Bʉ buru kʼoeda tẽã Jesude kĩrãkʼa oũdubira

1, 2. ¿Dayi bebʉra sãwũã awuara baseabʉ buru kʼoeda tẽãra?

DAYI buru kʼoebʉrʉdera akʉza Jeowa pʉwʉrʉdebema babʉrʉdera mejãcha sobiabʉ. Maʉ̃ra jipade yibia baera Davidʼde kĩrãkʼa kʼãwũã jaraseapanʉ: «Sobiabʉ [ . . . ] yi bʉma webʉra bʉ de ewarade bamarẽã» (Sal. 65:4).

² Jeowabara badu ẽbẽrata we ẽ iyimara. Iyara iyima webʉ ẽbẽrarã iyi kʼawa bakĩrãpanʉrata akʉza iyi neũdukʼawua bakĩrãpanʉrata, nããbema artikulode kʼawuada kĩrãkʼa (Sant. 4:8). Dayi bebʉ Jeowa diabʉrʉdera akʉza buru kʼoebʉrʉdera audre Jeowa kʼawa baseapanʉ. Ĩjãseabʉ maʉ̃neba ʉ̃tara iya diaita bʉa nesidabʉ jõma mawũã nekʼãrẽ wae ẽ marẽã (Mal. 3:10; Jer. 17:​7, 8).

3. ¿Ẽbẽrarã buru kʼoedarabara kʼãrẽta oibara? (Eclesiastés 5:​4, 5).

³ Dayirã buru kʼoebʉrʉdera ʉ̃rabʉrʉ Daizeze ode jʉ̃drʉbʉ. Bʉ buru kʼoeda tẽãra, bʉara nekʼãrẽ jõma oyi Jeowaba kãgabʉde bʼaita akʉza yi kayirua yi edebi ẽ baita (akʉra Eclesiastés 5:​4, 5). Bʉra Jesu kʼaidubema baera, nekʼãrẽ jõma oyi iyi kĩrãkʼa bʼaita akʉza iya jaradade bʼaita (Mat. 28:​19, 20; 1 Ped. 2:21). Naʉ̃ artikuloba kʼarebayi bʉa maʉ̃ta omarẽã.

JESUDE KĨRÃKʼA OBARA BEDʼEA ZROMA ŨDUBɄMINA AKɄZA NEKAYIRUA OITA ZEBɄMINA

4. ¿Kʼãrẽta jarakĩrãbʉ bedʼea «bebudʼe basiidʼu ewariza mʉrã pẽwãdua»? (Lucas 9:23).

⁴ Bʉ buru kʼoeda tẽãra bʉara ewari jõmaʉ̃nẽ nebia awa ũdu ba ẽ bayi, awuarabʉrʉ Jesuba iyi kʼaidubemara jarasi: «Bebudʼe basiidʼu ewariza mʉrã pẽwãdua» (akʉra Lucas 9:23). ¿Jesubara maʉ̃ bedʼea jaradadebara jarakĩrãbasika iyi kʼaidubemarãra ewari jõmaʉ̃nẽ zʉbʉria bʼaibasita? Mawũã ẽ, awuarabʉrʉ iyara jara ũrĩbikĩrãbasi ãya nebiata ũdudaimina, edaʉde bedʼea zromata ũdudaibasita, maʉ̃ra bedʼea zromaranebemara ʉ̃kʉrʉra mejãcha pʉabaibasi (2 Tim. 3:12).

5. ¿Kʼãrẽ nebiata diayi asi Jesubara iyi kʼarea nekʼãrẽ aduabʉrãra?

⁵ Bʉra bʉ mebẽrãba pẽwãbadabaibara Daizeze odebʉ kʼarea, mawũã ẽ bʉrʉ bʉa nekʼãrẽ bia erbʉta idubʉsibaibara mawũã Daizeze Nokʼoba zokʼabʉta nããra bʉeita (Mat. 6:33). Bʉa maʉ̃ta osibʉrʉ kʼawuabara Jeowabara akʉbʉta bʉa nekʼãrẽ bia obʉra iyi kʼarea (Heb. 6:10). Bʉa ũdubʉrʉbaibara Jesuba naʉ̃ bedʼea jaradara wãrĩnuta: «Mʉ̃a mara jaraya abaʉba amaera iyi deta, mebẽãrata, papata, zezeta, wũãwũãrata akʉza drʉata mʉ̃ kʼarea, mawũã ẽ bʉrʉ bedʼea bia kʼãrẽa idi ewade jidama 100 jidaya (deta bio, mebẽrã yumakẽrãrata, yuwẽrãrata, paparata, wũãwũãrata akʉza drʉarata, iyita pẽwãpanʉmina) akʉza ʉ̃ra zeide ewari jõmaʉ̃nẽ bʼaita erbayi» (Mar. 10:​29, 30). Bʉara nebiata audre ũdubʉ nekʼãrẽ aduabʉira (Sal. 37:4).

