Jeowaba bʉra mejãcha kãga

1. ¿Bʉa Jeowa ʉ̃rʉ ũrĩbʉrʉdera kʼãrẽta krĩchabʉ?

BɄA krĩchabarika, ¿Jeowara sãwũã chu? Bʉ iyaʼa yiwidʼibʉrʉdera ¿kʼãrẽta krĩchabʉ iyi ʉ̃rʉ? Daizeze Bedʼeaba jara ũrĩbibʉ iyi sãwũãbʉta, jarabʉ Jeowara «ũmadaʉ akʉza joudrʉbari kĩrãkʼabʉ». Adewara iyira tʉbʉ pʉrea kĩrãkʼabʉ (Sal. 84:11; Heb. 12:29). Akʉza jarabʉ iyira zafiro mõgara kĩrãkʼabʉta, adewara euma uruyabʉ kĩrãkʼabʉta (Ezeq. 1:​26-28). Edaʉde Jeowa sãwũãbʉ ʉ̃rʉ kʼawuaiba dayirãra kĩrãmiga amaeseabʉ, mawũã ẽ bʉrʉ daʉperaseabʉ.

2. ¿Kʼãrẽa ʉ̃kʉrʉitara zarea baseabʉ Jeowa kʼawa bʼaita?

² Dayirãba Jeowara ũdu ẽ baera, edaʉde zarea baseabʉ ĩjãita iya dayirãra kãgata. Ʉ̃kʉrʉ ẽbẽrarãbara ĩjã ẽ Jeowaba ãyaʼa kãga ũdubira ãyi nãã sãwũã berabarida kʼarea. Neẽ basibaibara kʼaiba kãga ũdubita ãyaʼa. Jeowabara kʼawuabʉ dayirã sãwũã sentibʉra. Maʉ̃ba iya kʼawuabʉ dayirãitara kʼãrẽa zareabʉta iyi kʼawa bʼaita. Adewara iyi Bedʼeadeba dayirã kʼawuabibʉ iyira sãwũãbʉta.

3. ¿Kʼãrẽa krĩchaibara Jeowaba kãga ũdubibʉ ʉ̃rʉ?

³ Jeowara kãga (1 Juan 4:8). Iyara mejãcha kãga ũdubibʉ, maʉ̃ba kãga ũdubibʉ yi ẽbẽrarã iyi odepanʉ ẽãrabida (Mat. 5:​44, 45). Naʉ̃ artikulode audre kʼawuadayi Jeowa ʉ̃rʉ akʉza iya kãga ũdubibʉ ʉ̃rʉ. Dayirãba iyi ʉ̃rʉ audre kʼawuabʉdade audre kãgadayi iyira.

JEOWABARA DAYIRÃRA MEJÃCHA KÃGA

4. ¿Jeowaba kãga ũdubibʉba sãwũã sentibibʉ bʉra? (Akʉra potota).

⁴ Jeowabara so borekea akʉbʉ akʉza so zʉbʉria akʉbʉ (Sant. 5:11). Daizeze Bedʼeade jara ũrĩbibʉ Jeowara papa kĩrãkʼabʉta (Is. 66:​12, 13). Krĩchara papa abaʉba yi wũãwũã zake bia akʉbʉta. Iyara yi wũãwũãra juwade jira edabʉ, mõbe ibiade bedʼeabʉ iyaʼa akʉza iyi jẽgabʉrʉdera akʉbʉ kʼãrẽta oseabʉta, mawũã iyi bia babita. Dayirãba zʉbʉria ũdubʉrʉde Jeowaba abarika kãga ũdubibʉ dayirã. Salmistaba naʉ̃ta bʉsi: «Mʉ̃ mejãcha krĩcha onʉmʉne, bʉa mʉ̃ra so zarea diasi akʉza sobiabisi» (Sal. 94:19).

5. ¿Bʉmara kʼãrẽta jarakĩrãbʉ Jeowa kãga jõkabara?

