Pãrĩguade barãra awuarabʉrʉ ũnane bara

1, 2. (1) Pabloba maʉ̃ karta Éfesodebemaraita bʉsidera, ¿sama chuasi iyira? akʉza ¿kʼãrẽa bʉsi iya maʉ̃ra? (2) ¿Kʼãrẽ bedʼeata panʉnai naʉ̃ artikulodera?

PABLO Romane iyi deda jida erpanasidera, iyara so zarea diakĩrãbasi mebẽrã. Iyara mebẽrãra kĩrãbita akʉ jʉ̃ẽ ẽ baera, kartata bʉsi. Maʉ̃ kartara poaga 60de, mawũã ẽ bʉrʉ 61ne bʉsibaibara mebẽrã Éfesodebemaraita (Efes. 1:1; 4:1).

² 10 poaga maʉ̃ berabari nãã, Pablobara Éfesode jaradiabasi bedʼea bia Daizeze Bedʼeadebemata (Hech. 19:​1, 8-10; 20:​20, 21). Iyara mejãcha kãgabasi mebẽrãra akʉza kʼarebakĩrãbasi ãyira Jeowaʉ̃me kʼẽrẽpa panamarẽã. Iyara maʉ̃ra kristianorãra, ¿kʼãrẽa bʉsi pãrĩgua ʉ̃rʉ akʉza ũna ʉ̃rʉ? ¿Kʼãrẽta kʼawuapanʉ dayirãba maʉ̃neba? Akʉdaya bedʼea ũme naʉ̃ra bedʼea panʉbʉta.

PÃRĨGUADEBA ŨNAENA

3. ¿Kʼãrẽ bedʼeata zokʼasi Pabloba Éfesodebemara karta bʉ dia bʉeside?

³ Pabloba kristianora Éfesodebemara naʉ̃ta jarasi: «Nããra marara pãrĩguabasi, mamina atiara ũnapanʉ» (Efes. 5:8). Pabloba nama zokʼasi bedʼea pãrĩguata akʉza ũnata Éfesodebemara ũdubita ãya nekʼãrẽ awuara ojʉ̃drʉsita. Akʉdaya Pabloba kʼãrẽa Éfesodebemara jarasita ãyira pãrĩguabʉta.

4. ¿Kʼãrẽa epesiorãra pãrĩguadepanasi?

⁴ Religion zeri ẽãta. Krisitano Éfesodebemaraba Daizeze ʉ̃rʉ wãrĩnu kʼawuai nããra religion zeri ẽãne edapanasi akʉza magia ʉ̃rʉ ĩjãpanasi. Éfeso pʉwʉrʉde basi templo daizeze zeri ẽ Artemisdeta. Mejãcha ẽbẽrarã maʉ̃ ewaridebemaraba krĩchapanasi maʉ̃ templora audre yibiata wuabemaraneira. Ẽbẽrarã mejãchaʉba nekʼãrẽ oma yiwidʼipanasi akʉza ne nẽdobarirabara nẽdonapasi nekʼãrẽ oma daizeze zeri ẽ Artemisdeta, maʉ̃ba ãyara plata mejãcha ganapanasi (Hech. 19:​23-27). Adewara maʉ̃ pʉwʉrʉdera magiata mejãcha opanasi (Hech. 19:19).

5. ¿Kʼãrẽa Pablobara jarasi ẽbẽrarã Éfesodebemara pãrĩguadebʉta?

⁵ Wawiada ẽ basi kʼãrẽ zokʼabʉta. Ẽbẽra Éfesodebemarabara yi kayiruata mejãcha opanasi akʉza wawia ũdubida ẽ basi ãya nekʼãrẽ omarẽã zokʼabʉra. Adewara piesta religionebema obʉrʉdera imitia bedʼeapanasi (Efes. 5:3). Ʉ̃kʉrʉ ẽbẽra Éfesodebemaba kayirua obʉrʉdera mejãcha krĩcha zroma oẽbasi maʉ̃ kʼarea (Efes. 4:​17-19). Ãya wãrĩnu ʉ̃rʉ kʼawuai nããra sopʉada ẽ basi kayirua obʉrʉdera akʉza krĩchada ẽ basi Jeowa sãwũã sentibʉta ãya maʉ̃ kayirua obʉrʉde. Maʉ̃ kʼarea Pablobara jarasi ãyira pãrĩguadebʉta akʉza Daizezedeba jĩgabʉta.

