Jeowabara sãwũã panʉbʉ dayirã yiwidʼira

1, 2. Dayirã yiwidʼibʉ ʉ̃rʉra, ¿kʼãrẽta widiseapanʉ?

¿BɄARA ewari abaʉde krĩchabarika Jeowaba bʉ yiwidʼira panʉbʉta? Mawũãbʉbʉrʉ bʉta abapai mawũãbʉ ẽ, mebẽrã mejãchaʉba maʉ̃ ʉ̃rʉ widibari, audre bedʼea zroma ũdubʉrʉde. Dayirã zʉbʉriabʉrʉdera zarea baseabʉ Jeowaba dayirã yiwidʼi panʉbʉ kʼawuaita.

² Akʉdaya sãwũã wãrĩnu ĩjãseapanʉta Jeowaba panʉbʉta iyi odepanʉra yiwidʼira (1 Juan 5:15). Akʉza panʉnañi naʉ̃ra widita, ¿kʼãrẽa edaʉde krĩchaseapanʉ Jeowabara panʉ ẽãta dayirã yiwidʼira? ¿Idi ewadera Jeowaba sãwũã panʉbʉ dayirã yiwidʼira?

JEOWABARA PANɄSEABɄ DAYIRÃ YIWIDʼI DAYIRÃBA JɄ̃Ã Ẽ BADATA

3. ¿Kʼãrẽa kãgabʉ Jeowaba iyaʼa yiwidʼimarẽã?

³ Daizeze Bedʼeaba jarabʉ Jeowabara dayirãra wãrĩnu kãgabʉta akʉza iyitara dayirãra biʼiabʉta (Ageo 2:7; 1 Juan 4:10). Maʉ̃ba iya kãgabʉ dayirãra iyaʼa yiwidʼidamarẽã (1 Ped. 5:6, 7). Iyara kʼarebakĩrãbʉ iyi kʼawa panamarẽã akʉza bedʼea zromata awuantamarẽã.

4. ¿Sãwũã kʼawuapanʉ Jeowabara panʉbʉta iyi ode kʼẽrẽpabʉ bedʼeara? (Akʉra potota).

⁴ Daizeze Bedʼeaba ũdubibʉ Jeowabara edaʉde panʉbasita iyi odepananara yiwidʼira. Bari jaraita, nokʼo David ʉ̃rʉ, iyi bedʼea zromane edabasidera ewari jõmaʉ̃nẽ jʉrʉbasi Jeowa kʼarebata. Maʉ̃ne iya naʉ̃ta jarasi: «Jeowa, ũrĩdua mʉ̃ yiwidʼira, ũrĩdua mʉ̃a bʉaʼa kʼareba widibʉra. Bʉra kʼẽrẽpabʉ baera akʉza aripe obʉ baera, panʉra» (Sal. 143:1). Jeowabara ũrĩsi David yiwidʼira iya ẽdrʉbimarẽã widisidera (1 Sam. 19:10, 18-20; 2 Sam. 5:17-25). Davidba soiduba jaraseabasi: «Jeowara jõma iyi jʉrʉbʉ kʼawabʉ, jõma wãrĩnu soiduba jʉrʉbʉ kʼawa». Dayirãbida abarika maʉ̃ne kĩrãkʼa wãrĩnu ĩjãseabʉ (Sal. 145:18).

5. ¿Kristiano nããbema bedʼeara Jeowaba ãya kãgabʉde panʉsika? (Yiza aba jara ũrĩbira akʉza akʉra potota).

⁵ Jeowabara daya kãgabʉ kĩrãkʼa waña panʉ ẽã baseabʉ dayi bedʼeara. Maʉ̃ kĩrãkʼa berabarisi apostol Pablota. Jeowaʼa widisi ãĩ bʉemarẽã iya bedʼea zroma erbʉta. Iya mawũã widibʉta ũbea osi, ¿Jeowabara maʉ̃ bedʼeara ũrĩsika? Ũrĩsi, mamina Pabloba jʉ̃ãbada kĩrãkʼa oẽbasi. Iya bedʼea zroma waña ãĩ bʉei kaude, awuarabʉrʉ diasi zareata Jeowaba zokʼabʉta aripe obamarẽã (2 Cor. 12:7-10).

