Marzo

Ẽjũã kĩrãwãreãra wabida ze ẽ, mamina krĩchadaibara nama nekʼãrẽ biabʉta: Bakururata, nedʉwʉrʉrata akʉza ẽbẽrarãta. Maʉ̃ra naena neẽbasimina, mia abaʉba jarabe ẽ maʉ̃ra neẽãta, maʉ̃ra nama ũdupanʉ Jeowaba parãsi baera (Gén. 1:​1, 26, 27). Jeowaba jarasi weita ẽjũã kĩrãwãreãta akʉza iya jaradara aripe oyi. Ẽjũã kĩrãwãreãnẽra ẽbẽrarãra ewari jõmaʉ̃nẽ panañi akʉza kayakabayi. Ẽjũã kĩrãwãreãra Jeowaba jidada ewaride zeyi (Is. 65:17; Apoc. 21:​3, 4). Ẽjũã kĩrãwãreã zeyeda, zarea ora bʉa ĩjãbʉ audre waribita. Jesu beida kʼarea biga diara, akʉra Jeowa zareata akʉza ewariza ora audre iyi kʼawa babibʉta. Bʉa mawũã obʉbʉrʉ oyi «ĩjãbʉba akʉza jʉ̃ãbʉba nebia ũdudaide kĩrãkʼa» (Heb. 6:​11, 12). w23.04 31 parr. 18, 19

Jesubara ʉ̃ta akʉ kʼãrãpe yiwidʼisi wuabemara daidu. Jesubara mawũã osi iya kãgabʉ baera jõmaʉ̃ta ibia bedʼeadamarẽã Jeowa ʉ̃rʉ, maʉ̃ tẽã jarasi: «Lázaro, ãĩ zera» (Juan 11:43). Maʉ̃ne ãĩ zesi Lázarora, mawũã Jesubara osi miõba okata. Maʉ̃ nebʉrabʉba dayirã kʼarebabʉ audre ĩjãbita beidara jẽda piradrʉita, ¿sãwũã ĩjãbibʉ? Kĩrãbedadrʉ Jesuba Marta jaradata: «Bʉ mebẽãra jẽda piradrʉyi» (Juan 11:23). Jesubara abarika yi Zezede kĩrãkʼa jẽda piradrʉbikĩrãbʉ, adewara zarea barabʉ. Jesu jẽgadaba ũdubibʉ beipanʉra akʉza pʉara wãrĩnu taʉbikĩrãbʉta. Lázaro beida jẽda piradrʉbidaba, Jesubara ũdubibʉ iyira zarea barabʉta beidara jẽda piradrʉbita. Idibema testode Jesuba Martaʼa jaradata kĩrãduada ẽ baibara. Kʼawuapanʉ Jeowaba beidara jẽda piradrʉi ʉ̃rʉ jarabʉra iyara jõma aripe berabaribita. w23.04 11, 12 parr. 15, 16

Dayirãbara awuara oseabʉ dayirã yiwidʼira kʼawua wãne Jeowaba kʼãrẽta kãgabʉta. Kĩrãbedaibara Jeowabara iya krĩchabʉra oita iya kãgabʉ ewaride. Maʉ̃ne edabʉ jipa jõbita akʉza wua neẽ baita idi ewade bedʼea zroma ũdupanʉra. Iya jõbikĩrãbʉ idi ewade bedʼea zroma dayirã zʉbʉriabibʉra. Bari jaraita, drʉade nekʼãrẽ berabaribʉta akʉza beibʉta, Jeowabara aripe berabaribiyi naʉ̃ra iyi Nokʼodeba (Dan. 2:44; Apoc. 21:​3, 4). Mamina maʉ̃ berabariyedara Jeowabara idu zokʼabinʉmʉ Diarua (Juan 12:31; Apoc. 12:9). Jeowaba kʼãwũãena naʉ̃ bedʼea zromata ara okʉara, mawũãra bayi Diaruba bia zokʼabʉ kĩrãkʼa. Mõbemata Jeowaba mesera ara oẽmina, maʉ̃ba jarakĩrãkʉ ẽ kʼareba neẽ amae ẽãta. Jeowaba dayirãra kʼarebayi. w23.05 8 parr. 4; 9, 10 parr. 7, 8

¿Sãwũã kʼarebaseapanʉ awuru ẽbẽrarãbida nebiata ũdumarẽã Jesu beida jẽda kĩrãbei ewaride? Nããra, dayirãba ãyira trʉ̃seabʉ jʉ̃ẽmarẽã maʉ̃ akʉde. Dayirãra deza deza wãpanʉ ẽbẽrarã trʉ̃ita Jesu beida jẽda kĩrãbeima jʉ̃ẽmarẽã. Mamina maʉ̃ daucha trʉ̃seapanʉ ẽbẽrarã dayirãba ũdukʼawuabʉta, dayirã neũdukʼawuarata, kolegiode ãba estudiabʉta akʉza trajode ãbabʉta. Mõbe ãyi trʉ̃ta bʉseabʉ kuadernone. Dayirãba karta Jesu beida jẽda kĩrãbeidebema mejãcha erbʉ ẽ mina, mensajede zokʼa bʉeseabʉ sama ũduseabʉta maʉ̃ karta internetʼne. Dayirãba maʉ̃ta obʉbʉrʉ ũdudayi naʉ̃ ewaridera ẽbẽra mejãchaʉta jʉ̃ẽita (Ecl. 11:6). Kĩrãbedaibara dayirãba ẽbẽrarã jarabʉrʉde Jesu beida jẽda kĩrãbeima wãmarẽã maʉ̃nera ãyara bedʼea mejãcha widita, audre ãyita ãba yi jʉrebarima jʉ̃ẽkabʉrʉ. Maʉ̃ba jipade yibia dayirãba ãyi jarai nãã krĩchaita sãwũã panʉita dayirãʼa bedʼeata widira. Jesu beida jẽda kĩrãbebʉ jõna tẽãra ẽbẽrarãbara bedʼea mejãcha widiseabʉ. Dayirãbara nekʼãrẽ jõma okĩrãpanʉ kʼarebaita yi ẽbẽrarã wãrĩnu kʼawuakĩrãpanʉraba nebiata ũdumarẽã Jesu beida jẽda kĩrãbebʉdeba (Hech. 13:48). w24.01 12 parr. 13, 15; 13 parr. 16