6. ¿Kʼãrẽa Pablobara jarasi ẽbẽrarã Éfesodebemarãra ũnapanʉta?

⁶ Ʉ̃kʉrʉ ẽbẽrarã Éfesodebemarabara ãya nekʼãrẽ kayirua obadara idubʉsida. Maʉ̃ kʼarea Pabloba ãyi ʉ̃rʉ naʉ̃ta jarasi: «Mamina atiara ũnapanʉ Jesuʉ̃me panʉ baera» (Efes. 5:8). Jeowaba nekʼãrẽ omarẽã zokʼabʉta wawia ũdubisida ãyara akʉza maʉ̃ba ũnanebʉ kĩrãkʼapanasi (Sal. 119:105). Naʉ̃ra ẽbẽrarã Éfesodebemarabara idubʉsida ãyi religion zeri ẽãra akʉza ãya kayirua obadasida. Maʉ̃ba ãyara Daizezede kĩrãkʼa opanasi akʉza zarea opanasi Jeowaʼa yiwidʼita iya kãgabʉ kĩrãkʼa (Efes. 5:1).

7. Dayirã idi sãwũã berabaribʉra, ¿kʼãrẽne abarikabʉ kristianora Éfesodebemaraʉ̃me?

⁷ Éfesodebemara kĩrãkʼa nããra dayirãra religion zeri ẽãne basibaibara akʉza yi kayiruata obasibaibara. Ʉ̃kʉrʉ dayirãnebemabara religion zeri ẽãba piesta obʉta obasi, mawũã ẽ bʉrʉ Jeowaba nekʼãrẽ omarẽã zokʼabʉaʼa wawia ũdubida ẽ basi. Mamina dayirãba Jeowa ʉ̃rʉ wãrĩnuta kʼawuaside akʉza kʼawuaside saʉ̃ta bigata adewara saʉ̃ta biga ẽãta, idubʉsida dayirãba kʼãrẽ kayirua obadara. Akʉza ojʉ̃drʉsida nekʼãrẽ Jeowaba omarẽã zokʼabʉta, maʉ̃ kʼarea nebiata ũdusida (Is. 48:17). Kayirua daya nãã obadata akʉza religion zeri ẽãba piesta obʉ idubʉira zare, mamina dayirãbara Jeowaba zokʼabʉta oibara. ¿Kʼãrẽba kʼarebaseabʉ maʉ̃ oita?

Ʉ̃kʉrʉ potota diasida Papyrology Collection, Graduate Library, University of Michigan, P.Mich.inv. 6238. Licensed under CC by 3.0

JĨGA BʼAIBARA PÃRĨGUADEBA

8. Efesios 5:​3-5 bayeda jarabʉdebara, ¿kʼãrẽta oẽbaibarabasi kristianora Éfesodebemarabara?

⁸ (Akʉra Efesios 5:​3-5). Kristianora Éfesodebemaraba Jeowaba nekʼãrẽ omarẽã zokʼabʉ wawia ũdubira, idubʉibarabasi nekʼãrẽ Jeowaba kãga ẽãta akʉza ãyara idubʉibarabasi imitia bedʼeabʉra, adewara Jeowaba mia erkʼãĩ ʉ̃rʉ kʼãrẽ jarabʉta ũrĩbarabasi. Pabloba kristianora Éfesodebemara jarasi ãya nekʼãrẽ kayirua obʉra idubʉibarabasita ãya Daizeze Nokʼode nebiata ũdukĩrãbasibʉrʉ.

9. ¿Kʼãrẽa jĩga bʼaibara yi kayiruadeba?

