Abril

Ẽbẽra nããbema Jeowa odebadasida bedʼea zroma ũdusi ãya jʉ̃ãna ẽãne. Bari jaraita akʉdaya Jacob ʉ̃rʉ. Jacob zezeba jarasi Labánʼinʉ wãmarẽã, Labán kaume mia kʼãĩmarẽã, ãyisida Daizeze ʉ̃rʉ ĩjãbasi baera. Akʉza jarasi iya mawũã ora, Jeowabara iyaʼa mejãcha nebia diaita (Gén. 28:​1-4). Aramaʉ̃ta Jacobʼbara osi yi zezeba zokʼada kĩrãkʼa, Canaánʼneba wãsi Labánma. Iyara kau ũme erbasi Leata akʉza Raquelta. Mamina Jacobʼbara kãgasi yi tẽãbemata Raquelta, maʉ̃ kʼarea Labánʼʉ̃me bedʼeasi yi kaume juwa jidai nãã 7 poagabayeda trajaita (Gén. 29:18). Mamina mawũã berabari ẽ basi, Labánbara sewasi yi kau nããbema Leaʉ̃me juwa jidamarẽã. Mawũã berabaridata Labánbara semana aba berabaribʉrʉde yi kau Raquelʼʉ̃me juwa jidabisi. Mamina maʉ̃ kʼarea jarasi awuru 7 poaga trajamarẽã iyiʉ̃me (Gén. 29:​26, 27). Akʉza Labánbara Jacobʼra trajodebida sewasi, mawũã sewabʉta 20 poagabasi (Gén. 31:​41, 42). w23.04 15 parr. 5

¿Kʼaita jʉrʉseabʉ dayirãbara sopʉabidadera akʉza ũrãgʼa diamarẽãbʉdera? Dayirãra Jeowaʼa yiwidʼiseapanʉ, iya jarabʉ mawũã opanamarẽã akʉza iya jarabʉ dayirãra badua yiwidʼipanamarẽã (1 Tes. 5:17). Dayirãbara Jeowara orraseapanʉ kʼãrẽ krĩcha ẽã akʉza dayirãba nekʼãrẽ opanʉne widiseapanʉ kʼarebamarẽã maʉ̃ta bia oita (Prov. 3:​5, 6). Jeowabara dayirã jara ẽ kʼãrẽ ewaridebʉrʉ yiwidʼibarata, kãgabʉ dayirãra iyiʉ̃me ewariza bedʼea bamarẽã. Jesubara kʼawuabasi Jeowaitara yibiata yiwidʼi bʼaira. Jesu nama egoro eda zei naweda, iya akʉbasi yi Zeze Jeowabara panʉbasita ẽbẽrarã iyi ode kʼẽrẽpabʉ bedʼeara. Bari jaraita, Jesura Jeowa kʼawabasi Ana, David, Elías akʉza wuabemaraba yiwidʼibʉta yi Zezeba panʉside (1 Sam. 1:​10, 11, 20; 1 Rey. 19:​4-6; Sal. 32:5). Jesubara iyi kʼaidubemara jaradiasi, ãya Jeowa widipanʉra wãrĩnu ĩjãnamarẽã Jeowaba ũrĩta akʉza jaradiasi Jeowaʉ̃me badua bedʼeapanamarẽã (Mat. 7:​7-11). w23.05 2 parr. 1, 3

Sumo saserdote Jehoiadábara Jeowata wawia ũdubibasi. Mawũã ũdubisi Jezabel kau Atalíaba, Judá zokʼaside. Maʉ̃ ẽbẽra wẽrãra, mejãcha zarea barachuasi akʉza iyara jõma bea zokʼasi iyi wũãwũãraneba warrara zebʉrʉra (2 Crón. 22:​10, 11). Jehoás dera Jehoástrʉ beada ẽ basi, Jehoiadá kimaba Jehosabeatba kʼarebasi baera. Maʉ̃ wũãwũãra merasida Jehoiadába yi kimaʉ̃meba, mawũã kʼarebasi Davidʼdeba nokʼo zei badata, maʉ̃ ewaridera Jehoiadára 100 poaga audre basibaibara, iyira zowaĩnĩgʉabʉta ũdubisi akʉza kʼẽrẽpabʉta akʉza iyara wawia ẽ basi Atalíara Jehoás 7 poagabaside Jehoiadábara akʉza kʼẽrẽpabʉta ũdubisi. Maʉ̃ba iyara bia krĩchasi iyita bia wãbasibʉrʉ Jehoásta nokʼo babibasi, Davidʼdeba zedata, mamina iya krĩchabadata aripe berabari ẽ basibʉrʉ, Jehoiadára beikasi. Mamina iya krĩchabadara aripe berabarisi Jeowa kʼarebadeba. w23.06 17 parr. 12, 13