6. ¿Kʼãrẽa edaʉde krĩchaseapanʉ Jeowaba dayirãba wididara panʉ ẽãta?

⁶ Jeowaba panʉbʉ edaʉde dayirãba widi ẽ badata. Dayirãbara ĩjãseabʉ Jeowabʉrʉ kʼawuabʉta dayirã sãwũã kʼarebaita, adewara «iyara dayirãba widida audre oseabʉ» (Efes. 3:20). Maʉ̃ kʼarea dayirãba jʉ̃ã ẽ badata Jeowaba panʉseabʉ.

7. ¿Kʼãrẽa awuara yiwidʼita nesidapanʉ? Yiza aba jara ũrĩbira.

⁷ Dayirãbara awuara oseabʉ dayirã yiwidʼira kʼawua wãne Jeowaba kʼãrẽta kãgabʉta. Krĩchadrʉ Martin Poetzinger yizata. Iyi juwa jidada dããra ẽãne ibalbʉesida karsel nazirane. Iyara nããra Jeowaʼa widisi ãĩ bʉebimarẽã maʉ̃ karseldeba, yi kima mawũã akʉita adewara Daizeze bedʼea bia jaradia bʼaita. Semana ũme berabarida tẽã, iya ũdu ẽ basi Jeowaba panʉbʉta iyi yiwidʼira, iyi karseldeba ãĩ wãmarẽã. Maʉ̃ kʼarea akʉza yiwidʼisi: «Jeowa mʉ̃ bia ora, ũdubira bʉa mʉ̃aʼa kʼãrẽta omarẽã kãgabʉta». Maʉ̃ tẽã, iya krĩcha jʉ̃drʉsi mebẽrã mamabʉra kʼãrẽ berabarinʉmʉta. Mebẽrã mamabemarãra mejãcha krĩchapanasi ãyi kima ʉ̃rʉ akʉza ãyi wũãwũã ʉ̃rʉ. Mebẽã Poetzingerʼra kʼãwũã yiwidʼisi: «Jeowa biga mʉ̃aʼa nekʼãrẽ oita diasi baera, mʉ̃ra kʼarebara mʉ̃ mebẽrã so zarea diaita». Iyira 9 poagabayeda maʉ̃ta osi maʉ̃ karselde.

8. ¿Kʼãrẽ ʉ̃rʉ krĩchadaibara dayirã yiwidʼibʉrʉdera?

⁸ Kĩrãbedaibara Jeowabara iya krĩchabʉra oita iya kãgabʉ ewaride. Maʉ̃ne edabʉ jipa jõbita akʉza wua neẽ baita idi ewade bedʼea zroma ũdupanʉra. Iya jõbikĩrãbʉ idi ewade bedʼea zroma dayirã zʉbʉriabibʉra. Bari jaraita, drʉade nekʼãrẽ berabaribʉta akʉza beibʉta, Jeowabara aripe berabaribiyi naʉ̃ra iyi Nokʼodeba (Dan. 2:44; Apoc. 21:3, 4). Mamina maʉ̃ berabariyedara Jeowabara idu zokʼabinʉmʉ Diaruab (Juan 12:31; Apoc. 12:9). Jeowaba kʼãwũãena naʉ̃ bedʼea zromata ara okʉara, mawũãra bayi Diaruba bia zokʼabʉ kĩrãkʼa. Mõbemata Jeowaba mesera ara oẽmina, maʉ̃ba jarakĩrãkʉ ẽ kʼareba neẽ amae ẽãta. Atia kʼawuadayi sãwũã Jeowaba dayirãra kʼarebabʉta.