⁹ Dayirãsida jʉra kʼawuabaibara kayirua oẽ baita (Efes. 5:11). Ẽbẽra abaʉba akʉbʉbʉrʉ, ũrĩbʉbʉrʉ akʉza mia erkʼãĩ ʉ̃rʉ bedʼeabʉbʉrʉ, naʉ̃ba kayirua obiseabʉ (Gén. 3:6; Sant. 1:​14, 15). Pʉwʉrʉ abaʉde mebẽrã mejãchaʉta mensajeta ãyirai zokʼa bʉepanasi internetʼneba. Ãyimara ãyira «neũdukʼawuarabasi». Nããra jõmaʉ̃ta nekʼãrẽ Daizezedebema ʉ̃rʉ bedʼea jʉ̃drʉsida, mamina tẽã mia erkʼãĩ ʉ̃rʉ bedʼeasida. Maʉ̃ra ẽbẽranebemara mejãchaʉba jarasida ãyi maʉ̃ ʉ̃rʉ bedʼeabʉba yi kayiruata obisita.

10. ¿Diaruba kʼãrẽta obʉ dayirã sewaita? (Efesios 5:6).

¹⁰ Naʉ̃ drʉa Diaruba zokʼabʉbara dayirã krĩchabikĩrãbʉ Jeowaba nekʼãrẽ omarẽã jarabʉra zeri ẽãta (2 Ped. 2:19). Diaruba ẽbẽrarã mawũã sewabʉra dããraba. Iya maʉ̃ta obʉ ẽbẽrarãba kʼawua ẽ marẽã saʉ̃ta bigata akʉza saʉ̃ta zeri ẽãta (Is. 5:20; 2 Cor. 4:4). Maʉ̃ kʼarea telebisorde, internetʼne ũdubibʉ nekʼãrẽ Jeowaba kãga ẽãta. Diaruba kãgabʉ dayirãba krĩchamarẽã ẽbẽrarãba naʉ̃ drʉade obʉra kayirua ẽãta, awuarabʉrʉ yibiata akʉza dayirãba maʉ̃ta obʉbʉrʉ sobia bʼaita (akʉra Efesios 5:6).

11. Angela yizaba ¿sãwũã ũdubibʉ Efesios 5:7ba jarabʉ oira yibiata? (Akʉra potota).

¹¹ Diarubara kãgabʉ dayirãra ãba panamarẽã ẽbẽrarã Jeowaba kãgabʉde bʉ ẽãʉ̃me. Maʉ̃ kʼarea Pabloba kristianora Éfesodebemara naʉ̃ta jarasi: «Ãyide kĩrãkʼa oraidua» (Efes. 5:7). Dayirãra ẽbẽrarã dayirãba kĩrãbita ũdubʉmebʉrʉ jʉra kʼawuabaibara ẽ awuarabʉrʉ jʉra kʼawuabaibara internetʼne dayirã kʼaiʉ̃me bedʼeabʉ kʼareabida. Angelaa Asiadebemaba, jara ũrĩbibʉ kʼãrẽa jʉra kʼawuabaibarata internetʼne kʼaiʉ̃me bedʼeabʉ kʼarea. Iya jarabʉ: «Awuru ẽbẽrarãʉ̃me internetʼneba bedʼeaira biga ẽ, maʉ̃ba mʉ̃ sãwũã krĩchabʉra awuara krĩchabisi baera. Mʉ̃itara kʼãrẽ ẽ basi «neũdukʼawuara» Jeowaba zokʼabʉde bʉ ẽbawara ãba bʼaira. Mʉ̃ara wiña wiñane krĩcha wãsi nekʼãrẽ Jeowaba jʉrabʉ oira bigata». Mamina zõrãrã kongregasionebemaraba kʼarebasida Angelaba iya nekʼãrẽ aña obadata awuara omarẽã. Iya jarabʉ: «Atiara mʉ̃ara krĩchabʉ Jeowa ʉ̃rʉ akʉza iya kʼãrẽ omarẽã kãgabʉ ʉ̃rʉ, krĩchai kaude ẽbẽrarãʉ̃me bedʼeaita internetʼneba».

