Audre bia yiwidʼi kʼawuadaibara

1. Jeowabara dayirãba ewariza, ¿kʼãrẽta omarẽã kãgabʉ? (Akʉra potota).

¿KʼAITA jʉrʉseabʉ dayirãbara sopʉabidadera akʉza ũrãgʼa diamarẽãbʉdera? Dayirãra Jeowaʼa yiwidʼiseapanʉ, iya jarabʉ mawũã opanamarẽã akʉza iya jarabʉ dayirãra badua yiwidʼipanamarẽã (1 Tes. 5:17). Dayirãbara Jeowara orraseapanʉ kʼãrẽ krĩcha ẽã akʉza dayirãba nekʼãrẽ opanʉne widiseapanʉ kʼarebamarẽã maʉ̃ta bia oita (Prov. 3:5, 6). Jeowabara dayirã jara ẽ kʼãrẽ ewaridebʉrʉ yiwidʼibarata, kãgabʉ dayirãra iyiʉ̃me ewariza bedʼea bamarẽã.

2. ¿Kʼãrẽta kʼawuadai naʉ̃ artikulodera?

² Jeowa mejãcha biga diapanʉ iya iduaribibʉ baera iyaʼa yiwidʼipanamarẽã, mamina dayirãra nekʼãrẽ mejãcha oibara baera, edaʉde zare ewari jʉrʉita Jeowaʼa yiwidʼita, adewara krĩchapanʉ audre bia yiwidʼibarata Jeowara. Mawũã krĩchabʉbʉrʉ Daizeze Bedʼeade ũduseabʉ sãwũã audre bia oita. Maʉ̃ kʼarea akʉdaya yiza aba, naʉ̃ba kʼarebaseabʉ sãwũã ewari jʉrʉita Jeowa bia yiwidʼita, adewara akʉdayi bedʼea juesoma sãwũã audre bia yiwidʼi kʼawuadaita.

JESURA EWARI JɄRɄSI YIWIDʼITA

3. ¿Kʼãrẽta kʼawuabasi Jesubara yiwidʼi bʼai ʉ̃rʉra?

³ Jesubara kʼawuabasi Jeowaitara yibiata yiwidʼi bʼaira. Jesu nama egoro eda zei naweda, iya akʉbasi yi Zeze Jeowabara panʉbasita ẽbẽrarã iyi ode kʼẽrẽpabʉ bedʼeara. Bari jaraita, Jesura Jeowa kʼawabasi Ana, David, Elías akʉza wuabemaraba yiwidʼibʉta yi Zezeba panʉside (1 Sam. 1:10, 11, 20; 1 Rey. 19:4-6; Sal. 32:5). Jesubara iyi kʼaidubemara jaradiasi, ãya Jeowa widipanʉra wãrĩnu ĩjãnamarẽã Jeowaba ũrĩta akʉza jaradiasi Jeowaʉ̃me badua bedʼeapanamarẽã (Mat. 7:7-11).

4. Jesu kʼãwũã yiwidʼibadadeba, ¿kʼãrẽta kʼawuapanʉ?

⁴ Jesu sãwũã yiwidʼibadadeba yiza biata amaesi iyi kʼaidubemara. Jesura badua yiwidʼibasi iya jaradiabasidera, iyara ewari jʉrʉibarabasi yiwidʼita Jeowaʼa, ẽbẽrarãta iyi kʼawapanasi baera (Mar. 6:31, 45, 46). Diapeda piradrʉbasi mawũã ewari erbaita Daizezeʼa yiwidʼita (Mar. 1:35). Ewari aba iyira diamasira ũnadrʉyeda yiwidʼibasi nekʼãrẽ biata jidaibarabasi baera (Luc. 6:12, 13). Diamasi iyi bei nãã yiwidʼida ʉ̃rʉ yiwidʼisi Jeowaʼa, mawũã aripe oita Jeowaba jaradata (Mat. 26:39, 42, 44).

5. ¿Sãwũã Jesude kĩrãkʼa oseapanʉ yiwidʼibʉrʉdera?

