¿Sãwũã kʼawuabʉ Jeowaba bʉa obʉra bia akʉbʉ kʼawuaita?

1. ¿Daizeze ode kʼẽrẽpapanʉra kʼãrẽba krĩcha obiseabʉ?

KʼÃRẼ kĩrãkʼa yibia Jeowaba iyi pʉwʉrʉdebemara jõmaʉ̃ta bia akʉbʉ baera, Daizeze Bedʼeaba jarabʉ: «Jeowara mejãcha sobiabʉ iyi pʉwʉrʉ kʼarea» (Sal. 149:4). Mawũãmina ʉ̃kʉrʉra krĩcha opanʉ, krĩchapanʉ baera Daizezeba ãyira bia akʉ ẽãta, ʉ̃kʉrʉ ẽbẽrarã Daizeze Bedʼeade eda jarabʉrasida krĩcha osida, edaʉde krĩchasida baera ãyira Daizezeba bia akʉ ẽãta (1 Sam. 1:​6-10; Job 29:​2, 4; Sal. 51:11).

2. ¿Jeowabara kʼairata bia akʉbʉ?

² Daizeze Bedʼeaba jara ũrĩbibʉ ẽbẽrarã nekayirua omiaramina Daizezeba bia akʉbʉta ãya kʼãrẽ obʉra, ¿sãwũã? Jesu ʉ̃rʉ ĩjãibara akʉza buru kʼoeibara (Juan 3:16). Mawũã ũdubibʉ jõmaʉ̃ra daya nemitia obadara wua oẽãta akʉza Jeowaba jarabʉde bʼaita (Hech. 2:38; 3:19). Mawũã opanʉbʉrʉ Jeowara mejãcha sobiayi iyi neũdukʼawua bakĩrãpanʉ baera. Nekʼãrẽ jõma obʉbʉrʉ daya Jeowa oya adata aripe oita mawũãra Jeowaba bia akʉyi dayirãra akʉza dayirã neũdukʼawua bia bayi (Sal. 25:14).

3. ¿Kʼãrẽ ʉ̃rʉ bedʼeadai naʉ̃ artikulodera?

³ ¿Kʼãrẽa ʉ̃kʉrʉbara krĩchaseabʉ Daizezeba ãyira bia akʉ ẽãta? ¿Sãwũã ũdubibʉ Jeowabara dayirã iya bia akʉbʉta? ¿Kʼãrẽta oibara kristiano abaʉba kʼawuaita Jeowaba iyira bia akʉbʉta?

¿KʼÃRẼA Ʉ̃KɄRɄBA KRĨCHASEABɄ JEOWABA BIA AKɄ ẼÃTA?

4, 5. ¿Krĩchapanʉbʉrʉ dayirãra zeri ẽãta kʼãrẽ ʉ̃rʉ ĩjãibara?

⁴ Dayirã bioʉba warrarainʉba krĩchabʉ dayirãra zeri ẽãta (Sal. 88:15). Mebẽã Adriánba jarabʉ: «Mʉ̃ra ewari jõmaʉ̃nẽ krĩcha zebʉrʉ zeri ẽãta, mʉ̃a kĩrãbebʉ mʉ̃ra yiwidʼibasita mʉ̃ mebẽrã drʉa kĩrãwãreãnẽ panamarẽã, mamina krĩchabasi mʉ̃ra maʉ̃ drʉa kĩrãwãreãnẽra eda ba ẽãta». Tonyra Jeowa ʉ̃rʉ Kʼawuabipanʉrãne wari ẽ basi, iya jarabʉ: «Mʉ̃ yibarirabara mʉ̃ara jarada ẽ basi mʉ̃ra kãgapanʉta mia jarada ẽ basi mʉ̃ kʼarea sobiapanʉta. Ãyara mʉ̃aʼa jarapanasi mʉ̃ara audre bia oseabasita».

