Bʉa Daizezeita oita krĩchabʉra oseabʉ

1. ¿Dayirã aba abaka kʼãrẽ bedʼea zromata ũdupanʉ?

¿KRĨCHABARIKA Daizezede audre bia oita, mamina zareka maʉ̃ oita?b Mawũãbʉrʉ krĩcharãra bʉra abapaibʉta. Bari jaraita, Philipʼra audre bia yiwidʼikĩrãbasi akʉza badua okĩrãbasi maʉ̃ta, mamina iyitara zarebasi ewari jʉrʉita. Erikabara krĩchasi Daizeze bedʼea jaradia wãita ãba yi jʉrebʉrʉde ãza jʉ̃ẽ ẽ baita, mawũãsidu iyira ãza jʉ̃ẽbasi mamara. Tomášʼra zarea osi Daizeze Bedʼea jõma leita, iya jarabʉ: «Mʉ̃a Daizeze Bedʼea lebadara maʉ̃ lebʉde sobia ba ẽ basi, mʉ̃a lema ũbea le akʉsi mamina jʉ̃ẽbasi Levíticomapei».

2. ¿Kʼãrẽa dayirãra sopʉa ẽ baibara wabida oẽbʉrʉ dayirãba oita krĩchadata?

² Bʉa wabida aripe oẽbʉrʉ bʉa oita krĩchadata, maʉ̃ kʼarea sopʉarãra, dayirãba krĩchada aripe oira zarea odaibara, mamina bʉa Daizezeita audrea oita krĩchabʉba, ũdubibʉ bʉitara Jeowa neũdukʼwua bʼaira audrea yibiata. Maʉ̃ba bʉya oita krĩchabʉra, ora bʉya oseabʉbitapai, mawũã mejãcha krĩcha zroma oẽ baita (Sal. 103:14; Miq. 6:8). Maʉ̃ba bʉa nekʼãrẽ oita krĩchabʉrʉdera, jʉrʉda bʉya oseabʉta. Mamina, ¿kʼareta odaibara daya krĩchada aripe oita? Akʉdaya ʉ̃kʉrʉ ũrãgʼata.

BɄYA OITA KRĨCHADARA OKĨRÃBAIBARA

3. ¿Kʼãrẽa yibia daya nekʼãrẽ okĩrãne obʼaita?

³ Yibia daya nekʼarẽ oita krĩchadara jipa okĩrã bʼaita, ẽbẽra mawũã krĩchabʉra mejãcha zarea obʉ iya krĩchada aribaeyeda, daya nekʼãrẽ okĩrãbʉra pʉãdrʉba jãba edebʉ kĩrãkʼabʉ, mejãcha pʉãdrʉbʉbʉrʉ jãbara mesera jʉ̃ẽñi iyi wãma. Maʉ̃ba dayirãba nekʼãrẽ oita krĩchadara okĩrãbʉbʉrʉ mesera aripe oyi. Mebẽã David El Salvadordebemaba jarabʉ: «Bʉa nekʼãrẽ okĩrãbʉdera zarea obʉ akʉza nekʼãrẽ oi kʼarea idubʉ ẽ maʉ̃ oita». Mawũẽra bʉra, ¿kʼãrẽta oseabʉ okĩrãne oita?

4. ¿Kʼãrẽa Jeowa yiwidʼibara? (Filipenses 2:13 akʉza akʉra potota).

⁴ Yiwidʼira Jeowa audre okĩrãne obʼaita. Daizeze jaure zereaba kʼarebaseabʉ bʉa krĩchada okĩrãne obʼaita (akʉra Filipenses 2:13). Edaʉde dayirãbara krĩchabʉ nekʼãrẽ oibarata maʉ̃ra yibia baera, mamina okĩrã ẽ. Akʉdaya yiza aba mebẽã Ugandadebemata yi trʉ̃ra Norina. Iya krĩchabasi ẽbẽra abaʉʼa Daizeze Bedʼea jaradiaita, mamina mawũã okĩrã ẽ basi iya krĩchabasi baera nejaradiabari bia ẽãta, ¿kʼãrẽba kʼarebasi iyira? Iya jarasi: «Badua Jeowa yiwidʼibasi Daizeze Bedʼea jaradiakĩrãne jaradia bʼaita, mawũã ẽbẽrã ababida erbaita Daizeze Bedʼea kʼawuamarẽã. Mawũẽra mʉ̃ra zarea osi mʉ̃a Jeowa widibada kĩrãkʼa aripe oita, adewara zarea osi audre nejaradiabari bia bʼaita. Jedeko bio berabarida tẽã mʉ̃a ũdusi Daizeze bedʼea jardiakĩrãbʉta, maʉ̃ põgade, mʉ̃a ẽbẽra ũmeʼa Daizeze bedeata jaradia jʉ̃drʉsi».

