Julio

Jesuba nekʼãrẽ jõma obadadeba akʉza sãwũã bedʼeabadadeba ũdubibasita yi Zezeba sãwũã krĩchabadata akʉza sentibadata (Juan 14:9).¿Kʼãrẽta kʼawuapanʉ Jesuba miõba okata obadadeba? Jesuba yi Zezeʉ̃meba mejãcha kãga dayirãra. Jesu nama egorodebaside, iya ũdubisi ẽbẽrarã kãgabʉta iya iyi zareadeba ẽbẽrarã bebikʉaside. Ewari aba yumakẽrãra dauberrepanʉ ũmeba iyaʼa kʼarebata widisida (Mat. 20:​30-34). Nama akʉpanʉ Jesura «so zʉbʉriape bebikʉasita». Bedʼea «so zʉbʉriape», naʉ̃ bedʼea griegodera jarakĩrãbʉ dayi sode mejãcha so zʉbʉria sentibʉta ẽbẽra zʉbʉriabʉ kʼarebai kʼarea. Jesuba ẽbẽrarã mejãcha kãga baera so zʉbʉriata ũdubisi wuabemara, maʉ̃ kʼarea iya nediasi ẽbẽrarã jarrabʉrata akʉza kʼarebasi ẽbẽra yagaba baribʉta (Mat. 15:32; Mar. 1:41). Jeowabara so zʉbʉriata ũdubibʉ, maʉ̃ kʼarea iyira akʉza Jesuʉ̃me zʉbʉriapanʉ dayirã zʉbʉriabʉrʉdera (Luc. 1:78; 1 Ped. 5:7). Ãya kãgapanʉ idi bedʼea zroma ũdupanʉra jipa jõbidaita. w23.04 3 parr. 4, 5

Zarea oibara akʉ ẽ baita akʉza ũrĩ ẽ baita naʉ̃ drʉaba sãwũã krĩchabʉ ʉ̃rʉ. Daizeze Bedʼea akʉiba, ãba yi jʉrʉbarieda wãiba akʉza jaradia wãiba kʼarebayi bia krĩchaita. Jeowabara obi ẽ dayi baebibari krĩcha zebʉrʉde wuetara (1 Cor. 10:​12, 13). Dayirãba nesidabʉ mejãcha Jeowaʼa soiduba yiwidʼita iyiʉ̃me kʼẽrẽpa bʼaita, naʉ̃ ewari kʼãwũã jõbodoarebida baera (Sal. 62:8). Jeowa yiwidʼibʉrʉde jaraibara iya kʼãrẽ nebia erbʉta akʉza biga diaibara. Widira zowaĩnĩgʉa erbaita jaradia wãbʉrʉde, widira bedʼea zroma awuantaita akʉza eda baebibari krĩchade wãbi ẽ baita, iduaribirãra mia kʼaiʼa Jeowa yiwidʼita iduaribita. w23.05 7 parr. 17, 18

¿Kʼãrẽa wãpanʉ ãba yi jʉrebari edara? Wãpanʉ Daizezeʼabʉrʉ yiwidʼidaita (Sal. 26:12; 111:1). Adewara wãpanʉ yiya so zarea diadaita kʼãwũã bedʼea zroma ũdupanʉ kʼarea (1 Tes. 5:11). Juwa ʉ̃ta wuabʉrʉdera komentario diaita naʉ̃ ũmeta opanʉ. Mamina bedʼea ũmechu dayirãita zarea babibʉta komentario diaita: perabʉ komentario diaita, edaʉde dayirã mejãcha komentakĩrãbʉ, mamina mebẽãba edaʉde dayaʼa dia ẽ. Apostol Pabloba jarasi bedʼea dayi karebaseabʉta iya jarasi audrera mebẽrãi yiya so zarea diaibarata. Dayirãba kʼawuada jara ũrĩbibʉrʉde, mawũã dayirã komentario badua diada ẽ bʉsida sobia baseabʉ wuabemasida komentario diai baera (1 Ped. 3:8). w23.04 20 parr. 1-3

Judiora Babiloniane 70 poagabayeda jidape erpananara, idibʉrʉ ãyira wãñi ãyi drʉa Jerusalénʼena (Esd. 1:​2-4). Maʉ̃ra Jeowabʉrʉ mawũã oseabasi. Babiloniabara ãya ẽbẽra jidadara jipa ẽdrʉbi ẽ basi baera (Is. 14:​4, 17). Mamina Babiloniara awuru pʉwʉrʉ juwa edrebasi akʉza mamabema nokʼo yiwidibara jarasi judiora ãyi drʉaeda wãseabasita. Judiora jõmaʉ̃ba kʼawua krĩchaibarabasi kʼãrẽ oita, mamina audre bia krĩchaibarabasi mebẽrã buruba wãita, mawũã ẽ bʉrʉ mama bʼaita. Judiora mejãchaʉta zõnabasi baera mama wãita krĩchapana ẽ basi, judiora mejãchaʉta mama tosida baera ãyara ũdukʼawuapanasi pʉwʉrʉ Babiloniatrʉ, maʉ̃ba ãyitara Jerusalénʼra ãyi zõrãrã drʉabasi, adewara ʉ̃kʉrʉ judiorãra de biata erbasibaibara, trajo biata, maʉ̃ kʼarea ãyitara zarebasibaibara awuru drʉa ãyi ũdukama wãira. w23.05 14 parr. 1, 2

Daizeze Bedʼeaba dayirãra kʼarebabʉ wuabemara so zʉbʉria akʉmarẽã audre awuantaita akʉza kãga ũdubita. Lucas 21:19ba jarabʉ: «Maraba awuanta bʉdeba mayi bebʉta ẽdrʉbidayi». Colosenses 3:12ba jarabʉ ẽbẽra biabaibarata. 1 Tesalonicenses 4:​9, 10ba jarabʉ: «Daizezebara maraʼa jaradianʉmʉ baera sãwũã yiya kãgaibarata [ . . . ] Mamina mebẽrã kãgapanʉ maʉ̃ta audre opanamarẽã». Naʉ̃ testode jara ũrĩbitaebara jarakĩrãbasi jõma mebẽrã so zʉbʉria akʉdaibarata, kãga ũdubidaibarata akʉza awuantadaibarata. Mamina mebẽrãbara audre zarea oibarabasi maʉ̃ nebia oũdubi wãita, dayirãbida abarika oseapanʉ. Akʉra nããbema kristianoraba sãwũã odata, naʉ̃ba kʼarebayi zʉbʉria zroma zei nãã daubapanaita. Bedʼea zromata awuanta kʼawuabʉ baera, zʉbʉria zroma zebʉrʉdera awuantayi akʉza awuantakĩrãñi. w23.07 3 parr. 4, 8