Nokꞌo Nabuconodosorba krĩchaseabasi Danielʼra iyiare ba ẽ basita akʉza maʉ̃ kʼarea beaseabasi, mamina Danielbara zowaĩnĩgʉata ũdubisi, mõbe jarasi iya maʉ̃ bedʼeara. ¿Kʼãrẽba kʼarebasi Danielʼra ewari jõma zowaĩnĩgʉa bʼaita? Iyi warrara wedara Danielbara kʼawuasi yibarira yiza biata (Deut. 6:​6-9). Danielbara biʼia ũdukʼawuabasi Daizezeba 10 bedʼea diadara akʉza ũdukʼawuabasi nekʼãrẽ maʉ̃ Leydebemata, bari jaraita kʼawuabasi iya kʼãrẽta koseabʉta akʉza kʼãrẽta ko ẽ baibarata (Lev. 11:​4-8; Dan. 1:​8, 11-13). Danielba ũdukʼawuabasi Jeowa pʉwʉrʉ sãwũã zebʉrʉta poaga biode akʉza kʼawuabasi kʼãrẽta berabaribasita Jeowaba zokʼabʉta oda ẽ bʉrʉ (Dan. 9:​10, 11). Daniel poaga biobayeda sãwũã berabari zebʉrʉba, ũdubibasi nekʼãrẽ badu berabaribʉrʉbʉsida Jeowaba kʼarebaita akʉza angeleraba (Dan. 2:​19-24; 10:​12, 18, 19). w23.08 3 parr. 5, 6

Rebeca buru biabasi akʉza ewari jõmaʉ̃nẽ zowaĩnĩgʉabʉta ũdubibasi iya nekʼãrẽ jidabʉdeba. Akʉza kʼawuabasi kʼãrẽta oita akʉza sõbede oita (Gén. 24:58; 27:​5-17). Ewari jõmaʉ̃nẽ ũdubisi ũrĩbʉta iyaʼa omarẽã jarapanʉta (Gén. 24:​17, 18, 65). Bʉa Rebecade kĩrãkʼa edabʉta ũdubibʉbʉrʉ akʉza wawiata ũdubibʉbʉrʉ, Jeowaba dayirã nãã bʉebʉra bedʼeata ũrĩñi, mawũãra bʉra yiza biabayi bʉ mebẽrãita akʉza mebẽrã kongregasionebemaraita. Sainʉ oita kʼawuabʉta ũdubibara. Esterbara ũdubisi sainʉ oita kʼawuabʉta. Naʉ̃ba kʼarebasi ʉ̃tabʉta krĩcha ẽ baita. Iyara ũrĩsi yi primo Mardoqueo bedʼeata, mõbe iya jaradade osi (Est. 2:​10, 20, 22). Abarika bʉabida sainʉ oita kʼawuabʉta ũdubiseabʉ ũrãgʼa bia jʉrʉbʉdeba akʉza maʉ̃ daucha obʉdeba (Tito 2:​3-5). Esterbara sainʉ oita kʼawuabʉta ũdubisi nekʼãrẽ awurudeba, iyira biʼiakirasi, mawũãsidu jʉrʉ ẽ basi jõmaʉ̃ba iyitrʉ akʉdamarẽã (Est. 2:​7, 15). w23.12 19, 20 parr. 6-8

Biga ẽ daya kayirua oda ʉ̃rʉ ewari jõmaʉ̃nẽ krĩcha bʼaira, naʉ̃ra nezʉgʉa kĩrãkʼabʉ baera. Daya kayirua odata jarabʉbʉrʉ akʉza soiduba jẽda krĩchabʉbʉrʉ, adewara maʉ̃ta wua oẽ bʉrʉ Jeowabara dayirã kayiruara kĩrãduayi (Hech. 3:19). Naʉ̃ jõma oda tẽãra Jeowabara kãga ẽ dayirã waidide sopʉa bamarẽã daya oda kʼarea. Iya kʼawuabʉ baera naʉ̃ra jipade yibia ẽãta dayirãitara (Sal. 31:10). Dayirãta aukʼara sopʉapanʉbʉrʉ dayirãba oda kʼarea ãĩ wãseapanʉ Jeowa odeba (2 Cor. 2:7). Bʉa kayirua oda kʼarea aukʼara krĩcha zroma obʉbʉrʉ kĩrãbera Jeowabara kĩrãduabʉta dayirã kayiruara (Sal. 130:4). Jeowaba dayirã kayirua kĩrãduabʉrʉdera dayirã naʉ̃ta jarabʉrʉ kĩrãkʼabʉ: «Jẽda kĩrãbe ẽ bayi ãyi kayiruara» (Jer. 31:34). Naʉ̃ba jarakĩrãbʉ bʉa kayirua nãã odara Jeowabara jẽda kĩrãbe ẽ baita. Bʉyikʉzaʉ̃me kĩrʉrãra bʉa kayirua oda kʼarea pribilegio nãã erbadata aduasibʉrʉ, Jeowabara bʉa kayirua oda ʉ̃rʉ krĩcha ẽ baera bʉabida krĩcha ẽ baibara. w23.08 30, 31 parr. 14, 15

