Febrero

Nokʼo Ezequías kayanʉmasidera kʼareba widisi Jeowa iyi bebimarẽã, Jeowaba bebisi iyira (2 Rey. 20:​1-6). Mamina apostol Pablo kayanʉmaside Jeowaʼa soiduba yiwidʼisi iyi bebimarẽã, mamina Jeowabara bebi ẽ basi (2 Cor. 12:​7-9). Santiago akʉza Pedro, ãyira ũmena bebʉdepanasi beaitanʉmasi baera Herodesba. Santiagora beasida, Pedrora Jeowaba ẽdrʉbisi (Hech. 12:​1-11). Maʉ̃ kʼarea widiseapanʉ: ¿Jeowabara kʼãrẽa kʼarebasi Pedrora akʉza Santiagora kʼãrẽa kʼareba ẽ basi? Daizeze Bedʼeaba jara ẽ maʉ̃ ʉ̃rʉra. Mamina dayirãba wãrĩnu ĩjãseapanʉ Jeowaba obʉra jõma aripe obʉta (Deut. 32:4). Edaʉde Jeowaba dayirã yiwidʼira panʉbʉ dayirãba krĩcha ẽ badade. Kʼawuapanʉ Jeowara ẽbẽra biata akʉza iya dayirãra kãgata, maʉ̃ kʼarea aña krĩchada ẽ iya dayirãba widibʉ sãwũã panʉbʉ kʼareara (Job 33:13). w23.11 21 parr. 6

Santiagoba jarasi ẽbẽra buru biabara soiduba ũrĩkĩrãbʉta. Maʉ̃ba jarakĩrãbʉ ũrĩña awabaibarata Jeowaba ẽbẽrarã dayirã zokʼamarẽã bʉedara bedʼeata. Mamina ẽbẽra abaʉba jarara Jeowaba kãgabʉ ẽãta omarẽã, maʉ̃ bedʼeara ũrĩ ẽ baibara (Hech. 4:​18-20). Audre zare ẽ Jeowaba jarabʉ ũrĩra iya jarabʉra jõma aripebʉ baera, mamina ẽbẽrarãba jarabʉ ũrĩra zareabʉ (Sal. 19:7). Mawũãsidu Jeowaba zokʼabʉ dayirãba ũrĩnamarẽã dayirã yibarira bedʼeata, nokʼora bedʼeata, akʉza zõrãrã kongregasionebemara bedʼeata (Prov. 6:20; 1 Tes. 5:12; 1 Ped. 2:​13, 14). Dayirãba ãyi bedʼea ũrĩbʉrʉdera Jeowa bedʼeata ũrĩbʉ kĩrãkʼabayi. w23.10 6 parr. 2, 3

Dayirãba audre zarea ĩjãseapanʉ krĩchabʉde Jeowa kʼãrẽaba zarea barabʉta. Jeowara zarea barabʉ iya jarada jõma aripe berabaribita, wãrĩnu bʼaira iyabʉrʉ nekʼãrẽ jõma oseabʉ (Job 42:2; Mar. 10:27; Efes. 3:20). Jeowaba jarasi Abrahánʼa akʉza yi kima Saraʼa ãyi zõna babʉrʉde wũãwũã erpanaita (Gén. 17:​15-17). Akʉza jarasi Abrahánʼa iyideba zebʉrʉ wũãwũãra, diaita Canaán drʉata. Israelitara Abrahánʼneba zedara Egiptode wuabemara nezokʼabadaraba, krĩchaseapanasi Jeowaba Abrahánʼa jaradara aripe berabari ẽãta, mamina maʉ̃ra tẽã jõma aripe berabarisi. Adewara Jeowaba jarasi Maríaʼa wũãwũã baraita iyira mia kʼai yumakẽrãʉ̃me ãba kʼãĩkabasimina, maʉ̃ wũãwũãra Jesubasi. Jesudeba Jeowabara aripe berabaribisi iya jardin Edénʼne jaradata (Gén. 3:15). Dayirãba akʉpanʉne sãwũã Jeowaba jaradara aripe berabari wãta, naʉ̃ba audre ĩjãbibʉ Jeowa zarea ʉ̃rʉ, adewara wãrĩnu weita ẽjũã kĩrãwãreã iya weya abʉra (Jos. 23:14; Is. 55:​10, 11). w23.04 28 parr. 10-12

Jeowabara ũrĩsi David yiwidʼira iya ẽdrʉbimarẽã widisidera (1 Sam. 19:​10, 18-20; 2 Sam. 5:​17-25). Dayirãbida abarika maʉ̃ne kĩrãkʼa wãrĩnu ĩjãseabʉ (Sal. 145:18). Jeowabara daya kãgabʉ kĩrãkʼa waña panʉ ẽã baseabʉ dayi bedʼeara. Pabloba Jeowaʼa widisi ãĩ bʉemarẽã iya bedʼea zroma erbʉta. Iya mawũã widibʉta ũbea osi, ¿Jeowabara maʉ̃ bedʼeara ũrĩsika? Ũrĩsi, mamina Pabloba jʉ̃ãbada kĩrãkʼa oẽbasi. Iya bedʼea zroma waña ãĩ bʉei kaude, awuarabʉrʉ diasi zareata Jeowaba zokʼabʉta aripe obamarẽã (2 Cor. 12:​7-10). Jeowaba panʉbʉ edaʉde dayirãba widi ẽ badata. Dayirãbara ĩjãseabʉ Jeowabʉrʉ kʼawuabʉta dayirã sãwũã kʼarebaita, adewara «iyara dayirãba widida audre oseabʉ» (Efes. 3:20). Maʉ̃ kʼarea dayirãba jʉ̃ã ẽ badata Jeowaba panʉseabʉ. w23.05 8, 9 parr. 4-6

