze ewarira jʉ̃drʉyi nokʼoraba Babilonia Zroma makenabʉrʉde akʉza jõñi iya Armagedón webʉrʉde. Dayirã maʉ̃ne bei ẽ baira, kʼãwũãenaʉ̃ba dauba bʼaibara. Jesuba jaradia ẽ basi bari dauba bʼaibarata, awuarabʉrʉ jarasi kĩrãkita bʼaibarata (Mat. 24:21; Luc. 12:40). Yi nããrabema karta Tesalonicenses bʉ dia bʉedara, Pablobara mejãcha zokʼasi yizarata, kʼarebaita kristianora Daizeze ewari zei naena dauba panamarẽã. Pablobara kʼawuabasi Daizeze ewarira maʉ̃ ewaridera ze ẽ baita (2 Tes. 2:​1-3). Mawũãsidu Pabloba ũdubisi mebẽrã dauba bʼaibarata maʉ̃ ewari nrʉema zei kĩrãkʼa. Dayirãbida maʉ̃ ũrãgʼata ũrĩnaibara. w23.06 8 parr 1, 2

Chigorora ʉ̃tʉ drazoa warichu akʉza teiteachu maʉ̃ daucha susuabʉ. Maʉ̃ba pʉãdrʉ mejãcha zebʉrʉdera mesera kora wã ẽ. Kristianorata maʉ̃ chigoro kĩrãkʼabʉ, ¿kʼãrẽne? Kristianora Jeowa ode kʼẽrẽpabʉra zareabaibara Jeowaba zokʼabʉta aripe oita, mamina daya krĩchabʉta oẽ baibara. Jeowaba zokʼabʉta oya awabaibara akʉza krĩcha ẽ baibara awuara oita adewara krĩcha ẽ baibara wuabemarabara daya krĩchabʉ kĩrãkʼa odamarẽã (Sant. 3:17). Dayirãba naʉ̃ta bia kʼawuabʉbʉrʉ krĩchada ẽ bayi daya kãgakʉtrʉ ẽbẽraba oibarata, mawũã ẽ bʉrʉ mejãchade iduaribita ẽbẽraba ãya kãgabʉta odamarẽã. w23.07 14 parr. 1, 2

Jesura zarea oibarabasi Diaruʼa yi sewabi ẽ baita, mawũã kʼẽrẽpa bʼaita Daizezeare (Mat. 4:​1-11). Diarubara badua jʉrʉbasi sãwũã oita Jesuba kayiruata omarẽã, mawũã Jesuba dayirãta ẽdrʉbi ẽ marẽã. Jesu nama egorodebasidera bedʼea zroma mejãcha ũdusi. Iyi nejʉraraba pẽwãpanasi beaita (Luc. 4:​28, 29; 13:31). Jesu kʼaidubemarãra kayirua omiarabasi, maʉ̃ba iyara zarea oibarabasi ãyiʉ̃me kĩrʉ ẽ baita (Mar. 9:​33, 34). Tẽã iyira mejãcha zʉbʉria oda kʼãrãpe beasida (Heb. 12:​1-3). Iyi mawũã zʉbʉria berabarisidera Jesubara dobaʉba awuantaibarabasi maʉ̃ra. Jeowaba iduaribisi iyita maʉ̃ne berabarimarẽã (Mat. 27:46). Dayirã kayiruadeba ẽdrʉbita Jesura mejãcha zʉbʉria ũdusi. Dayirãba krĩchabʉrʉde Jesu dayirã kʼarea kãrẽaba zʉbʉriasita, naʉ̃ba kʼarebabʉ iyita audre kãga zeita. w24.01 10, 11 parr. 7-9

