Ʉ̃ra zei bʉa jʉ̃ãbʉra wãrĩnubayi

1. ¿Kʼãrẽa Abrahánbara jʉ̃ãbaibarabasi Jeowaba iyaʼa wũãwũã diaya adara?

JEOWABA iyi neũdukʼawua Abrahánʼa jarasi diaita wũãwũãta maʉ̃neba naʉ̃ drʉadebemara jõma nebia ũduita (Gén. 15:5; 22:18). Abrahánba wãrĩnu ĩjãbasi Daizeze ʉ̃rʉ, maʉ̃ba ĩjãsi iya Daizezeba nebia diaya abʉra wãrĩnuta. Abrahán 100 poaga babodode akʉza yi kima 90 poagabasimina wũãwũã neẽbasida waidide (Gén. 21:​1-7). Mawũãsidu Daizeze Bedʼeaba jarabʉ: «Iya ĩjãbʉde jʉ̃ãbasi akʉza ĩjãsi pʉwʉrʉra zeze bʼaita iyira, jaradapeada kĩrãkʼa: ‹Kʼãwũã mejãcha bayi bʉdeba zebʉrʉra›» (Rom. 4:18). Dayirãba kʼawuapanʉ kĩrãkʼa Abrahánba jʉ̃ãbadara wãrĩnu berabarisi. Iya mejãcha jʉ̃ãbadara aripe berabarisi Jeowaba Isaac diaside. ¿Kʼãrẽa ĩjãbasi Abrahánbara Jeowaba jarada jõma aripe berabarita?

2. ¿Abrahánbara kʼãrẽa ĩjãbasi Jeowaba iyaʼa nebia diaya adara wãrĩnu berabarita?

² Abrahánba Jeowa biʼia ũdu kʼawuabasi baera, maʉ̃ba wãrĩnu soiduba ĩjãbasi Jeowaba diaya adara (Rom. 4:21). Jeowaba bia akʉsi Abrahánʼra akʉza jarasi iyara nekʼãrẽ aripe obʉta iya ĩjãbʉ kʼarea (Sant. 2:23). Romanos 4:18​ba jarabʉ kĩrãkʼa Abrahánbara ĩjãbasi akʉza jʉ̃ãbasi nebiata. Atia akʉdayi apostol Pabloba jaradata jʉ̃ãi ʉ̃rʉ Romanos kapitulo 5de.

3. ¿Kʼãrẽta jara ũrĩbibʉ Pabloba nebia jʉ̃ãi ʉ̃rʉ?

³ Pabloba jara ũrĩbisi ʉ̃ra zei jʉ̃ãpanʉbara kʼãrẽa sewa ẽãta (Rom. 5:5). Adewara jaradiabʉ dayirãba ĩjã erbʉ sãwũã zarea erbaita. Romanos 5:​1-5 bayeda akʉ barabʉeda, krĩchara bʉa ĩjãbʉ sãwũã audre zarea erbaita. Mawũã obʉbʉrʉ ewari berabari wãne kʼawuayi bʉa ĩjãbʉra wãrĩnu berabarita. Dayirãba akʉbarabʉdeba kʼawuabiseabʉ kʼãrẽta oibarata daya atia ĩjãbʉ audre zarea bʼaita. Nãã kʼawuadaya Pabloba jaradata dayirãba jʉ̃ãbʉbara sewa ẽãta.

DAYIRÃBA NEBIA JɄ̃ÃBɄTA

4. ¿Kʼãrẽ ʉ̃rʉ bedʼeabʉ Romanos 5:​1, 2​de?

⁴ (Akʉra Romanos 5:​1, 2). Pabloba bʉsi naʉ̃ bedʼea kongregasion Romanebemaraita. Mebẽrã mamabemarabara kʼawuasida Jeowa ʉ̃rʉ akʉza Kristo ʉ̃rʉ, mõbe ãyi ʉ̃rʉ ĩjãsida, adewara kristianora basida. Daizezeba ãyira jarasi nekʼãrẽ aripe obʉta, ũdubisida baera ĩjãbʉta akʉza iyi jaure zareata diasi. Mawũã ũdusida ãya nebia jʉ̃ãpananata.

