Mayo

Kristianora nããbema siglodebema ewaride «jarraba zromata» zesi jõmaʉ̃ drʉade. Maʉ̃ne mebẽrãsida mejãcha zʉbʉriasi jarraba kʼarea. Bari jaraita, maʉ̃ba yibarirãra mejãcha krĩcha zroma obasibaibara, yiko edeita ãyi wũãwũãra kʼarea. Mamina, ¿kʼãrẽta odaibarabasi warrara Daizeze bedʼea audre jaradiakĩrãbadabara? ¿Ãyara jʉ̃ãnaibarabasika jarraba berabariyeda? Adewara ãyi aba abaka awuarapanasimina idubʉda ẽ basi Daizeze Bedʼea jaradiapanʉta, adewara ãya yiko erbʉta mebẽrã Judeadebema dedekapanasi (Hech. 11:​29, 30). Ẽbẽra yi kʼareba jidadarabara ũdusida Jeowaba sãwũã kʼarebabʉta ãyira, maʉ̃ kʼarea mejãcha sobiapanasi (Mat. 6:​31-33). Adewara sentisida mebẽrã ãyi kʼareba jʉ̃ẽnabawara ãbapanʉta. Mebẽrãba ãya nekʼãrẽ erbada diadata akʉza nekʼãrẽ awurude kʼarebadara mejãcha sobiapanasi, ãya wuabemara diapanasi baera (Hech. 20:35). w23.04 16 parr. 12, 13

Edaʉde Jeowabara zokʼabʉ ẽbẽrarã iyi odebʉ ẽãta iya kãgabʉta omarẽã. Bari jaradaita, iya osi nokʼo Artajerjesba Nehemíasta idu wãmarẽã Jerusalénma, mawũã Jerusalénta ara omarẽã (Neh. 2:​3-6). Iyara idi ewadebida oseabʉ ẽbẽrarã iyi odebʉ ẽãba dayirãta kʼareba zemarẽã. Edaʉde dayirãba ũdu ẽ Jeowaba sãwũã panʉbʉta dayirã yiwidʼira. Mamina iya dayirã yiwidʼi panʉbʉrʉdera diabʉ dayirãba nesidabʉta iyiʉ̃me kʼẽrẽpa bamarẽã. Maʉ̃ kʼarea kĩrãkita akʉdaibara sãwũã Jeowaba panʉbʉta dayirã yiwidʼira. Dayirãbida krĩchadaibara sãwũã Jeowabara panʉ zebʉrʉta dayirã yiwidʼira (Sal. 66:​19, 20). Wãrĩnu ĩjãbʉta ũdubipanʉ Jeowa yiwidʼibʉde akʉza ĩjãbʉde Jeowaba dayirã yiwidʼi panʉbʉta, dayirãba widida kĩrãkʼachu ẽ mina (Heb. 11:6). w23.05 11 parr. 13; 12 parr. 15, 16

Dayirã bebʉ Jeowa diasidadera dayirãba jarasida oita iya zokʼabʉta akʉza iyi abapaiʼabʉrʉ yiwidʼita. Naʉ̃ oira jipade yibia. ¿Kʼãrẽa? Jeowaba parãsi baera dayirãba iya zokʼabʉta omarẽã (Apoc. 4:11). Iya dayirã parãsidera osi iyita ũdu kʼawuakĩrãnamarẽã akʉza iyi abapaiʼa yiwidʼidamarẽã, adewara iyi kĩrãkʼa parãsi. Dayirãba Jeowaba kãgabʉta opanʉbʉrʉ akʉza yi warrade kĩrãkʼa opanʉbʉrʉ aduʼa sentidayi (Mat. 11:​28-30). Maʉ̃ba dayirãba Jeowa kãgabʉta audre zarea erbaibara krĩchabʉrʉde Jeowaba bʉ sãwũã kʼareba zebʉrʉ ʉ̃rʉ akʉza kʼãrẽ nebia dia zebʉrʉ ʉ̃rʉ. Bʉa Daizeze kãgabʉta audre kãga wãbʉrʉ zare ẽ bayi oita iya omarẽã jarabʉta (1 Juan 5:3). Jesude kĩrãkʼa ora. Iyara Jeowaba zokʼabʉra osi Jeowaʼa kʼareba widibasi baera akʉza krĩchabasi baera iya kʼãrẽ nebia ũdui ʉ̃rʉ (Heb. 5:7; 12:2). Bʉabida Jesude kĩrãkʼa Jeowaʼa widira so zarea diamarẽã akʉza krĩchara iya bʉaʼa nebiata diaya abʉ ʉ̃rʉ. w23.08 27, 28 parr. 4, 5

Dayirãra ãba bakĩrã ẽbẽrarã jʉ̃ã kʼawuapanʉbawarara. ¿Bʉabida abarika krĩchabʉka? Dayirãba nekʼãrẽ aña obʉrʉde dayirãba biga diapanʉ ẽbẽra abaʉta maʉ̃ kʼarea mejãcha kĩrʉ ẽ bʉrʉ. Akʉza biga diapanʉ dayirã nejaradiabariba jʉ̃ã kʼawuabasi baera dayita zarebaside oũdubita daya kʼawua wãta. Mamina audre biga diapanʉ Jeowaʼa iya dayirãta jʉ̃ã kʼawuabʉ baera. Dayirãbara biga diapanʉ ẽbẽra abaʉba jʉ̃ã kʼawuabʉta ũdubibʉde. Mamina dayi mawũã bʼaira edaʉde zarea baseabʉ. Bari jaraita zarea baseabʉ dayi ospital eda wãbʉrʉde jʉ̃ãita ẽbẽrarãta mejãchabʉ baera, mawũã medikoba dayita akʉita. Akʉza mejãcha kĩrʉseabʉ wuabemaraba dayimabʉta oda ẽãne. Adewara zarea baseabʉ dayirãba jʉ̃ãpanaita Jeowaba ʉ̃ra zeide nebia weya abʉ ʉ̃rʉ. Maʉ̃ra jõmaʉ̃nẽ jʉ̃ãkʼawuabʉta ũdubibara. w23.08 20 parr. 1, 2

