Mateo
Juan Burukʼoemiãba zokʼakuadʼa
11 Izha jʉrʉkuadʼata doce bʼea Jesúsbara maʉ̃ta ma jarape mamaʉ̃bara wãsia pʉwʉrʉza miã ũrãgʼadʼe. 2 Mawũẽ cárceldʼe bʼʉba Juanbara ũrĩsia zhãrã Ẽdrʉbiba kʼãrẽ obʼʉta, mawũẽ ũme zokʼasia izha jʉrʉkuadʼata. 3 Widʼi mawũãnamarẽã: ¿Bʉka zhãrã Ẽdrʉbiita zeita bʼadʼara, o daibara wadʼi awʉrʉta jʉ̃ãnaĩ?
4 Mawũãnaĩ Jesúsbara panaʉ̃ mawũãsia: Wãũdua, mobe Juanʉã kʼawuabiudua mazha ũrĩbʉdata mazha ũdubʉdata. 5 Daʉbʼerrea bʼera ne ũdu tupudʼea audua, wã bʼe ẽã bʼera wã tupudʼea, aidʼaba kʼaya bʼera nene ẽã tupudʼea, ne ũrĩ ẽã bʼera ne ũrĩ tupudʼea, beudʼapeadʼara piradrʉ tupudʼea, zuburia bʼea jara bara bʼʉa ẽdrʉdʼaidʼebemata bedʼea biata. 6 Sobia bʼaya mʉnebemata ĩjã ẽã nʉmʉ ẽãrã.
7 Juanba zokʼakuadʼata wãbʉdadʼera Jesúsbara Juan jarabʉrʉta zhãrã kʼobʼea mawũãsia: ¿Drua drudrua tabʼʉidʼura marãbara kʼãrẽta akʉdʼe jũẽsidʼa? ¿Bariduta bʼʉta akʉdʼe jũẽsidʼakʼa? 8 ¿O kʼãrẽta akʉdʼe jũẽsidʼa? ¿Ũmakĩrã wua biaba zho bʼʉta akʉdʼe jũẽsidʼakʼa? Wua biaba zho bʼera reyrã dedʼabʉrʉ bʼea. 9 ¿Kʼãrẽta akʉdʼe jũẽsidʼa? ¿Daizezeba bedʼeata jarabibarita akʉdʼe jũẽsidʼakʼa? Izhia, mʉã marãã jaraya, kʼãʉ̃ Daizezeba bedʼeata jarabibarita audre zhi zroma. 10 Kʼãʉ̃ẽnabemata zhi bʼʉmata mawũã bʼʉa:
Mʉ bedʼeata jarabarita mʉã bʉ na zokʼaya, bia ẽãrã ãmabʉdaba maʉ̃bara bʉ zei ota araa obʉrʉkaya bʉ na.*
11 Mʉã wãrĩnu marãã jaraya, wũẽrãba tobʉdara awʉrʉrã audre zhi zroma ẽã Juan Burukʼoemiã kʼãñabara. Mawũãmina Daizezeta Nokʼodʼebemata zhi zroma ẽãta bʼʉra zhi zroma izhi kʼãñabara.
12 Juan Burukʼoemiã miã ũrãgʼa bʼedʼa ewadeba idʼibasiidʼu Daizezeta Nokʼodʼebemata zuburia obʼea, aramaʉ̃ne maʉ̃ kʼarea zhõ bʼebara jõbiita nʉmeã. 13 Daizezeba bedʼeata jarabibarirãbara, Moisébara jarasidʼa Daizezeta Nokʼodʼebemata, maʉ̃ta tabʼʉa Juanba jaradʼa bitabai. 14 Maʉ̃rãba jaradʼapeadʼata marãba ĩjãnarã kʼãʉ̃ Juan basia Elía zeita bʼadʼara. 15 Ne ũrĩ bʼʉbara maʉ̃ta kĩrãkuita ũrĩdua. 16 Zhãrã idʼi ewadebema ¿mʉã kʼãrẽ ũme abʼarika jaraipe? Warrarã pʉwʉrʉdʼe jẽmene jewedʼabada kĩrãkʼa bʼea, ãzhi kʼopaeroa nemi jĩgua, 17 mawũãbada: Daiba chiruta zabʉdadʼera marã bairadʼa ẽbasia, dai miã sopua trʉ̃ãbʉdadʼera marã jẽgadʼa ẽbasia. 18 Aramaʉ̃ kĩrãkʼa bʼeta Juan zedʼara nekʼo ẽã vino do ẽã bʼʉ baera jaita erubʼʉa abʼea. 19 Waya mʉ Beubari Bape bʼʉta zedʼara nekʼo vino do bʼʉ baera ũmakĩrã naʉ̃ nekʼomiã vino domiã abʼea. Rey Romanebemaĩta plata widʼibada bawara, dewaraurã kʼazhirua omiãrã bawara zhibiata bʼʉa abʼea. Mawũãmina Daizeze krĩchara bigata kʼawua nʉmeã izhidʼebema ĩjã bʼeta bia nʉmeba.