⁵ Jesu yizabara ũdubibʉ dayirã nekʼãrẽ mejãcha oibaramina, ewari jʉrʉibarata Jeowa yiwidʼita. Jesu yizade kĩrãkʼa ewarita jʉrʉibara: diapeda piradrʉibara, mawũã ẽ bʉrʉ diamasi ʉrʉmabaibara Jeowa yiwidʼita. Mawũã opanʉne ũdubipanʉ dayirãitara yibiata Jeowa yiwidʼira. Mebẽã Lynneba jarabʉ iyira sãwũã sentibasita kʼawuaside Jeowa yiwidʼira arigʉ yibiata. Iya jarabʉ: «Mʉ̃a kʼawuaside Jeowa badu ewaride yiwidʼiseabʉta, maʉ̃ba ũdubisi mʉ̃aʼa iyi neũdukʼawuarata akʉza kʼarebasi mʉ̃ yiwidʼira audre bia oita». Dayirã jõmaʉ̃ta mawũã krĩchabari. Atia bedʼea juesoma akʉdayi kʼãrẽta eda bʉeseabʉta dayirã yiwidʼibʉrʉde.

BEDʼEA JUESOMABɄTA YIWIDʼI Ʉ̃RɄ

6. Apocalipsis 4:10, 11​de jarabʉdera, ¿kʼãrẽta diaibara Jeowaʼa?

⁶ Jeowa ʉ̃rʉ ibia bedʼeaidua. Apostol Juanba ũdusi ʉ̃tʉ bajãne zõrãrã 24 panʉta Jeowa ʉ̃rʉ ibia bedʼeabarabʉta. Ãya jarasida: «Bʉ abapaiʼabʉrʉ ibia bedʼeaibara, wawiata ũdubibara akʉza zareata» (akʉra Apocalipsis 4:10, 11). Angelerabida nekʼãrẽ mejãcha erbʉ Jeowa ʉ̃rʉ ibia bedʼeabira. Ãyira Jeowa kʼawabʉ baera, Jeowata bia ũdukʼawuabʉ akʉza akʉbʉ Jeowaba kʼãrẽ nebia erbʉta, maʉ̃ akʉbʉde ibia bedʼeabikĩrãbʉ Jeowa ʉ̃rʉ (Job 38:4-7).

7. Dayirã Jeowa yiwidʼibʉrʉdera, ¿kʼãrẽta jaraibara iyaʼa?

⁷ Dayirã Jeowa yiwidʼibʉrʉdera jaraibara Jeowaba nekʼãrẽ nebia erbʉ ʉ̃rʉ akʉza jaraibara dayirãba mejãcha kãgabʉta. Bʉa Daizeze Bedʼea ʉ̃rʉ akʉbʉrʉde kĩrãkita akʉra kʼãrẽ nebia Jeowaba erbʉ ʉ̃rʉ bedʼeabʉta (Job 37:23; Rom. 11:33). Maʉ̃are Jeowa jarada bʉa kʼãrẽ sentibʉta iyi nebia ʉ̃rʉ, maʉ̃are Jeowaʼa jaraibara iya kʼãrẽ obʉta iyi pʉwʉrʉ kʼarea akʉza dayi kʼarea. Jeowaba dayirãra ewari jõmaʉ̃nẽ bia akʉbʉ (1 Sam. 1:27; 2:1, 2).

8. ¿Kʼãrẽ kʼarea Jeowaʼa biga diapanʉ? (1 Tesalonicenses 5:18).

⁸ Jeowa biga diaibara. Dayirãba nekʼãrẽ Jeowa biga diaira mejãchabʉ, maʉ̃ba dayirã yiwidʼibʉrʉdera iyaʼa biga diaibara (akʉra 1 Tesalonicenses 5:18). Jeowa biga diaibara dayirãba nebia erbʉ kʼarea, maʉ̃ nebiara iyideba zebʉ baera (Sant. 1:17). Bari jaraita, dayirãbara biga diaseabʉ Jeowaba drʉa oda kʼarea akʉza nekʼãrẽ jõmabʉ parãna kʼarea, adewara dayirãbara biga diaseabʉ Jeowaba bebʉ diasi baera, neũdukʼawua biata diasi baera, mebẽrã kʼarea akʉza nebia zeita jʉ̃ãbibʉ baera akʉza biga diakĩrãpanʉ Jeowa iyi neũdukʼawua babibʉ baera. 