Jeowabara jarasi Gedeónʼa, audre eda babimarẽã iyi gorogororãra. Maʉ̃ kʼarea iya krĩchasibaibara: «¿Wãrĩnu maʉ̃ta oibaraka? ¿Maʉ̃ta ora bia bʼaika?». Mawũãsidu Gedeónbara ũrĩsi. Idi ewadera zõrãrãbara Gedeónba oda kĩrãkʼa ũrĩpanʉ, Jeowa organizasionba nekʼãrẽ awuara ojarabʉdade (Heb. 13:17). Gedeónbara jõma ũrĩsi Jeowaba zokʼadara iyi perabasimina akʉza bebʉdebasimina (Juec. 9:17). Iya kʼawuaside Jeowara iyiare bʉta iya wãrĩnu ĩjãsi Jeowaba kʼarebaita iyi pʉwʉrʉ akʉmarẽã. Zõrãrã kongregasionebema bʉmae idu jaradiabida ẽ bʉrʉ Gedeónba oda kĩrãkʼa oseabʉ. Ãyara zowaĩnĩgʉata ũdubibʉ ãba yi jʉrebarima wãbʉde, deza deza jaradia wãbʉde, ãyi karselde ibalbʉedaya apanʉmina, mawũã ẽ bʉrʉ jarapanʉbʉrʉ ãyi podaita akʉza ãyi trajodeba ãĩ bʉedaita. Zʉbʉria zroma zebʉrʉdera zõrãrãbara ũdubidaibara zowaĩnĩgʉabʉta.w23.06 5, 6 parr. 12, 13

Jeowaba Sumo saserdote Jehoiadába nebia odata bʉbisi, mawũã dayirãta kʼarebaita maʉ̃neba (Rom. 15:4). Jehoiadá beisidera jousida nokʼora joubadamae, David pʉwʉrʉde, iya kʼãrẽ nebiata oũdubibasi baera. Israel pʉwʉrʉde nebiata oũdubisi baera Jeowata wawiabʉta ũdubisi akʉza Jeowa deta (2 Crón. 24:​15, 16). Jehoiadá nebʉraba dayirã jõmaʉ̃ta kʼarebaseabʉ Jeowaʼa sãwũã wawia ũdubita. Zõrãrã kristianorabara Jehoiadába oda kĩrãkʼa oseapanʉ mebẽrã kongregasionebema akʉbʉde (Hech. 20:28). Zõrãrãbara Jehoiadába oda kĩrãkʼa oseapanʉ Jeowa wawia ũdubibʉde akʉza kʼẽrẽpabʉde. Jeowabara zokʼaseabʉ maʉ̃rata iya krĩchada aripe berabaribita. Warrarabara kʼawuaseabʉ Jeowaba Jehoiadá sãwũã edadadeba, wawiata ũdubibara zõrãrã akʉza akʉ ẽ baibara zeri ẽ kĩrãkʼa akʉza audre wawia ũdubibara Daizeze ode kikibaria (Prov. 16:31). Kongregasion yi nãã edebariare bʼaibara akʉza ãya jarabʉta oibara (Heb. 13:17). w23.06 17 parr. 14, 15

Ãba yi jʉrebaride , nãã bia krĩchara kʼawuaita sõbede juwa ʉ̃ta wuaita. Bʉta badua juwa ʉ̃ta wuabʉbʉrʉ, yi jaradiabʉa krĩchabiseabʉ bʉaʼa komentario diaibarata wuabemara juwa ʉ̃ta wuabʉbʉsida komentario diaita (Ecl. 3:7). Kongregasione mebẽrãta mejãcha juwa ʉ̃ta wuabʉbʉrʉ maʉ̃ba dayaʼa diada ẽ baseabʉ komentariora, maʉ̃ba dayirã sopʉaseabʉ. Maʉ̃ta berabarira zarea oibara kĩrʉnʉma ẽ baita (Ecl. 7:9). Bʉa komentariota dia ẽ bʉrʉ bʉa kãgabʉ kĩrãkʼa, chupea ũrĩseabʉ mebẽrãba komentario diabʉta, mawũã ãba yi jʉrebari berabarida tẽã ãyaʼa biga diaita mawũã bia jaradabari, maʉ̃ta ora ãyaʼa so zarea diayi bʉa komentario diaibadaba so zarea diaibada kĩrãkʼa. w23.04 23, 24 parr. 14-16

Daizeze Bedʼea ledadrʉ akʉza maʉ̃ ʉ̃rʉ krĩchadadrʉ. Bakuruta mesera kora wã ẽ marẽãra biʼia karra jidanʉmaibara, abarika dayirãbida Jeowa ʉ̃rʉ wãrĩnu ĩjãibara zareapanaita. Bakurura wari wãbʉrʉza audre karra jida wã, maʉ̃ba mesera kora wã ẽ. Abarika dayirãba Daizeze Bedʼea le kʼãrãpe maʉ̃ ʉ̃rʉ krĩchabʉba, kʼarebabʉ audre Jeowa ʉ̃rʉ ĩjãita akʉza audre ĩjãbibʉ Jeowaba jaradia wãra yibiata (Col. 2:​6, 7). Krĩchadadrʉ sãwũã nãã ẽbẽrarã Jeowa odepananara bia wãsita Jeowaba zokʼabʉ ũrĩpanasidera. Bari jaraita, Ezequielbara biʼia akʉbasi angelba obadara, kʼawuaita templo kʼãrẽababʉta. Ezequielba mawũã ũdudabara biode kʼarebasi iya audre ĩjãita. Naʉ̃ba dayirã jaradiabʉ sãwũã Jeowa wawia ũdubibarata iya kãgabʉde obʼaita (Ezeq. 40:​1-4; 43:​10-12). Dayirãra idi ewadera mejãcha kʼarebaseabʉ ewari jʉrʉpanʉbʉrʉ Daizeze Bedʼea lepe maʉ̃ ʉ̃rʉ bia krĩchapanʉbʉrʉ. Dayirã sosida teitea baseabʉ, wãrĩnu soiduba ĩjãpanʉbʉrʉ Jeowa ʉ̃rʉ (Sal. 112:7). w23.07 18 parr. 15, 16