12. ¿Sãwũã kʼawuaseapanʉ dayirãba Jeowaba nekʼãrẽ omarẽã zokʼabʉ wawia ũdubibʉ kʼawuaita?

¹² Ẽbẽrarã naʉ̃ drʉadebemarabara krĩchapanʉ nekʼãrẽ Jeowaba dayirã omarẽã zokʼabʉra biga ẽãta, mamina dayirãra jʉra kʼawuabaibara mawũã krĩcha ẽ baita, biʼia kʼawuapanʉ baera maʉ̃ra sewidata (Efes. 4:​19, 20). Dayirãkʉza naʉ̃ta widibara: «¿Mʉ̃ra zarea obʉka ẽbẽrarã Jeowaba kãgabʉde bʉ ẽãbawara ãba ba ẽ baita? ¿Mʉ̃ra zarea obʉka Jeoware bʼaita wuabemaraba mʉ̃ ʉ̃rʉ aña krĩchaimina?» 2 Timoteo 2:​20-22 bayeda jarabʉ kĩrãkʼa, jʉra kʼawuabaibara kongregasionebida kʼãrẽ neũdukʼawuara jʉrʉbʉ kʼarea. Kĩrãbedaibara ʉ̃kʉrʉbara kʼareba ẽ baita dayirã Jeowa ode kʼẽrẽpa bamarẽã.

«ŨNA WŨÃWŨÃ KĨRÃKʼA PANAIDUA»

13. ¿Kʼãrẽta jarakĩrãbʉ bʼaita ũna wũãwũã kĩrãkʼa? (Efesios 5:​7-9).

¹³ Pablobara Éfesodebemara bari jara ẽ basi ẽbẽra kayiruaraba opanʉ kĩrãkʼa opana ẽ marẽã, awuarabʉrʉ jarasi «ũna wũãwũã» kĩrãkʼa panamarẽã (akʉra Efesios 5:​7-9). ¿Kʼãrẽta jarakĩrãbʉ naʉ̃ba? Jarakĩrãbʉ panaibarata ewari jõmaʉ̃nẽ kristianoʼara kĩrãkʼa, mawũã oira akʉibara Daizeze Bedʼeata ewari jõmaʉ̃nẽ akʉza akʉibara kartara Daizeze Bedʼeadebemarata. Jipade yibia bia akʉita Jesu yizata akʉza iya jaradiadata, iyira ũnatabʉ baera drʉade panʉraita (Juan 8:12; Prov. 6:23).

14. ¿Sãwũã kʼarebaseabʉ Daizeze jaure zareabara?

¹⁴ Adewara nesidapanʉ Daizeze jaure zareata panaita ũnanebema wũãwũãra kĩrãkʼa. ¿Kʼãrẽa? Zare baera naʉ̃ drʉadebemaba mitia obʉ kĩrãkʼa oẽ baita (1 Tes. 4:​3-5, 7, 8). Daizeze jaure zareaba kʼarebayi naʉ̃ drʉadebema kĩrãkʼa krĩcha ẽ baita. Naʉ̃ra drʉadebemarabara akʉ ẽ baera nekʼãrẽra Jeowaba akʉbʉ kĩrãkʼa. Adewara Daizeze jaure zareaba kʼarebaseabʉ ẽbẽra bia bʼaita akʉza aripe oita (Efes. 5:9).

15. ¿Sãwũã jidaseapanʉ Daizeze jaure zareara? (Efesios 5:​19, 20).

¹⁵ ¿Sãwũã jidai Daizeze jaure zareara? Jeowaʼa widibara maʉ̃ta diamarẽã. Jesuba jarasi jaure zareata Jeowaʼa wididara, Jeowaba diayi (Luc. 11:13). Ãba yi jʉrebarima wãbʉrʉdebida Daizeze jaure zarea jidapanʉ (akʉra Efesios 5:​19, 20). Daizeze jaure zareaba kʼarebayi dayirã Jeowaba kãgabʉde bamarẽã.

16. ¿Kʼãrẽba kʼarebai nekʼãrẽ bia jida kʼawuaita? (Efesios 5:​10, 17).

