Génesis

12 Jeowaba jarasi Abrán’a: «Wãra bʉ drʉadebara, amaera bʉ mebẽrãta akʉza ẽbẽrarã bʉ zeze deda panʉrasida mõbe maʉ̃ tẽã wãra mʉ̃a bʉa drʉa ũdubima. 2 Mʉ̃a bʉra pʉwʉrʉ zroma babiyi, bʉ ʉ̃rʉ nebiata zeyi akʉza mʉ̃a bʉ trʉ̃ra yi zroma babiyi, bʉra nebiabayi wuabemaraita. 3 Mʉ̃ara nebiata diayi jari ẽbẽra bʉ ʉ̃rʉ ibia bed’eabʉara akʉza jari ẽbẽra bʉ ʉ̃rʉ imitia bed’eabʉra bia wã ẽ bayi, adewara wãrĩnu mebẽrã naʉ̃ drʉa jõmaʉ̃nẽbemata bʉdeba nebiata ũduyi». 4 Mawũẽra Abránbara osi Jeowaba jarada kĩrãk’a akʉza wãsi, adewara Lot’ra iyi k’aidu wãsi. Abrán’ra 75 poagabasi Haráneba wãsidera. 5 Wãsi Canaán drʉa eda akʉza edesi yi kima Saraísida akʉza yi mebẽã wũãwũã Lotsida, iya nek’ãrẽ bia erbadara jõma edesi adewara iyi nezok’ara Haráne ũdudasida. Ãyi Canaán drʉa eda zeside, 6 Abránbara maʉ̃ drʉa jõma berabarisi Siquem drʉaidu zeyeda, bakuru zroma Moréde panʉ k’awa. Maʉ̃ ewaride cananeorãra maʉ̃ drʉade panasi. 7 Jeowara yi ũdubisi Abrán’a mõbe jarasi: «Naʉ̃ drʉara jõma bʉdeba zebʉa diaya asi». Maʉ̃ tẽã Abránbara mama Jeowaita altarta osi. 8 Mawũã berabarida tẽã mamaʉ̃ba wãsi pʉwʉrʉ Betel katumaidabʉma mõbe karpa deta bʉsi Betel akʉza Hai ẽzadra. Beteldera juwa’ãkarebasi adewara Haira juwararebasi. Mama Jeowaita altarta osi mama Jeowa’a yiwid’ita. 9 Maʉ̃ tẽã Abránbara akʉza jẽda jʉrepesi iyi karpa dera mõbe iyira pʉwʉrʉza wãsi Néguebayeda. 10 Maʉ̃ drʉadera mejãcha zesi jarrabata. Jarrabara mejãchanʉmina baera Abrán’ra wãsi Egipto eda mamina maʉ̃ pʉwʉrʉdera ewari bio ba ẽ basi. 11 Ãyi Egipto eda jʉ̃ẽi naena yi kima Saraí’a jarasi: «Mʉ̃ bia ok’ãrãpe ũrĩda mʉ̃ bed’eata. Mʉ̃a k’awuabʉ bʉra arigʉ bi’ia kiruta. 12 Ẽbẽrarã Egiptodebemaraba bʉ ũdubʉdade krĩchadayi bʉra mʉ̃ kimata. Maʉ̃ k’area mʉ̃ra beadayi akʉza maʉ̃ba bʉra neida oda ẽ bayi. 13 Mʉ̃ bia ok’ãrãpe jarada bʉra mʉ̃ mebẽãta, mʉ̃ mawũã bʉdeba bia edamarẽã mawũã beada ẽ marẽã». 14 Abrán Egipto eda jʉ̃ẽside, egipsiorabara ũdusida naʉ̃ wẽrãra arigʉ bi’ia kiruta. 15 Faraón wũãwũãrabida ũdusida arigʉ bi’ia kiruta, maʉ̃ k’area iyi arigʉ bi’ia kiru ʉ̃rʉ ibia bed’easida faraón nãã. Mawũãera wẽrãra edesida faraón deda. 16 Iyara maʉ̃ wẽrãneba bia edasi Abrán’ra mawũã Abránbara erbesi obejata, pakata, burrota, kameyota akʉza nezok’arata. 17 Mamina Jeowabara zʉbʉriata berabaribisi faraónta akʉza maʉ̃ deda badarata Saraí k’area, Abrán kima k’area. 18 Aramaʉ̃ta faraónbara trʉ̃bʉesi Abránta mõbe jarasi: «¿K’ãrẽa k’ãwũã obʉrʉ bʉa mʉ̃ra? ¿K’ãrẽa jara ẽ basi k’aʉ̃ra bʉ kimata? 19 ¿K’ãrẽa jarasi bʉa k’aʉ̃ra bʉ mebẽãta? ¿Mʉ̃ra k’aʉ̃mera bera mi k’ai? zachu bʉ kimara. Edera bʉ kimara». 20 Faraónbara zok’abʉesi iyi nezok’arata Abránta kĩrãyubʉedamarẽã akʉza kimata adewara ãya nebia erpanʉrabawara.