Daizeze Bedʼeadebʉ mejãcha yizarata yumakẽrã kʼẽrẽpabadaraneta. Ãyara kãgabasi Jeowara akʉza nekʼãrẽ mejãcha osida Jeowa pʉwʉrʉ kʼarebaita. Bʉ mebẽrãnebida akʉza kongregasionebida ũduseabʉ yiza bia mebẽrã kristianora biadeba (Heb. 13:7). Adewara erpanʉ yiza yi audre yibiata Jesudeta (1 Ped. 2:21). Maʉ̃ra ʉ̃rʉ krĩchabʉrʉde akʉra ãya kʼãrẽ nebiata erbʉta (Heb. 12:​1, 2). Mõbe zarea ora bʉabida ũdubita maʉ̃ra nebiarata. Yumakẽrã kĩrãkita krĩcha kʼawuabʉbara nekʼãrẽ oi nãã biʼia akʉbʉ jõma, mawũẽra zarea ora bʉabida kĩrãkita krĩcha kʼawuaita. Zarea ora Daizeze Bedʼeadebemata kʼawuaita akʉza krĩchara kʼãrẽa yibiata mama eda jarabʉra bʉitara, tẽã bʉa kʼãrẽ kʼawuadadeba nebiata jidara mawũã Jeowata sobiabita (Sal. 119:9). Bʉa naʉ̃ta obʉbʉrʉ kristiano bia baseabʉ (Prov. 2:​11, 12; Heb. 5:14. w23.12 24, 25 parr. 4, 5

Yibarirabara ãyi wũãwũãra jaradiaseabʉ sãwũã ibiade panʉibarata awururaba ãya ĩjãbʉ ʉ̃rʉ widibʉdade (Sant. 3:13). Ʉ̃kʉrʉ yibarirabara ãyi mebẽrãbawara Daizeze ʉ̃rʉ kʼawuaita ãba yi jʉrebʉrʉde, oũdubipanʉ sãwũã ibiade panʉibarata kolegiode bedʼea widibʉdade. Nekʼãrẽ berabari nãã estudiabʉba kʼarebayi bʉa ĩjãbʉta zarea erbaita akʉza kʼarebaita wuabemarabida abarika ĩjãmarẽã. Jw.org de bʉa ũduyi «Warraraba widipanʉta», nama ũdubibʉ bʉa kʼãrẽta oseabʉta. Naʉ̃ra osida warraraba audre bia kʼawuamarẽã ãya kʼãrẽ ĩjãbʉ ʉ̃rʉ akʉza maʉ̃ ʉ̃rʉ biʼia panʉmarẽã. Naʉ̃ta dayirã mebẽrãbawaraʉba ãbaʉba estudiara, kʼawuadayi sãwũã ibiade panʉita dayirãba ĩjãpanʉ ʉ̃rʉ. w23.09 17 parr. 10; 18 parr. 15, 16

¿Krĩchabarika Daizezede audre bia oita, mamina zareka maʉ̃ oita? Mawũãbʉrʉ krĩcharãra bʉra abapaibʉta. Bari jaraita, Philipʼra audre bia yiwidʼikĩrãbasi akʉza badua okĩrãbasi maʉ̃ta, mamina iyitara zarebasi ewari jʉrʉita. Erikabara krĩchasi Daizeze bedʼea jaradia wãita ãba yi jʉrebʉrʉde ãza jʉ̃ẽ ẽ baita, mawũãsidu iyira ãza jʉ̃ẽbasi mamara. Bʉa wabida aripe oẽbʉrʉ bʉa oita krĩchadata, maʉ̃ kʼarea sopʉarãra, dayirãba krĩchada aripe oira zarea odaibara, mamina bʉa Daizezeita audrera oita krĩchabʉba, ũdubibʉ bʉitara Jeowa neũdukʼawua bʼaira audre yibiata. Maʉ̃ba bʉya oita krĩchabʉra, ora bʉya oseabʉbitapai, mawũã mejãcha krĩcha zroma oẽ baita (Sal. 103:14; Miq. 6:8). Maʉ̃ba bʉa nekʼãrẽ oita krĩchabʉrʉdera, jʉrʉda bʉya oseabʉta. w23.05 26 parr. 1, 2

Ẽbẽrarã zowaĩnĩgʉa ũdubipanʉrãra edaʉde pera sentipanʉ, mamina maʉ̃ kʼarea idubʉda ẽ ãya nebia obʉta. Danielʼra zowaĩnĩgʉabasi. Iya akʉbasi ʉ̃kʉrʉ propesia propetaraba bʉdata, maʉ̃ne akʉza propeta Jeremías bʉkʉadata. Iya maʉ̃ne kʼawuasi yi Babiloniaena jida edekʉadarãra aranʉbai jẽda wãibasita (Dan. 9:2). Iya ũduside Jeowaba jarada sãwũã aripe berabarisita, kʼarebasi audre Jeowa ʉ̃rʉ ĩjãita akʉza yi Daizeze ʉ̃rʉ ĩjãpanʉrãra abarika zowaĩnĩgʉa baseapanʉta (naʉ̃ testoʉ̃me akʉra Romanos 8: 32, 37-39). Danielʼra badua yiwidʼibasi Daizeze Jeowa (Dan. 6:10). Iyi nemitiara jõma jarasi Jeowa akʉza iyi sãwũã sentibʉsida, mõbe kʼarebata widibasi (Dan. 9:​4, 5, 19). Iyira dayirã kĩrãkʼa egoro oma baera iyi tosidadera zowaĩnĩgʉa erba ẽ basi, maʉ̃ba iya Daizeze Bedʼea akʉbʉba, Daizezeʼa yiwidʼibʉba akʉza Daizeze ʉ̃rʉ ĩjãiba kʼarebasi zowaĩnĩgʉa bʼaita. w23.08 3 parr. 4; 4 parr. 7

