Junio

Jeowabara kristianora nããbema siglodebemara nekʼãrẽ biata mejãcha diasi, ãya oseabʉta jõma osida baera. Ãyira badua pẽwãpanasi zʉbʉria odaita. Krĩchara kʼãrẽta sãwũã berabarisita Bernabéta Pabloʉ̃me Daizeze Bedʼea jaradiapanʉne pʉwʉrʉ Listra kʼawa. Nããrãra Bernabé akʉza Pablo bedʼeara ẽbẽrabara bia ũrĩsida. Mamina iyabaʉ ewaride wuabema ẽbẽrarã jarasida Bernabéta Pabloʉ̃me mejãcha podamarẽã, maʉ̃ kʼarea Pablora mejãcha posida baera krĩchasida beasidata (Hech. 14:19). Mawũãsidu Bernabéta Pabloʉ̃mera Daizeze Bedʼea jaradiabasi awuru pʉwʉrʉde. ¿Kʼãrẽ nebiata ũdusi ãyara? Kʼarebasi ẽbẽrarã mejãchaʉta Daizeze ode wãmarẽã akʉza ãya odadeba yiza biata amaesi wuabemara mebẽrãita (Hech. 14:​21, 22). Ẽbẽra mejãchaʉba Jeowa ʉ̃rʉ ũdukʼawuasida Bernabéta Pabloʉ̃me Daizeze bedʼeata jaradiabasi baera ãyi pẽwãpanasimina zʉbʉria odaya. Dayirãsida abarika aukʼarada ẽ bʉrʉ Daizeze bedʼea jaradiapanʉta Jeowaba dayirã mejãcha nebiata diayi. w23.04 16, 17 parr. 13, 14

Nokʼo David bedʼea zromane edabasidera ewari jõmaʉ̃nẽ jʉrʉbasi Jeowa kʼarebata. Davidbara krĩchabasi Jeowabara wãrĩnu panʉbʉta yiwidʼira, abarika dayirãbida wãrĩnu ĩjãseapanʉ. Daizeze Bedʼeaba jarabʉ Jeowabara diaseabʉta buru biata akʉza zareata dayirãba nesidabʉ awuantaita. Iya zokʼaseabʉ mebẽrã kongregasionebemarata akʉza ẽbẽrarã iyi ode panʉra ẽãta dayirãta kʼarebamarẽã. Jeowaba dayirã yiwidʼi dayirãba kãgabʉ kĩrãkʼa panʉ ẽ mina, kʼawuabʉ iyara panʉita dayirã yiwidʼira. Iyara diayi dayirãba nesidabʉde akʉza dayirãba nesidabʉ ewaride. Wãrĩnu yiwidʼidaibara akʉza ĩjãbaibara Jeowaba idi ewade akʉita dayirãra akʉza ʉ̃ra zeide «zokʼaibʉra nekʼãrẽ jõma kãgabʉta [diayi]» (Sal. 145:16). w23.05 8 parr. 4; 13 parr. 17, 18

Yibia krĩchaita kʼãrẽ nebia ũduita bʉa oita krĩchada jõma aribaebʉrʉde. ¿Bʉa kʼãrẽ nebia ũduita krĩchaseabʉ? Bʉa krĩchabʉbʉrʉ audre Daizezeʼa yiwidʼita akʉza Daizeze Bedʼea badua le bʼaita, krĩchara sãwũã naʉ̃ oiba kʼarebaita audre Jeowa neũdukʼawua bʼaita (Sal. 145:​18, 19). Bʉa krĩchabʉbʉrʉ bʉ sode nebia erbʉta audre bia owãita, krĩchara sãwũã maʉ̃ oiba kʼarebaita wuabemabawara aduʼa bʼaita (Col. 3:14). Bʉa kãgabʉrʉ bʉra kartade kʼãrẽa bʉya krĩchadara aripe oita krĩchabʉta akʉza tẽã maʉ̃ta badua akʉibara. Akʉza audre ãbabara ẽbẽra bʉa krĩchada oita kʼarebabʉme (Prov. 13:20). Mamina bʉ ewari dayirãba nekʼãrẽ oamabʉta, ¿maʉ̃bara jarakĩrãbʉka dayirãba krĩchada aripe obe ẽãta? Mawũã ẽ. Dayirãba zarea oseabʉ daya krĩchada aripe oita oamabʉmina, mawũã dayirãta zarea opanʉbʉrʉ nebiata ũdudayi. w23.05 27, 28 parr. 5-8

Dayirãba kʼawuaiba daya nekʼãrẽ obʉba zʉbʉriabiseabʉta, kʼarebayi jaraita daya kayirua odata akʉza jẽda krĩchaita, adewara maʉ̃ta wua oẽ baita. Naʉ̃ oiba kʼarebayi wẽbaita ewari jõmaʉ̃nẽbayeda. Bʉa nei aña jidasibʉrʉ ¿kʼãrẽta oseabʉ? Bʉa nei aña oda kʼarea jʉrʉrãra wuabemara jara ũrĩbita bʉa kʼãrẽa mawũã osita maʉ̃ra, mawũã ẽ bʉrʉ jararãra bʉara maʉ̃ra osita awuruba omarẽã jarasi baera. Awuarabʉrʉ kʼawuara maʉ̃ra mawũã berabarisita bʉa bia jida ẽ basi baera akʉza zarea ora audre bia jida kʼawuaita. Bʉa nei aña osibʉrʉ soiduba jẽda krĩchara maʉ̃ ʉ̃rʉ akʉza Jeowaʼa widira kĩrãduamarẽã maʉ̃ta (Sal. 25:11; 51:​3, 4). Bʉa mebẽã abaʉta sopʉabisibʉrʉ widira iyaʼa maʉ̃ta kĩrãduamarẽã akʉza zõrãrã kʼarebata jʉrʉra (Sant. 5:​14, 15). Bʉa kayirua odadeba kʼawuara kʼãrẽta obe ẽãta mõbe maʉ̃ta wua orãra. Bʉa maʉ̃ta ora kʼawuabara Jeowabara so zʉbʉria akʉita akʉza diaita bʉa kʼareba nesidabʉta (Sal. 103:​8-13). w23.08 28, 29 parr. 8, 9