Edaʉde yibia dayirãba bia krĩchaita jẽda piradrʉi ʉ̃rʉ. ¿Kʼãrẽa yibia maʉ̃ ʉ̃rʉ bia krĩchaita? Kʼawua ẽ baera dayirãbara dayi kʼãrẽ ewaride kaya kʼãrãpe beita, mawũã ẽ bʉrʉ dayirã mebẽrãta (Ecl. 9:11; Sant. 4:​13, 14). Jẽda piradrʉi ʉ̃rʉ wãrĩnu soiduba ĩjãbʉba, kʼarebaseabʉ maʉ̃ bedʼea zroma zebʉrʉde awuantaita (1 Tes. 4:13). Daizeze Bedʼeabara jarabʉ Jeowabara dayirãra aba abaka bia ũdukʼawuabʉta akʉza mejãcha kãgabʉta (Luc. 12:7). Jeowaba dayirã biʼia ũdukʼawuabaibara dayi nãã sãwũãbadade jẽda piradrʉbira akʉza dayi bei nãã dayi burude krĩchabadata jõma jẽda kĩrãbebira. Jeowaba dayirã mejãcha kãgabʉ baera ewari jõmaʉ̃nẽ babiyi akʉza ẽbẽra beidara jẽda piradrʉbiyi, mawũã ẽjũã kĩrãwãreãnẽ sobiapanamarẽã. ¿Kʼãrẽa ĩjãnaibara jẽda piradrʉi ʉ̃rʉra? Dayirãba kʼawuapanʉ baera yi maʉ̃ jaradabara okĩrãbʉta akʉza zarea barabʉta maʉ̃ aripe oita. w23.04 8, 9 parr. 2-4

Joséba Maríaʉ̃mebara nekʼãrẽ osida audre Jeowa neũdukʼawua bʼaita. Ãyara kʼawuabasi yi mebẽã ãbaʉba yiwidʼibarabasita Jeowaʼa (Luc. 2:​22-24; 4:16). Maʉ̃ kʼarea ãyira jipa yiza bia yi juwa jidapanʉraita. José kĩrãkʼa akʉza María kĩrãkʼa wũãwũãrata erbʉbʉrʉ zarea baseabʉ ãba yi jʉrebarieda wãita akʉza semanaza bʉ mebẽrãbawaraʉba kʼawuaita Jeowa ʉ̃rʉ akʉza maraitara zarea baseabʉ Daizeze ʉ̃rʉ ũmepeiba kʼawuaita akʉza Jeowa yiwidʼita. Kĩrãbeidua, maraba mara ũmeba Jeowaba kãgabʉta opanʉbʉrʉ audre iyi kʼawabayi akʉza audre yi kãgapanañi. Maʉ̃ kʼarea nãã bʉeidua Jeowaba kãgabʉta. Mara juwa jidapanʉne bedʼea zromata ũdupanʉbʉrʉ maraitara zarea baseabʉ mebẽrãbawara Daizeze ʉ̃rʉ kʼawuaita. Maʉ̃ta mawũãbʉbʉrʉ mayi ũmeba estudiaidua maramabʉta akʉza aukʼara drazo chu ẽãta, maraba maʉ̃ta opanʉbʉrʉ audre yiya kãga wãnañi akʉza Jeowaba jarabʉta audre okĩrã wãnañi. w23.05 22 parr. 7, 8

¿Sãwũã kʼarebasi Abdíasʼra Jeowa wawia ũdubiba? Maʉ̃ba kʼarebasi iyira kʼẽrẽpa bʼaita akʉza aripe obʼaita. Maʉ̃ kʼarea nokʼobara jidasi iyi de akʉbari bamarẽã (naʉ̃ testoʉ̃me akʉra Nehemías 7:2). Abdíasba Jeowaʼa wawiata ũdubibasi baera, iyira zowaĩnĩgʉabasi, iyira zowaĩnĩgʉa bʼaibarabasi Acabʼba zokʼabʉ ewaridebasi baera (1 Rey. 16:30). Acabʼbara zokʼabasi israelitara 10 tribubʉ ʉ̃rʉ, yi kima Jezabelbara jʉrabasi Jeowara akʉza kãga ẽ basi mia abaʉta Jeowa yiwidʼimarẽã, yi kimaba zokʼabadamae akʉza iyara mejãcha beakʉasi Jeowa propetarata (1 Rey. 18:4). Jezabelba Jeowa propeta beaita pẽwãbʉde, Abdíasbara «propetara 100bʉta 50tade [mĩrʉbisi] mõgara zobeade eda, maʉ̃ne diabasi panta baniaʉ̃me» (1 Rey. 18:​13, 14). Abdíasba mawũã obʉta ũdusidabʉrʉ beakasida. Abdíasʼra badu ẽbẽra kĩrãkʼa beiamabasi, mamina iyara audre kãgabasi Jeowata akʉza Jeowa propetata iyi bebʉira. w23.06 16 parr. 9, 10

