Dayirã sumo saserdote Jesúsbara so borekea akʉbʉ

1, 2. (1) ¿Kʼãrẽa zokʼasi Jeowabara yi warrara nama egoro edara? (2) ¿Kʼãrẽta kʼawuadai naʉ̃ artikulodera? (Hebreos 5:​7-9).

JEOWABA yi warra iya audre kãgabʉ nama egoro eda zokʼadara, 2.000 poaga ba, mamina ¿kʼãrẽa zokʼasi Jeowabara yi warrara? Iya zokʼasi ẽbẽrarãta beideba akʉza nemitiadeba ẽdrʉbita akʉza Diaruba aña obʉta ara oita (Juan 3:16; 1 Juan 3:8). Adewara Jeowaba kʼawuabasi yi warrata nama egoro eda zokʼasibʉrʉ, naʉ̃ba kʼarebaibasita sumo saserdote bia bʼaita, wuabemara so borekea akʉita akʉza wuabemara zʉbʉriabʉrʉde iyabida maʉ̃ta sentita. Jesúsʼra sumo saserdote ba jʉ̃drʉsi iyi buru kʼoeda tẽã poaga 29deba ʉ̃ta.a

² Naʉ̃ artikulode kʼawuadayi sãwũã Jesús nama egoro eda zedaba, kʼarebasita sumo saserdote bia bʼaita, wuabemara so borekea akʉita. Naʉ̃ ʉ̃rʉ biʼia kʼawuaira jipade yibia, naʉ̃ ʉ̃rʉ biʼia kʼawuaiba kʼarebai baera dayirãita zare ẽ bamarẽã Jeowa yiwidʼita akʉza iyi kʼawa bʼaita, audre dayirãba nekʼãrẽ aña oda kʼarea sopʉapanʉbʉrʉ (akʉra Hebreos 5:​7-9).

DAIZEZEBA ZOKʼA BɄESI YI WARRA IYA AUDRE KÃGATA

3, 4. ¿Kʼãrẽta amaesi Jesúsbara akʉza sãwũãbasi iyira nama egorodera?

³ Dayirãnebema mejãchaʉba nekʼãrẽ awuara oibara dayi bebʉde. Bari jaradaita, dayirãba drʉa mejãcha kãgabadata amaeibara aña wãita, mawũã ẽ bʉrʉ dayirã mebẽrãta akʉza dayirã neũdukʼawuarata amaeibara, maʉ̃ra dayitara jipade zareabʉ. Mamina dayirãneira Jesúsba audre nekʼãrẽ awuara oibarabasi. ¿Kʼãrẽa mawũã jarapanʉ? Jesús ʉ̃tʉbasidera angeleranera iyita audre yi zromabasi akʉza Jeowabara iyita nããra parãsi. Adewara Jeowabara iyira mejãcha kãgabasi akʉza iyira ewari jõmaʉ̃nẽ sobiabasi yi zezeʉ̃me ãba trajabasi baera (Sal. 16:11; Prov. 8:30). Mamina Filipenses 2:7de jarabʉ Jesúsbara iya erbadata jõma amaesita, mawũã nama egorode ẽbẽrarã nemitia omiarabawara ãba bʼaita.

⁴ Krĩchadaya Jesús wiñayirʉeda sãwũãbasita nama egorode, iyi yibarirãra plata mejãcha neẽbasi, maʉ̃ta kʼawuapanʉ iyi toda tẽã sakripisio diasidade, yibarirabara ibanarata ũme diasida baera sakripisiode (Lev. 12:8; Luc. 2:24). Adewara nokʼo Herodesba kʼawuaside Jesús toda ʉ̃rʉ bea zokʼasi, mamina Herodesdeba ẽdrʉita yi mebẽrãra Egipto eda mĩrʉ wãsida (Mat. 2:​13, 15). Naʉ̃ba ũdubibʉ Jesúsʼra jipa awuarabasita nama egorodera ʉ̃tʉ badaira.

5. Jesúsbara nama egorode basidera, ¿kʼãrẽ zʉbʉriata ũdusi akʉza naʉ̃ba sãwũã kʼarebasi sumo saserdote bia bʼaita? (Akʉra potota).

