Mebẽrã yumakẽrãra: marabara krĩchaseapanʉ sãwũã audre kristiano bia bʼaita

1. ¿Kristianobara kʼãrẽta oibara bia wãita?

NOKʼO Davidba Salomónʼa jarasi: «Zarea bara akʉza ũdubira yumakẽrãʼarata» (1 Rey. 2:​1-3). Kristianora warraraba naʉ̃ ũrãgʼaba jarabʉta odara jipade yibiabayi, ãyi bia wãira kʼawuaibara kʼãrẽta jarabʉta Daizeze Bedʼeaba akʉza maʉ̃ta oibara (Luc. 2:52). ¿Kʼãrẽa yibia kʉ̃raraba zarea odamarẽã mawũã kristiano bia bʼaita?

2, 3. ¿Kʼãrẽa yibia kʉ̃rarata kristiano bia bamarẽãra?

² Kristiano yumakẽrãbara nekʼãrẽ obʉ iyi mebẽrãʉ̃mebʉde akʉza kongregasione. Kʉ̃rarabara krĩchabaribaibara ãya kʼãrẽta okĩrãbʉ ʉ̃rʉ, ãyara krĩchabaribaibara yi nãã edebari bʼaita, zõrãrã kʼarebabari bʼaita, mawũã ẽ bʉrʉ zõrãrã kongregasionebema bʼaita. Ʉ̃kʉrʉra juwa jidakĩrãbʉ akʉza wũãwũã barakĩrãbʉ (Efes. 6:4; 1 Tim. 3:1). Iya maʉ̃ oita akʉza bia wãita nesida kristiano bia bʼaita.b

³ ¿Kʼãrẽta oibara kristiano bia bʼaita? Maʉ̃itara bʉara nekʼãrẽ okʼawuaibara. ¿Idi wedaʉba, kʼãrẽta oibara mawũã ʉ̃ra zeide nekʼãrẽ berabaribʉrʉde kʼawuaita kʼãrẽta oita?

¿KʼÃRẼTA OIBARA KRISTIANO BIA BʼAITA?

4. ¿Sama ũduseabʉ yiza bia bʉa maʉ̃rane kĩrãkʼa omarẽã? (Akʉra potota).

⁴ Yiza biata jʉrʉra maʉ̃rane kĩrãkʼa oita. Daizeze Bedʼeadebʉ mejãcha yizarata yumakẽrã kʼẽrẽpabadaraneta. Ãyara kãgabasi Jeowara akʉza nekʼãrẽ mejãcha osida Jeowa pʉwʉrʉ kʼarebaita. Bʉ mebẽrãnebida akʉza kongregasionebida ũduseabʉ yiza bia mebẽrã kristianora biadeba (Heb. 13:7). Adewara erpanʉ yiza yi audre yibiata Jesudeta (1 Ped. 2:21). Maʉ̃ra ʉ̃rʉ krĩchabʉrʉde akʉra ãya kʼãrẽ nebiata erbʉta (Heb. 12:​1, 2). Mõbe zarea ora bʉabida ũdubita maʉ̃ra nebiarata.

5. ¿Sãwũã kĩrãkita krĩcha kʼawuaseabʉ akʉza kʼãrẽa yibia maʉ̃ra? (Salmo 119:9).

⁵ Kĩrãkita krĩcha kʼawuara (Prov. 3:21). Yumakẽrã kĩrãkita krĩcha kʼawuabʉbara nekʼãrẽ oi nãã biʼia akʉbʉ jõma, mawũẽra zarea ora bʉabida kĩrãkita krĩcha kʼawuaita, ¿kʼãrẽa? Idi ewadera warrara naʉ̃ drʉadebemabara nekʼãrẽ oira jidabʉ ãyi sãwũã sentibʉdeba akʉza ãya kʼãrẽ kãgabʉdeba (Prov. 7:7; 29:11). Telebisorba, sineba, radioba akʉza internetʼba aña krĩchabiseabʉ bʉaʼa, ¿kʼãrẽta oibara kĩrãkita krĩcha kʼawuaita? Zarea ora Daizeze Bedʼeadebemata kʼawuaita akʉza krĩchara kʼãrẽa yibiata mama eda jarabʉra bʉitara, tẽã bʉa kʼãrẽ kʼawuadadeba nebiata jidara mawũã Jeowata sobiabita (akʉra Salmo 119:9). Bʉa naʉ̃ta obʉbʉrʉ kristiano bia baseabʉ (Prov. 2:​11, 12; Heb. 5:14). Akʉra sãwũã kĩrãkita krĩcha kʼawuaiba kʼarebaita nekʼãrẽ ũmene: aba, wẽrãraʉ̃me sãwũãbʉta. Yi ũmeta bʉ sãwũã wua jʉ̃bʉta.