Nokʼo Jehoásbara nebiata ũdusi Jehoiadába odadeba. Nokʼo Jehoiadábara okĩrãbasi Jeowaba jarabadata, mamina Jehoiadá beida tẽã ũrĩ jʉ̃drʉsi apostataraba jarabʉta (2 Crón. 24:​4, 17, 18). Jeowara mejãcha sopʉabasi, maʉ̃ kʼarea zokʼa bʉesi propetarata, ãya obʉta idubʉdamarẽã, mawũãsidu ãyara idubʉda ẽ basi, mia kʼãrẽsida ũrĩna ẽ basi Zacarías Jehoiadá warrata, Jehoás primota iyisida propetabasi, awuarabʉrʉ Jehoásbara bea zokʼasi Zacaríasʼra (2 Crón 22:11; 24:19-22). Jehoásbara Jeowaʼa wawia ũdubi ẽ basi. Jeowaba jarasi: «Mamina mʉ̃ kãgada ẽãra kʼãrẽ ẽ kĩrãkʼa akʉyi» (1 Sam. 2:30). Tẽã siriora gorogorora wĩkabʉba Jehoás gorogorora mejãchabʉta makenasida, maʉ̃are iyita mãrĩsida (2 Crón. 24:​24, 25). Jehoás nezokʼarabara ariya jẽda beasi iyira Zacarías beada kʼarea. w23.06 18 parr. 16, 17

Apostol Pablobara Éfesode jaradiabasi bedʼea bia Daizeze Bedʼeadebemata (Hech. 19:​1, 8-10; 20:​20, 21). Iyara mejãcha kãgabasi mebẽrãra akʉza kʼarebakĩrãbasi ãyira Jeowaʉ̃me kʼẽrẽpa panamarẽã. Krisitano Éfesodebemaraba Daizeze ʉ̃rʉ wãrĩnu kʼawuai nããra religion zeri ẽãne edapanasi akʉza magia ʉ̃rʉ ĩjãpanasi. Éfeso pʉwʉrʉde basi templo daizeze zeri ẽ Artemisdeta. Mejãcha ẽbẽrarã maʉ̃ ewaridebemaraba krĩchapanasi maʉ̃ templora audre yibiata wuabemaraneira. Ẽbẽrarã mejãchaʉba nekʼãrẽ oma yiwidʼipanasi akʉza ne nẽdobarirabara nẽdonapasi nekʼãrẽ oma daizeze zeri ẽ Artemisdeta, maʉ̃ba ãyara plata mejãcha ganapanasi adewara maʉ̃ pʉwʉrʉdera magiata mejãcha opanasi (Hech. 19:19). Ẽbẽra Éfesodebemarabara yi kayiruata mejãcha opanasi akʉza wawia ũdubida ẽ basi ãya nekʼãrẽ omarẽã zokʼabʉra. Adewara piesta religionebema obʉrʉdera imitia bedʼeapanasi (Efes. 5:3). Ʉ̃kʉrʉ ẽbẽra Éfesodebemaba kayirua obʉrʉdera mejãcha krĩcha zroma oẽbasi maʉ̃ kʼarea (Efes. 4:​17-19). Ãya wãrĩnu ʉ̃rʉ kʼawuai nããra sopʉada ẽ basi kayirua obʉrʉdera. Maʉ̃ kʼarea Pablobara jarasi ãyira pãrĩguadebʉta akʉza Daizezedeba jĩgabʉta. Ʉ̃kʉrʉ ẽbẽrarã Éfesodebemarabara ãya nekʼãrẽ kayirua obadara idubʉsida baera. w24.03 20 parr. 2, 4; 21 parr. 5, 6

Gedeónʼra zarea trajaibarabasi juez bʼaita. Gedeón diamasi madianitabawara yõ wãside, ãyira mĩrʉ wẽba mawãsi, aramaʉ̃ta Gedeónbara kʼaidu pẽwã wãsi Jezreeldeba do, Jordánʼinubayeda (Juec. 7:22). ¿Iyira do Jordánʼinʉpai jʉ̃ẽ kʼãrãpe jẽda wãsika? Mawũã ẽ. Gedeónta akʉza iyi gorogorora 300 bʉta mejãcha aukʼarabasimina, dokĩrãbarida kʼãrãpe akʉza pẽwã wãsida madianitarãra mõbe ãyi juwa edre baebisida (Juec. 8:​4-12). Gedeónbara wãrĩnu ĩjãbasi Jeowaba kʼarebaita, maʉ̃ra aripe berabarisi (Juec. 6:​14, 34). Ewari aba Gedeónba akʉza iyi kʼaidupanʉraba pẽwã jʉ̃ẽsida nokʼo ũme Madiánʼnebemata, maʉ̃ra kameyode bari wãbasimina (Juec. 8:​12, 21). Mamina Jeowabara maʉ̃ra israelitara juwa edre baebisi nokʼorãra. Zõrãrãbida ĩjãseabʉ Jeowa ʉ̃rʉ «iyira pae ẽ» baera, iyara diayi zareara maʉ̃raba nesidabʉ ewaride (Is. 40:​28, 29). w23.06 6 parr. 14; 7 parr. 16