⁵ Jeowara kʼẽrẽpabʉ (Sal. 103:8). Dayirãba nekʼãrẽ kayirua obʉrʉdera Jeowabara doba amae ẽ dayirãra. Israel pʉwʉrʉba iyi bedʼea ũrĩ ẽ basimina, Jeowabara iyi kãga jõkata ũdubisi iyi pʉwʉrʉara. Iya naʉ̃ta jarasi ãyi ʉ̃rʉ: «Bʉra mʉ̃ dabʉ nãã jipa kĩrãwãreãbasi baera, mʉ̃a bʉra bia akʉsi, mʉ̃a kãga bʉra» (Is. 43:​4, 5). Jeowaba kãga ũdubibʉra ewari jõmaʉ̃nẽ iyababʉ. Dayirãba iyi ʉ̃rʉ ĩjãseapanʉ ewari jõmaʉ̃nẽ. Dayirãba kayirua obʉrʉmina Jeowabara idubʉ ẽ bayi dayirãra. Dayirãba kayirua oda kʼarea jẽda krĩchabʉrʉdera akʉza jẽda Jeowama zebʉrʉdera, iya dayirãʼa kãga ũdubibʉra aribiabayi. Jeowabara biode kĩrãduabʉ baera dayirã kayiruara (Is. 55:7). Daizeze Bedʼeaba jara ũrĩbibʉ dayirã kayirua mawũã kĩrãduabʉrʉdera Jeowaba webʉta sobiadai ewarita (Hech. 3:19).

6. ¿Kʼãrẽta jaradiabʉ Zacarías 2:8​ba Jeowa ʉ̃rʉ?

⁶ (Akʉra Zacarías 2:8). Jeowaba kãga dayirãra. Maʉ̃ba iya kʼawuabʉ dayirã sãwũã sentibʉra akʉza kʼarebakĩrãbʉ. Dayirã zʉbʉriabʉrʉdera iyisida zʉbʉriabʉ. Maʉ̃ba iyaʼa yiwidʼibʉrʉdera jaraseapanʉ dayirãta biʼia akʉmarẽã iyi dabʉ jã akʉbʉ kĩrãkʼa (Sal. 17:8). Dayirã dabʉ jãra jipade bia akʉibara, naʉ̃ta tõbarira pʉ, mawũã ẽ bʉrʉ neida berabariseabʉ. Jeowabara jarabʉ dayirãra iyi dabʉ jã kĩrãkʼabʉta. Maʉ̃ba iya dayirã jarabʉ kĩrãkʼabʉ: «Mara tõbaribʉra mʉ̃ dabʉ jãta tõbaribʉ kĩrãkʼabʉ».

7. ¿Kʼãrẽa nesidapanʉ audre ĩjãita Jeowaba kãga ũdubibʉ ʉ̃rʉ?

⁷ Jeowaba kãgabʉ dayirãba kʼawuadamarẽã iyara dayirã aba abakaʉʼa kãga ũdubibʉta. Mamina iya kʼawuabʉ dayirãitara edaʉde zarea baseabʉta ĩjãita iya dayirã kãgata, dayirã nãã sãwũã berabarida kʼarea. Mawũã ẽ bʉrʉ dayirãba ũduseabʉ bedʼea zromata, maʉ̃ kʼarea zarea baseabʉ ĩjãita Jeowaba dayirã kãga ũdubibʉ ʉ̃rʉ. ¿Kʼãrẽba kʼarebai dayirãba audre ĩjãita? Kʼawuaibara Jeowaba sãwũã kãga ũdubibʉta yi warra Jesuʼa akʉza ʉ̃ta wãira, adewara dayirã.

JEOWABARA SÃWŨÃ ŨDUBIBɄ IYI KÃGARA

8. ¿Jesubara kʼãrẽa ĩjãbasi yi zezebara iyira wãrĩnu kãgata?