9. ¿Kʼãrẽa zarea baseabʉ biga diaira?

⁹ Edaʉde dayirãbara zarea oibara krĩchaita kʼãrẽ kʼarea Jeowa biga diaita. Idi ewadera ẽbẽrarãbara biga diakĩrã ẽ. Ẽbẽrarãba ãya nekʼãrẽ mejãcha erbakĩrãbʉ ʉ̃rʉ krĩchabʉba, krĩchada ẽ biga diaita ãya ne erbʉ kʼarea. Dayirãta namabema ẽbẽra kĩrãkʼapanʉbʉrʉ, yiwidʼibʉrʉdera bari Jeowabʉrʉ widibayi biga dia ẽã. Mawũã berabari ẽ marẽãra dayirãbara zarea oibara biga diaita Jeowaʼa iya dayirã nekʼãrẽ bia diabʉ kʼarea (Luc. 6:45).

10. ¿Sãwũã biga diaiba kʼarebasi mebẽã aba bedʼea zroma awuantaita? (Akʉra potota).

¹⁰ Dayirãba biga dia kʼawuabʉba kʼãrẽ bedʼea zromara zarea awuantaseabʉ. Akʉra mebẽã Kyung-sook berabaridata, iyi nebʉrara bʉ La Atalaya 15 enero, 2015de. Iyira barisi potode kanserba. Iya jarasi: «Mʉ̃ kʼãwũã kayada kʼarea mejãcha krĩcha zroma osi akʉza krĩchasi mʉ̃ bebʉra mamapai taʉdogota, maʉ̃ba mejãcha perabasi». ¿Iyira kʼãrẽba kʼarebasi iyi mawũãbʉ awuantaita? Diamasi iyi kʼãĩ nãã de ʉ̃tre wãbasi Jeowaʼa biga diaita nekʼãrẽ juesoma berabarida ʉ̃rʉ maʉ̃ ewaride. Maʉ̃ba iyira aduʼa babibasi akʉza Jeowa kãgabʉta ũdubibasi. Iya ũdusi sãwũã Jeowaba so zarea diabʉta iyiʉ̃me kʼẽrẽpapanʉrãra, mawũã bedʼea zromata awuantamarẽã, adewara iyara ũdusi audre nebia ũdubʉta bedʼea zromaira. Dayirãbida Kyung-sookde kĩrãkʼa nekʼãrẽ mejãchabʉ Jeowaʼa biga diaita bedʼea zroma erpanʉmina. Jeowaʼa biga diaiba kʼarebaseabʉ bedʼea zroma awuantaita akʉza aduʼa bʼaita.

11. ¿Kʼãrẽa Jesu kʼaidubemarabara Jesu ʉ̃ta wãna tẽã nesidabasi zowaĩnĩgʉata?

¹¹ Jeowa widira zowaĩnĩgʉata Daizeze bedʼea jaradiaita. Akʉza Jesuba iyi ʉ̃ta wãi naena, iyi kʼaidupanʉra kĩrãbebisi iyi ʉ̃rʉ jaradiadaibarata «Jerusalénʼne, Judeaza jõmaʉ̃nẽ adewara Samariade akʉza wawara naʉ̃ drʉa jõmaʉ̃nẽ» (Hech. 1:8; Luc. 24:46-48). Maʉ̃ tẽã religionebema zeri ẽãraba jidasida Pedrota Juanʼʉ̃me, mõbe edesida Sanedrín nãã, mama jarasida Juanʼa akʉza Pedroʼa Daizeze Bedʼeata wua jaradiada ẽ bamarẽã. Maʉ̃ta ora beadaita jarasida (Hech. 4:18, 21). Maʉ̃ba Juanta Pedroʉ̃mera, ¿kʼãrẽta osida?