Dayirãba bedʼea zroma ũdubʉrʉdera dayirã sora teitea baseabʉ. Maʉ̃ba ĩjãnaibara Jeowa ʉ̃rʉ. Krĩchadadrʉ Barac ʉ̃rʉ, iya Jeowa bedʼeata ũrĩbasi baera jõma bia wãsi. Maʉ̃ ewaridera israelitarabara kʼawua ẽ basi sãwũã yõita, mia neẽbasi joudrʉbarita akʉza miazʉta, mawũãsidu Jeowaba jarasi Baracʼa yõ wãnamarẽã Sísara akʉza iyi gorogorora Canaánʼnebemabawara, maʉ̃rãra jõma yõ kʼawuabasi (Juec. 5:8). Propeta Déboraba jarasi Baracʼa katuma Tabordeba zemarẽã koribieda mawũã Sísara akʉza yi gorogorabawara yõita, maʉ̃raba erbasi 900 karru yõbaridebemata. Maʉ̃ koribidera gorogorora karru mejãcha erbadaba ganai kĩrãkʼabasimina Baracʼbara ũrĩsi Jeowaba zokʼadara, wãsi maʉ̃ koribieda. Barac gorogorora katumanebayeda urueda, Jeowabara kueta mejãcha zebisi, mawũã karru yõbarira jõma jousi egorobade. Mawũã Jeowabara makenasi iyi nejʉrarãra (Juec. 4:​1-7, 10, 13-16). Dayirãsida abarika bia wãseabʉ ũrĩpanʉbʉrʉ Jeowaba zokʼabʉta akʉza iyi organizasionba. w23.07 19 parr. 17, 18

Dayirãbara erpanaibara jʉ̃ã kʼawuaita ewari jõmaʉ̃nẽpanaita. Naweda ẽbẽrarã Jeowa ode pananaraba jʉ̃ãbada kĩrãkʼa, dayirãbida jʉ̃ã kʼawuaibara Jeowaba iya jarada aripe berabaribiyeda (Heb. 6:​11, 12). Daizeze Bedʼeaba jarabʉ dayirãra ne umia kĩrãkʼabʉta (Sant. 5:​7, 8). Ne umiara mejãcha zarea trajabʉ iyi ne u ubʉrʉde bia pãwãramarẽã. Mamina iya kʼawua ẽ sõbede pãwãraira. Dayirãbara zarea opanʉ Jesuba oda kĩrãkʼa oita, dayirãba kʼawua ẽ mina sõbede zeita Daizeze Nokʼora (Mat. 24:42). Dayirãba jʉ̃ã kʼawuabʉta ũdubi ẽ bʉrʉ wiña wiñane aduaseabʉ dayirãba jʉ̃ãbʉra akʉza Jeowadeba jĩgara wãseabʉ. Dayirãba jʉrʉseabʉ nekʼãrẽ naʉ̃ drʉadebʉta mawũã atia edabʉrʉ sobia bʼaita, mamina dayirãba jʉ̃ã kʼawuapanʉbʉrʉ awuantadayi akʉza ewari jõmaʉ̃nẽ baseabʉ (Miq. 7:7). w23.08 22 parr. 7

Propesia Daniel 2:​41-43 bayeda jarabʉba akʉza awuru propesiara Danielba bʉdaba jarabʉba akʉza Apocalipsisba jarabʉba ũdubibʉ maʉ̃ jĩrʉra Gran Bretañata Estados Unidosʼʉ̃me bedʼea abarika zedata, naʉ̃ra nokʼo zromarabara naʉ̃ drʉa jõmaʉ̃nẽ idi zokʼabʉ. Danielba jarasi nokʼo zromara naʉ̃ drʉa jõmaʉ̃mae zokʼabʉ ʉ̃rʉ, maʉ̃ra «nokʼora ʉ̃kʉrʉta zareabayi ʉ̃kʉrʉta borekeabayi». ¿Kʼãrẽa ʉ̃kʉrʉta borekeabaibarabasi? Egorobara jarakĩrãbʉ ẽbẽrarãta, maʉ̃ra ẽbẽrarã nokʼora idu yi zokʼabida ẽ, maʉ̃ba nokʼorabara zarea zokʼabe ẽ naʉ̃ra ẽbẽrarãra ãya kãgabʉ kĩrãkʼa. Danielba jaradadeba nekʼãrẽ kʼawuapanʉ,. Aba, Gran Bretañata Estados Unidosʼʉ̃mebara ũdubibʉ ãyira mejãcha zarea erbʉta. Bari jaraita, Estados Unidosba Gran Bretañaʉ̃meba ʉ̃kʉrʉ pʉwʉrʉrata ãyi juwa edre baebisi. Maʉ̃ra osida Primera Guerra mundial zeside akʉza Segunda Guerra mundial zeside. Mamina maʉ̃ra nokʼorãra wiña wiñane borekea wã, ẽbẽrarã ãya zokʼabʉta yiya yõpanʉ baera akʉza ãya kãgabʉta opanʉ baera. Yi ũmeta, maʉ̃ nokʼo zromaba naʉ̃ drʉa jõmaʉ̃mae zokʼabʉ kĩrãkʼara wuara neẽ bayi, Daizeze Nokʼota zei baera. w23.08 10, 11 parr. 12, 13

Edaʉde Davidʼra sopʉa sentibasi iya bedʼea zroma ũdubʉ kʼarea (Sal. 18:​4, 5). Mamina Jeowaba iyaʼa kãga ũdubibʉba zarea diasi Davidʼra. Iyi neũdukʼawua David sopʉabasidera Jeowaba iyi kãgata ũdubisi, naʉ̃ba so zarea diasi Davidʼa akʉza kʼarebasi sobiade omarẽã Jeowaba zokʼabʉta (Sal. 18:​28-32; 23:2). Abarika idi ewade, dayirãba bedʼea zroma ũdupanʉmina akʉza dayirã bebʉ bebʉdebʉmina, dayirãra neida berabari ẽ Jeowaba iyi kãga jõkata ũdubibʉ baera (Lam. 3:22; Col. 1:11). David bebʉra badua bebʉdebasi akʉza iyara mejãcha erbasi nejʉrara zarea barachuberata. Mamina, Jeowaba iyaʼa kãga ũdubibʉba aduʼa sentibisi Davidʼra akʉza kʼawuabasi Jeowaba iyira kʼarebaita. Davidba bedʼea zroma ũdubʉrʉdera iyara sentibasi Jeowara iyi kʼawabʉta akʉza maʉ̃ba aduʼa sentibibasi. Iya naʉ̃ta jarasi: «[Jeowaba] mʉ̃ perabi jõma ãĩ bʉesi» (Sal. 34:4). David edaʉde mejãcha perabasimina, maʉ̃ perabia yi edebi ẽ basi kʼawuabasi baera Jeowaba iyira mejãcha kãgabʉta. w24.01 29, 30 parr. 15-17