Dayirãba nokʼoraba jarabʉta ũrĩpanʉbʉrʉ nebiata ũdudayi akʉza kʼarebadayi wuabemarabida nebiata ũdumarẽã. ¿Kʼãrẽ nebiata ũdupanʉ? Dayirãba ũrĩpanʉbʉrʉ dayirã omarẽã jarapanʉta mawũãra yi ũrĩkĩrã ẽãba kʼãrẽ kayirua ũdubʉta ũduda ẽ bayi (Rom. 13:​1, 4). Dayirãba nokʼoraba jarabʉta ũrĩpanʉbʉrʉ ãya ũdudayi Jeowa ʉ̃rʉ Kʼawuabipanʉrãbara jõma daucha okĩrãta. Bari jaraita poaga darããba pʉwʉrʉ Nigeriade ʉ̃kʉrʉ gorogororata eda jʉ̃ẽsida ãba yi jʉrebari deda, maʉ̃nera kongregasion aba ãba yi jʉrebasi. Ãyara jʉrʉ jʉ̃ẽsida ẽbẽrarã nokʼoraba plata widibʉ paga ẽãrata. Mamina ãyi gorogorora zokʼabʉba naʉ̃ra gorogorora jarasi wãnamarẽã mamaʉ̃bara, iya jarasi: «Jeowa ʉ̃rʉ Kʼawuabipanʉrãbara jõmaʉ̃ba badua diapanʉ nokʼoraba plata widibʉra». Bʉa ũrĩbʉbʉrʉ nokʼoraba jarabʉta, kʼarebayi Jeowa ʉ̃rʉ Kʼawuabipanʉrã ʉ̃rʉ ibia bedʼeadamarẽã akʉza mawũã ibia bedʼeapanʉba kʼarebayi dayirã mebẽrãsida. w23.10 9 parr. 13

Ʉ̃kʉrʉ mebẽrãbara dããraba Daizeze ewari zeita jʉ̃ãbʉta. Ʉ̃kʉrʉ ẽbẽraba jarapanʉ Daizeze ewarira yateda zeibarabasita, mamina Jeowabara kʼawuabʉ iyi odepanʉrãra sãwũã sentibʉta. Iya Habacucʼa jarasi: «Wabida waebʉ ʉrʉmabʉde ũduda zeira akʉza naʉ̃ra mesera wã aripe berabarita, sewidata jara ẽ. Ãza zei kĩrãkʼabʉmina, maʉ̃ta jʉ̃ãkĩrã jʉ̃ãbara. Jõma aripe berabariyi. Ãza ze ẽ bayi» (Hab. 2:3). ¿Jeowabara naʉ̃ bedʼeara Habacucʼa jarasika iyitrʉ kʼarebaita? Mawũã ẽ bʉrʉ, ¿naʉ̃ bedʼeabara idi ewade dayirãsida kʼarebabʉka? Daizeze jaure zareadeba Pablobara naʉ̃ bedʼeata jarasi kristianora, ãyara jʉ̃ãpanasi Daizeze ewarita (Heb. 10: 37). Dayirãba krĩchapanʉbʉrʉ Jeowaba ẽjũã kĩrãwãreã weya adata mesera ze ẽãta, wãrĩnu ĩjãnaibara maʉ̃ra «jõma aripe berabariyi, ãza ze ẽ bayi». w23.04 30 parr. 16

Israelitara mejãchaʉba ĩjãna ẽ basi Jeowaba Moisésta zokʼabʉta mawũã ãyaʼa jaradiaita kʼãrẽta oita (Núm. 14: 10, 11). Maʉ̃ kʼarea israelitara maʉ̃ ewaridebemara Jeowabara iya ẽjũã bia diaya adamara jʉ̃ẽbi ẽ basi, ode makenasi (Núm. 14:30). Mamina ʉ̃kʉrʉ israelitarabara idu Jeowa yi jaradiabisida. Bari jaraita Jeowaba jarasi Calebʼbara soiduba obasita iyaʼa jarabʉra (Números 14:24). Jeowabara nebiata diasi Calebʼara. Iya iduaribisi Calebʼba jidamarẽã sama bakĩrãbʉta ẽjũã kĩrãwãreã iya diaya adamae (Jos. 14:​12-14). Israelitara Jeowaba drʉa bia diaya adamae badarabara yiza biata ũdubisida, ãyara Jeowa idu yi jaradiabisida baera. Moisés beida tẽã Josuéba israelitara akʉsidera ãyara wawiata ũdubisida Josuéʼara (Jos. 4:14). Maʉ̃ kʼarea Jeowaba ãyaʼa nebiata diasi, adewara iya ẽjũã bia diaya adama erjʉ̃ẽsi (Jos. 21:​43, 44). w24.02 21 parr. 6, 7