Pʉwʉrʉ tabʼe maẽ ĩjãna ẽbadʼapeadʼa
20 Jesúsbara kẽãkuasia pʉwʉrʉ zroma tabʼe maẽ bʼeta, maʉ̃za ũdudʼakʼata bio okuasimina kʼazhiruara ãmape Daizezeta pẽwãna ẽãba mawũãsia: 21 ¡Daizezebara pua kʼawua oya Corazín pʉwʉrʉdʼe bʼera! ¡Pua kʼawua oya Betsaida pʉwʉrʉdʼe bʼera! Tiro pʉwʉrʉdʼe, Sidón pʉwʉrʉdʼe ũdudʼakʼata obʉrʉta mʉã marã maẽ odʼata osibʉrʉ, dããrãbʉrʉta sopuaba wua paima jʉ̃ jewedʼadʼape, sopuaba burudʼe itarra podʼape, kʼazhiruara ãmape Daizezeta pẽwãkʼausidʼa. 22 Mawũẽ mʉã marãã jaraya, Daizezeba kʼawua obʉrʉ ewadera Tiro pʉwʉrʉdʼe, Sidón pʉwʉrʉdʼe bʼeadʼara yarebai zuburia bʼeabiya marã kʼãñabara. 23 Capernaúm pʉwʉrʉdʼe bʼera ʉ̃taa wãĩta krĩcha bʼedʼe Daizezebara pepekuaya beudʼapeadʼata zuburia bʼeabiima. Sodoma pʉwʉrʉdʼe ũdudʼakʼata osibʉrʉ mʉã marã maẽ odʼata osibʉrʉ idʼi basiidʼu bʼeakʼausia. 24 Mawũẽ mʉã marãã jaraya, Daizezeba kʼawua obʉrʉ ewadera Sodoma pʉwʉrʉdʼe bʼeadʼara yarebai zuburia bʼeabiya marã kʼãñabara.
Mʉma zeudua mʉã ẽnaʉ̃bigaya
25 Maʉ̃ ewadera Jesúsbara mawũãsia: Zeze, mʉã bʉra ibia jaraya, bʉra ʉ̃trebema Nokʼoa, drua Nokʼoa, bʉ mawũã Nokʼodʼebema bʉara kʼawuabi ẽbasia ãzhikusa krĩcha banata bʼeara, awuarabʉrʉ kʼawuabisia krĩcha bana ẽãta bʼea. 26 Zeze, bʉma mawũã biga basia.
27 Izhidʼebemata jõma mʉãã kʼawuabisia mʉ Zezebara. Miõba kʼawua ẽã mʉ zhi Warradʼebema, mʉ Zezebʉrʉ kʼawua bʼʉa, miõba kʼawua ẽã mʉ Zezedʼebema, mʉ zhi Warrabʉrʉ kʼawua bʼʉa, mawũẽ mʉ zhi Warraba kʼawuabi krĩñabʉrʉaara kʼawuabiya. 28 Mʉma zeudua kʼãrẽ kʼaudʼa bʼeba mapoea bʼera, mawũãrã mʉã ẽnaʉ̃bigaya. 29 Idu mʉãã zhi edebibʉdata mʉnebemata kʼawaudua, mʉrã sodʼera adu-a ibiadʼe bʼʉa, mawũãrã ẽnaʉ̃naña. 30 Mʉã jara bʼʉra borekea, obʼeya mʉã jara bʼʉra.