Jehoásba aña jidadadeba kʼawuara. Sumo saserdote Jehoiadá beida tẽãra Jehoásbara jʉrʉsi neũdukʼawuara zeri ẽãta (2 Crón. 24:​17, 18). Iyara jidasi ũrĩta nokʼora warrara Judádebemaba jarabʉta, naʉ̃rabara kãga ẽ basi Jeowara. Bʉara krĩchabasibaibara Jehoásʼra naʉ̃ra ẽbẽrarãnebara jĩga bʼaibarabasita, ãyara yi kayiruata opanasi baera. Mamina, iyara ũrĩsi iyi neũdukʼawuara zeri ẽãba jarapanʉtrʉ akʉza Zacarías iyi mebẽrãnebemaba iyaʼa ũrãgʼa diasidera iyara bea zokʼasi (2 Crón. 24:​20, 21; Mat. 23:35). Iyara biʼia krĩchabʉta ũdubi ẽ basi, nããrãra nekʼãrẽ jõma bia ojʉ̃drʉsi, mamina iyira tẽãra Jeowa ʉ̃rʉbasi akʉza miabeamiabasi. (2 Crón. 24:​22-25). Iya Jeowaba jarabʉta ũrĩbasibʉrʉ akʉza ẽbẽrarã iyi kãgapanʉraba jarabʉta ũrĩbasibʉrʉ, iyi bebʉra awuarabakasi. w23.09 9 parr. 6

Jesubara kʼawuabasi apostol Pedrora kʼẽrẽpa baseabʉta, maʉ̃ kʼarea jarasi pera ẽ marẽã. Jesuba kʼãwũã Pedro ʉ̃rʉ ĩjãbadaba kʼarebasi iyi bebʉ awuara bamarẽã. Pedroba yi mebẽã Andrésʼʉ̃mebara amaesida ãyi trajora akʉza Jesu kʼaidubemarabasida, maʉ̃ba ãyara nebia mejãcha ũdusida (Mar. 1:​16-18). Pedro Jesu kʼaidubemabasidera nebiata mejãcha ũdusi. Bari jaraita, iya ũdusi Jesuba jẽda piradrʉbisita beidarata, kayabʉrata bebisita akʉza angelera kayiruara ãĩ bʉesita (Mat. 8:​14-17; Mar. 5:​37, 41, 42). Akʉza Pedrobara ũdusi Jesuba iyi nokʼo babʉrʉde kʼãrẽta oibasita, iya maʉ̃ ewarira kĩrãdua ẽ basi (Mar. 9:​1-8; 2 Ped. 1:​16-18). Pedrobara naʉ̃ nebiara ũdusi iyita Jesu kʼaidubemabasi baera, Pedrora mejãcha sobiabasibaibara iyi ʉ̃rʉ aña krĩchabʉta wua oẽ basi baera akʉza maʉ̃neba nebiata ũdusi baera. w23.09 21 parr. 4, 5

Iyi kartade apostol Pedroba jaraside mayirai yi kãgaidua, iyara jarakĩrãbasi maʉ̃ kãgabara jõma kĩrãduabʉta kayirua opanʉra (1 Ped. 4:8). Maʉ̃ bedʼea bʉside Pedrobara kĩrãbesibaibara Jesuba bedʼea nãã jaradata. Maʉ̃ ewaridera Pedrobara jarasi yi mebẽãba kayirua obʉra kĩrãduaibarata 7 bayeda, maʉ̃nera iyara krĩchasi aripe jarasita, mamina Jesuba jaradiasi akʉza dayirã jaradiabʉ 77 bayeda kĩrãduaibarata dayirã mebẽrãba kayirua odara. Maʉ̃ba jarakĩrãbʉ krĩcha ẽ baibarata sõbebayeda kĩrãduaibarata dayirã mebẽrãba kayirua obʉra (Mat. 18:21). Bʉta mawũã berabaribʉbʉrʉ maʉ̃ kʼarea mapaerãra, jõma Jeowa odepanʉraita zareabʉ kĩrãduaita awuruba kayirua obʉrʉde. Bʉta zarea obʉbʉrʉ bʉ mebẽãba kayirua oda kĩrãduaita maʉ̃trʉ jipade yibia. w23.09 29 parr. 12

Jonásbara Jeowaba jarada ũrĩ ẽ basimina beda biteda bʉeda jẽda krĩchasi akʉza ĩjãsi Jeowaba iyi bedʼea ũrĩta akʉza jẽda kʼarebaita, Jeowaba kʼarebasi Jonásʼra maʉ̃are Jeowaba jarabʉrʉta oya awabasi (Jon. 2:10–3:4) Edaʉde bʉ mejãcha krĩcha zroma onʉmʉnera yi sãwũã yiwidʼisi kʼawua ẽ Jeowaʼa akʉza dayi estudiabʉrʉde yi sãwũã estudiasi kʼawua ẽ. Maʉ̃nera kĩrãbera Jeowaba biʼia kʼawuabʉta bʉ sãwũã berabarinʉmʉra. Bʉ mejãcha drazoa yiwidʼi ẽ mina ĩjãra Jeowaba kʼawuabʉta bʉa kʼãrẽ nesidabʉra akʉza mõbe maʉ̃ta diaita (Efes. 3:20). Bʉ kakua pʉaba Daizeze Bedʼeata leita zarebʉrʉ, ũrĩra yi grawamata akʉzade kartara Daizeze Bedʼeadebema grawamata. Audre yibiabayi ũrĩta trãbira jw.org debemata, mawũã ẽ bʉrʉ akʉita bideorata. Jeowabara dayirã zarea diakĩrãbʉ, ¿sãwũã obʉ maʉ̃ta? Dayirãba Daizezeʼa yiwidʼibʉrʉdera iya panʉbʉ Daizeze Bedʼeadeba, mawũã ẽ bʉrʉ kartara Daizeze Bedʼeadebemaneba. w23.10 13 parr. 6; 14 parr. 9