Daizeze Bedʼeadera jarabʉ ẽbẽrarã 8 beidata jẽda piradrʉbida ʉ̃rʉ. Kĩrãkita estudiara naweda ẽbẽrarã beida jẽda piradrʉda ʉ̃rʉra, maʉ̃ra nebʉra ʉ̃rʉ lebʉrʉde, kʼawuara sãwũã Jeowaba jẽda piradrʉbikĩrãbʉta beidara akʉza zarea barabʉta, adewara bia krĩchara beida jẽda piradrʉda yi audre yibia ʉ̃rʉ, Jesu ʉ̃rʉ. Adewara krĩchara Jesu beida jẽda piradrʉsidera, ẽbẽra mejãchaʉba ũdusita. Naʉ̃ba kʼarebabʉ dayirãba beida jẽda piradrʉi ʉ̃rʉ ĩjãbʉra audre ĩjãita (1 Cor. 15:​3-6, 20-22). Jeowaʼa mejãcha biga diapanʉ beidara jẽda piradrʉbi baera. Dayirãbara naʉ̃ra wãrĩnu ĩjãpanʉ aripe berabaribita Jeowabara, iyara okĩrãbʉ baera akʉza zarea barabʉ baera. Maʉ̃ kʼarea ewariza zarea odaibara audre zarea ĩjãnaita beida jẽda piradrʉi ʉ̃rʉra. Mawũã zarea opanʉbʉrʉ dayirãra audre Jeowa kʼawapanañi. Jeowaba dayirã jarabʉrʉ kĩrãkʼabʉ: ‹Mara mebẽrã beidara akʉza jẽda panañi› (Juan 11:23). w23.04 8 parr. 2; 12 parr. 17; 13 parr. 20.

Bedʼea modestia akʉza bedʼea humildad abarikabʉ kĩrãkʼabʉ. Bedʼea modestiabara jarakĩrãbʉ dayitrʉ jʉ̃zaba krĩcha ẽ baita akʉza sainʉ oita kʼawuaita. Humildadba jarakĩrãbʉ edabʉta krĩchabʉta akʉza krĩchabʉde wuabemaratrʉ audre yibiata dayirãira (Filip. 2:3). Ẽbẽrarãba kʼawuabʉbʉrʉ sainʉ oita, eda krĩchabʉta ũdubibʉ. Gedeónbara eda krĩchabʉta ũdubibasi akʉza kʼawuabasi sainʉ oita. Angelba jaraside Gedeónba ẽdrʉbita israelitara madianitara juwadeba, iya jarasi: «Manasésdebemanera mʉ̃ mebẽrã kʼãrẽ ẽ kĩrãkʼabʉ akʉza mʉ̃ zeze dedabemara mʉ̃ta yi audre kʼãrẽ ẽ kĩrãkʼabʉ» (Jue. 6:15). Iya krĩchabasi maʉ̃ra obe ẽãta, mamina Jeowabara kʼawuabasi iya oseabʉta. Jeowa kʼarebadeba Gedeónbara aripe osi Jeowaba zokʼadara. Zõrãrãbara zarea obʉ ũdubita sainʉ oita kʼawuabʉta akʉza eda krĩchabʉ ũdubita, nekʼãrẽ jõma obʉde (Hech. 20:​18, 19). Aukʼara bedʼea ẽ ãya nebia obʉ kʼarea akʉza krĩcha ẽ ãyira zeri ẽãta nekayiruata obʉ baera. w23.06 3 parr. 4, 5

Yuwẽrã nejʉra burura birachita, maʉ̃ra aripe berabariyi Jesuba Diaru jipa jõbibʉrʉde 1.000 poaga berabarida tẽã (Apo. 20:​7-10). Maʉ̃ berabari nãã Daizeze Bedʼeaba ʉ̃ra zeide kʼãrẽ berabari ʉ̃rʉ jarabʉ. Nããrãra nokʼorabara jaradayi dayirãra «aduʼa bʼaita» (1 Tes. 5:​2, 3). Nokʼoraba maʉ̃ta jarabʉrʉde jʉ̃drʉyi zʉbʉria zromata, maʉ̃ra berabariyi nokʼoraba religionʼra zeri ẽã jõma pẽwãbʉrʉde (Apoc. 17:16). Maʉ̃ tẽã Jesubara ẽbẽrarãra kʼawua oyi akʉza iyara obeja kĩrãkʼabʉrãra jʉ̃zaba bʉeyi akʉza yi chibo kĩrãkʼabʉrãra jʉ̃zaba bʉeyi (Mat. 25:​31-33, 46). Mamina Diarura piki ba ẽ bayi maʉ̃ berabarinʉmʉnera, iyara oyi nokʼora jõmaʉ̃ta ãba zemarẽã Jeowa pʉwʉrʉ pẽwãita, maʉ̃ra nokʼora ãba zepanʉrãra Daizeze Bedʼeabara trʉ̃gabʉ Gog de Magog (Ezeq. 38:​2, 10, 11). Maʉ̃ mawũã berabarinʉmʉne ʉ̃kʉrʉ ẽbẽrarã ʉ̃ta wãirãra waidide nama egorode panʉrãra, ʉ̃ta wañi Jesuʉ̃me ãba bʼaita akʉza mawũã Diaruʉ̃me panʉrabawara yõita Armagedónʼne (Mat. 24:31; Apoc. 16:​14, 16). Maʉ̃ jõma berabarida tẽã Jesuba zokʼa jʉ̃drʉyi 1.000 poagabayeda, iyara zokʼayi ʉ̃tʉba nama egorode panʉrata (Apoc. 20:6). w23.10 20, 21 parr. 9, 10