5. ¿Kʼãrẽne krĩchaibara audre okĩrã oita?

⁵ Krĩchara Jeowaba bʉ kʼarea kʼãrẽ ozebʉrʉ ʉ̃rʉ (Sal. 143:5). Apostol Pablobara jẽda kĩrãbesi Jeowara sãwũã iyiʉ̃me ẽbẽra biabasita, naʉ̃ba kʼarebasi iyi zarea trajaita Jeowade oita (1 Cor. 15:9, 10; 1 Tim. 1:12-14). Bʉa biʼia kĩrãbebʉbʉrʉ Jeowaba bʉ kʼarea kʼãrẽ ozebʉrʉta, naʉ̃ba kʼarebayi bʉya nekʼãrẽ oita krĩchada okĩrãne oita (Sal. 116:12). Krĩchara mebẽã Hondurasdebemata iyira kʼãrẽba kʼarebasita yi nãã edebari bʼaita, iya jarabʉ: «Biʼia krĩchasi Jeowaba mʉ̃ra kʼãrẽaba kãgabʉta, iyi pʉwʉrʉ eda wedata akʉza mʉ̃ta akʉbʉta, naʉ̃ba kʼarebasi mʉ̃a Jeowa audre kãgaita akʉza nekʼãrẽ okĩrãita iyita».

6. ¿Adewara kʼãrẽba kʼarebaseabʉ daya krĩchada okĩrã oita?

⁶ Krĩchara kʼãrẽ nebia ũduita bʉya oita krĩchada kʼarea. Krĩchara kʼãrẽba kʼarebasita Erikara iyi ãzape jʉ̃ẽbʉba Daizeze Bedʼea jaradiaita ãba yi jʉrebʉmae, iya jarabʉ: «Mʉ̃ ãza jʉ̃ẽbasidera bedʼea ẽ basi mebẽrãbawarara, mamina mʉ̃ta ãba yi jʉrei nãã jʉ̃ẽbasidera, ewari erbasi mebẽrãbawara aduʼa bedʼea bʼaita, adewara ũrĩseabasi mebẽã abaʉba ũrãgʼa diabʉta sãwũã Daizeze Bedʼea jaradiai ʉ̃rʉ, maʉ̃ba kʼarebasi mʉ̃aʼa Daizeze bedʼea jaradiabʉde sobia jaraita akʉza mʉ̃ra nejaradiabari bia bʼaita». Erikabara bia krĩchasi kʼãrẽ nebia ũduita iyita wua ãza jʉ̃ẽ ẽ bʉrʉ, iya maʉ̃ta aripe osi. ¿Bʉa kʼãrẽ nebia ũduita krĩchaseabʉ? Bʉa krĩchabʉbʉrʉ audre Daizezea yiwidʼita akʉza Daizeze Bedʼea badua le bʼaita, krĩchara sãwũã naʉ̃ oiba kʼarebaita audre Jeowa neũdukʼawua bʼaita (Sal. 145:18, 19). Bʉa krĩchabʉbʉrʉ bʉ sode nebia erbʉta audre bia owãita, krĩchara sãwũã maʉ̃ oiba kʼarebaita wuabemabawara aduʼa bʼaita (Col. 3:14). Bʉa kãgabʉrʉ bʉra kartade kʼãrẽa bʉya krĩchadara aripe oita krĩchabʉta akʉza tẽã maʉ̃ta badua akʉbara, Tomášba jarabʉ: «Daya biʼia kʼawuabʉbʉrʉ daya krĩchadara kʼãrẽa aripe oibarata, zarea obʉ maʉ̃ aripe oyeda».

7. ¿Kʼãrẽba karebasi Juliota yikimaʉ̃mera ãya krĩchada aripe oita?

⁷ Audre ãbabara ẽbẽra bʉa krĩchada oita kʼarebabʉme (Prov. 13:20). Akʉdaya kʼãrẽba kʼarebasita, Juliota yikimaʉ̃me audre jaradiaita Daizeze bedʼeata, iya jarabʉ: «Daibara jʉrʉsida neũdukʼawua daiba krĩchada kʼarebabʉta akʉza maʉ̃ ʉ̃rʉ bedʼeasida ãyibawara. Maʉ̃rabara aripe osida daiba oita krĩchabada kĩrãkʼabʉta maʉ̃ba ãya daiʼa ũrãgʼa biata diaseabasi. Dai neũdukʼawuabara widibasi daiba oita krĩchadara sãwũã wã kʼawuaita, adewara daiʼa so zarea diabasi daiba nesidabʉde».