¹⁶ Daya nekʼãrẽ oi krĩchabʉrʉde krĩchaibara maʉ̃ ʉ̃rʉ sãwũã akʉbʉta Jeowaba, mawũã jidaita Jeowaba kãgabʉde (akʉra Efesios 5:​10, 17). Dayirãba dayi bebʉde nekʼãrẽ oi nãã Daizeze Bedʼearadebemata jʉrʉpanʉbʉrʉ akʉza maʉ̃ne kĩrãkʼa opanʉbʉrʉ ũdubipanʉ Jeowade kĩrãkʼa krĩchabʉta. Maʉ̃ba Daizeze Bedʼeadebemaba jarabʉde oita jidapanʉbʉrʉ, maʉ̃ba kʼarebayi nebia jidaita.

17. ¿Kʼãrẽta jarakĩrãbʉ dayirã ewari bia zokʼaita? (Efesios 5:​15, 16 akʉra potota).

¹⁷ Pabloba ũrãgʼasi kristianora Éfesodebemara biʼia zokʼadamarẽã ãyi ewarita (akʉra Efesios 5:​15, 16). Diarubara kãgabʉ dayirã ewarira zokʼadamarẽã naʉ̃ drʉadebemaba opanʉ kĩrãkʼa, mawũã ewari neẽ bamarẽã Daizezeba kãgabʉ oita (1 Juan 5:19). Kristiano abaʉita zare ẽ bʉrʉ trajo bia jʉrʉita, estudiaita unibersidade, plata ũduita, mamina zarebʉrʉ Daizeze Bedʼeaba jarabʉ oita, maʉ̃ba ũdubibʉ naʉ̃ drʉadebema kĩrãkʼa krĩchabʉta. Maʉ̃ oira kayirua ẽ, mamina dayi bebʉde nããra ba ẽ baibara naʉ̃ drʉadebema krĩchata. Ũna wũãwũã kĩrãkʼa bʼaira bia zokʼaibara dayirã ewarita, bia kʼawuaibara saʉ̃ta nããra bʉeibarata dayi bebʉde.

18. ¿Kʼãrẽta osi Donaldbara iyi ewari bia zokʼaita?

¹⁸ Jʉrʉda Jeowadebema audre oya awa bʼaita. Naʉ̃ta osi Donaldba, iyira Sur Áfricadebema. Iya jarabʉ: «Akʉsi mʉ̃a kʼãrẽ obʉta, mõbe Jeowaʼa yiwidʼisi kʼarebamarẽã mʉ̃a audre oita iya kãgabʉta. Daizezeʼa yiwidʼisi kʼarebamarẽã trajo ũduita, mamina ewari erbaita Daizeze Bedʼea jaradia wãisida. Mʉ̃a ũdusi trajo biata, tẽã jʉ̃nẽãne mʉ̃ kimaʉ̃meba daiba audre ojʉ̃drʉsida Daizezedeta».

19. ¿Kʼãrẽba kʼarebai ũna wũãwũã kĩrãkʼa bʼaita?

¹⁹ Pabloba kartara kristianora Éfesodebemara bʉdaba kʼarebasi ãyi kʼẽrẽpa bamarẽã. Abarika dayirãsida mawũã kʼarebaseabʉ. Dayirãba atia kʼawuada kĩrãkʼa kʼarebayi dayi ewari sãwũã zokʼaita akʉza neũdukʼawuara bia jidaita. Adewara Daizeze Bedʼea semana za akʉbʉba kʼarebayi nekʼãrẽ aripe oita. Mawũã ũna wũãwũã kĩrãkʼa bʼaita. Daizeze jaure zareaba kʼarebaseabʉ dayirãba nebiata owãnamarẽã. Pabloba bʉdata dayirãba opanʉbʉrʉ, maʉ̃ba kʼarebayi dayirã Jeowaba kãgabʉde bʼaita. Maʉ̃ mawũã jõma obʉdeba ẽdrʉyi pãrĩguadeba, mawũã ũnane bayi.