Dayirãta ʉ̃ta wãibʉrʉ, mawũã ẽ bʉrʉ nama egorode bʼaibʉrʉ, zarea odaibara neẽãbʉ ode bʼaita. Neneẽãbʉ Odebaibara kʼarebabʉ dayirã Jeowaba kãgabʉde bʼaita akʉza Daizeze Nokʼoba ẽjũã kĩrãwãreãnẽ nebia webʉrʉdebida iya kãgabʉde baita (Juan 10:16). Poaga 1919deba ʉ̃ta yumakẽrãraba, yuwẽrãraba, warraraba, amaesida Babilonia Zromata mawũã Jeowaba kãgabʉta ojʉ̃drʉsida. Judiora Babilonianeba wãsidera, Jeowabara jarasi ode neida berabari ẽ baita (Is. 57:14). ¿Kʼãrẽta berabaribʉ idi dayirãba Neneẽãbʉ O erbʉra? Poaga 1919 nãã, Jeowabara zokʼasi yumakẽrã iyi wawiapanʉrata, naʉ̃raba ota ara owãnamarẽã, mawũã ẽbẽrarãta Babilonia Zromaneba ãĩ wãnamarẽã Naʉ̃ra yumakẽrãraba nekʼãrẽ jõma osida, mawũã tẽã ẽbẽrarãba religion zeri ẽãta amae kʼãrãpe Jeowaba kãgabʉde obʼaita iyi pʉwʉrʉme. w23.05 15, 16 parr. 8, 9

Jeowabara kãgabʉ iya zokʼabʉra sobiade odamarẽã (2 Cor. 9:7). ¿Daya oita krĩchada oamabʉde, maʉ̃ta oita krĩchaibaraka? Akʉdaya Pablo yizata, iya jarasi: «Mʉ̃ kakuara pobʉa akʉza mʉ̃yi nezokʼa babibʉa» (1 Cor. 9:​25-27 nota). Pablora mejãcha zarea osi iya nebia oita, iyi kakuaba nemitia oita kãgabasimina. Jeowabara bia akʉsi adewara iyaʼa nebiata mejãcha diasi (2 Tim. 4:​7, 8). Jeowaba Pablo bia akʉda kĩrãkʼa dayirãsida bia akʉbʉ zarea obʉde aripe oita daya krĩchada oamabʉde. Jeowara mejãcha sobiabʉ dayirãba krĩchabʉ aripe obʉra kãgade opanʉ ẽ mina, opanʉta iyita mejãcha kãgabʉ baera. Jeowaba Pabloʼa nekʼãrẽ bia mejãcha diadakĩrã iya nebia oda kʼarea, dayirãbida nebiata mejãcha diayi dayirã kʼãwũã zarea obʉ kʼarea (Sal. 126:5). Dayirãba ũdu wãne Jeowaba dayirã nekʼãrẽ biata mejãcha dia wãta, naʉ̃ba daya oita krĩchadara audre okĩrãne oyi. w23.05 29 parr. 9, 10

Apostol Pabloba jarasi ẽbẽrarã Daizeze ewari zebʉrʉde beirãra kʼãĩbʉ kĩrãkʼabʉta. Ẽbẽra kʼãĩbʉbara kʼawua ẽ iyi audu kʼãrẽ berabarinʉmʉta akʉza kʼãrẽ ũmadaʉbasi (Rom. 11:8). Ãyitara kʼãrẽ ẽ kĩrãkʼabʉ nekʼãrẽ ũdubibʉde ewari jõbodoarepanʉta akʉza zʉbʉria zroma arakʼaitabata (2 Ped. 3:​3, 4). Mamina kʼawuapanʉ kʼãwũã ewari berabari wãbʉrʉza, audre yibiata dauba bʼaita. (1 Tes. 5:6). Maʉ̃ba nesidapanʉ aduʼabaita mejãcha krĩcha zroma oẽ bʼaita drʉade nekʼãrẽ berabarinʉmʉ kʼarea, politikara ʉ̃rʉ akʉza drʉade bedʼea zroma ũdubʉ ʉ̃rʉ. Daizeze ewari arakʼaitaba baera, ẽbẽrarãbara dayirã jaradayi jʉrʉdamarẽã kʼaiare bʼaita, maʉ̃ba krĩcha zroma oẽ baibara kʼãrẽ panʉi ʉ̃rʉ, Daizeze jaure zareaba kʼarebai baera (Luc. 12:​11, 12). w23.06 10 parr. 6, 7

Sansón ʉ̃rʉ ũrĩbʉrʉdera, ¿kʼãrẽta krĩchabʉ bʉara? Krĩchabʉbaibara iyira yumakẽrã zarea mejãcha erbadabasita, naʉ̃ra wãrĩnu. Mamina edaʉde Sansónbara bia jida ẽ basi. Maʉ̃ba iyira mejãcha zʉbʉriabisi. Mamina Daizezebara akʉ ẽ basi iya aña jidadata awuarabʉrʉ akʉsi iyira sãwũã kʼẽrẽpabasita iyiʉ̃me, maʉ̃ kʼarea iduaribisi iyi ʉ̃rʉ bʉmarẽã Daizeze Bedʼeade, naʉ̃ba dayirãta kʼarebamarẽã. Jeowabara zokʼasi Sansónta iyi pʉwʉrʉ Israelta kʼarebamarẽã. Maʉ̃ta poaga bio berabarida tẽã Jeowaba Pabloʼa bʉbisi ẽbẽrarã iyiare kʼẽrẽpapanana ʉ̃rʉ. Maʉ̃ne edabasi Sansón trʉ̃ta (Heb. 11:​32-34). Sansón yizaba mejãcha so zarea diaseabʉ dayirã. Iya bedʼea zroma ũdusidera Jeowa ʉ̃rʉ ĩjãbʉta ũdubisi. Sansón yizadeba nekʼãrẽ kʼawuaseapanʉ akʉza iyi yizaba dayirãʼa so zarea diaseabʉ. w23.09 2 parr. 1, 2

