ARTIKULO KʼAWUAITA 11
TRÃBI 129 Servimos con aguante
Kʼẽrẽpa baseabʉ nekʼãrẽba bʉ sopʉabibʉmina
«Akʉza mʉ̃ trʉ̃ kʼarea teiteabʉ» (APOC. 2:3).
KʼÃRẼTA ŨDUDAITA
Dayirãra Jeowaʉ̃me kʼẽrẽpa baseapanʉ, daya kayirua oda kʼarea sopʉabʉmina mawũã ẽ bʉrʉ wuabemaba kayirua oda kʼarea sopʉabʉmina.
1. ¿Kʼãrẽ nebiata ũdupanʉ dayirã Jeowa organizasionebʉ baera?
IDI ewade dayirãra naʉ̃ ewari jõbodoarebʉ akʉza audre ũdupanʉ zʉbʉriata. Maʉ̃ba jipade yibia Jeowa organizasione edapanaira. Naʉ̃ drʉade audre kayirua ũdu wãne Jeowaba dayirã diabʉ mebẽrã kongregasionebemata (Sal. 133:1). Akʉza kʼarebabʉ dayirã mebẽrãʼarabawara ãbapanamarẽã (Efes. 5:33–6:1). Akʉza iyara dayirãba buru bia nesidata diabʉ, mawũã aduʼapanaita.
2. ¿Kʼãrẽta oibara akʉza kʼãrẽa?
2 Dayirãra zarea odaibara Jeowaʉ̃me kʼẽrẽpa bʼaita. ¿Kʼãrẽa? Wuabemaraba nekʼãrẽ obʉba dayita sopʉabibʉ baera. Mawũã ẽ bʉrʉ nekʼãrẽ daya obʉba sopʉabibʉ baera. Audre sopʉa baseabʉ nekʼãrẽ daya aña obʉta badua iyaba obʉbʉrʉ. Dayirãbara nekʼãrẽ ũbea kʼarea nesidabʉ Jeowaʉ̃me kʼẽrẽpa bʼaita: Yi nããbemata, dayirã mebẽrãba nekʼãrẽ aña obʉba dayi sopʉabibʉ kʼarea. Yi ũmeta, dayi kimaba nekʼãrẽ aña obʉba sopʉabibʉrʉde. Yi ũbeata, daya nekʼãrẽ aña oda kʼarea sopʉabʉrʉde. Naʉ̃ra nekʼãrẽ ũbea ʉ̃rʉ kʼawuanʉmʉne akʉdayi nebʉrara Daizeze Bedʼeadebema maʉ̃ kĩrãkʼa berabaridarata.
KʼẼRẼPA BʼAIBARA MEBẼRÃRABA BIA EDADA ẼÃNE
3. ¿Kʼãrẽ bedʼea zromata ũdubʉ Jeowa odepanʉrabara?
3 Yi bedʼea zromata. Edaʉde ʉ̃kʉrʉ mebẽrã sãwũãbʉba dayita kĩrʉbiseabʉ. Ʉ̃kʉrʉbara dayirãra sopʉabibʉ, mawũã ẽ bʉrʉ dayirãta bia edada ẽ. Edaʉde zõrãrãbara nekʼãrẽ aña oseabʉ, maʉ̃ kʼarea ʉ̃kʉrʉba krĩchaseabʉ ãyira wãrĩnu Jeowa organizasionebʉ ẽãta. Maʉ̃ba mebẽrãʉ̃me ãba bʼai kaude, ãyira kĩrʉbʉ yi mebẽã ãyi kĩrʉbidaʉ̃me akʉza ãba yi jʉrebarimabida wã ẽ (Sof. 3:9). ¿Maʉ̃ra yibiaka? Atia akʉdayi yiza aba ẽbẽra Daizeze Bedʼeadebema mawũã berabaridata.
4. ¿Kʼãrẽ bedʼea zromarata ũdusi Pablobara?