Tabernakulota akʉza templo Jerusalénʼne parãnapeadara abarika parãsida, dejã ũme chuasi. Maʉ̃ dera wuaba dejã ũme zebichuasi, yi dejã nããbemara santobasi, yi dejã ũmera santisimobasi (Heb. 9:​2-5; Éx. 26:​31-33). Santode edabasi, ĩbira juwa jiwini barabʉta akʉza basi altar insienso babarita, adewara basi mesa pan bʉebarita. Santode edara wãseabasi saserdote mama eda wãi jidadapeadaratrʉ ãyi trajo oita (Núm. 3:​3, 7, 10). Santisimonera edabasi arka bedʼea abarika zedapeadatrʉ, mawũã ũdubita Jeowa mamabʉta (Éx. 25:​21, 22). Santisimonera eda wãseabasi sumo saserdotetrʉ poagaza espiasion ewaridebʉrʉ (Lev. 16:​2, 17). Iyira eda wãbasi nedʉwʉrʉ wa eda, Jeowaba kĩrãduamarẽã iyi nemitiata akʉza pʉwʉrʉdeta. Ewari berabari wãne Jeowaba jarasi kʼãrẽta jarakĩrãbasita tabernakulode mawũã opananaba (Heb. 9:​6-7). w23.10 27 parr. 12

Daizeze Bedʼeaba jarada ʉ̃rʉ jarabʉ mayirai yiya kãgaidua (Juan 15:12; Rom. 13:8; 1 Tes. 4:9; 1 Ped. 1:22; 1 Juan 4:11). Kãgara nebia dayirã sodebʉ akʉza mia abaʉ ẽbẽraba ũdu ẽ dayirã sode kʼãrẽtabʉra, mawũẽra ¿dayirãbara sãwũã ũdubiseabʉ dayirã kãgara wuabemarãra? Dayirãba kʼãrẽ jarabʉdeba akʉza kʼãrẽ obʉdeba. Dayirãba mebẽrã kãga ũdubira ne kĩrã biodeba ũdubiseabʉ. Akʉdaya ʉ̃kʉrʉ yizarata: «Mayirai wãrĩnuta jaraibara» (Zac. 8:16). «Zhiya adu-a bʼeaudua» (Mar. 9:50). «Yiya wawia ũdubira» (Rom. 12:10). «Zhiya bia edaudua» (Rom. 15:7). «Kĩrãduaidua bʉ ʉ̃rʉ nemitiata osidamina» (Col. 3:13). «Yiya kʼareba atʉidua zʉgʉara» (Gál. 6:2). «Mayirai so zarea diaidua» (1 Tes. 4:18). «Mayirai kʼarebaidua» (1 Tes. 5:11). «Yiya yiwidʼidua» (Sant. 5:16). w23.11 9 parr. 7, 8

Ewariza dayirãbara krĩcha jidapanʉ, mawũã oira nesidapanʉ audre zarea ĩjã bʼaita. Bari jaraita, bia krĩchaibara kʼaira bawara ãba bʼaita, kʼãrẽ pelikula akʉita, kʼãrẽne jemeneita, kʼaiʉ̃me juwa jidaita, krĩchaibara wũãwũã erbaita mawũã ẽ bʉrʉ erba ẽãta akʉza kʼãrẽne traja bʼaita. Maʉ̃ kʼarea yibiabayi dayirãkʉza widita: «¿Ũdubibʉka mʉ̃a krĩcha jidabʉba ewari jõbodoarebʉta akʉza ẽjũã kĩrãwãreã zeira arakʼaitabata? Mawũã ẽ bʉrʉ, ¿abarika krĩcha jidabʉka jari ẽbẽrarã ẽjũã kĩrãwãreã zei ʉ̃rʉ ĩjã ẽ kĩrãkʼa?» (Mat. 6:​19, 20; Luc. 12:​16-21). Dayirãba ĩjãpanʉbʉrʉ ẽjũã kĩrãwãreã zeita arakʼaitabata, naʉ̃ba kʼarebayi krĩcha bia jidaita. Adewara dayirãbara bedʼea zromata ũdupanʉ, maʉ̃ne zarea ĩjãbʉta ũdubita nesidapanʉ. Bari jaraita, dayirãra pẽwãseapanʉ zʉbʉria odaita, mejãcha kayaseabʉ, mawũã ẽ bʉrʉ bedʼea zroma ũduseabʉ dayi maʉ̃ba sopʉabibʉta. Maʉ̃ bedʼea zroma zebʉrʉdera dayirãbara krĩchaseabʉ awuantaita, mamina maʉ̃ta mesera taʉ ẽãnera zarea odaibara audre ĩjãita Jeowa ʉ̃rʉ, mawũã sobia awuantaita maʉ̃ bedʼea zromara (1 Ped. 1:​6, 7). w23.04 27 parr. 4, 5

Jeowabara kãgabʉ dayirãba wididade odamarẽã. Mebẽã abaʉba Jeowaʼa widibʉ kʼarebamarẽã iyi trajode ewarita diamarẽã, mawũã asamblea regionalʼeda wãita, ¿sãwũã panʉi Jeowabara maʉ̃ yiwidʼira? Jeowabara zowaĩnĩgʉata diaseabʉ naʉ̃ mebẽãta iyi zokʼabʉme bedʼea wãmarẽã, mamina maʉ̃itara naʉ̃ mebẽãra wãibara iyi zokʼabʉidu maʉ̃me bedʼeaita. Iyi zokʼabʉba dia ẽã abʉbʉrʉ iyara widida ʉ̃rʉ widibara, mawũã ẽ bʉrʉ jaraseabʉ awuru ewaride trajaita. Jeowabara jʉ̃ãbʉ dayirãba badua wididamarẽã nekʼãrẽ dayirã krĩcha zroma obibʉ ʉ̃rʉ. Jesuba jara ũrĩbisi dayirãba nekʼãrẽ widibʉra edaʉde mesera panʉ ẽ baita (Luc. 11:9). Maʉ̃ba mapaerãra, awuarabʉrʉ widida ʉ̃rʉ widira Jeowaʼa (Luc. 18:​1-7). Dayirãba maʉ̃ta opanʉbʉrʉ iyaʼa ũdubipanʉ dayirãba nekʼãrẽ widibʉra wãrĩnu kãgapanʉta akʉza ũdubipanʉ ĩjãpanʉta iya dayirãra wãrĩnu kʼarebaseabʉta. w23.11 22 parr. 10, 11