Idi ewadera naweda obada kĩrãkʼa Jeowabara iyi pʉwʉrʉʼa kʼãrẽta oira jaradiabʉ iyi Bedʼeadeba akʉza yi warra Jesudeba. Adewara Jeowabara yi pʉwʉrʉʼa kʼãrẽta oita jaradiabʉ ẽbẽrarãneba, akʉdaya ʉ̃kʉrʉ yizarata. 1870 tẽã Charles Russellba akʉza iyiʉ̃me ãba badaraba kʼawuasida Daizeze Nokʼobara zokʼa jʉ̃drʉita 1914de (Dan. 4:​25, 26). Ãya maʉ̃ra kʼawuasida Daizeze Bedʼeade propesiarabʉdeba akʉza Jeowaba kʼarebasi baera maʉ̃ta biʼia ũrĩnamarẽã. Poaga 1914de kʼãrẽ berabaridaba ũdubisi wãrĩnu Daizeze Nokʼoba zokʼa jʉ̃drʉsita maʉ̃ poagade: maʉ̃ne berabarisi Primera Guerra Mundialta, zesi kaya zromata, jarrabata akʉza drʉa ureta (Luc. 21:​10, 11). Jeowaba maʉ̃ra kristianora kʼẽrẽpapanʉrata zokʼasi iyi pʉwʉrʉʼa jaradiaita kʼãrẽta oita. w24.02 22 parr. 11

Dayirãra Jeowa pʉwʉrʉdepanʉ baera, kʼawuapanʉ Jeowabara kãgata akʉza dayirãra bia wãmarẽã kãgabʉta (Rom. 8:​35-39). Adewara biʼia kʼawuapanʉ Daizeze Bedʼearadebemaba jarabʉta opanʉbʉrʉ jõma bia wãita (Is. 48:​17, 18). Mamina, ¿kʼãrẽta odai dayirãba bedʼea zroma jʉ̃ã ẽãta ũdubʉrʉdera? Bari jaraita, dayirã mebẽrãnebema abaʉba krĩcha zroma obiseabʉ, mejãcha kayabʉba nãã Daizezedebema bia obada kĩrãkʼa oẽ baera, naʉ̃ drʉade neida berabaribʉde dayirãsida zʉbʉria berabariseabʉ, mawũã ẽ bʉrʉ dayirãra pẽwãseapanʉ zʉbʉria odaita dayirãba ĩjãbʉ kʼarea. Dayirãba kʼãwũã bedʼea zroma ũdubʉrʉdera dayikʉza widiseabʉ: «¿Kʼãrẽa mʉ̃trʉ kʼãwũã zʉbʉrianʉmʉ? ¿Mʉ̃a kʼãrẽ nemitiata osi? ¿Jeowabara kʼãwũãra mʉ̃ra bia akʉ ẽka?». ¿Mawũã krĩchabarika ewari abaʉde? Maʉ̃ta krĩchabʉbʉrʉ maʉ̃ kʼarea sopʉarãra. Nããbema ẽbẽrarã Jeowa ode kʼẽrẽpabʉrasida mawũã krĩcha zroma obada (Sal. 22:​1, 2; Hab. 1:​2, 3). w23.04 14 parr. 1, 2

Nemitia oita krĩcha zera jipa oda ẽ baibara maʉ̃ta, mawũã Jeowa sopʉabida ẽ baita dayirãba obʉdeba. Jeowabara kãgabʉ dayirãba wãrĩnu soiduba odamarẽã iya zokʼabʉra (Rom. 6:17). Jeowaba dayirã omarẽã jarabʉra dayirã biaita, akʉza iya zokʼabʉra awuara obeda ẽ (Is. 48:​17, 18; 1 Cor. 6:​9, 10). Dayirãta Jeowaʉ̃me kʼẽrẽpa ba ẽ marẽãra, Diarubara pẽwãbʉ akʉza maʉ̃ daucha mejãcha pobʉ, ¿kʼãrẽa mawũã obʉ? Dayirãta wua Jeowa neũdukʼawua bada ẽ marẽã (1 Ped. 5:8). Kristianora nããbema siglodebemara pẽwãsida, posida akʉza beasida, ãyita Jeowaʉ̃me kʼẽrẽpapana ẽ marẽã (Hech. 5:​27, 28, 40; 7:​54-60). Idi ewadebida Diarubara pẽwãbʉ. Bari jaradaita, dayirã mebẽrã Rusiadebemara zʉbʉria opanʉ akʉza awuru pʉwʉrʉdebemasida. Naʉ̃ drʉa jõmaʉ̃nẽ mebẽrãra pẽwãpanʉ ãyi zʉbʉria odaita. Adewara Diarubara dayirãra edaʉde pẽwãbʉ maʉ̃ta neẽbʉrʉ kʉ̃rʉ̃gabʉ (Efes. 6:11). w23.07 15, 16 parr. 6-9