COVID-19nʉmaside mejãcha jarasida sewa nebʉrata maʉ̃ ʉ̃rʉ. Mamina Jeowa ʉ̃rʉ Kʼawuabipanʉrãbara Jeowa organizasionba zokʼabʉta ũrĩsida baera krĩcha zroma oda ẽ basi yi sewabida ẽ basi baera (Mat. 24:45). Dayirãbara oibara yi audre yibiata (Filip. 1:​9, 10). Dayirãta jʉra kʼawuapanʉ ẽ bʉrʉ, nekʼãrẽ mejãcha obʉba dayirã ewari bia zokʼaibadasida aduaseabʉ. Bari jaraita, jemeneiba, nekoiba, kʼãrẽ doiba, dayirã ewarira bari ewarade aduabiseabʉ maʉ̃ oita dayirãita audre yibia kĩrãkʼabʉbʉrʉ (Luc. 21:​34, 35). Ewariza akʉpanʉ politikorãra sãwũã ãyirainʉ yi bedʼeakapanʉta, maʉ̃raba jarabʉta akʉbʉde ewari adua ẽ baibara. Dayirãta jʉra kʼawuapanʉ ẽ bʉrʉ dayi sode ãyiare bʼaita krĩchaseabʉ. Diarubara nekĩrã bio zokʼabʉ dayirãta Jeowaʉ̃me kʼẽrẽpa ba ẽ marẽã. w23.07 16, 17 parr. 12, 13

Jeowa pʉwʉrʉitara Jesu beida jẽda kĩrãbei ewaritrʉ audre yibia. Jesubara jarasi naʉ̃ ewaritrʉ abapai jẽda kĩrãbeibarata (Luc. 22:​19, 20). Naʉ̃ba kʼarebabʉ krĩchaita sãwũã biga diaita Jesuʼa iyi dayirãbari beida kʼarea (2 Cor. 5:​14, 15). Adewara kʼarebabʉ mebẽrãʉ̃me yi ũdubʉrʉde dayirãi so zarea diaita (Rom. 1:12). Akʉza ẽbẽra mejãchaʉta jʉ̃ẽpanʉ Jesu beida jẽda kĩrãbeima, ãyira kĩrãmigabʉ maʉ̃ ewaride dayirãba kʼãrẽ opanʉ kʼarea. Maʉ̃ kʼarea audre kʼawuakĩrãpanʉ Jeowa ʉ̃rʉ. Akʉzade mejãcha sobiapanʉ naʉ̃ ewaridera mebẽrãbawara yi ũdui baera, naʉ̃ nekʼãrẽ jõmaʉ̃ kʼarea, jipade yibia Jesu beida jẽda kĩrãbeira. w24.01 8 parr. 1-3

Dayirãba audre krĩchapanʉbʉrʉ Jeowaba akʉza Jesuʉ̃meba dayirã kʼarea kʼãrẽ oda ʉ̃rʉ, ũdudayi ãyara dayirãra wãrĩnu kãgata (Gál. 2:20). Jeowabara yi warrara zokʼasi ũdubita iya dayirãra wãrĩnu kãgata. Jeowaba iyi kãgara ũdubisi diaside iya audre kãgabʉta dayirãbari: Jesuta. Jeowaba iduaribisi iyi warrata zʉbʉriamarẽã akʉza beimarẽã dayirãbari. Jeowabara iyi kãgara dayirãra bari ũdubibʉ ẽ, awuarabʉrʉ jarabʉ kʼãrẽaba kãgata dayirãra (Jer. 31:3). Jeowabara dayirãra iyima wesi kãga baera (naʉ̃ testoʉ̃me akʉra Deuteronomio 7:​7, 8). Dayirãra nekʼãrẽ baduba jĩga babi ẽ bayi Jeowa kãgadebara (Rom. 8:​38, 39). ¿Bʉra sãwũã sentibʉ maʉ̃ kʼareara? w24.01 28 parr. 10, 11

Kristianora ʉ̃ta wãirabara maʉ̃ta jʉ̃ãpanʉ. Maʉ̃nebema abara mebẽã Frederick Franz. Maʉ̃ mebẽãba iya nebia jʉ̃ãbʉ ʉ̃rʉ naʉ̃ta jarasi: «Daiba nebia jʉ̃ãpanʉra, wãrĩnu berabariyi. Yi 144.000debemara jõmaʉ̃ba ũdudayi maʉ̃ra». 1991ne mebẽã Franzba jarasi ãya nebia jʉ̃ãbʉ aripe berabarimarẽãra poaga bio berabaribaramina jʉ̃ãita, maʉ̃ ũduira jipade yibia bʼai baera. Dayirãba nebia jʉ̃ãbʉra ʉ̃tʉ ũduimina, mawũã ẽ bʉrʉ nama egorode ũduimina, jõmaʉ̃ta sobiapanʉ maʉ̃ nebia kʼarea. Akʉza dayirãba nebia jʉ̃ãbʉra audre zarea erpanaseabʉ. w23.12 9 parr. 6; 10 parr. 8

Tabernakuloidu jʉ̃ẽi nãã basi altarta, nama nedʉwʉrʉrata beapanasi Jeowaʼa sakripisio diaita (Éx. 27:​1, 2; 40:29). Mamina ãya maʉ̃ra sakripisio diabʉba ãyi kayiruara ewari jõmaʉnẽ kĩrãdua ẽ baibasi (Heb. 10:​1-3). Maʉ̃ra sakripisiora nrʉemaza obʉba ũdubisi israelitara ãyara nesidabasita sakripisio audre yi zromata mawũã ãyi kayirua jipade kĩrãduamarẽã. Jesubara kʼawuabasi iyira Jeowabara zokʼasita nama egoroeda iyi bebʉta diamarẽã ẽbẽrarã jõmaʉ̃bari, mawũã ãyi kayirua kĩrãduaita (Mat. 20:28). Maʉ̃ kʼarea Jesura buru kʼoesi Jeowaba kãgabʉ oita (Juan 6:38; Gál. 1:4). Jesura beima abapai beisi, wua bei ẽ basi iyira, mawũã ẽbẽrarã iyi ʉ̃rʉ ĩjãpanʉrãta ewari jõmaʉ̃nẽ panamarẽã (Heb. 10:​5-7, 10). w23.10 26, 27 parr. 10, 11