Dayirãbara bedʼea zromara audre awuantaseapanʉ, badua jarapanʉbʉrʉ maʉ̃ta Jeowa (1 Tes. 5:17). Kʼãwũãena bʉra bedʼea zroma mejãcha erbʉ ẽ baibara mawũãsidu, ¿bʉara jʉrʉbʉka Jeowa kʼarebata, bʉ kĩrʉbʉde, kʼawua ẽãne kʼãrẽ oita akʉza krĩcha zroma obʉde? Bʉa bedʼea zroma erbʉde Jeowa kʼarebata jʉrʉ kʼawuabʉbʉrʉ bedʼea zroma mejãcha erbʉde zare ẽ bayi Jeowa kʼareba jʉrʉita. Mawũã obʉbʉrʉ bʉara biʼia kʼawuabayi Jeowabara sõbede akʉza sãwũã kʼarebaita (Sal. 27:​1, 3). Idi ewade bedʼea zromata awuanta kʼawuapanʉbʉrʉ zʉbʉria zroma zebʉrʉdera dayirãita zare ẽ bayi awuantaita (Rom. 5:3). ¿Kʼãrẽa mawũã jarapanʉ? Mebẽrã mejãchaʉba jarabʉ, ãya bedʼea zroma erbʉta awuantadaba kʼarebasita tẽã bedʼea zroma zebʉra awuantaita, mawũã bedʼea zroma awuantadaba kʼarebasi audre Jeowa ʉ̃rʉ ĩjãita iyara badu ewaride kʼarebaseabʉta akʉza ĩjãbʉba kʼarebasi wuabema bedʼea zroma awuantaita (Sant. 1:​2-4). w23.07 3 parr. 7, 8

Jeowa edabʉta krĩchabʉ baera akʉza wuabemara so zʉbʉria akʉbʉta ũdubibʉ baera iya krĩchabʉta jipa oẽ. Bari jaradaita, Jeowaba eda krĩchabʉta ũdubisi ẽbẽrarã Sodomanebema makenaita krĩchaside. Iyi angeleraneba Jeowaba Lotʼa jarasi katumaena mĩrʉ wãmarẽã. Lotʼra mejãcha perabasi baera Jeowaʼa widisi iduaribimarẽã iyita akʉza yi mebẽrãbawara wãita Zóar pʉwʉrʉeda, mamina Jeowaba krĩchabasi maʉ̃ pʉwʉrʉsida makenaita. Maʉ̃ kʼarea Jeowaba jaraseabasi Lotʼara iya jarabʉta jõma omarẽã. Maʉ̃ widi kʼaude iya iduaribisi Lotʼara idu wãmarẽã Zóar pʉwʉrʉeda iya nãã krĩchasimina ẽbẽrarã maʉ̃ pʉwʉrʉdebema makenaita (Gén. 19:​18-22). Poaga mejãcha berabarida tẽã Jeowaba so zʉbʉria akʉbʉta ũdubisi ẽbẽrarã Nínivedebemara. Jeowaba zokʼasi Jonásʼa jaramarẽã iya maʉ̃ pʉwʉrʉ ãrĩta akʉza ẽbẽrarã kayirua mamabʉrata makenaita. Mamina ninibitaraba ãya kayirua obada idubʉsida, maʉ̃ kʼarea Jeowaba so zʉbʉria akʉ kʼãrãpe makena ẽ basi maʉ̃ pʉwʉrʉra (Jon. 3:​1, 10; 4:​10, 11). w23.07 21 parr. 5

¿Jehoás yizadebara kʼãrẽta kʼawuaseapanʉ? Bakuruba jorketa nesidabʉ kĩrãkʼa kora wã ẽ bamarẽã, abarika mawũã berabarisi Jehoásʼsida. Jehoás kʼareba neẽãsidera akʉza wuabemarata Daizeze zeri ẽã yiwidʼi jʉ̃drʉsidera, iyara kʼawua ẽ basi kʼãrẽ ojʉ̃drʉita, naʉ̃ba ũdudibʉ dayirãba Jeowa bedʼeata ũrĩra, oẽ baibarata dayirã mebẽãba jarabʉ kʼarea mawũã ẽ bʉrʉ wuabemara kongregasionebemaba ojarabʉ baera. Dayirã audre Jeowa kʼawa bʼaira audre wari wãbibara dayirãkʉza Jeowa kãga wãita akʉza iyi wawia ũdubita, maʉ̃ erbaira dayidobaʉba Daizeze Bedʼeara akʉibara, krĩchaibara maʉ̃ ʉ̃rʉ akʉza yiwidʼibaibara (Jeremías 17:​7, 8; Col. 2:​6, 7). Jeowabara dayirã nekʼãrẽ mejãcha omarẽã widi ẽ, Eclesiastés 12:13ba ũdubibʉ iya kʼãrẽta widibʉta, iya jarabʉ: «Wawiara Daizeze wãrĩnuarãra akʉza iya zokʼabʉta ora, ẽbẽrarã jõmaʉ̃ba maʉ̃ta opanaibara». Jeowata wawia ũdubipanʉbʉrʉ bedʼea zroma ʉ̃ra zeira awuantayi, adewara zarea takerayi, mawũãra mia kʼaiba Jeowa neũdukʼawuara bʼaita ãrĩ ẽ bayi. w23.06 18, 19 parr. 17-19