⁵ Jesúsbara iyi wari wãne ũdu wãsi zʉbʉriata iyi audu. Iya ũdusi sãwũã sopʉabʉta dayirã daya ẽbẽra aba kãgabʉta beibʉrʉde, bari jaraita yi zeze José beisi baera. Adewara iya Daizeze Bedʼea jaradiabaside Jesúsba ũdubasi ẽbẽrarãra zʉbʉriabʉta kayabʉ baera, daʉberreabʉ baera, wãbe ẽãbʉ baera, mawũã ẽ bʉrʉ ãyi wũãwũãta beisi baera (Mat. 9:​2, 6; 15:30; 20:34; Mar. 1:​40, 41; Luc. 7:13). Jesúsbara ʉ̃tʉbasidera ũdubasi ẽbẽrarã sãwũã zʉbʉriabʉra, mamina iyi nama egoroeda zesidera, iyara kʼawuabasi sãwũã sentibʉta ẽbẽrarãra zʉbʉriabʉrʉdera (Is. 53:4). Jesúsba kʼawuabasi ẽbẽrarã sãwũã sentibʉta sobiabʉrʉde, krĩcha obʉrʉde, mawũã ẽ bʉrʉ bedʼea zroma kʼarea zʉbʉriabʉra. Iyisida badu ẽbẽra kĩrãkʼa mapaesi akʉza sopʉa sentisi.

JESÚSBARA KʼAWUABASI ẼBẼRARÃ KʼÃRẼABA SOPɄABɄRA

6. ¿Isaíasba yiza ũme zokʼadaba kʼãrẽta jaradiabʉ Jesúsba so borekea akʉda ʉ̃rʉ akʉza wuabemara ʉ̃rʉ krĩchabʉta? (Isaías 42:3).

⁶ Jesúsba Daizeze Bedʼea jaradiasidera ẽbẽrarã wuabemaraba bia edada ẽãra akʉza zʉbʉria opanʉrãra bia edasi, ãyaʼa ũdubisi iyara kʼawuabʉta ãyi kʼãrẽaba zʉbʉriabʉra. Mawũã obʉrʉde Jesúsba aripe berabaribisi propesiaba jarabʉta. Escrituras Hebreasde jarabʉ ẽbẽrarã biapanʉrãra akʉza zareapanʉrãra bakuru zroma biʼia pawãrabari kĩrãkʼabʉta, mawũã ẽ bʉrʉ nepono biʼia pawãrabʉ kĩrãkʼabʉta (Sal. 92:12; Is. 61:3; Jer. 31:12). Mamina jarabʉ ẽbẽrarã kʼaiba kʼarebai neẽãpanʉrãra, mawũã ẽ bʉrʉ wuabemaraba zʉbʉriabipanʉrãra, cha bʉa wãbodo kĩrãkʼabʉta akʉza ĩbira kibodobʉ kĩrãkʼapanʉta, ãyira kʼãrẽ ẽ kĩrãkʼa akʉpanʉ wuabemarabara (akʉra Isaías 42:3; Mat. 12:20). Jeowaba naʉ̃ yizata zokʼasi ũdubita Jesúsba ẽbẽrarã wuabemaraba kʼãrẽ ẽ kĩrãkʼa akʉbʉra, kãga akʉita akʉza so borekea akʉita.

7, 8. ¿Sãwũã aripe berabaribisi Jesúsbara Isaíasba propesiaba jarabʉra?

⁷ Mateoba ũdubisi maʉ̃ propesia Isaíasba jaradara Jesúsba aripe berabaribisita iya naʉ̃ta jaraside: «Cha bʉa wãbodobʉra arawua bʉeta ẽ bayi, mia kia ẽ bayi ĩbira ʉ̃rabʉrʉ pʉreabʉsira». Jesús ewaride basi ẽbẽrarã mejãcha wuabemaraba bia edada ẽãta akʉza zʉbʉria opanʉta, maʉ̃ra ẽbẽrarãbara kʼãrẽ biata jʉ̃ãpana ẽ basi. Mamina Jesúsba miõba okata osi ãyi kʼarebaita. Bari jaradaita, Jesús ewaride basi yumakẽrã aba mejãcha kayabʉta akʉza iyira wuabema ẽbẽrabawara ãba ba ẽ baibarabasi, maʉ̃nera yumakẽrãbara krĩchabasibaibara iyira wua be ẽ baita akʉza wua iyi mebẽrãbawara ãba ba ẽ baita mia iyi neũdukʼawuarabawara (Luc. 5:​12, 13). Adewara basi yumakẽrã ũrĩ ẽãbʉta akʉza bia bedʼeabe ẽãbʉta. Naʉ̃ yumakẽrãra bia ẽã basibaibara wuabemara bedʼeabarabʉ ũdubasidera iya ũrĩ ẽ basi baera mia kʼãrẽsida akʉza kʼãrẽ jarabe ẽ basi baera (Mar. 7:​32, 33). Mamina maʉ̃ awa ẽ basi ãyi bedʼea zromara.