Dayirãkʉzara ẽdrʉbe ẽ bakasi kayiruadeba akʉza beideba (Sal. 49:​7, 8). Maʉ̃ kʼarea Jeowabara iyi Warrata zokʼa bʉesi dayirãbari beimarẽã. Ãyi ũmeba nekʼãrẽ biata osida dayirãbari. Krĩchapanʉbʉrʉ ãya dayirã kʼarea kʼãrẽ oda ʉ̃rʉ, ũdudayi kʼãrẽaba yibiabasita ãya odara. Adánba nemitia oda tẽãra aduasi ewari jõmaʉ̃nẽ bʼaita, naʉ̃ra iyi abapaiba adua ẽ basi, awuarabʉrʉ iyideba zebʉrabida aduasida. Adánba maʉ̃ aduada jẽda erbaira Jesuba iyi bebʉta diasi. Akʉza egorode basidera «iyira kayirua oẽ basi, akʉza sewa nebʉrʉ okabasi» (1 Ped. 2:22). Iyira kayirua okabasi Adán nãã bada kĩrãkʼa, maʉ̃ba Jesubara iyi bebʉdeba pagaseabasi Adánba aduada jẽda erbaita (1 Cor. 15:45; 1 Tim. 2:6). w24.01 10 parr. 5, 6

Jeowaba jẽda piradrʉbida tẽã ʉ̃ta wãsi Jesura, maʉ̃ba iyira Santisimoinʉ jʉ̃ẽbʉrʉ kĩrãkʼasi. Jeowaba nekʼãrẽ osi dayiraba iyita orradamarẽa yi Warra beidadeba maʉ̃ra jipa yibia. Sumo saserdotera eda wãbasi Santisimoinʉ nedʉwʉrʉra waeda. Akʉza yi tabernakulora ẽbẽrarãba parãnabasi, mamina Jesura jʉ̃ẽsi audre Santisimoinʉ Jeowa kĩrãbita, mama erjʉ̃ẽsi iyi wata, mawũã kĩrãduamarẽã dayirã nemitiata (Heb. 9:, 24-26). Ẽbẽrarã yi ʉ̃ta wãiba akʉza nama egorode bʼaiba Jeowara orraseapanʉ iyi templo espiritualde. w23.10 28 parr. 13, 14

Jesura ʉ̃tʉbʉ akʉza Sumo Saserdote. Iyideba dayirãra Jeowa kʼawa baseapanʉ yiwidʼibʉde akʉza Jeowaba kʼarebaseabʉ dayirãra dayirãba nesidabʉde (Heb. 4:​14,15). Ewariza krĩchadaibara ãya dayirã kʼarea nekʼãrẽ opanʉ ʉ̃rʉ. Ãya dayirãʼa mejãcha kãga ũdubipanʉ baera nekʼãrẽ jõma okĩrã oibara (2 Cor. 5:​14, 15). Biga diabʉta ũdubipanʉ ẽbẽrarã jaradiapanʉne akʉza kʼarebapanʉne ãyisida Jeowa ʉ̃rʉ Kʼawuabipanʉrã bamarẽã (Mat. 28:​19, 20). Pabloba maʉ̃ta osi, iya kʼawuabasi Jeowaba naʉ̃ta kãgabʉta: «Jõmaʉ̃ba kʼawuadamarẽã wãrĩnuta akʉza ẽbẽra jõmaʉ̃ta ẽdrʉmarẽã» (1 Tim. 2:​3, 4). w23.10 22, 23 parr. 13, 14

Dayirãba ẽbẽrarã ẽjũã bia ʉ̃rʉ jaradiabʉrʉdera, naʉ̃ testota jara ũrĩbipanʉ. ¿Sãwũã kʼarebaseapanʉ ẽbẽrarãbida wãrĩnu ĩjãnamarẽã Apocalipsis 21:​3, 4ba jarabʉra wãrĩnu berabarita? Jeowabara bari jara ẽ basi naʉ̃ nebiata diaita, awuarabʉrʉ nei jarasi mawũã dayirãba audre ĩjãmarẽã iyi ʉ̃rʉ. Naʉ̃ra bersikuloraba kʼarebayi dayirãba wãrĩnu ĩjãmarẽã Jeowaba nebia weyi abʉ ʉ̃rʉ. Jarabʉ: «Bʉguede jewedabʉba mawũãsi: ‹Akʉra, mʉ̃ara nekʼãrẽ jõma yiwidi babinʉmʉ›. Akʉza jarasi: ‹Bʉra naʉ̃ bedʼearata, kʼẽrẽpabʉ baera akʉza wãrĩnu baera›. Iya mʉ̃aʼa jarasi: ‹Maʉ̃ra wãrĩnu berabarisi. Mʉ̃ra Alfa akʉza yi Omega, yi jʉ̃drʉdata akʉza yi jõbibʉta›» (Apoc. 21:​5, 6a). w23.11 3 parr. 3-5

