Bʉ mebẽrãnebema akʉbʉde sobiabara

1, 2. Bʉa akʉbʉbʉrʉ zõrãbʉta mawũã ẽ bʉrʉ kayabʉta, ¿sãwũã krĩchabʉ Jeowara bʉ ʉ̃rʉra? (Proverbios 19:17; akʉra potorata).

MEBẼÃ aba Coreadebemaba yi trʉ̃ Jin-yeolba nebʉrabʉ: «Mʉ̃ kimaʉ̃me juwa jidadata 32 poaga ba. Maʉ̃ta 5 poaga ba iyi akʉbʉta mʉ̃ kimara mejãcha kayabʉ baera akʉza maʉ̃ba iyitara zareabʉ piraita. Mʉ̃ara mejãcha kãga mʉ̃ kimara, maʉ̃ba mʉ̃ara akʉkĩrãne akʉbʉ iyira. Dai dedara ospitaldebema kamatabʉ, mama diamasiza kʼãĩbʉ iyira, mʉ̃ra iyi kʼawa kʼãĩbʉ, maʉ̃ne iyi juwama jida kʼãrãpe kʼãĩbʉ».

² Bʉara akʉbʉbaibara bʉ papata, bʉ zezeta, bʉ kimata, bʉ wũãwũãta, mawũã ẽ bʉrʉ bʉ neũdukʼawuata, ãyi kayabʉ kʼarea mawũã ẽ bʉrʉ zõrãbʉ kʼarea, bʉa mawũã obʉbʉrʉ, maʉ̃ra bʉitara jipa biga, akʉkĩrãne akʉbʉ bʉa maʉ̃ra kãgabʉ baera. Adewara mawũã obʉ Jeowata kãgabʉ baera (1 Tim. 5:​4, 8; Sant. 1:27). Mamina mawũã akʉbʉde bedʼea zromata ũduseabʉbaibara, mawũã oira zareabʉ baera. Edaʉde sentibʉbaibara bʉtrʉ abapai zʉbʉriabʉta, maʉ̃ kʼarea bʉra wuabemara daidura sobiabʉta ũdubibʉmina, bʉ sodera jẽgabʉbaibara (Sal. 6:6). Wuabemaba ũduda ẽ mina bʉ kʼãrẽaba zʉbʉriabʉta Jeowabara akʉbʉ (naʉ̃ testoʉ̃me akʉra Éxodo 3:7). Jeowabara akʉbʉ bʉya kʼãrẽ okĩrãbadata idubʉebʉta bʉ mebẽrãnebema akʉita akʉza akʉbʉ edaʉde bʉ jẽgabʉta, zarea trajabʉta ãyi bia akʉita, maʉ̃ kʼarea iyara bʉra mejãcha kãga (Sal. 56:8; 126:5). Mawũẽra bʉ mebẽrãbari nekʼãrẽ jõma obʉra Jeowaʼa nebiata diabʉ kĩrãkʼabʉ, maʉ̃ba iyara bʉara maʉ̃ta jẽda diayi (akʉra Proverbios 19:17).

3. ¿Kʼãrẽ bedʼea zromata ũdusidaba Abrahánba akʉza Saraʉ̃meba Taré akʉsidadera?

³ Daizeze Bedʼeade nebʉrabʉ ẽbẽra zõrãbʉta, mawũã ẽ bʉrʉ kayabʉta akʉpanana ʉ̃rʉ. Bari jaraita, akʉdaya Abrahán akʉza Sara ʉ̃rʉ. Ãyira pʉwʉrʉ Urdeba wãibarabasi, Abrahán zeze Taréʉ̃me, naʉ̃ra 200 poagabasi. Mawũãsidu ãyi kʼaidu wãsi. Jĩga wãibarabasi Haránʼinʉbayeda 960 kilometro (Gén. 11:​31, 32). Abrahánba akʉza Saraʉ̃meba mejãcha kãgabasi Taréra, mamina ãyitara mejãcha zareabasibaibara Taré akʉira, mamina audre zareabasibaibara ãyi mawũã ode wãne. Ãyira wãsibaibara kameyode, mawũã ẽ bʉrʉ burrode. Taréra zõrãbasi baera iyitara mejãcha zarebasibaibara. Maʉ̃ba Abrahánta Saraʉ̃mera aukʼarapanasibaibara. Mamina Jeowaba zarea diasi mawũã jĩga wãita. Mawũẽra abarika Abrahánʼa akʉza Saraʼa zarea diada kĩrãkʼa bʉabida zarea diayi Jeowabara (Sal. 55:22).