Medikobara dayirã so sãwũãbʉra kʼawuabʉ dayirã juwa akʉbʉrʉde. Abarika dayirãba Jeowa kʼãrẽaba kãgabʉra kʼawuaseapanʉ mebẽrã kʼãrẽaba kãga ũdubibʉdeba. Dayirãba mebẽrã kãga ũdubibʉta mejãcha ũdubibʉ ẽ bʉrʉ, maʉ̃ba ũdubiseabʉ daya Jeowa kãgabʉsida zareabʉ ẽãta, mamina dayirãba mebẽrã ewariza ũdubipanʉbʉrʉ ãyi kãgabʉta, naʉ̃ba ũdubibʉ dayirãba Daizeze kãgabʉsida zarea erpanʉta. ¿Dayirãba mebẽrã kãga ũdubi ẽ bʉrʉ krĩcha oseapanʉka maʉ̃ kʼarea? Mawũã, maʉ̃ba ũdubibʉ baera dayirãra Daizeze kʼawabʉ ẽãta. Apostol Juanba ũdubisi kʼãrẽa yibiata mebẽrã kãga ũdubira, iya jarasi: «Yi mebẽã kãga ẽãra iya ũdubʉta, Daizezearara kãga ẽ ũdu ẽ baera» (1 Juan 4:20). ¿Kʼãrẽta kʼawuapanʉ? Jeowaba dayirãta biʼia akʉmarẽãra, dayirãbara kãga ũdubibarata mebẽrãʼa (1 Juan 4:​7-9, 11). w23.11 8 parr. 3; 9 parr. 5, 6

Jehoás warrarabasidera bia jida kʼawuabasi, iyira zeze neẽbasi baera jʉrʉsi sumo saserdote Jehoiadá kʼarebata. Jehoásʼra Jehoiadá wũãwũã ẽ basimina Jehoiadábara biʼia jaradiasi iyara. Jehoiadába kʼãwũã jaradiadaba kʼarebasi Jehoásba Jeowaba kãgabʉta oita akʉza kʼarebaita pʉwʉrʉbida Jeowaba kãgabʉta omarẽã. Adewara Jehoásbara zokʼasi Jeowa templota ara odamarẽã (2 Crón. 24:​1, 2, 4, 13, 14). Bʉaʼa Jeowa ʉ̃rʉ jaradiasidabʉrʉ akʉza iya kʼãrẽta omarẽã kãgabʉ ʉ̃rʉ, nebiata diasida (Prov. 2:​1, 10-12). Yibarirabara nekʼãrẽ awuara zokʼaseapanʉ ãyi wũãwũãra jaradiaita. Bʉa Jeowaba zokʼabʉta ũrĩra bʉ yibarirata sobiabiyi akʉza Daizezeta, adewara Jeowaʉ̃me neũdukʼawua biabayi ewari jõmaʉ̃nẽ (Prov. 22:6; 23:​15, 24). Naʉ̃ba kʼarebabʉ Jehoás warraraena bada kĩrãkʼa bʼaita. w23.09 8, 9 parr. 3-5

Jeowaba jarabʉ ũrĩta dayirã yiwidʼibʉra. Jeowabara kãga ẽbẽrarã iyi ode panʉrãra, maʉ̃ kʼarea iyara ewari jõmaʉ̃nẽ ũrĩñi ãyi bedʼeara (Sal. 10:17; 37:28). Mamina maʉ̃ba jarakĩrãbʉ ẽ dayirãba nekʼãrẽ jõma widibʉra Jeowabara jõma diaita, edaʉde Jeowaba dayirã bedʼea panʉmarẽãra jʉ̃ãibara ẽjũã bia zeita. Dayirã Jeowa yiwidʼibʉrʉdera iyara krĩchabʉ kʼãrẽne abarikabʉta dayirãba widibʉta iya nekʼãrẽ oita krĩchabʉme (Is. 55:​8, 9). Maʉ̃ nekʼãrẽ iya oita krĩchabʉdebemara naʉ̃: ẽbẽrarã ẽjũã biade ãba sobiapanamarẽã, mamina Diarubara jarabʉ dayirãra audre bia panʉta dayirãba kãgata opanʉnebʉrʉ (Gén. 3:​1-5). Mamina Jeowabara iduaribibʉ ẽbẽrarãba ãya kãgata odamarẽã, mawũã ũdubita Diaruba jarabʉra sewidata, naʉ̃ drʉadera ẽbẽrarãba ãya kãgata obʉdeba kayiruata mejãchabʉ baera (Ecl. 8:9). Dayirãbara kʼawuapanʉ Jeowabara nemitia naʉ̃ drʉadebʉra jõma ãĩ bʉe ẽãta. w23.11 21 parr. 4, 5

Jeowaba jarasi Abrahánʼneba nebia diaita pʉwʉrʉra. Abrahán 100 poagabaside akʉza Sara 90 poaga, mawũãsidu ãyira wũãwũã neẽbasi. Dayirã kʼãwũã beibaritara zõna babʉrʉde wũãwũã erbaira zare, maʉ̃ kĩrãkʼabasi Abrahánta Saraʉ̃me. Maʉ̃ba ãyi wũãwũã barai ĩjãira zarebasi. «Iya ĩjãbʉde jʉ̃ãbasi akʉza ĩjãsi pʉwʉrʉ zeze bʼaita iyira» (Rom. 4:​18, 19). Iya jʉ̃ãbadara aripe berabarisi. Iyira Isaac zezebasi iya jʉ̃ãbada kĩrãkʼa (Rom. 4:​20-22). Dayirãbida Jeowa nebia erbaseapanʉ akʉza iyi neũdukʼawua baseabʉ Abrahán kĩrãkʼa. Maʉ̃ ʉ̃rʉ jara ũrĩbisi Apostol Pabloba: «Bari Abraham ʉ̃rʉ̃ bʼʉdʼa ẽbasia mawũã bedʼea ne ẽã bʼʉdʼara. Awuarabʉrʉ dazhirãsidʼa abʼarika bedʼea ne ẽã duanukʼãrĩã dazhirãbara izhidʼebema ĩjã bʼeba beudʼata piradrʉbidʼata Jesús dazhirã Nokʼota» (Rom. 4:​23, 24). Abrahánʼne kĩrãkʼa dayirãbida nesidapanʉ Jeowa ʉ̃rʉ ĩjãita akʉza nekʼãrẽ bia oita. Adewara Jeowaba jarabʉra aripe berabaribʉta. w23.12 7 parr. 16, 17