Kʉ̃rabara Jeowa kĩrãkʼa krĩchabʉta ũdubibʉ iyi sãwũã wua jʉ̃bʉdeba akʉza bʉda sãwũã tʉbʉdeba. Ẽbẽrarã wua parãpanʉrabara krĩchada ẽ Jeowaba kʼãrẽ krĩchabʉta akʉza wawia ũdubida ẽ Jeowaʼa akʉza parãpanʉ wua jʉ̃ẽbaribʉta akʉza maʉ̃ra wuabara yumakẽrãra yuwẽrã kĩrãkʼa ũdubibʉ. Kʉ̃ra abaʉba Jesude kĩrãkʼa okĩrãbʉbʉrʉ oyi Daizeze Bedʼeaba jarabʉde akʉza yiza biata ũduyi kongregasione (1 Cor. 10:​31-33). Jeowaba akʉza mebẽrã kongregasionebemarabara wawia ũdubidayi kʉ̃ra abaʉba kĩrãkita krĩcha kʼawuabʉta ũdubibʉbʉrʉ. w23.12 26 parr. 7

Naweda basidebida, nokʼo surdebemabara Daizeze pʉwʉrʉra pẽwã zebʉrʉ (Dan. 11:40). Ʉ̃kʉrʉ mebẽrãra karselde eda ibalbʉesida akʉza ʉ̃kʉrʉ warrarata kolegiodeba ãĩ bʉesida kʼaiare ba ẽ basi baera. Mamina idi ewade mebẽrãbara ũdubibara Jeowa Nokʼoarepanʉta. Bari jaradaita, ẽbẽrarãba jidabʉrʉde kʼai nokʼo bʼaita, mebẽrãba krĩchaseabʉ kʼaiare bʼaita ãyi sode. ¿Dayirãbara sãwũã daya krĩchabʉdeba akʉza daya obʉdeba ũdubibara kʼaiarebʉ ẽãta? (Juan 15:​18, 19). w23.08 12 parr. 17

Dayirã ewari jõmaʉ̃nẽ bʼaita zarea odaibara wẽba takeraita mainʉ jʉ̃ẽñena (1 Cor. 9:24). Jesuba naʉ̃ ũrãgʼata diasi: «Mayi soba krĩchabʉde panaraidua, aukʼara nekopanaraidua akʉza ituaba bei panaraidua, naʉ̃ ẽjũãnẽbʉta krĩcha panaraidua» (Luc. 21:34). Naʉ̃ ũrãgʼaba akʉza awururaba kʼarebayi bʉa kʼawuaita kʼãrẽta oibarata wẽba takeraita (Is. 40:​29-31). Maʉ̃ kʼarea pikãga wẽbaraidua awuarabʉrʉ Pablode kĩrãkʼa oidua. Iyira wẽbasi nebia ũduyeda (Filip. 3:​13, 14). Mia abaʉta wẽba ẽ bayi bʉbarira, mamina Jeowa kʼarebadeba bʉra wẽba takeraseabʉ. Jeowaba kʼarebayi zʉgʉara bʉa atʉibarata bia edemarẽã akʉza bʉa ãĩ bʉeibarata ãĩ bʉemarẽã. w23.08 31 parr. 16, 17

Jesu 12 poagabaside wãsi Jerusalénʼena iyi yibarira kʼaidu (Luc. 2:​46-52). Mamina ãyi jẽda urudera yi yibarirabara kʼawua ẽ basi Jesura ãyi kʼaidu ze ẽ basita. Joséba Maríaʉ̃mebara ãyi wũãwũãra ãba jʉre erbaibarabasi deda wãi nãã. Maríaba Jesu ũdusidera kʼẽãsi, mamina Jesubara iyaʼa kĩrʉ panʉ ẽ basi, awuarabʉrʉ wawiata ũdubisi. Joséba Maríaʉ̃meba bia ũrĩ ẽ basimina Jesuba ãyaʼa kʼãrẽta jarakĩrãbadata, mawũãsidu Jesubara ãya jarabʉta obasi. Warrara, ¿maraitara zareka ũrĩta mara yibariraba nekʼãrẽ aña obʉde, mawũã ẽ bʉrʉ ãya ũrĩ ẽãne kʼãrẽta jarakĩrãbʉta? ¿Kʼãrẽba kʼarebaseabʉ? Krĩchara Jeowa sãwũã sentibʉta. Daizeze Bedʼeaba jarabʉ bʉa bʉ yibarira bedʼeata ũrĩbʉbʉrʉ Daizezeta sobiabibʉta (Col. 3:20). Jeowaba kʼawuabʉ edaʉde bʉ yibarirabara ũrĩ ẽãta bʉa kʼãrẽta jarakĩrãbʉra, mawũã ẽ bʉrʉ, ãya nekʼãrẽ omarẽã jarabʉra bʉma biga ẽãta. Mamina bʉa ãya jarabʉta ũrĩbʉbʉrʉ naʉ̃ba sobiabibʉ Jeowata. w23.10 7 parr. 5, 6