4 Nebʉra Daizeze Bedʼeadebemata. Pablobara kʼawuabasi mebẽrãra kayirua omiarata. Bari jaraita, mebẽrã Jerusalénʼnebemarabara iyi ũdusidadera ĩjãna ẽ basi iyira wãrĩnu Jesu kʼaidubemata (Hech. 9:26). Tẽã ʉ̃kʉrʉra iyi ʉ̃rʉ imitia bedʼeasida wuabemaraba ĩjãna ẽ marẽã Pablo ʉ̃rʉ (2 Cor. 10:10). Akʉza Pabloba ũdusi sãwũã zõrãrã abaʉba nekʼãrẽ aña jidada kʼarea, wuabemara mebẽrãsida baebiseabasita (Gál. 2:11, 12). Adewara iyiʉ̃meba Daizeze Bedʼea jaradiabadaba, yi trʉ̃ Marcosba nekʼãrẽ osi Pablo kĩrʉbibʉta (Hech. 15:37, 38). Pablora maʉ̃ kʼarea mebẽrãneba jĩga wãi kaude, iyara akʉsi mebẽrãba kʼãrẽ nebiata erbʉta akʉza Jeowa ode kʼẽrẽpabasi. ¿Kʼãrẽba kʼarebasi Pablo kʼẽrẽpa bʼaita?
5. ¿Kʼãrẽba kʼarebasi Pablo mebẽrã kʼawa bʼaita akʉza ãyi kayirua kĩrãduaita? (Colosenses 3:13, 14 akʉza akʉra potota).
5 Pablobara mejãcha kãgabasi mebẽrãra. Naʉ̃ba kʼarebasi iya akʉ ẽ baita mebẽrãba kʼãrẽ aña obʉta, awuarabʉrʉ akʉita mebẽrãba kʼãrẽ nebia obʉta. Kãga ũdubibʉba kʼarebasi Pabloba iya Colosenses 3:13, 14de jarada kĩrãkʼa aripe oita (akʉra). Akʉdaya Pabloba sãwũã ũdubisita maʉ̃ta. Marcosba iyi doba amaesidera Pablora maʉ̃ kʼarea kĩrʉ kiki kʼawua ẽ basi Marcosʼʉ̃me, awuarabʉrʉ iya kolosensera karta bʉe diabʉsidera, ibia bedʼeasi Marcos ʉ̃rʉ akʉza jarasi Marcosbara iyaʼa so zarea diasita (Col. 4:10, 11). Pablo Romane karselde edabaside widisi iyira Marcosba akʉ jʉ̃ẽmarẽã (2 Tim. 4:11). Pablora mebẽrã kʼawabasi akʉza kĩrãduasi mebẽrãba kʼãrẽ kayirua odara. ¿Dayirãbara kʼãrẽta kʼawuabʉ Pabloba odadeba?
Pabloba bedʼea zromata ũdusi Bernabéʉ̃me akʉza Marcosʼʉ̃me, mawũãsidu iya kĩrãduasi maʉ̃ra akʉza Marcosʼʉ̃me sobiade trajasi. (Akʉra parrapo 5).
6, 7. ¿Sãwũã zarea oseapanʉ mebẽrãʼa kãga ũdubita ãyi kayirua omiamina? (1 Juan 4:7).
6 Kʼãrẽta kʼawuabʉta. Jeowabara kãgabʉ dayirãba zarea omarẽã mebẽrã kãga ũdubita (akʉra 1 Juan 4:7). Mebẽã abaʉba dayita bia eda ẽ bʉrʉ kristianoraba oibara kĩrãkʼa, krĩcha ẽ baibara kriña mawũã osita, awuarabʉrʉ kĩrãbeibara ãyabida Jeowaba kãgabʉde okĩrãbʉta (Prov. 12:18). Iyi ode kʼẽrẽpapanʉra nekayirua omiamina Jeowabara kãga. Akʉza ãya nekʼãrẽ aña obʉrʉdera, ãyiʉ̃me kĩrʉ ẽ akʉza ãyi neũdukʼawua babʉ (Sal. 103:9). Kʼãrẽ yibia Jeowade kĩrãkʼa kĩrãdua kʼawuaita mebẽrãba nekayirua obʉrʉde (Efes. 4:32–5:1).