⁵ Edaʉde dayirãba krĩchabaribʉrʉ dayirãra kʼãrẽita zeri ẽãta kĩrãbeibara Jeowaba iyi biaba dayirãra iyima wesita (Juan 6:44). Jeowabara akʉbʉ dayirãba kʼãrẽ nebia erbʉta akʉza iyara bia kʼawuabʉ dayirã so sãwũãbʉra, maʉ̃ta dayirãba ũdu ẽ mina (1 Sam. 16:7; 2 Crón. 6:30). Maʉ̃ kʼarea Jeowaba dayirã jarabʉbʉrʉ iyitara dayirãra jipade yibiata, ĩjãnaibara maʉ̃ ʉ̃rʉ (1 Juan 3:​19, 20).

6. ¿Iya nãã kayirua oda kʼarea kʼãrẽta krĩchasi Pablobara?

⁶ Dayirãba wãrĩnu ʉ̃rʉ kʼawuai nããra osibaibara nekʼãrẽ kayirua dayirã sopʉabibʉta (1 Ped. 4:3). Ʉ̃kʉrʉ ẽbẽrarã Jeowa ode kʼẽrẽpapanʉrasida zarea opanʉ yi kayirua yi edebi ẽ baita. ¿Bʉara edaʉde krĩchabarika Jeowabara kĩrãdua ẽãta bʉa nekʼãrẽ kayirua odara? Bʉa mawũã krĩchabaribʉrʉ, naʉ̃ba so zarea diayi, kĩrãbeiba ʉ̃kʉrʉ mebẽrãrasida zarea opanʉta mawũã krĩcha ẽ baita. Bari jaraita, Pabloba krĩchabasi iyira kʼãrẽita zeri ẽãta iya nekʼãrẽ aña obʉ kʼarea (Rom. 7:24). Mamina Pablora iya kayirua oda kʼarea jẽda krĩchasi akʉza iyira buru kʼoesi, mawũãsidu iyi ʉ̃rʉ bedʼeabʉrʉdera jarabasi wuabemara apostoleraira iyitrʉ audre edabʉta akʉza iyabʉrʉ audre kayirua osita (1 Cor. 15:9; 1 Tim. 1:15).

7. ¿Dayirãba nãã kayirua oda kʼarea sopʉabʉbʉrʉ kʼãrẽta kĩrãbeibara?

⁷ Jeowaba jarabʉ dayirãba kayirua oda kʼarea wãrĩnu soiduba jẽda krĩchapanʉbʉrʉ, iyara kĩrãduaita dayirã kayiruara (Sal. 86.5). Dayirãba kayirua oda kʼarea wãrĩnu soiduba jẽda krĩchapanʉbʉrʉ ĩjãseapanʉ Jeowaba iyi Bedʼeade jarabʉra wãrĩnuta, dayirãba kayirua oda kĩrãduaita (Col. 2:13).

8, 9. ¿Kʼãrẽba kʼarebai wua krĩcha ẽ baita Daizezebara dayirãra bia akʉbʉ ẽãta?

⁸ Jõmaʉ̃ba nekʼãrẽ jõma opanʉ mawũã Jeowaba omarẽã kãgabʉta oita, mamina ʉ̃kʉrʉba krĩchaseapanʉ ãyira mia kʼãrẽita zeri ẽãta akʉza Jeowabara bia akʉ ẽãta. Mebẽã aba yi trʉ̃ Amandaba naʉ̃ta jarabʉ: «Mʉ̃ara krĩchabʉ daya diaseabʉta Jeowa diaira daya oseabʉde wũẽta oibarata, maʉ̃ kʼarea mʉ̃ara kãgabʉ mʉ̃a oseabʉde wũẽta oita Jeowa kʼarea, mamina maʉ̃ta oau ẽ baera krĩchabʉ mʉ̃ra zeri ẽãta akʉza Jeowamabida zeri ẽãta».