Jeowaba iyi neũdukʼawua Abrahánʼa jarasi diaita wũãwũãta maʉ̃neba naʉ̃ drʉadebemara jõma nebia ũduita (Gén. 15:5; 22:18). Abrahánba wãrĩnu ĩjãbasi Daizeze ʉ̃rʉ, maʉ̃ba ĩjãsi iya Daizezeba nebia diaya abʉra wãrĩnuta. Abrahán 100 poaga babodode akʉza yi kima 90 poagabasimina wũãwũã neẽbasida waidide (Gén. 21:​1-7). Mawũãsidu Daizeze Bedʼeaba jarabʉ: «Iya ĩjãbʉde jʉ̃ãbasi akʉza ĩjãsi pʉwʉrʉra zeze bʼaita iyira, jaradapeada kĩrãkʼa: ‹Kʼãwũã mejãcha bayi bʉdeba zebʉrʉra›» (Rom. 4:18). Dayirãba kʼawuapanʉ kĩrãkʼa Abrahánba jʉ̃ãbadara wãrĩnu berabarisi. Iya mejãcha jʉ̃ãbadara aripe berabarisi Jeowaba Isaac diaside. ¿Kʼãrẽa ĩjãbasi Abrahánbara Jeowaba jarada jõma aripe berabarita? Abrahánba Jeowa biʼia ũdu kʼawuabasi baera, maʉ̃ba wãrĩnu soiduba ĩjãbasi Jeowaba diaya adara (Rom. 4:21). Jeowaba bia akʉsi Abrahánʼra akʉza jarasi iyara nekʼãrẽ aripe obʉta iya ĩjãbʉ kʼarea (Sant. 2:23). w23.12 8 parr. 1, 2

Bʉta kʉ̃rabʉrʉ akʉza jõmaʉ̃ba ũdukaʉdebʉrʉ jõma bia obʉta mawũãra nekʼãrẽ bʉaʼa omarẽã jarabʉdara jõma oyi. Krĩchara Jesu yizata, iyara jõma osi Jeowaba nekʼãrẽ omarẽã jaradara akʉza maʉ̃ oira iyitara zaremina osi. Iyara mejãcha kãgabasi ẽbẽrarãra, audre iyi kʼaidubemarata, maʉ̃ kʼarea iyi bebʉta diasi ãyi bari (Juan 13:1). Bʉa Jesude kĩrãkʼa okĩrãbʉbʉrʉ, bʉaʼa nekʼãrẽ omarẽã jarapanʉta jõma ora akʉza bʉa maʉ̃ta obe ẽ bʉrʉ eda krĩchabʉta ũdubira, mõbe kʼareba widira yi mebẽrã maʉ̃ ʉ̃rʉ biʼia kʼawuabʉa. Bʉa nekʼãrẽ omarẽã jaradapeadatrʉ orãra, bʉa audre oseabʉbʉrʉ ora (Rom. 12:11). Bʉa nekʼãrẽ omarẽã jaradapeadata Jeowa kʼarea obʉbʉrʉ akʉza maʉ̃ta ẽbẽrarã kʼarea obʉ ẽ bʉrʉ, zarea oyi jõma bia oita akʉza nãã oita (Col. 3:23). Bʉra kayirua oka ẽ, maʉ̃ba bʉa nei aña osibʉrʉ jarara bʉa osita (Prov. 11:2). w23.12 26 parr. 8

Dayi buru kʼoebʉrʉdera akʉza Jeowa pʉwʉrʉdebema babʉrʉdera mejãcha sobiabʉ. Maʉ̃ra jipade yibia baera Davidʼde kĩrãkʼa kʼãwũã jaraseapanʉ: «Sobiabʉ [ . . . ] yi bʉma webʉra bʉ de ewarade bamarẽã» (Sal. 65:4). Jeowabara badu ẽbẽrata we ẽ iyimara. Iyara iyima webʉ ẽbẽrarã iyi kʼawa bakĩrãpanʉrata akʉza iyi neũdukʼawua bakĩrãpanʉrata (Sant. 4:8). Dayi bebʉ Jeowa diabʉrʉdera akʉza buru kʼoebʉrʉdera ĩjãseabʉ maʉ̃neba ʉ̃tara iya diaita bʉa nesidabʉ jõma mawũã nekʼãrẽ wae ẽ marẽã (Mal. 3:10; Jer. 17: 8). Dayirã buru kʼoebʉrʉdera ʉ̃rabʉrʉ Daizeze ode jʉ̃drʉbʉ. Bʉ buru kʼoeda tẽãra, bʉara nekʼãrẽ jõma oyi Jeowaba kãgabʉde bʼaita akʉza yi kayirua yi edebi ẽ baita (Ecl. 5:​4, 5). Bʉra Jesu kʼaidubema baera, nekʼãrẽ jõma oyi iyi kĩrãkʼa bʼaita akʉza iya jaradade bʼaita (Mat. 28:​19, 20; 1 Ped. 2:21). w24.03 8 parr. 1-3

