Jeowa ʉ̃rʉ ĩjãra Sansónba oda kĩrãkʼa

1, 2. ¿Kʼãrẽa kʼawuakĩrãnaibara Sansón nebʉrara?

SANSÓN ʉ̃rʉ ũrĩbʉrʉdera ¿kʼãrẽta krĩchabʉ bʉara? Krĩchabʉbaibara iyira yumakẽrã zarea mejãcha erbadabasita, naʉ̃ra wãrĩnu. Mamina edaʉde Sansónbara bia jida ẽ basi. Maʉ̃ba iyira mejãcha zʉbʉriabisi. Mamina Daizezebara akʉ ẽ basi iya aña jidadata awuarabʉrʉ akʉsi iyira sãwũã kʼẽrẽpabasita iyiʉ̃me, maʉ̃ kʼarea iduaribisi iyi ʉ̃rʉ bʉmarẽã Daizeze Bedʼeade, naʉ̃ba dayirãta kʼarebamarẽã.

² Jeowabara zokʼasi Sansónta iyi pʉwʉrʉ Israelta kʼarebamarẽã. Maʉ̃ta poaga bio berabarida tẽã Jeowaba Pabloʼa bʉbisi ẽbẽrarã iyiare kʼẽrẽpapanana ʉ̃rʉ. Maʉ̃ne edabasi Sansón trʉ̃ta (Heb. 11:​32-34). Sansón yizaba mejãcha so zarea diaseabʉ dayirã. Iya bedʼea zroma ũdusidera Jeowa ʉ̃rʉ ĩjãbʉta ũdubisi. Naʉ̃ artikulode kʼawuadayi kʼãrẽta kʼawuaseapanʉta Sansón yizadeba akʉza sãwũã Sansón yizaba dayirãʼa so zarea diabʉta.

SANSÓNBARA JEOWA Ʉ̃RɄ ĨJÃSI

3. ¿Kʼãrẽta omarẽã jarasida Sansónʼara?

³ Sansón tosidadera, israelitarãra pilisteora juwa edrebasi akʉza ãyara mejãcha zʉbʉria opanasi israelitarãra (Juec. 13:1). Jeowaba Sansónta jidasi iyi pʉwʉrʉ Israelta ẽdrʉbimarẽã pilisteoraneba (Juec. 13:5). Naʉ̃ oira jipade zarebasi, maʉ̃ba Sansónbara Jeowa ʉ̃rʉ ĩjãbʉta ũdubibarabasi.

4. ¿Jeowaba sãwũã kʼarebasi Sansónʼra pilisteoraneba ẽdrʉmarẽã? (Jueces 15:​14-16).

⁴ Akʉdayi sãwũã Sansónba Jeowa ʉ̃rʉ ĩjãbʉta ũdubisita akʉza Jeowaba iyira sãwũã kʼarebasita. Ewari aba pilisteoraba Sansónʼra jidade jʉ̃ẽsida pʉwʉrʉ Lehídu, maʉ̃ra Judádebasibaibara. Ẽbẽrarã Jerusalénʼnebemara mejãcha perapanasi baera Sansónʼra jʉ̃kara yiwidiba juwama jʉ̃ kʼãrãpe pilisteora diasida, iyira ãyi pʉwʉrʉdebemabasimina (Juec. 15:​9-13). Mamina Jeowa jaure zareaba zarea diasi Sansónʼa iyi juwata jʉ̃bʉta enamarẽã. Maʉ̃ tẽã burru kidatrʉta jida kʼãrãpe 1.000 pilisteora makenasi (akʉra Jueces 15:​14-16).

5. ¿Sansónba burru kidatrʉ zokʼadaba sãwũã ũdubisi Jeowa ʉ̃rʉ ĩjãbʉta?

