Kʼẽrẽpabʉta ũdubipanʉ dayirãba ĩjãbʉdeba akʉza nekʼãrẽ obʉdeba

1. ¿Daya Abrahánba ĩjãbada akʉbʉrʉde, kʼãrẽta widiseapanʉ?

ẼBẼRA mejãchaʉba ũrĩbari Abrahán ʉ̃rʉ, mamina mejãchaʉba kʼawua ẽ kʼaita Abrahánʼra. Bʉara ãyideira biʼia kʼawuabʉ kʼaita iyira. Bari jaraita bʉa kʼawuabʉ Daizeze Bedʼeade jarabʉta iyira ĩjã erbʉra zezeta (Rom. 4:11). Bʉara bʉyikʉza widiseabʉ, ¿mʉ̃ara Abrahánʼne kĩrãkʼa ĩjãseabʉka? Mawũã.

2. ¿Kʼãrẽa yibia Abrahán yiza ʉ̃rʉ kʼawuaira? (Santiago 2:​22, 23).

² Dayirãba Abrahánʼne kĩrãkʼa ĩjãkĩrãpanʉbʉrʉ iyi ʉ̃rʉ kʼawuaibara. Bari jaraita Jeowaba iyaʼa zokʼasi jĩga wãmarẽã akʉza mawũã de karpade besi iyira poaga biobayeda. Adewara iyi warrasida sakripisiode diaibasi. Iya mawũã odaba ũdubisi iya ĩjãbʉra zarea erbʉta. Iya ĩjãbʉ ũdubibʉba akʉza kʼãrẽ obʉba, kʼarebasi Jeowaba iyi neũdukʼawua kĩrãkʼa akʉmarẽã (akʉra Santiago 2:​22, 23). Jeowabara abarika akʉkĩrãbʉ bʉsida. Maʉ̃ kʼarea Santiagoʼa akʉza Pabloʼa bʉbisi Abrahán yiza ʉ̃rʉ. Atia akʉdayi kʼãrẽta jarabʉta Romanos yi zroma 4ba akʉza Santiago yi zroma 2ba Abrahán ʉ̃rʉ. Naʉ̃ra kapitulo ũmeba nebiata jara ũrĩbibʉ iyi ʉ̃rʉ.

3. ¿Pablo akʉza Santiagoʉ̃mebara saʉ̃ bedʼea bia Daizeze Bedʼeadebʉta zokʼasi?

³ Pabloba Santiagoʉ̃mebara jarasida bedʼea Génesis 15:6​de jarabʉta, nama jarabʉ: «Abrahánbara wãrĩnu ĩjãsi Jeowara, aramaʉ̃ta iyara jõma aripe obʉta akʉsi». Abrahánba ĩjãbasi baera Jeowaba ũdusi iya jõma aripe obʉta. Nekʼãrẽ aripe obʉba kʼarebabʉ Jeowaba dayita biʼia akʉmarẽã. Dayirãra nemitia omia baera edaʉde krĩchaseabʉ jipade zareta nekʼãrẽ aripe oita Daizeze dabʉ nãã, mamina aripe oseapanʉ. Mamina kʼawuaita kʼãrẽta oibarata nekʼãrẽ aripe oita Daizeze dabʉ nãã, akʉdaya kʼãrẽa Jeowaba jarasita Abrahánbara nekʼãrẽ aripe obʉta.

ĨJÃBɄTA ŨDUBIBARA JEOWA DABɄ NÃÃ NEKʼÃRẼ ARIPE OBʼAITA

4. ¿Ẽbẽrarã kayirua omiamina, kʼãrẽba kʼarebaseabʉ aripe oita?

⁴ Romanos kartade Pablobara jara ũrĩbisi ẽbẽrarã jõmaʉ̃ta nemitia omiarata (Rom. 3:23). Mamina mawũãsidu, ¿kʼãrẽa jaraseapanʉ Daizeze dabʉ nããra dayirãbara nekʼãrẽ aripe oseabʉta? Kristianoraba maʉ̃ ʉ̃rʉ biʼia ũrĩmarẽã Pabloba zokʼasi Abrahán yizata.