Bʉme ãba estudiabʉba jarara Jeowa ʉ̃rʉ Kʼawuabipanʉrãba abari yumakẽrã, mawũã ẽ bʉrʉ abari yuwẽrãra ãba kʼãĩ ʉ̃rʉ krĩchabʉra awuara krĩchaibarata. Maʉ̃nera dubidaibara dayirãbara ẽbẽrarã jõmaʉ̃ta kãgapanʉta akʉza wawia ũdubipanʉta ãya sãwũã krĩchabʉra (1 Ped. 2:17). Akʉza jara ũrĩbidaibara kʼãrẽa yibiata Daizeze Bedʼeaba jarabʉ oita. Ẽbẽra abaʉba dayirãba krĩchabʉ kĩrãkʼa krĩcha ẽ bʉrʉ, jara ẽ baibara dayirãbara kʼawuabʉta kʼãrẽa mawũã krĩchabʉta iya. Bari jaraita, bʉme ãba estudiabʉba jarara Daizeze ʉ̃rʉ ĩjãira jipade yibia ẽãta, maʉ̃nera bʉara krĩchaseabʉ iyara maʉ̃ta jarabʉta ĩjãbʉ baera nekʼãrẽ naʉ̃ drʉadebʉra iyidoba zesita. Mamina bʉa biʼia krĩchara kʼawuayi iyara mawũã jarabʉta wuabemaraba jarabʉ kʼarea, maʉ̃ kʼarea jarara jw.org de jʉrʉmarẽã bedʼea naʉ̃ ʉ̃rʉ bedʼeabʉta. Bʉa mawũã ora iyira bedʼeakĩrãñi bʉme iya kʼãrẽ ũduda ʉ̃rʉ kartarane mawũã ẽ bʉrʉ bideorane. Dayirãba ibiade panʉbʉbʉrʉ naʉ̃ba kʼarebayi ẽbẽrarãba awuara krĩchamarẽã. w23.09 17 parr. 12, 13

Dayirãba kayirua oda kʼarea wãrĩnu jẽda krĩchapanʉbʉrʉ ĩjãseapanʉ Jeowabara dayirãra kʼarebaita akʉza jẽda zokʼaita iya kãgabʉta omarẽã (Prov. 28:13). Sansónʼra nemitia omiabasi akʉza Dalilaʉ̃me kayirua osi, mawũãsidu idubʉ ẽ basi Jeowaba kãgabʉ oita. Akʉza Jeowaba Sansónʼa jẽda diasi nekʼãrẽ oita. Jeowabara krĩchabasi Sansónʼra kʼẽrẽpabʉta maʉ̃ kʼarea iyi trʉ̃ra bʉbisi Hebreos yi zroma 11de. Jipade yibia dayirã Jeowaita trajaira, iyira Zeze bia baera so zarea diakĩrãbʉ dayirã akʉza audre diakĩrãbʉ dayirã sopʉapanʉne. Maʉ̃ kʼarea Sansónʼne kĩrãkʼa Jeowaʼa jaraibara: «Mʉ̃ bia okʼãrãpe mʉ̃ta kĩrãbera [ . . . ] mʉ̃aʼa zarea diara» (Juec. 16:28). w23.09 7 parr. 18, 19

Dayirãba bia kʼawuapanʉbʉrʉ Jeowa ewari zei ʉ̃rʉ, naʉ̃ba kʼarebayi wuabemara maʉ̃ ʉ̃rʉ jaradiakĩrãita. Mawũãsidu edaʉde dayirãra peraseabʉ wuabemara bedʼeaita. ¿Kʼãrẽa? Perapanʉ baera wuabemara kʼarea. Dayirãsida Pedro kĩrãkʼa berabariseabʉ. Iyira wuabemara kʼarea perasi baera jara ẽ basi Jesu kʼaidubemata akʉza jarasi iyara Jesura ũdukata (Mat. 26:​69-75). Mamina tẽã Pedrora pera ẽbasi (1 Ped. 3:14). Mawũẽra ¿Kʼãrẽba kʼarebaseabʉ wuabemara kʼarea pera ẽ baita? Pedroba naʉ̃ta jarabʉ: «Wawiara Kristota Yibari kĩrãkʼa mara sode» (1 Ped. 3:15). Maʉ̃itara kĩrãbedaibara Jesuba atia kʼãrẽta onʉmʉta akʉza kʼãrẽaba zarea barabʉta. w23.09 27, 28 parr. 6-8

Dayirãra jʉra kʼawuabaibara kayirua oẽ baita (Efes. 5:11). Ẽbẽra abaʉba akʉbʉbʉrʉ, ũrĩbʉbʉrʉ akʉza mia erkʼãĩ ʉ̃rʉ bedʼeabʉbʉrʉ, naʉ̃ba kayirua obiseabʉ (Gén. 3:6; Sant. 1:​14, 15). Naʉ̃ drʉa Diaruba zokʼabʉbara dayirã krĩchabikĩrãbʉ Jeowaba nekʼãrẽ omarẽã jarabʉra zeri ẽãta (2 Ped. 2:19). Diaruba ẽbẽrarã mawũã sewabʉra dããraba. Iya maʉ̃ta obʉ ẽbẽrarãba kʼawua ẽ marẽã saʉ̃ta bigata akʉza saʉ̃ta zeri ẽãta (Is. 5:20; 2 Cor. 4:4). Maʉ̃ kʼarea telebisorde, internetʼne ũdubibʉ nekʼãrẽ Jeowaba kãga ẽãta. Diaruba kãgabʉ dayirãba krĩchamarẽã ẽbẽrarãba naʉ̃ drʉade obʉra kayirua ẽãta (Efes. 5:6). w24.03 22 parr. 8-10

