Sábado 1 noviembre
Warrarã kedʼea, ju do kedʼea bʉzhita ibia jarabigaya (Mat. 21:16).
Marata wũãwũãra barabʉbʉrʉ kʼarebaseabʉ mara wũãwũãrãra komentario jaramarẽã. Edaʉde estudiaseapanʉ juwa jidai ʉ̃rʉ akʉza dayi sãwũã bia bʼai ʉ̃rʉ, yibarirabara yi wũãwũãrãra kʼarebaseabʉ maʉ̃ne sãwũã komentario bia diaita. Adewara kʼarebara mara wũãwũãrãra ãya komentariota diada ẽ bʉrʉ kʼawuamarẽã nekayirua ẽãta, bʉa maʉ̃ta jara ũrĩbira ãyira sopʉa ẽ bayi awurura komentario diabʉrʉ kʼarea (1 Tim. 6:18). Jõmaʉ̃ba komentario biata jaraseabʉ, mawũã Jeowa trʉ̃ ʉ̃rʉ ibia bedʼeabita akʉza dayirã mebẽrã so zarea diaita (Prov. 25:11). Daya komentario diabʉrʉde dayi sãwũã berabarida ʉ̃rʉ jaraseabʉ mamina aukʼara jaranʉmabe ẽ dayi ʉ̃rʉ (Prov. 27:2; 2 Cor. 10:18). Awuarabʉrʉ jaraibara Jeowa ʉ̃rʉ, iyi bedʼea ʉ̃rʉ akʉza iyi pʉwʉrʉ ʉ̃rʉ (Apoc. 4:11). w23.04 24, 25 parr. 17, 18
Domingo 2 noviembre
Kʼãĩnʉma ẽ baibara wuabemaraba obʉ kĩrãkʼa. Awuarabʉrʉ dauba panaibara akʉza bia krĩchaibara (1 Tes. 5:6).
Kãgaba kʼarebabʉ dauba bʼaita (Mat. 22:37-39). Daizezeta wãrĩnu kãgapanʉ baera jaradia wãpanʉ bedʼea zroma ũdupanʉmina (2 Tim. 1:7, 8). Dayirãba ẽbẽrarã Daizeze odebʉ ẽãta kãga ũdubipanʉ baera, jaradiada ʉ̃rʉ jaradiapanʉ. Jaradiapanʉ telepononeba akʉza kartadeba, jʉ̃ãpanʉ ẽbẽrarã Daizeze odebʉ ẽãta Jeowa ode bamarẽã (Ezeq. 18:27, 28). Kãgata ũdubibara dayirã mebẽrãbida. Maʉ̃ kãgara ũdubibʉ yiya so zarea diabʉde akʉza kʼarebabʉde (1 Tes. 5:11). Dayirãra gorogorora yõne yiya kʼarebabari kĩrãkʼabʉ. Maʉ̃ kĩrãkʼabʉ dayirã mebẽrãne, ãyi sopʉabibʉde dayirãbara krĩña oẽ akʉza abarika oẽ, ãya dayi ʉ̃rʉ nekayirua oda kĩrãkʼa (1 Tes. 5:13, 15). Akʉza wawiata ũdubipanʉ mebẽrã dayirã kongregasione nãã edebʉra (1 Tes. 5:12). w23.06 10 parr. 6; 11 parr. 10, 11
Lunes 3 noviembre
Jeowaba jaradara, ¿aripe obʉ ẽka? (Núm. 23:19).
Adewara dayirãbara audre zarea ĩjãseabʉ krĩchabʉde Jesu beida ʉ̃rʉ. Jesu beidaba ũdubibʉ Jeowaba jarabʉra wãrĩnu aripe oita. Dayirãbara bia krĩchadaibara kʼãrẽa beisita Jesura akʉza Jeowa kʼãrẽaba sopʉadata yi warra beiside. Naʉ̃ba ũdubibʉ baera Jeowaba ẽjũã kĩrãwãreã weya abʉra wãrĩnu weita, ¿kʼãrẽa mawũã jarapanʉ?Jeowata Jesuʉ̃mera, ¿kʼãrẽta sãwũã berabarisi dayirã kʼarea? Jeowabara nama egoro eda zokʼa bʉesi yi warra nããbemara ẽbẽra nemitia oka kĩrãkʼa zemarẽã. Jesu nama egorode basidera mejãcha zʉbʉriasi akʉza iyi beisidebida, maʉ̃ kʼarea Jeowara mejãcha zʉbʉriasi. Jeowaba krĩcha ẽ basibʉrʉ dayirãta ewari jõmaʉ̃nẽ babita iduaribi ẽ bakasi kʼãwũã yi warra zʉbʉria beimarẽã (Juan 3:16; 1 Ped. 1:18, 19). Mamina iya iduaribisi baera beimarẽã, naʉ̃ba ũdubibʉ Jeowabara dayirãra ewari jõmaʉ̃nẽ ẽjũã kĩrãwãreãnẽ babita. w23.04 27 parr. 8, 9