7 Kĩrãbedaibara naʉ̃ ewari jõbodota arakʼaitaba baera audre mebẽrã kʼaita bʼaibarata. Maʉ̃ ewaridera audre pẽwãnañi dayirãra akʉza karselde eda bʉeseapanʉ. Maʉ̃ mawũã berabaribʉrʉdera dayirãbara mebẽrãta nesidayi (Prov. 17:17). Akʉdaya mebẽã Josep,a sãwũã berabarisita. España pʉwʉrʉde, iyira zõrãrã kongregasionebema. Iyira awuru mebẽrãbawara karselde ibalbʉesida kʼaiarebʉ ẽ baera. Iya jarabʉ: «Dai karselde basidera zare ẽ basi mebẽrãbawara kĩrʉira, ewari jõmaʉ̃nẽ ãyiʉ̃me ãbabasi baera. Maʉ̃ kʼarea kĩrãdua kʼawuabaibarabasi ãya kayirua obʉrʉta. Maʉ̃ba kʼarebasi mebẽrãbawara ãba bʼaita akʉza dayirãi yiya kʼarebaita, dai audu ẽbẽra kayiruara mejãchabasimina. Ewari aba, mʉ̃ juwara bʉawãsi, maʉ̃ba wuaba bʉrabasi akʉza maʉ̃ kʼarea nekʼãrẽ obe ẽ basi mʉ̃yidobaʉbara. Mʉ̃ra mebẽã abaʉba kʼareba wua tõ diasi akʉza nekʼãrẽ awurude kʼarebasi. Maʉ̃ne mʉ̃a kãga ũdubidamarẽãbʉta ũdubisida». Kʼãrẽ yibia kʼãwũãena mebẽrãʉ̃me bedʼea zroma ũdubʉrʉde ara oita.
KʼẼRẼPA BARA BɄ KIMABA NEKʼÃRẼ BɄ SOPɄABIBɄTA OBɄRɄDE
8. ¿Kʼãrẽ bedʼea zromata ũdupanʉ juwa jidapanʉrabara?
8 Yi bedʼea zromata. Juwa jidapanʉra jõmaʉ̃ba bedʼea zroma ũduyi, maʉ̃ta jarabʉ Daizeze Bedʼeaba (1 Cor. 7:28). ¿Kʼãrẽa? Ãyi ũmena kayirua omiara baera, nekʼãrẽ awuara opanʉ baera, nekʼãrẽ awuruta kãga baera akʉza awuarapanʉ baera, adewara kultura awuarabʉ baera. Maʉ̃ba ãyi juwa jida tẽãbʉrʉ ũduseabʉ ãyi kima wãrĩnu sãwũãbʉta ãyi juwa jidai nãã ũdu ẽ badata. Maʉ̃ kʼarea bedʼea zromata ũduseapanʉ akʉza ãya nekʼãrẽ aña obʉta akʉ ẽã jaraseapanʉ ãyi kimabʉrʉ nekʼãrẽ aña obʉta. Maʉ̃ba ãya bedʼea zroma erbʉ kʼarea krĩchaseapanʉ audre yibiata yi idubʉita. Mamina, ¿maʉ̃ oira yibiaka?b Akʉdaya sãwũã ẽbẽra wẽrã aba yi kimaba bia eda ẽ basimina zarea osita Jeowaʉ̃me kʼẽrẽpa bʼaita.
9. ¿Kʼãrẽ bedʼea zromata ũdusi Abigaílbara?
9 Nebʉra Daizeze Bedʼeadebemata. Abigaílʼra juwa jidabasi Nabalʼʉ̃me, naʉ̃ yumakẽrãra jipade ẽbẽra kayiruabasi (1 Sam. 25:3). ¿Abigaílʼra maʉ̃ yumakẽrãneba ẽdrʉseabasika? Oseabasi. David Nabal beade jʉ̃ẽbʉrʉdera Abigaílʼra mĩrʉ wãseabasi, mawũã Nabal beadamarẽã. Mamina iya maʉ̃ta oẽbasi, awuarabʉrʉ Davidʼʉ̃me bedʼeasi mawũã Nabalta beada ẽ marẽã (1 Sam. 25:9-13, 23-27). ¿Iyara kʼãrẽa maʉ̃ta osi?
10. ¿Kʼãrẽba kʼarebasibaibara Abigaíl yi kimaʉ̃me ãba bamarẽã maʉ̃ba iyi bia eda ẽ basimina?