Bʉ bedʼea zromaba perabibʉrʉdera, kʼawuara Jeowaba kʼawuabʉta bʉ sãwũã berabarinʉmʉta akʉza maʉ̃ba bʉ sãwũã sentibibʉta. Bari jaraita Jeowaba kʼawuabasi iyi pʉwʉrʉ Egiptode sãwũã zʉbʉrianʉmʉta akʉza ãyi sãwũã sopʉabʉta (Éx. 3:7). Bʉta bedʼea zroma berabarinʉmʉbʉrʉ krĩchaseabʉ Jeowaba bʉra kʼareba ẽãta, mawũãnʉmʉbʉrʉ ¿kʼãrẽba kʼarebaseabʉ? (2 Rey. 6:​15-17). Bʉyikʉza widira: «¿Mebẽrã komentarioba so zarea diabarika mawũã ẽ bʉrʉ diskursoba? Mawũã ẽ bʉrʉ, ¿so zarea diabarika bideoba, kartaraba, trãbiraba? Edaʉde dayirãba kĩrãduaseabʉ Jeowaba dayirã so zarea diabʉta mebẽrãneba akʉza kartaraneba, mamina maʉ̃ra Jeowaba dayirã nebari diada (Is. 65:13; Mar. 10:​29, 30). Maʉ̃ba ũdubibʉ bʉra Jeowaba biʼia akʉbʉta, maʉ̃ kʼarea iyi ʉ̃rʉ ĩjãseapanʉ (Is. 49:​14-16). w24.01 4, 5 parr. 9, 10

Jesuba iyi ʉ̃ta wãi naena, iyi kʼaidupanʉra kĩrãbebisi iyi ʉ̃rʉ jaradiadaibarata «Jerusalénʼne, Judeaza jõmaʉ̃nẽ adewara Samariade akʉza wawara naʉ̃ drʉa jõmaʉ̃nẽ» (Hech. 1:8; Luc. 24:​46-48). Maʉ̃ tẽã religionebema zeri ẽãraba jidasida Pedrota Juanʼʉ̃me, mõbe edesida Sanedrín nãã, mama jarasida Juanʼa akʉza Pedroʼa Daizeze Bedʼeata wua jaradiada ẽ bamarẽã. Maʉ̃ta ora beadaita jarasida (Hech. 4:​18, 21). Pedroba Juanʼʉ̃meba jarasida «Daizezema bigabʉrʉ maraba jarabʉta ũrĩta Daizezeba jarabʉ ũrĩ kaude, marabʉrʉ kʼawua oidua. Mamina daiba ũdudapeadata akʉza ũrĩnapeadata jara ẽãranʉma ẽ bayi» (Hech. 4:​19, 20). Pedrota Juanʼʉ̃me ãĩ bʉesidade karseldeba, wuabemara Jesu kʼaidupanʉrãra Jeowaʼa yiwidʼisida, Jeowabara ãyi mawũã yiwidʼidara ũrĩsi (Hech. 4: 31). w23.05 5 parr. 11, 12

Jeowa yi warraʉ̃me ãbabʉra dããraba, akʉza ãyira yiya kãga ũdubi zebʉda. Testo idibemane Jeowabara biʼia ũdubisi iya Jesu kãgabʉta. Jeowabara bari jaraseabasi: «Naʉ̃ mʉ̃ warrara, iyi kʼarea sobiabʉa», mamina iyara maʉ̃ta jara ẽ basi, awuarabʉrʉ jarasi Jesu kʼãrẽaba kãgata naʉ̃ bedʼea jaraside: «Naʉ̃ mʉ warra mʉãrã kʉãgʼa». Jeowara sobiabasi Jesu kʼarea akʉza iya kʼãrẽ oi kʼareabida (Efes. 1:7). Jesubara krĩcha ẽ basi yi Zezebara iyi kãga ẽãta, awuarabʉrʉ, iya biʼia kʼawuabasi Jeowabara iyira wãrĩnu kãgabʉta. Jesubara jarada bio jarasi yi Zezebara iyira kãgata (Juan 3:35; 10:17; 17:24). w24.01 28 parr. 8

Krĩchara naʉ̃ta: Ẽbẽra aba bʉa mejãcha kãgabʉba bʉ ʉ̃rʉ imitia bedʼeabʉ akʉza bʉa kʼawuabʉ iya jarabʉra sewidata, mawũãsidu ʉ̃kʉrʉ ẽbẽrarãba ĩjãpanʉ maʉ̃ ʉ̃rʉ, adewara iyabaʉ bedʼeata awuru ẽbẽrarãba awurura jara ũrĩbipanʉ akʉza maʉ̃rabida ĩjãnañi maʉ̃ bedʼeara, ¿maʉ̃nera bʉra sãwũã senti? bʉra sopʉa sentiyi, ¿bʉmabida? Maʉ̃ba biʼia kʼawuabibʉ dayirãʼa, Jeowa sãwũã sentisita iyi ʉ̃rʉ imitia bedʼeasidade. Iyi angeleranebema abaʉba iyi ʉ̃rʉ sewidata jarasi Evaʼa, Evaba ĩjãsi maʉ̃ra, maʉ̃ba ãyara oda ẽ basi Jeowaba jarabʉra, adewara maʉ̃neba zesi kayiruata akʉza ẽbẽrarã beibarita (Gén. 3:​1-6; Rom. 5:12). Mamina iyi ʉ̃rʉ sewida jaradapeada kʼarea, ¿sopʉabʉka Jeowara? Mawũã. Mawũãsidu iyira so kayiruabʉ ẽ, mia kĩrʉbʉ ẽ, awuarabʉrʉ iyira sobiabʉ (1 Tim. 1:11). w24.02 8 parr. 1, 2