5. ¿Kʼãrẽ nebiata jʉ̃ãpanʉ ʉ̃ta wãirabara?

⁵ Pabloba tẽã juneane bʉsi epesiora yi ʉ̃ta wãira, ãya nebia jʉ̃ãbʉ ʉ̃rʉ (Efes. 1:18). Akʉza kolosenserabida jarasi ãya nebiata jʉ̃ãbʉta ʉ̃tʉ (Col. 1:​4, 5). Mawũẽra maʉ̃ra kristianorãra Jeowaba piradrʉbiyi ʉ̃tʉ jaurede, Jesuʉ̃meba zokʼadamarẽã (1 Tes. 4:​13-17; Apoc. 20:6).

6. ¿Kʼãrẽta jarabʉ mebẽã ʉ̃ta wãiba iya nebia jʉ̃ãbʉ ʉ̃rʉ?

⁶ Kristianora ʉ̃ta wãirabara maʉ̃ta jʉ̃ãpanʉ. Maʉ̃nebema abara mebẽã Frederick Franz. Maʉ̃ mebẽãba iya nebia jʉ̃ãbʉ ʉ̃rʉ naʉ̃ta jarasi: «Daiba nebia jʉ̃ãpanʉra, wãrĩnu berabariyi. Yi 144.000debemara jõmaʉ̃ba ũdudayi maʉ̃ra». Jeowa ode kʼẽrẽpabʉta poaga bio berabarida tẽã 1991ne mebẽã Franzba jarasi, ãya nebia jʉ̃ãbʉ aripe berabarimarẽãra poaga bio berabaribaramina jʉ̃ãita, maʉ̃ ũduira jipade yibia bʼai baera.

7, 8. ¿Kʼãrẽ nebiata jʉ̃ãpanʉ yi wuabemarabara? (Romanos 8:​20, 21).

⁷ Idi ewadera Daizeze odepanʉra mejãchaʉba jʉ̃ãpanʉ nebia Abrahánʼne kĩrãkʼa, ewari jõmaʉ̃nẽ bʼaita nama Daizeze Nokʼoba zokʼabʉrʉde (Heb. 11:​8-10, 13). Pabloba bʉsi kʼãrẽ nebiata ũduibasita yi ẽbẽrarã maʉ̃ jʉ̃ãpanʉrabara (akʉra Romanos 8:​20, 21). Bʉa Daizeze Bedʼeaba nebia erbʉ ʉ̃rʉ kʼawuasidera, ¿saʉ̃ta audre kãgasi? Kʼawuaside ewari abaʉde bʉra kayirua oka bʼaita, mawũã ẽ bʉrʉ ¿bʉra mejãcha sobiasika kʼawuasi baera bʉ mebẽrãnebema beida jẽda ũduita egoro bia zebʉrʉde? Daizezeba dayirã mawũã nekʼãrẽ diaya abʉba mejãcha nebiata jʉ̃ãbibʉ.

⁸ Dayirãba nebia jʉ̃ãbʉra ʉ̃tʉ ũduimina, mawũã ẽ bʉrʉ nama egorode ũduimina, jõmaʉ̃ta sobiapanʉ maʉ̃ nebia kʼarea. Akʉza dayirãba nebia jʉ̃ãbʉra audre zarea erpanaseabʉ. Pabloba jara ũrĩbibʉ maʉ̃ sãwũã berabarita. Maʉ̃ ʉ̃rʉ kʼawuaiba kʼarebabʉ audre ĩjãita dayirãba nebia jʉ̃ãbʉra wãrĩnu berabarita.

SÃWŨÃ KʼAWUAPANɄ DAYIRÃBA JɄ̃ÃBɄRA WÃRĨNU ARIPE BERABARITA

9, 10. ¿Pablode kĩrãkʼa kʼãrẽta jʉ̃ãseapanʉ kristianorabara? (Romanos 5:3 akʉza akʉra potota).