Ʉ̃kʉrʉ pʉwʉrʉdera iduaribida ẽ Daizeze Bedʼea jaradiaita. Mawũãsidu mebẽrãbara nokʼora wawia ũdubipanʉmina, iduaribida ẽ Abdíasba oda kĩrãkʼa Jeowaba zokʼabʉ oita (Mat. 22:21). Jeowa wawia ũdubipanʉ ẽbẽrarãba zokʼabʉ oi kaude (Hech. 5:29). Maʉ̃ wawiara ũdubipanʉ Daizeze Bedʼea jaradiabʉde akʉza jʉra kʼawua ãba yi jʉrepanʉne (Mat. 10:​16, 28). Nekʼãrẽ mejãcha obʉ mebẽrãba nesidabʉ erbamarẽã, mawũã Jeowa kʼawa bʼaita. Akʉdaya Henri nebʉrata, iyira Áfricadebema, nããrãra iyi pʉwʉrʉ badamaera Daizeze Bedʼea jaradiabikĩrãna ẽ basi. Henribara maʉ̃ pʉwʉrʉde Daizeze Bedʼea jaradiabi ẽ basidera iya jarasi mebẽrãita karta edeita Daizeze Bedʼeadebemata, iya jarasi: «Mʉ̃ra warrarainʉba paebʉ, Jeowata wawia ũdubibasi baera zowaĩnĩgʉata erbesi». ¿Bʉara Henride kĩrãkʼa zowaĩnĩgʉa ũdubiseabʉka? Mawũã zowaĩnĩgʉa bʼaira wãrĩnu Jeowa wawiabʉta ũdubibara. w23.06 16 parr. 9, 11

Adánba Evaʉ̃meba Jeowaba jarada ũrĩ ẽ bada tẽãra, krĩchaseapanʉ Jeowaba naʉ̃ drʉa ẽbẽrarãba biramarẽã kãgabadara Diaruba iduaribi ẽ basita. Diarubara krĩchasibaibara Jeowaba iya kʼãrẽ oita krĩchabʉra obe ẽ baita. Krĩchasibaibara Jeowaba iya oita krĩchabʉ oira, Adánta Evaʉ̃me beaibarabasita akʉza awuru ẽbẽrarãta parãibarata. Mamina Jeowaba maʉ̃ta osibʉrʉ Diarubara jaraseabasi iyira sewa nebʉrʉ omiata, ¿kʼãrẽã? Génesis 1:28de Jeowaba jarasi baera Adán akʉza Evadeba zebʉrʉra wũãwũãraba biraibasita naʉ̃ drʉara. Adewara Diaruba krĩchaseabasi naʉ̃ drʉara biraita, mamina ẽbẽra kayirua omiaraba akʉza ãyira ewari jõmaʉ̃nẽ kayirua omiabaibasita (Ecl. 7:20; Rom. 3:23). Maʉ̃ta mawũã berabarisibʉrʉ Diarubara krĩchaseabasi Jeowabara oau ẽãta iya oita krĩchabʉra, ¿kʼãrẽa? Jeowabara kãgabasi baera naʉ̃ drʉara jõma biramarẽã ẽbẽrarã kayiruara okaraba, mamina ẽbẽra kayirua omiaraba birabasibʉrʉ aripe berabari ẽ baibasi. w23.11 6 parr. 15, 16

Jeowabara Daizeze Bedʼeadeba akʉza iyi organizasioneba dayirã ẽza jara ũrĩbibʉ kʼãrẽta oibarata. Maʉ̃ba dayirãbara neẽ kʼãrẽ eda bʉeira (Prov. 3:​5-7). Maʉ̃ba dayirãbara Daizeze Bedʼeade eda zokʼabʉde wuetara oẽ akʉza wuabemara jara ẽ kʼãrẽta oibarata. Diarubara sewabʉ ẽbẽrarã sewa nebʉradeba, mawũã awuara krĩchapanamarẽã (Col. 2:8). Bari jaradaita, siglo nããbemanera Diarubara sewasi ẽbẽra krĩchadeba. Judiorabara jaradiapanasi Daizeze Bedʼeade edabʉ ẽãta akʉza jarapanasi kristianorabara oibarabasita Jeowaba Moisésʼa Ley diadata, maʉ̃ra jipa sewidabasi, maʉ̃ba obasi baera ẽbẽrarãba wãrĩnuta kʼawuada ẽ marẽã Jeowa ʉ̃rʉ. Idi ewadera Diarubara zokʼabʉ ẽbẽra sewaita telebisorta, internetʼta, radiota. Adewara politikorabida maʉ̃ta zokʼabʉ wuabemara sewaita. w23.07 16 parr. 11, 12

Jeowaba jʉrʉsi sãwũã aripe oita iya kʼãrẽta oita krĩchabʉra. Diaruba, Adánba akʉza Evaʉ̃meba iyi bedʼea ũrĩ ẽ basimina. Jeowabara iduaribisi Adánba Evaʉ̃meba wũãwũã todamarẽã, mawũã iya jarada aripe berabarimarẽã. Iyira sewa nebʉrʉ omia ẽ, maʉ̃ba Jeowaba nei oya abʉbʉrʉ, maʉ̃ra wãrĩnu oyi. Iyara ẽbẽra aba zokʼasi mawũã Adán akʉza Evadeba zeda wũãwũãrata ẽdrʉbita akʉza mawũã aripe berabarimarẽã iya kʼãrẽ oita krĩchabʉra (Gén. 3:15; 22:18). Naʉ̃ ẽbẽrabara iyi bebʉta diaibasi ẽbẽrarã ẽdrʉbita. Diarubara jʉ̃ã ẽ basi Jeowaba maʉ̃ oira, ¿kʼãrẽa mawũã jʉ̃ã ẽ basi? Diarura ẽbẽra kayirua baera iyira kãga neẽ, mamina Jeowabara dayirãra kãga baera, ẽbẽra aba zokʼa bʉesi dayirã bari beimarẽã (Mat. 20:28; Juan 3:16). Jeowaba maʉ̃ ẽbẽra dayirãbari beimarẽã zokʼadadebara, ¿kʼãrẽta berabari? Jesuba zokʼabʉta 1.000 poaga berabarida tẽãra Adán akʉza Evadeba zedarãra ẽjũã kĩrãwãreãnẽ panañi akʉza kayirua okabayi Jeowaba krĩchabada kĩrãkʼa. w23.11 6 parr. 17