Yi bersikulo 5 jʉ̃drʉdogode naʉ̃ bedʼeata jarabʉ: «Bʉguede jewedabʉba mawũãsi» (Apoc. 21:5a). Naʉ̃ bedʼeara jipade yibia, ¿kʼãrẽa? Apocalipsis librodera Jeowara bedʼeama ũbea bedʼeasi baera, yi bersikulo 5de jaradara maʉ̃ranebema ababasi. Naʉ̃ bedʼeara angelba jara ẽ basi, mia Jesuba iyi ʉ̃tʉ jʉ̃ẽbʉrʉde jara ẽ basi, naʉ̃ra Jeowabʉrʉ jarasi. Naʉ̃ testoba kʼarebabʉ dayirãba ĩjãita Jeowara sewa nebʉrʉ oẽãta (Tito 1:2). Dayirãbara ĩjãseapanʉ Apocalipsis 21:​5, 6ba jarabʉra wãrĩnu berabarita. Akʉdayi kʼãrẽta jarakĩrãbʉta bedʼea «akʉra». Naʉ̃ bedʼea «akʉra» mejãcha zokʼabʉ Apocalipsis librode. Jeowaba bedʼea «akʉra» jarada tẽã, ¿kʼãrẽta jarasi? Naʉ̃ta jarasi: «Mʉ̃ara nekʼãrẽ jõma yiwidi babinʉmʉ», Jeowaba naʉ̃ra nekʼãrẽ awuara oira, ʉ̃ra zeidebʉrʉ oyi, mamina iya biʼia kʼawuabʉ baera maʉ̃ra wãrĩnu aripe oita, maʉ̃ba iya bedʼea jarabʉra wãrĩnu atia berabarinʉmʉ kĩrãkʼa jarabʉ (Is. 46:10). w23.11 3, 4 parr. 7, 8

Apostol Pedrobara edaʉde nemitia obasi, akʉdaya ʉ̃kʉrʉ yizata. Jesuba jara ũrĩbiside iyi sãwũã zʉbʉria berabarita Daizeze Bedʼeaba jarabʉ kĩrãkʼa, Pedrobara kʼẽãsi Jesura (Mar. 8:​31-33). Edaʉde Jesu kʼaidubemarãra akʉza Pedrota bedʼeakapanasi ãyidebema saʉ̃ta audre yi zroma kʼarea (Mar. 9:​33, 34). Ewari aba diamasi Jesu bei nãã Pedrobara yumakẽrã abaʉ kʉwʉrʉta urapetatasi (Juan 18:10). Adewara maʉ̃ diamasi Pedrobara jarasi Jesura ũdukata, maʉ̃ta jarasi ũbeabayeda (Mar. 14:​66-72). Maʉ̃ kʼarea Pedrora mejãcha jẽgasi Jesubara Pedrora maʉ̃ kʼarea idubʉ ẽ basi, iyi jẽda piradrʉda tẽã Jesubara iduaribisi Pedroba iyaʼa ũdubimarẽã kʼãrẽaba kãgabʉta iyira. Jesubara jarasi Pedroʼa iyi odepanʉrata biʼia akʉmarẽã (Juan 21:​15-17). Pedrobara okĩrãbasi Jesuba omarẽã zokʼadara akʉza Jeowaba ẽbẽrarã ʉ̃ta wãita jidasidera iyira yi nããrabemarane edabasi. w23.09 21, 22 parr. 6, 7

Apostol Pedroba naʉ̃ ũrãgʼata diasi zõrãrã: «Obeja akʉbariba akʉbari kĩrãkʼa akʉidua Daizeze obejara» (1 Ped. 5:​1-4). Bʉta zõrãrãbʉrʉ kʼawuapanʉ bʉara soiduba akʉkĩrãbʉta mebẽrã kongregasionebemara. Mamina bʉa nekʼãrẽ mejãcha oita erbʉ baera, mawũã ẽ bʉrʉ mapaebʉta sentibʉ baera, krĩchaseabʉ oau ẽ baita maʉ̃ trajora. ¿Kʼãrẽta oseabʉ? Jeowaʼa jara ũrĩbira bʉa kʼãrẽ krĩchabʉta. Pedroba bʉsi: «Awuruta kʼarebaibʉrʉ oibara Daizeze zareadeba» (1 Ped. 4:11). Mebẽrã kongregasionebemarabara erbʉ bedʼea zroma idi ewade jipa ara obe ẽãta, mamina kĩrãbera Jesuba zarea erbʉta ãyi kʼarebaita. Iyara maʉ̃ra oseabʉ idi akʉza ẽjũã biade. Jeowaba kãgabʉ zõrãrãba naʉ̃ta odamarẽã: mebẽrãta kãgadamarẽã, bia akʉdamarẽã akʉza yiza biata ũdubidamarẽã ãyaʼa. w23.09 29, 30 parr. 13, 14

Dayirãra jʉra kʼawuapanaibara ẽbẽrarã sãwũã krĩchabʉdeba. Dayirãta krĩchapanʉbʉrʉ ẽbẽra kĩrãkʼa, mawũãra ũrĩna ẽ bayi Jeowaba zokʼabʉra akʉza Jeowadeba jĩga wãñi (1 Cor. 3:19). Ẽbẽra naʉ̃ drʉadebemabara kãgabʉ ewari jõmaʉ̃nẽ daya kãgabʉtrʉ odamarẽã. Atia kʼawuadaya kʼãrẽta berabarisita kongregasion Pérgamone akʉza Tiatirade. Kristianora mamabemabara ojʉ̃drʉsida wuabemaba obʉ kĩrãkʼa, nekʼãrẽ oma yiwidʼi jʉ̃drʉsida akʉza mia erkʼãĩ jʉ̃drʉsida. Maʉ̃ kʼarea Jesubara naʉ̃ kongregasion ũmera kʼẽãsi ãya iduaribisida baera mia erkʼãĩ marẽã (Apoc. 2:​14, 20). Idi ewadebida ẽbẽrabara dayirã jaraseabʉ ãya krĩchabʉ kĩrãkʼa krĩchadamarẽã, edaʉde dayi mebẽrãba, dayi neũdukʼawuaba jaraseapanʉ odamarẽã dayirãba kãgabʉta, mawũã Jeowaba kãgabʉta oda ẽ marẽã. Ãya jaraseapanʉ kayirua ẽãta daya kãgabʉ oira, adewara jaraseapanʉ Daizeze Bedʼeaba jarabʉra kikibari baera zeri ẽãta. Edaʉde dayirãbara krĩchaseapanʉ Jeowabara audre bia jara ũrĩbibarata, maʉ̃ba edaʉde dayirãbara krĩchaseabʉ Daizeze Bedʼeaba zokʼabʉde wueta oita (1 Cor. 4:6). w23.07 16 parr. 10, 11