Bʉa Daizeze Bedʼea audre akʉ wãne, audre kãga wãñi bʉara Jeowara, maʉ̃ kãgaba bʉa ojʉ̃drʉbibʉ iya zokʼabʉta. Adewara karebayi Daizeze Bedʼearadebemaba jarabʉta oita mawũã bia jida kʼawuaita. Bʉa kʼãrẽ obʉta akʉza sãwũã krĩchabʉta ara ora Jeowa sobiabita. Wũãwũãbara yi zezeba obʉ kĩrãkʼa daucha obʉ. Abarika bʉara Daizeze Jeowade kĩrãkʼa okĩrãbʉ (Efes. 5:​1, 2). Dayirãkʉza naʉ̃ta widiseabʉ: ‹¿Mʉ̃ara Jeowara idi ewadera audre kãgabʉka mʉ̃ buru kʼoei nãã kãgabadaira? ¿Mʉ̃ buru kʼoedadeba ʉ̃ta mʉ̃a krĩchabʉta akʉza mʉ̃a obʉta Jeowaba kãgabʉdebʉka? ¿Mʉ̃ara kãgata ũdubibʉka wuabemarãra, mamina audre mebẽrã kongregasionebemara?›. Bʉa nãã kãgabada kĩrãkʼa kãga ẽ bʉrʉ, maʉ̃ kʼarea sopʉarãra. Maʉ̃ kĩrãkʼa berabarisi mebẽrã kristiano nããbemarata, Jesubara ãya aña obʉ kʼarea mitia akʉ ẽ basi akʉza pae ẽ basi. Abarika obʉ dayirã kʼareabida, iyira pae ẽ (Apoc. 2:​4, 7). Jesubara kʼawuabʉ dayirãba Daizeze Bedʼea kʼawuaside nãã kãgabadaira audre kãga wãseabʉta. w23.07 8 parr. 2, 3

Pedroba kayirua mejãcha osi. Bari jaraita, nããrãra audre ĩjãsi iyi ʉ̃rʉ, jarasi wuabemaraba Jesu doba amaemina iyara amae ẽ baita (Mar. 14:​27-29). Tẽã Pedrora daʉba ba ẽ basi (Mar. 14:​32, 37-41). Tẽã Pedrobara Jesura doba amaesi ẽbẽrarã biobʉ kĩrãbita (Mar. 14:50). Tẽã Pedrobara jarasi Jesura ũdukata (Mar. 14:​66-71). ¿Kʼãrẽta osi Pedroba kʼawuaside iya kayirua odara yi zromabasita? Iyira mejãcha sopʉabasi akʉza jẽgabasi (Mar. 14:72). Pedroba kayirua oda kʼarea Jesubara kʼẽã ẽ basi awuarabʉrʉ nekʼãrẽ oita diasi Daizeze kongregasione (Juan 21:​15-17). Pedroba kʼawuabasi iyara kayirua zromata osita, mamina maʉ̃ kʼarea idubʉ ẽ basi Daizeze odebʉta. ¿Kʼãrẽa? Iyara biʼia kʼawuabasi baera Jesuba iyita kãgata, ¿kʼãrẽta kʼawuapanʉ? Jeowabara kãgabʉ dayirãba kʼawuadamarẽã iya dayirã kãgata akʉza kĩrãduakĩrãbʉta dayirã kayiruara (Rom. 8:​38, 39). w24.03 18, 19 parr. 13-15

Juwa jida ẽ nãã mia erkʼãĩbʉbara ũduseabʉ bedʼea zroma daya jʉ̃ã ẽ badata. Bari jaraita, dayi perata ũduseabʉ, ewarade biogoseabʉ, kʼãrẽ ẽ kĩrãkʼa sentiseabʉ akʉza yi mebẽrãʉ̃me sobia bʼaita aduaseabʉ. Buru biata ũdubiseapanʉ yuwẽrã bia krĩchabʉ ẽã deda wã ẽ bʉrʉ. Daizezedeba jĩga wãna awuara akʉza ãya ũduseabʉ kayata, maʉ̃ba beieda edeseabʉ wabida ẽ nãã (Prov. 7:23). Proverbios kapitulo 9 yi 18de naʉ̃ bedʼeata jarabʉ: «Iya mama eda trʉ̃bʉra bewãrã dedebʉta». Mawũẽra, ¿kʼãrẽa mejãchaʉba ĩjãpanʉ iya trʉ̃bʉra? (Prov. 9:​13-18). Jipa akʉda ẽ baibara ẽbẽra ãkadabʉra. Ʉ̃kʉrʉbara krĩchapanʉ maʉ̃ akʉira kayirua ẽãta. Ẽbẽra maʉ̃ akʉbʉra iyikʉza zʉbʉriabʉ, iyikʉza wawia ẽ akʉza wuabemarata. Ẽbẽra ãkadabe akʉbʉra dayi buru morredebara waña ãĩ wã ẽ. Ẽbẽra ãkadabʉ akʉbʉbara krĩcha mitiata taʉbi ẽ, awuarabʉrʉ maʉ̃ta audre obikĩrãbʉ (Col. 3:5; Sant. 1:​14, 15). Ẽbẽra ãkadabe akʉbʉbara mia erkʼãĩena edebʉ. w23.06 23 parr. 10, 11

Ʉ̃kʉrʉ nokʼorata Gran Bretaña Estados Unidosʼʉ̃me yõkĩrãbʉmina, ãyide kĩrãkʼara zokʼa ze ẽ bayi. Maʉ̃ra jarapanʉ Daizeze Bedʼeaba jarabʉ baera mõgaraba birachiyita nekʼãrẽ jĩrʉ omara, maʉ̃ mõgarabara jarakĩrãbʉ Daizeze Nokʼota. Nekʼãrẽ jĩrʉ omaba Estados Unidos akʉza Gran Bretañata (Dan. 2:​34, 35, 44, 45). ¿Bʉara wãrĩnu ĩjãbʉka Danielba jaradara nekʼãrẽ jĩrʉne jiorro erbʉ ʉ̃rʉ akʉza egoro oma ʉ̃rʉ jarabʉra? ¿Maʉ̃ra wãrĩnuka? Bʉa wãrĩnu ĩjãbʉbʉrʉ jʉrʉ ẽ bayi mejãcha plata erbaita akʉza naʉ̃ drʉade nekʼãrẽ bia mejãcha erbaita, kʼawuapanʉ baera Daizeze Nokʼoba naʉ̃ drʉadebʉra jõbita (Luc. 12:​16-21; 1 Juan 2:​15-17). Akʉza maʉ̃ ʉ̃rʉ ĩjãpanʉbʉrʉ zarea odayi wuabemara jaradiaita (Mat. 6:33; 28:​18-20). Maʉ̃ propesia estudiada tẽã widira: «¿Mʉ̃a nekʼãrẽ jidabʉdeba mʉ̃ara wãrĩnu kʼawuabʉka Daizeze Nokʼobʉrʉ jõbita aranʉ nokʼora naʉ̃ drʉadebʉra?». w23.08 11 parr. 13, 14

