«Bʉra jipa yibia»

1, 2. ¿Kʼãrẽba kʼarebaseabʉ kʼawuaita Jeowabara dayirãra wãrĩnu kãgabʉta?

JEOWA odepanʉranebemara ʉ̃kʉrʉta ãyi ʉ̃rʉ mitia krĩchabʉ, ¿kʼãrẽa mawũã krĩchapanʉ? Ãyita biata edada ẽ basi baera, mawũã ẽ bʉrʉ ẽbẽra abaʉba jarasi baera kʼãrẽita zeri ẽãta. Bʉta mawũã berabarisibʉrʉ, ¿kʼãrẽba kʼarebai ĩjãita Jeowaba bʉra kãgabʉta?

² Bʉa Daizeze Bedʼeade nebʉrabʉta lera, bʉa ũduyi Jeowaba sãwũã edadamarẽã kãgabʉta ẽbẽrarã. Daizeze warra Jesúsbara wuabemara ẽbẽrarãra bia edasi, adewara ãyaʼa wawia ũdubisi. Jesúsba odaba ũdubisi iya yi zezeʉ̃mebara mejãcha kãgapanʉta ẽbẽrarã kʼãrẽita zeri ẽãta krĩchapanʉrãra (Juan 5:19; Heb. 1:3). Naʉ̃ artikulode kʼawuadayi naʉ̃ta: nããra, sãwũã Jesúsba kʼarebasita ẽbẽrarãba kʼawuadamarẽã Jeowaba mejãcha kãgabʉta. Ũmeta, sãwũã dayirãkʉza ĩjãseabʉta Jeowabara wãrĩnu kãgabʉta (Ageo 2:7).

JESÚSBA KʼAREBASI ẼBẼRARÃBA KʼAWUADAMARẼÃ JEOWABARA WÃRĨNU KÃGABɄTA

3. ¿Galileadebemarãra Jesúsbara sãwũã edasi?

³ Jesúsba Galileade jaradiabaside, ẽbẽrarã mejãchaʉta iyidu jʉ̃ẽbasi iya jaradiabʉta ũrĩta akʉza ãyi kayabʉta bebimarẽã. Maʉ̃ne Jesúsba ũdusi naʉ̃ra ẽbẽrarãra popanʉ kĩrãkʼabʉta akʉza obejara yi akʉbari neẽ kĩrãkʼabʉta (Mat. 9:36; akʉra nota de estudio). Religion nokʼorabara, naʉ̃ra ẽbẽrarãra kʼãrẽ kʼawua ẽbʉ kĩrãkʼa akʉbasi akʉza kʼãrẽita zeri ẽ kĩrãkʼa akʉpanasi, maʉ̃ kʼarea ãyara jarapanasi «Daizezebara kʼawua okuaya» (Juan 7:​47-49 nota de estudio). Mamina Jesúsbara naʉ̃ra ẽbẽrarãra mawũã akʉ ẽ basi awuarabʉrʉ ewari jʉrʉsi ãyaʼa jaradiaita akʉza ãyi kayabʉ bebita (Mat. 9:35). Adewara ẽbẽrarã audre kʼarebaita iyi kʼaidubemara jaradiasi sãwũã Daizeze Bedʼea jaradiaita, adewara zarea diasi ẽbẽrarã ãyi kayabʉ bebikʉamarẽã (Mat. 10:​5-8).

4. Wuabemaraba bia edada ẽãne Jesúsba bia edadadeba, ¿dayirãbara kʼãrẽta kʼawuapanʉ?

⁴ Idi ewadera ẽbẽrarã mejãchaʉba kʼãrẽ ẽ kĩrãkʼa akʉbʉ ʉ̃kʉrʉ ẽbẽrarã. Mamina Jeowaba Jesúsʼʉ̃mebara ãyira mejãcha kãga. ¿Sãwũã kʼawuapanʉ? Jesúsba ẽbẽrarã iyi akʉ jʉ̃ẽnara ãyi bia edadadeba akʉza ãyaʼa wawia ũdubidadeba. Bʉta Jeowa odebʉbʉrʉ mamina krĩchabʉbʉrʉ kʼãrẽita zeri ẽãta, krĩchara Jesúsba ẽbẽrarã iyi akʉ jʉ̃ẽbadara sãwũã edadata. Mawũã ora, bʉa kʼawuayi Jeowabara bʉra mejãcha kãgabʉta.