6. ¿Kĩrãkita krĩchabʉba sãwũã kʼarebabʉ kʉ̃ra abaʉba wawia ũdubimarẽã mebẽrã wẽrãra?

⁶ Kĩrãkita krĩcha kʼawuaiba kʼarebayi wẽrãra wawia ũdubita. Bari jaraita, mebẽã yumakẽrã abaʉba mebẽã wẽrãta ũdukʼawuakĩrãbʉbʉrʉ naʉ̃ra kayirua ẽ, yumakẽrã kĩrãkita krĩcha kʼawuabʉbara iya maʉ̃ yuwẽrãʉ̃me wãrĩnu mia kʼãĩta krĩchabʉ ẽ bʉrʉ, bʉ ẽ bayi mia jara ẽ bayi akʉza oẽ bayi nekʼãrẽ maʉ̃ yuwẽrã aña krĩchabibʉta (1 Tim. 5:​1, 2). Bʉa mebẽã wẽrã abaʉta bedʼea erbʉbʉrʉ jʉra kʼawuabayi iyiʉ̃me doba ba ẽ baita mawũã wuabemaraba iyi ʉ̃rʉ aña krĩcha ẽ marẽã (1 Cor. 6:18).

7. ¿Kʉ̃ra abaʉba kĩrãkita krĩcha kʼawuabʉba sãwũã kʼarebai iyi bia wua jʉ̃ita?

⁷ Kʉ̃ra abaʉba iyi Jeowa kĩrãkʼa krĩchabʉra ũdubibʉ iyi sãwũã wua jʉ̃bʉdeba akʉza iyi bʉda sãwũã tʉbʉdeba. Idi ewade ẽbẽrarã dayirã sãwũã wua jʉ̃ibara ʉ̃rʉ jarabʉrabara, krĩchada ẽ Jeowaba kʼãrẽ krĩchabʉta akʉza wawia ũdubida ẽ Jeowaʼa akʉza parãpanʉ wua jʉ̃ẽbaribʉta akʉza maʉ̃ra wuabara yumakẽrãra yuwẽrã kĩrãkʼa ũdubibʉ. Kʉ̃ra abaʉba Jesude kĩrãkʼa okĩrãbʉbʉrʉ oyi Daizeze Bedʼeaba jarabʉde akʉza yiza biata ũduyi kongregasione. Bʉyikʉza widira: «¿Mʉ̃a kʼãrẽ oi jidabʉba ũdubibʉka mʉ̃ krĩcha aduʼabʉta akʉza biʼia ũdubibʉta wuabemara? ¿Mʉ̃ sãwũã wua jʉ̃bʉba ũdubibʉka mʉ̃ra Daizeze odebʉta?» (1 Cor. 10:​31-33; Tito 2:6). Jeowaba akʉza mebẽrã kongregasionebemarabara wawia ũdubidayi kʉ̃ra abaʉba kĩrãkita krĩcha kʼawuabʉta ũdubibʉbʉrʉ.

8. ¿Kʼãrẽta oibara kʉ̃ra abaʉba iyi ʉ̃rʉ ĩjãmarẽã?

⁸ Ũdubira bʉ ʉ̃rʉ ĩjãseabʉta. Bʉa maʉ̃ta obʉbʉrʉ nekʼãrẽ bʉaʼa omarẽã jarabʉdara jõma oyi (Luc. 16:10). Krĩchara Jesu yizata, iyara jõma osi Jeowaba nekʼãrẽ omarẽã jaradara akʉza maʉ̃ oira iyitara zaremina osi. Iyara mejãcha kãgabasi ẽbẽrarãra, audre iyi kʼaidubemarata, maʉ̃ kʼarea iyi bebʉta diasi ãyi bari (Juan 13:1). Bʉa Jesude kĩrãkʼa okĩrãbʉbʉrʉ, bʉaʼa nekʼãrẽ omarẽã jarapanʉta jõma ora akʉza bʉa maʉ̃ta obe ẽ bʉrʉ eda krĩchabʉta ũdubira, mõbe kʼareba widira yi mebẽrã maʉ̃ ʉ̃rʉ biʼia kʼawuabʉa. Bʉa nekʼãrẽ omarẽã jaradapeadatrʉ orãra, bʉa audre oseabʉbʉrʉ ora (Rom. 12:11). Bʉa nekʼãrẽ omarẽã jaradapeadata Jeowa kʼarea obʉbʉrʉ akʉza maʉ̃ta ẽbẽrarã kʼarea obʉ ẽ bʉrʉ, zarea oyi jõma bia oita akʉza nãã oita (Col. 3:23). Bʉra kayirua oka ẽ, maʉ̃ba bʉa nei aña osibʉrʉ jarara bʉa osita (Prov. 11:2).