IDI EWADE JEOWABA SÃWŨÃ PANɄBɄTA DAYIRÃ YIWIDʼIRA

9. ¿Jeowabara sãwũã kʼarebabʉ krĩcha bia jidaita? Yiza aba jara ũrĩbira.

⁹ Jeowabara diabʉ dayirã buru biata. Mawũã nekʼãrẽ jidabʉrʉde dayirãba bia jida kʼawuaita. Dayirãba audre nesidabʉ Jeowaba dayirã buru bia diamarẽã, mawũã nekʼãrẽ jidabʉrʉde dayirã bebʉ awuara babita. Bari jaraita, juwa jidaita mawũã ẽ bʉrʉ doba bʼaita (Sant. 1:5). Krĩchara mebẽã dobabʉ ʉ̃rʉ, iyi trʉ̃ra María.c Iyira yi nãã edebaribasi mebẽã ũdukʼawuasidera iya jarabʉ: «Audre yi neũdukʼawua ba wãside audre yi kãga wãsida, mʉ̃a kʼawuabasi nekʼãrẽ jidabʉrʉdera bia jidaibarata, maʉ̃ba Jeowaʼa mejãcha yiwidʼisi. Mʉ̃ara bia kʼawuabasi krĩcha bia jidaibarabasita, maʉ̃ba Jeowaʼa mejãcha yiwidʼisi. Mʉ̃ara kʼawuasi Jeowa kʼarebata nesidabasita, mamina Jeowabara mʉ̃barira jida ẽ baibasi». Iya ũdusi Jeowaba iyi yiwidʼibadara panʉsita buru bia diamarẽã widibaside, kʼãwũãena iya jʉrʉsi dayirã kartarane kʼarebata, mawũã ũdusi iya kʼareba jʉrʉbadara, adewara ũrĩsi iyi papa ũrãgʼata. Iya iyi papa bedʼea ũrãgʼa ũrĩnaba akʉza Daizeze Bedʼea akʉdaba kʼarebasi krĩcha bia jidaita.

10. Filipenses 4:13​ba jarabʉdebara, ¿Jeowabara kʼãrẽta oi iyi kʼaidupanʉrãra kʼarebaita? (Yiza aba jara ũrĩbira akʉza akʉra potota).

¹⁰ Jeowabara diabʉ dayirã zareata mawũã awuantamarẽã. Jeowaba Pabloʼa so zarea diada kĩrãkʼa, dayirãbida diayi so zarea bedʼea zroma awuantaita (akʉra Filipenses 4:13). Akʉdaya sãwũã Jeowaba kʼarebasita mebẽã Benjamin bedʼea zroma awuantaita. Iyi warraraenaʉba yi mebẽrãbawara basi ẽbẽrarã yõneba mĩrʉ zedamae, maʉ̃ra basi Áfricade. Bejaminba jarabʉ: «Jeowaʼa badua yiwidʼibasi, zarea diamarẽã iya kãgabʉta oita, Jeowabara mʉ̃ yiwidʼira ũrĩsi. Kʼarebasi mʉ̃ aduʼa bʼaita, zowaĩnĩgʉa jaradiaita akʉza iyi kartaraneba kʼarebasi iyi kʼawa bʼaita. Mʉ̃a lesi mebẽrã nebʉrata akʉza ũdusi sãwũã Jeowaba kʼarebasita, maʉ̃ba mʉ̃ra kʼarebasi Jeowaʉ̃me kʼẽrẽpa bʼaita».

11, 12. ¿Jeowabara sãwũã zokʼabʉ mebẽrã kongregasionebemara dayirã yiwidʼibʉ panʉita? (Akʉra potota).