6. ¿Bʉ buru kʼoeda tẽãra kʼãrẽa nesidai zarea oita yi kayirua yi edebi ẽ baita?

⁶ Bʉ buru kʼoeda tẽãra zarea oibara kayirua oita krĩcha zebʉrʉde maʉ̃ʼa yi edebi ẽ baita (1 Juan 2:16). Dayirã Adánʼneba zesi baera, edaʉde Pablo kĩrãkʼa krĩchaseabʉ, iya naʉ̃ta jarasi: «Mʉne edʼaubara mʉma biga Daizeze ũrãgʼara. Mawũãmina ne awuruta mʉne bʼʉa mʉ krĩchata idaribi ẽãta, maʉ̃bara obi edea kʼazhiruata mʉne bʼʉta» (Rom. 7:​22, 23). Bʉra nekayirua omia baera, sopʉa baseabʉ edaʉde bʉa nebia okĩrãbʉta oau ẽ bai baera. Mamina bʉa krĩchabʉbʉrʉ bʉ bebʉ Jeowa diaside kʼãrẽta oita jaradata, naʉ̃ba kʼarebayi kayirua oita zebʉrʉde maʉ̃ʼa yi edebi ẽ baita. Bʉ bebʉ Jeowa diabʉba kʼarebayi kayirua oẽ baita, ¿sãwũã?

7. ¿Bʉ bebʉ Jeowaʼa diaiba sãwũã kʼarebai kʼẽrẽpa baita?

⁷ Dayi bebʉ Jeowaʼa diabʉrʉdera, wua oẽ daya nekʼãrẽ okĩrãbʉta. Maʉ̃ba jarakĩrãbʉ daya nei okĩrãbʉbʉrʉ, nei kãgabʉbʉrʉ, mamina naʉ̃ra Jeowaba kãgabʉdebʉ ẽ bʉrʉ, oẽ baibara (Mat. 16:24). Maʉ̃ba bʉara krĩcha ẽ bayi kʼãrẽta oita, mawũã ẽ bʉrʉ sãwũã oita, biʼia kʼawua bʼai baera yi kayiruata oẽ baibarata akʉza Jeowaʉ̃me kʼẽrẽpabaibarata. Dayirãta Jeowaʉ̃me kʼẽrẽpapanʉbʉrʉ, mawũãra Jobde kĩrãkʼa odayi. Iyara mejãcha ũdusi bedʼea zromara, mawũãsidu iya naʉ̃ta jarasi: «Mʉ̃ bei ẽ nããra iyiʉ̃me kʼẽrẽpabayi» (Job 27:5).

8. Bʉ bebʉ Jeowaʼa diaya ada ʉ̃rʉ krĩchaiba, ¿sãwũã kʼarebai yi kayirua yi edebi ẽ baita?

⁸ Bʉa krĩchabʉbʉrʉ bʉ yiwidʼiside Jeowaʼa bʉ bebʉ diaya ada ʉ̃rʉ, naʉ̃ba kʼarebayi bʉa yi kayirua oita zebʉrʉde, zarea erbamarẽã maʉ̃ yi kayirua yi edebi ẽ baita. Bari jaraita, ẽbẽra aba kima barabʉbʉrʉ bʉra, ¿auduabaibaraka maʉ̃ ẽbẽraʉ̃me? Mawũã ẽ, bʉara Jeowa jarasi baera maʉ̃ta oẽ baita. Bʉta maʉ̃ yi kayirua yi edebi ẽ bʉrʉ tẽã bʼai bedʼea zroma ũdu ẽ bayi. Bʉra yi kayirua odebara jĩgabayi (Prov. 4:​14, 15).

9. ¿Bʉ bebʉ Jeowaʼa diada ʉ̃rʉ krĩchaiba, sãwũã kʼarebai Jeowaba jarabʉta nããra oita?