¿Kʼãrẽta oseabʉ yi juwa jidapanʉrata ãbabʉde sobiapanʉ ẽ bʉrʉ? ¿Kʼãrẽta osepanʉ? Krĩchaidua tʉbʉ ʉ̃rʉ naʉ̃ra waña pʉrea toto ẽ, awuarabʉrʉ wiña wiñane jẽrã wãibara, mawũã pʉrea wãmarẽã. Maʉ̃ kĩrãkʼa mayi ũmena ewari jʉrʉidua aba bʼaita wiña wiñane akʉza oidua mayi ũmeba nekʼãrẽ kãgapanʉta (Sant. 3:18). Maʉ̃ba maraba nekʼãrẽ ãbaʉba wiña wiñane owãne mayirai audre yi kãga wãnañi. Wawia ũdubira arigʉ yibia kʼãwũã juwa jidapanʉne. Dayirãra iñababʉ osijenoba, osijenota nẽẽbʉrʉ beiseabʉ, maʉ̃ kĩrãkʼa tʉbʉ pʉrea erbaita nesidabʉ osijenota, osijenota neẽbʉrʉ tʉbʉra kiseabʉ. Maʉ̃ wawia ũdubira osijeno kĩrãkʼabʉ juwa jidapanʉrane. Juwa jidapanʉrane wawiata ũdubida ẽ bʉrʉ mawũãra aduaseabʉ yiya kãgabʉra. Juwa jidapanʉrata yiya wawia ũdubipanʉbʉrʉ mawũãra audre wari wãñi ãyi yi kãgapanʉra. Mamina krĩcha ẽ baibara bʉa iyita wawiabʉta, bʉ kimaba wãrĩnu sentibara bʉa iyaʼa wawia ũdubibʉta. w23.05 22 parr. 9; 23, 24 parr. 14, 15

Daizeze Bedʼeade jara ũrĩbibʉ sãwũã Jeowa odepanʉrãra ãyi nejʉraraba pẽwãbʉ kʼarea mejãcha pera sentisidata (Sal. 18:4; 55:​1, 5). Abarika dayirãsi pẽwãseapanʉ kolegiode, trajode, dayirã mebẽrãba mawũã ẽ bʉrʉ nokʼoraba, mawũã ẽ bʉrʉ kayabʉba bebʉde baseabʉ. Mawũãbʉrʉdera dayirã wũãwũã zake kĩrãkʼa sentiseabʉ kʼaiba kʼarebai neẽ kĩrãkʼa. ¿Sãwũã kʼarebabʉ Jeowaba dayirã mawũã sentibʉdera? Iya so zarea diabʉ akʉza aduʼa babibʉ, mawũẽra badua yiwidʼira akʉza Daizeze Bedʼeata ewariza akʉra (Sal. 77:​1, 12-14). Bʉa naʉ̃ta badua obʉbʉrʉ bʉa bedʼea zroma ũdubʉrʉdera krĩchayi Jeowaba bʉ sãwũã kʼarebai ʉ̃rʉ, iyaʼa jarada bʉ sãwũã sentibʉta akʉza Daizeze Bedʼeade akʉra iya sãwũã so zarea diabʉta bʉaʼa (Sal. 119:28). w24.01 24, 25 parr. 14-16

Yibia daya nekʼãrẽ oita krĩchadara jipa okĩrã bʼaita, ẽbẽra mawũã krĩchabʉra mejãcha zarea obʉ iya krĩchada aribaeyeda. Dayirãba nekʼãrẽ oita krĩchadara okĩrãbʉbʉrʉ mesera aripe oyi. Mawũẽra bʉra, ¿kʼãrẽta oseabʉ okĩrãne oita? Yiwidʼira Jeowa audre okĩrãne obʼaita. Daizeze jaure zareadeba kʼarebaseabʉ bʉa krĩchada okĩrãne obʼaita. Edaʉde dayirãbara krĩchabʉ nekʼãrẽ oibarata maʉ̃ra yibia baera, mamina okĩrã ẽ. Krĩchara Jeowaba bʉ kʼarea kʼãrẽ ozebʉrʉ ʉ̃rʉ (Sal. 143:5). Apostol Pablobara jẽda kĩrãbesi Jeowara sãwũã iyiʉ̃me ẽbẽra biabasita, naʉ̃ba kʼarebasi iyi zarea trajaita Jeowade oita (1 Cor. 15:​9, 10; 1 Tim. 1:​12-14). Bʉa biʼia kĩrãbebʉbʉrʉ Jeowaba bʉ kʼarea kʼãrẽ ozebʉrʉta, naʉ̃ba kʼarebayi bʉya nekʼãrẽ oita krĩchada okĩrãne oita (Sal. 116:12). w23.05 26, 27 parr. 3-5

Jeowara sobiabʉ dayirãba iyi trʉ̃ ʉ̃rʉ ibia bedʼeabʉdade (Sal. 119:108). Daizezera ẽbẽra kayirua omia kĩrãkʼabʉ ẽ. Ẽbẽrarãbara ãyi ʉ̃rʉ ibia bedʼeamarẽã kãgabʉ mawũã bia sentita. Dayirã Jeowa trʉ̃ ʉ̃rʉ ibia bedʼeabʉrʉdera ũdubipanʉ Diaruaʼa iya dayirã aba abaka ʉ̃rʉ kʼãrẽ jaradara sewidata. Diaruba jarabʉ mia abaʉ ẽbẽrata Daizeze trʉ̃are ba ẽ baita akʉza mia abaʉta kʼẽrẽpa babe ẽãta, adewara iya jarabʉ dayirãba bedʼea zroma ũdubʉrʉdera idubʉita Daizeze odebʉta (Job 1:​9-11; 2:4). Jobʼba ũdubisi Diarura sewa nebʉrʉ omiata, ¿bʉara abarika oika? Dayirãnebema aba abakaʉba jidaseabʉ Jeowa trʉ ʉ̃rʉ ibia bedʼeabita akʉza iyiare kʼẽrẽpabʉdeba iyita sobiabita (Prov. 27:11). Naʉ̃ra jipade yibia dayirãita. w24.02 8, 9 parr. 3-5