María Jesús papabara nesidabasi zareara iyaʼa jaradapeada oita. Iyira mia kʼãĩchua ẽ basi, mamina biogoibasi. Iyira wũãwũã neẽbasi baera kʼawua ẽ basi sãwũã dapʉẽita, mamina iya dapʉẽibasi Dayirã ẽdrʉbibari bʼaita, mia erkʼãĩkabasi baera sãwũã jaraibasi José iyi kima baiʼara wũãwũã baraita (Luc. 1:​26-33). ¿Maríabara sama ũdusi zareara? Jʉrʉsi kʼareba wuabemaraneta, bari jaraita widisi Gabrielʼa jaradiamarẽã iya sãwũã oita (Luc. 1:34). Dããra ẽãne wãsi Judáʼeda Elizabet akʉde maʉ̃ra yi mebẽrãbasi, Maríara mama bia wãsi. Mawũẽ Jeowaba kʼarebasi Elizabetdeba bedʼeamarẽã propesia aba maʉ̃ wũãwũã ʉ̃rʉ bedʼeabʉta (Lucas 1:​39-45). Maríaba jarasi Jeowara mejãcha zarea barabʉta (Luc. 1:​46-51). Jeowaba zarea diasi María Gabrieldeba akʉza Elizabetdeba. w23.10 14, 15 parr. 10-12

Jeowaba jidasi 144.000 pai ʉ̃ta wãita saserdotera bʼaita, Jesuʉ̃me ʉ̃tʉ (Apoc. 14:1). Ãyi nama udabʉdeweda Jeowaba iyi jaure zareaba jidasi, maʉ̃ba kʼarebabʉ ãyira Jeowaʉ̃me bia bʼaita. Ãyira tabernakulo santode eda wãbʉ kĩrãkʼabʉ. 144.000rãra Jeowaba jidasi iyi jaure zareaba ãyi nama udapanʉena, maʉ̃ba ãyira Jeowa wũãwũãra kĩrãkʼabʉ. Mamaʉ̃ba ʉ̃ta ãyira tabernakulo santo eda jʉ̃ẽbʉ kĩrãkʼabʉ (Rom. 8:​15-17). Santisimo tabernakulode badara jarakĩrãbasi bajã Jeowa chuta. Wua santo akʉza santisimo ẽzadra jirabadara jarakĩrãbasi Jesu kakuata, iyira ʉ̃tara wãbe ẽ basi kakuata bʉwʉrʉta akʉza watabara baera. Iyira ʉ̃ta wãibarabasi sumo saserdote templo espiritualdebema baera. Jesura ẽbẽrarãbari beisi baera o ewasi 144.000 pai ʉ̃ta wãita, mamina ãyira ʉ̃ta wã ẽ bʉwʉrʉta, yarata watabarabʉedara. Maʉ̃itara ãya maʉ̃ra idubʉibara jõma (Heb. 10:​19, 20; 1 Cor. 15:50). w23.10 28 parr. 13

Eprainitara iyi ʉ̃rʉ imitia bedʼeasidera Gedeónʼra kĩrʉ ẽ basi (Juec. 8:​1-3). Iyara kĩrʉ panʉi kaudeedabʉta ũdubisi ãyi bedʼea ũrĩbaside, mawũã bedʼea zromara ara osida. Zõrãrãbara abarika opanʉ ãyi ʉ̃rʉ imitia bedʼeasimina ũrĩpanʉne kĩrʉ ẽã (Sant. 3:13). Mawũã obʉba kʼarebabʉ kongregasione aduʼa bʼaita. Jeowa ʉ̃rʉ ibia bedʼeabidua. Gedeónba madianitara iyi juwa edre baebiside, wuabemara iyi ʉ̃rʉ ibia bedʼeasi, mamina iya osi Jeowa ʉ̃rʉ ibia bedʼeamarẽã (Juec. 8:​22, 23). ¿Zõrãrãbara sãwũã Gedeónba oda kĩrãkʼa oseapanʉ? Maraba nebia obʉ kʼarea Jeowa ʉ̃rʉ ibia bedʼeabiseabʉ (1 Cor. 4:​6, 7). Bari jaradaita, mebẽã abaʉa jaradara bʉa kʼãrẽaba bia obʉta, mebẽãba jaraseabʉ maʉ̃ra zebʉta Daizeze Bedʼeadeba akʉza organizasioneba. Zõrãrãbara krĩchaibara ãya mawũã jaradiabʉra Jeowa ʉ̃rʉ ibia bedʼeamarẽã mawũã obʉta, mawũã ẽ bʉrʉ wuabemaraba iyita akʉmarẽã mawũã obʉta. w23.06 4 parr. 7, 8

Dayirãba Jeowaʼa yiwidʼibʉta iya panʉ ẽ bʉrʉ naʉ̃ta widiseabʉ: ‹¿Mʉ̃a widibʉra yibiaka?›. Dayirãba edaʉde krĩchapanʉ dayirãba widibʉra bigabʉta, mamina wãrĩnu bʼaira maʉ̃ ẽ basi dayirãba nesidabadara. Dayirãba bedʼea zroma erbʉde Jeowaʼa widipanʉ maʉ̃ bedʼea zroma sãwũã ara oi ʉ̃rʉ, mamina maʉ̃ bedʼea zromara nekʼãrẽ awurudeba ara oseabʉ. Edaʉde nekʼãrẽ dayirãba widibʉra Jeowaba kãgabʉde bʉ ẽ (1 Juan 5:14). Bari jaradaita, krĩchadaya yibariraba odata ãya Jeowa yiwidʼiside widisida kʼarebamarẽã ãyi wũãwũã Jeowa ode kʼẽrẽpa bʼaita. Ãya mawũã widibʉra bigabʉ kĩrãkʼabʉ, mamina Jeowabara dayirã ajuerzade jarabʉ ẽ iya kãgabʉta omarẽã, awuarabʉrʉ iya kãgabʉ dayirã aba abakaʉba soiduba odamarẽã iya kãgabʉta (Deut. 10:​12, 13; 30:​19, 20). Maʉ̃ba yibarirabara Jeowa widiseapanʉ kʼarebamarẽã ãyi wũãwũãra soidu jʉ̃ẽita, mawũã ãyira Daizeze neũdukʼawua bakĩrãnamarẽã (Prov. 22:6; Efes. 6:4). w23.11 21 parr. 5; 23 parr. 12