NEKʼÃRẼ OKʼAWUARA

9. ¿Kʼãrẽa kʉ̃rabara nekʼãrẽ okʼawuaibara?

⁹ Bʉ kristiano bia bʼaira nekʼãrẽ okʼawuabaibara, naʉ̃ba kʼarebayi kongregasione bʉa nekʼãrẽ omarẽã jarabʉta bia oita akʉza trajo ũduita mawũã bʉ mebẽrã kʼarebaita, adewara wuabemarabawara bia bʼaita. Akʉdaya maʉ̃ranebema saʉ̃ba kʼarebaseabʉta.

10, 11. Kʉ̃ra abaʉba le kʼawuabʉbʉrʉ akʉza bʉ kʼawuabʉbʉrʉ, ¿naʉ̃bara sãwũã kʼarebabʉ iyita akʉza kongregasionebemata? (Salmo 1:​1-3 akʉza akʉra potota).

¹⁰ Le kʼawuara akʉza bʉ kʼawuara. Daizeze Bedʼeaba jarabʉ yumakẽrã sobiabʉbara Daizeze Bedʼeata akʉbʉta akʉza naʉ̃ ʉ̃rʉ krĩchabʉta ewariza (akʉra Salmo 1:​1-3). Kʼarebayi krĩchaita Jeowa krĩchabʉ kĩrãkʼa akʉza kʼarebayi biʼia krĩchaita (Prov. 1:​3, 4). Kongregasionera nesidapanʉ mebẽrã yumakẽrãra mawũãpanʉta.

¹¹ Mebẽrã kongregasionebemarabara nesida ãyita kʼarebadamarẽã, maʉ̃ kʼarea yumakẽrãrabara biʼia jaradia kʼawuaibara akʉza ũrãgʼa biata dia kʼawuaibara Daizeze Bedʼeadeba (Tito 1:9). Adewara bʉa bia le kʼawuabʉbʉrʉ akʉza bia bʉ kʼawuabʉbʉrʉ diaseabʉ komentario mebẽrã so zarea diabʉta. Ãba yi jʉrebʉde diskurso diabʉta mawũã ẽ bʉrʉ asambleade diskurso diabʉta, bʉseabʉ bʉ kuadernone ãya bedʼea jarabʉta. Bʉa mawũã bʉdaba kʼarebayi bʉa ĩjãbʉ zarea erbaita akʉza wuabemarabida ũrãgʼa bia diaita.

12. ¿Kʼãrẽba kʼarebaseabʉ bia ũrĩta akʉza bia bedʼea kʼawuaita?

¹² Bia ũrĩ kʼawuara akʉza bia bedʼea kʼawuara. Yumakẽrã naʉ̃ kʼãwũã obʉbara biʼia ũrĩbʉ wuabemara bedʼeabʉta akʉza kʼawuaseabʉ ãyi sãwũã sentibʉta adewara kʼãrẽ krĩchabʉta (Prov. 20:5). Bʉa kʼawuaseabʉ wuabemara sãwũã sentibʉra akʉbʉde iyi kĩrã sãwũãbʉta, iyi sãwũã bedʼeabʉta akʉza iyi sãwũã chu akʉbʉde. Maʉ̃ oita mebẽrãbawara ãbabaibara, bʉ wuabemaraʉ̃me bedʼeabʉrʉde mensajedeba, mawũã ẽ bʉrʉ internetʼneba bedʼeabʉbʉrʉ, bʉitara zareabayi awurume kĩrãbita bedʼeabʉrʉde bia bedʼeaita, maʉ̃ba zarea ora wuabemaraʉ̃me kĩrãbita bedʼea kʼawuaita (2 Juan 12).

13. ¿Adewara kʼãrẽta okʼawuaibara kʉ̃rarabara? (1 Timoteo 5:8 akʉza akʉra potota).