4. ¿Kʼãrẽta kʼawuadai naʉ̃ artikulodera?

⁴ Sobiabʉbara kʼarebaseabʉ bʉ mebẽrãnebema akʉbʉde, mejãcha aukʼara ẽ baita (Prov. 15:13). Ẽbẽra aba sobiabʉbʉrʉ, iya bedʼea zroma erbʉbʉsida sobiabayi (Sant. 1:​2, 3). Mamina, ¿sãwũã sobia bʼai mawũã bedʼea zroma erbʉbʉsida? Jeowaʼa yiwidʼibaibara akʉza iyaʼa kʼareba widibara, ũdubimarẽã kʼãrẽ kʼarea sobia bʼaita. Naʉ̃ artikulode kʼawuadayi kʼãrẽa nesidabʉ sobia bʼaita akʉza kʼãrẽa aduaseabʉ bʉ sobiabʉra, bʉ mebẽrãnebema akʉbʉde. Akʉza kʼãrẽta oseabʉta bʉ sobiabʉta adua ẽ baita bʉ mebẽrãnebema akʉbʉta. Adewara sãwũã wuabemarabara bʉra kʼarebaseabʉta.

KʼÃRẼA ZAREA BASEABɄ BɄ MEBẼRÃNEBEMA AKɄBɄDE BɄ SOBIA BʼAITA

5. ¿Kʼãrẽa nesidapanʉ sobia bʼaita?

⁵ Badua krĩchara ẽbẽra aba akʉide kʼãrẽaba zareabʉta, mawũãra zarea neẽbayi (Prov. 24:10). Aukʼarabʉrʉdera, bia eda ẽ bayi wuabemara akʉza akʉkĩrãne akʉ ẽ bayi.

6. ¿Kʼãrẽa yi mebẽrãnebema akʉbʉra mapaepanʉ?

⁶ Ẽbẽra wuabema akʉbʉra mejãcha mapaebʉ. Mebẽã wẽrã yi trʉ̃ Leahba naʉ̃ta jarabʉ: «Ẽbẽra aba akʉira mejãchade zareabʉ. Ewaride nekʼãrẽ mejãcha zareabʉta oibara ẽ basimina, ewari kiuyedara mapaebʉ akʉza kʼãrẽ oamabʉ, mejãcha aukʼarabʉ baera. Maʉ̃ba mʉ̃aʼa mensaje dia bʉepanʉra akʉamabʉ akʉza panʉamabʉ». Ʉ̃kʉrʉra bia kʼãĩ ẽ akʉza ewari neẽ aña wãita. Mebẽã aba yi trʉ̃ Inésba naʉ̃ta jarabʉ: «Mʉ̃ra bia kʼãĩ ẽ, diamasira ora ũmene piradrʉibara mʉ̃ pakõrẽ akʉita akʉza mʉ̃ta mʉ̃ kimaʉ̃me aña pasia wã ẽã bʉta dããraba». Adewara ʉ̃kʉrʉra ãyi neũdukʼawuarabawara wãbe ẽ akʉza kongregasione asignasion diabʉdata obe ẽ, ãyi mebẽrãnebemata ewari jõmaʉ̃nẽ akʉibara baera. Maʉ̃ba doba sentiseabʉ akʉza sopʉa baseabʉ ãya nãã obada kĩrãkʼa obe ẽ baera.