¿Sãwũã Joséde kĩrãkʼa oseapanʉ yi kayirua oẽ baita akʉza Jeowaʉ̃me kʼẽrẽpa bʼaita? Kʼãwũãena krĩchara nemitia oita zebʉrʉde kʼãrẽta oita, Jeowaba nekʼãrẽ jʉrata oita krĩchara, waña krĩchaibara maʉ̃ta oẽ baita akʉza mia kʼãrẽsi krĩcharãra maʉ̃ra ʉ̃rʉra (Sal. 97:10; 119:165). Bʉa naʉ̃ta obʉbʉrʉ naʉ̃ba kʼarebayi kayirua oẽ baita. Bʉa kʼawuabʉ bʉra wãrĩnuarade edabʉta akʉza Jeowaba kãgabʉta okĩrãbʉta bʉ soiduba, mamina perabʉbaibara bʉ bebʉ Jeowaʼa diaita akʉza buru kʼoeita. Bʉara Davidʼde kĩrãkʼa Jeowaʼa naʉ̃ta jaraseabʉ: «Daizeze mʉ̃ta biʼia akʉra akʉza biʼia kʼawuara mʉ̃ sode kʼãrẽtabʉta. Biʼia akʉra mʉ̃ta akʉza bia kʼawuara mʉ̃ kʼãrẽba krĩcha obibʉta. Akʉra mʉ̃ne, yi kayirua bʉ kʼawuaita akʉza o ewari jõmaʉ̃nẽbʉare edera» (Sal. 139:​23, 24). Jeowabara nebiata diabʉ iyi jʉrʉpanʉrãra bʉa bʉ bebʉta iyaʼa diaita akʉza buru kʼoeita zarea obʉbʉrʉ (Heb. 11:6). w24.03 6 parr. 13-15

Sumo saserdotera pʉwʉrʉ jõmaʉ̃bari bedʼeabasi Jeowa nãã. Jeowaba Aarónʼra sumo saserdote babisi tabernakulo mapãranʉmʉsidade, mamina apostol Pabloba jarasi maʉ̃ra sumo saserdoterãra tẽã beibasi baera jʉrʉibarabasita awuruta ãyi bari bʉeita (Heb. 7:​23-26). Akʉza maʉ̃ra saserdoterãra ãyisida nemitia omiabasi baera, sakripisio diaibarabasi ãyi nemitia kʼarea. Ãyira jipade awuarabasi sumo saserdote Jesuʉ̃mera. Jesura Jeowa templo espiritualde sumo saserdote (Heb. 8:​1, 2). Pablobara jarasi Jesura beika baera iyira ewari jõmaʉ̃nẽ sumo saserdote bʼaita akʉza jarasi Jesura neneẽãbʉ baera adewara ẽbẽra kayiruaraneba jĩgabʉ baera, iyara nesida ẽãta kʼãrẽa sakripisio oira iyi kayirua kʼarea. w23.10 26 parr. 8, 9

Maʉ̃ nããbema bajãbara jarakĩrãbʉ nokʼora Diaruba zokʼabʉrata (Mat. 4:​8, 9; 1 Juan 5:19). Edaʉde Daizeze Bedʼeaba drʉa jarabʉrʉdera jarakĩrãbʉ ẽbẽrarãta (Gén. 11:1; Sal. 96:1). Maʉ̃ kʼarea jaraseapanʉ nããbema drʉa jarabʉbara jarakĩrãbʉta ẽbẽrarã kayiruara nama egorode pananata. Daizeze Bedʼeabara bari jara ẽ Jeowabara nekʼãrẽ ara oita, awuarabʉrʉ jarabʉ bʉeita bãja yiwidita akʉza drʉa yiwidita, maʉ̃ba jarakĩrãbʉ Nokʼo yiwidita bʉeita ẽbẽrarã kʼẽrẽpapanʉrata zokʼamarẽã. Isaíasba jarada kĩrãkʼa naʉ̃ drʉara ẽjũã kĩrãwãreãbayi jardin Edén bada kĩrãkʼa. Jeowabara yi wãbe ẽãbʉta, daʉberreabʉta akʉza ũrĩ ẽã bʉrãra bebiyi, adewara yi beidarasida jẽda piradrʉbiyi (Is. 25:8; 35:​1-7). w23.11 4 parr. 9, 10

Badu ewaride zeseabʉ zʉbʉria zromara (Mat. 24:21). Mamina naʉ̃ drʉade nekʼãrẽ berabaribʉba jidabʉ kĩrãkʼara jida ẽ bayi zʉbʉria zroma zebʉrʉdera. 2.000 poaga audre ba Jesuba iyi kʼaidupanana jaradata dakitapanamarẽã zʉbʉria zroma zei naena. Kʼawuapanʉbʉrʉ kʼãrẽta oita maʉ̃ ewari zeyeda, maʉ̃ba kʼarebaseabʉ dayirãkʉza zarea bʼaita akʉza wuabemarasida (Luc. 21:36). Dayirãba nesidayi awuantaita mawũã Jeowaba zokʼabʉ ũrĩta akʉza wãrĩnu ĩjãnaibara iya kʼarebaita. Mamina ¿kʼãrẽta oseapanʉ dayirã mebẽrãba nekʼãrẽ nebia erbadata aduara? (Hab. 3:​17, 18). Dayirãbara dayirã mebẽrãra so borekea akʉdaibara ãyaʼa nekʼãrẽ diaita akʉza so zarea diaita. ¿Dayirãra sãwũã bʼai mebẽrãbawara ãbabidade ewari biobayeda nokʼoraba pẽwãpanʉ kʼarea? (Ezeq. 38:​10-12). Maʉ̃nera nesidapanañi wãrĩnu kãgaʼarata, mawũã dayirãi yiya kʼarebaita. w23.07 2 parr. 2, 3