¹¹ Iyara kʼarebabʉ dayirã mebẽrã kongregasionebemaneba. Jesu diamasi iyi bei naena mejãcha yiwidʼisi Jeowaʼa. Iya Jeowaʼa widisi, iyira ẽbẽra kayirua kĩrãkʼa beibi ẽ bamarẽã. Mawũã Jeowa trʉ̃ra imitia jarada ẽ marẽã. Iya widida kĩrãkʼa panʉ ẽ basimina Jeowabara zokʼa bʉesi angelta iyaʼa so zarea diamarẽã (Luc. 22:42, 43). Jeowabara dayirã mawũã so zarea diaseabʉ dayirã mebẽrãneba, mawũã ẽ bʉrʉ dayirã telepononeba trʉ̃panʉneba. Dayirã jõmaʉ̃ba jʉrʉibara sãwũã dayirã mebẽrã bedʼea bia jaraita (Prov. 12:25).

¹² Akʉdaya mebẽã Miriam yizata. Yi kima semana beida bio berabarida tẽã Miriamʼra mejãcha sopʉa jẽgabasi jipa, iyira badu mebẽãʉ̃me jipa bedʼeakĩrãbasi. Iya jarabʉ: «Mʉ̃ra zarea neẽbasi mebẽrã trʉ̃ita, mejãcha Jeowa yiwidʼibasi. Mʉ̃ jẽganʉmʉena mebẽã abaʉba trʉ̃si, iyira zõrãrãbasi, mʉ̃ neũdukʼawuabasi». Miriambara wãrĩnu kʼawuabʉ maʉ̃ mebẽãra akʉza yi kimaʉ̃mera Jeowaba zokʼasita.

13. Yizata aba jara ũrĩbira Jeowaba sãwũã zokʼabʉta ẽbẽrarã iyi odebʉ ẽãba dayirã yiwidʼibʉ panʉita.

¹³ Jeowabara zokʼaseabʉ ẽbẽrarã iyi odebʉ ẽãsida. (Prov. 21:1). Edaʉde Jeowabara zokʼabʉ ẽbẽrarã iyi odebʉ ẽãta iya kãgabʉta omarẽã. Bari jaradaita, iya osi nokʼo Artajerjesba Nehemíasta idu wãmarẽã Jerusalénma, mawũã Jerusalénta ara omarẽã (Neh. 2:3-6). Iyara idi ewadebida oseabʉ ẽbẽrarã iyi odebʉ ẽãba dayirãta kʼareba zemarẽã.

14. ¿Bʉara kʼãrẽta kãgasi Soo Hing yizadebara? (Akʉra potota).

¹⁴ Mebẽã abaʉba iyi trʉ̃ra Soo Hing, maʉ̃ba ũdusi sãwũã Jeowaba kʼarebasita mediko abaʉdeba. Ãyi wũãwũãra buru morrodeba kayabasi, maʉ̃ne asidentasi, maʉ̃ kʼarea iya akʉza yi kimaʉ̃meba ãyi trajabadara amaesi ãyi wũãwũã akʉita. Maʉ̃ba ãyira plata neẽbasi ãya nesidabʉ edaita. Mebẽã Soo Hingba jarabʉ: «Wua awuanta ẽ bai kĩrãkʼabasita maʉ̃ bedʼea zromara». Iya Jeowaʼa widisi kʼarebamarẽã, mediko ãyi wũãwũãra akʉbʉba ãyi ʉ̃rʉ krĩchasi. Maʉ̃ medikoba kʼarebasi nokʼoraba kʼareba diabʉta ũdumarẽã akʉza ãyi sama bʼaita. Tẽã mebẽã Soo Hingba jarasi: «Daibara wãrĩnu ũdusi Jeowa juwara, iyira ‹yiwidʼibʉ ũrĩbari›» (Sal. 65:2).

NESIDABɄ ĨJÃTA ŨDUITA JEOWABA SÃWŨÃ PANɄBɄTA

15. ¿Mebẽãra kʼãrẽba kʼarebasi kʼawuaita iyi yiwidʼira Jeowabara panʉbʉta?