7. ¿Kʼãrẽa ʉ̃kʉrʉ yi mebẽrãnebema akʉbʉra sopʉapanʉ akʉza ãyima bia oẽãta sentipanʉ?

⁷ Yi mebẽrãnebema akʉbʉra sopʉa sentiseabʉ akʉza bia ẽã sentiseabʉ iyima aña osi baera. Mebẽã wẽrã yi trʉ̃ Jessicaba naʉ̃ta jarabʉ: «Mʉ̃a sentibʉ mʉ̃a mʉ̃ zeze kʼãrẽ obʉra mejãcha oẽãta, awuarabʉrʉ audre oibarata nesidabʉta, maʉ̃ kʼarea mʉ̃ enaʉ̃bʉrʉdera krĩchabʉ bia ẽãta osita awuarabʉrʉ mʉ̃yitrʉ krĩchabʉta». Ʉ̃kʉrʉra mejãcha krĩcha zroma obʉbaibara sentibʉ baera, ãyi mebẽrãbari nekʼãrẽ mejãcha oẽãta, mawũã ẽ bʉrʉ sentiseabʉ maʉ̃ ẽbẽrarã wua bia akʉbe ẽãta. Edaʉde aukʼarabʉde bedʼea mitiata jaraseabʉ, maʉ̃ba sopʉabiseabʉ ẽbẽra iya akʉbʉta (Sant. 3:2). Naʉ̃ jõmaʉ̃ba yi akʉbʉra mejãcha sopʉabiseabʉ. Adewara ʉ̃kʉrʉra mejãcha sopʉa sentibʉ ãya ãyi mebẽrãnebema akʉbʉta ewariza audre kaya wãta ũdupanʉne. Mebẽã wẽrã yi trʉ̃ Bárbaraba jarabʉ: «Mʉ̃itara mejãchade zareabʉ, mʉ̃a ẽbẽra aba mejãcha kãgabʉta ũdu wãne ewariza audre idra wãta».

8. ¿Ʉ̃kʉrʉra sãwũã sentipanʉ awuruba ãyaʼa biga diabʉrʉde?

⁸ Bʉa sentiseabʉ bʉaʼa biga diada ẽãta bʉa obʉ kʼarea. ¿Kʼãrẽa mawũã sentiseabʉ? Bʉaʼa jarada ẽ baera bia obʉta bʉa obʉra akʉza maʉ̃ kʼarea bʉaʼa biga diada ẽ baera, mamina ẽbẽra abaʉba bʉaʼa biga diara bʉa obʉ kʼarea, naʉ̃ba bʉra mejãcha sobiabiseabʉ (1 Tes. 5:18). Mebẽã wẽrã aba yi trʉ̃ Melissaba jarabʉ: «Edaʉde mʉ̃ra mejãcha jẽgabʉ krĩcha zroma obʉ baera akʉza sopʉabʉ baera. Mamina jari ẽbẽrarã mʉ̃a akʉbʉba naʉ̃ta jarabʉrʉde: ‹Biga bʉa daita bia akʉbʉ baera›, mawũã jarabʉrʉba mʉ̃aʼa so zarea diabʉ, naʉ̃ bedʼeaba nrʉemane jẽda ãyi akʉkĩrãne akʉkĩrãbʉ». Mebẽã aba yi trʉ̃ Ahmadu akʉza yi kimaʉ̃meba akʉpanʉ ãyi sobrina zaketa, maʉ̃ra mejãcha kayabʉ. Ahmaduba jarabʉ yi sobrina zakeba iyaʼa biga diabʉrʉde iyi sãwũã sentibʉta: «Mʉ̃ sobrina zakebara kʼawua ẽ baibara daiba nekʼãrẽ mejãcha obʉta iyi akʉita, mamina daira mejãcha sobiabʉ daia biga diabʉrʉde, mawũã ẽ bʉrʉ kartade bʉ kʼãrãpe naʉ̃ bedʼeata bʉbʉrʉde ‹Mejãcha kãga›».