⁹ Ẽbẽra abaʉba bʉaʼa jarara iyitaʼa trajamarẽã, mamina maʉ̃ trajoba bʉta ewariza ãba yi jʉrebarima wãbi ẽ bʉrʉ ¿kʼãrẽta oi? Maʉ̃nera bʉara biʼia kʼawuabayi kʼãrẽta oita naena krĩchasi baera bʉaʼa trajota diadara mamina maʉ̃ trajoba bʉta ãba yi jʉrebarima wãbi ẽ bʉrʉ, ĩjã ẽ baita maʉ̃ trajo oira. Maʉ̃ba bʉara ĩjã ẽ bayi maʉ̃ trajo oira tẽã jʉrʉnʉme ẽ baita sãwũã Jeowaba jarabʉ nãã bʉeita. Jesubara ewari jõmaʉ̃nẽ yi Zezeba kãgata okĩrãbasi, abarika bʉabida krĩchaibara Jeowaba kãgabʉtrʉ oita (Mat. 4:10; Juan 8:29).

10. ¿Bʉ buru kʼoeda tẽãra Jeowabara, sãwũã kʼarebai Jesu kʼaidubʉta idubʉ ẽ marẽã?

¹⁰ Bʉa bedʼea zroma ũdubʉba akʉza yi kayirua oita zebʉrʉde kʼãrẽ oi jidabʉba, ũdubibʉ bʉra Jesu kʼaidubemata akʉza bʉa maʉ̃ta obʉrʉdera kʼawua baseabʉ Jeowaba kʼarebaita bʉra. Daizeze Bedʼeaba jarabʉ: «Mamina Daizezera jipabʉ, maʉ̃ kʼarea kayiruade baebibari krĩchara, daya oẽãsidu wuetara obi ẽ, awuarabʉrʉ kayiruade baebibari krĩcha zebʉrʉdera, Daizezebara kʼarebayi maʉ̃neba ẽdrʉita mawũã zarea bamarẽã» (1 Cor. 10:13).

KʼÃRẼTA OSEAPANɄ JESU KʼAIDUBɄ IDUBɄ Ẽ BAITA

11. ¿Kʼãrẽta oseapanʉ Jesu kʼaidubʉ idubʉ ẽ baita? (Akʉra potota).

¹¹ Jesubara soiduba obasi Jeowaba jarabʉra akʉza Jeowa kʼawabasi yiwidʼibʉdeba (Luc. 6:12). Buru kʼoeda tẽã Jesude kĩrãkʼa obʼaira, naenaʉ̃ba nebiata ozeibara, mawũã Jeowa kʼawa bʼaita. Daizeze Bedʼeaba jarabʉ: «Mamina dayirãba nekʼãrẽ mejãcha obʉmina, maʉ̃ta audre bia owãibara» (Filip. 3:16). Edaʉde bʉa ũrĩñi ʉ̃kʉrʉ mebẽrãba nekʼãrẽ ozebʉrʉta mawũã Jeowaita audre trajaita. Maʉ̃ra mebẽrãra Eskuela Ebangelizadorʼeda jʉ̃ẽsibaibara, mawũã ẽ bʉrʉ ãyira awuru drʉa eda jʉ̃ẽsibaibara, mawũã nesidabʉmae kʼarebaita, bʉabida maʉ̃ta oseabʉbʉrʉ ora. Jeowa pʉwʉrʉbara Jeowa kʼarea nekʼãrẽ audre okĩrãbʉ (Hech. 16:9). Mamina bʉa maʉ̃ta obe ẽ bʉrʉ, krĩcharãra bʉra zeri ẽãta wuabemarane kĩrãkʼa obe ẽ baera. Daizeze odebʉraitara audre yibia baera awuanta bʼaita, bʉa oseabʉta obʉbʉrʉ maʉ̃ba Jeowata sobiabibʉ (Mat. 10:22). Kĩrãbera bʉa nekʼãrẽ jõma obʉbʉrʉ Jeowaba kãgabʉ oita, mawũãra iyita sobiabibʉta. Bʉ buru kʼoeda tẽã bʉa maʉ̃ta obʉbʉrʉ, idubʉ ẽ bayi Jesu kʼaidubʉta (Sal. 26:1).

12, 13. ¿Kʼãrẽta oseabʉ bʉa Daizezede nãã okĩrãbada kĩrãkʼa oẽbʉrʉ? (1 Corintios 9:​16, 17 akʉza akʉra rekuadro «Kʼẽrẽpa bara Daizeze ode»).