DAYA OKĨRÃ ẼÃNE

8. ¿Kʼarẽta berabaribʉ daya oita krĩchadara daya okĩrãbʉde obʉbʉrʉ? (Akʉra potota).

⁸ Maminabʉ ewari dayirãba nekʼãrẽ oamabʉta, ¿maʉ̃bara jarakĩrãbʉka dayirãba krĩchada aripera obe ẽãta? Mawũã ẽ. Krĩchara naʉ̃ yizata, mejãcha pʉãdrʉbʉdera mesera edebʉ jãbara iyi wãma, mamina edaʉde wiña pʉãdrʉbʉ, maʉ̃ta neẽbʉrʉ jipa pʉãdrʉ ẽ, mamina ¿maʉ̃ba jarakĩrãbʉka yi jãba manejabʉra jʉ̃ẽ ẽ baita iyi wãmara? Mawũã ẽ. Ʉ̃kʉrʉ jãbabara erbʉ motorta, mawũã ẽ bʉrʉ yi wiguibarita, yi jãba manejabʉbara maʉ̃ta zokʼaseabʉ iyi wãkĩrãbʉma jʉ̃ẽita. Daya nekʼãrẽ okĩrãbʉra pʉãdrʉ kĩrãkʼabʉ, bʉ ewari dayirãba krĩchada okĩrã ẽãbʉta, maʉ̃ba dayirãba nekʼãrẽ oamabʉdera zarea odaibara aripe oita, mawũã oda ẽ bʉrʉ dayirãba krĩchadara aripe oda ẽ bayi. Mamina abarika jãba yibariba nekʼãrẽ zokʼada kĩrãkʼa iya kãgabʉidu jʉ̃ẽita, abarika dayirãsida zarea oseabʉ daya krĩchada aripe oita oamabʉmina, mawũã dayirãta zarea opanʉbʉrʉ nebiata ũdudayi. Dayirãba maʉ̃ sãwũã oita kʼawuai nãã, bedʼeadayi daya edaʉde bedʼea widibʉ ʉ̃rʉ.

9. ¿Oamabʉmina daya krĩchadata oibaraka? Jara ũrĩbira.

⁹ Jeowabara kãgabʉ iya zokʼabʉra sobiade odamarẽã (Sal. 100:2; 2 Cor. 9:7). ¿Daya oita krĩchada oamabʉde, maʉ̃ta oita krĩchaibaraka? Akʉdaya Pablo yizata, iya jarasi: «Mʉ̃ kakuara pobʉa akʉza mʉ̃yi nezokʼa babibʉa» (1 Cor. 9:25-27). Pablora mejãcha zarea osi iya nebia oita, iyi kakuaba nemitia oita kãgabasimina. ¿Jeowabara bia akʉsika Pabloba obadara? Bia akʉsi adewara iyaʼa nebiata mejãcha diasi (2 Tim. 4:7, 8).

10. ¿Kʼãrẽ nebiata ũdui dayirãba krĩchadata oamabʉde aripe obʉrʉdera?

¹⁰ Jeowaba Pablo bia akʉda kĩrãkʼa dayirãsida bia akʉbʉ zarea obʉde aripe oita daya krĩchada oamabʉde. Jeowara mejãcha sobiabʉ dayirãba krĩchabʉ aripe obʉra kãgade opanʉ ẽ mina, opanʉta iyita mejãcha kãgabʉ baera. Jeowaba Pabloʼa nekʼãrẽ bia mejãcha diadakĩrã iya nebia oda kʼarea, dayirãbida nebiata mejãcha diayi dayirã kʼãwũã zarea obʉ kʼarea (Sal. 126:5). Dayirãba ũdu wãne Jeowaba dayirã nekʼãrẽ biata mejãcha dia wãta, naʉ̃ba daya oita krĩchadara audre okĩrãne oyi. Mebẽã wẽrã Polonianebemaba yi trʉ̃ Lucynaba, jarabʉ: «Edaʉde Daizeze bedʼea jaradia wãmabʉ audre mawũãbʉ aukʼarabʉde, mamina Daizeze bedʼea jaradia wãna tẽãra mejãcha sobia sentibʉ». Mawũẽra akʉdaya ¿kʼãrẽta odaibarata dayirãba nekʼãrẽ oamabʉde?

11. ¿Sãwũã kʼarebaseabʉ Jeowabara dayirã kakua bia zokʼaita?