Tabernakulora de karpa oma kĩrãkʼabasi, maʉ̃ba ãyara ãyi wãma edeseabasi maʉ̃ra. Ãyara mawũã opanʉra 500 poaga berabarisi, mamina tẽã Jerusalénʼne templo osidade wua oda ẽ basi (Éx. 25:​8, 9; Núm. 9:22). Maʉ̃ tabernakulora osida israelitaraba Jeowaʼa mama sakripisio diadamarẽã akʉza Jeowaʼa yiwidʼidamarẽã (Éx. 29:​43-46). Maʉ̃ tabernakulobara ũdubibasi templo espiritual sãwũã bʼaita (Heb. 9:9) Maʉ̃ra jʉ̃drʉsi poaga 29 Kristo ewaride. Maʉ̃ poagade Jesura buru kʼoesi akʉza maʉ̃neba ʉ̃ta iyira sumo saserdote ba jʉ̃drʉsi maʉ̃ templo espiritualde (Heb. 4:14; Hech. 10:​37, 38). w23.10 26 parr. 6, 7

Audre Jeowa kʼawa bʼaira dãyimabʉta oẽ baibaira, nekʼãrẽ awuara oya awa bʼaibara, ¿sãwũã oi maʉ̃ra? Zarea oibara nekʼãrẽ awuara oita dayirã bebʉta awuarabidabʉrʉ akʉza wuabemaraba jarabʉa wawia ũdubibʉde. Dayirãra Jeowa nezokʼa baera daya krĩchabʉta oẽ, eda krĩchabʉta ũdubibʉ akʉza wuabemara so borekea akʉbʉta ũdubibʉ. Daizeze Bedʼeaba jarabʉ Jeowara «Mõgara», iyira zareabarabʉ baera akʉza iduaribi ẽ baera nekʼãrẽ baduba awuara babita (Deut. 32:4). Mamina. Naʉ̃ drʉata awuara wã baera Jeowabida awuara owã, mawũã iya oya adata aripe berabarimarẽã. Akʉza Jeowaba dayirãra iyi kĩrãkʼa parãsi baera, dayirãbida awuara owãseabʉ dayirã bebʉ awuara bʼaimina. Iya dayirã Daizeze Bedʼeadebemata diasi dayirã kʼarebaita bia jida kʼawuamarẽã krĩcha ẽã kʼãrẽ bedʼea zroma ũdubʉrʉde. w23.07 20 parr. 1-3

Daizeze Bedʼeade jara ũrĩbibʉ Jeowara papa kĩrãkʼabʉta (Is. 66:​12, 13). Krĩchara papa abaʉba yi wũãwũã zake bia akʉbʉta akʉza akʉbʉ kʼãrẽta oseabʉta, mawũã iyi bia babita. Dayirãba zʉbʉria ũdubʉrʉde Jeowaba abarika kãga ũdubibʉ dayirã. Dayirãba nekʼãrẽ kayirua obʉrʉdera Jeowabara doba amae ẽ dayirãra (Sal. 103:8). Israel pʉwʉrʉba iyi bedʼea ũrĩ ẽ basimina, Jeowabara iyi kãga jõkata ũdubisi iyi pʉwʉrʉara. Iya naʉ̃ta jarasi ãyi ʉ̃rʉ: «Bʉra mʉ̃ nãã jipa kĩrãwãreãbasi baera, mʉ̃a bʉra bia akʉsi, mʉ̃a kãga bʉra (Is. 43:​4, 5). Jeowaba kãga ũdubibʉra ewari jõmaʉ̃nẽ iyababʉ. Dayirãba kayirua obʉrʉmina jẽda krĩchabʉrʉdera akʉza jẽda Jeowama zebʉrʉdera, iya dayirãʼa kãga ũdubibʉra aribiabayi. Jeowabara biode kĩrãduabʉ baera dayirã kayiruara (Is. 55:7). Daizeze Bedʼeaba jara ũrĩbibʉ dayirã kayirua mawũã kĩrãduabʉrʉdera Jeowaba webʉta sobiadai ewarita (Hech. 3:19). w24.01 26, 27 parr. 4, 5