Wawia ũdubipanʉ dayirã bebʉra akʉza wasida. ¿Kʼãrẽã? Jeowaba jarabʉ wara dayirã bebʉta akʉza bebʉra iya diada (Lev. 17:14). Jeowaba iduaribiside ẽbẽrarã nedʉwʉrʉ chichita komarẽã, jarasi wata ko ẽ marẽã (Gén. 9:4). Adewara iyabaʉta jarasi israelitara Moisésdeba Leyta diaside (Lev. 17:10). Nããbema siglodera Zõrãrã Buru biadeba kristianora jarasi wata koda ẽ marẽã (Hech. 15:​28, 29). Dayirãbida nama naʉ̃ leyba jarabʉde okĩrãpanʉ, medikoraba kʼãrẽ tratamiento oita jarabʉrʉde. Adewara wawia ũdubipanʉ Jeowaba zokʼabʉta mia erkʼãĩ ʉ̃rʉ. Apostol Pabloba jarasi: «Beaibara, dayirã kakuadebemara». Naʉ̃ ũrãgʼa biaba dayirã kʼarebabʉ dayi sode akʉza krĩchade nemitia oita krĩchabʉ ãĩ bʉeita. Bari jaraita, akʉda ẽ baibara akʉza nekʼãrẽ oda ẽ baibara dayi mia erkʼãĩena edebʉta (Col. 3:5; Job 31:1). w23.07 15 parr. 5, 6

Sansónbara maʉ̃ wẽrãra wãrĩnu kãgabasi baera ũdu ẽ basibaibara iya kʼãrẽta okĩrãbadara. Dalilabara jarada ʉ̃rʉ jarabasi Sansónʼa iyaʼa jaramarẽã kʼãrẽa mejãcha zarea barabʉta. Iya naʉ̃ wẽrã bedʼeata ũrĩsi baera aduasi iya zarea erbadata akʉza Jeowaba bia akʉbʉta (Juec. 16:​16-20). Sansónʼra mejãcha zʉbʉriasi Dalila ʉ̃rʉ ĩjãsi baera Jeowa ʉ̃rʉ ĩjãi kaude. Iyira pilisteorabara jidada kʼãrãpe dabʉ ãĩ bʉesida. Iyira pilisteorabara Gazaeda edesida karselde eda bʉeita. Tẽã iyira nezokʼa babisida mawũã neta bamarẽã. Pilisteorabara sakripisio zromata diasida ãyi daizeze zeri ẽã Dagónʼa. Ãya krĩchapanasi baera naʉ̃ba kʼarebasita Sansón jidaita. Maʉ̃ne Sansónʼra ãyidu wesida mawũã iyi kʼarea ipidaita (Juec. 16:​21-25). w23.09 5, 6 parr. 13, 14

Edaʉde dayirãʉ̃me estudiabʉba mawũã ẽ bʉrʉ trajabʉba widiseabʉ dayirãba kʼãrẽa obʉta Daizeze Bedʼeaba jarabʉra. Maʉ̃nera dayirãbara ẽbẽrarã jara ũrĩbibara kʼãrẽa mawũã opanʉta, mamina ibiade oibara (1 Ped. 3:15). Edaʉde yibia ẽbẽrarãba daya mawũã widibʉrʉdera, naʉ̃ba kʼarebabʉ baera kʼawuaita ãya kʼãrẽta krĩchabʉta akʉza krĩcha ẽ baita ãya mawũã opanʉta dayirã kĩrʉbita. Krĩchada ẽ baibara ẽbẽrarãba dayirã bedʼea widibʉrʉdera kʼãrẽa mawũã opanʉta, awuarabʉrʉ zarea oibara ewari jõmaʉ̃nẽ ibiade panʉita, mawũã opanʉbʉrʉ ẽbẽrarãba bia krĩchaseapanʉ dayirãba ĩjãbʉ ʉ̃rʉ. Dayirãʉ̃me ãba trajabʉba dayirã widira kʼãrẽa dayirãbara dayirã toda ewari piestara o ẽãta, naʉ̃ ʉ̃rʉ krĩchaibara: ¿Iyara maʉ̃ra widibʉka krĩchabʉ baera dayirãra sobia bakĩrã ẽãta? Dayirãba iyaʼa jaraseapanʉ jipade yibiata iya kʼãwũã kãgabʉ baera ẽbẽrarã trajodepanʉra aduʼapanamarẽã. Dayirãba mawũã opanʉbʉrʉ naʉ̃ba kʼarebayi dayirãʉ̃me ãba trajabʉba audre kʼawuakĩrãmarẽã Daizeze Bedʼeaba kʼãrẽta jarabʉta dayi toda ewaride piesta oi ʉ̃rʉ. w23.09 17 parr. 10, 11

Kʼãrẽãba yibiabayi dayirãba dayi ewarita bia zokʼapanʉbʉrʉ ẽbẽrarã naʉ̃ drʉa jõmaʉ̃nẽdebemara jaradiaita. Apostol Pedroba dayirã jarasi «ʉrʉma [jʉ̃ãpanamarẽã] Jeowa ewari zeyeda» (2 Ped. 3:​11, 12). Ewariza krĩchadaibara ẽjũã kĩrãwãreãnẽ sãwũã biʼia panai ʉ̃rʉ. Bari jaraita yiko warra koita, akʉza dayirã mebẽrãnebema beida jẽda piradrʉbʉrʉde ũduita, adewara ẽbẽrarã beida dããraba jara ũrĩbita sãwũã Daizeze Bedʼeade propesia jarabʉra aripe berabarisita. Naʉ̃ ʉ̃rʉ krĩchaiba kʼarebayi naʉ̃ ewari zeita jʉ̃ãita akʉza kʼawuaita dayirãra ewari jõbodoare panʉta. Adewara kʼarebabʉ wuabemaraba jarabʉ kʼarea aña krĩcha ẽ baita, biʼia kʼawuapanʉ baera ʉ̃ra zeide kʼãrẽta berabarita. w23.09 27 parr. 5, 6