Wuabemarabawara bia wãita jʉ̃ã kʼawuabʉta ũdubibara. Naʉ̃ba kʼarebabʉ wuabemara bedʼeabʉde kĩrãkita ũrĩta (Sant. 1:19). Kʼarebabʉ jʉrʉita wuabemarabawara aduʼa bʼaita. Dayirãba jʉ̃ã kʼawuabʉta ũdubibʉbʉrʉ ãya dayi sopuabibʉrʉde mesera panʉ ẽ akʉza dayi mejãcha krĩcha zroma obʉde ãya kĩrʉ bedʼea ẽ awuarabʉrʉ jʉrʉbʉ jʉ̃ã bʼaita akʉza ibiade kĩrãduayi dayi ʉ̃rʉ nemitiata osidamina (Col. 3:​12, 13). Jʉ̃ã kʼawuabʉba kʼarebabʉ nekʼãrẽ jidabʉrʉde bia jida kʼawuaita. Dayirãba jidabʉrʉde nekʼãrẽ mesera jidai nãã, zarea obʉ bia kʼawuaita saʉ̃ta audre yibiata mawũã bia jidaita. Bari jaraita, dayi trajo neẽãne jʉ̃ã kʼawuabʉta ũdubi ẽ bʉrʉ, daya trajo nãã diabʉdata. Jʉ̃ã kʼawuabʉta ũdubibʉbʉrʉ, nãã krĩchayi maʉ̃ trajo, mebẽrãne maʉ̃ra sãwũã bʼaita akʉza sãwũã Jeowadeba jĩga babiseabʉta. Daya jʉ̃ã kʼawuabʉta ũdubibʉbʉrʉ nekʼãrẽ jidabʉrʉde bia jida kʼawuayi. w23.08 22 parr. 8, 9

Bʉra nekayirua omia baera, sopʉa baseabʉ edaʉde bʉa nebia okĩrãbʉta oau ẽ bai baera. Mamina bʉa krĩchabʉbʉrʉ bʉ bebʉ Jeowa diaside kʼãrẽta oita jaradata, naʉ̃ba kʼarebayi kayirua oita zebʉrʉde maʉ̃ʼa yi edebi ẽ baita, ¿sãwũã? Dayi bebʉ Jeowaʼa diabʉrʉdera, wua oẽ daya nekʼãrẽ okĩrãbʉta. Maʉ̃ba jarakĩrãbʉ daya nei okĩrãbʉbʉrʉ, nei kãgabʉbʉrʉ, mamina naʉ̃ra Jeowaba kãgabʉdebʉ ẽ bʉrʉ, oẽ baibara (Mat. 16:24). Maʉ̃ba bʉara krĩcha ẽ bayi kʼãrẽta oita, mawũã ẽ bʉrʉ sãwũã oita, biʼia kʼawua bʼai baera yi kayiruata oẽ baibarata akʉza Jeowaʉ̃me kʼẽrẽpabaibarata. Dayirãta Jeowaʉ̃me kʼẽrẽpapanʉbʉrʉ, mawũãra Jobde kĩrãkʼa odayi. Iyara mejãcha ũdusi bedʼea zromara, mawũãsidu iya naʉ̃ta jarasi: «Mʉ̃ bei ẽ nããra iyiʉ̃me kʼẽrẽpabayi» (Job 27:5). w24.03 9 parr. 6, 7

Jeowara Daizeze kãga akʉza iyira dayirãʉ̃mebʉ (2 Cor. 13:11). Iyara dayirã aba abakaʉ ʉ̃rʉ krĩchabʉ, maʉ̃ba kʼawuapanʉ dayirãra iyi kãga jõkaba purrebaribʉta (Sal. 32:10). Dayirãba badua krĩchapanʉbʉrʉ Jeowaba dayirãʼa sãwũã kãga ũdubibʉta, naʉ̃ba kʼarebayi ũduita Jeowara wãrĩnu chuta akʉza audre iyi kʼawa sentidayi. Dayirãbara pera ẽã widiseapanʉ Jeowaʼa iyi kãgata diamarẽã. Dayirãba kʼãrẽ krĩcha zroma erbʉra iyaʼa jaraseabʉ, kʼawuapanʉ baera iya kʼawuabʉta dayirã sãwũã sentibʉra akʉza iyara wãrĩnu kʼarebakĩrãbʉta (Sal. 145:19). Ewari kʉrãzanʉmʉne, tʉbʉ jʉ̃wʉrʉaba biʼia sentibibari kĩrãkʼa Jeowa kãgaba dayirãra biʼia sentibibʉ. Jeowara mejãcha zarea barabʉmina mawũãsidu kãga ũdubibʉ iyara. Sobiabara Jeowaba bʉta kãgabʉ baera. Akʉza dayirã jõmaʉ̃ba jaraseabʉ mʉ̃a kãga Jeowara (Sal. 116:1). w24.01 31 parr. 19, 20