⁵ ¿Sansónbara kʼãrẽa jidasi burru kidatrʉta pilisteora beaita? Iyara kʼawuabasibaibara yõena wãira audre yibiata kuchota zokʼaita, mamina iya ĩjãbasi baera Jeowaba kʼarebaita, kʼawuabasi nekʼãrẽ baduta zokʼaseabasita. Mawũã, Sansónʼra Jeowaʉ̃me kʼẽrẽpabasi baera, nekʼãrẽ baduta zokʼasi Jeowaba kãgabʉta oita. Sansónbara naʉ̃ra ẽbẽrarãra jõma makenasi Jeowa ʉ̃rʉ ĩjãbasi baera.

6. ¿Jeowaita nei oibarabʉrʉ Sansón nebʉrabara sãwũã kʼarebabʉ?

⁶ Jeowabara dayirãbida zarea diayi, iya dayirã omarẽã jarabʉta aripe omarẽã, maʉ̃ oira zareabʉmina. Daizezebara dayirãba kʼawua ẽãne kʼarebaseabʉ. Jeowabara Sansónʼa zarea diasi iyi ʉ̃rʉ ĩjãbasi baera, dayirãbida Jeowa ʉ̃rʉ ĩjãpanʉbʉrʉ iya zarea diayi iya kãgabʉta odamarẽã (Prov. 16:3).

7. ¿Kʼãrẽ yizaba ũdubibʉ jipade yibiata Jeowa yi jaradiabita?

⁷ Mebẽrã Daizeze de parãpanʉne trajapanʉrabara, ũdubi zebʉda Jeowa ʉ̃rʉ ĩjãpanʉta. Nawedara mebẽrã Daizeze de parãpanʉrabara jarapanasi dera sãwũã oita akʉza maʉ̃ta opanasi. Mamina Jeowa pʉwʉrʉra ewariza audre wari wã baera Jeowa organizasionbara nekʼãrẽ awuruta owã. Mebẽrã Daizeze de parãpanʉnebema yi nãã edebariraba, jʉrʉsida Jeowa kʼarebata maʉ̃ kʼarea nekʼãrẽ awuara osida. Bari jaraita jʉrʉsida deta mõbe maʉ̃ta ara osida Daizeze de babita. Mebẽã Robertʼra dããraba naʉ̃ drʉa jõmaʉ̃mae trajabʉta Daizeze de parãbʉde. Iya naʉ̃ta jarabʉ: «Abedaedara ʉ̃kʉrʉitara zarebasi ĩjãita mawũã nekʼãrẽ awuara opanʉra, naʉ̃ra awuarabasi baera daiba nekʼãrẽ nãã opananaira, mamina mebẽrãbara zarea opanʉ nekʼãrẽ awuara oita akʉza ũdubʉda Jeowaba sãwũã kʼareba zebʉrʉta naʉ̃ne». Naʉ̃ yizaba ũdubibʉ Jeowaba sãwũã kʼarebabʉta iyi pʉwʉrʉra mawũã iya kãgabʉta odamarẽã. Dayikʉza naʉ̃ta widiseabʉ: «¿Mʉ̃ara bia akʉbʉka Jeowaita sãwũã trajabʉra? akʉza ¿nekʼãrẽ awuara okĩrãbʉka mawũã Jeowaba kãgabʉ oita?».

SANSÓNBARA BIA ZOKʼASI JEOWABA IYAʼA DIADARA

8. Ewari aba Sansón obisiabasidera, ¿kʼãrẽta osi?

⁸ Bʉara kĩrãbebʉbaibara nekʼãrẽ bio Sansónba odata. Iyira doba yõsi leonʼʉ̃me akʉza 30 yumakẽrãra makenasi pʉwʉrʉ Asquelónʼne (Juec. 14:​5, 6, 19). Sansónbara kʼawuabasi iyara naʉ̃ra obe ẽ basita Jeowa kʼarebata neẽbasibʉrʉ. Iyara maʉ̃ta ũdubisi ewari aba iya 1.000 pilisteora makenana tẽã mejãcha obisiabaside, iyidobaʉba bania jʉrʉ wãi kaude Jeowaʼa kʼarebata widisi (Juec. 15:18).