KʼÃRẼBA KʼAREBAI SOBIABɄ ADUA Ẽ BAITA

9. Yi mebẽrãnebema akʉbʉbara, ¿sãwũã ũdubibʉ sainʉ oita kʼawuabʉta?

⁹ Kʼawuabara kʼãrẽta oseabʉta akʉza kʼãrẽta obe ẽãta (Prov. 11:2). Jõmaʉ̃ta zarea neẽ akʉza ewari neẽ daya kãgabʉta jõma oita, maʉ̃ba kʼawuaibara bʉa kʼãrẽta oseabʉta akʉza kʼãrẽta obe ẽãta. Maʉ̃ba edaʉde wuabemaraba bʉa kʼãrẽ omarẽã jarabʉrʉta ĩjã ẽ bayi. Bʉa mawũã obʉrʉra bigabʉ, maʉ̃ kʼarea krĩcha orãra, maʉ̃ba ũdubibʉ baera bʉa kʼawuabʉta sainʉ oseabʉta. Maʉ̃ awuara, awururaba bʉta kʼarebakĩrãbʉbʉrʉ maʉ̃ra idu yi kʼarebabira, adewara biga diara ãyaʼa. Mebẽã abaʉba yi trʉ̃ Jayba naʉ̃ta jarabʉ: «Dayirãbara nekʼãrẽ mejãcha obe ẽ, maʉ̃ba bia kʼawuapanʉbʉrʉ sainʉ oseabʉta akʉza maʉ̃neba wua oẽ bʉrʉ, naʉ̃ba kʼarebayi dayi sobiabʉta adua ẽ baita».

10. Bʉa ẽbẽra aba kayabʉta akʉbʉbʉrʉ, ¿kʼãrẽta kʼawuaibara? (Proverbios 19:11).

¹⁰ Kʼawuara kʼãrẽ kʼarea ẽbẽra abaʉba mawũã obʉta (akʉra Proverbios 19:11). Bʉa mawũã obʉbʉrʉ ẽbẽra bʉa akʉbʉba bʉaʼa bedʼea mitiata jarabʉrʉdera, maʉ̃nera bʉra aduʼabayi mesera kĩrʉ ẽ bayi. Ẽbẽra buru biabara zarea obʉ kʼawuaita kʼãrẽ kʼarea maʉ̃ ẽbẽrabara mawũã osita. Ẽbẽra kayabʉbara obʉ akʉza jarabʉ ãya nãã jara ẽ baibadata (Ecl. 7:7). Bari jaraita, ẽbẽrarã wuabemara bia edabadata iyira kayabʉ baera, wuabemaʉ̃me kʼaikʼai baseabʉ, kĩrʉ baseabʉ, mawũã ẽ bʉrʉ iya kãgakʉtrʉ diadamarẽã kãga baseabʉ akʉza mia kʼãrẽba iyira sobiabi ẽ. Bʉa akʉbʉbʉrʉ ẽbẽra aba mejãcha kayabʉta, bigabayi bʉa kʼawuaita iyira kʼãrẽba kayabʉta. Bʉa kʼawuabʉrʉde iyi kʼãrẽba kayabʉta, naʉ̃ba kʼarebayi iya obʉra iyi kayabʉ kʼarea mawũã obʉta, akʉ ẽ bayi iya kʼãrẽta aña obʉta (Prov. 14:29).