⁹ ¿Kʼãrẽba kʼarebai bʉa krĩcha ẽ baita Jeowabara bia akʉbʉ ẽãta nekʼãrẽ dayirãba obʉra? Kĩrãbedaibara Jeowabara jʉ̃ã ẽãta dayirãba oseabʉde wũẽta odamarẽã awuarabʉrʉ Jeowaba ũdubʉrʉde dayirãba iyi kʼarea nekʼãrẽ oseabʉta opanʉbʉrʉ mawũãra iyira sobiabʉ. Daizeze Bedʼeade nebʉrabʉ ʉ̃kʉrʉ ẽbẽrarã Jeowaba kãgabʉta soiduba oda ʉ̃rʉ, bʉara maʉ̃ ʉ̃rʉ krĩchaseabʉ. Bari jaraita, krĩchadaya Pablo nebʉrata. Iyira zarea trajasi kongregasionʼra mejãcha oita, maʉ̃itara iyira jĩga wãibarabasi, mamina iyi bebʉ awuara beside akʉza iya Daizeze bedʼea nãã jaradiabada kĩrãkʼa jaradia ẽ basidera, ¿Jeowabara bia akʉ ẽ basika iya kʼãrẽ obʉra? Mawũã ẽ, awuarabʉrʉ iya oseabʉta osi Pablobara akʉza Jeowaba maʉ̃ kʼarea nebiata diasi iyaʼa (Hech. 28:​30, 31). Abarika dayirãba Jeowa kʼarea obʉra edaʉde audre diaseapanʉ Jeowaʼa mawũã ẽ bʉrʉ nãã diabada kĩrãkʼa dia ẽ bayi, mamina kĩrãbedaibara Jeowabara audre bia akʉbʉta dayirãba iyi kʼarea nekʼãrẽ obʉta soiduba opanʉbʉrʉ. Atia akʉdayi Jeowaba dayirãʼa sãwũã ũdubibʉta iya dayirãra bia akʉbʉta.

¿JEOWABA SÃWŨÃ ŨDUBIBɄ IYA DAYIRÃRA BIA AKɄBɄTA?

10. ¿Sãwũã kʼawuaseapanʉ Jeowabara bia akʉbʉta nekʼãrẽ dayirãba obʉra? (Juan 16:27).

¹⁰ Iyi Bedʼeadeba. Jeowabara jʉrʉbʉ iyi ode kʼẽrẽpapanʉra sãwũã ũdubita iya kãgata akʉza bia akʉbʉta ãya nekʼãrẽ obʉra. Daizeze Bedʼeade jara ũrĩbibʉ Jeowaba yi warra jarada ũme jarasita iyara Jesura kãgata akʉza bia akʉbʉta (Mat. 3:17; 17:5). ¿Kʼawuakĩrãbʉka Jeowaba bʉa sãwũã jarabʉta iyara bia akʉbʉta nekʼãrẽ bʉa obʉra? Jeowaba dayirã nemi jĩgʉa jara ẽ maʉ̃ra, mamina iyira dayirã bedʼeabʉ iyi Bedʼeadeba. Dayirãba Daizeze Bedʼeade akʉbʉrʉde Jesuba iyi kʼaidubemara kʼãrẽ bedʼea bia jaradata, dayima maʉ̃ bedʼeara Jeowaba dayirã jarabʉ kĩrãkʼabʉ (akʉra Juan 16:27). Jesubara yi Zezeba nekʼãrẽ bia erbʉta abarika oũdubisi. Maʉ̃ba dayirãba Daizeze Bedʼeade akʉbʉrʉde, Jesuba sãwũã iyi kʼaidubemara kʼẽrẽpapanʉra kayirua omiabasimina jarasita ãyira bia akʉbʉta, naʉ̃ba dayirã krĩchabibʉ maʉ̃ bedʼea biara Jeowaba dayirã jarabʉta (Juan 15:​9, 15).

11. ¿Kʼãrẽa dayirãba bedʼea zroma ũdubʉbara jarakĩrãbʉ ẽ Jeowaba dayirã bia akʉ ẽãta? (Santiago 1:12).