Idi ewadera warrara audurabʉ ẽbẽrarã yi yibarira bedʼea ũrĩkĩrã ẽãta (2 Tim. 3:​1, 2). ¿Kʼãrẽa ʉ̃kʉrʉ warraraitara zareabʉ ãyi yibarira bedʼea ũrĩra? Ʉ̃kʉrʉba krĩchapanʉ baera ãyi yibarirabara oẽãta ãyaʼa omarẽã jarapanʉta akʉza awururaba krĩchapanʉ naʉ̃ ewarira audre awuara wã baera ãyi yibariraba ũrãgʼa diabʉra zeri ẽãta. Mawũã ẽ bʉrʉ krĩchapanʉ ãyi yibarirabara nekʼãrẽ aukʼara omarẽã jarapanʉta. ¿Bʉra mawũã sentibarika? Warrara mejãchaitara zare ũrĩta Jeowaba idibema testode omarẽã zokʼabʉra. ¿Kʼãrẽba kʼarebaseabʉ maʉ̃ ũrĩta? Bʉara Jesu yiza biadeba kʼawuaseabʉ (1 Ped. 2:​21-24). Jesura nemitia okabasi, mamina iyi yibarirãra nemitia omiabasi, maʉ̃ba ãyara edaʉde nekʼãrẽ aña opanasi, mawũãsidu Jesubara ũrĩbasi ãya jarabʉra (Éx. 20:12). w23.10 7 parr. 4, 5

Apostol Pabloba ãyaʼa jara ũrĩbisi ãya sakripisio Moisés leyba jarabʉde obadabara jipa ãĩ bʉe ẽãta ãya kayirua obʉra. Maʉ̃ kʼarea Jeowaba jarasi maʉ̃neba ʉ̃ta maʉ̃ leyba jarabʉra ũrĩ ẽ baibarata. Maʉ̃ kʼarea Pabloba ãyaʼa jara ũrĩbisi bedʼea audre yibiata, ãyaʼa jara ũrĩbisi sãwũã Jesu beidaba kʼarebabʉta ãyi audre Jeowa kʼawa bʼaita (Heb. 7: 19). Pabloba kristianora ebreora jara ũrĩbisi ãya Jeowaʼa sãwũã yiwidʼibʉra audre yibiabasita ãyi religion judiade baside obadaira. Judioraba Moisés leyba jarabʉde Daizezeʼa sãwũã yiwidʼibadabara ũdubikĩrãbasi Jesu zebʉrʉde sãwũã yiwidʼibarabasita (Col. 2:17). Judioraba Jeowaʼa sãwũã yiwidʼibadabara bari ũdubibasi ʉ̃ra zeide sãwũã yiwidʼibarabasita Jeowaʼa. Jeowabara nekʼãrẽ osi dayirã kayirua kĩrãduaita akʉza dayirãba iya yiwidʼidamarẽã iya kãgabʉde. Maʉ̃ba dayirãbara biʼia kʼawuaibara iya kʼãrẽta osita maʉ̃ta berabarimarẽã. w23.10 25 parr. 4, 5

Daniel yi zroma 11de bedʼeabʉ nokʼo zroma ũme ʉ̃rʉ. Ãyira yõbʉ yiya kʼaita audre yi zroma bʼaita akʉza naʉ̃ drʉa jõma kʼaiba zokʼaita. Maʉ̃ propesia wuabemara propesia Daizeze Bedʼeade akʉbʉrʉdera kʼawuaseapanʉ nokʼo nortedebemara Rusia akʉza nokʼo surdebemara Estados Unidos akʉza Gran Bretaña. Nokʼo norte zokʼabʉmaebʉra, mejãchade zʉbʉriabʉ ãyaʼa pẽwãpanʉ baera. Ʉ̃kʉrʉ mebẽrãta popanʉ, ʉ̃kʉrʉta karselde eda ibalbʉepanʉ ãya ĩjãbʉ kʼarea. Maʉ̃ nokʼo nortedebemaba obʉ kʼarea mebẽrãrarã perada ẽ, awuarabʉrʉ ãya ĩjãbʉta ʉ̃ta zarea babibʉ. ¿Kʼãrẽa mãwũã ĩjãpanʉ? Maʉ̃ra mebẽrãba kʼawuapanʉ baera Danielba jaradara Daizeze pʉwʉrʉ pẽwãnai ʉ̃rʉra wãrĩnuta (Dan. 11:41). Maʉ̃ kʼawuaiba kʼarebayi Jeowaʉ̃me kʼẽrẽpa bʼaita. w23.08 11 parr. 15, 16

Jeowaba kãga dayirãra. Maʉ̃ba iya kʼawuabʉ dayirã sãwũã sentibʉra akʉza kʼarebakĩrãbʉ. Dayirã zʉbʉriabʉrʉdera iyisida zʉbʉriabʉ. Maʉ̃ba iyaʼa yiwidʼibʉrʉdera jaraseapanʉ dayirãta biʼia akʉmarẽã iyi dabʉ jã akʉbʉ kĩrãkʼa (Sal. 17:8). Dayirã dabʉ jãra jipade bia akʉibara, naʉ̃ta tõbarira pʉ, mawũã ẽ bʉrʉ neida berabariseabʉ. Jeowabara jarabʉ dayirãra iyi dabʉ jã kĩrãkʼabʉta. Maʉ̃ba iya dayirã jarabʉ kĩrãkʼabʉ: «Mara tõbaribʉra mʉ̃ dabʉ jãta tõbaribʉ kĩrãkʼabʉ».Jeowaba kãgabʉ dayirãba kʼawuadamarẽã iyara dayirã aba abakaʉʼa kãga ũdubibʉta. Mamina iya kʼawuabʉ dayirãitara edaʉde zarea baseabʉta ĩjãita iya dayirã kãgata, dayirã nãã sãwũã berabarida kʼarea. Mawũã ẽ bʉrʉ dayirãba ũduseabʉ bedʼea zromata, maʉ̃ kʼarea zarea baseabʉ ĩjãita Jeowaba dayirã kãga ũdubibʉ ʉ̃rʉ. ¿Kʼãrẽba kʼarebai dayirãba audre ĩjãita? Kʼawuaibara Jeowaba sãwũã kãga ũdubibʉta yi warra Jesuʼa akʉza ʉ̃ta wãira, adewara dayirã. w24.01 27 parr. 6, 7