Bʉ sõbe poagabʉ kʼãrẽa, bʉ sãwũã kayabʉ kʼarea akʉza bʉ sãwũã berabarinʉmʉ kʼarea, kʼawuabaibara sainʉ oseabʉta. Bʉ kayabʉ kʼarea akʉza bʉ sõbe poagabʉ kʼarea nekʼãrẽ obe ẽ bʉrʉ Barziláide kĩrãkʼa jarara obe ẽãta (2 Sam. 19:​35, 36). Akʉza Moisésde kĩrãkʼa, wuabemara jarara kʼãrẽne kʼarebaseapanʉta (Éx. 18:​21, 22). Bʉa kʼawuabʉbʉrʉ sainʉ oita, jʉrʉ ẽ bayi oita nekʼãrẽ bʉ mapaebiseabʉta. Adewara awururaba aña jidabʉrʉde krĩcha ẽ baibara maʉ̃ra dayi kʼarea mawũã osita. Dayirãbara wuabemabari jidabe ẽ akʉza krĩchabe ẽ ãya aña jidabʉrʉdera maʉ̃ra dayi kʼarea mawũã berabarisita. Bari jaraita, wũãwũã abaʉba jidaseabʉ Jeowadeba jĩga bʼaita, mamina yi yibarirabara krĩcha ẽ baibara maʉ̃ra mawũã berabarisita ãya bia akʉ ẽ baera, mawũãsidu yibariraba krĩchadara maʉ̃ra berabarisita ãyi kʼãrẽa, naʉ̃ra ãyitara zʉgʉa zroma kĩrãkʼabayi. Jeowabara kãga ẽ ãya mawũã krĩchamarẽãra. w23.08 29 parr. 11, 12

Sansónʼra dayirã kĩrãkʼa kayirua omiabasi, maʉ̃ba iya edaʉde aña jidasi. Mamina iya ewari aba aña jidadara jipade kayiruabasi. Iyira pʉwʉrʉ Israel juezbasi poaga biobayeda, mamina tẽã «kãgasi wẽrã koribi Sorecdebemata yi trʉ̃ Dalila». Naenara Sansónbara jarasi juwa jidakĩrãbʉta wẽrã Filisteadebemaʉ̃me. Jeowabara maʉ̃ra iduaribisi pilisteora makenaita. Maʉ̃ tẽã Sansónʼra wẽrã odebema deda kʼãĩsi maʉ̃rabasi Gazade, maʉ̃ pʉwʉrʉra Filisteadebemabasi. Maʉ̃ ewadede Jeowaba Sansónʼa zarea diasi, mawũã iya mamabema pʉwʉrʉ puerta ãĩ ogaedape edesi akʉza iya mawũã obʉrʉba maʉ̃ pʉwʉrʉra zarea neẽbesi (Juec. 14:​1-4; 16:​1-3). Mamina iyita Dalilaʉ̃me juwa jidamarẽãra Jeowaba zokʼa ẽ basi, Dalilara pʉwʉrʉ Israeldebemabasibaibara. Dalilabara ĩjãsi Sansón sewaita plata mejãchabari. w23.09 5 parr. 12, 13

Bia krĩchaiba kʼarebaseabʉ ibiade bedʼeaita. Ẽbẽra bia krĩchabʉbara kʼawuabʉ sãwũã panʉita awururaba imitia bedʼeabʉrʉde iya kʼãrẽ ĩjãbʉ ʉ̃rʉ. Edaʉde ẽbẽrarãba dayirã nekʼãrẽ widibʉrʉdera ãyara jara ũrĩbida ẽ kʼãrẽa maʉ̃ta widipanʉta, ãyara maʉ̃ra widipanʉbaibara krĩcha zroma obʉ baera, mawũã ẽ bʉrʉ bʉ baera nekʼãrẽ ãyaʼa maʉ̃ta widibibʉta. Dayirãba panʉi nãã biʼia krĩchaibara dayirãbara kʼawua ẽãta maʉ̃ ẽbẽrabara kʼãrẽa widibʉta maʉ̃ra (Prov. 16:23). Akʉdaya Gedeónba sãwũã panʉsita yumakẽrãra Efraínʼnebemara. Efraínʼnebemarabara kĩrʉ widisida kʼãrẽa trʉ̃ ẽ basita ãyira yõenara, ¿kʼãrẽa mawũã widisibaibara ãyara? ¿Ãyara ʉ̃tabʉta krĩchapanasika? Ãya kʼãrẽ oda krĩcha ẽã Gedeónbara ibiade panʉsi, maʉ̃ kʼarea Daizeze Bedʼeaba jarabʉ Efraínʼnebemabawara aduʼapanesita (Juec. 8:​1-3). w23.09 16 parr. 8, 9