⁸ Jesús ewaribasidera judiorabara krĩchapanasi ẽbẽra aba kayabʉ kʼarea zʉbʉriabʉbʉrʉ, maʉ̃ra mawũã berabaribʉta iya nemitia oda kʼarea, mawũã e bʉrʉ yibariraba nemitiata osi baera (Juan 9:2). Ãya mawũã krĩchapanʉ kʼarea, yi zʉbʉriapanʉrãra bia edada ẽ basi, krĩchapanasi maʉ̃ra ẽbẽrarã mawũã zʉbʉriabʉra kʼãrẽ ẽ kĩrãkʼabʉta, mamina Jesúsbara naʉ̃ra ẽbẽrarãra mawũã akʉ ẽ basi, awuarabʉrʉ yi kayabʉrãra bebisi akʉza ãya kʼawuabisi Jeowabara ãyira krĩchabʉta, ¿naʉ̃ba dayirã kʼãrẽta jaradiabʉ Jesús ʉ̃rʉ?

9. Hebreos 4:​15, 16ba, ¿sãwũã ũdubibʉ Jesúsbara wãrĩnu so borekea akʉbʉta ẽbẽrarãra?

⁹ (Akʉra Hebreos 4:​15, 16). Dayirãba ĩjãseapanʉ Jesúsbara dayirãra ewari jõmaʉ̃nẽ so borekea akʉita, ¿kʼãrẽta jarakĩrãbʉ so borekea akʉibara? Griego bedʼeade so borekea abʉbara jarakĩrãbʉ, awuru ẽbẽra zʉbʉriabʉ ũdubʉrʉde dayisida maʉ̃ kĩrãkʼa zʉbʉriaita, dayita maʉ̃ne berabarinʉmʉ kĩrãkʼa. (Adewara akʉra Hebreos 10:​34, nama Pabloba iyabaʉ bedʼea griegodebemata zokʼasi). Jesúsba miõba okata oda ʉ̃rʉ nebʉrabʉde ũdubibʉ, iya wuabemarãra so zʉbʉria akʉbasita ãyi daucha zʉbʉriabasita iyisida. Jesúsbara wuabemarãra bebi ba ẽ basi bari oibara baera, awuarabʉrʉ obasi wãrĩnu ãyi ʉ̃rʉ krĩchabasi baera akʉza wãrĩnu kʼarebakĩrãbasi baera. Bari jaradaita, basi ẽbẽra aba lepraba baribʉta maʉ̃ ẽbẽrarã poaga biobasi ẽbẽrarãneba jĩgabʉta. Jesúsba maʉ̃ ẽbẽra bebisidera jĩgaʉba bebiseabasi, mamina mawũã oẽbasi, awuarabʉrʉ tõbarisi, mõbe bebisi. Adewara basi yumakẽrã aba ũrĩ ẽãbʉta, maʉ̃ ẽbẽrarã Jesúsbara ẽbẽrarã bionʉmʉmaeba jãpe ede kʼãrãpe bebisi. Adewara yuwẽrã nemitia obada jẽda krĩchadaba Jesús jĩrʉ iyi daʉbaba sʉgʉsidera akʉza iyi bʉdaba jãrẽsidera pariseo abaʉba mitia krĩchasi iyi ʉ̃rʉ, mamina Jesúsʼra maʉ̃ yuwẽrã are bedʼeasi (Mat. 8:3; Mar. 7:33; Luc. 7:44). Naʉ̃ba ũdubibʉ Jesúsbara ẽbẽrarã nemitia odapeadarãra akʉza kayapanʉrãra mitia akʉba ẽ basita, ãyideba jĩga wã ba ẽ basita, awuarabʉrʉ bia edabasi akʉza so zarea diabasi mawũã so borekeata ũdubibasi. Dayirãbida ĩjãseapanʉ Jesúsbara idi ewade abarika so borekea akʉita dayirãra.

DAYIRÃ SUMO SASERDOTEDE KĨRÃKʼA ODADRɄ

10. ¿Dayirãbara kʼãrẽ kʼarebata erbʉ yi dabʉba ũdu ẽãta akʉza kʉwʉrʉba ũrĩ ẽãta kʼarebadaita Jeowa kʼawa bamarẽã? (Akʉra potorata).