10 Abigaílbara kãgabasi Jeowara akʉza wawia ũdubibasi Jeowaba juwa jidai ʉ̃rʉ kʼãrẽ jarabʉra. Abigaílbara kʼawuabasibaibara Jeowaba kʼãrẽta jarasita Adánʼa akʉza Evaʼa juwa jidai ʉ̃rʉ (Gén. 2:24). Abigaílbara kʼawuabasi Jeowaitara juwa jidaira jipade yibiabasita. Maʉ̃ kʼarea zarea osi iyi mebẽrã kʼarebaita akʉza yi kimasida. Iyara nekʼãrẽ mesera osi mawũã Davidba yi kima Nabalta bea ẽ marẽã. Iyara Davidʼa widisi ãya kayirua odata kĩrãduamarẽã, maʉ̃ kayiruara iya oẽ basimina. Naʉ̃ yuwẽrãra Jeowabara maʉ̃ kʼarea mejãcha kãgabasibaibara. Mebẽrã yumakẽrãraba akʉza yuwẽrãraba nekʼãrẽ mejãcha kʼawuaseapanʉ Abigaíl yizadeba.
11. (1) ¿Kʼãrẽta omarẽã kãgabʉ Jeowabara juwa jidapanʉraba? (Efesios 5:33). (2) Carmenba yi kimaʉ̃me ãba baita zarea odadeba, ¿kʼãrẽta kʼawuapanʉ? (Akʉra potota).
11 Kʼãrẽta kʼawuabʉta. Jeowabara kãgabʉ juwa jidapanʉrãra ãba panamarẽã, ãyi kimaʉ̃me ãba bʼai zaremina. Jeowara mejãcha sobiabʉ ũdubʉrʉde juwa jidapanʉrãra zarea opanʉta ãyirai kãga ũdubita akʉza wawia ũdubita (akʉra Efesios 5:33). Akʉdaya Carmen yizata, iyira juwa jidadata 6 poaga berabarida tẽã Daizeze ʉ̃rʉ kʼawua jʉ̃drʉsi akʉza buru kʼoesi. Iya jarabʉ: «Mʉ̃ kimabara kãga ẽ basi mʉ̃a Jeowa ʉ̃rʉ kʼawuaira, iyira mʉ̃aʼa imitia bedʼeabasi akʉza iyara jarabasi idubʉita mʉ̃ra. Poaga bio berabarida tẽã, mʉ̃ara kʼawuasi sãwũã biʼia bedʼeaita mʉ̃ kimaʉ̃me. Mʉ̃ara kʼawuabasi Jeowaba juwa jidaira sãwũã akʉbʉta, maʉ̃ kʼarea zarea osi mʉ̃ kimaʉ̃me ãba bʼaita. Akʉza maʉ̃ra mʉ̃a mawũã osi Jeowata kãgabasi baera».c Carmenʼra zarea osi yi kimaʉ̃me ãba bʼaita iyira 50 poagabayeda zarea osi yi kima kãga ũdubita akʉza wawia ũdubita.
Abigaílʼra zarea osi yi kimaʉ̃me ãba bʼaita, ¿bʉara maʉ̃neba kʼãrẽta kʼawuaseabʉ? (Akʉra parrapo 11).
BɄA KAYIRUA ODA KʼAREA IDUBɄRÃRA DAIZEZE ODEBɄTA
12. ¿Sãwũã krĩchaseapanʉ kayirua oda tẽã?