9. ¿Jeowabara sãwũã panʉsi Sansónba wididara? (Jueces 15:19).

⁹ Jeowabara Sansónba wididara panʉsi baniata ʉ̃tʉ zebiside. Iya maʉ̃ bania doda tẽãra jẽda zarea erbasi (akʉra Jueces 15:19). Maʉ̃ baniara poaga bio berabarisidu ariwiabasibaibara Samuelba Jueces libro bʉside maʉ̃ ʉ̃rʉ jarasi baera. Israelitaraba naʉ̃ bania ũdubʉrʉdera kĩrãbepanasibaibara Jeowa ʉ̃rʉ ĩjãseapanʉta akʉza yi Jeowaʉ̃me kʼẽrẽpabʉara Jeowaba kʼarebaita.

10. ¿Kʼãrẽta jarakĩrãbʉ Jeowa kʼareba jʉrʉibara? (Akʉra potota).

¹⁰ Krĩcha ẽã dayirãba Jeowa organizasione kʼãrẽta ozebʉrʉta, mawũã ẽ bʉrʉ kʼãrẽta okʼawuabʉta, jõmaʉ̃ba Jeowa kʼarebata jʉrʉdaibara. Dayirãbara kʼawuadaibara dayirãba nekʼãrẽ obʉrʉra biʼia oita Jeowa ʉ̃rʉ ĩjãpanʉbʉrʉ. Jeowaba iyaʼa bania diada doda tẽã Sansónʼra zareabara totosi. Abarika Jeowaba dayirã nekʼãrẽ diabʉ iyi kʼawa panamarẽã. Dayirãba maʉ̃ta biʼia zokʼa kʼawuapanʉbʉrʉ dayirãba ĩjãbʉra audre zarea erpanañi (Mat. 11:28).

11. ¿Kʼãrẽta oibara Jeowaba dayirãta kʼarebamarẽã? Yizata aba jara ũrĩbira.

¹¹ Akʉdaya mebẽã Alexéi yizata. Iyira Rusiadebema akʉza zʉbʉriabʉ pẽwãpanʉ baera. ¿Kʼãrẽba kʼarebabʉ iyi mawũã barabarinʉmʉmina zarea bʼaita? Iya iyi kimaʉ̃meba zarea opanʉ ewariza nekʼãrẽ oita audre Jeowa kʼawa bʼaita. Iya jarabʉ: «Mʉ̃ra zarea obʉ ewariza doba estudiaita akʉza Daizeze Bedʼea leita. Nrʉemaza mʉ̃a mʉ̃ kimaʉ̃meba diapeda akʉpanʉ testo ewarizadebemata akʉza ãba yiwidʼipanʉ». ¿Kʼãrẽta jaradiabʉ naʉ̃ba dayirã? Dayikʉza ʉ̃rʉ ĩjãi kaude ĩjãibara Jeowaba kʼarebaita. ¿Sãwũã? Dayidoba estudiaibara, Daizeze Bedʼeata ewariza leibara akʉza nekʼãrẽ Daizezedebemata oibara. Mawũã daya ĩjãbʉta audre zarea erbaita. Akʉza Jeowaba bʉaʼa nebia diayi bʉta zarea obʉbʉrʉ iya kãgabʉta oita. Jeowabara Sansónʼa zarea diasi abarika dayirãbida zarea diayi.

SANSÓNBARA IDUBɄ Ẽ BASI JEOWABA KÃGABɄ OBɄTA

12. ¿Saʉ̃basi Sansónba aña jidadara akʉza naʉ̃ra kʼãrẽne awuarabasi iya nãã jidadaʉ̃mera?