⁹ (Akʉra Romanos 5:​3, 4). Kĩrãbera bʉa bedʼea zroma ũdubʉrʉba kʼarebaita bʉa nebia jʉ̃ãbʉ ʉ̃rʉ ĩjãbʉta audre zarea erbaita. Jesu kʼaidupanʉrabara jʉ̃ãseapanʉ bedʼea zroma ũduita. Akʉdaya Pablo yizata. Iya jarasi Tesalónicadebemara naʉ̃ta: «Dai maraʉ̃me panaside daiba jarasida zʉbʉria ũdudaibasita, maʉ̃ta maraba kʼawuapanʉ kĩrãkʼa, aripe berabarisi» (1 Tes. 3:4). Akʉza Corintodebemara naʉ̃ta bʉsi: «Kãgapanʉ maraba kʼawuadamarẽã daiba kʼãrẽ bedʼea zroma erpananata [ . . . ] krĩchasida daira beita» (2 Cor. 1:8; 11:​23-27).

¹⁰ Kristianora idi ewadebemabida bedʼea zroma ũduseapanʉ (2 Tim. 3:12). Bʉa Jesu ʉ̃rʉ ĩjãbʉta ũdubisi baera akʉza iyi kʼaidubemabasi baera ¿pẽwãbadaka bʉra? Bʉ neũdukʼawuaraba mawũã ẽ bʉrʉ bʉ mebẽrãnebemabara zʉbʉria obadabaibara. Mawũã ẽ bʉrʉ bʉ trajabʉmae bʉ zokʼabʉba akʉza bʉme ãba trajapanʉraba zʉbʉria obadabaibara bʉa wãrĩnuta jarabʉ baera (Heb. 13:18). ¿Bʉa nebia jʉ̃ãbʉ ʉ̃rʉ jara ũrĩbibʉ kʼarea nokʼorabida zʉbʉria obadaka? Mamina dayirãba kʼãrẽ bedʼea zroma ũdubʉ ʉ̃rʉ krĩcha ẽã, Pabloba jarasi dayirãra sobia baseabʉta ¿kʼãrẽa?

11. ¿Kʼãrẽa krĩchadaibara badu bedʼea zroma ũdubʉrʉta awuantaita?

¹¹ Dayirãra sobia baseapanʉ bedʼea zroma ũdubʉrʉdera. Romanos 5:3​ba jarabʉ baera bedʼea zroma ũdubʉba kʼarebabʉta awuantaita. Kristianora jõmaʉ̃ba ũduyi bedʼea zromara. Maʉ̃ba jõmaʉ̃ba krĩchaibara ãya badu bedʼea zroma ũdubʉrʉta awuantaita. Mawũãtrʉ ũdudai baera nebia dayirãba jʉ̃ãpanʉta. Dayirãra bakĩrãpanʉ ẽ jari ẽbẽrarã Jesuba jara ũrĩbida kĩrãkʼa. Jesuba jarasi naʉ̃rãra neta mõgara ʉ̃rʉ baeda kĩrãkʼabʉta. Ãya Daizeze ʉ̃rʉ kʼawuasidera ĩjãsida, mamina bedʼea zroma ũdusidade idubʉsida (Mat. 13:​5, 6, 20, 21). Dayirãba bedʼea zroma ũdubʉrʉdera naʉ̃ra pʉ, mamina dayirãba awuantadara nebiata ũdudayi akʉza Jeowaba omarẽã jarabʉta odayi.

12. ¿Kʼãrẽ nebiata ũdupanʉ dayirãba bedʼea zroma awuantabʉrʉde?

¹² Santiagoba jara ũrĩbisi dayirãba bedʼea zroma awuantabʉrʉde kʼãrẽ nebia ũduita. Iya jarasi: «Maraba awuantabʉ kʼarea nebiata oyi, mawũã daucha jipa bamarẽã, nejõma bia bamarẽã akʉza nekʼãrẽ wae ẽ marẽã» (Sant. 1:​2-4). Santiagoba jarasi awuantaibara nekʼãrẽ biode kʼarebaseabʉta. Kʼarebaseabʉ daya audre jʉ̃ã kʼawua bʼaita, daya ĩjãbʉ audre zarea erbaita akʉza ĩjãita Daizezeba jarabʉra wãrĩnuta. Mawũãmina dayirãba awuantapanʉbʉrʉ awuru nebiata ũdupanʉ.

13, 14. ¿Kʼãrẽba sãwũãi dayirãba bedʼea zromata awuantabʉbʉrʉ akʉza maʉ̃neba sãwũãi dayirãba nebia jʉ̃ãbʉra? (Romanos 5:4).