¹² Bʉta soiduba yiwidʼinʉmʉ ẽ bʉrʉ, Daizeze Bedʼea jaradia wãbʉrʉde sobiade obʉ ẽ bʉrʉ, mawũã ẽ bʉrʉ Daizeze Bedʼea akʉbʉde nãã akʉkĩrã akʉbada kĩrãkʼa akʉ ẽ bʉrʉ, ¿kʼãrẽta oseabʉ? Bʉ buru kʼoeda tẽã mawũã sentibʉbʉrʉ, krĩcharãra bʉra Daizeze jaure zareaba kʼareba ẽãta, dayirãra kayirua omia baera edaʉde dayirã sãwũã sentibʉra awuara baseabʉ. Bʉa Jeowaba jarabʉta nãã obada kĩrãkʼa soiduba obʉ ẽ bʉrʉ, krĩchara Pablo yiza ʉ̃rʉ. Iyara Jesude kĩrãkʼa soiduba okĩrãbasi, mamina kʼawuabasi edaʉde mawũã soiduba okĩrã ba ẽ bai basita (akʉra 1 Corintios 9:​16, 17). Pabloba jarasi iya maʉ̃ta okĩrã ba ẽ basimina, oibarabasita iyaʼa maʉ̃ta omarẽã zokʼasida baera. Pablobara zarea osi iyaʼa omarẽã zokʼadapeadara jõma aribaeita, krĩcha ẽã iyi sãwũã sentibʉta.

¹³ Edaʉde, dayirãbara Jeowaba nekʼãrẽ omarẽã zokʼabʉra oamakʉ, mamina maʉ̃nera zarea odaibara maʉ̃ aripe oita. Bʉta zarea obʉbʉrʉ ewariza Jeowaba zokʼabʉta oita, mawũãra bʉara wiña wiñane okĩrã wãñi maʉ̃ra. Dayirãba Daizeze Bedʼeata ewariza akʉbʉbʉrʉ, Daizezeʼa yiwidʼibʉbʉrʉ, ãba yi jʉrebarima wãbʉbʉrʉ, akʉza jaradiade wãbʉbʉrʉ, naʉ̃ba kʼarebayi buru kʼoeda tẽã Jesude kĩrãkʼa oita. Mebẽrãba ũdudara dayirãba ewariza Jeowaba kãgabʉde obʉta, naʉ̃ba kʼarebayi ãyabida abarika okĩrãmarẽã (1 Tes. 5:11).

«MAYIKɄZA AKɄIDUA»

14. ¿Kʼãrẽta akʉibara dayikʉza akʉza kʼãrẽa? (2 Corintios 13:5).

¹⁴ Yibia buru kʼoeda tẽãbida dayirãba ewariza akʉita, Daizezeba nekʼãrẽ omarẽã zokʼabʉ nãã obada kĩrãkʼa idi ewadebida okĩrãbʉ kʼawuaita (akʉra 2 Corintios 13:5). Krĩchara bʉa ewariza kʼãrẽta obʉta. Ewariza Daizeze Bedʼea akʉbʉ kʼawuaita, badua yiwidʼibʉ kʼawuaita, ãba yi jʉrebarima badu jʉ̃ẽbʉ kʼawuaita akʉza badua jaradiade wãbʉ kʼawuaita. Jʉrʉda maʉ̃ sãwũã sobiade oita. Bari jaraita bʉyikʉza widira: «¿Mʉara awurura jaradiaseabʉka Daizeze Bedʼeaba kʼãrẽ jarabʉ ʉ̃rʉ? ¿Kʼãrẽta oseabʉ Daizeze Bedʼea jaradiabʉrʉde sobiade jaradiaita? ¿Mʉ̃ yiwidʼibʉrʉdera Daizezeʼa jara ũrĩbibʉka mʉ̃a kʼãrẽ nesidabʉta? mawũã ẽ bʉrʉ ¿mʉ̃ yiwidʼibʉba ũdubibʉka mʉ̃ara Daizeze ʉ̃rʉ wãrĩnu ĩjãbʉta? ¿Badua wãbʉka ãba yi jʉrebarima? ¿Kʼãrẽta oibara ãba yi jʉrebarimae juwa ʉ̃ta wuaita akʉza kĩrãkita ũrĩta?».

15, 16. ¿Kʼãrẽta kʼawuapanʉ mebẽã Robert yizadeba?