5. ¿Kʼãrẽa Jeowabara jarasi Abrahánbara jõma aripe obʉta? (Romanos 4:​2, 4).

⁵ Jeowaba jarasi Abrahánbara nekʼãrẽ aripe obʉta. Iyira maʉ̃nera waidide Canaánʼnebasi. Mamina Jeowabara jara ẽ basi Abrahánʼra nekʼãrẽ aripe obʉta Jeowaba Moisésʼa ley diadaba jarabʉta aripe obʉ baera. ¿Kʼãrẽa mawũã jarapanʉ? (Rom. 4:13). Jeowaba Abrahánʼa jaraside iya nekʼãrẽ jõma aripe obʉta, maʉ̃ ewaridera Jeowabara waidide dia ẽ basi maʉ̃ leyʼra. Jeowabara maʉ̃ leyʼra diasi 400 poaga berabarida tẽãbʉrʉ. ¿Kʼãrẽa mawũãsidu Jeowabara jarasi Abrahánbara nekʼãrẽ aripe obʉta? Jeowaba Abrahánʼra mejãcha kãgabasi baera, jarasi iyara nekʼãrẽ aripe obʉta ĩjãbʉta ũdubibasi baera (akʉra Romanos 4:​2-4).

6. ¿Kʼãrẽa Jeowabara jarabʉ ẽbẽra kayirua omiabara aripe oseabʉta?

⁶ Pabloba maʉ̃ ʉ̃rʉ bia ũrĩbita jarasi ẽbẽra abaʉba ĩjãbʉba Daizeze dabʉ nããra nekʼãrẽ aripe obʉta (Rom. 4:5). Akʉza Pabloba jarasi: «Adewara Davidbida jara ũrĩbibʉ ẽbẽra sobiabʉta Daizeze nãã kʼẽrẽpabʉta, mamina mawũã obʉ ẽ iya nekʼãrẽ obʉ kʼarea: ‹Sobiapanʉ yi ãya kayirua oda kĩrãduadapeadara akʉza ãyi kayirua jẽda kĩrãbeda ẽãrata, sobiabʉ yumakẽrã Jeowaba iyi nekayirua jẽda widi ẽãne›» (Rom. 4:​6-8; Sal. 32:​1, 2). Daizezeba kĩrãduabʉ ẽbẽrarã iyi ʉ̃rʉ ĩjãbʉ kayiruara, adewara iyara wuara kĩrãbe ẽ. Daizezeba maʉ̃ra ẽbẽrarã biʼia akʉbʉ ãyita wãrĩnu soiduba jẽda krĩchapanʉ baera.

7. ¿Kʼãrẽa jaraseapanʉ ẽbẽrarã nããra Daizeze odepananabara aripe opanasita?

⁷ Abrahán, David akʉza wuabemara Daizeze odepananasida aripe obʉta jarasidamina, ãyisida kayirua omiarabasi. Mamina Daizezebara ãya ĩjãbʉ kʼarea ãyira neneẽãbʉ kĩrãkʼa akʉsi, mawũã akʉ ẽ basi ẽbẽrarã iyi odepanʉra ẽ kĩrãkʼa (Efes. 2:12). Apostol Pabloba Romanos kartade jara ũrĩbisi dayirãbara ĩjãta erbaibarata Daizeze neũdukʼawua bʼaira. Maʉ̃ta osi Abrahánba akʉza Davidba. Dayirãbida maʉ̃ta odaibara.

¿KʼÃRẼNE ABARIKABɄ ĨJÃITA NEKʼÃRẼ OIɄ̃MERA?

8, 9. ¿Kʼãrẽta jarapanʉ ẽbẽrarãbara Pabloba akʉza Santiagoʉ̃meba bʉda ʉ̃rʉra akʉza kʼãrẽa?