¹⁵ Edaʉde dayirãba ũdu ẽ Jeowaba sãwũã panʉbʉta dayirã yiwidʼira. Mamina iya dayirã yiwidʼi panʉbʉrʉdera diabʉ dayirãba nesidabʉta iyiʉ̃me kʼẽrẽpa bamarẽã. Maʉ̃ kʼarea kĩrãkita akʉdaibara sãwũã Jeowaba panʉbʉta dayirã yiwidʼira. Atia akʉdayi mebẽã Yoko ʉ̃rʉ, iyara krĩchabasi Jeowabara panʉ ẽ basita iyi yiwidʼira, maʉ̃ kʼarea iya kuadernone bʉ jʉ̃drʉsi Jeowaʼa widibadara, maʉ̃are ewari bio berabarida tẽã iya jẽda akʉbʉrʉdera iyi kuadernone, iya kʼawuasi Jeowabara panʉsita iya widibadara akʉza iya kĩrãduadasida. Dayirãbida krĩchadaibara sãwũã Jeowabara panʉ zebʉrʉta dayirã yiwidʼira (Sal. 66:19, 20).

16. ¿Sãwũã wãrĩnu ĩjãbʉta ũdubiseabʉ yiwidʼibʉrʉdera? (Hebreos 11:6).

¹⁶ Wãrĩnu ĩjãbʉta ũdubipanʉ Jeowa yiwidʼibʉde akʉza ĩjãbʉde Jeowaba dayirã yiwidʼi panʉbʉta, dayirãba widida kĩrãkʼachu ẽ mina (akʉra Hebreos 11:6). Krĩchara Mike akʉza Chrissy ʉ̃rʉ. Ãyira trajakĩrãbasi Betelde, Mikeba jarabʉ: «Daibara solisituta zokʼa bʉesi Betelʼeda wãita, maʉ̃ba daira yiwidʼida ʉ̃rʉ yiwidʼibasi Jeowaʼa poaga biobayeda, mamina daira trʉ̃na ẽ basi». Mike Chrissyʼʉ̃meba kʼawuapanasi Jeowabʉrʉ kʼawuachuta ãyi sãwũã bia zokʼaita, ãya nekʼãrẽ mejãcha osi, yi nãã edebarita okãrãpe wãsi awuru pʉwʉrʉeda jaradiade, ẽbẽrarã Daizeze bedʼea mejãcha jaradiada ẽma, adewara kʼareba jʉ̃drʉsi Daizeze de parãita. Idi ewadera ãyira kongregasionʼra zõrãrã akʉbari. Mikeba jarabʉ: «Jeowabara panʉ ẽ basi dai yiwidʼira daiba kãgabʉ kĩrãkʼa, mamina panʉsi, iya mawũã panʉbʉrʉdera audre diasi daiba jʉ̃ã ẽ badata».

17, 18. Salmo 86:6, 7​ba jarabʉdebara, ¿kʼãrẽ ʉ̃rʉ wãrĩnu ĩjãseapanʉ?

¹⁷ (Akʉra Salmo 86:6, 7). Davidbara krĩchabasi Jeowabara wãrĩnu panʉbʉta yiwidʼira, abarika dayirãbida wãrĩnu ĩjãseapanʉ. Naʉ̃ artikulode ũdusida yiza biarata bio, naʉ̃ra yizaba ũdubibʉ Jeowabara diaseabʉta buru biata akʉza zareata dayirãba nesidabʉ awuantaita. Iya zokʼaseabʉ mebẽrã kongregasionebemarata akʉza ẽbẽrarã iyi ode panʉra ẽãta dayirãta kʼarebamarẽã.

¹⁸ Jeowaba dayirã yiwidʼi dayirãba kãgabʉ kĩrãkʼa panʉ ẽ mina, kʼawuabʉ iyara panʉita dayirã yiwidʼira. Iyara diayi dayirãba nesidabʉde akʉza dayirãba nesidabʉ ewaride. Wãrĩnu yiwidʼidaibara akʉza ĩjãbaibara Jeowaba idi ewade akʉita dayirãra akʉza ʉ̃ra zeide «zokʼaibʉra nekʼãrẽ jõma kãgabʉta [diayi]» (Sal. 145:16).