Moisés akʉza Josué ewari berabarida tẽãra Jeowabara juezʼrata bʉesi, mawũã iyi pʉwʉrʉʼa jaraita kʼãrẽta oibarata. Tẽã, nokʼora ewaridera zokʼasi propetarata, mawũã naʉ̃raba pʉwʉrʉʼa jara ũrĩbimarẽã kʼãrẽta oibarata. Nokʼora kʼẽrẽpapanʉrabara ũrĩsida propetaraba ãyaʼa jara ũrĩbibʉra. Bari jaraita propeta Natánba nokʼo Davidʼa jara ũrĩbiside iya kʼãrẽ kayirua odata, Davidbara ũrĩsi naʉ̃ propetaba jaradara (2 Sam. 12:​7, 13; 1 Crón. 17:​3, 4). Nokʼo Jehosafatbara ĩjãsi propeta Jahazielba jara ũrĩbibʉra akʉza kʼarebasi pʉwʉrʉ Judádebemarabida propetara ʉ̃rʉ ĩjãmarẽã (2 Crón. 20:​14, 15). Nokʼo Ezequías krĩcha zroma obasidera propeta Isaías kʼarebata jʉrʉsi (Is. 37:​1-6). Nokʼoraba Jeowaba jarabʉde opanasidera Jeowaba ãyaʼa nebiata diabasi akʉza pʉwʉrʉsida akʉbasi (2 Crón. 20:​29, 30; 32:22). Naʉ̃ba ũdubibasi propetarãra Jeowaba zokʼabasita iyi pʉwʉrʉʼa jaradiaita kʼãrẽta oita. w24.02 21 parr. 8

Diarubara kãgabʉ dayirãra ãba panamarẽã ẽbẽrarã Jeowaba kãgabʉde bʉ ẽãʉ̃me. Dayirãra ẽbẽrarã dayirãba kĩrãbita ũdubʉmebʉrʉ jʉra kʼawuabaibara ẽ awuarabʉrʉ jʉra kʼawuabaibara internetʼne dayirã kʼaiʉ̃me bedʼeabʉ kʼareabida. Ẽbẽrarã naʉ̃ drʉadebemarabara krĩchapanʉ nekʼãrẽ Jeowaba dayirã omarẽã zokʼabʉra biga ẽãta, mamina dayirãra jʉra kʼawuabaibara mawũã krĩcha ẽ baita, biʼia kʼawuapanʉ baera maʉ̃ra sewidata (Efes. 4:​19, 20). Dayirãkʉza naʉ̃ta widibara: «¿Mʉ̃ra zarea obʉka ẽbẽrarã Jeowaba kãgabʉde bʉ ẽãbawara ãba ba ẽ baita? ¿Mʉ̃ra zarea obʉka Jeoware bʼaita wuabemaraba mʉ̃ ʉ̃rʉ aña krĩchaimina?» 2 Timoteo 2:​20-22 bayeda jarabʉ kĩrãkʼa, jʉra kʼawuabaibara kongregasionebida kʼãrẽ neũdukʼawuara jʉrʉbʉ kʼarea. Kĩrãbedaibara ʉ̃kʉrʉbara kʼareba ẽ baita dayirã Jeowa ode kʼẽrẽpa bamarẽã. w24.03 22, 23 parr. 11, 12

Bʉa krĩchabarika, ¿Jeowara sãwũã chu? Daizeze Bedʼeaba jara ũrĩbibʉ iyi sãwũãbʉta, jarabʉ Jeowara «ũmadaʉ akʉza joudrʉbari kĩrãkʼabʉ». Adewara iyira tʉbʉ pʉrea kĩrãkʼabʉ (Sal. 84:11; Heb. 12:29). Akʉza jarabʉ iyira zafiro mõgara kĩrãkʼabʉta, adewara euma uruyabʉ kĩrãkʼabʉta (Ezeq. 1:​26-28). Dayirãba Jeowara ũdu ẽ baera, edaʉde zarea baseabʉ ĩjãita iya dayirãra kãgata. Ʉ̃kʉrʉ ẽbẽrarãbara ĩjã ẽ Jeowaba ãyaʼa kãga ũdubira ãyi nãã sãwũã berabarida kʼarea. Jeowabara kʼawuabʉ dayirã sãwũã sentibʉra. Maʉ̃ba iya kʼawuabʉ dayirãitara kʼãrẽa zareabʉta iyi kʼawa bʼaita. Adewara iyi Bedʼeadeba dayirã kʼawuabibʉ iyira sãwũãbʉta. Jeowara kãga (1 Juan 4:8). Iyara mejãcha kãga ũdubibʉ, maʉ̃ba kãga ũdubibʉ yi ẽbẽrarã iyi odepanʉ ẽãrabida (Mat. 5:​44, 45). w24.01 26 parr. 1-3

Jeowaba jidasi Moisésta israelitara Egiptodeba ẽdrʉbita akʉza ãyaʼa ũdubisi jãrãrata, naʉ̃ jãrãra ʉ̃tʉba baebasi. Abarika diamasiare pʉreata mawũã diabasi (Éx.13:21). Moisésʼra maʉ̃ pʉrea kʼaidu akʉza jãrãra kʼaidu wãsi. Maʉ̃bara israelitarãra Mar Rojoidu erjʉ̃ẽsi. Ãyi mainʉ jʉ̃ẽbʉrʉde gorogorora Egiptodebemaraba pẽwãsida. Maʉ̃ kʼarea israelitarãra mejãcha perasida krĩchasida baera ãyira mama beadaita. Mamina maʉ̃ra mawũã ẽ basi. Jeowaba zokʼasi Moisésta mawũã iyi pʉwʉrʉ mainʉ erjʉ̃ẽmarẽã (Éx. 14:2). Mamina ãyara jʉ̃ã ẽ basi Jeowaba ãyi biʼia ẽdrʉbira (Éx. 14:​26-28). 40 poagabayeda, Moisésbara Jeowa pʉwʉrʉʼa jaradiasi saʉ̃ ode wãibarata drʉa ibʉawabʉmaera Jeowa kʼarebadeba, maʉ̃ jãrãraneba akʉza pʉreadeba (Éx. 33:​7, 9, 10). Jeowara Moisésʼa bedʼeabasi maʉ̃ jãrãraneba akʉza pʉreadeba. Iya jara ũrĩbibasi kʼãrẽta oibarata iyi pʉwʉrʉ akʉita. Maʉ̃neba israelitarabara ũdusida Jeowaba Moisésta zokʼabasita mawũã ãyaʼa jaradiaita. w24.02 21 parr. 4, 5