¿Wuabemara so zarea diaibara sãwũã ũdubibʉ kãgata? Libro abaʉba jarabʉ Pabloba jarada ʉ̃rʉ, bedʼea so zarea diaibara jarakĩrãbʉ ẽbẽra bedʼea zroma berabarinʉmʉne iyi kʼawa bʼaita ũrĩta akʉza kʼarebaita. Dayi mebẽã bedʼea zroma ũdunʉmʉne so zarea diabʉdeba kʼarebabʉ dayi mebẽã Jeowaʉ̃me kʼẽrẽpa bamarẽã. Ewari jʉrʉpanʉne dayi mebẽã so zarea diaita ũdubipanʉ kãgata (2 Cor. 7:​6, 7, 13). So zarea diaita akʉza so zʉbʉria akʉira abarikabʉ kĩrãkʼabʉ, ¿kʼãrẽa mawũã jarapanʉ? Ẽbẽra so zʉbʉria akʉbʉbara wuabema zʉbʉrianʉmʉ ũdui kʼarebakĩrãbʉ so zarea bamarẽã. Nããra so zʉbʉria akʉpanʉ, maʉ̃are so zarea diapanʉ. Pabloba jarabʉ Jeowaba sãwũã zʉbʉria akʉbʉba so zarea diabʉta. Pabloba jarabʉ Jeowa ʉ̃rʉ naʉ̃ta: «Zeze dayirã kãga akʉbʉa akʉza Daizeze dayirã so zarea diabaria» (2 Cor. 1:3). w23.11 9, 10 parr. 8-10

Jesu kʼaidupanʉrabara jʉ̃ãseapanʉ bedʼea zroma ũduita. Akʉdaya apostol Pablo yizata. Iya jarasi Tesalónicadebemara naʉ̃ta: «Dai maraʉ̃me panaside daiba jarasida zʉbʉria ũdudaibasita, maʉ̃ta maraba kʼawuapanʉ kĩrãkʼa, aripe berabarisi» (1 Tes. 3:4). Akʉza Corintodebemara naʉ̃ta bʉsi: «Kãgapanʉ maraba kʼawuadamarẽã daiba kʼãrẽ bedʼea zroma erpananata [ . . . ] krĩchasida daira beita» (2 Cor. 1:8; 11:​23-27). Kristianora idi ewadebemabida bedʼea zroma ũduseapanʉ (2 Tim. 3:12). Bʉa Jesu ʉ̃rʉ ĩjãbʉta ũdubisi baera akʉza iyi kʼaidubemabasi baera bʉ neũdukʼawuaraba mawũã ẽ bʉrʉ bʉ mebẽrãnebemabara zʉbʉria obadabaibara. Mawũã ẽ bʉrʉ bʉ trajabʉmae bʉ zokʼabʉba akʉza bʉme ãba trajapanʉraba zʉbʉria obadabaibara bʉa wãrĩnuta jarabʉ baera (Heb. 13:18). ¿Bʉa nebia jʉ̃ãbʉ ʉ̃rʉ jara ũrĩbibʉ kʼarea nokʼorabida zʉbʉria obadaka? Mamina dayirãba kʼãrẽ bedʼea zroma ũdubʉ ʉ̃rʉ krĩcha ẽã, Pabloba jarasi dayirãra sobia baseabʉta. w23.12 10, 11 parr. 9, 10

Jacobʼbara bedʼea zroma mejãcha ũdusi. Bari jaraita, yi wũãwũãra ũmeba Simeón akʉza Levíʉ̃meba imitia bedʼeabisida yi mebẽrã ʉ̃rʉ akʉza Jeowa ʉ̃rʉ. Adewara yi kima Raquel yi wũãwũã ũmeta to bʉeda beisi akʉza Jacob zõnãbaside jarraba kʼarea waĩbarabasi Egiptoeda (Gén. 35:​16-19; 37:28; 45:​9-11, 28). Jacobʼba naʉ̃ bedʼea zroma mejãcha ũdusimina idubʉ ẽ basi Jeowa ʉ̃rʉ ĩjãbʉta akʉza iya kʼãrẽ nebiata diaya adata. Adewara Jeowabida iyira bia akʉsi, iyaʼa nebia mejãcha diasi. Adewara Jacobʼbara Jeowa mejãcha biga diabasibaibara, yi warra José iya beidata krĩchabadara jẽda ũdusi kʼarea. Jacob Jeowaʉ̃me neũdukʼawua bia baera kʼarebasi maʉ̃ bedʼea zroma mejãcha zebʉra awuantaita (Gén. 30:43; 32:​9, 10; 46:​28-30). Abarika dayirãsida Jeowaʉ̃me neũdukʼawua biabʉrʉ bedʼea zroma dayirãba jʉ̃ã ẽãta ũdubʉrʉdera awuantaseapanʉ. w23.04 15 parr. 6, 7

Salmo 23de Davidba jara ũrĩbisi iya kʼãrẽaba ĩjãbʉta Jeowaba iyira wãrĩnu kãgata akʉza iyi bia akʉbʉta. Iya jara ũrĩbisi iyira Jeowaʉ̃mera jipade neũdukʼawua biata. Iya jarasi Jeowara obeja akʉbarita. Davidba Jeowaʼa idu yi jaradiabibasidera biʼia sentibasi akʉza iyara soiduba ĩjãbasi Jeowa ʉ̃rʉ. Davidbara kʼawuabasi Jeowabara ewari jõmaʉ̃nẽ ũdubibasita iyi kãgabʉta. ¿Kʼãrẽa mawũã kʼawuabasi iyara? Davidbara sentibasi Jeowabara iyira biʼia akʉbʉta, ewari jõmaʉ̃nẽ diabasi baera nekʼãrẽ iya nesidabʉta. Adewara Davidbara kʼawuabasi Jeowara iyi neũdukʼawuata akʉza Jeowabara iyira biʼia akʉbʉta. Maʉ̃ba iya kʼawuabasi ʉ̃ra zeide nekʼãrẽ berabaribʉrʉdebida Jeowaba diaita iya nekʼãrẽ nesidabʉra. Davidbara ĩjãbasi Jeowabara iyira kãgata akʉza iyira biʼia akʉita. Naʉ̃ba kʼarebasi iyi aukʼara krĩcha zroma oẽ baita akʉza sobia bʼaita (Sal. 16:11). w24.01 28, 29 parr. 12, 13