¹³ Traja kʼawuara mawũã erbamarẽã bʉa kʼãrẽ nesidabʉta. Kristiano biabara kʼawuabaibara kʼãrẽta oita mawũã iya nesidabʉ erbaita akʉza yi mebẽrãba kʼãrẽ nesidabʉ diaita (akʉra 1 Timoteo 5:8). Ʉ̃kʉrʉ drʉadera warrarabara ãyi yibariraba nekʼãrẽ okʼawuabʉta kʼawuabare, mawũã ẽ bʉrʉ ãyi kolegiode jaradiapanʉ kʼãrẽ okʼawuamarẽã. Kʼãrẽ ẽ bʉa sama nekʼãrẽ okʼawuasita, mamina bʉa mawũã nekʼãrẽ okʼawuadaba kʼarebayi trajo ũduita (Hech. 18:​2, 3; 20:34; Efes. 4:28). Zarea trajara akʉza zarea ora jõma oita bʉaʼa nekʼãrẽ omarẽã jarapanʉta, mawũã wuabemaraba ũdudayi bʉa kʼãrẽ bia obʉra. Bʉa maʉ̃ta obʉbʉrʉ naʉ̃ba kʼarebayi trajo ũduita akʉza maʉ̃ trajo adua ẽ baita. Naʉ̃ra nebiara dayirãba kʼawuadaba kʼarebayi kʉ̃ra abaʉba kʼawuamarẽã kʼãrẽta oita ʉ̃ra zeide iya nekʼãrẽ omarẽã jarabʉdade, akʉdaya ʉ̃ra zeide kʼãrẽta oseabʉta.

KʼAWUARA KÃRẼTA OITA Ʉ̃RA ZEIDE

14. ¿Kʉ̃ra abaʉba kʼãrẽta oseabʉ ewari jõmaʉ̃nẽ trajaita Daizezeita?

¹⁴ Ewari jõmaʉ̃nẽ trajara Daizezeita. Mebẽrã mejãcha Jeowa ode kʼẽrẽpapanʉrãra ãyi warraraenaʉba Daizezeita traja jʉ̃drʉsi, yi nãã edebari bʼaira jipade yibia, naʉ̃ba kʼarebabʉ baera wuabemaraʉ̃me bia bʼaita akʉza bʉ platasida bia zokʼa kʼawuaita, mawũã ewarade gasta ẽ baita (Filip. 4:​11-13). Bʉta Daizezeita ewari jõmaʉ̃nẽ trajakĩrãbʉbʉrʉ yi nãã edebari 30 ora diabarita ora, naʉ̃ba kʼarebayi tẽã yi nãã edebari 50 ora diabari bʼaita. Bʉta yi nãã edebaribʉrʉ naʉ̃ba kʼarebayi Jeowaita audre trajaita, bari jaraita Daizeze de parãbʉde kʼarebaseabʉ, mawũã ẽ bʉrʉ Betelde trajaseabʉ.

15, 16. ¿Kʼãrẽba kʼarebaseabʉ kʉ̃ra aba zõrãrã kʼarebabari bamarẽã mawũã ẽ bʉrʉ zõrãrã bamarẽã?

¹⁵ Zõrãrã kʼarebabari bʼaita, mawũã ẽ bʉrʉ zõrãrã bʼaita. Mebẽrã kongregasionebemarabara nekʼãrẽ oibara mawũã zõrãrã kongregasionebema bʼaita. Daizeze Bedʼeaba jarabʉ mebẽrãba maʉ̃ oita krĩchapanʉbʉrʉ maʉ̃ra yibiata (1 Tim. 3:1). Mebẽrãra zõrãrã bʼai nããra, zõrãrã kʼarebabari bʼaibara, zõrãrãra kʼarebabarirabara mejãcha kʼarebapanʉ zõrãrãta. Zõrãrãta akʉza zõrãrã kʼarebabarirãra, mebẽrãita trajapanʉ akʉza Daizeze Bedʼea jaradia wãpanʉ mebẽrãbawara. Kʉ̃rarãra, zõrãrã kʼarebabari baseapanʉ. Mebẽã aba zõrãrã kʼarebabarita kʼẽrẽpabʉbʉrʉ iyi 20 poagabʉmina zõrãrã baseabʉ.