5. Jara ũrĩbira ẽbẽra wẽrã Galileadebema Jesúsba ũdukʼawuadara sãwũãbasita.

⁵ Jesúsbara bari ẽbẽrarã biobʉdebʉrʉ jaradia ba ẽ basi akʉza aba abakaʉta akʉbasi Jesúsbara. Bari jaraita, Jesúsba Galileade jaradiabʉde iya ũdukʼawuasi ẽbẽra wẽrã aba waba kayabʉta 12 poaga bata (Mar. 5:25). Mawũãbʉra, leybara jarabasi jaigʉabʉ kĩrãkʼabʉta akʉza yi tõbaribʉrʉra jaigʉa bʼaita. Mawũẽra naʉ̃ ẽbẽra wẽrãra jĩga dobabasibaibara. Adewara sinagogaeda wãbe ẽ basi akʉza wuabema piesta obʉedabida wãbe ẽ basi (Lev. 15:​19, 25). Mawũẽra naʉ̃ ẽbẽra wẽrãra mejãcha kayabasi akʉza mejãcha sopʉabasi (Mar. 5:26).

6. ¿Sãwũã besi ẽbẽra wẽrãra waba kayabʉra?

⁶ Naʉ̃ ẽbẽra wẽrã kayabʉbara, kãgabasi Jesúsba iyita bebimarẽã. Mamina iyara orra ẽ basi Jesúsʼra. ¿Kʼãrẽa? Iyira perabasibaibara iyi kayabʉ kʼarea, mawũã ẽ bʉrʉ iyira perabasibaibara Jesúsba kʼẽãi kʼarea iyi mawũã kayabʉta ẽbẽrarãne edabʉ kʼarea. Mawũẽra, bari Jesús wuama tõbarisi, iya ĩjãbasi baera mawũã obʉrʉba beita (Mar. 5:​27, 28). Mawũã ĩjãbʉta ũdubisi baera iya nebiata ũdusi, iyira besi. Maʉ̃ tẽã Jesúsba widisi kʼaiba tõbarisita, aramaʉ̃ta iya panʉsi iya osita. Maʉ̃ne ¿kʼãrẽta osi Jesúsbara?

7. ¿Jesúsbara sãwũã edasi ẽbẽra wẽrã kayabʉra? (Marcos 5:34).

⁷ Jesúsbara naʉ̃ ẽbẽra wẽrãra bia edasi. Iya ũdusi «peraba pidʼidʼia kʼobʼʉta» (Mar. 5:33). Jesúsba mawũãbʉta ũdusi baera, iyaʼa ibiade bedʼeasi, iyaʼa jarasi «kau». Mawũã jarabʉrʉba bari wawiabʉta ũdubi ẽ basi awuarabʉrʉ kãgata akʉza ibiade edasi (akʉra Marcos 5:34). Daizeze Bedʼeabara ũdubibʉ maʉ̃nebʉrʉ Jesúsbara kau asita yuwẽrã abaʉʼa. Iya maʉ̃ bedʼeata zokʼasibaibara iya ũdusi baera maʉ̃ ẽbẽra wẽrãra mejãcha perabʉta. ¿Sãwũã sentisiba naʉ̃ ẽbẽra wẽrãra Jesúsba maʉ̃ bedʼea jarada tẽãra? Iyira mejãcha sobiabasibaibara Jesúsba iyaʼa kãga ũdubisi baera. Mamina krĩchara Jesúsba mawũã oẽ basibʉrʉ iyi sãwũã sentibakasita. Iyi kayabʉra bekasi, mamina iyira ariya sopʉabakasi. Mamina Jesúsbara kãgabasi iya kʼawuamarẽã Jeowaba iyira mejãcha kãgabʉta iyi kau kĩrãkʼa.

8. ¿Kʼãrẽ bedʼea zromata ũdusi mebẽã wẽrã Brasildebemabara?

⁸ Idi ewadera ʉ̃kʉrʉ mebẽrã ãyi kayabʉ kʼarea, mejãcha sopʉabʉ akʉza kʼãrẽita zeri ẽãta krĩchabʉ. Mawũã berabarisi mebẽã aba yi trʉ̃ María,a iyira prekursora regular Brasildebema, iyira tosida jĩrʉ neẽã akʉza iyi juwa juwaʼãka neẽã, mawũẽra iya jara ũrĩbibʉ: «Mʉ̃me kolegiode estudiapanʉrabara mʉ̃ra imitia jarapanasi, maʉ̃ba mʉ̃ra sopʉabibasi ãyara. Adewara mʉ̃ dedabida edaʉde mʉ̃ mebẽrãba jarabʉba mʉ̃ra sopʉabibasi».

9. ¿Kʼãrẽba kʼarebasi Maríara kʼawuaita Jeowabara iyira mejãcha kãgabʉta?