Dayirãba bedʼea zroma ũdubʉrʉdera Jeowaba kʼarebayi. Bari jaraita, dayirã trajabʉmae ewari widibʉrʉde asambleaeda wãita, mawũã ẽ bʉrʉ ãba yi jʉrebarima wãita. Dayirãba maʉ̃ mawũã obʉrʉdera ũduseapanʉ Jeowaba sãwũã kʼarebabʉta. Dayirãba ũdubʉrʉde Jeowaba sãwũã kʼarebabʉta, naʉ̃ba kʼarebabʉ iyi ʉ̃rʉ audre ĩjãita. Esdrasbara edabʉta ũdubisi Jeowa kʼarebata jʉrʉsideIya nekʼẽrẽ mejãcha oibara kʼarea krĩcha zroma obʉdera Esdrabara Jeowaʼa kʼareba widibasi (Esd. 8:​21-23; 9:​3-5). Esdrasba Jeowa ʉ̃rʉ mejãcha ĩjãbʉta ũdubisi baera yiza biata diasi wuabemara, ãyabida iyide kĩrãkʼa okĩrãpanasi (Esd. 10:​1-4). Abarika dayirãsi krĩcha zroma opanʉbʉrʉ dayirã mebẽrã sãwũã bia akʉi kʼarea, ãyi mawũã aduʼapanamarẽã, mawũã ẽ bʉrʉ krĩcha opanʉbʉrʉ ãya kʼãrẽ nesidabʉ sãwũã diai kʼarea, Jeowaʼa yiwidʼiseapanʉ iya kʼarebamarẽã. w23.11 18 parr. 15-17

Jeowaba jara ẽ basi iya bia akʉira oibarata daucha Abrahánba oda kĩrãkʼa, awuarabʉrʉ soiduba ĩjãbʉta ũdubiseapanʉ nekʼãrẽ awuara awuaraka obʉdeba. Bia edaseapanʉ ʉ̃rabʉrʉ zepanʉrata akʉza kʼarebaseapanʉ mebẽrãta wãrĩnu kʼareba nesidapanʉta akʉza bia edadaibara dayirã mebẽrãta. Mawũã opanʉbʉrʉ Jeowaba bia akʉyi dayirãra akʉza nebiata diayi (Rom. 15:7; 1 Tim. 5:​4, 8; 1 Juan 3:18). Akʉza jaradia wãpanʉne ũdubipanʉ wãrĩnu soiduba ĩjãbʉta (1 Tim. 4:16). Dayirã jõmaʉ̃ba daya nekʼãrẽ obʉdeba ũdubiseapanʉ ĩjãbʉta nekʼãrẽ bia wãrĩnu ʉ̃ra berabari ʉ̃rʉ, mawũã obʉbʉrʉ Jeowaba akʉyi ẽbẽra aripe obʉ kĩrãkʼa akʉza iyi neũdukʼawuabayi. w23.12 2 parr. 3; 6 parr. 15

Iyi beibodoare nokʼo Davidba Salomónʼa jarasi idibema testode jarabʉta (1 Rey. 2:​1,3). Kristianora warraraba naʉ̃ ũrãgʼaba jarabʉta odara jipade yibiabayi, ãyi bia wãira kʼawuaibara kʼãrẽta jarabʉta Daizeze Bedʼeaba akʉza maʉ̃ta oibara (Luc. 2:52). ¿Kʼãrẽa yibia kʉ̃raraba zarea odamarẽã mawũã kristiano bia bʼaita? Kristiano yumakẽrãbara nekʼãrẽ obʉ iyi mebẽrãʉ̃mebʉde akʉza kongregasione. Kʉ̃rarabara krĩchabaribaibara ãya kʼãrẽta okĩrãbʉ ʉ̃rʉ, ãyara krĩchabaribaibara yi nãã edebari bʼaita, zõrãrã kʼarebabari bʼaita, mawũã ẽ bʉrʉ zõrãrã kongregasionebema bʼaita. Ʉ̃kʉrʉra juwa jidakĩrãbʉ akʉza wũãwũã barakĩrãbʉ (Efes. 6:4; 1 Tim. 3:1). Iya maʉ̃ oita akʉza bia wãita nesida kristiano bia bʼaita.w23.12 24 parr. 1, 2

Jeowabara diasi zõrãrã kongregasionebema mebẽrãta akʉmarẽã. Ãyita maʉ̃ oira arigʉ yibia, wãrĩnu ãyara bia akʉbʉ mebẽrãra (Jer. 23:4; 1 Pedro 5:2). Arigʉ sobiapanʉ zõrãrã mawũã panʉta erpanʉ baera kongregasione.Zõrãrã kongregasionebemarabara juez Gedeón yizade kĩrãkʼa oseapanʉ (Heb. 6:12). Gedeónbara akʉbasi Jeowa pʉwʉrʉrãra (Juec. 2:16; 1 Cró. 17:6). Jeowabara abarika Gedeón jidada kĩrãkʼa idibida jidasi zõrãrãta, iyi pʉwʉrʉta akʉmarẽã kʼãwũã bedʼea zroma idi ewade ũdubʉde (Hech. 20:28; 2 Tim. 3:1). Gedeónbara ũdubisi edabʉta krĩchabasita, sainʉ oita kʼawuabʉta ũdubibasi akʉza ũrĩbasi. Idi ewade dayirãbara nekʼãrẽ kʼawuaseapanʉ iya kʼãwũã ũdubidadeba. Dayirã zõrãrãta, zõrãrã ẽãta, zõrãrã biga diabʉta ũdubi kʼawuaibara akʉza kʼarebaibara maʉ̃ra mebẽrã kongregasion akʉbʉrata (Heb. 13:17). w23.06 2 parr. 1; 3 parr. 3