¹⁶ ¿Mebẽrãbara kʼãrẽ nebiata erbaibara zõrãrã kʼarebabari bʼaita akʉza tẽã zõrãrã bʼaita? Daizeze Bedʼeabara jara ũrĩbibʉ kʼãrẽ nebiata erbaibarata maʉ̃ra mebẽrãba, maʉ̃ranebemara Jeowa ũdubibara kãgata, mebẽrã akʉza kongregasionebemara (1 Tim. 3:​1-13; Tito 1:​6-9; 1 Ped. 5:​2, 3). Zarea ora bia kʼawuaita maʉ̃ nebia ʉ̃rʉ akʉza Jeowa yiwidʼira kʼarebamarẽã maʉ̃ nebia erbaita.c

17. ¿Kʉ̃rarabara kʼãrẽta oibara kima bia bʼaita akʉza yi mebẽrã bia edaita? (Akʉra potota).

¹⁷ Kima biabara akʉza mebẽrã buru biabara. Jesuba jarada kĩrãkʼa ʉ̃kʉrʉ kristiano biarãra dobapanʉ (Mat. 19:12). Mamina kĩrãbeidua, kimata jʉrʉbʉbʉrʉ, kima biabaibarata akʉza mebẽrã buru biabaibarata (1 Cor. 11:3). Jeowabara kãgabʉ yumakẽrãba diamarẽã yuwẽrãba nesidabʉta akʉza iyi neũdukʼawua bia bamarẽã, adewara kʼarebamarẽã audre Jeowa kʼawa bʼaita (Efes. 5:​28, 29). Naʉ̃ artikulode kʼawuasida yumakẽrãbara krĩcha biata erbaibara, yuwẽrãra wawiata ũdubibara akʉza iyi ʉ̃rʉ ĩjãbʉta ũdubibara, iya maʉ̃ra nebia erbidade, maʉ̃ba kʼarebayi iyi juwa jidabʉrʉdera kima bia bʼaita, adewara yi mebẽrãta bia akʉyi.

18. ¿Kʉ̃rarãra kʼãrẽta oibara zeze bia bʼaita?

¹⁸ Zeze bʼaita. Bʉ juwa jidabʉrʉdera zeze baseabʉ, maʉ̃ kʼarea Jeowadebara, ¿kʼãrẽta kʼawuaseapanʉ zeze bʼai ʉ̃rʉra? Nekʼãrẽ mejãcha kʼawuaseabʉ (Efes. 6:4). Jeowabara yi warra Jesuara pera ẽ jarasi iyira mejãcha kãgabʉta akʉza bia akʉbʉta (Mat. 3:17). Bʉta zeze ba zera jarada bʉ wũãwũã kʼãrẽaba kãgabʉta ewariza, mõbe ibia bedʼeara iyi ʉ̃rʉ iya kʼãrẽ obʉ kʼarea. Yibariraba Jeowaba obʉ kĩrãkʼa opanʉbʉrʉ kʼarebabʉ yi wũãwũãrata waribʉrʉde kristiano bia bamarẽã. Bʉra zeze bia baseabʉ bʉa bʉ mebẽrãta bia akʉbʉbʉrʉ akʉza mebẽrã kongregasionebemarata, adewara kãgata ũdubibʉbʉrʉ ãyaʼa, adewara ũrĩbʉbʉrʉ ãya jarabʉta ibiade (Juan 15:9). Bʉa idi ewade maʉ̃ nebiata erbʉbʉrʉ bʉra nebia kĩrãkʼabayi Jeowaita, mebẽrãita akʉza kongregasionʼraita.

¿ATIARA KʼÃRẼTA OI BɄARA?

19, 20. ¿Kʉ̃rarãra kʼãrẽba kʼarebai kristianora bia bʼaita? (Akʉra poto yi nããrabemata).

¹⁹ Marara mejãcha zarea odaibara kristiano bia bʼaita, kʼawuaibara kʼaita mara yizara bia bʼaita, bia krĩcha kʼawuaibara akʉza ũdubibara wãrĩnu bʉ ʉ̃rʉ ĩjãseabʉta, nekʼãrẽta kʼawuaibara, mawũã ʉ̃ra zeide kʼawuaita kʼãrẽ oita.

²⁰ Edaʉde bʉra mejãcha krĩcha zroma oseabʉ bʉa kʼãrẽ oi kʼarea, mamina bʉra bia wãseabʉ. Kĩrãbera bʉra Jeowabara kʼarebakĩrãbʉta (Is. 41:​10, 13). Mebẽrã kongregasionebemabida kʼarebakĩrãpanʉ, bʉta Jeowaba kãgabʉ kĩrãkʼa bʉbʉrʉ bʉ bebʉra jipa biabayi. Daibara kãga marara kʉ̃rara, maraʼa Jeowaba mejãcha nebia diaya, kʼãwũã zarea obʉ baera kristianora bia bʼaita (Prov. 22:4).