⁸ Jeowa yi warraʉ̃me ãbabʉra dããraba, akʉza ãyira yiya kãga ũdubi zebʉda. Jeowabara biʼia ũdubisi iya Jesu kãgabʉta. Mateo 17:5​de jarabʉ bedʼeara Jeowabara bari jaraseabasi: «Naʉ̃ mʉ̃ warrara, iyi kʼarea sobiabʉa», mamina iyara maʉ̃ta jara ẽ basi, awuarabʉrʉ jarasi Jesu kʼãrẽaba kãgata naʉ̃ bedʼea jaraside: «Naʉ̃ mʉ warra mʉãrã kʉãgʼa». Jeowara sobiabasi Jesu kʼarea akʉza iya kʼãrẽ oi kʼareabida (Efes. 1:7). Jesubara krĩcha ẽ basi yi Zezebara iyi kãga ẽãta, awuarabʉrʉ, iya biʼia kʼawuabasi Jeowabara iyira wãrĩnu kãgabʉta. Jesubara jarada bio jarasi yi Zezebara iyira kãgata (Juan 3:35; 10:17; 17:24).

9. ¿Kʼãrẽ bedʼeaba ũdubibʉ Jeowabara ʉ̃ta wãirãra wãrĩnu kãgata? Jara ũrĩbira (Romanos 5:5).

⁹ Adewara Jeowabara iyi kãgara ũdubibʉ ʉ̃ta wãirabida (akʉra Romanos 5:5). Daizeze Bedʼeaba naʉ̃ bedʼeata jarabʉ: «Dayirã sode diasi [weasi]». Libro abaʉba bedʼea «weai» ʉ̃rʉ naʉ̃ta jarabʉ: Jeowaba ʉ̃ta wãira mejãcha kãgabʉ baera, jarabʉ Daizeze kãgara bania do zakedeba zebʉ kĩrãkʼabʉta. Ʉ̃ta wãirabara kʼawuapanʉ ãyira Daizezebara kãgata (Jud. 1). Juanba jara ũrĩbisi iyi sãwũã sentibʉta naʉ̃ta bʉside: «Akʉidua kʼãrẽaba kãgata Daizezeba dayirãta, maʉ̃ kʼarea dayirãra trʉ̃gapanʉ Daizeze warrara» (1 Juan 3:1). ¿Bari ʉ̃ta wãirabʉrʉ ũdubibʉka Jeowabara iyi kãgara? Mawũã ẽ, Jeowabara iyi kãgara ũdubibʉ dayirã jõmaʉ̃ʼabida.

10. ¿Jeowaba kʼãrẽta osi ũdubita bʉra wãrĩnu kãgabʉta?

¹⁰ ¿Jeowabara kʼãrẽneba ũdubisi dayirã kãgabʉta? Iyi warrata zokʼasi dayirã ẽdrʉbita, maʉ̃ra jipade yibiabasi (Juan 3:16; Rom. 5:8). Jeowaba iyi warra audre kãgata diasi ẽbẽrarã kayiruabari beimarẽã, mawũã kĩrãduaita ãya kayirua obʉta akʉza iyi neũdukʼawua badamarẽã (1 Juan 4:10). Dayirãba audre krĩchapanʉbʉrʉ Jeowaba akʉza Jesuʉ̃meba dayirã kʼarea kʼãrẽ oda ʉ̃rʉ, ũdudayi ãyara dayirãra wãrĩnu kãgata (Gál. 2:20). Jeowabara yi warrara dia bʉe ẽ basi bari ũdubita iyara nekʼãrẽra jõma aripe obʉta, awuarabʉrʉ zokʼasi ũdubita iya dayirãra wãrĩnu kãgata. Jeowaba iyi kãgara ũdubisi diaside iya audre kãgabʉta dayirãbari: Jesuta. Jeowaba iduaribisi iyi warrata zʉbʉriamarẽã akʉza beimarẽã dayirãbari.

11. ¿Kʼãrẽta kʼawuapanʉ Jeremías 31:3​deba?