Esdrasba ũdusi Jeowaba sãwũã kʼarebabasita iyi pʉwʉrʉba bedʼea zroma ũdubʉrʉde. Poaga 484de Kristo nãã, nokʼo Asueroba zokʼasi judiorata makenanamarẽã, maʉ̃nera Esdrasʼra Babilonianebasibaibara (Est 3:​7, 13-15). Maʉ̃ ewaridera Esdrasʼra akʉza yi wuabemara judiorãra bebʉdepanasi, maʉ̃ kʼarea ãyira ayunasida akʉza Daizezeʼa kʼareba widisida (Est. 4:3). Judiorãra mejãcha sobiasidabaibara ãya ũdusidade ãyi nejʉrarata beisita ãyita bei kaude (Est. 9:​1, 2). Esdras kʼãwũã berabaridaba kʼarebasi iya tẽã bedʼea zroma ũdubʉrʉde awuantaita akʉza kʼawuaita Jeowabara iyi pʉwʉrʉra kʼarebaita. w23.11 17 parr. 12, 13

Apostol Pablobara jarakĩrãbasi oibarata Moisésba israelitara ley diadata (Rom. 3:​21, 28). Pablo ewaribasidera ʉ̃kʉrʉitara zarebasibaibara ĩjãita Moisés leyta. Maʉ̃ kʼarea Pabloba Abrahán yizata jara ũrĩbisi ũdubita nesida ẽãta leyba jarabʉ jõma oita Daizezeba bia akʉmarẽãra. Maʉ̃ tẽãra Pabloba jara ũrĩbisi kʼãrẽta oibarata ĩjã erbaita. Naʉ̃ba sobiabibʉ dayirãra, kʼawuapanʉ baera Daizeze ʉ̃rʉ akʉza Jesu ʉ̃rʉ ĩjãbʉbʉrʉ, Jeowabara dayirãra bia akʉbʉta. Adewara Santiago kapitulo 2ba nekʼãrẽ oi ʉ̃rʉ bedʼea jaradara, jarakĩrãkʉa ẽ basi oita Pabloba leyde jaradata. Santiagoba jaradara jarakĩrãkʉasi kristianoraba ewariza opanʉta (Sant. 2:24). Maʉ̃ba ũdubibasi wãrĩnu ĩjã erpanʉ kʼawuaita. Akʉdaya yiza ũme Santiagoba zokʼadata. w23.12 3 parr. 8; 4, 5 parr. 10, 11

Mebẽrã wẽrãraba juwa jidaita krĩchabʉbʉrʉ jʉra kʼawuabara kʼaiʉ̃me juwa jidaita. Juwa jidai nããra biʼia krĩchaibara akʉza kĩrãbera bʉara wawia ũdubibarata bʉ kima bʼaiara (Rom. 7:2; Efes. 5:33). Bʉyikʉza krĩchara: «¿Naʉ̃ mebẽãbara zarea obʉka Jesude kĩrãkʼa krĩchaita akʉza oita? ¿Iyara nããra obʉka Jeowaba kãgabʉta? ¿Nekʼãrẽ bia jida kʼawuabʉka? ¿Iya kayirua obʉrʉdera ĩjãbʉka maʉ̃ra iya osita? ¿Wawia ũdubibʉka yuwẽrãra? ¿Iyara mʉ̃ra kʼarebaika Jeowa neũdukʼawua bʼaita akʉza diaika mʉ̃a nekʼãrẽ nesidabʉra? ¿Adewara iyira mʉ̃ neũdukʼawua bia bʼaika? Mamina kĩrãbera bʉa kima biata ũdukĩrãbʉbʉrʉ bʉsida kima bia bʼaibarata. Yuwẽrãra yi kima kʼarebata (Gén. 2:18). Iya Jeowata kãgabʉ baera zarea obʉ wuabemaraba ũdudamarẽã yi kimaba kʼãrẽ nebia erbʉta (Prov. 31:​11, 12; 1 Tim. 3:11). Bʉra audre kima bia baseabʉ zarea obʉbʉrʉ Jeowa kʼaita bʼaita akʉza kʼarebabʉbʉrʉ bʉ mebẽrãta, adewara mebẽrã kongregasionebemata. w23.12 22, 23 parr. 18, 19

Jeowabara diabʉ dayirã buru biata. Mawũã nekʼrẽ jidabʉrʉde dayirãba bia jida kʼawuaita. Dayirãba audre nesidabʉ Jeowaba dayirã buru bia diamarẽã, mawũã nekʼãrẽ jidabʉrʉde dayirã bebʉ awuara babita. Jeowabara diabʉ dayirã zareata mawũã awuantamarẽã. Jeowaba Pabloʼa so zarea diada kĩrãkʼa, dayirãbida diayi so zarea bedʼea zroma awuantaita (Filip. 4:13). Iyara kʼarebabʉ dayirã mebẽrã kongregasionebemaneba. Jesu diamasi iyi bei naena mejãcha yiwidʼisi Jeowaʼa. Iya Jeowaʼa widisi, iyira ẽbẽra kayirua kĩrãkʼa beibi ẽ bamarẽã. Mawũã Jeowa trʉ̃ra imitia jarada ẽ marẽã. Iya widida kĩrãkʼa panʉ ẽ basimina Jeowabara zokʼa bʉesi angelta iyaʼa so zarea diamarẽã (Luc. 22:​42, 43). Jeowabara dayirã mawũã so zarea diaseabʉ dayirã mebẽrãneba, mawũã ẽ bʉrʉ dayirã telepononeba trʉ̃panʉneba. Dayirã jõmaʉ̃ba jʉrʉibara sãwũã dayirã mebẽrã bedʼea bia jaraita (Prov. 12:25). w23.05 10, 11 parr. 9-11