12 Yi bedʼea zromata. Daya kayirua oda kʼarea sopʉabʉba idubʉseabʉ Daizeze odebʉta. Daizeze Bedʼeaba jarabʉ daya kayirua obʉrʉdera dayi «so ãrĩbʉta akʉza sopʉabʉta» (Sal. 51:17). Mebẽã Robertʼra poaga biobayeda zarea obasi zõrãrã kʼarebabaridebema bʼaita, mamina iya kayirua zromata osi baera krĩchasi Jeowabara iyira kãga ẽãta. Iya jarabʉ: «Mʉ̃ra mejãcha krĩcha zroma obasi mʉ̃a kʼãrẽ kayirua oda ʉ̃rʉ krĩchabʉrʉba. Tẽã mʉ̃ra bi pʉaba kayasi, mʉ̃ra jẽgabasi akʉza yiwidʼibasi Jeowaʼa. Akʉza mʉ̃a krĩchasi Jeowabara ũrĩ ẽãta mʉ̃ bedʼeara, mʉ̃a kayiruata osi baera akʉza iyita sopʉabisi baera». Dayirãba kayirua obʉrʉdera sopʉa baseabʉ akʉza krĩchaseabʉ Jeowaba dayirã doba amaesita akʉza kʼarea Daizeze ode bʼaira neẽãta (Sal. 38:4). Bʉta maʉ̃ kʼarea sopʉabʉbʉrʉ krĩchara ẽbẽra Daizeze Bedʼeade jarabʉta sãwũã sopʉabasita iya kayirua oda kʼarea.
13. ¿Kʼãrẽ kayiruata osi Pedroba akʉza maʉ̃ba kʼãrẽ kayirua zromata obisi?
13 Nebʉra Daizeze Bedʼeadebemata. Diamasi Jesu bei nããra Pedroba kayirua mejãcha osi, maʉ̃ba iyaʼa kayirua zromata obisi. Bari jaraita, nããrãra iyara audre ĩjãsi iyi ʉ̃rʉ, jarasi wuabemaraba Jesu doba amaemina iyara amae ẽ baita (Mar. 14:27-29). Tẽã ãyi jardin Getsemanine baside Pedrora daʉba ba ẽ basi (Mar. 14:32, 37-41). Tẽã Pedrobara Jesura doba amaesi ẽbẽrarã biobʉ kĩrãbita (Mar. 14:50). Tẽã Pedrobara jarasi Jesura ũdukata (Mar. 14:66-71). ¿Kʼãrẽta osi Pedroba kʼawuaside iya kayirua odara yi zromabasita? Iyira mejãcha sopʉabasi akʉza jẽgabasi iya kayirua oda kʼarea (Mar. 14:72). Pedrora mejãcha krĩcha zroma osibaibara ũduside iyi neũdukʼawua Jesu beaita erbarabʉta. Maʉ̃nera iyara krĩchasibaibara iyira kʼãrẽita zeri ẽãta.
14. ¿Kʼãrẽba kʼarebasi Pedro Jeowaʉ̃me kʼẽrẽpa bamarẽã? (Akʉra poto yi nããrabemata).
14 Pedrora Jeowa ode kʼẽrẽpabasi nekʼãrẽ bio kʼarea. Iyira wuabemaraneba jĩga wã ẽ basi akʉza jʉrʉsi Jesu kʼaidubemara kʼawa bʼaita. Naʉ̃raba iyaʼa so zarea diasida (Luc. 24:33). Jesu jẽda piradrʉda tẽãra Pedroʼa yi ũdubisi iyaʼa so zarea diaita (Luc. 24:34; 1 Cor. 15:5). Tẽã, Pedroba kayirua oda kʼarea Jesubara kʼẽã ẽ basi awuarabʉrʉ nekʼãrẽ oita diasi Daizeze kongregasione (Juan 21:15-17). Pedroba kʼawuabasi iyara kayirua zromata osita, mamina maʉ̃ kʼarea idubʉ ẽ basi Daizeze odebʉta. ¿Kʼãrẽa? Iyara biʼia kʼawuabasi baera Jesuba iyita kãgata akʉza mebẽrã kongregasionebemaba iyaʼa so zarea diasida. ¿Kʼãrẽta kʼawuapanʉ Pedrodeba?
Juan 21:15-17 bayeda jarabʉ, Jesuba krĩcha ẽ basita Pedrora zeri ẽãta, awuarabʉrʉ so zarea diasi kʼẽrẽpa takeramarẽã. (Akʉra parrapo 14).
15. ¿Jeowabara dayirãba kʼãrẽta biʼia kʼawua bamarẽãbʉ? (Salmo 86:5; Romanos 8:38, 39 akʉza akʉra potota).