¹¹ Iya nekʼãrẽ obʉdeba. Jeowabara dayirãra kʼarebakĩrãbʉ, bari jaraita diabʉ nekʼãrẽ dayirãba nesidabʉta. Edaʉde Jeowaba idu kayirua berabaribibʉ dayirãra Job berabarida kĩrãkʼa (Job 1:​8-11). Dayirãba bedʼea zroma ũdubʉba jarakĩrãbʉ ẽ Jeowaba dayirãra bia akʉ ẽ baera mawũãbʉta awuarabʉrʉ bedʼea zroma ũdubʉba kʼarebabʉ dayirãba Jeowaʼa ũdubita iyita kʼãrẽaba kãgabʉta akʉza kʼãrẽaba ĩjãpanʉta iyi ʉ̃rʉ (akʉra Santiago 1:12). Adewara dayirã bedʼea zromane berabaribʉrʉde ũdupanʉ Jeowaba dayirã kʼãrẽaba kãgata akʉza iya sãwũã kʼarebabʉta dayirãba bedʼea zroma awuantaita.

12. ¿Kʼãrẽta kʼawuaseapanʉ Dimitri nebʉradeba?

¹² Akʉdaya mebẽã Dimitri nebʉrata, iyira Asiadebema. Iyira trajo neẽ besi, maʉ̃ta jedeko biobayeda mawũã besi. Iyara Jeowa ʉ̃rʉ wãrĩnu ĩjãbʉta ũdubisi Daizeze Bedʼeata audre jaradia jʉ̃drʉside. Jedeko bio berabarisidu iyara trajo ũdu ẽ basi. Adewara maʉ̃ tẽã iyira mejãcha kayasi, maʉ̃ba iyi kamaneba piradrʉ be ẽ basi. Adewara iyara krĩchasi iyira kima bia ẽãta akʉza zeze bia ẽãta adewara iyikʉza widibasi Jeowaba iyira waidide bia akʉbʉ kʼawuaita. Maʉ̃ tẽã yi kauba diasi kartata, mama eda jarabasi bedʼea Isaías 30:15de jarabʉta: «Marara zarea panañi aduʼapanʉbʉrʉ akʉza ĩjãbʉta ũdubidara». Adewara yi kauba iyaʼa jarasi: «Zeze, bʉ sopʉa krĩchabʉrʉde kĩrãbera naʉ̃ testoba bedʼea jarabʉta». Dimitriba ũdusi Jeowa kʼarebadeba iyi mebẽrãbara erbʉta nekʼãrẽ ãya nesidabʉra, yikota, wuata akʉza ãyi sama bʼaita. Iya jarabʉ: «Mʉ̃ krĩcha zroma obʉrʉdera aduʼa baibarabasi akʉza Daizeze ʉ̃rʉ ĩjãibarabasi». Bʉabida abarika bedʼea zromata ũdunʉmʉbʉrʉ, ĩjãra Jeowaba bia akʉita bʉra akʉza iya kʼarebaita bʉa bedʼea zroma awuantamarẽã.

13. ¿Kʼairata zokʼabʉ Jeowabara dayirã kʼawuabita iya bia akʉbʉta akʉza sãwũã obʉ?

¹³ Mebẽrã kongregasionebemaneba. Jeowabara mebẽrãta zokʼabʉ mawũã dayirãʼa jaraita iyara bia akʉbʉta nekʼãrẽ dayirãba obʉra. Bari jaraita, Jeowaba zokʼaseabʉ mebẽã abaʉta mawũã dayirãʼa so zarea diaita. Mebẽã wẽrã Asiadebemaba mejãcha krĩcha zroma obʉde maʉ̃ta ũdusi. Iyira trajo neẽbesi akʉza mejãcha kayasi. Maʉ̃ tẽã yi kimaba kayiruata osi maʉ̃ kʼarea wua zõrãrã kongregasionebema babe ẽ basi. Iya jarabʉ: «Mʉ̃ara kʼawua ẽ basi yi kʼãrẽsi berabarinʉmʉra, krĩchasi mʉ̃a nei aña osi baera Jeowaba mʉ̃ra bia akʉbʉ ẽãta». Naʉ̃ mebẽãbara Jeowaʼa widisi kʼawuabimarẽã Jeowabara iyira biʼia akʉbʉta. ¿Jeowabara sãwũã kʼawuabisi iyaʼa? Iya jarabʉ: «Zõrãrã kongregasionebemarata bedʼeasida mʉ̃me, ãya mʉ̃aʼa kʼawuabisida Jeowabara mʉ̃ra kãgata akʉza maʉ̃ ewaride mebẽrã kongregasionebemaraba mʉ̃aʼa kartata dia bʉesida. Mʉ̃a maʉ̃ akʉside kʼawuasi Jeowaba maʉ̃neba panʉbʉta mʉ̃a iyaʼa wididara». Mawũẽra Jeowabara mebẽrãneba kʼawuabibʉ iya dayirãba nekʼãrẽ obʉra bia akʉbʉta (Sal. 10:17).