Jeowa ode kʉrãzapanʉra Jesu beida jẽda kĩrãbeima jʉ̃ẽinara perabasibaibara wuabemaraba ãyi ʉ̃rʉ kʼãrẽ jarai kʼarea. Maʉ̃ba zarea odaibara ãyaʼa bedʼea widibʉrʉde mitia sentibi ẽ baita. Ãyira dayirã mebẽrã, maʉ̃ba mejãcha sobiapanʉ akʉza jẽda ãbaʉba odai baera Jeowaba kãgabʉta (Sal. 119:176; Hech. 20:35). Jipade biga diapanʉ Jesuba jarasi baera iyi beida ewarita jẽda kĩrãbedamarẽã. Maʉ̃ba jipade yibia bia ũrĩta kʼãrẽa kĩrãbeita maʉ̃ ewarita. Mawũã opanʉbʉrʉ dayirã jõmaʉ̃ba nebiata ũdudayi (Is. 48:​17, 18). Adewara dayirã Jesu beida jẽda kĩrãbeima wãbʉrʉdera dayirãba Jeowata akʉza Jesu kãgabʉra audre waribʉ. Akʉza ãyaʼa biga diapanʉ dayirãbari kʼãrẽ oda kʼarea. Adewara dayirã mebẽrãʉ̃me audre ãbapanʉ. Akʉza dayirãbara kʼarebaseapanʉ awuru ẽbẽrarãbida ũdumarẽã nebia dayirãba ũdubʉta Jesu dayirã kʼarea beidadeba. Maʉ̃ba zarea odaibara kʼawuaita kʼãrẽta oita maʉ̃ ewari bia zebʉrʉde wãita. w24.01 14 parr. 18, 19

Jeowaba dayirãba kʼãrẽta oibarata jaradiabʉ Daizeze Bedʼeadeba mawũãsidu iya zokʼabʉ ẽbẽrarata. Bari jaraita, iya jaradiabʉ dayirã Zõrãrã Burubiaraneba, ãyita zokʼabʉ dayirãʼa yiko jauredebema diaita. Maʉ̃ba kʼarebabʉ dayirãba nekʼãrẽ oita jidabʉrʉde bia jidamarẽã (Mat. 24:45). Jeowabara adewara zokʼabʉ awuru mebẽrãsida dayirãʼa jaradiaita. Bari jaraita, zokʼabʉ kongregasionʼra akʉbari zõrãrãta akʉza zõrãrã kongregasionebemarata. Ãya so zarea diabʉ akʉza jaradiaseabʉ dayirãba bedʼea zroma ũdubʉrʉde kʼãrẽta oseabʉta. Idi ewade dayirãra ewari jõbodoarepanʉ baera, mejãchade biga diapanʉ kʼãwũã dayirã jaradiapanʉ baera. Naʉ̃ba kʼarebabʉ ewari jõmaʉ̃nẽ Jeowaba kãgabʉde bʼaita akʉza idi ewade sobia bʼaita, adewara ʉ̃ra zeidebida sobia bʼaita. Edaʉde dayirãitara zarea baseabʉ Jeowaba jaradiabʉ ũrĩra, audre naʉ̃ta ẽbẽrarã nama egorodebemaneba zebʉbʉrʉ. Maʉ̃ mawũã berabaribʉrʉdera dayirãbara nesidapanʉ ĩjãita mebẽrãba jarapanʉra Jeowadeba zebʉta akʉza ãya ũrãgʼa diabʉta ũrĩpanʉbʉrʉ, naʉ̃neba nebiata ũdudaita. w24.02 20 parr. 2, 3

Dayirãbara Jeowara audre kãga wãseabʉ iyi bedʼeata kĩrãkita akʉpanʉbʉrʉ. Daizeze Bedʼea akʉbʉrʉde bia kʼawuara kʼãrẽta jaradiakĩrãbʉta Jeowa ʉ̃rʉ. Bʉyikʉza widira: «¿Naʉ̃ testoba sãwũã ũdubibʉ mʉ̃ra wãrĩnu Jeowaba kãgabʉ kʼawuaita? ¿Naʉ̃ testoba sãwũã ũdubibʉ mʉ̃ara kʼãrẽa kãgaibarata Jeowara?». Adewara dayirãba Jeowa kãgabʉra wari wãbiseabʉ, dayirã sãwũã sentibʉ iyaʼa jarabʉde (Sal. 25:​4, 5). Akʉza Jeowabara dayirã yiwidʼira panʉñi (1 Juan 3:​21, 22). Adewara dayirãba wuabemara kãgabʉra audre wari wãibara. Kristiano bada tẽã Pabloba ũdukʼawuasi Timoteota. Iyara kãgabasi Jeowara akʉza wuabemara ẽbẽrarãsida. Pablobara naʉ̃ta jarasi: «Mʉ̃are iyi kĩrãkʼabʉta neẽ baera [Timoteo], iyara marata wãrĩnu krĩchabʉ baera» (Filip. 2:20). Pablobara bia akʉbasi Timoteoba sãwũã mebẽrã kãga ũdubibadata. Timoteoba kongregasion akʉ jʉ̃ẽbadabara jʉ̃ãkĩrã jʉ̃ãpanasi (1 Cor. 4:17). w23.07 9 parr. 7-10

Israel pʉwʉrʉ Jeowaba drʉa bia diaya adama jʉ̃ẽi nãã, beisi Moisésʼra. Iyi beida tẽãra, ¿Jeowabara iyi pʉwʉrʉra wua kʼareba ẽ basika? Mawũã ẽ, ãyi kʼẽrẽpabʉedara Jeowabara diasi ãya nesidabʉta. Moisés bei nãã, Jeowaba jarasi Josuéʼa jaradiamarẽã sãwũã zokʼaita iyi pʉwʉrʉta (Éx. 33:11; Deut. 34:9). Akʉza basi ʉ̃kʉrʉ yumakẽrãra pʉwʉrʉ nãã edebʉta, ʉ̃kʉrʉra ẽbẽrarã 100bʉ burubasi akʉza ʉ̃kʉrʉra 50bʉ burubasi, ʉ̃kʉrʉra 10bʉ burubasi (Deut. 1:15). Jeowabara iyi pʉwʉrʉra biʼia akʉsi. Akʉza akʉdaya Elías yizata. Iyira zarea trajasi poaga biobayeda israelitara kʼarebaita Jeowaba kãgabʉde yiwidʼidamarẽã, mamina tẽã Jeowaba iyaʼa awuru trajota omarẽã diasi Judáde (2 Rey. 2:1; 2 Crón. 21:12). Ẽbẽrarã kʼẽrẽpapanʉra Israeldebema nokʼoba zokʼabadarãra, ¿Elíasta wãsi baera Daizezebara doba amaesika? Mawũã ẽ. Elíasbara Eliseoʼa jaradiasi. Mawũã Jeowaba iya oita krĩchabʉ aripe berabaribimarẽã. w24.02 5 parr. 12