¹¹ Jeowabara iyi kãgara dayirãra bari ũdubibʉ ẽ, awuarabʉrʉ jarabʉ kʼãrẽaba kãgata dayirãra (akʉra Jeremías 31:3). Jeowabara dayirãra iyima wesi kãga baera (naʉ̃ testoʉ̃me akʉra Deuteronomio 7:​7, 8). Dayirãra nekʼãrẽ baduba jĩga babi ẽ bayi Jeowa kãgadebara (Rom. 8:​38, 39). ¿Bʉra sãwũã sentibʉ maʉ̃ kʼareara? Akʉra Salmo 23, akʉza akʉra Jeowaba Davidʼa kãga ũdubidaba sãwũã sentibisita Davidta, adewara bʉta sãwũã sentibiseabʉta maʉ̃ kãgaba.

JEOWABA KÃGA ŨDUBIBɄBA ¿SÃWŨÃ SENTIBIBɄ BɄRA?

12. ¿Bʉara sãwũã jara ũrĩbiseabʉ Salmo 23​ra?

¹² (Akʉra Salmo 23:​1-6). Salmo 23de Davidba jara ũrĩbisi iya kʼãrẽaba ĩjãbʉta Jeowaba iyira wãrĩnu kãgata akʉza iyi bia akʉbʉta. Iya jara ũrĩbisi iyira Jeowaʉ̃mera jipade neũdukʼawua biata. Iya jarasi Jeowara obeja akʉbarita. Davidba Jeowaʼa idu yi jaradiabibasidera biʼia sentibasi akʉza iyara soiduba ĩjãbasi Jeowa ʉ̃rʉ. Davidbara kʼawuabasi Jeowabara ewari jõmaʉ̃nẽ ũdubibasita iyi kãgabʉta. ¿Kʼãrẽa mawũã kʼawuabasi iyara?

13. ¿Davidbara kʼãrẽa ĩjãbasi Jeowabara iyira bia akʉbʉta?

¹³ «Mʉ̃ra nekʼãrẽ wae ẽ bayi». Davidbara sentibasi Jeowabara iyira biʼia akʉbʉta, ewari jõmaʉ̃nẽ diabasi baera nekʼãrẽ iya nesidabʉta. Adewara Davidbara kʼawuabasi Jeowara iyi neũdukʼawuata akʉza Jeowabara iyira biʼia akʉbʉta. Maʉ̃ba iya kʼawuabasi ʉ̃ra zeide nekʼãrẽ berabaribʉrʉdebida Jeowaba diaita iya nekʼãrẽ nesidabʉra. Davidbara ĩjãbasi Jeowabara iyira kãgata akʉza iyira biʼia akʉita. Naʉ̃ba kʼarebasi iyi aukʼara krĩcha zroma oẽ baita akʉza sobia bʼaita (Sal. 16:11).

14. ¿Jeowabara dayirãra sãwũã biʼia akʉseabʉ?

¹⁴ Jeowabara wãrĩnu krĩchabʉ dayirãra, audre dayirãba bedʼea zroma ũdubʉrʉde. Clairera,a Betelde trajabʉta 20 poagaba, iyi mebẽrãba bedʼea zroma ũdusidera iyara kʼawua ẽ basi kʼãrẽta oita. Iyi zezera buru morrode kayasi akʉza yi mebẽãra Jeowa odeba ãĩ wãsi. Adewara iyi mebẽrãra bedʼea zroma erbasi plata neẽbasi baera akʉza ãya nekʼãrẽ erbʉta aduasida. ¿Jeowaba sãwũã ũdubisi iyira bia akʉbʉta? Claireba jarabʉ: «Jeowabara mʉ̃ mebẽrãra bia akʉbasi. Ewari jõmaʉ̃nẽ diabasi nekʼãrẽ ãya nesidabʉta. Jeowaba nekʼãrẽ daiba nesidabʉde wueta diabasi. Mʉ̃ara badua krĩchabʉ Jeowaba dai sãwũã kʼarebada ʉ̃rʉ akʉza kĩrãdua ẽ bayi iya daiʼa kãga ũdubidara. Adewara maʉ̃ba kʼarebasi awuru bedʼea zromara ũdubʉrʉde sobiade oita Jeowaba zokʼabʉta».