⁸ Poaga mejãchaba nokʼora religionʼranebema bedʼeabʉta ĩjãta akʉza nekʼãrẽ oita kʼãrẽne abarikabʉta. Ʉ̃kʉrʉba jarapanʉ dayi ẽdrʉira Jesu ʉ̃rʉbʉrʉ ĩjãibarata. Bʉa ũrĩbaribaibara naʉ̃ bedʼeara «Jesu ʉ̃rʉ ĩjãra mawũã ẽdrʉita». Ʉ̃kʉrʉba Pabloba bʉdata jarapanʉ: «Daizeze nãã kʼẽrẽpabʉta, mamina mawũã obʉ ẽ iya nekʼãrẽ obʉ kʼarea» (Rom. 4:6). Ʉ̃kʉrʉba jarapanʉ bʉra ẽdrʉseabʉta iglesiadebemaba jarabʉrʉma wãbʉrʉde akʉza wuabemara kʼarea nebia obʉde. Ũdubita ãya jarabʉ wãrĩnuta ũdubipanʉ Santiago 2:24​ta: «Ẽbẽrarã bari ĩjãbʉ kʼarea ẽbẽra bia ẽ, awuarabʉrʉ iya obʉ kʼareabida».

⁹ Maʉ̃ ʉ̃rʉ mejãchaʉta awuara krĩchapanʉ baera krĩchapanʉ Pablota Santiagoʉ̃mera bedʼea abarika ba ẽ basita dayirãba nekʼãrẽ oibara ʉ̃rʉ, Daizezeba bia akʉmarẽã. Nokʼo religionʼranebema yi audre kʼawuabʉba jarapanʉ Pabloitara ẽbẽra kʼẽrẽpa bʼaira nesidabʉ ĩjã erbaita nekʼãrẽ nebia oi erbai kaude. Waya Santiagoba krĩchabasi nekʼãrẽ bia oibarata Daizezeba bia akʉmarẽãra. Propesor religionebemaba maʉ̃ta jara ũrĩbisi: «Santiagoba ũrĩ ẽ basi Pabloba kʼãrẽa jarabʉta ẽbẽra abaʉba ĩjã erbaibarata kʼẽrẽpa bʼaita. Maʉ̃ kʼarea Santiagora bedʼea abarika ba ẽ basi Pabloʉ̃mera». Mamina Jeowaba bʉbisi naʉ̃ bedʼeara Pabloʼa akʉza Santiagoʼa (2 Tim. 3:16). Mamina bʉ bedʼea naʉ̃ ʉ̃rʉ jara ũrĩbibʉta ãya kʼãrẽa bedʼea abarikabʉ ẽ basita. Adewara audre kʼawuaita dayirãbara akʉibara ãya kʼãrẽta audre bʉsita.

10. ¿Pablora kʼãrẽ nebia oi ʉ̃rʉ bedʼeasi? (Romanos 3:​21, 28 akʉza akʉra potota).

¹⁰ ¿Kʼãrẽta jarakĩrãbʉ bedʼea nekʼãrẽ oibara Pabloba Romanos 3 akʉza 4de bʉdabara? Jarakĩrãbasi oibarata Moisésba israelitara ley diadata (akʉra Romanos 3:​21, 28). Pablo ewaribasidera ʉ̃kʉrʉitara zarebasibaibara ĩjãita Moisés leyta. Maʉ̃ kʼarea Pabloba Abrahán yizata jara ũrĩbisi ũdubita nesida ẽãta leyba jarabʉ jõma oita Daizezeba bia akʉmarẽãra. Maʉ̃ tẽãra Pabloba jara ũrĩbisi kʼãrẽta oibarata ĩjã erbaita. Naʉ̃ba sobiabibʉ dayirãra, kʼawuapanʉ baera Daizeze ʉ̃rʉ akʉza Jesu ʉ̃rʉ ĩjãbʉbʉrʉ, Jeowabara dayirãra bia akʉbʉta.

11. ¿Santiagora kʼãrẽ nebia oi ʉ̃rʉ bedʼeasi?