¹³ (Akʉra Romanos 5:4). Pabloba jarasi daya awuantabʉbʉrʉ Jeowaba biʼia akʉita dayirã. Mamina naʉ̃ba jarakĩrãbʉ ẽ Jeowara sobiabʉta dayirã bedʼea zroma ũdubʉrʉdera, awuarabʉrʉ jarabʉ iyira sobiabʉta ũdubʉ baera bʉra iyiare kʼẽrẽpabʉta bedʼea zroma ũdubʉmina. Jipade yibia kʼawuaita daya bedʼea zroma erbʉde awuantabʉbʉrʉ, naʉ̃ba Jeowata sobiabibʉta (Sal. 5:12).

¹⁴ Kĩrãbedaibara Abrahánbida ũdusita bedʼea zromara akʉza iya maʉ̃ bedʼea zroma ũdusimina kʼẽrẽpabʉta ũdubisidera, Jeowabara iyira biʼia akʉsi akʉza jarasi Abrahánʼra iyi neũdukʼawuata, adewara nekʼãrẽ aripe obʉta (Gén. 15:6; Rom. 4:​13, 22). Dayirãʉ̃mebida abarika berabaribʉ. Jeowaba audre biʼia akʉbʉ ẽ dayirãta iyi kʼarea mejãcha trajabʉta, mawũã ẽ bʉrʉ dayirã iyita sama trajabʉta, awuarabʉrʉ iyira sobiabʉ ũdubʉde dayirãba bedʼea zroma ũdupanʉmina iyiare kʼẽrẽpapanʉta. Naʉ̃ta audre biʼia akʉbʉ iyara. Krĩcha ẽã dayi zõna babʉta, kayabʉta jõmaʉ̃ba awuantaseapanʉ. ¿Bʉara bedʼea zroma ũdubʉka akʉza mawũãsidu Jeoware kʼẽrẽpabʉka? Dayirãba awuantapanʉbʉrʉ kʼawuapanʉ Jeowata sobiabipanʉta akʉza dayirãba nebia zei jʉ̃ãbʉra audre ĩjãnañi.

DAYA NEBIA JɄ̃ÃBɄ ZAREA ERBAITA

15. ¿Pabloba kʼãrẽta jarasi akʉza maʉ̃neba kʼãrẽta widiseapanʉ ʉ̃kʉrʉba?

¹⁵ Pabloba jara ũrĩbibʉ Jeowara dayirãʉ̃me sobiabʉta dayirãta iyiare kʼẽrẽpapanʉne akʉza dayirãba bedʼea zroma awuantapanʉne. Pabloba naʉ̃ta jarabʉ: «Jʉ̃ãbibʉ nebiata ʉ̃ra zeide Daizezeba bia akʉbʉ baera akʉza ʉ̃ra zei jʉ̃ãpanʉnera sewakʉa ẽ» (Rom. 5:​4, 5). Nãã Romanos 5:2​de, Pabloba jarasi naʉ̃ra kristianora Romanebemabara nebiata jʉ̃ãpanʉta ʉ̃ta wãita. Maʉ̃neba ʉ̃kʉrʉba widiseabasi iyikʉza: ¿naʉ̃ra kristianoraba kʼawuabasibʉrʉ ãya kʼãrẽ nebia jʉ̃ãbʉ ʉ̃rʉ, kʼãrẽa Pabloba iyi diskurso tẽã jara ũrĩbiside akʉza bedʼeasi maʉ̃ ʉ̃rʉ?

16. ¿Dayirãba nebia jʉ̃ãpanʉ ʉ̃rʉ ĩjãpanʉra, sãwũã audre zarea wãbiseabʉ? (Akʉra potota).