15. ¿Kʼãrẽba zarea babisi Davidʼra? (Akʉra potota).

¹⁵ «Mʉ̃ta zareabibʉ». Edaʉde Davidʼra sopʉa sentibasi iya bedʼea zroma ũdubʉ kʼarea (Sal. 18:​4-6). Mamina Jeowaba iyaʼa kãga ũdubibʉba zarea diasi Davidʼra. Iyi neũdukʼawua David sopʉabasidera Jeowaba iyi kãgata ũdubisi, naʉ̃ba so zarea diasi Davidʼa akʉza kʼarebasi sobiade omarẽã Jeowaba zokʼabʉta (Sal. 18:​28-32).

16. ¿Jeowa kãgaba bʉra sãwũã zarea babisi?

¹⁶ Abarika idi ewade, dayirãba bedʼea zroma ũdupanʉmina akʉza dayirã bebʉ bebʉdebʉmina, dayirãra neida berabari ẽ Jeowaba iyi kãga jõkata ũdubibʉ baera (Lam. 3:22; Col. 1:11). Akʉdaya Rachel yizata. Iyira mejãcha sopʉa besi COVID-19 berabarisidera yi kimaba iyita doba amaesi baera akʉza Jeowasida amaesi baera. ¿Kʼãrẽta osi Jeowaba iyi kʼarea? Iya jarabʉ: «Jeowaba iyi kãgata ũdubisi mʉ̃aʼa, zokʼa bʉesi neũdukʼawuarata mʉ̃me ãbapanamarẽã, ãya mʉ̃ita wepanasi yikota akʉza zokʼa bʉepanasi mensajeta, mõbe bedʼea bia Daizeze Bedʼeadebemata jarapanasi mʉ̃aʼa so zarea diaita akʉza badua kĩrãbebipanasi Jeowaba mʉ̃ra akʉbʉta. Mʉ̃a badua biga diabʉ Jeowaʼa mebẽrãta diasi baera mʉ̃aʼa kãga ũdubidamarẽã».

17. ¿Kʼãrẽa Davidʼra pera ẽ basi kayirua berabari kʼarea?

¹⁷ «Pera ẽ bayi yi kayirua kʼareara, bʉra mʉ̃mebʉ baera». David bebʉra badua bebʉdebasi akʉza iyara mejãcha erbasi nejʉrara zarea barachuberata. Mamina, Jeowaba iyaʼa kãga ũdubibʉba aduʼa sentibisi Davidʼra akʉza kʼawuabasi Jeowaba iyira kʼarebaita. Davidba bedʼea zroma ũdubʉrʉdera iyara sentibasi Jeowara iyi kʼawabʉta akʉza maʉ̃ba aduʼa sentibibasi. Iya naʉ̃ta jarasi: «[Jeowaba] mʉ̃ perabi jõma ãĩ bʉesi» (Sal. 34:4). David edaʉde mejãcha perabasimina, maʉ̃ perabia yi edebi ẽ basi kʼawuabasi baera Jeowaba iyira mejãcha kãgabʉta.

18. ¿Bʉa kʼawuabʉbʉrʉ Jeowaba bʉ kãgata, naʉ̃ba sãwũã so zarea diaseabʉ bʉ pera sentibʉrʉdera?

