Daizezebara parãsi bajãta akʉza drʉata

Daizeze Jeowaba nekʼãrẽ jõmabʉra iya parãna. Iya parãsi nekʼãrẽ daya ũdubʉta akʉza daya ũdu ẽãta. Dayirãba nekʼãrẽ ũdubʉ parãi nãã, parãsi mejãcha angelerata. ¿Kʼaubʉka bʉara kʼairata angelerãra? Daizezebara parãsi maʉ̃ra angelerãra iyi kĩrãkʼa bamarẽã. Maʉ̃ba daya Daizeze ũdu ẽ kĩrãkʼa abarika angelerasida ũduda ẽ. Iya angel nãã parãnaba kʼarebasi nekʼãrẽ wuabemara parãita. Maʉ̃ angelba kʼarebasi naʉ̃ drʉade ewarade nekʼãrẽ ãĩbʉta jõma parãita, bari jaradaita chĩdaurata, bisiata, jedekota akʉza dayirã drʉata.

Maʉ̃ tẽã Jeowabara naʉ̃ drʉara bia onʉmʉsi, mama eda bʉeita nedʉwʉrʉrata akʉza ẽbẽrarãta. Osi bisiata naʉ̃ drʉa ʉ̃rʉ ũna bamarẽã, adewara parãsi katumarata, puzarata, akʉza dorata.

¿Maʉ̃ tẽã kʼãrẽta berabarisi? Jeowaba jarasi: «Mʉ̃a parãñi chiruarata akʉza bakururata». Mawũã netarata ʉ̃tʉ zemarẽã akʉza neponorata, adewara Jeowaba parãsi nedʉwʉrʉra ʉ̃tʉ wãbarirata, doedabemarata akʉza orrajʉ wãbeta. Parãsi nedʉwʉrʉra wikakederata kʉriba kĩrãkʼa akʉza yi zromata elepante kĩrãkʼa. ¿Bʉa saʉ̃ nedʉwʉrʉ zaketa audre kãga?

Aramaʉ̃ta Jeowaba jarasi iya angel nãã parãna: «Parãna yumakẽrãta». Ẽbẽrarãra jipa awuara bʼaibasi nedʉwʉrʉraira. Bari jaradaita, ẽbẽrarãbara nekʼãrẽ yiwidita parãseabasi, bedʼeaseabasi, ipidaseabasi akʉza yiwidʼiseabasi Daizezeʼa. ¿Kʼaubʉka kʼai yumakẽrãta nããra parãnara? Maʉ̃ta akʉdadrʉ.