11. Yi mebẽrãnebema akʉbʉbara, ¿kʼãrẽita ewari jʉrʉibara ewariza? (Salmo 132:​4, 5).

¹¹ Ewari jʉrʉda audre Jeowa neũdukʼawua bʼaita. Edaʉde bʉa nekʼãrẽ mejãcha obʉdebemata oẽ baibara, mawũã «audre yibiata» oita (Filip. 1:10). Maʉ̃nebemara audre yibia Jeowa neũdukʼawua bʼaita. Nokʼo Davidbara nekʼãrẽ mejãcha obasimina iyara nããra bʉesi Jeowadeta (akʉra Salmo 132:​4, 5). Maʉ̃ kĩrãkʼa bʉa nekʼãrẽ mejãcha oibaramina ewari jʉrʉseabʉ Daizeze Bedʼea leita akʉza Jeowaʼa yiwidʼita. Mebẽã wẽrã yi trʉ̃ Elishaba jarabʉ: «Jeowaʼa yiwidʼibʉ akʉza lebʉ salmorata, adewara mama bedʼea jarabʉ ʉ̃rʉ mejãcha krĩchabʉ. Maʉ̃ba kʼarebabʉ mʉ̃ aduʼa bʼaita akʉza sobia bʼaita. Jeowa yiwidʼibʉba audre kʼarebabʉ mʉ̃ra, ewaride Jeowaʼa yiwidʼima bio yiwidʼibʉ iya mʉ̃ta kʼarebamarẽã».

12. ¿Yi akʉbʉbara kʼãrẽa biga ewari jʉrʉita iyikʉza bia akʉita?

¹² Bʉyikʉza bia akʉra. Bʉ mebẽrãnebemata akʉbʉ baera bʉra mejãcha ewari neẽ, yiko bia eda kʼãrãpe maʉ̃ta okoita, mamina bʉ kakuata akʉza bʉ buruta bia erbaira, nesidabʉ yiko bia koita akʉza ejersisio oita. Maʉ̃ kʼarea mawũã bʉ ewari mejãcha neẽmina ewari jʉrʉibara maʉ̃ oita, mawũã mejãcha kaya ẽ baita (Efes. 5:​15, 16). Adewara zarea ora audre bia kʼãĩta (Ecl. 4:6). Ẽbẽrarã buru morro ʉ̃rʉ estudiapanʉraba jarapanʉ kʼãĩbʉbara kʼarebabʉta dayi buru morro ara oita, adewara karta medikoraba odaba jarabʉ ẽbẽrarã biʼia kʼãĩbʉbara kʼarebabʉta krĩcha zroma oẽ baita, adewara bedʼea zroma erbʉdera aduʼa sentita. Akʉza ewari jʉrʉibara bʉa kãgabʉ oita (Ecl. 8:15). Mebẽã wẽrã aba yi mebẽrãnebema akʉbʉba jarabʉ kʼãrẽta obʉta iyi sobiabʉ adua ẽ baita: «Ewari bia ũnadrʉbʉ ewadera, mʉ̃ra ãĩ wãbʉ mʉ̃ dedaʉba akʉza jedekoza ewari aba jʉrʉbʉ mʉ̃ neũdukʼawua wẽrãʉ̃me mʉ̃a kãgata oita».

13. ¿Kʼãrẽa yibia ipida bʼaira? (Proverbios 17:22).

¹³ Jʉrʉda nekʼãrẽ bʉ ipidabibʉta (akʉra Proverbios 17:22; Ecl. 3:​1, 4). Bʉ ipidabʉbara kʼarebabʉ mejãcha krĩcha zroma oẽ baita. Daya ẽbẽra aba akʉbʉbʉrʉ daya krĩchabʉ kĩrãkʼa jõma berabari ẽ, maʉ̃ kʼarea mejãcha kĩrʉseabʉ. Mamina bʉa jʉrʉbʉbʉrʉ mawũã berabaribʉrʉde maʉ̃ kʼarea ipida bʼaita, naʉ̃ba kʼarebaseabʉ bʉ mejãcha kĩrʉ ba ẽ baita. Adewara ẽbẽra bʉa akʉbʉme bʉta ipidabʉbʉrʉ, mayi yi kãgabʉta audre wari wãseabʉ.