¹¹ Jeowa yiwidʼira kʼarebamarẽã bʉ kakua bia zokʼaita. Naʉ̃ba jarakĩrãbʉ daya bia zokʼa kʼawuabʉta daya krĩchabʉta akʉza daya obʉta, dayi kakuara bia zokʼaibara nemitia oẽ baita. Mamina maʉ̃ daʉcha yibia dayi kakua bia zokʼaita nebia omarẽã, dayirãba oitabʉra zareamina, mawũã ẽ bʉrʉ maʉ̃ta okĩrã ẽ mina. Kĩrãbera dayi kakua bia zokʼaira neta jauredebemata, maʉ̃ba Jeowa widira iya kʼarebamarẽã dayi kakua bia zokʼaita (Luc. 11:13; Gál. 5:22, 23). Mebẽã Davidba jarabʉ sãwũã kʼarebasita iyi yiwidʼibʉba, iya kãgabasi badua Daizeze bedʼea iyidobaʉba estudia bʼaita, iya jarasi: «Jeowa badua widibasi iya kʼãrẽbamarẽã mʉ̃ kakua bia zokʼaita, iyi kʼarebadeba Daizeze Bedʼeara mʉ̃yidobaʉba badua estudia jʉ̃drʉsi».

12. Eclesiastés 11:4​bara, ¿sãwũã kʼarebabʉ dayirãba oita krĩchada ozeita?

¹² Jʉ̃ãrãra bʉa nekʼãrẽ bia ũdubʉrʉidu oita. Naʉ̃ drʉadera zare nekʼãrẽ jõma bia oita. Daya krĩchabʉbʉrʉ nekʼãrẽ bia nãã erbaita mawũã daya ojʉ̃drʉita, mawũãra oẽbayi (akʉra Eclesiastés 11:4). Mebẽã Daynielba jarabʉ: «Jʉ̃ã ẽ baibara nãã nekʼãrẽ bia erbaita, maʉ̃ba owãibara dayirãba oita krĩchadara». Akʉza Paul Ugandadebemaba jarasi kʼãrẽa daya oseabʉta idubʉ ẽ baita tẽã oita. Iya jarabʉ: «Dayiraba krĩchadata obʉbʉrʉ mawũãra Jeowabara nebiata diayi» (Mal. 3:10).

13. ¿Kʼãrẽa yibia nekʼãrẽ wiña wiñaneba ojʉ̃drʉira?

¹³ Wiña wiñane ojʉ̃drʉra. Edaʉde dayirãba oita krĩchabʉra okĩrã ẽ zare baera, bʉta mawũã berabaribʉbʉrʉ wiña wiñaneba ojʉ̃drʉseabʉ. Bʉa nekʼãrẽ biata ũdubikĩrãbʉbʉrʉ wiña wiñaneba oudubira. Bʉa Daizeze Bedʼeata malekĩrãbʉbʉrʉ ojʉ̃drʉra wiña wiñaneba. Tomášba zarea osi Daizeze Bedʼea poaga aba babʉrʉde maleita, iya jarabʉ: «Mʉ̃a kʼawuasi mʉ̃a Daizeze Bedʼea kʼawua jʉ̃drʉsidera mejãcha le jʉ̃drʉsita, maʉ̃ba zarebasi. Maʉ̃ atia le jʉ̃drʉsi, mamina mejãcha le ẽ mawũã ewari erbaita krĩchaita mʉ̃a leda ʉ̃rʉ, maʉ̃ra maʉ̃ba atira jipa lekĩrã Daizeze Bedʼeara». Tomáš mejãcha sobiabasi baera Daizeze Bedʼea akʉbaside, maʉ̃ba iyara audre le wãsi, maʉ̃ kʼarea ewari berabari wãne iyara jõma lesi Daizeze Bedʼeara.c

MAPAERÃRA BɄA OKĨRÃBADA KĨRÃKʼA OZE Ẽ BɄRɄ

14. ¿Kʼãrẽ bedʼea zromata ũduseapanʉ?

¹⁴ Dayirãba okĩrãbʉbʉrʉ dayirãba krĩchadata akʉza zarea obʉbʉrʉ maʉ̃ta berabarimarẽã, edaʉde berabariseabʉ daya jʉ̃ã ẽ badata, maʉ̃ba jãrĩseabʉ dayirã ewarita dayirãba oita krĩchabadata (Ecl. 9:11). Bari jaraita dayirãba ũduseabʉ bedʼea zroma dayi zarea jãrĩseabʉta akʉza dayi sopʉabiseabʉta (Prov. 24:10). Nekayirua omia baera oseapanʉ daya krĩcha ẽ badata oita (Rom. 7:23). Mawũã ẽ bʉrʉ mapaebʉba (Mat. 26:43). ¿Kʼãrẽba kʼarebaseabʉ maʉ̃ bedʼea zroma ara oita?