¹⁶ Pabloba kʼãrẽta jarakĩrãbadara bia ũrĩseapanʉ kʼawuabʉdade dayirãba nebia zei ʉ̃rʉ ĩjãbʉra, audre zarea erpanaseabʉta. Naʉ̃ ʉ̃rʉ bia ũrĩnaita krĩchara naʉ̃ta, ¿kĩrãbebʉka bʉa ũrĩkata ũrĩside Daizeze Bedʼeaba jarabʉta ẽjũã bia weya abʉ ʉ̃rʉ? Bʉa naʉ̃ ũrĩsidera krĩchasibaibara mawũã ẽjũã biade bʼaira kʼãĩmokʼãrã kĩrãkʼabʉta akʉza maʉ̃ra wãrĩnu berabari ẽãta. Mamina bʉa Jeowa audre ũdu kʼawua wãne akʉza Daizeze Bedʼeade iya nebia weya abʉ ʉ̃rʉ audre kʼawua wãne, ĩjãsi bʉa nebia jʉ̃ãbʉra aripe berabarita.

17. Bʉ bebʉ Jeowaʼa diada tẽã akʉza buru kʼoeda tẽãra, ¿sãwũã audre ĩjã wãseabʉ nebia bʉa ĩjãbʉ ʉ̃rʉ?

¹⁷ Bʉ buru kʼoeda tẽãbida, bʉara Jeowara audre ũdu kʼawua zesi akʉza audre kãga zesi, adewara audre ĩjãsi bʉa nebia jʉ̃ãbʉra wãrĩnu berabarita (Heb. 5:13–6:1). Edaʉde bʉra berabaribaribaibara Romanos 5:2-4​ba jarabʉ kĩrãkʼa, bʉa bedʼea zroma bio ũdusibaibara, mamina bʉa awuantasi baera ũdusibaibara Jeowaba bʉ sãwũã bia akʉsita. Bʉa kʼawuabʉ baera Jeowaba bʉ kãgata akʉza bʉa awuantabʉ kʼarea sobiabʉta, naʉ̃ba kʼarebabʉ audre ĩjãita bʉa nebia jʉ̃ãbʉra aripe berabarita. Akʉza naʉ̃ba awuara babibʉ bʉ bʉ mebẽrãʉ̃me sãwũãbʉta. Adewara bʉa nei jidaidebida audre bia obibʉ.

18. ¿Kʼãrẽa ĩjãseapanʉ Jeowaba wãrĩnu diaita maʉ̃ nebiara?

¹⁸ Apostol Pabloba nebiata jara ũrĩbibʉ, iya jara ũrĩbibʉ Jeowata sobiabibʉbʉrʉ kʼawuabʉta iya nebia jʉ̃ãbʉra aripe berabarita. ¿Kʼãrẽa mawũã ĩjãpanʉ? Pabloba naʉ̃ bedʼea biata jarasi kristianora: «Ʉ̃ra zei jʉ̃ãpanʉnera sewakʉa ẽ; Daizezebara kãgata iyideta dayirã sode diasi, jaure biata dayirã diadaba» (Rom. 5:5). Bʉara wãrĩnu ĩjãseabʉ bʉa nebia jʉ̃ãbʉra wãrĩnu berabarita.

19. ¿Kʼãrẽta ĩjãseabʉ bʉa nebia jʉ̃ãbʉ ʉ̃rʉ?

¹⁹ Krĩchadaibara Jeowaba Abrahánʼa nebia diaya adata akʉza sãwũã Jeowaba iyira bia akʉbasita, adewara iyi neũdukʼawua babisita. Abrahánba jʉ̃ãbadara aripe berabarisi. Daizeze Bedʼeaba jarabʉ: «Abrahánba jʉ̃ãbʉta ũdubida tẽãbʉrʉ, diasia naʉ̃ nebia diaya adara» (Heb. 6:15; 11:​9, 18; Rom. 4:​20-22). Abrahánbara wãrĩnu ũdusi iya jʉ̃ãbadara. Bʉabida ĩjãseabʉ bʉta kʼẽrẽpabʉbʉrʉ bʉa nebia jʉ̃ãbʉra wãrĩnu ũduita. Maʉ̃ba bʉra sobia baseabʉ (Rom. 12:12). Pabloba bʉsi: «Daizezeba maraʼa bedʼea bia jarabʉba mara sota sobiabimarẽã akʉza aduʼa babimarẽã iyi ʉ̃rʉ ĩjãpanʉ kʼarea, mawũã soiduba jʉ̃ãnamarẽã Daizeze jaure zareadeba» (Rom. 15:13).