15 Kʼãrẽta kʼawuabʉta. Jeowabara kãgabʉ dayirãba kʼawuadamarẽã iya dayirã kãgata akʉza kĩrãduakĩrãbʉta dayirã kayiruara (akʉra Salmo 86:5; Romanos 8:38, 39). Dayirãba kayirua obʉrʉdera sopʉa baseabʉ. Mamina krĩchada ẽ baibara Jeowabara dayirãra kãga ẽãta akʉza kĩrãduakĩrã ẽãta dayirãba kayirua odara, awuarabʉrʉ kʼarebata mesera jʉrʉibara. Robertba jarabʉ: «Mʉ̃ara kayirua zromata osi mʉ̃yi ʉ̃rʉ ĩjãsi baera. Mʉ̃ zõrãrãʉ̃me bedʼeaside ũdusi Jeowaba sãwũã mʉ̃aʼa kãga ũdubisita. Zõrãrãbara mʉ̃ra doba amae ẽ basi. Ãya kʼarebasida mʉ̃a ĩjãmarẽã Jeowabara mʉ̃ra doba amae ẽãta». Dayirãbida biʼia kʼawuaseabʉ Jeowaba dayirãra wãrĩnu kãgata akʉza kĩrãduakĩrãbʉta dayirãba kayirua odara. Maʉ̃itara jẽda krĩchaibara daya kayirua oda kʼarea, adewara kʼarebata jʉrʉibara akʉza daya nekʼãrẽ aña odata jẽda oẽ baibara (1 Juan 1:8, 9). Dayirãba biʼia kʼawuapanʉbʉrʉ Jeowaba dayirã kãgata akʉza dayirã kayirua kĩrãduakĩrãbʉta, mawũãra dayirãba kayirua obʉrʉdera iyi odebʉta idubʉda ẽ bayi.
Bʉa ũdubʉrʉde zõrãrã kongregasionebemata bʉ kʼarebaita zarea trajabʉta, ¿sãwũã sentibʉ maʉ̃ kʼarea? (Akʉra parrapo 15).
16. ¿Bʉra kʼãrẽa Jeowa ode kʼẽrẽpa bakĩrãbʉ?
16 Dayirãba bedʼea zroma ũdubʉmina Jeowa ode bʼaita zarea opanʉbʉrʉ Jeowabara maʉ̃ra biʼia akʉbʉ. Jeowa kʼarebadeba dayirãra kʼẽrẽpa baseapanʉ dayirãba kayirua oda kʼarea sopʉabʉmina akʉza wuabemaraba kayirua oda kʼarea sopʉabʉmina. Dayirãbara Jeowa ũdubiseapanʉ iyi kãgabʉta akʉza iya nekʼãrẽ omarẽã jarabʉta wawia ũdubibʉta, zarea obʉde dayi kimaʉ̃me ãba bʼaita. Dayirãba kayirua zromata ora Jeowaʼa kʼareba widibara akʉza ĩjãnaibara iya dayirãra kãgata akʉza dayirãba kayirua odara kĩrãduakĩrãbʉta. Adewara iyiʉ̃me kʼẽrẽpapanaibara. Adewara kʼawuaseapanʉ dayirãta mapae ẽ bʉrʉ, nebiata ũduita (Gál. 6:9).
¿KʼÃRẼTA PANɄI?
¿Kʼãrẽa Jeowa ode kʼẽrẽpa bakĩrãpanʉ wuabemaraba dayirã sopʉabibʉmina?
¿Kʼãrẽa Jeowa ode kʼẽrẽpa bakĩrãpanʉ dayi kimaba sopʉabibʉmina?
¿Kʼãrẽa Jeowa ode kʼẽrẽpa bakĩrãpanʉ daya nekʼãrẽ oda kʼarea sopʉabʉmina?
TRÃBI 139 Krĩchara ẽjũã kĩrãwãreãnẽbʉta
a Ʉ̃kʉrʉ trʉ̃ra awuara jarabʉ.
b Daizeze Bedʼeaba jarabʉ yibia ẽãta juwa jidapanʉra yi idubʉira. Mamina edaʉde nekʼãrẽ berabaribʉba juwa jidapanʉrabara krĩchaseabʉ yi idubʉita. Akʉra nota jõbodoare yi 4debemata «Kimaneba jĩgara wãbʉde» Bʉra ewari jõmaʉ̃nẽ sobia baseabʉ librode.