14. ¿Sãwũã kʼarebaseabʉ neũdukʼawuaʉ̃me bedʼeaibara?

¹⁴ Bʉ neũdukʼawua jarada bʉ sãwũã sentibʉta. Bʉa nekʼãrẽ mejãcha obʉbʉsida bʉ sobia bʼaita, edaʉde bʉra krĩcha zroma oseabʉ. Mawũã berabaribʉrʉdera jʉrʉda neũdukʼawua bʉ bia sentibibʉta, aña krĩchabibʉ ẽãta bʉa jarabʉ kʼarea, awuarabʉrʉ bʉa jarabʉta ũrĩbʉta akʉza bʉaʼa so zarea diabʉta, maʉ̃bara kʼarebayi bʉra akʉza jẽda sobia bʼaita (Prov. 12:25; 17:17).

15. ¿Kʼãrẽa yibia ẽjũã kĩrãwãreã ʉ̃rʉ bedʼeaita?

¹⁵ Krĩchara kʼãrẽta oita bʉ mebẽrãbawaraʉba ẽjũã kĩrãwãreãnẽ. Kĩrãbera bʉara ewari jõmaʉ̃nẽ zõrãbʉta akʉza kayabʉta akʉ ba ẽ baita, adewara kĩrãbera Jeowabara oẽ basita ẽbẽra yi kayabʉta akʉpanamarẽã (2 Cor. 4:​16-18). Mamina ẽjũã kĩrãwãreãnẽra dayirãra panañi Jeowaba kãgabada kĩrãkʼa (1 Tim. 6:19). Bʉta bedʼeara ẽbẽra bʉaʼa akʉbʉme ẽjũã kĩrãwãreãnẽ kʼãrẽta odaita, mawũãra mayi ũmena mejãcha sobiapanañi (Is. 33:24; 65:21). Mebẽã wẽrã yi trʉ̃ Heatherba jarabʉ: «Ẽbẽra mʉ̃a akʉbʉra badua naʉ̃ta jarabʉ, ãbaʉba wua kasudaita, ãba wũẽbapanaita, ãbaʉba bisikleta manejanaita, pan wiadaita akʉza neodaita dayirã mebẽrãra jẽda piradrʉbʉrʉraita. Ãbaʉba Jeowaʼa biga diapanʉ nebiata jʉ̃ãbibʉ baera Jeowaba».

WUABEMARABARA SÃWŨÃ KʼAREBASEABɄ

16. ¿Kongregasionbara sãwũã kʼarebaseabʉ yi mebẽrãnebema akʉbʉra? (Akʉra potota).

¹⁶ Kʼarebara yi mebẽrãnebema akʉbʉba ewari erbamarẽã. Mebẽrã kongregasionebemarabara ãyareba jaraseabʉ zõrãbʉta, mawũã ẽ bʉrʉ kayabʉta akʉita, mawũã yi mebẽrãnebema akʉbʉta ewari erbamarẽã enaʉ̃ita akʉza iya nekʼãrẽ oita nesidabʉta omarẽã (Gál. 6:2). Bari jaraita, ʉ̃kʉrʉ mebẽrãbara kartade bʉ amaebʉ semanaza kʼaiba akʉita zõrãbʉta, mawũã ẽ bʉrʉ kayabʉta. Mebẽã wẽrã aba yi trʉ̃ Natalyaba, yi kima wãbe ẽãbʉta akʉbʉba jarabʉ: «Mebẽã aba mʉ̃ kongregasionebemaba mʉ̃ kimata semanane badua akʉ zebʉ, Daizeze Bedʼea jaradia wãpanʉ, bedʼeapanʉ, mawũã ẽ bʉrʉ pelikulata akʉpanʉ ãbaʉba, mawũã obʉra mʉ̃ kimaitara mejãcha yibia akʉza mʉ̃aʼa ewari diabʉ mʉ̃ enaʉ̃ita akʉza mʉ̃a nekʼãrẽ nesidabʉta oita». Adewara dayirãbara jaraseapanʉ zõrãbʉta, mawũã ẽ bʉrʉ kayabʉta diamasi akʉita mawũã yi akʉbʉta bia kʼãĩmarẽã.