Jeowara Jesuʉ̃mera mejãcha yiya kãgapanasi. Jeowara mejãcha sopʉasibaibara ũdusi baera yi warra sãwũã mejãcha zʉbʉria opanʉta akʉza jʉrapanʉta. Yibarira jõmaʉ̃ba kʼawuapanʉ kʼãrẽaba pʉta ãyi wũãwũãranebema aba aduaira. Dayirã jõmaʉ̃ba kʼawuapanʉ Jeowaba jẽda piradrʉbita beidarãra, mawũãsidu dayirã mebẽrãnebema beibʉrʉdera sopʉapanʉ. Naʉ̃ yizaba kʼarebabʉ dayirãba biʼia kʼawuaita Jeowa kãrẽaba sopʉa sentisita ũduside yi warra poaga 33de sãwũã beadapeadata (Mat. 3:17). Kʼãwũã wedaʉba dayirãbara zarea odaibara dobaʉba Daizeze Bedʼea akʉbʉde, mawũã ẽ bʉrʉ mebẽrãbawaraʉba Daizeze Bedʼea akʉbʉde estudiaita Jesu beida jẽda kĩrãbei ʉ̃rʉ bedʼeabʉta. Akʉza Jesu beida jẽda kĩrãbei ewari zebʉrʉdera kĩrãduarãra akʉita programa Beteldebemaba jara ũrĩbibʉta. Dayirãba naʉ̃ jõma obʉbʉrʉ Jesu beida jẽda kĩrãbei ewari zei nãã, naʉ̃ba kʼarebayi dayirãba wuabemarata kʼarebamarẽã ãyabida abarika omarẽã (Esd. 7:10). w24.01 11 parr. 10-12

Dayirãbara so zarea ũduseabʉ naʉ̃neba, nããra yiwidʼibʉdeba, ¿Jeowaba sãwũã panʉbʉ? Diabʉ zarea zroma dayideba zebʉ ẽãta (2 Cor. 4:7). Akʉza zarea baseabʉ iyi Bedʼea akʉpanʉne akʉza maʉ̃ ʉ̃rʉ krĩchapanʉne (Sal. 86:11). Daizeze Bedʼeade jarabʉba maʉ̃ba zarea diabʉ dayirã (Heb. 4:12). Yiwidʼiba akʉza Daizeze Bedʼea akʉiba zarea diayi awuantaita akʉza sobia bʼaita, adewara dayaʼa omarẽã jarabʉda oita. Akʉra sãwũã Jeowaba zarea diasita propeta Jonásta. Jeowaba Jonásʼa nei omarea zokʼasi mamina iyira perasi baera jãpe wãsi, maʉ̃neba Jonásʼra bera beisi akʉzade zʉbʉriabisi iyi kʼawapananata. Iyi jãbadeba doi balbʉesidadera beda zromaba misi. ¿Kʼãrẽta osi Jonásbara zarea jidaita maʉ̃ beda zroma bitedabaside? Nããra yiwidʼisi (Jon. 2:​1, 2, 7). w23.10 13 parr. 4-6

Naʉ̃ra kartara apostol Pedroba bʉdara mebẽrã siglo nããrabemaraita bʉsimina, Jeowaba iduaribisi iyi bedʼeade eda bamarẽã dayirãta kʼarebamarẽã. Maʉ̃ba idi ewade naʉ̃ba kʼarebaseabʉ dayirãta (Rom. 15:4). Idi ewadebida dayirã audurabʉ ẽbẽrarã propresiara ʉ̃rʉ ĩjã ẽãrata. Ẽbẽra mejãchaʉta dayirã kʼarea ipidapanʉ, poaga bio baera jarapanʉta naʉ̃ ewari jõira arakʼaitabata akʉza ʉ̃kʉrʉbara jarapanʉ maʉ̃ ewarira ze ẽ baita (2 Ped. 3:​3, 4). Dayirãba jaradia wãbʉrʉde, dayirã trajode, mawũã ẽ bʉrʉ dayirã mebẽrãba baduba maʉ̃ bedʼeata jarara, naʉ̃ba dayirãba ĩjãbʉta wiña wiñane aduabiseabʉ. Pedroba jara ũrĩbisi maʉ̃ mawũã berabaribʉrʉde kʼãrẽba kʼarebaseabʉta dayirãra.Ʉ̃kʉrʉraba krĩchapanʉ Jeowaba ẽbẽrarã jõbiyi abʉra mesera we ẽãta, mamina Pedroba jaradaba kʼarebabʉ dayirã ʉrʉma bʼaita maʉ̃ ewari zei nãã, kĩrãbebibʉ baera Jeowabara ewarira awuara akʉbʉta dayirãba akʉbʉira (2 Ped. 3:​8, 9). Jeowaitara mil poagara ewari ababʉ kĩrãkʼabʉ akʉza Jeowabara jʉ̃ã kʼawuabʉ, iyara kãga ẽ ẽbẽrarã beimarẽãra. Naʉ̃ drʉara jõñi. w23.09 26, 27 parr. 2-5