Juwa jidapanʉrabara nekʼãrẽ mejãcha kʼawuaseabʉ Áquila akʉza Priscila yizadeba, ãyira yiza biabasi kristianora nããbemaraitara (Rom. 16:​3, 4). Ãyira ãba trajabasi, ãbaʉba jaradiabasi akʉza ãbaʉba kʼarebapanasi wuabemarata (Hech. 18:​2, 3, 24-26). Adewara Daizeze Bedʼeaba Áquilata akʉza Priscila ʉ̃rʉ jarabʉdera, maʉ̃rãra ũme ãba jarabʉ. ¿Juwa jidapanʉrabara sãwũã oseapanʉ ãya oda kĩrãkʼa? Krĩchaidʉa bʉa akʉza bʉ kimaʉ̃meba nekʼãrẽ mejãcha oseapanʉta. ¿Maraba nekʼãrẽ opanʉra ãbaʉba oseapanʉka? Bari jaradaita, Áquilaba Priscilaʉ̃mebara ãbaʉba Daizeze Bedʼeata jaradiapanasi, ¿marabara maʉ̃rane kĩrãkʼa abarika oseapanʉka? Akʉza Áquilara Priscilaʉ̃mera ãyira ãba trajapanasi, ¿marata iyabaʉ trajota erpanʉ ẽ bʉrʉ deda ãba trajaseapanʉka? (Ecl. 4:9). Marata yiya kʼarebapanʉbʉrʉ nekʼãrẽ obʉde, mawũãra audre ãba bayi akʉza audre bedʼeapanañi. w23.05 22, 23 parr. 10-12

Edaʉme jõmaʉ̃ta pera sentibʉ. Bari jaraita, iyi Saúlba beaita pẽwãnʉmasidera Davidʼra mĩrʉ wãsi Gatʼeda. Iyi mamabaside nokʼo Akísba kʼawuasi Davidbasita pilisteora mejãcha makenanara, maʉ̃ kʼarea Davidʼra mejãcha perasi (1 Sam. 21:​10-12). David pera sentibasidera, ¿kʼãrẽba kʼarebasi iya kʼawuamarẽã kʼãrẽta oita? Salmo 56de ũdubibʉ David sãwũã sentibasita pʉwʉrʉ Gatdebaside. Naʉ̃ salmoba biʼia jara ũrĩbibʉ Davidʼra maʉ̃nera pera sentibasita akʉza jara ũrĩbibʉ kʼãrẽba kʼarebasita iyi pera senti ẽ baita. David iyi pera sentibasidera ũdubibasi Jeowa ʉ̃rʉ ĩjãbʉta (Sal. 56:​1-3, 11). Davidbara Jeowa ʉ̃rʉ ĩjãbasi baera Jeowaba kʼarebasi, iya nei osi mawũã bei ẽ baita, iyira kĩrãnemabʉ kĩrãkʼabasi, maʉ̃ kʼarea Akísbara Davidʼra bea ẽ basi, awuarabʉrʉ ãyi pʉwʉrʉdeba aña wãmarẽã kãgabasi (1 Sam. 21:13–22:1).w24.01 2 parr. 1-3

¿Idibema testora kʼaira ʉ̃rʉ bedʼeabʉ? Maʉ̃rãra ʉ̃ta wãira, maʉ̃ba ãyi ʉ̃ta wãbʉrʉdera zʉbʉria zroma jõbodoarera ãyara naʉ̃ta oyi: yõita. Mamina naʉ̃ra 144.000ra ʉ̃ta wãna tẽãra, ãyira Jesuʉ̃me akʉza angeleraʉ̃me ãba trajayi yõita Daizeze nejʉraraʉ̃me. Krĩchara naʉ̃ta, ʉ̃ta wãira nama egorode bʉedara ãyira zõrãrãyiru. Mamina ãyi ʉ̃ta wãbʉrʉdera jauredepanañi, zarea mejãcha erpanañi akʉza beikabayi, adewara ãyira Jesu kʼawa yõñi. Armagedón berabarida tẽãra ãyira Jesuʉ̃me trajayi kʼarebaita ẽbẽrarãta kayirua oka bamarẽã. 144.000rabara mejãcha kʼarebayi mebẽrãra ãyi ʉ̃ta wãbʉrʉdebʉrʉ, ãyi nama egorodebaside kʼarebadaira. w24.02 6, 7 parr. 15, 16

Ʉ̃kʉrʉbara ãyi bebʉra Jeowaʼa diaseabʉ akʉza buru kʼoeseabʉ, mamina ãyira krĩcha obʉ maʉ̃ oi kʼarea. Ʉ̃kʉrʉra krĩcha opanʉ ãyi bebʉ Jeowaʼa diada tẽã akʉza buru kʼoeda tẽã kayirua okãrãpe Jeowa pʉwʉrʉdeba ãĩ wãi kʼarea. Bʉta maʉ̃ kʼarea perabʉbʉrʉ kĩrãbera Jeowabara diaita bʉa nekʼãrẽ nesidabʉta mawũã iya kãgabʉde bamarẽã akʉza iyita sobiabimarẽã (Col. 1:10). Iya bʉaʼa diaseabʉ maʉ̃ zareara, iya ũdubi zebʉrʉ maʉ̃ra wuabemara kʼarebabʉdeba (1 Cor. 10:13). Maʉ̃ kʼarea Jeowa organizasione bʉra mejãchaʉta ãĩ wã ẽ, Jeowaba kʼarebabʉ baera iyi pʉwʉrʉdebemara kʼẽrẽpa bʼaita. Ẽbẽra jõmaʉ̃ta kayirua omiara, maʉ̃ba zare nebia oira (Sant. 1:14). Maʉ̃ kʼarea bʉyikʉzaʉba jidaibara nebiata oita mawũã ẽ bʉrʉ yi kayiruata oita. Ʉ̃kʉrʉ ẽbẽrarãba jarapanʉ daya nekayirua ʉ̃rʉ krĩcha zebʉrʉdera maʉ̃ʼa yi edebibarata, mamina maʉ̃ra mawũã ẽ, dayara nebia oita jidaseabʉ baera. w24.03 5 parr. 11, 12