Kristianora Éfesodebemarabara Jeowaba nekʼãrẽ omarẽã zokʼabʉa wawia ũdubisida akʉza maʉ̃ba ũnanebʉ kĩrãkʼapanasi (Sal. 119:105). Aya idubʉsida ãyi religion zeri ẽãra akʉza ãya kayirua obadasida. Adewara Daizezede kĩrãkʼa opanasi akʉza zarea opanasi Jeowaʼa yiwidʼita iya kãgabʉ kĩrãkʼa (Efes. 5:1). Maʉ̃ kĩrãkʼa nããra dayirãra religion zeri ẽãne basibaibara akʉza yi kayiruata obasibaibara. Ʉ̃kʉrʉ dayirãnebemabara religion zeri ẽãba piesta obʉta obasi, mawũã ẽ bʉrʉ Jeowaba nekʼãrẽ omarẽã zokʼabʉaʼa wawia ũdubida ẽ basi. Mamina dayirãba Jeowa ʉ̃rʉ wãrĩnuta kʼawuaside akʉza kʼawuaside saʉ̃ta bigata adewara saʉ̃ta biga ẽãta, idubʉsida dayirãba kʼãrẽ kayirua obadara. Akʉza ojʉ̃drʉsida nekʼãrẽ Jeowaba omarẽã zokʼabʉta, maʉ̃ kʼarea nebiata ũdusida (Is. 48:17). Kayirua daya nãã obadata akʉza religion zeri ẽãba piesta obʉ idubʉira zare, mamina dayirãbara Jeowaba zokʼabʉta oibara. w24.03 21 parr. 6, 7

Bʉa krĩchaseabʉ waidide bʉ bebʉ Jeowaʼa diabe ẽãta akʉza buru kʼoebe ẽãta, nekʼãrẽ awuara oibara baera, mawũã ẽ bʉrʉ nesidabʉ baera audre ĩjãita Jeowa ʉ̃rʉ (Col. 2:​6, 7). Daizeze Bedʼea ʉ̃rʉ kʼawuapanʉrabara, jõmaʉ̃ba Daizezera abarika kãga ze ẽ akʉza warrara jõmaʉ̃ba ãyi bebʉ Jeowaʼa dia ẽ wuabemara daucha. Akʉra kʼãrẽne audre bia oibarata, mamina krĩcharãra wuabemaraba obʉ kĩrãkʼa oibarata bʉabida (Gál. 6:​4, 5). Waidide krĩchabʉbʉrʉ Daizezeʼa bʉ bebʉ diaita waebʉta, krĩchara kʼãrẽta awuara oibarata mawũã tẽã bʉ bebʉ Jeowaʼa diaita. Jeowaʼa kʼareba widira bʉa nekʼãrẽ awuara oitabʉta ara oita (Filip. 2:13). Ĩjãra Jeowabara bʉa widibʉra panʉita (1 Juan 5:14). w24.03 5 parr. 9, 10

Ewari aba Sarara mejãcha krĩcha zroma obasi, jarasi Abrahánʼa iyi sãwũã sentibadata akʉza jarasi iyi kʼarea mawũã berabarinʉmʉta. Abrahánbara kʼawuabasi Sarara iya jarabʉrʉde basita akʉza ẽbẽra bia basita maʉ̃ba ũrĩsi mõbe ara oita krĩchasi maʉ̃ bedʼea zromara (Gén. 16:​5, 6). ¿Kʼãrẽta kʼawuapanʉ maʉ̃neba? Yumakẽrãra marabʉrʉ jidaseabʉ mara mebẽrã kʼareara (1 Cor. 11:3). Mamina bigabayi kʼãrẽ jidai nãã, yi kimabida widita kʼãrẽ krĩchabʉta maʉ̃ ʉ̃rʉ akʉza ũrĩta iya jarabʉta mawũã iyi sopʉabi ẽ baita (1 Cor. 13:​4, 5). Ewari aba Abrahánbara ẽbẽrarã jãpeba zedata bia edakĩrãbasi, maʉ̃ kʼarea jarasi Sara, iya nekʼãrẽ obadata idubʉ kʼãrãpe panta mejãcha wiamarẽã ãyita (Gén. 18:6). Sarabara Abrahánba jaradara ũrĩsi mõbe mesera osi. Yuwẽrãra juwa jidapanʉrabara ũrĩbara mara kima bedʼeara, mawũãra mara yiya kãgapanʉra audre wari wãñi (1 Ped. 3:​5, 6). w23.05 24, 25 parr. 16, 17

Gedeón juez bʼaita jidasidera Israel pʉwʉrʉ nãã bʼaibarabasi. Maʉ̃ oita ũdubibarabasi ũrĩbʉta akʉza zowaĩnĩgʉabʉta, iyaʼa jarasida Baal altarta ãrĩmarẽã yi zeze yiwidʼibadata (Juec. 6:​25, 26). Jeowaba jarada ũme jarasi iyi gorogororata eda babimarẽã (Juec. 7:​2-7). Akʉza jarasi iyi nejʉrarabawara yõ wãmarẽã diamasi (Juec. 7:​9-11). Zõrãrãbara ewari jõmaʉ̃nẽ ũrĩbʉta ũdubibara. Zõrãrã ũrĩbʉbara obʉ Daizeze Bedʼeaba jarabʉta akʉza Daizeze organizasionba jarabʉta. Mawũã wuabemara ũdubibʉ yiza biata, mamina zõrãrãitara edaʉde zarea baseabʉ ũrĩta. Zõrãrãitara zarea baseabʉ iya kʼãrẽ jaradapeada oita, mawũã oũdubita. Edaʉde zõrãrãbara krĩchaseabʉ ãya jaradiabʉra wãrĩnu kʼarebabʉ kʼawuaita, mawũã ẽ bʉrʉ wãrĩnu ĩjãbʉ kʼawuaita. Edaʉde jaraseapanʉ zõrãrã nekʼãrẽ odamarẽã iyi karsel eda wãbiseabʉta. Mawũã berabaribʉrʉdera zõrãrãbara, ¿sãwũã Gedeónba oda kĩrãkʼa oseapanʉ? Kĩrãkita ũrĩdua bʉa kʼãrẽ jarabʉta mõbe oũdubira. w23.06 4, 5 parr. 9-11