17. ¿Kʼãrẽta oseabʉ yi mebẽrãnebema akʉbʉba ãba yi jʉrebʉde jarabʉta bia ũrĩmarẽã?

¹⁷ Kʼarebara yi mebẽrãnebema akʉbʉta ãba yi jʉrebʉde jarabʉta bia ũrĩmarẽã. Yi mebẽrãnebema akʉbʉbara ãba yi jʉrebʉde asambleade jaradiapanʉta, jõma biʼia ũrĩ ẽ, nekʼãrẽ mejãcha obʉ baera yi mebẽrã akʉita. ¿Sãwũã kʼarebaseabʉ mebẽrã kongregasionebemabara? Jewedaseapanʉ zõrãbʉme, mawũã ẽ bʉrʉ yi kayabʉme. Maʉ̃ra oseabʉ wiñaena, mawũã ẽ bʉrʉ ãba yi jʉrebʉ jõñiena. Mawũã yi akʉbʉba ãba yi jʉrebarabʉde jarabʉta bia ũrĩmarẽã. Yi ẽbẽra zõrãbʉta, mawũã ẽ bʉrʉ yi kayabʉta dedaʉba aña wãbe ẽ bʉrʉ, bʉra iyi deda wãseabʉ mõbe iyiʉ̃meba zoomneba akʉseabʉ. Mawũã yi akʉbʉta wãmarẽã ãba yi jʉrebarieda.

18. ¿Adewara kʼãrẽta oseabʉ yi mebẽrãnebema akʉbʉta kʼarebaita?

¹⁸ Yi mebẽrãnebema akʉbʉa bedʼea biata jarada akʉza ãyibari yiwidʼida. Zõrãrã kongregasionebemabara yi mebẽrãnebema akʉbʉra, badua akʉ wãbaibara Daizeze Bedʼeadeba so zarea diaita (Prov. 27:23). Mamina bari mawũã zõrãrã awabʉrʉ mawũã oẽ baibara, mebẽrã jõma kongregasionebemabida jaraseabʉ ãyira mejãcha kãgabʉta akʉza jaraseabʉ ãya obʉra bia obʉta. Adewara Jeowaʼa yiwidʼiseabʉ ãyibari ãyaʼa so zarea diamarẽã akʉza kʼarebamarẽã ãyi sobiabʉta adua ẽ bamarẽã (2 Cor. 1:11).

19. ¿Dayirãbara kʼãrẽ nebiata jʉ̃ãpanʉ?

¹⁹ Aranʉ Jeowabara dayirã zʉbʉriabʉra jõma jõbiyi, wua kayada ẽ bayi, mia beida ẽ bayi (Apoc. 21:​3, 4). «Wãbe ẽ bʉra pinãdrʉyi beguiba obʉ kĩrãkʼa» (Is. 35:​5, 6). Mawũẽra wuara zõna ba ẽ bayi, mia kayada ẽ bayi dayirã mebẽrãnebemara, mia dayirãsida. Maʉ̃ba «nekʼãrẽ nãã berabaridata wua kĩrãbeda ẽ bayi» (Is. 65:17). Dayirãba maʉ̃ nebia jʉ̃ãpanʉenara Jeowabara dayirãra kʼarebayi akʉza doba amae ẽ bayi. Mawũẽra dayirãba jʉrʉpanʉbʉrʉ Jeowata iya dayirã zarea diamarẽã, Jeowabara kʼarebayi awuantaita, jʉ̃ã kʼawuabʉta adua ẽã akʉza sobiabʉta adua ẽã (Col. 1:11).