Moisésbara Jeowa bedʼeata ũrĩsi

Jõma Egipto drʉade badara Jacobdeba zedarãra trʉ̃gasida israelita. Jacob akʉza José beida tẽã, awuru paraonba zokʼa jʉ̃drʉsi. Maʉ̃ nokʼo paraonʼra mejãcha perabasi israelitarãra eaba wãsi baera, maʉ̃ kʼarea iyi nezokʼara babisi. Ãyira mejãcha trajabisida, ladriyota obipanasida. Egipsioraba israelitara bia edada ẽ basimina wuabʉrʉ eaba wãsida. Maʉ̃ kʼarea paraonʼra kĩrʉsi. Israelitara wũãwũãra yumakẽrã zakera to baebʉdadera bea zokʼasi, waya yuwẽrãrãra bea ẽ bʼaita jarasi. Bʉmara, ¿israelitarãra maʉ̃ kʼarea mejãcha perasidaka?

Wẽrã Israeldebema aba yi trʉ̃ Jokébedʼba yumakẽrã zaketa tosi. Iyi wũãwũã beada ẽ marẽã petade bʉesi, Nilo dode chirua kʼawa bʉsi. Míriamʼra maʉ̃ wũãwũã mebẽãbasi, maʉ̃ kʼarea iyara arakʼaita akʉ wãsi kʼãrẽ berabari kʼawuaita.

Paraon kaura wãsi doeda, maʉ̃ne ũdusi petata. Iya maʉ̃ ũdubʉrʉde ewa akʉbʉrʉdera wũãwũãta mejãcha jẽganʉmasi, maʉ̃ba so borekea akʉsi maʉ̃ wũãwũãra. Míriamba widisi: «¿Bʉara kãgabʉka jʉrʉ wãmarẽã ẽbẽra wẽrã bʉbari ju dawa bʼaita?». Paraon kaubara jarasi jʉrʉ wãmarẽã. Aramaʉ̃ta Míʼriambara yi papata jʉrʉ wãsi. Paraon kauba jarasi Jokébedʼa: «Edera wũãwũãra, mʉ̃a bʉaʼa diayi platata, mʉ̃bari akʉmarẽã».

Wũãwũã wariside Jokébedʼbara diasi paraon kauʼa. Maʉ̃ne iya trʉ̃gasi Moisés akʉza iyi wũãwũãra kĩrãkʼa dapʉẽsi. Moisés nokʼo wũãwũã kĩrãkʼa warisi baera, iya kãgabʉta jõma erbaseabasi, mamina Moisésbara Jeowara kĩrãdua ẽ basi. Moisésbara kʼawuabasi iyira israelitata, mawũã Egiptodebema ẽãta, maʉ̃ba Moisésbara jidasi Jeowa bedʼea ũrĩta.

Moisés 40 poaga bidade iyara kʼarebakĩrãbasi israelitarãra. Ewari aba Moisésba ũdusi egipsioba sãwũã israelita ubea eranʉmʉta maʉ̃ kʼarea Moisésba israelita kʼarebabʉrʉta beasi egipsiora. Maʉ̃ne egipsio kakuara ibʉde joʉ̃si. Maʉ̃ berabaridata paraonba ũrĩside, beaita krĩchasi Moisésʼra, maʉ̃ kʼarea Moisésʼra mĩrʉ wẽba wãsi Madián drʉaeda. Mainʉ Jeowaba akʉsi Moisésʼra.