¹¹ Adewara Santiago kapitulo 2ba nekʼãrẽ oi ʉ̃rʉ bedʼea jaradara, jarakĩrãkʉa ẽ basi oita Pabloba leyde jaradata. Santiagoba jaradara jarakĩrãkʉasi kristianoraba ewariza opanʉta. Maʉ̃ba ũdubibasi wãrĩnu ĩjã erpanʉ kʼawuaita. Akʉdaya yiza ũme Santiagoba zokʼadata.

12. ¿Sãwũã jara ũrĩbisi Santiagoba ĩjãi ʉ̃rʉ akʉza nekʼãrẽ oi ʉ̃rʉ? (Akʉra potota).

¹² Yi nããbema yizade Santiagoba jara ũrĩbisi jõmaʉ̃ta daucha akʉibarata. Maʉ̃ bia ũrĩbita ũdubisi yiza aba ẽbẽra abaʉba bia akʉbʉta yumakẽrã plata mejãcha erbʉta, mamina bia akʉ ẽãta yumakẽrã kʼãrẽ neẽãbʉra. Santiagoba jarasi naʉ̃ yumakẽrãba ĩjãbʉ abasimina iya obʉba ũdubi ẽ basi ĩjãbʉta (Sant. 2:​1-5, 9). Yiza ũme jara ũrĩbita Santiagoba jara ũrĩbisi yumakẽrã abaʉba ũdubʉta mebẽã aba wua neẽãbʉta, yiko neẽãbʉta, mamina iya kʼãrẽ oẽãta maʉ̃ kʼarebaita. Naʉ̃ yumakẽrãba jarabʉbʉrʉ iya ĩjãbʉta mamina iya obʉdeba ũdubibʉ ĩjã erbʉ ẽãta. Santiagoba jarabʉ kĩrãkʼa «daya ĩjãbʉta oũdubi ẽ bʉrʉ beibʉ kĩrãkʼabʉ» (Sant. 2:​14-17).

13. ¿Sãwũã ũdubisi Santiagoba daya ĩjãbʉ oũdubira? (Santiago 2:​25, 26).

¹³ Santiagoba jarasi Rahabʼbara iya ĩjãbʉ erbʉta iya nekʼãrẽ obʉdeba (akʉra Santiago 2:​25, 26). Iya ũrĩbarisi Jeowaba israelitarãra kʼarebabʉta (Jos. 2:​9-11). Iya ĩjãbʉta ũdubisi iya meraside israelitara ũme miaordabarita, mawũã ãyita beada ẽ marẽã. Maʉ̃ba naʉ̃ yuwẽrã nekayirua omiabasimina, israelita ẽ basimina aripe obʉta jarasida, Abrahán kĩrãkʼa. Rahab yizadeba kʼawuasida dayirãba ĩjãbʉ ũdubira ũdubibarata daya nekʼãrẽ obʉdeba.

14. ¿Kʼãrẽa jaraseapanʉ Pabloba akʉza Santiagoba bʉdara awuara jarabʉ ẽãta?

¹⁴ Mawũẽra Pabloba akʉza Santiagoba kĩrã awuara jara ũrĩbipanʉ ĩjãi ʉ̃rʉ akʉza nekʼãrẽ oi ʉ̃rʉ. Pabloba kristiano judiora jarasi Moisés leyba jarabʉtrʉ obʉbʉrʉ Jeowabara bia akʉ ẽ baita. Adewara Santiagoba jarasi kristianora daya ĩjãbʉta ũdubibarata daya nekʼãrẽ obʉdeba.