⁹ ¿Kʼãrẽba kʼarebasi Maríara? Iyi Jeowa ʉ̃rʉ Kʼawuabipanʉrã baside mebẽrãba iyaʼa so zarea diasida akʉza kʼarebasida iyikʉza akʉmarẽã Jeowaba akʉbʉ kĩrãkʼa. Maʉ̃ba iya jarabʉ: «Mebẽrãba mʉ̃ mejãcha kʼareba zebʉrʉta, mʉ̃a jaraibʉrʉ mʉ̃a jõmaʉ jara aʉ ẽ. Mawũẽra Jeowa mejãcha biga diabʉ mʉ̃aʼa mebẽrã kongregasionebemata ũdukʼawuabisi baera». Mawũẽra mebẽrã kogregasionebemarabara mejãcha kʼarebasida kʼawuaita, Jeowabara iyira mejãcha kãgabʉta.

10. ¿María Magdalenabara kʼãrẽ bedʼea zromata erbasi? (Akʉra potorata).

¹⁰ Adewara akʉdaya Jesúsba sãwũã kʼarebasita awuru ẽbẽra wẽrãta, yi trʉ̃ra María Magdalena. Iyara abasi 7 demonio (Luc. 8:2). Maʉ̃ba iyira wawabasi, maʉ̃ kʼarea ẽbẽrarãbara iyira orrakĩrã ẽ basi, mawũẽra iyira sopʉabasi mejãcha perabasi, krĩchabasi mia kʼaiba iyira bebi ẽãta. Mamina Jesúsbara iya 7 demonio abʉra ãĩ bʉesi. Mawũã María Magdalenara jipa iyi kʼaidubemabasi. Adewara, ¿Jesúsbara sãwũã kʼarebasi María Magdalenaba kʼawuamarẽã Jeowabara iyira mejãcha kãgabʉta?

11. ¿Jesúsbara sãwũã ũdubisi María Magdalena Jeowabara iyira wãrĩnu kãgabʉta? (Akʉra potorata).

¹¹ Jesúsbara jarasi María Magdalena iyi kʼaidu bamarẽã iya Daizeze Bedʼea jaradiabʉeda.b Mawũẽra María Magdalenabara Jesúsba wuabemara jaradiabʉeda, nekʼãrẽ mejãcha kʼawuasi iyideba. Adewara Jesús beidata jẽda piradrʉbʉrʉdera yi nããra bedʼeadara naʉ̃ ẽbẽra wẽrã María Magdalenabasi. Akʉza jarasi naʉ̃ ẽbẽra wẽrã iyi kʼaidubemara jarakamarẽã iyira jẽda piradrʉsita. Jesúsba mawũã odaba María Magdalenabara kʼawuasi Jeowabara iyira wãrĩnu kãgabʉta (Juan 20:​11-18).

12. ¿Kʼãrẽ kʼarea Lidiabara krĩchasi iyira kʼãrẽita zeri ẽãta?

¹² Idi ewadera ẽbẽrarã mejãchaʉta María Magdalenaba krĩchabada kĩrãkʼa krĩchapanʉ, mia kʼaiba iyira kãga ẽãta. Akʉdaya mebẽã wẽrã, yi trʉ̃ Lidia Españanebema berabaridata. Iya jarabʉ yi papabara iyira ʉra bʉeibasita akʉza iyira bia akʉ ẽ basita, adewara iyaʼa imitia bedʼeabasita. Iya jara ũrĩbibʉ: «Mʉ̃ papaba mʉ̃aʼa kãga ũdubi ẽ basi baera, mʉ̃a kãgabasi wuabemaraba mʉ̃aʼa kãga ũdubidamarẽã akʉza mʉ̃ neũdukʼawuara badamarẽã, mamina mʉ̃ra perabasi mʉ̃a krĩchabasi baera mʉ̃a nekʼãrẽ mejãcha obʉbʉsida nekʼãrẽ bia oita, wuabemarabara mʉ̃ra kãga ẽ baita. Mʉ̃ papaba jarabadaba mʉ̃aʼa krĩchabisi mʉ̃ra mia kʼaiba kãgada ẽ baibasita».

13. ¿Kʼãrẽba kʼarebasi Lidiaba kʼawuamarẽã Jeowabara iyira mejãcha kãgabʉta?