15. ¿Kʼãrẽa idubʉ ẽ baibara daya oita krĩchabadara nekʼãrẽ baduba obi ẽ bʉsida? (Salmo 145:14).

¹⁵ Kĩrãbera nekʼãrẽ baduba iduaribi ẽ bʉrʉ bʉa krĩchada oita, maʉ̃ba jarakĩrãkʉ ẽ bʉa oita krĩchabadara idubʉita. Daizeze Bedʼeaba jarabʉ dayara badua ũduseabʉta bedʼea zromara akʉza jarabʉ dayirãbara jẽda ojʉ̃drʉseabʉta dayirãba krĩchadara Jeowa kʼarebadeba (akʉra Salmo 145:14). Mebẽã Philipba jarabʉ: «Mʉ̃ara krĩcha ẽ kʼãrẽa aripe oẽbasita mʉ̃a oita krĩchadara, awuarabʉrʉ krĩchabʉ mʉ̃a sãwũã jẽda oita, mʉ̃a oita krĩchabadara». Davidba jarabʉ: «Mʉ̃a oẽbʉrʉ mʉ̃a oita krĩchabadata, krĩcha ẽ mamapai taʉdogota, awuarabʉrʉ zarea obʉ maʉ̃ oita, mawũã Jeowa ũdubita iyi kãgabʉta». Zareabʉbʉrʉ bʉa oita krĩchabadata mawũãsidu obʉbʉrʉ, ũdubiyi Jeowa kãgabʉta. Jeowara mejãcha sobiabʉ bʉta zarea obʉ baera bʉa oita krĩchabadata, aripe oita.

16. Bʉa krĩchabʉta aripe obi ẽ bʉrʉ nekʼãrẽ berabaribʉrʉba, ¿maʉ̃neba kʼãrẽta kʼawuaseabʉ?

¹⁶ Bʉa krĩchabʉta aripe obi ẽ bʉrʉ nekʼãrẽ berabaribʉrʉba, maʉ̃neba kʼawuara. Biʼia krĩchara bʉ berabarida ʉ̃rʉ akʉza bia krĩchara kʼãrẽta osebaʉta mawũã abarika berabari ẽ marẽã (Prov. 27:12). Bʉa krĩchada aripe oita bʉita zareabʉbʉrʉ, naʉ̃ba ũdubibʉ awuara oseabʉta mawũã bʉa krĩchada aripe oita, mawũã ẽ bʉrʉ krĩchaseabʉ nekʼãrẽ jipa awuara oita.d Jeowabara dayirãra mitia akʉ ẽ daya krĩchadata aripe oẽ kʼareara (2 Cor. 8:12).

17. ¿Kʼãrẽa jẽda kĩrãbeibara dayirãba nekʼãrẽ aripe ozebʉrʉra?

¹⁷ Jẽda kĩrãbera bʉya nekʼãrẽ oda ʉ̃rʉ. Daizeze Bedʼeaba jarabʉ: «Daizezera jipabʉ baera maraba opanʉra kĩrãdua ẽ» (Heb. 6:10). Mawũẽra bʉabida kĩrãdua ẽ baibara bʉa ozebʉrʉra. Bari jaraita, sãwũã audre Jeowa neũdukʼawua babʉrʉta, kʼãrẽta obʉta wuabemara iyi ʉ̃rʉ audre bedʼeaita akʉza bʉ buru koeda ʉ̃rʉ. Nãã bʉa nekʼãrẽ krĩchada aripe ozebʉrʉ kĩrãkʼa, naʉ̃neba ʉ̃ta bʉa oita krĩchabʉsida aripe oyi (Filip. 3:16).

18. ¿Kʼãrẽta jẽda kĩrãbeibara dayirãba krĩchada aripe oide? (Akʉra potota).

¹⁸ Jeowa kʼarebadeba bʉa nekʼãrẽ oita krĩchadara aripe oyi. Bari jaita, jãbade wãbara krĩchabʉ iyi sama jʉ̃ẽita, mamina maʉ̃ daʉcha akʉ wãbʉ baera dota, chiruata, nekʼãrẽ odebʉta, sobiabʉ. Abarika dayirãba nekʼãrẽ oita krĩchabʉrʉdera, jẽda kĩrãbedaibara Jeowaba sãwũã kʼareba zebʉrʉta dayirãba nãã oita krĩchadara, mawũã obʉrʉdera dayirãra mejãcha sobiabayi (2 Cor. 4:7). Mawũã obʉbʉrʉ Jeowaba bʉaʼa nebiata mejãcha diayi (Gál. 6:9).