¹⁰ Dayirãbara Jesúsde kĩrãkʼa okĩrãpanʉ baera zarea opanʉ wuabemara kãga ũdubita, so borekea ũdubita (1 Ped. 2:21; 3:8). Dayirãba Jesúsde kĩrãkʼa dabʉba ũdu ẽãbʉta, kʉwʉrʉba ũrĩ ẽãta bebi auda ẽ mina, kʼarebaseabʉ ẽbẽrarãra Jeowa kʼawa bamarẽã. Bari jaraita, bʉ kartara ẽbẽrarã juwaba bedʼeabʉraita bedʼea awuara awuaraka 100 audre. Adewara yi dabʉba ũdu ẽã bʉraitara bʉ ãyita kartara bedʼea 60 audre. Maʉ̃ awuara bideode kʼãrẽ sãwũã berabarinʉmʉta jara ũrĩbibʉta, bʉ bedʼea awuara awuaraka 100 audre. Naʉ̃ba kʼarebabʉ yi kʉwʉrʉba ũrĩ ẽãbʉta akʉza dabʉba ũdu ẽãta Jeowata Jesúsʼʉ̃me ũdukʼawuamarẽã.

11. ¿Sãwũã Jeowa organizasionbara Jesúsde kĩrãkʼa so borekea akʉbʉ ẽbẽrarãra? (Hechos 2:​5-7, 33 akʉza akʉra potorata).

¹¹ Jeowa organizasionbara zarea obʉ ẽbẽrarã jõmaʉ̃ʼa jaradiaita Jeowa ʉ̃rʉ. Kĩrãbera jẽda piradrʉda tẽãra Jesúsbara jaure zareata diasita iyi kʼaidupanʉra, mawũã ãya jaradiadamarẽã ẽbẽrarã Pentecostés piestade ãbapanʉra, mawũã mamapanʉra ẽbẽrarãba ũrĩnamarẽã ãyi bedʼea arade Daizeze ʉ̃rʉ (akʉra Hechos 2:​5-7, 33). Mawũẽra Jesúsde kĩrãkʼa opanʉ baera Jeowa organizasionbara idi ewadera kartarãra Daizeze Bedʼeadeba bedʼea awuara awuaraka 1.000 audre obʉrʉ. Ʉ̃kʉrʉ bedʼeata ẽbẽrarã wiñaʉba bedʼeabʉmina maʉ̃raitabida obʉ kartara. Bari jaradaita, América Nortede akʉza Surde panʉ ẽbẽrarãta, mamina ãyi ẽbẽra bedʼeara awuara awuarakabʉ, mõbe maʉ̃ne panʉ ʉ̃kʉrʉ ẽbẽrarãra wiñabʉta, mamina maʉ̃raitabida bʉ kartarata 160 bedʼea awuara awuarakade, mawũã maʉ̃ra ẽbẽrarãbida ũrĩnamarẽã bedʼea biata Daizezedebemata. Adewara dayirã kartarãra bʉ 20 bedʼea romanírane, ẽbẽrarã mejãchaʉba maʉ̃ra bedʼea bedʼeabʉraba ĩjãsida Jeowa ode bʼaita.

12. ¿Adewara Jeowa organizasionbara kʼãrẽta zokʼabʉ wuabemara kʼarebaita?

¹² Adewara ẽbẽrarã bedʼea bia Daizeze ʉ̃rʉ jaradiabʉ awuara, kʼarebabʉ Jeowa organizasionbara yi zʉbʉriabʉra do kʼarea, drʉa ure kʼarea, mawũã ẽ bʉrʉ nãgʉba obʉrʉ kʼarea. Akʉza mawũã zʉbʉrianʉmʉne kʼarebaira, mebẽrã mejãchaʉba kʼarebapanʉ, adewara mebẽrã diapanʉ ãya nesidapanʉta. Adewara Jeowa organizasionbara kʼarebabʉ de parã diaita mebẽrãta mawũã ãba yi jʉredamarẽã Jeowa ʉ̃rʉ kʼawuaita.

DAYIRÃ SUMO SASERDOTEBARA KʼAREBASEABɄ BɄRA

13. ¿Jesúsbara sãwũã kʼarebabʉ dayirãra?