14. Adewara, ¿kʼãrẽneba kʼawuabibʉ Jeowaba dayirãba nekʼãrẽ obʉra iyara bia akʉbʉta?

¹⁴ Adewara Jeowaba dayirã kʼawuabibʉ iya bia akʉbʉta mebẽrãba dayirãʼa ũrãgʼa diabʉdeba. Bari jaraita, siglo nããrabemane Jeowaba Pablota zokʼasi 14 karta bʉbita mawũã mebẽrã kʼarebaita. Maʉ̃ra kartarane Pablobara ũrãgʼa biata diasi mebẽrã. ¿Kʼãrẽa bʉbisi Jeowaba maʉ̃ra ũrãgʼara? Jeowara Zeze bia akʉza iyara kʼẽãbʉ iyi ode kʼẽrẽpa panʉrãra (Prov. 3:​11, 12). Maʉ̃ba dayirã ũrãgʼata Daizeze Bedʼeadeba diadara, krĩchadaibara maʉ̃ba ũdubibʉta Jeowabara bia akʉbʉta nekʼãrẽ dayirãba obʉra (Heb. 12:6). Adewara, ¿kʼãrẽneba ũdubibʉ Jeowaba bia akʉbʉta nekʼãrẽ dayirãba obʉra?

ADEWARA SÃWŨÃ KʼAWUASEAPANɄ JEOWABA DAYIRÃ BIA AKɄBɄTA

15. ¿Jeowabara kʼaira diabʉ iyi jaure zareara akʉza naʉ̃ba sãwũã audre ĩjãbibʉ?

¹⁵ Jeowaba iyi jaure zareata diabʉ iya bia akʉbʉʼa (Mat. 12:18). Dayikʉza naʉ̃ta widiseabʉ: «¿Mʉ̃ara nebia neta jauredebemara oũdubibʉka?». ¿Idi ewade audre ũdubibʉka jʉ̃ã kʼawuabʉta nãã badaira? Neta jauredebema nebiata ũdubibʉbʉrʉ, naʉ̃ba kʼarebayi kʼawuaita Jeowabara bia akʉbʉta nekʼãrẽ bʉa obʉra (Akʉra rekuadro «Netara jauredebemara naʉ̃»).

16. (1) ¿Daizeze Bedʼea jaradia wãira Jeowabara kʼairata zokʼabʉ? (1 Tesalonicenses 2:4). (2) ¿Maʉ̃ kʼawuaiba sãwũã krĩchabibʉ bʉaʼa?

¹⁶ Jeowara sobiabʉ iya bia akʉbʉrata Daizeze bedʼea jaradia wãita zokʼabʉrʉde (akʉra 1 Tesalonicenses 2:4). Akʉdaya mebẽã yi trʉ̃ Jocelynba kʼãrẽ nebiata ũdusita ẽbẽrarã Daizeze Bedʼea jaradia wãside. Ewari aba, Jocelynʼra sopʉa basi. Iya jarabʉ: «Mʉ̃ara krĩchabasi Jeowa kʼãrẽ nebia diaira neẽãta, mamina mʉ̃ra yi nãã edebari baera akʉza maʉ̃ ewaride jaradia wãibarabasi baera, Jeowaʼa yiwidʼisi akʉza wãsi jaradiade». Maʉ̃ diapeda Jocelynba ũdukʼawuasi Maryta, naʉ̃ ẽbẽra wẽrãba ĩjãsi Daizeze Bedʼea ʉ̃rʉ kʼawuaita. Jedeko berabarida tẽã Maryba jarasi Jocelyn iyi deidu jʉ̃ẽi nããra iya Daizezeʼa kʼareba widisita. Iyi sãwũã berabarida ʉ̃rʉ krĩchaside, Jocelynba naʉ̃ta jarasi: «Naʉ̃neba Jeowaba mʉ̃aʼa jarabʉrʉ kĩrãkʼa basi, mʉ̃a bʉra bia akʉbʉ». Dayirãba Daizeze Bedʼea jaradia wãbʉrʉdera jõmaʉ̃ba ũrĩ ẽ mina, dayirãba oseabʉta opanʉbʉrʉ ẽbẽrarã jaradiaita, naʉ̃ba Jeowata sobiabibʉ.