Jesubara bari jaradia ẽ basi saʉ̃ta Daizeze trʉ̃ta, judioraba naʉ̃ ʉ̃rʉra kʼawuabasi baera, awuarabʉrʉ «iyara kʼawuabisia sãwũãbʉta» Daizezera (Juan 1:​17, 18). Bari jaraita, Escrituras Hebreasde ũdubibʉ Jeowabara so borekea akʉbʉta akʉza so zʉbʉria akʉbʉta (Éx. 34:​5-7). Jesuba naʉ̃ ʉ̃rʉ biʼia jara ũrĩbisi nebʉraside kʉ̃ra plata gastada ʉ̃rʉ akʉza yi zeze ʉ̃rʉ. Dayirãba naʉ̃ nebʉra lebʉrʉde ũdupanʉ zezeba yi warra jẽda uruta jĩgaʉba ũdubʉrʉdera, orra kʼãrãpe soiduba kĩrãduabʉ yi warraba kʼãrẽ kayirua odade. Naʉ̃ba biʼia ũdubibʉ Jeowaba dayirã sãwũã so zʉbʉriata akʉza so borekeata ũdubibʉta (Luc. 15:​11-32). Jesubara ũdubisi yi Zeze wãrĩnu sãwũãbʉta. w24.02 10 parr. 8, 9

Dayirã zʉbʉriabʉrʉde Jeowaba aduʼa sentibiseabʉ, ¿sãwũã dayirãba Jeowade kĩrãkʼa so zʉbʉria akʉpe akʉza so zarea diaseabʉ? ¿Sãwũã oseabʉ? Nããra, dayirã sode kʼawuaibara nebia oita, mawũã wuabemara so zarea daita, ¿saʉ̃ra maʉ̃ra nebiara? ¿Kʼãrẽba kʼarebai ewariza mebẽrã kãga ũdubita akʉza so zarea diaita? (1 Tes. 4:18). Kʼarebayi nebʉraiba neũdukʼawuara kĩrãkʼa akʉza mẽbẽra kĩrãkʼa yiya kãgaiba, adewara ẽbẽra bia baiba (Col. 3:12; 1 Ped. 3:8). ¿Sãwũã kʼarebai naʉ̃ra nebiaraba? Mebẽrã so zʉbʉria akʉbʉdade wãrĩnu krĩchadayi ãyi ʉ̃rʉ, mawũã soiduba so zarea diakĩrãnañi ãyi zʉbʉrianʉmʉne. Jesuba jarada kĩrãkʼa dayi sode kʼãrẽ erbʉta maʉ̃ta bedʼeabʉ, ẽbẽra biabara iyi sode kʼãrẽ bia erbʉta maʉ̃ta diabʉ (Mat. 12:​34, 35). Mebẽrã so zarea diabʉdade ũdubipanʉ wãrĩnu kãgata. w23.11 10 parr. 10, 11

Nesidapanʉ kʼareba jʉrʉita wãrĩnu ũrĩkĩrãpanʉbʉrʉ propesiara ʉ̃rʉ. Krĩchara naʉ̃ta, bʉta wãñi drʉa bʉa ũduaduaeda bʉ neũdukʼawuaʉ̃me, mamina mama jʉ̃ẽbʉrʉde bʉ neũdukʼawuaba bia kʼawuabayi saʉ̃ ode wãibarata, maʉ̃ kʼarea bʉra mejãcha sobiayi kʼawuasi baera iyira bʉme wãsita. Maʉ̃ kĩrãka Jeowabara kʼawuabʉ dayirãra kʼãrẽ ewaride barabʉta. Maʉ̃ kʼarea dayirãba propesiata ũrĩkĩrãbʉbʉrʉ Jeowa kʼarebata widibara (Dan. 2:28; 2 Ped. 1:​19, 20). Yibarirabara kãgapanʉ yi wũãwũãra bia wãmarẽã, maʉ̃ kĩrãkʼa Jeowabida kãgabʉ dayirãta bia wãmarẽã (Jer. 29:11). Wuabemara yibariraira, Jeowabara jaraseabʉ ʉ̃ra zeide kʼãrẽta berabarita. Jeowabara jidasi ʉ̃kʉrʉ yumakẽrãrata iyi propesiata iya jaradata bʉmarẽã, mawũã kʼawuamarẽã ʉ̃ra zeide kʼãrẽ berabarita maʉ̃ berabari nãã (Is. 46:10). w23.08 8 parr. 3, 4