¹³ Jesúsbara nekʼãrẽ jõma obʉ dayirãba nesidabʉ diaita, mawũã Jeowa kʼawa bamarẽã (Juan 10:14; Efes. 4:7). Edaʉde dayirãra sentiseabʉ cha bʉa wã kĩrãkʼa mawũã ẽ bʉrʉ ĩbira ki wã kĩrãkʼa, ¿kʼãrẽa? Mejãcha kayabʉ baera, dayirãba nemitia oda kʼarea, mawũã ẽ bʉrʉ mebẽrã kongregasionebemaʉ̃me yõsi baera. Mawũẽra zarea baseabʉ akʉita ʉ̃rabʉrʉ kʼãrẽ nebia zeita. Audre krĩcha baseabʉ idi ewade daya kʼãrẽ bedʼea zroma erbʉta. Mamina kĩrãduarãra Jesúsbara kʼawuabʉta bʉ kʼãrẽne sãwũã berabarinʉmʉta akʉza bʉ sãwũã sentibʉra kʼawuabʉ, maʉ̃ kʼarea bʉta so borekea akʉbʉ akʉza kʼarebakĩrãbʉ. Bari jaraita iya kʼarebaseabʉ jaure zarea diabʉrʉde bʉ krĩcha zroma obʉde so zarea diaita (Juan 16:7; Tito 3:6). Adewara Jesúsbara zokʼaseabʉ zõrãrã kongregasionebemata akʉza mebẽrãta bʉaʼa so zarea diaita (Efes. 4:8).

14. ¿Kʼãrẽta oseapanʉ dayirã krĩcha zroma opanʉnera?

¹⁴ Bʉ krĩcha zroma obʉde kĩrãbera dayirã sumo saserdote Jesús ʉ̃rʉ, iya kʼãrẽta onʉmʉta idi ewade akʉza kʼãrẽ nebiata weita aranʉ. Kĩrãduarãra Jeowabara Jesúsʼra bari dia bʉe ẽ basita nama egoroeda dayirãbari beimarẽã, awuarabʉrʉ dia bʉesi biʼia kʼawuamarẽã ẽbẽrarãba kʼãrẽ bedʼea zroma erbʉta akʉza sãwũã sentibʉta. Mawũẽra dayirã krĩcha zroma obʉdera dayirãba nemitia oda kʼarea, Jesúsbara dayirãra kʼarebayawabʉ dayirãba kʼareba nesidabʉ ewaride (Heb. 4:​15, 16).

15. Jara ũrĩbira sãwũã ẽbẽra aba Jeowa odeba jĩga wãnata kʼareba ũdusita kongregasionʼena zeita.

¹⁵ Jesúsbara kongregasioneba mejãcha kʼarebabʉ yi ẽbẽrarã Jeowadeba jĩga wãnata jẽda zemarẽã (Mat. 18:​12, 13). Akʉdaya Stefanob berabaridata. Iyi kongregasioneba ãĩ wãnata, 12 poaga berabaribʉrʉde ãba yi jʉrebarieda wãita krĩchasi. Iya jarabʉ: «Mʉ̃itara mejãchade zareabasi, mamina mebẽrãʉ̃meba Jeowaba kãgabʉta okĩrãbasi. Adewara zõrãrã kongregasionebemabara mʉ̃ra bia edasida. Edaʉde krĩcha zroma obasi mʉ̃a Jeowata amaesi baera, mamina zõrãrãbara mʉ̃aʼa kĩrãbebipanasi Jeowaba akʉza Jesúsʼʉ̃meba, mʉ̃ra mejãcha kãgabʉta akʉza Jeowa ota amae ẽ marẽã jarapanasi. Maʉ̃ta mʉ̃ jẽda kongregasionʼena zebʉrʉdera mebẽrãbara mʉ̃ra bia edasida. Maʉ̃ tẽã mʉ̃ kimara Daizeze Bedʼea kʼawua jʉ̃drʉsi akʉza idi ewadera mʉ̃ta, mʉ̃ mebẽrãbawara Jeowa odepanʉ». Mawũẽra dayirã sumo saserdote Jesúsʼra mejãcha sobiabʉbaibara ũdubʉrʉde mebẽrã kongregasionebemara mejãcha zarea obʉta kʼarebaita Jeowadeba jĩga wãnata jẽda zemarẽã.

16. ¿Bʉitara kʼãrẽa yibia sumo saserdote bia erbaira?

¹⁶ Jesús nama egorode basidera Jesúsbara ẽbẽrarã mejãchaʉta kʼarebasi ãya kʼareba nesidabʉde. Idi ewadebida dayirãbara wãrĩnu ĩjãseapanʉ Jesúsbara kʼarebaita ewari jõmaʉ̃nẽ dayirãba kʼareba nesidabʉde. Akʉza ẽjũã kĩrãwãreãnẽra ẽbẽrarã iyi bedʼea ũrĩbʉra ẽdrʉbiyi nemitia omianeba. Mawũẽra biga diapanʉ Jeowaʼa dayirã so zʉbʉria akʉsi baera akʉza dayirãta kãgabʉ baera diasi yi warra Jesústa dayirã sumo saserdote bia bamarẽã.