17. Vickyba Jeowaba dayirã sãwũã ẽdrʉbibʉ ʉ̃rʉ jaradadeba, ¿kʼãrẽta kʼawuapanʉ? (Salmo 5:12).

¹⁷ Jeowabara dayirã bia akʉbʉra ũdubibʉ dayirã ẽdrʉbidadeba (1 Tim. 2:​5, 6). Mamina kʼãrẽta berabariseabʉ dayirãba Jeowaba dayirã ẽdrʉbisita ĩjãbʉidu akʉza buru kʼoesidu, krĩchapanʉbʉrʉ Jeowabara dayirãra bia akʉ ẽãta, kĩrãbedaibara dayirã sãwũã krĩchabʉ ʉ̃rʉ ĩjãibara ẽãta, awuarabʉrʉ Jeowa ʉ̃rʉ ĩjãibarata. Jeowabara yi kʼẽrẽpapanʉrãra akʉza iya ẽdrʉbida ʉ̃rʉ ĩjãpanʉrãra nebiata diayi (akʉra Salmos 5:12; Rom. 3:26). Jeowaba dayirã ẽdrʉbida ʉ̃rʉ krĩchaiba kʼarebasi Vickyʼra. Ewari aba iya maʉ̃ ʉ̃rʉ bia krĩchabʉde iya nei kʼawuasi, iya jarabʉ: «Poaga biobadeba Jeowaba jʉrʉbasi mʉ̃aʼa sãwũã kʼawuabita iya mʉ̃ra kãgata. Mamina mʉ̃a iyaʼa jarabʉ kĩrãkʼa basi: ‹Jeowa bʉara ẽbẽra mʉ̃ kĩrãkʼabʉra kãgabe ẽ. Mʉ̃a nekʼãrẽ odara bʉ warra mʉ̃ kʼarea beidaba kĩrãdua ẽ›». Jeowaba dayirã sãwũã ẽdrʉbida ʉ̃rʉ krĩchaiba, kʼarebasi Vickyba kʼawuaita Jeowabara iyira kãgata. Abarika dayirãba krĩchapanʉbʉrʉ Jeowaba dayirã sãwũã ẽdrʉbida ʉ̃rʉ, naʉ̃ba kʼarebayi kʼawuaita Jeowaba dayirãsida kãgata.

18. Dayirãba Jeowata audre kãgapanʉbʉrʉ, ¿kʼãrẽ ʉ̃rʉ ĩjãseapanʉ?

¹⁸ Dayirãba naʉ̃ artikulode kʼawuadata aripe oita zarea opanʉmina, edaʉde krĩchaseapanʉ Jeowabara dayirãra bia akʉ ẽãta. Maʉ̃ta berabaribʉrʉdera, kĩrãbedaibara Jeowabara biʼia akʉbʉta yi ẽbẽrarã iyaʼa kãga ũdubipanʉrãra (Sant. 1:12). Maʉ̃ba zarea odaibara Jeowa kʼawa bʼaita akʉza ũduita Jeowaba sãwũã dayaʼa ũdubibʉta bia akʉbʉta nekʼãrẽ daya obʉra. Adewara kĩrãbedaibara Jeowara dayirã aba abakaʉdebara jĩgabʉ ẽãta (Hech. 17:27).