¹³ Lidiabara Daizeze Bedʼea kʼawua jʉ̃drʉdadeba, iyara kʼawuasi Jeowabara iyira mejãcha kãgabʉta, ¿kʼãrẽba kʼarebasi? Jeowa yiwidʼibʉba, Daizeze Bedʼea estudiabʉba akʉza mebẽrãba iyaʼa bedʼea bia jarabʉdeba akʉza iyibari nekʼãrẽ bia opanʉneba. Iya jara ũrĩbibʉ: «Mʉ̃ kimabara mʉ̃aʼa badua jarabʉ mʉ̃ra mejãcha kãgabʉta akʉza badua jarabʉ mʉ̃a mʉ̃ sode kʼãrẽ nebia erbʉta. Iyabaʉ opanʉ mʉ̃ neũdukʼawuarabida». Bʉ kongregasionera, Lidia kĩrãkʼa bʉbaibara nesidabʉta kʼawuabita Jeowabara ãyira mejãcha kãgabʉta, bʉara kʼarebaseabʉ mawũã kʼawuabita bʉa obʉdeba akʉza jarabʉdeba.

BɄYIKɄZA ĨJÃRA JEOWABARA BɄRA WÃRĨNU KÃGABɄTA

14. ¿1 Samuel 16:7ba sãwũã kʼarebabʉ dayikʉza akʉita Jeowaba akʉbʉ kĩrãkʼa? (Akʉra rekuadro «¿Jeowabara kʼãrẽa kãga iyi pʉwʉrʉra?»).

¹⁴ Kĩrãbera Jeowabara akʉbʉ ẽãta ẽbẽrarã naʉ̃ drʉadebemaba akʉbʉ kĩrãkʼa bʉra (akʉra1 Samuel 16:7). Ẽbẽrarã naʉ̃ drʉadebemabara bia akʉbʉ ẽbẽrarã platabarabʉta, mejãcha estudiabʉta akʉza ẽbẽra biʼiabʉta, mamina Jeowabara mawũã obʉ ẽ (Is. 55:​8, 9). Maʉ̃ kʼarea zarea ora bʉyikʉza akʉita Jeowaba akʉbʉ kĩrãkʼa, mamina ¿kʼãrẽba kʼarebai? Daizeze Bedʼeade jara ũrĩbibʉ ʉ̃kʉrʉ ẽbẽrarã ãyi kʼãrẽita zeri ẽãta sentipananata, bari jaraita Elíasta, Noemíta akʉza Anata. Mamina ãyi ʉ̃rʉ estudiabʉrʉde akʉra sãwũã Jeowaba ãyaʼa kãga ũdubisita. Akʉza krĩchara bʉyi ʉ̃rʉ, mõbe bʉra Jeowaba bʉaʼa kʼãrẽaba kãga ũdubi zebʉrʉ ʉ̃rʉ. Adewara dayirã kartarane jʉrʉra sãwũã dayikʉza audre kãgai ʉ̃rʉ bedʼeabʉta.c

15. ¿Jeowabara Danielʼra kʼãrẽa mejãcha kãgabasi? (Daniel 9:23).

¹⁵ Kĩrãbera bʉra kʼẽrẽpabʉ baera Jeowabara bʉra mejãcha kãgata. Bari jaraita propeta Daniel 100 poaga babodoare, iyira aukʼara sentisi akʉza sopʉabasi (Dan. 9:​20, 21). Maʉ̃ne, ¿Jeowabara iyaʼa sãwũã so zarea diasi? Jeowabara zokʼa bʉesi angel Gabrielta iyaʼa naʉ̃ bedʼeata jaramarẽã: «Bʉra jipa yibia», adewara jarasi Jeowabara iyi yiwidʼibʉra ũrĩsita (akʉra Daniel 9:23). ¿Kʼãrẽa Jeowabara mejãcha kãgabasi Danielʼra? Danielbara soiduba nebiata obasi baera akʉza Jeowaʉ̃me kʼẽrẽpabasi baera (Ezeq. 14:14). Jeowabara Daniel berabaridara Daizeze Bedʼeade bʉsi dayirã so zarea diaita (Rom. 15:4). Bʉa soiduba nebiata obʉ baera akʉza Jeowaʉ̃me kʼẽrẽpabʉ baera, Jeowabara bʉra mejãcha kãga. Adewara Jeowaba Daniel yiwidʼibʉta ũrĩna kĩrãkʼa, bʉ yiwidʼibʉsida ũrĩñi iyara (Miq. 6:8; Heb. 6:10).

16. ¿Kʼãrẽba kʼarebaseabʉ bʉa akʉita Jeowara zeze bia kĩrãkʼa?