12. Hechos 4:29, 31ba jarabʉdera, ¿Jesu kʼaidupanʉrabara kʼãrẽta osida?

¹² Pedroba Juanʼʉ̃meba nokʼora religion jarasida «Daizezema bigabʉrʉ maraba jarabʉta ũrĩta Daizezeba jarabʉ ũrĩ kaude, marabʉrʉ kʼawua oidua. Mamina daiba ũdudapeadata akʉza ũrĩnapeadata jara ẽãranʉma ẽ bayi» (Hech. 4:19, 20). Pedrota Juanʼʉ̃me ãĩ bʉesidade karseldeba, wuabemara Jesu kʼaidupanʉrãra Jeowaʼa yiwidʼisida, naʉ̃ta jarasida: «Dai bʉ nezokʼarãã wãniguata dedʼekarua wãnigua jaradʼaita bʉ bedʼeata». Jeowabara ãyi mawũã yiwidʼidara ũrĩsi (akʉra Hechos 4:29, 31).

13. ¿Jin-hyuk yizadebara kʼãrẽta kʼawuaseapanʉ?

¹³ Dayirãbida abarika oseabʉ Jesu kʼaidupananaraba oda kĩrãkʼa, nokʼoraba dayirã jarabʉrʉde wua jaradia ẽ bamarẽã Daizeze Bedʼea ʉ̃rʉ. Atia ũrĩnaña mebẽã Jin-hyuk nebʉrata. Iyira karselʼeda bʉesida Jeowaʉ̃me kʼẽrẽpabasi baera, iyaʼa jarasida mama wuabemara karseldebʉrata akʉmarẽã. Iyaʼa jarasida Daizeze Bedʼeata mama jaradia ẽ bamarẽã, awuarabʉrʉ jarasida maʉ̃ trajota jʉ̃zaba omarẽã. Aramaʉ̃ta Jin-hyukʼra Jeowaʼa yiwidʼisi iya jaradiaseabʉde jaradiabimarẽã (Hech. 5:29). Iya jarabʉ: «Jeowabara ũrĩsi mʉ̃ yiwidʼira, mamabema karseldebema mama 5 minutobayeda jaradiabasi puertaya, maʉ̃ tẽã diamasi iya kartata bʉbasi mamabema karseldebema maʉ̃ dedekʼaita». Dayirãbida abarika Jin-hyukba oda kĩrãkʼa oseapanʉ, Jeowaʼa widiseapanʉ diamarẽã buru biata akʉza wãrĩnu ĩjãita Jeowaba kʼarebaita iyi bedʼea jaradiabʉde.

14. ¿Kʼãrẽba kʼarebaseabʉ bedʼea zroma awuantaita? (Salmo 37:3, 5).

¹⁴ Jeowa kʼarebata widira, mawũã bedʼea zroma awuantaita. Dayirã mejãchaʉta kayabʉ, mawũã ẽ bʉrʉ sopʉabʉ, dayirãba ũduseabʉ bedʼea zromata dayirã mebẽrãne, dayirã pẽwãbʉda kʼarea, mawũã ẽ bʉrʉ badu bedʼea zromata. Pandemiaba akʉza yõba audre zarea babiseabʉ bedʼea zroma awuantaita. Jõma Jeowaʼa jarada bʉ sopʉabʉra, bʉa bʉ neũdukʼawuara jarai kĩrãkʼa akʉza sãwũã sentibʉta, wãrĩnu ĩjãra Jeowaba kʼarebaita bʉ bedʼea zroma ũdubʉrʉdera (akʉra Salmo 37:3, 5).

15. ¿Sãwũã yiwidʼiba kʼarebaseabʉ bedʼea zroma awuantaita? Yiza aba jara ũrĩbira.