15. Dayirãba nekʼãrẽ bia obʉdeba, ¿sãwũã ũdubipanʉ wãrĩnu ĩjãbʉta? (Akʉra potota).

¹⁵ Jeowaba jara ẽ basi iya bia akʉira oibarata daucha Abrahánba oda kĩrãkʼa, awuarabʉrʉ soiduba ĩjãbʉta ũdubiseapanʉ nekʼãrẽ awuara awuaraka obʉdeba. Bia edaseapanʉ ʉ̃rabʉrʉ zepanʉrata akʉza kʼarebaseapanʉ mebẽrãta wãrĩnu kʼareba nesidapanʉta akʉza bia edadaibara dayirã mebẽrãta. Mawũã opanʉbʉrʉ Jeowaba bia akʉyi dayirãra akʉza nebiata diayi (Rom. 15:7; 1 Tim. 5:​4, 8; 1 Juan 3:18). Akʉza jaradia wãpanʉne ũdubipanʉ wãrĩnu soiduba ĩjãbʉta (1 Tim. 4:16). Dayirã jõmaʉ̃ba daya nekʼãrẽ obʉdeba ũdubiseapanʉ ĩjãbʉta nekʼãrẽ bia wãrĩnu ʉ̃ra berabari ʉ̃rʉ, mawũã obʉbʉrʉ Jeowaba akʉyi ẽbẽra aripe obʉ kĩrãkʼa akʉza iyi neũdukʼawuabayi.

Ʉ̃RA ZEIDE NEBIA JɄ̃ÃPANɄBA DAYA ĨJÃBɄTA AUDRE WARIBIBɄ

16. ¿Kʼãrẽne abarikabasi Abrahánba ĩjãbʉta iya nebia jʉ̃ãbadaʉ̃me?

¹⁶ Romanos yi zroma 4de adewara ũdubibʉ dayirãba kʼãrẽta kʼawuaseabʉta Abrahán ʉ̃rʉ: kʼãrẽ yibia nebia jʉ̃ã bʼaira. Jeowaba jarasi Abrahánʼneba nebia diaita pʉwʉrʉra, krĩchara Abrahánba nebia zroma jʉ̃ãbada ʉ̃rʉ (Gén. 12:3; 15:5; 17:4; Rom. 4:17). Abrahán 100 poagabaside akʉza Sara 90 poaga, mawũãsidu ãyira wũãwũã neẽbasi. Dayirã kʼãwũã beibaritara zõna babʉrʉde wũãwũã erbaira zare, maʉ̃ kĩrãkʼabasi Abrahánta Saraʉ̃me. Maʉ̃ba ãyi wũãwũã barai ĩjãira zarebasi. «Iya ĩjãbʉde jʉ̃ãbasi akʉza ĩjãsi pʉwʉrʉ zeze bʼaita iyira» (Rom. 4:​18, 19). Iya jʉ̃ãbadara aripe berabarisi. Iyira Isaac zezebasi iya jʉ̃ãbada kĩrãkʼa (Rom. 4:​20-22).

17. ¿Sãwũã kʼawuapanʉ Jeowa dabʉ nãã nekʼãrẽ aripe obʉta akʉza iyi neũdukʼawua baseabʉta?

¹⁷ Dayirãbida Jeowa nebia erbaseapanʉ akʉza iyi neũdukʼawua baseabʉ Abrahán kĩrãkʼa. Maʉ̃ ʉ̃rʉ jara ũrĩbisi Apostol Pabloba: «Bari Abraham ʉ̃rʉ̃ bʼʉdʼa ẽbasia mawũã bedʼea ne ẽã bʼʉdʼara. Awuarabʉrʉ dazhirãsidʼa abʼarika bedʼea ne ẽã duanukʼãrĩã dazhirãbara izhidʼebema ĩjã bʼeba beudʼata piradrʉbidʼata Jesús dazhirã Nokʼota» (Rom. 4:​23, 24). Abrahánʼne kĩrãkʼa dayirãbida nesidapanʉ Jeowa ʉ̃rʉ ĩjãita akʉza nekʼãrẽ bia oita. Adewara Jeowaba jarabʉra aripe berabaribʉta. Romanos yi zroma 5de, Pablora audre bedʼeabʉ jʉ̃ãi ʉ̃rʉ. Maʉ̃ ʉ̃rʉ akʉdayi wuarebema artikulode.