¹⁵ Bʉyikʉza akʉibara bʉa saʉ̃ne audre bia oita waebʉta. Mebẽa Robert yizaba ũdubibʉ kʼãrẽa yibiata maʉ̃ oita. Iya jarabʉ: «Mʉ̃ 20 poaga baside ewari bio traja ba ẽ basi. Maʉ̃ne ẽbẽra wẽrãba mʉ̃me ãba trajabadaba, trʉ̃si iyi deidu jʉ̃ẽmarẽa mawũã ũmepei panaita akʉza bia berabaridaita. Nããra mʉ̃ara jarasi kʼãrẽ oibara baera wãbe ẽãta, mamina tẽã juneane jara ũrĩbisi kʼãrẽa wãbe ẽãta». Robertba bia osi, nemitia oẽ basi baera. Mamina iya tẽã junea maʉ̃ ʉ̃rʉ krĩchabʉrʉde krĩchasi audre bia oseabasita. Iya jarabʉ: «Naʉ̃ ẽbẽra wẽrãba iyi deda ũmepei wãnai jaraside, mesera jaraidebasi wã ẽãta Joséba Potifar kima jarada kĩrãkʼa (Gén. 39:​7-9). Mejãcha krĩcha osi mesera ĩjã ẽã a ẽ basi baera, maʉ̃ba kʼawuasi zarea oibarata audre Jeowa neũdukʼawuabaibarata».

¹⁶ Bʉa nebiata ũduseabʉ bʉyikʉza akʉbʉbʉrʉ Robertba oda kĩrãkʼa. Nemitia oẽ basimina widira: «¿Mʉ̃ra krĩcha osika maʉ̃ ĩjã ẽã aita?». Bʉa kʼawuara audre bia oibarata maʉ̃ kʼarea krĩcha orãra, yiwidʼira Daizezeʼa iya kʼarebamarẽã daya saʉ̃ta audre bia oibarata. Adewara, zarea oibara Jeowaba kãgabʉ oita (Sal. 139:​23, 24).

17. ¿Robert kʼẽrẽpabʉba sãwũã Jeowa ʉ̃rʉ ibia bedʼeabisi?

¹⁷ Audre bia kʼawuadaya Robert nebʉra ʉ̃rʉ. Iya jarabʉ: «Ẽbẽra wẽrã mʉ̃me ãba trajabʉ bedʼea ĩjã ẽ bada tẽã junea iya mʉ̃aʼa jarasi: ‹Idibʉrʉ mʉ̃a kʼawuadogo›. Mʉ̃aʼa jarasi iyi neũdukʼawua Jeowa ʉ̃rʉ Kʼawuabibaribadaba jarasita Jeowa ʉ̃rʉ Kʼawuabipanʉrã warrarabara, jõmaʉ̃ba nemitia chuwea opanʉta. Iyi neũdukʼawuaba jarada wãrĩnu kʼawuaita, maʉ̃ kʼarea iya mʉ̃aʼa jarasi ũmepei wãnaita. Mʉ̃a maʉ̃ kʼawuaside mejãchade sobiasi mʉ̃ra, Jeowa ʉ̃rʉ ibia bedʼeabisi baera».

18. ¿Kʼãrẽta oita krĩchaibara bʉ buru kʼoeda tẽãra? (Akʉra rekuadro «Naʉ̃ra artikulorãra jipade biga bʉita»).

¹⁸ Bʉ bebʉ Jeowaʼa diada tẽã akʉza buru kʼoeda tẽã, naʉ̃ba ũdubibʉ Jeowa trʉ̃ neneẽã bamarẽã kãgabʉta, krĩcha ẽã kʼãrẽ bedʼea zroma zebʉbʉsida. Bʉa ĩjãseabʉ Jeowaba kʼawuabʉta bʉa kʼãrẽ bedʼea zroma erbʉta akʉza kʼawuabʉta bʉa kʼãrẽta awuanta zebʉrʉta. Jeowaba nebia diayi, bʉa iyiare kʼẽrẽpa bʼai kʼarea zarea obʉ baera. Ĩjãra iya iyi jaure zareata diaita mawũã bʉa zarea erbamarẽã maʉ̃ oita (Luc. 11:​11-13). Jeowa kʼarebadeba bʉ buru kʼoeda tẽãra, bʉara Jesude kĩrãkʼa obaseabʉ.