¹⁸ Dayirãba bedʼea zroma ũdubʉrʉde, ¿sãwũã so zarea diabʉ kʼawuaiba Jeowaba dayirã kãgata? Yi nãã edebari, yi trʉ̃ Susiba jara ũrĩbibʉ iyita yi kimaʉ̃me sãwũã sentisita ãyi wũãwũã iyikʉza beiside: «Bʉa bedʼea zroma ũdubʉrʉdera, naʉ̃bara mejãcha sopʉabibʉ akʉza krĩcha zroma obibʉ kʼãrẽ sãwũã berabari kʼarea, mamina Jeowaba dayirã biʼia akʉbʉba kʼarebabʉ aduʼa sentibita». Rachelba naʉ̃ta jarabʉ: «Ewari aba mʉ̃ sopʉabaside akʉza mejãcha krĩcha zroma onʉmaside, adewara pera sentibaside nemi jĩgʉa bedʼeasi Jeowaʼa. Maʉ̃ne mʉ̃a sentisi iya mʉ̃ so aduʼa babibʉta akʉza mʉ̃ biʼia sentibibʉta papa abaʉba yi wũãwũã bia sentibibari kĩrãkʼa. Maʉ̃ tẽã mʉ̃ra kʼãĩsi. Mʉ̃a maʉ̃ ewarira jipa kĩrãdua ẽ bayi». Zõrãrã aba, yi trʉ̃ Tasosta, poaga kimare berabarisi karselde edabʉta. Iyira mama basi gorogororane eda wã ẽ basi baera. ¿Sãwũã ũdusi iya Jeowaba iyira bia akʉbʉta akʉza kãgata? Iya jarabʉ: «Jeowaba diasi nekʼãrẽ mʉ̃a nesidabʉ jõma, naʉ̃ba mʉ̃a ĩjãbʉra audre wari wãbisi. Mamabasimina, Jeowaba kʼarebasi mʉ̃ sobia bʼaita. Naʉ̃ba mʉ̃aʼa kʼawuabisi mʉ̃ta audre Jeowa kʼawabʉbʉrʉ, audre ũduibasita iya mʉ̃ sãwũã biʼia akʉbʉta. Maʉ̃ba mʉ̃ara yi nãã edebarita ojʉ̃drʉsi karselde edabʉde».

AUDRE DAIZEZE KʼAWA BARA

19. (1) Jeowaba dayirãta kãgata kʼawuapanʉ baera, ¿kʼãrẽta widiseapanʉ iyaʼa yiwidʼibʉrʉdera? (2) Jeowaba iyi kãga sãwũã ũdubibʉdebemara, ¿bʉara saʉ̃ta audre kãga? (Akʉra rekuadro «Naʉ̃ra bedʼearaba kʼarebabʉ dayirãba sentita Jeowa kãgata»).

¹⁹ Nebʉrara dayirãba ũdutabedaba ũdubibʉ Jeowara Daizeze kãgata akʉza iyira dayirãʉ̃mebʉta (2 Cor. 13:11). Iyara dayirã aba abakaʉ ʉ̃rʉ krĩchabʉ, maʉ̃ba kʼawuapanʉ dayirãra iyi kãga jõkaba purrebaribʉta (Sal. 32:10). Dayirãba badua krĩchapanʉbʉrʉ Jeowaba dayirãʼa sãwũã kãga ũdubibʉta, naʉ̃ba kʼarebayi ũduita Jeowara wãrĩnu chuta akʉza audre iyi kʼawa sentidayi. Dayirãbara pera ẽã widiseapanʉ Jeowaʼa iyi kãgata diamarẽã. Dayirãba kʼãrẽ krĩcha zroma erbʉra iyaʼa jaraseabʉ, kʼawuapanʉ baera iya kʼawuabʉta dayirã sãwũã sentibʉra akʉza iyara wãrĩnu kʼarebakĩrãbʉta (Sal. 145:​18, 19).

20. ¿Jeowa kãgaba sãwũã iyi kʼawa babibʉ?

²⁰ Ewari kʉrãzanʉmʉne, tʉbʉ jʉ̃wʉrʉaba biʼia sentibibari kĩrãkʼa Jeowa kãgaba dayirãra biʼia sentibibʉ. Jeowara mejãcha zarea barabʉmina mawũãsidu kãga ũdubibʉ iyara. Sobiabara Jeowaba bʉta kãgabʉ baera. Akʉza dayirã jõmaʉ̃ba jaraseabʉ mʉ̃a kãga Jeowara (Sal. 116:1).