Apostol Pablobara naʉ̃ kartara bʉsibaibara nekʼãrẽ ũme kʼarea. Nããra, ãyaʼa so zarea diaita. Ʉ̃kʉrʉ kristianora ebreorãra nããra religion judiadepanasi. Naʉ̃ religion judiadebemabara erpanasi templota akʉza mama sakripisiota opanasi. Adewara erpanasi saserdoterata maʉ̃ sakripisio oita. Mamina kristianorabara maʉ̃ra oẽbasi akʉza ãyara templora erba ẽ basi, maʉ̃ kʼarea ʉ̃kʉrʉ nokʼora religion judiadebemarãra ãyi kʼarea ipidapanasi (Heb. 3:​12, 14). Maʉ̃ba ãyidebema ʉ̃kʉrʉba krĩchaseabasi jẽda wãita maʉ̃ religion judiadebemama. Yi ũmeta, Pablobara naʉ̃ kartara bʉsi kristianora ebreora jara ũrĩbita ãyara zarea opana ẽ basita Daizeze Bedʼeaba kʼãrẽ jarabʉ bia ũrĩta (Heb. 5:​11-14). Maʉ̃ra kristianoranebema ʉ̃kʉrʉba waidide okĩrãpanasi Moisés leyba jarabʉta. w23.10 24, 25 parr. 3, 4

Ʉ̃kʉrʉ mebẽrã wẽrãrabara krĩchabʉ mesera juwa jida ẽ baita (Mat. 19:​10-12). Kʼawuabara Jeowabara Jesuʉ̃mebara jʉra ẽãta ãyira. Jõmaʉ̃mae naʉ̃ra mebẽrãra yiza bia kongregasionebemaraita, ãya wuabemarata biʼia akʉpanʉ baera akʉza kãga ũdubipanʉ baera, wuabemarabara ãyira akʉpanʉ ãyi papa kĩrãkʼa akʉza ãyi mebẽã kĩrãkʼa (Mar. 10:​29, 30). Ʉ̃kʉrʉra Jeowaita ewari jõmaʉ̃nẽ trajaseabʉ. Mebẽrã wẽrãrabara mejãcha kʼarebapanʉ Daizeze Bedʼea jaradiaita naʉ̃ drʉa jõmaʉ̃mae (Sal. 68:11). Bʉra ewari jõmaʉ̃nẽ trajaseabʉ Daizezeita. Yi nãã edebari baseabʉ, Daizeze de parãbʉde kʼarebaseabʉ, mawũã ẽ bʉrʉ Betelde trajaseabʉ. Yiwidʼira Jeowa maʉ̃ oita akʉza bedʼeara mebẽã mama trajabʉme kʼawuaita bʉa kʼãrẽta oseabʉta mama trajaita. Krĩchara kʼãrẽta oita ũduita bʉa okĩrãbʉta, kĩrãbera bʉta Jeowaita trajabʉbʉrʉ, naʉ̃ba kʼarebaita bʉa nekʼãrẽ mejãcha oita iyi bari. w23.12 22 parr. 16, 17

Zʉbʉria zroma zeita arakʼaitaba baera, krĩchadaibara audre jaradia wãita Daizeze Bedʼeata. Mamina edaʉde zarea baseabʉ dayirãra trajaibara baera plata ũduita, mawũã ẽ bʉrʉ pẽwãpanʉ baera. Mamina, ¿kʼãrẽba kʼarebai Daizeze Nokʼodebemata nããra bʉeita? Ĩjãibara Jeowara dayirãrebʉta. Dayirãba Daizeze Nokʼodebemata nãã bʉepanʉbʉrʉ Jeowaba ewari jõmaʉ̃nẽ kʼarebayi, maʉ̃ba kʼãrẽa peraira neẽ (Ageo 2:4). Jeowaba kãgabʉ dayirãba kʼarebadamarẽã ẽbẽrarã iyi oeda zeita. Ageoba pʉwʉrʉʼa jarasi Daizeze templo jẽda parã jʉ̃drʉdamarẽã, ãya maʉ̃ta osidabʉrʉ Jeowaba jarasi ãyaʼa nebia diaita (Ageo 2:​18, 19). Dayirãbida kʼawuapanʉ Jeowaba nekʼãrẽ omarẽã jarabʉta nããra bʉepanʉbʉrʉ, iya nebia diaita. w23.11 16 parr. 8; 17 parr. 11

Romanos kartade apostol Pablobara jara ũrĩbisi ẽbẽrarã jõmaʉ̃ta nemitia omiarata. Mamina mawũãsidu, ¿kʼãrẽa jaraseapanʉ Daizeze dabʉ nããra dayirãbara nekʼãrẽ aripe oseabʉta? Kristianoraba maʉ̃ ʉ̃rʉ biʼia ũrĩmarẽã Pabloba zokʼasi Abrahán yizata. Jeowaba jarasi Abrahánbara nekʼãrẽ aripe obʉta. Iyira maʉ̃nera waidide Canaánʼnebasi. Mamina Jeowabara jara ẽ basi Abrahánʼra nekʼãrẽ aripe obʉta Jeowaba Moisésʼa ley diadaba jarabʉta aripe obʉ baera. ¿Kʼãrẽa mawũã jarapanʉ? (Rom. 4:13). Jeowaba Abrahánʼa jaraside iya nekʼãrẽ jõma aripe obʉta, maʉ̃ ewaridera Jeowabara waidide dia ẽ basi maʉ̃ leyʼra. Jeowabara maʉ̃ leyʼra diasi 400 poaga berabarida tẽãbʉrʉ. ¿Kʼãrẽa mawũãsidu Jeowabara jarasi Abrahánbara nekʼãrẽ aripe obʉta? Jeowaba Abrahánʼra mejãcha kãgabasi baera, jarasi iyara nekʼãrẽ aripe obʉta ĩjãbʉta ũdubibasi baera (Rom. 4:​2-4). w23.12 3 parr. 4, 5