Segunda Guerra Mundialdeba Daizeze odepanʉrabara pʉwʉrʉ mejãchaʉmae jaradia zebʉda Daizeze Bedʼeara. Maʉ̃ba ẽbẽra mejãchaʉba Jeowa ʉ̃rʉ ũdukʼawuabʉda akʉza iyi ʉ̃rʉ jaradiapanʉrasida. Zõrãrã Burubiadebemarabara Jesu kʼarebata jʉrʉpanʉ. Ãyara kãgapanʉ mebẽrã kʼãrẽ oita jarabʉrʉde, naʉ̃raba ũdudamarẽã ãya jarabʉra Jeowaba kãgabʉdebʉta. Adewara ãyara zokʼapanʉ Kongregasionʼra akʉbari zõrãrãta akʉza zõrãrãta, mawũã mebẽrã jaradiaita kʼãrẽta oibarata. Zõrãrã ʉ̃ta wãirãra Jesu juwararepanʉ (Apoc. 2:1). Mamina naʉ̃ra zõrãrãra kayirua obarira, maʉ̃ba ãyara edaʉde nekʼãrẽ aña opanʉ. Moisésba, Josuéba akʉza ʉ̃kʉrʉ Jesu kʼaidubemarabara edaʉde osida kayiruata (Núm. 20:12; Jos. 9:​14, 15; Rom. 3:23). Mawũãsidu Jesubara Zõrãrã Burubiadebema akʉza zõrãrã, jaradiabʉ kʼãrẽta oibarata. Maʉ̃ba dayirãbara naʉ̃ra mebẽrã Jeowa pʉwʉrʉ nãã edepanʉraba jarabʉ ʉ̃rʉra ĩjãseapanʉ. w24.02 23, 24 parr. 13, 14

Idi ewade dayirãbara Jeowara sobiabipanʉ. Dayirã bedʼeabʉrʉde jara ũrĩbibʉrʉde iyaʼa biga diabʉta, iyi kãgata akʉza iyi ẽbẽra biata. Dayirãba ẽbẽrarãra jaradia wãbʉrʉdera kʼarebaibara ãyira Jeowa kʼawa bamarẽã akʉza Jeowata akʉdamarẽã dayirãba akʉbʉ kĩrãkʼa, dayirã Zeze kĩrãkʼa (Sant. 4:8). Dayirãbara ẽbẽrarã jara ũrĩbikĩrã Daizeze Bedʼeaba kʼãrẽta jarabʉta Jeowa ʉ̃rʉ, ãyaʼa ũdubipanʉ iyi kãgata, iya nekʼãrẽ aripe obʉta, iyi buru biata, iyi zareata akʉza nekʼãrẽ awuru nebiara iya erbʉta. Dayirãbara Jeowa ʉ̃rʉ ibia bedʼeabibʉ zarea opanʉne iya kãgabʉ kĩrãkʼa oita. Dayirãba mawũã obʉdadera ũdubidayi dayirãra awuarapanʉta ẽbẽra kayiruara naʉ̃ drʉadebʉira, maʉ̃ kʼarea ãya widiseabʉ, ¿kʼãrẽa mawũãpanʉ? (Mat. 5:​14-16). Dayirã ãyibawara ewariza bedʼeabʉde ãyaʼa jara ũrĩbiseapanʉ kʼãrẽa mawũãpanʉta dayirãra. Maũba ẽbẽrarãbida Daizezeta ũdukʼawuakĩrãnañi. Dayirãba Jeowa ʉ̃rʉ ibia bedʼeabʉrʉdera iyi sota sobiabibʉ (1 Tim. 2:​3, 4). w24.02 10 parr. 7

Bʉ kristiano bia bʼaira nekʼãrẽ okʼawuabaibara, naʉ̃ba kʼarebayi kongregasione bʉa nekʼãrẽ omarẽã jarabʉta bia oita akʉza trajo ũduita mawũã bʉ mebẽrã kʼarebaita, adewara wuabemarabawara bia bʼaita. Bari jaraita le kʼawuara akʉza bʉ kʼawuara. Daizeze Bedʼeaba jarabʉ yumakẽrã sobiabʉbara Daizeze Bedʼeata akʉbʉta akʉza naʉ̃ ʉ̃rʉ krĩchabʉta ewariza (Sal. 1:​1-3). Kʼarebayi krĩchaita Jeowa krĩchabʉ kĩrãkʼa akʉza kʼarebayi biʼia krĩchaita (Prov. 1:​3, 4). Mebẽrã kongregasionebemarabara nesida ãyita kʼarebadamarẽã, maʉ̃ kʼarea yumakẽrãrabara biʼia jaradia kʼawuaibara akʉza ũrãgʼa biata dia kʼawuaibara Daizeze Bedʼeadeba. Adewara bʉa bia le kʼawuabʉbʉrʉ akʉza bia bʉ kʼawuabʉbʉrʉ diaseabʉ komentario mebẽrã so zarea diabʉta. Ãba yi jʉrebʉde diskurso diabʉta mawũã ẽ bʉrʉ asambleade diskurso diabʉta, bʉseabʉ bʉ kuadernone ãya bedʼea jarabʉta. Maʉ̃ba kʼarebayi bʉa ĩjãbʉ zarea erbaita akʉza wuabemarabida ũrãgʼa bia diaita. w23.12 26, 27 parr. 9-11