¹⁶ Akʉra Jeowara zeze bia bʉ kãgabʉ kĩrãkʼa. Jeowabara kʼarebakĩrãbʉ bʉra akʉza badua jʉrʉnʉmʉ ẽ bʉa kʼãrẽ aña oita, tẽã maʉ̃ta jaraita (Sal. 130:3; Mat. 7:11; Luc 12:​6, 7). Ẽbẽrarã mejãchaʉba maʉ̃ ʉ̃rʉ krĩchaiba kʼarebabʉ ãyi kʼãrẽ ẽ kĩrãkʼa sentibʉta mawũã senti ẽ baita. Bari jaraita, mebẽã wẽrã yi trʉ̃ Michelle Españanebemata, iyira kʼãrẽ ẽ kĩrãkʼa sentisi yi kimaba poaga biobayeda iyaʼa imitia bedʼeabasi baera. Iya jara ũrĩbibʉ: «Mʉ̃ kʼãrẽita zeri ẽãta sentibʉdera, mʉ̃a krĩchabʉ Jeowaba mʉ̃ iyi juwade jirada kʼãrãpe mʉ̃aʼa kãga ũdubibʉta akʉza aduʼa sentibʉta maʉ̃ne» (Sal. 28:9). Adewara mebẽã wẽrã yi trʉ̃ Laurenba Sudáfricadebemata, iyikʉza naʉ̃ta jarabʉ: «Jeowabara iyima wesi, poaga biobayeda iyi kʼawa bʼaita kʼareba zebʉrʉ akʉza Jeowabara mʉ̃ra zokʼabʉ wuabemara iyi ʉ̃rʉ jaradiaita. Mawũã obʉrʉba mʉ̃aʼa ũdubibʉ Jeowabara mʉ̃ra mejãcha kãgabʉta» (Juan 6:44).

17. ¿Bʉara sãwũã kʼawuai Jeowaba bʉra bia akʉbʉta? (Salmo 5:12; akʉra potota).

¹⁷ Dayikʉza wãrĩnu ĩjãibara Jeowabara bia akʉbʉta (akʉra Salmo 5:12). Davidbara jarasi Jeowaba bia akʉbʉra dayita «joudrʉbari zroma» kĩrãkʼabʉta, maʉ̃bara kʼarebabʉta yi kʼẽrẽpapanʉrata. Maʉ̃ kʼawua bʼaiba dayirãra mejãcha kʼarebayi kʼãrẽita zeri ẽãta krĩchabʉrʉde, mawũã krĩcha ẽ baita. Mamina, ¿sãwũã kʼawuapanʉ Jeowaba bia akʉbʉta? Jeowabara bʉaʼa kʼawuabiseabʉ iyi bedʼeadeba, zõrãrã kongregasioneba, bʉ neũdukʼawuaraneba akʉza wuabemaraneba, iya bʉra mejãcha kãgabʉta. Mawũẽra, ¿bʉra sãwũã krĩchai ẽbẽraba bʉaʼa bedʼea biata jaradara?

18. ¿Kʼãrẽa bʉara ĩjãibara wuabemaba bʉaʼa bedʼea bia jarabʉra?

¹⁸ Ẽbẽrarã bʉ kãgabʉba bʉaʼa bedʼea bia jarabʉta, krĩcharãra sewidata. Kĩrãbera Jeowaba maʉ̃rata zokʼabʉta bʉaʼa ũdubita iyara bʉra bia akʉbʉta. Bari jaraita, mebẽã Michelle, nãã jaradaba, iya naʉ̃ta jarabʉ: «Mebẽrãba mʉ̃aʼa bedʼea bia jarabʉra mʉ̃ara wiña wiñane ĩjã wã ãyi bedʼeara. Mawũã oita mʉ̃ita mejãcha zareabʉmina, mawũã obʉ Jeowaba maʉ̃ra bedʼeata ĩjãmarẽã kãgabʉ baera». Michellera zõrãrã kongregasionebemaba mejãcha kʼareba zebʉrʉ. Atiara iyira prekursora adewara Betelta iyi dedaʉba kʼarebabʉ.

19. ¿Bʉara kʼãrẽa wãrĩnu ĩjãseabʉ Jeowabara bʉra wãrĩnu kãga bʼaita?

¹⁹ Jesúsbara jarabʉ Jeowabara dayirãra mejãcha kãgata (Luc. 12:24). Mawũẽra dayirãbara wãrĩnu ĩjãibara Jeowabara ewari jõmaʉ̃nẽ kãga bʼaita dayirãra, maʉ̃ta jipa kĩrãdua ẽ baibara. Adewara zarea oibara wuabemara ẽbẽrarã kʼarebadaita ãyabida kʼawuadamarẽã Jeowabara ãyira mejãcha kãgabʉta.