Natánba Davidʼa jarasi maʉ̃ bedʼeara, maʉ̃ diamasi Jeowaba jarasi Natánʼa Davidbara templora parã ẽ baibasita (1 Cró. 17:​3, 4, 11, 12). ¿Kʼãrẽta osi Davidbara maʉ̃ bedʼea ũrĩsidera? Iya krĩchasi yi warraʼa kʼareba odiaita maʉ̃ templora, maʉ̃ kʼarea nekʼãrẽ jõma jʉrʉsi maʉ̃ templo parãmarẽã (1 Cró. 29:​1-5). Jeowaba Davidʼa templo parã ẽ baita jarada tẽã, bedʼea abarika zesi iyiʉ̃me. Jeowaba jarasi Davidʼa iyideba zedaranebema abaʉba ewari jõmaʉ̃nẽ zokʼaita (2 Sam. 7:16). Jesuba Mil poagabayeda zokʼabʉrʉde, ẽjũã biadera Davidʼra mejãcha sobiabayi, maʉ̃ra iyideba zesi baera. Dayirãba Jeowaita jõma oita kãgabʉta aripe obeda ẽ mina, Jeowaba dayirã nebiata diaseabʉ dayirãba jʉ̃ã ẽ badata. w23.04 16 parr. 8-10

Pera sentibʉrʉde jʉrʉseabʉ testora bʉ kʼarebaseabʉta, adewara so zarea ũduseabʉ Job, Salmos akʉza Proverbios librora lebʉrʉde, mawũã ẽ bʉrʉ akʉra Jesuba bedʼea jaradata Mateo 6de. Bʉ Jeowa yiwidʼibʉrʉde akʉza iyi Bedʼea akʉbʉrʉde so zarea ũduyi. Ĩjãseapanʉ bedʼea zroma ũdubʉrʉdera Jeowaba kʼarebaita, iyara doba amae ẽ baita (Sal. 23:4). Jeowaba jarabʉ dayirãra kʼarebaita, zarea babita, biʼia akʉita akʉza so zarea diaita. Isaías 26:3ba naʉ̃ta jarabʉ Jeowa ʉ̃rʉ: «Biʼia akʉya bʉ kʼareba jʉrʉpanʉrãra, wãrĩnu neneẽã babiya bʉara nrʉemaza, bʉta ĩjãpanʉ baera». Maʉ̃ kʼarea ĩjãra Jeowa ʉ̃rʉ akʉza iyi kʼarebata jʉrʉra, bʉa maʉ̃ta obʉbʉrʉ zareabayi bedʼea zroma zebʉrʉde. w24.01 25 parr. 16, 17

Naʉ̃ bedʼeara idi ewade aripe berabarinʉmʉ. Akʉza naʉ̃ta aripe berabarinʉmʉ: «Jõma bʉ wũãwũãrãra Jeowaba jaradiayi akʉza bʉ wũãwũãrãra biode neneẽãpanañi. Jõma bʉa aripe obʉra ariya piki teitea erbayi [ . . . ], bʉra mia kʼãrẽ kʼarea pera ẽ bãyi akʉza mia kʼãrẽba so perabida ẽ bayi, maʉ̃ra bʉ kʼawa neẽbai baera» (Is. 54:​13, 14). Mia Diaruba obe ẽ bayi Daizeze odepanʉraba Jeowa ʉ̃rʉ jaradiapanʉta idubʉdamarẽãra (2 Cor. 4:4). Dayirãba Jeowaba kãgabʉde yiwidʼibʉra ewari jõmaʉ̃nẽ mawũãbayi, nekʼãrẽ baduba oẽbayi maʉ̃ta idubʉdamarẽã. w24.02 4 parr. 10.

Jeowa odepanʉrabara nekʼãrẽ opanʉ aripe oũdubita dayirãba Jeowa oya adata, maʉ̃ba nekʼãrẽ dayirãba jidaibarata, mawũã ẽ bʉrʉ dayirã mebẽrãʉ̃me sãwũãbʉra awuara baseabʉ. Zarea opanʉ dayirã mebẽrãba nesidabʉ diaita, mamina dayirã mebẽrãba nekʼãrẽ omarẽã jarabʉta nããra bʉepanʉ ẽ Jeowaba jarabʉ oira (Mat. 10:​35,36; 1 Tim. 5:8). Edaʉde dayirãba kʼãrẽ oita jidaseabʉ, mamina dayirã mebẽrãra maʉ̃ kʼareara sobia ba ẽ bayi, mawũãsidu Jeowara sobiabayi. Iya parãsi mebẽrãra akʉza iya kãgabʉ mebẽrãra sobiapanamarẽã (Efes. 3:​14, 15). Dayirãta wãrĩnu sobia bakĩrãpanʉbʉrʉ nekʼãrẽ jõma obʉra Jeowaba kãgabʉde oibara. Kĩrãbeibara Jeowabara biʼia akʉbʉta iya kãgabʉ oi kʼarea nekʼãrẽ opanʉra akʉza dayirã mebẽrã akʉpanʉra, ãyaʼa kãgata akʉza wawiata ũdubipanʉra (Rom. 12:10). w24.02 18 parr. 11, 13