¹² Sansónʼra dayirã kĩrãkʼa kayirua omiabasi, maʉ̃ba iya edaʉde aña jidasi. Mamina iya ewari aba aña jidadara jipade kayiruabasi. Iyira pʉwʉrʉ Israel juezbasi poaga biobayeda, mamina tẽã «kãgasi wẽrã koribi Sorecdebemata yi trʉ̃ Dalila» (Juec. 16:4). Naenara Sansónbara jarasi juwa jidakĩrãbʉta wẽrã Filisteadebemaʉ̃me. Jeowabara maʉ̃ra iduaribisi pilisteora makenaita. Maʉ̃ tẽã Sansónʼra wẽrã odebema deda kʼãĩsi maʉ̃rabasi Gazade, maʉ̃ pʉwʉrʉra Filisteadebemabasi. Maʉ̃ ewadede Jeowaba Sansónʼa zarea diasi, mawũã iya mamabema pʉwʉrʉ puerta ãĩ ogaedape edesi akʉza iya mawũã obʉrʉba maʉ̃ pʉwʉrʉra zarea neẽbesi (Juec. 14:​1-4; 16:​1-3). Mamina iyita Dalilaʉ̃me juwa jidamarẽãra Jeowaba zokʼa ẽ basi, Dalilara pʉwʉrʉ Israeldebemabasibaibara.

13. ¿Kʼãrẽta osi Dalilabara Sansónba kayiruata omarẽã?

¹³ Dalilabara ĩjãsi Sansón sewaita plata mejãchabari. Sansónbara maʉ̃ wẽrãra wãrĩnu kãgabasi baera ũdu ẽ basibaibara iya kʼãrẽta okĩrãbadara. Dalilabara jarada ʉ̃rʉ jarabasi Sansónʼa iyaʼa jaramarẽã kʼãrẽa mejãcha zarea barabʉta. Iya naʉ̃ wẽrã bedʼeata ũrĩsi baera aduasi iya zarea erbadata akʉza Jeowaba bia akʉbʉta (Juec. 16:​16-20).

14. Sansónba Dalila ʉ̃rʉ ĩjãsi baera, ¿kʼãrẽta berabarisi?

¹⁴ Sansónʼra mejãcha zʉbʉriasi Dalila ʉ̃rʉ ĩjãsi baera Jeowa ʉ̃rʉ ĩjãi kaude. Iyira pilisteorabara jidada kʼãrãpe dabʉ ãĩ bʉesida. Iyira pilisteorabara Gazaeda edesida karselde eda bʉeita. Nawedara Sansónbara naʉ̃ pʉwʉrʉdebema puertara ãrĩsibasi. Tẽã iyira nezokʼa babisida mawũã neta bamarẽã. Pilisteorabara sakripisio zromata diasida ãyi daizeze zeri ẽã Dagónʼa. Ãya krĩchapanasi baera naʉ̃ba kʼarebasita Sansón jidaita. Maʉ̃ne Sansónʼra ãyidu wesida mawũã iyi kʼarea ipidaita (Juec. 16:​21-25).

15. ¿Sansónbara sãwũã ũdubisi Jeowa ʉ̃rʉ jẽda ĩjãsita? (Jueces 16:​28-30 akʉza akʉra poto yi nããrabemata).

¹⁵ Sansónbara nekayirua osimina idʉbʉ ẽ basi Jeowaba zokʼabʉ obʉta. Iyara jʉrʉsi sõbede oita Jeowaba omarẽã zokʼadara, pilisteora makenaita (akʉra Jueces 16:​28-30). Sansónba Jeowaʼa widisi: «Iduaribira mʉ̃abida pilisteora abarika kayirua oita». Daizezebara panʉsi Sansón bedʼeara. Mõbe iya zarea nãã erbadara jẽda diasi. Jeowaba kʼarebasi baera Sansónbara pilisteora mejãcha makenasi naʉ̃ne nãã odaira.

16. ¿Kʼãrẽta kʼawuaseapanʉ Sansónba kayirua odabeda?