¹⁵ Dayirã Jeowa mejãcha yiwidʼibʉdeba kʼarebabʉ bedʼea zroma awuantaita (Rom. 12:12). Jeowabara kʼawuachu kʼãrẽ berabarinʉmʉra iyi odepanʉrãra, Jeowaba «ũrĩñi kʼareba widibʉ bedʼeara» (Sal. 145:18, 19). Mebẽã Kristie 29 poaga chu, iyira yi nãã edebari. Iya wãrĩnu ũdusi naʉ̃ bedʼeara wãrĩnuta, iyira kaya jʉ̃drʉsi mawũã kaya jʉ̃drʉbʉrʉba iyi kaya kʼarea mejãcha sopʉa besi, maʉ̃ tẽã iya kʼawuasi iyi papara kayasita kanserba. Kristieba jarabʉ: «Mʉ̃ra Jeowaʼa mejãcha yiwidʼisi zarea diamarẽã maʉ̃ bedʼea zroma ewariza awuantaita, zarea osi Jeowade idubʉ ẽ baita, wãbasi ãba yi jʉrebarieda akʉza mʉ̃yidobaʉba Daizeze Bedʼea akʉbasi. Mʉ̃ yiwidʼibadaba kʼarebasi bedʼea zroma awuantaita, mʉ̃a kʼawuabasi Jeowara mʉ̃ kʼawabʉta, maʉ̃ba mʉ̃ra mejãcha so zareata diasi. Jeowaba mʉ̃ bedʼea zromara waña taʉbi ẽ basimina diasi mʉ̃ so aduʼa bʼaita». Jipa kĩrãduada ẽ baibara «Jeowabara ẽdrʉbikaʉ ẽbẽrarã iyaʼa wawia ũdubibʉra» (2 Ped. 2:9).

16. ¿Kʼãrẽa nesidapanʉ dayirãbara Jeowa kʼarebara?

¹⁶ Jeowa kʼarebata widira nemitia obi ẽ marẽã. Dayirã jõmaʉ̃ta nekayirua omia baera yõibara dayi krĩcha mitiaʉ̃me nekayirua oẽ baita. Diarubara nekʼãrẽ baduta obʉ dayirã maʉ̃ krĩcha mitia zebʉa edebimarẽã. Maʉ̃ranebemara kãgabʉ omarẽã jemene Jeowaba kãga ẽãta, maʉ̃ra jemene kayiruaba dayi sota ãrĩseabʉ akʉza dayi krĩchata, maʉ̃ba nemitiata obiseabʉ (Mar. 7:21-23; Sant. 1:14, 15).

17. Jeowa yiwidʼibʉde kʼareba widida tẽã, ¿kʼãrẽta oibara? (Akʉra potota).

¹⁷ Dayirãba nekayiruata oamapanʉbʉrʉ nesidapanʉ Jeowa kʼarebata. Jesuba naʉ̃ta widimarẽã jarasi, iya jaraside: «Eda baebirara kayiruade baebibari krĩchade, awuarabʉrʉ ẽdrʉbira Diaru juwadeba» (Mat. 6:13). Jeowabara dayirãra kʼarebakĩrãbʉ, mamina dayirãba widibara iyaʼa kʼarebata. Dayirãba Jeowaʼa yiwidʼida kĩrãkʼa oibara, zarea oibara akʉ ẽ baita akʉza ũrĩ ẽ baita naʉ̃ drʉaba sãwũã krĩchabʉ ʉ̃rʉ (Sal. 97:10). Daizeze Bedʼea akʉiba, ãba yi jʉrʉbarieda wãiba akʉza jaradia wãiba kʼarebayi bia krĩchaita. Jeowabara obi ẽ dayi baebibari krĩcha zebʉrʉde wuetara (1 Cor. 10:12, 13).

18. ¿Yiwidʼibʉrʉdera kʼãrẽta odaibara?

¹⁸ Dayirãba nesidabʉ mejãcha Jeowa yiwidʼita iyiʉ̃me kʼẽrẽpa bʼaita, naʉ̃ ewari kʼãwũã jõbodoarebida baera. Ewari jʉrʉibara soiduba yiwidʼita. Jeowabara kãgabʉ «iyi daidu [zarrabimarẽã dayirã] sora» (Sal. 62:8). Jeowa yiwidʼibʉrʉde jaraibara iya kʼãrẽ nebia erbʉta akʉza biga diaibara. Widira zowaĩnĩgʉa erbaita jaradia wãbʉrʉde, widira bedʼea zroma awuantaita akʉza eda baebibari krĩchade wãbi ẽ baita, iduaribirãra mia kʼaiʼa Jeowa yiwidʼita iduaribita. Mamina, ¿Jeowabara sãwũã panʉbʉ dayirã yiwidʼira? Wuarebema artikulode naʉ̃ ʉ̃rʉ kʼawuadayi.