Bʉ pera sentibʉrʉde krĩchara kʼãrẽta oita Jeowaba ʉ̃ra zeide, neẽ bʉrʉde Diarura. Krĩchara poaga 2014de asambleade ũdubidapeadata, zeze abaʉba jara ũrĩbibʉ yi mebẽrã drʉa kĩrãwãreãnẽ sãwũã bʼaita ẽbẽrarã 2 Timoteo 3:​1-5 bayeda jarabʉta neẽbʉrʉ. Jarabakasi ẽjũã kĩrãwãreãnẽrã dayirãra sobiapanañi, ãyi ẽbẽrarã ãyirai yi kãgayi, Daizezeta kãgadayi, sainʉ oseabʉta kʼawuabayi akʉza edabʉta krĩchabayi, Daizezeʼa yiwidʼipanañi, yibarira bedʼea ũrĩñi, biga dia kʼawuapanañi akʉza kʼẽrẽpapanañi, ãyi mebẽrã kãga ũdubiyi, awururaʉ̃me bedʼea abarika zeyi, ibia bedʼeapanañi akʉza ãyi kakua bia zokʼa kʼawuabayi, adewara ẽbẽra biarabayi akʉza bʉa ãyi ʉ̃rʉ ĩjãseabayi, mawũã panʉra kʼawa bara. ¿Bedʼeabarika bʉ mebẽrãbawara drʉa kĩrãwãreãnẽ sãwũã bʼai ʉ̃rʉra? w24.01 6 parr. 13, 14

Kʼãrẽ kĩrãkʼa yibia Jeowaba iyi pʉwʉrʉdebemara jõmaʉ̃ta bia akʉbʉ baera, Daizeze Bedʼeaba jarabʉ: «Jeowara mejãcha sobiabʉ iyi pʉwʉrʉ kʼarea» (Sal. 149:4). Mawũãmina ʉ̃kʉrʉra krĩcha opanʉ, krĩchapanʉ baera Daizezeba ãyira bia akʉ ẽãta, ʉ̃kʉrʉ ẽbẽrarã Daizeze Bedʼeade eda jarabʉrasida krĩcha osida, edaʉde krĩchasida baera ãyira Daizezeba bia akʉ ẽãta (1 Sam. 1:​6-10; Job 29:​2, 4; Sal. 51:11). Daizeze Bedʼeaba jara ũrĩbibʉ ẽbẽrarã nekayirua omiaramina Daizezeba bia akʉbʉta ãya kʼãrẽ obʉra, ¿sãwũã? Jesu ʉ̃rʉ ĩjãibara akʉza buru kʼoeibara (Juan 3:16). Mawũã ũdubibʉ jõmaʉ̃ra daya nemitia obadara wua oẽãta akʉza Jeowaba jarabʉde bʼaita (Hech. 2:38; 3:19). Mawũã opanʉbʉrʉ Jeowara mejãcha sobiayi iyi neũdukʼawua bakĩrãpanʉ baera. Nekʼãrẽ jõma obʉbʉrʉ daya Jeowa oya adata aripe oita mawũãra Jeowaba bia akʉyi dayirãra akʉza dayirã neũdukʼawua bia bayi (Sal. 25:14). w24.03 26 parr. 1, 2

Dayirãbida abarika oseabʉ Jesu kʼaidupananaraba oda kĩrãkʼa, nokʼoraba dayirã jarabʉrʉde wua jaradia ẽ bamarẽã Daizeze Bedʼea ʉ̃rʉ. Kʼawuapanʉ Jeowaba kʼarebaita dayirãba jaradiapanʉta aribaeita. Maʉ̃ba Jeowa widira zowaĩnĩgʉata akʉza buru biata. Jeowa kʼarebata widira, mawũã bedʼea zroma awuantaita. Dayirã mejãchaʉta kayabʉ, mawũã ẽ bʉrʉ sopʉabʉ, dayirãba ũduseabʉ bedʼea zromata dayirã mebẽrãne, dayirã pẽwãbʉda kʼarea, mawũã ẽ bʉrʉ badu bedʼea zromata. Pandemiaba akʉza yõba audre zarea babiseabʉ bedʼea zroma awuantaita. Jõma Jeowaʼa jarada bʉ sopʉabʉra, bʉa bʉ neũdukʼawuara jarai kĩrãkʼa akʉza sãwũã sentibʉta, wãrĩnu ĩjãra Jeowaba kʼarebaita bʉ bedʼea zroma ũdubʉrʉdera (Sal. 37:​3, 5). Dayirã Jeowa mejãcha yiwidʼibʉdeba kʼarebabʉ bedʼea zroma awuantaita (Rom. 12:12). Jeowabara kʼawuachu kʼãrẽ berabarinʉmʉra iyi odepanʉrãra, Jeowaba «ũrĩñi kʼareba widibʉ bedʼeara» (Sal. 145:​18, 19). w23.05 5, 6 parr. 12-15

Daya nekʼãrẽ oi krĩchabʉrʉde krĩchaibara maʉ̃ ʉ̃rʉ sãwũã akʉbʉta Jeowaba, mawũã jidaita Jeowaba kãgabʉde (Efes. 5: 17). Dayirãba dayi bebʉde nekʼãrẽ oi nãã Daizeze Bedʼearadebemata jʉrʉpanʉbʉrʉ akʉza maʉ̃ne kĩrãkʼa opanʉbʉrʉ ũdubipanʉ Jeowade kĩrãkʼa krĩchabʉta. Maʉ̃ba Daizeze Bedʼeadebemaba jarabʉde oita jidapanʉbʉrʉ, maʉ̃ba kʼarebayi nebia jidaita. Diarubara kãgabʉ dayirã ewarira zokʼadamarẽã naʉ̃ drʉadebemaba opanʉ kĩrãkʼa, mawũã ewari neẽ bamarẽã Daizezeba kãgabʉ oita (1 Juan 5:19). Kristiano abaʉita zare ẽ bʉrʉ trajo bia jʉrʉita, estudiaita unibersidade, plata ũduita, mamina zarebʉrʉ Daizeze Bedʼeaba jarabʉ oita, maʉ̃ba ũdubibʉ naʉ̃ drʉadebema kĩrãkʼa krĩchabʉta. Maʉ̃ oira kayirua ẽ, mamina dayi bebʉde nããra ba ẽ baibara naʉ̃ drʉadebema krĩchata. w24.03 24 parr. 16, 17