¹⁶ Sansónʼra iya kayirua oda kʼarea zʉbʉriabasimina, idubʉ ẽ basi Jeowaba kãgabʉ oita. Dayirãba kayirua obʉrʉde maʉ̃ kʼarea kʼẽãnara, mawũã ẽ bʉrʉ dayirãba pribilegio erbʉta aduara, zarea oibara Jeowaba kãgabʉta idubʉ ẽ baita. Kĩrãbera Jeowabara kĩrãduakĩrãbʉta bʉa nemitia odata (Sal. 103:​8-10). Dayirãba kayirua osimina Jeowaba dayirãra zokʼaseabʉ iya kãgabʉ oita Sansón berabarida kĩrãkʼa.

17, 18. ¿Michael yizaba sãwũã so zarea diabʉ bʉ̃aʼa? (Akʉra potota).

¹⁷ Akʉdaya Michael yizata. Iyara mejãcha kʼarebabasi yi kongregasione, bari jaraita iyira zõrãrã kʼarebabaribasi akʉza yi nãã edebaribasi. Mamina iya nekayiruata osi baera aduasi iyi pribilegiora. Iya jarabʉ: «Mʉ̃a nekʼãrẽ Jeowaita obʉra jõma bia wãbasi, mamina atiaʉde muroma deguebʉrʉ kĩrãkʼasi. Mʉ̃a krĩchakabasi Jeowaba mʉ̃ra idubʉita, mamina krĩcha obasi jẽda iyi neũdukʼawua bʼai kʼarea akʉza mʉ̃ iyita trajaseabʉ kʼawuaita mʉ̃a nãã obada kĩrãkʼa kongregasione».

¹⁸ Michaelbara idubʉ ẽ basi Jeowaba kãgabʉ oira. Iya jarabʉ: «Mʉ̃ra zarea osi audre Jeowa neũdukʼawua bia bʼaita, maʉ̃ kʼarea soiduba yiwidʼi jʉ̃drʉsi, Daizeze Bedʼeata akʉ jʉ̃drʉsi akʉza maʉ̃ ʉ̃rʉ krĩchabasi». Ewari berabarida tẽã iyira zõrãrãbasi akʉza yi nãã edebaribasi. Iyara jarabʉ: «Zõrãrã kʼarebadeba mʉ̃a ũdusi Jeowaba mʉ̃ra waidide kãgabʉta, mʉ̃ara akʉza kongregasione jẽda aduʼa obesi Jeowaba zokʼabʉra. Mʉ̃ kʼãwũã berabaridaba mʉ̃aʼa jaradiasi Jeowabara kĩrãduabʉta yi wãrĩnu jẽda krĩchabʉra». Dayirãba kayirua oda kʼarea wãrĩnu jẽda krĩchapanʉbʉrʉ ĩjãseapanʉ Jeowabara dayirãra kʼarebaita akʉza jẽda zokʼaita iya kãgabʉta omarẽã (Sal. 86:5; Prov. 28:13).

19. ¿Sansón yizaba sãwũã so zarea diabʉ bʉara?

¹⁹ Naʉ̃ artikulode kʼawuasida Sansón sãwũã berabaridata. Iyira nemitia omiabasi akʉza Dalilaʉ̃me kayirua osi, mawũãsidu idubʉ ẽ basi Jeowaba kãgabʉ oita. Akʉza Jeowaba Sansónʼa jẽda diasi nekʼãrẽ oita. Jeowabara krĩchabasi Sansónʼra kʼẽrẽpabʉta maʉ̃ kʼarea iyi trʉ̃ra bʉbisi Hebreos yi zroma 11de. Jipade yibia dayirã Jeowaita trajaira, iyira Zeze bia baera so zarea diakĩrãbʉ dayirã akʉza audre diakĩrãbʉ dayirã sopʉapanʉne. Maʉ̃ kʼarea Sansónʼne kĩrãkʼa Jeowaʼa jaraibara: «Mʉ̃ bia okʼãrãpe mʉ̃ta kĩrãbera [ . . . ] mʉ̃aʼa zarea diara» (Juec. 16:28).